السبت، مارس 08، 2008

ماذا تعرف عن قانون الطوارئ اللي حاكمنا

رغبة مني في انهاء النقاش الدائر في البوست اللي فات و علشان الناس تفهم يعني ايه اعتقال
أعيد نشر البوست القديم ده
بالصدفة و أنا على موقع قناة الجزيرة عثرت على الرابط ده

و منشور فيه النص الكامل لقانون الطوارئ اللي حاكمنا ومن هذه الصفحة نفدت على الرابط ده

و المفاجأة أن الطوارئ في مصر مش من 1981 بعد إغتيال الرئيس السادات زي ما معظم الناس متخيلة
لا دي الطوارئ تم تطبيقها لأول مرة في مصر 1914 على يد الانجليز أثناء الحرب العالمية الأولى
و ظلت مطبقة حتى الأن مع الغاء حالة الطوارئ لمدد بسيطة و استثنائية
وحالة الطوارئ الحالية مطبقة منذ نكسة 1967 حتي الأن ولم ترفع سوى بضعة شهور لم تزيد عن ثمانية عشر شهرا - من مايو 1980 حتى اكتوبر 1981
شفتوا الوكسة الناس نست معنى الحرية من كتر ما عاشت في الطوارئ
و لسه قانون مكافحة الإرهاب اللي عمالين يضبطوه و يستفوه علشان كل مواد الطوارئ و مواد تانية ألعن منها تتحط فيه
و يبقى قانون دائم مش استثنائي زي الطوارئ و مش محتاج تجديد و تمديد مدة كل شوية من مجلس الشعب
و اللي يعيش ياما يشوف في مجلس الأغلبية (موافقون ......موافقة) والله يرحمنا برحمته
عرفونا رأيكم دام فضلكم

هناك 41 تعليقًا:

sokoothansawat يقول...

فكرتني بالمضحكات المبكيات في مصرنا الحبيبة

زعلانين قوي على قانون الطوارئ...دي البلد مليانة بلاوي بس محدش بيقرا

فكرت حضرتك تبص على الموقع الرسمي لمجلس الشورى في مصر؟؟

هتلاقي من اهم اهداف مجلس الشورى الحفاظ على مبادئ الثورة....وتدعيم الإشتراكية..طب إذا كانت الإشتراكية اتلغت من الدستور رسميا..يبقى مجلس الشورى ده ما تحلش ليه لحد دلوقتي..؟؟

عادي...ايه في بلدنا ما يفورش الدم يا باشمهندس...

سيبك من حكاية منطقة المسائل دي..وسمعني سلام...كماننا

نانو يقول...

ما احنا طول عمرنا فى طوارئ وحنفضل فى طوارئ متهيألى لو لغوا قانون الطوارئ حنستغرب البلد حنحس انها مش بلدنا وبعدين فعلا ربنا يستر لما يخلصوا قانون الأرهاب اللى عمالين ينقحوا فيه ويبتكروا عقوبات وصلاحيات لهم فى أختراق خصوصيات الشعب الغلبان اللى اصلا معندوش خصوصيات أتحرم منها من زمااااان ربنا يستر علينا

عاشقه الفردوس يقول...

الله اكبر هتثقفنا ياباشمهندس

ماشاء الله
والله خايفه افتح الموقع علشان هيتحرق دمي


اقولك خلاص هروح افتحه وربنا يستر

فرنسا هانم يقول...

من سىء الى اسوء
يا قلبى لاتحزن
شوف يا هندسه
المطبخ بتاع القوانين بيشتغل بروقاااان قوى قوى
وبيعرف يخلى طبيخه ميخرش الملح
تحياتى لك

النجم القادم يقول...

ايه ياهندسة انته ناوى تروح على برج العرب ولا ايه
هههههههههههههههههههه
ربنا يجازيك كل خير
واحنا فى طوارى طوال 24 ساعة خدمة متواصلة
وهذا القانون كما اعرف انه لغى فى الدول التى اخترعته ولكنه مازال يطبق عندنا حقا هو ده التقليد الاعمى

بت خيخة وأى كلام يقول...

مش حاسسة بقانون الطوارئ لانى لم اتعرض له من قبل
بس ساعات اسمع حكايات عن ناس اتبهدلوا من بعض افراد الشرطة
وكل ده كان تحت مسمى قانون الطوارئ
انا لسة مافتحتش الموقع اللى انت حطه عندك فى البوست
لانى متوقعة ان يا اما مش هافهم حاجة يا اما دمى هيتحرق
علشان كدة مش هافتحه دلوقتى
هافتحه كمان شوية
تحياتى ليك يا محمد
سلام
اختك خيخة

مستــ ج ــــدة يقول...

