الخميس، أغسطس 23، 2007

يا مرحب يا نظيف باشا 4

الحلقة الأخيرة علشان طولنا عليكوا قوي

الباشا لم يفتتح نادي القوات المسلحة و لا مبنى التحكم الإقليمي في كهرباء غرب الدلتا و ذلك لعدم انتهاء أعمال الرصف الجديد أمامهم و هوا ما يصحش يمشي بعربيته المرسيدس السوداء المصفحة 200 متر بحالهم على أسفلت قديم

و لم يفتتح مجمع المواقف اللي إتكلف 25 مليون جنيه علشان موضوع الكوبري اللي ظهر فجأة بعد الشكاوي و القضايا التي قامت برفعها شركات التأمين على سيارات الميكروباص الجديدة التي ستعمل بالموقف و أكدت فيها أن الموقف بوضعه الحالي سيتسبب في حوادث كثيرة مما سيتسبب بخسائر لها كونها ملتزمة بالتأمين على السيارات ضد الحوادث

و تناول السادة الضيوف طعام الغداء في قاعة وجيه أباظة بالنادي الإجتماعي (نادي ألعاب دمنهور ) و الذي تم إحضاره لهم من قرية الحجناية القريبة من دمنهور

حيث قام الحاج محمود الأعصر عمدة القرية و عضو الحزب الوطني و عضو مجلس الشوري بالتزوير

قام بإحضار 15 طباخ من قبلها بليلة تفننوا في طبخ لحوم الغزلان و النعام بصفة خاصة مع بعض اللحوم العادية الأخرى

ربنا يخلي لنا الفول و الطعمية

و أنصحكم بقراءة قصيدة أحمد فؤاد نجم الفول و اللحمة

و المثل بيقول إطعم الفم تستحي العين

فقام بعدها الباشوات بزيارة قريته و إعطاؤها لقب القرية المثالية قبل أن يغادروا المحافظة

اللهم صبرنا يارب

هناك 8 تعليقات:

عصفور المدينة يقول...

أعمل إيه يابشمهندس كنت قعدت أعلق على الصور وتعبت
وجزاك الله خيرا على المجهود التاريخي ده عارف الصور بتاعتك دي حتنفع في تقارير من نوع
before and after
وبعدين خلي بالك
after
حيبقى بيفور بعد كدة لما الحاجات دي تزول ويأتي عليها الزمان وتعدم الصيانة ,ايضا الشوارع الداخلية المكسرة والوضع في بطانة الصور الظاهرة
مهازل هم يعلمونها ولكنهم لا يسألون عن أشياء إن تبد لهم تسؤهم ويرضون بالظاهر الجميل المرقع الذي هو على شفا جرف هار يوشك أن ينهار

عصفور المدينة يقول...
أزال أحد مشرفي المدونة هذا التعليق.
مهندس مصري يقول...
أزال المؤلف هذا التعليق.
Marvel - واحد زهقان يقول...

مجهود رائع يا باشمهندس...والصور بتتكلم لوحدها عن النفاق اللي بيجري في البلد مجرى النيل

احييك :)

سجدة يقول...

والله ما فى جديد كله كده
وكل حاجة يتم تجميله علشان الباشا معدى
وبعد كده إلى الدمار والهالك
انا مش عارفة احنا هنوصل لأيه اكتر من كده لما اصبح المواطن مالوش اى لازمة والكل يعمل علشان الحكومة تنبسط وتتغنى اكتر

نانو يقول...

المهم لحم الغزال ده مأكلتش منه حته مش كانوا يوزعوه على البلد كل واحد حتة من الغزالة وربنا ميطلع غزالتهم علينا يارب
صور جميلة فعلا انا قريت الموضوع بتاعك من يومين بس معرفتش أعلق فى وقتها النت كان عاملها معايا
بس الباشا نظيف مش كان ينظف ما خفى من البلد أفضل من صرف فلوسنا على بطنهم منهم لله وحسبى الله ونعم الوكيل

أبو العلا يقول...

الله ينور يا باشمهندس والله مجهود رائع وتوثيق كامل..... أنا للأسف كنت بره مصر لأسباب متعلقة بالعمل في الفترة الميمونة دي والمرحلة المهمة من تاريخ دمنهور (ديم إن حور) يعني مدينة الإله حور الخالدة عشان أحظى ببعض الشرف في استقبال الباشا وهو يمكن ينوبنا منه شوية بركة أو يغير رأيه ويوصلنا سن الرشد ويبطل يقول عنا شعب قاصر بعد ما نبوس أيديه لكن بصراحة وصفك التفصيلي خلاني كأني شفت الخيبة بعنية... عموما مش ده المهم..... المهم أنا حضيف لمعلوماتك أن أرض الموقف الجديد اللي كنا بنتحاكي في جماله والتي تبلغ عشر فدادين اشترتهم المحافظة من حوالي 4 أو 5 سنين من واحد أسمه أحمد خيري محمد محمود عبد الواحد صاحب شركة أراب إكسبريس للنقل البحري وأمين عام الحزب الوطني في اسكندرية سابقا ووالد خالد خيري عضو مجلس الشعب عن دائرة العطارين....... مش عيب لكن العيب بقه أن الأرض دي أصلا مش بتاعته الأرض دي بتاعة المرحومة فايقة الحبشي عمة أمه عزيزة الله يرحمها اللي كانت عاملاله توكيل وباعهم لنفسه مع كمان حوالي 40 فدان ورماها بعد كدة في دار للمسنين إلى أن وافتها المنية وبعدين قال أخلص منهم وابيعهم للمحافظة....... لكن ربنا يقدرنا ونقدر نلحقهم قبل ما يبقوا موقف....
وبابا بيسلم عليك.
محامي مصري قرفان برضه بس مش قوي

غير معرف يقول...

ربنا يكرمك يا رب و تبقي مهندس مشهور زي ايمن نور كده و تتظبط وتاخد علق كده و نسمع عنك في الجرايد زي ايمن نور و الناس دي يا ريت يكون في نت في السجون علشان الناس تقضي وقت حلو مع الملاهي اللي شغاله 24 ساعه و بلاش من غير فلوس او تذاكر و يجعله عامر