السبت، أغسطس 11، 2007

أنا مين

السلام عليكم
أنا لسه جديد في موضوع المدونات ده و مبعتبرش نفسي مدون
لأن أنا مهندس صغير و الشغل مطحنة و ما أدراكم ما شغل المدني شغال في الفاعل مع العمال و الصنايعية في الشمس و الحر
دا غير إني مهندس حكومة يعني شغال بملاليم و بأمضي على شغل بملايين و أي حاجة غلط أنا اللي حأشيل مسئوليتها بأعتباري مهندس الإشراف الخاص بالمالك (الحكومة) و أنا اللي بأستلم من المقاول و من مهندس المقاول
و لكن حأجرب أتكلم شوية عن اللي حاسس بيه من ناحية البلد و اللي بيحصل فيها و مفيش مانع أتكلم عن نفسي و محافظتي و مدينتي و شغلي
أنا متابع دايماً لمدونة نوارة نجم "جبهة التهييس الشعبية" ومدونة عبد المنعم محمود"أنا إخوان" و ما أحلمش أكون زيهم و يارب أحصل ربعهم
أنا بأحب الإخوان و لو إن أنا مش إخوان و ليا بعض الإختلاف مع بعض أفكارهم لكن بأحبهم و ليا أصحاب و جيران إخوان
و بأحب أيمن نور بل و انضميت لحزب الغد من شهر 4/2005 لحد شهر 12/2005 لما أيمن نور خد حكم في القضية المتلفقة و إتحبس وبعدها ما دخلتش الحزب و لا خطيته برجلي رغم اني ما قدمتش استقالتي رسميا من الحزب لغاية النهاردة لكن زهقت من الصراعات على مناصب تافهة بين الناس و بعضها جوه الحزب بينما أيمن محبوس و العملية مش ناقصة و بصراحة بعد حبس أيمن نور يئست من العمل السياسي الحزبي و آمنت إن مفيش فايدة من الأحزاب
أنا قارئ دائم لجريدة الدستور المصرية سواء يومي أو إسبوعي وبأحب إبراهيم عيسي و بلال فضل ومعظم اللي بيكتبوا في الدستور
و بأعتبر الدستور هوا الجرنان اللي فتح عنيين المصريين على حاجات ياما كانت غايبة عنهم
مش عارف أقول ايه تاني أرجو إني ما أكونش بايخ و لا رذل
سلام وعرفوني رأيكم

هناك 14 تعليقًا:

ahmed يقول...

متنساش يا هندسه تتكلم شوية عن كيمونكس ...........سلام

نانو يقول...

أهلا بيك فى عالم المدونين العرب والف مبروك صدور مدونتك وربنا يوفقك أن شاء الله

مهندس مصري يقول...

كيمونكس المكتب الإستشاري اللي كنت شغال فيه قبل الحكومة ليه معايا حلقات بس مش وقتها دلوقت يا أحمد
و شكرا يا نانو مستني تعليقاتك و نصايحك

battabakr يقول...

اهلا ومرحبا بيك في عالم التدوين
مش عاوزينك تيئس من السياسة
هو في ورانا غيرها
منتظرين منك المزيد

مهندس مصري يقول...

انا ما يئستش من السياسة
انا يئست من العمل السياسي الحزبي
حيث ان الأحزاب المصرية محاصرة بتشكيلة من القوانين التي تكبلها و تمنعها من الخروج من مقراتها و العمل الشعبي
وعندما تجاوز حزب الغد و أيمن نور هذا الخط الأحمر و نزل الشارع و جاب المحافظات في طول مصر و عرضها و لم يكتفي بالجلوس في مكتبه في القاهرة
و ها نحن جميعا نرى ما يتعرض له من قهر في السجن و اذلال و منع للعلاج و رفض للإفراج الطبي رغم انطباق شروطه عليه علشان يموت موتة ربنا و يريحهم من القتل المباشر ليه
حسبنا الله و نعم الوكيل فيهم

دعوة الفردوس يقول...

جميل جدا ان تتعرف على الشخص من خلال مايكتب
وان نت لا ارى ان ماكتبته كافيا لنعرفك
ولن نعرفك الا بقراءة المزيد والمزيد من تدويناتك
ومهم جدا ان تتنوع مابين الديني والسياسي والانساني
عندها ربما نعرف بعضا عنك
فليس من السهل ان تتعرف الى شخصية ما بكل جوانبها
ولكن سعدنا بك اخانا في عالم التدوين
واسال الله ان يجعل كلماتك في ميزان حسناتك

مهندس مصري يقول...