أصل دى خلاص بقت حجتهم ف كل حاجه
كل بلوة يعملوها تبقى تحت مسمى قانون الطوارىء...تقدر تقول انها شمسيه او حاجة زى كده
والناس هتعمل ايه يعنى...مهو الكل ف الهم سواء
والكل ف ظل الطوارىء مطلوبيييين

مستــ ج ــــدة يقول...

على فكرة يابشمهندس
اللينك مبيفتحش...تقريبا اتغير
بيقول الملف غير موجود او لم يعد له وجود
... ممكن يكونوا شالوه طوارىء برضو

أحمد سعيد بسيوني يقول...

بسم الله
معذرة على التحليق خارج السرب
ولكن
ثورة طنطا في صور - جديد مدونة البحر
مع خالص تحياتي

مهندس مصري يقول...

سكوت حنصوت
===========
طيب أدينا بنتعرف سوا على البلاوي دي مع بعض يمكن حد فينا يغيرها أو يقرأ كلامنا بعد كده حد يقدر يغيرها في يوم من الايام

نانو
======
ربنا يستر

عاشقة الفردوس
==============
افتحيه يعني حيحصل لنا ايه أكتر من اللي حاصل لنا

هي طوارئ و لا أكتر

فرنسا هانم
===========
يعني قريت اللنكات و لا لأ يا فرنسا شكلك علقتي من غير ما تقري
لأ مش عايزين كروتة في التعليق
:)

النجم القادم
=============
ليه هو قراءة القانون حرمت و لا ايه ؟
لو كان كده يبقى يقفلوا كلية حقوق بقى

بت خيخة و أي كلام
=================
لا يا ستي الموضوع سهل و مفهوم
و مستني تعليقك بعد قراءة نص القانون و تاريخه
لأنه أكيد حيكون تعليق ثري
ثم ما علقتيش على البوست اللي فات ليه ؟
عايزة تمسكي العصاية من النص ؟

مستجدة
======
هي فعلاً حجة
بس اللينكين شغالين
و عموماً اللينك التاني مكتوب فيه برضه نص القانون اللي في اللينك الأولاني
يعني أعم و أشمل

احمد سعيد بسيوني
================
شكراً لمرورك

آفاق الحرية يقول...

قانون الطواريء
والله جيت علي الجرح ياباشمهندس
بس قانون ايه اللي يتيح اعتقال الالاف وتعذيبهم
قانون ايه اللي يتيح مداهمة البيوت في الفجر

محمود المصرى يقول...

بسم الله الرحمن الرحيم

هو ميزة التدوينة دى انها تعرفنا كلنا ان اى واحد يحصله اى حاجة فى اى وقت يعرف انه ماتظلمش ولا حاجة , وكله بالقانون على حد قول أحد الهالكين .
لكن انا كان محيرنى شىء واحد وهو ان ماينفعش ينفذ اى تظلم الا بموافقة رئيس الجمهورية , ولا سيف الدولة الحمدانى يا جدعان اللى قال فيه المتنبى:
ياأعدل الناس الا في معاملتي
فيك الخصام وأنت الخصم والحكم

أنونيمس يقول...

عاوز رأينا ف أيه يا هندسه ؟؟؟

ملعون ابو الطوارئ ع على اللي عملوا القانون ع اللي بيطلبوا يمدوه ع اللي يبوفقوا يمدوه ع الناس اللي مش داريانين بالهوا

عاجبك كده؟؟؟

ابن حـجـر الـعـسـقـلانـى يقول...

معلش .. أنا جيت متأخر

بخصوص الموضوع اللى فات عايز أقول لك بيت شعر كنت مألفه شبيه لبيت شعر للمتنبى .. البيت دة بيقول

الصمت أبلغ أحيانا من الكلم ... يوفى جوابا أقطع من اللاءات و النعم

أنا كنت هابعت لك ميل يوم الخميس اللى فات .. و والله ما كنت أعرف إنك جاى البورصة .. و كنت عايز أقول لك كدة هناك بس ماعرفتش .. و من ساعتها ما فضيتش

أنا باقول انت تعلن حالة الطوارئ فى مدونتك و تعتقل كل واحد يدخل المدونة عندك و تنزل فيه ضرب لحد ما يبان له صاحب .. و قانون الطوارئ بتاعنا هاتلاقى فيه مواد تنفع للمدونات

و فى الآخر .. تحياتى لك

مهندس مصري يقول...

آفاق الحرية
==========
هو انت ما قريتش اللنكات و لا ايه ؟
القانون بيسمح بالإعتقال و المداهمة و بلاوي تانية كتير
بس للأمانة هو ما جابش سيرة التعذيب
بس ده شئ لزوم الشئ
:)

محمود المصري
===========
لا و ناويين يخلوه قانون دائم بإسم مكافحة الإرهاب
حسبنا الله و نعم الوكيل

أنونيمس
========
أحلى كلام يا دكترة :)

ابن حجر العسقلاني
=================
لا يا ابو العساقيل
احنا بنقول التدوين ادب مش هز إكتاف
:)
و ياريت تضيفني على الماسنجر عندك علشان نفسي أتكلم و ارغي معاك و ما عرفتش على البورصة
:)

النجم القادم يقول...

