الثلاثاء، أغسطس 21، 2007

يا مرحب يا نظيف باشا 2

يا مرحبتين يا نظيف باشا

تتوالى الأنباء تباعاً بخصوص زيارة نظيف باشا لمحافظة البحيرة وهي زيارة تاريخية حقاً لأننا دايماً منسيين و ما أقدرش أفتكر آخر مرة زارنا فيها رئيس وزراء حتة واحدة

لا و الحلاوة بقه ان معاه جميع محافظين الجمهورية يعني النهارده حيبقى يوم تاريخي والله أعلم حنعرف نروح الشغل في المحمودية و لا مداخل و مخارج و شوارع دمنهور حتتقفل لحد ما الزيارة تخلص

الشوارع اللي حيمر منها اتملت بوابات من بتاعة الفراشة متعلق عليها يفط النفاق و الترحيب الحار بالباشا و صحبه الكرام

واحد علق و قال يعنى لو واحد مات مش حيلاقوا فراشة علشان يعملوه صوان للعزاء يالله اللي يموت يستريح

فضائح الزيارة

واحد

سيقوم الباشا بإفتتاح كوبري كفر الدوار على الطريق الزراعي و الذي به خطأ هندسي فادح و فاضح

يتمثل في أن إرتفاع التقاطع الذي تمر منه السيارات أسفل الكوبري يجب ألا يقل عن خمسة متر و نصف 5.50 م حسب المواصفات و الرسومات و لكن الحادث حالياً أن الإرتفاع أربعة متر 4 م فقط و ذلك بسبب خطأ في التنفيذ و بذلك لن تتمكن اللواري و عربات النقل الثقيل من المرور أسفل الكوبري و ستضطر لدخول كفر الدوار من الدوران

قبل أو بعد الكوبري بما يقرب من عشرة كيلومترات

و كفر الدوار كلها مصانع و حركة اللواري على ودنه آدي واحد

اتنين

الكورنيش الذي سيفتتحه الباشا في دمنهور و طوله اثنين 2 كم وهو جزء من كورنيش دمنهور الذي يبلغ طوله خمسة 5 كم والذي تم بناؤه من أربعة 4 سنين فقط

تكلف الكورنيش الجديد لنظيف باشا و الذي تم عمله على عجل من ثلاثة 3 شهور فقط ستة 6 مليون جنيه بينما تكلفت أعمدة الإنارة و كابلاتها الأرضية لنفس الكورنيش عشرة 10 مليون جنيه لأنها من أغلى نوع و الذي يستخدم في تزيين مداخل المباني المهمة و من السفه وضعه على جانبي الكورنيش بطول اتنين 2 كم

يعني ستاشر 16 مليون جنيه في الكورنيش و بقية البلد بايظة

ثلاثة

بصوا على الخريطة دي توضح مشاكل شبكة المياه في دمنهور عام 2003 قبل التجديد و الإحلال