دعوة الفردوس
------------
أشكرك و أسأل الله على أن يعيننا على قول كلمة الحق دائماً و ألا نخشى سواه
فأفضل الجهاد كلمة حق عند سلطان جائر

Eng.Omar يقول...

طيب أيه ألى جابرك تشتغل عند الحكومه سيبها وروح أشتغل فى طلعت مصطفى أو أى شركه محترمه واكيد انت كفائتك مش قليله لان سنك مش صغير
انا أعرف مهندسين فى سنك من مساحه ومدنى أشتغلوا هناك فى طلعت مصطفى ومرتباتهم كويسه جدا أتمنى تفكر فى كلامى

وثانيا مدونك جميله وتفكيرك قريب جدا منى رغم اننا مش من سن بعض ولا حاجه لكن انا مفكرتش أعمل مدونه سياسه زى الباقين انا قلت أكسر القاعده ومفيش كلام فى السياسه خالص لانى قرفان منها جدا جدا جدا
وسلامى ليك يا بشهمندس ويارب أتخرج انا كمان ابقى مهندس بجد

مهندس مصري يقول...

ياه يا عمر
انت بتعلق على اول تدوينة ليا
انت جاي متأخر قوي
أنا سبت الحكومة و مسافر السعودية بكرة
:)
أما الشركات الكبيرة دي فبتبقى محتاجة واسطة أو معرفة جامدة جوة الشركة
و ساعات بتشتغل بدون واسطة لو فيه احتياج سريع لمهندسين في مشروع معين

مهندس مصري يقول...

آه صحيح
شكراً على كل الكلام الجميل المكتوب في ثانياً
:)
و ان شاء الله تتخرج و تبقى مهندس ناجح

حزينه يقول...

السلام عليكم


انا مبسوطه اوى انى شفت المدونه بتاعتك لانى من دمنهور وكان نفسى الاقى حد فكرة زى فكرك لانى كان نفسى كتير اتكلم عن دمنهور بس اكيد من كل المدونين يهمهم دمنهور او يعرفوها زى اللى منها بجد




بجد مدونتك جميلهوانا سعيدة ان فى مدونه حلوة كدة


وبجد حابه كتير انى اشرك فيها واتكلم فيها معاك عن دمنهور...


بس حبدا اتكلم معاك عن دمنهور وعن مدونتك الجميله

بس بعد ما امتحاناتى تخلص ادعيلى انجح

معلش طولت عليك بس بجد مدونتك تحفه



اختك
sad

مهندس مصري يقول...

حزينة
======
انا مش عارف إزاي ما شفتش تعليقك ده قبل كده
كنت مشغول ساعتها في أول ايامي في السعودية
شكراً على كل الكلام الحلو اللي قولتيه في حق المدونة ده يا ستي
و ربنا ينجحك دايماً و لو إنها متأخرة
و انا رايح مدونتك فوراً

ايوشة يقول...

ربنا يعينك على الشغل والغربة
وحل انك مقتنع بالاخوان مش اقتناع تمام ولا انك رافضهم تماما كل حزب ولا اى اتجاه فيه الصح وفيه الغلط
اما ايمن نور مش عارفة من غير ما اعرف عنه حاجات كتير انا مش بحبه بصراحة

مهندس مصري يقول...

ايوشة
=======
ياه
دا البوست ده ذكريات بعيدة
بالنسبة لأيمن نور هو مش شرط اكون متفق معاه تماماً
بس هو إنسان شريف
هو مش خاين و لا عميل و لا فاسد و لا مزور و لا حرامي و لا أي حاجة من دول
و صعب انك تلاقي سياسي شريف في البلد دي
:)
لو عرفتي عنه المعرفة المضبوطة مش شرط تحبيه لكن أكيد حتقدريه
خصوصاً انه تعرض لحملة تشويه حكومية واسعة

شكلك كده حتقري المدونة بوست بوست بجد
كده يبقى انا منتظر تقييمك ليها و رأيك الصادق فيها
و يسعدني زيارتك لمدونتي بجد
:)

يعني ايه ده ؟

وحل انك مقتنع بالاخوان

وحل ايه ؟
ممكن التصحيح علشان مش فاهم الكلمة بالضبط
:)

و يسمع منك ربنا بالنسبة لدعواتك
:)