احنا صلحنا نصفها و فاضل نصفها مش كانت هيه أولى بالفلوس بدل الفشخرة الكدابة

دي خريطة كبيرة نزلوها على الجهاز عندكم و كبروها و اتفرجوا و بعدها اتحسروا

أربعة
نادي القوات المسلحة الجديد على ترعة الخندق الشرقي المارة بدمنهور
بعد ما علقوا يافطة باسم
نادي القوات المسلحة
من اسبوعين نزلوها أول امبارح و حطوا واحدة جديدة
" نادي مبارك "
ما هو كل البلد بتاعته و يمكن نظيف باشا يفتتح النادي ده و يمكن لأ الله أعلم
كل المشاريع اللي حيفتتحها نظيف كان ممكن يفتتحها رئيس مجلس المدينة أو المحافظ بالكتير
الحاجة الوحيدة اللي عليها القيمة فعلاً هي توسعة محطة مياه أبو حمص و زيادة انتاجها ثلاثة أضعاف
وعلى فكرة شركة مياه شرب البحيرة مصنفة أحسن شركة مياه في الجمهورية
و التحاليل المعملية بتؤكد إن مياه الشرب في مدينة دمنهور هي أنظف مياه في مصر كلها و الحمد لله
اما القرية النموذجية اللي حيزورها في كفر الدوار فجنبها قرى ياما حالتها بالبلا
و في داخل مدينة كفر الدوار كوبري ما خلصش من ثلاثة و ثلاثين 33 سنة و المستشفي الشامل فيها ما خلصش من ثلاثين 30 سنة
حتى عقود شقق اسكان مبارك اللي حيوزعها في كفر الدوار طبقاً للبرنامج الإنتخابي للسيد الرئيس
شقق مساحتها اتنين و خمسين 52متر مسطح مكونة من أوضتين و صالة و مطبخ و حمام صغيرين جداً
و الناس دافعة تمنها بالتقسيط المريع و ليس المريح على ثلاثين 30 سنة تحسبها تلاقي الشقة واقفة بـستة و تسعين 96 ألف جنيه يا بلاش و لما العمارة تقع بعد عمر طويل ما لكش حق في الأرض لأنك ماضي عقد حق إنتفاع و ليس تمليك
مما إستفز زكريا الجنايني عضو مجلس الشعب عن كفر الدوار من كتلة الإخوان المسلمين في تصريحاته لجريدة الدستور
هو و الدكتور محمد جمال حشمت الممثل الشرعي لأهل دمنهور و الذي تم التزوير ضده في الإنتخابات السابقة لصالح الدكتور مصطفى الفقي
حيث قال الإثنين بالفم المليان لا مرحباً بك يا نظيف
جاي رئيس الوزاراء بجلالة قدره هو و المحافظين علشان يفتتحوا موقف الميكروباص و سوق الخضار
وكم ذا بمصر من المضحكات و لكنه ضحك كالبكاء
حأستلف موبايل واحد صاحبي بكاميرا و أصور لكم البلد و تشوفوا الفرق بين شوارع حيمر فيها الباشا و شوارع عايش فيها الشعب
يا ولاد الشعب
انتظروا الصور قريباً مع تغطية لما سيحدث في البلد أثناء الزيارة

هناك 7 تعليقات:

أنونيمس يقول...

والله يا بشمهندس
انت راجل طيب امال ايه
البيه النظيف دلوقتي في وضع حرج
عايز يعمل أي منظر ولو كان بسوق خضار وموقف ميكروباصات
البيه خايف لحسن ياخد الصابونة
ويتكل في التعديل الجاي
مش عارف خايف من الصابونه ليه مع انه المفروض نظيف
:)

ومستني الصور
سلام يا بشمهندس

مهندس مصري يقول...

يا مرحب بيك عندي يا دكتور أنونيمس
نورتني و الله
بس نظيف باشا إتأكد خلاص انه باقي في مطرحه بل و بيعمل مشاورات تشكيل الحكومة الجديدة حالياً
دا كان فيه كلام من اسبوعين ان الزيارة ممكن تتلغي علشان كلام التغيير الوزاري الكتير اللي كان في البلد
لكن لما إتأكد من بقائه في منصبه شرفنا و قرفنا بالزيارة

عصفور المدينة يقول...

:)
طبعا ياهندسة هذا لإظهار جوانب مشرفة للخدمات بعد أن علم الجميع بانفساخ العقد الاجتماعي الذي يكون بيننا وبين الحكومة للقيام بالخدمات العامة

ولكن لاحظ أنه ربما أنت لن تشعر بتلك الزيارة يوم حدوثها وهذا ما حصل في الغربية في شهر إبريل
في يوم الزيارة نفسه لم نشعر بأي شيءبينما تربيت على رؤية السادات يمر من حينا للذهب إلى محافظة المنوفية وكان الرصف دائم التغيير

وأهديك هذه الهدية عشان تفرفش شوية
http://ctybrd.blogspot.com/2007/04/blog-post_11.html

جمعاوى روش طحن يقول...

يا باشمهندس

قدرا كنت إمبارح فى دمنهور

و و انا جاى على الطيق السيع

لافتات تأييد إيه
و شوادر إيه

و أسفلت جديد

و الرصيف إتلون

و الأمن العام ماسك البلد بقاله 5 أيام

و بلاوى

و كنت ناوى أنزل أبو المطامير بالمرة

مارلاضيتش بصراحة علشان اللجان اللى ح تبقىلا على الطرق
و كلام من ده

و لى عودة

نانو يقول...

يا باشمهندس ده الطبيعى يعنى عايز نظيف باشا ينزل من غير ترحيب ولا يافطات ولا اسفلت ولا تجميل ولا أى منظر ده لو حصل تبقى انت اكيد مش فى مصر
ومستنية التغطية بالصور

مهندس مصري يقول...

هيثم باشا
من خرج من داره إتقل مقداره
خليك في كفر الدوار و بلاش تيجي دمنهور غير للكلية بس
و بعت لك السلام مع واحد جاري حبيبك

مهندس مصري يقول...

اتمنى تكون الصور عجبتك يا نانو
و توصلي لقمة السلم بس ما تبقيش تنسينا