السلام عليكم

هندسة

يلا شارك معانا فى حملة لا لتزوير المحليات فى حملة مدونون ضد التزوير

http://www2.0zz0.com/2008/03/10/01/184609152.jpg

عبدالرحمن فارس يقول...

لا ولسه قانون الارهاب ألعن واضل

ووقتها هنقول الله يرحمك يا طوارئ

ألا لعنة الله على الظالمين والحكومه المصريه ووزارة الداخليه

وربنا يستر

fatima يقول...

مهندس يا مصرى
أنت عارف كل دا و ماشى غصبن عننا مضطرين
مكرهين عليه
أنا اللى مجننى بقى
لما بنيجى نشغل دماغنا بنطلعها متخرش المية أهو ...
إشمعنى الدماغ دى مبنشغلهاش الا فى البلاوى و تكتيف الحريات
ليه العقول دى بتتقد كدا فى الأذية و مبنشوفش الحاجات دى فى اللى ينفع الناس
طلب إعملولنا كام حاجة كدا تريح الناس شوية و لو من باب كسر العين
مشيها كس عين بلاش نقول حق المواطن
هه
راضيين
يعنى يا مهندس جيت على قانون الطوارىء و هو بس اللى مستغربله؟؟
تحياتى

دكتور بيطرى يقول...

أنا شيفك زعلان قوى ياباشمهندس من قنون الإرهاب !! هو ده بس اللى مزعلك !!
أنا اللى مزعلنى حقيقى وبأدعوا الله أن يديم الإستقرار لبلدى الحبيب مصر أن لاتقوم إنتفاضة ثانية بسبب الجوع مثل اللى سماها السادات بإنتفاضة الحرامية سنة 79 لأن الطبقة المثقفة فى مصر لا تمثل أكثر من 10 % ودول مافيش خوف عليهم لأن ردة فعلهم معروفة ويمكن التفاهم معهم ولكن الخوف من الباقية الباقية من الجهلاء وهذه إنتفاضتهم ستكون غوغائية ظالمة ستدمر الأخضر واليابس وسيكون صعب السيطرة عليها فى غياب الطبقة المثقفة المغيبة إما بالأعتقالات تارة أو بالإرهاب تارة أو بالتشويش عليها تارة أخرى وفى هذا الوقت لا ينفع مع هذه الغوغائية الظالمة قانون إرهاب ولا غيره فنسأل الله العافية.

بت خيخة وأى كلام يقول...

ازيك يا محمد
اولا انا ماكنتش قريت التدوينة اللى فاتت وده نوع من التقصير فى زياراتك
فاماكنتش اعرف ان حصل نقاش حاد بينك وبين قطة الصحراء
ولما قريت البوست اللى فات
خلانى ارجع للبوست اللى قبليه كمان علشان اشوف تعليق قطة الصحراء وردك عليها
وقريت بالمرة ردك على كلامى انا كنت اقصد انى هاكتب كلام اهبل اوى
بس حرف اللام بتاع اهبل وقع منى
المهم
بالنسبة لردك عليا على التعليق اللى انا كتبته على البوست ده
انا لسة ماقريتش برضه قانون الطوارئ
وبالنسبة انك بتقولى انتى معلقتيش على البوست اللى فات وعايزة تمسكى العصاية من النص
هاقولك اه انا ماكنتش قريت البوست اللى فات
لكن مش فاهمة يعنى ايه عايزة امسك العصاية من النص
عصاية ايه
قصدك يعنى انى امتنعت بارادتى عن التعليق علشان مخسرش حد منكم انتوا الاتنين انت او قطة الصحراء يعنى؟
لا والله انا ماعللقتش لانى ماكنتش قريت من اساسه البوست
وزى ماقلتلك ده ناتج عن تقصير منى فى زيارة مدونتك
لكن لما قريت التعليقات على البوست اللى قبل اللى فات وقريت البوست اللى فات
فهمت ان حصل نقاش بينك وبين قطة

بس مش عارفة برضه اقول رايى فى ايه

يعنى مثلا اقول اه كلام قطة صح
وكلامك انت غلط
او العكس
انا شايفة ان كل واحد بيكون له وجهة نظر مقتنع بيها صعب انه يغيرها بسرعة

قطة الصحراء واضح ان عضو دايرتها اداها مثل سئ للاخوان كلهم
وده ساعات بيحصل معانا
ان ممكن مثلا تلاقى مدرس جشع فتقول على ان المدرسين كلهم جشعين
يعنى غصب عننا احنا بنعمم
وبيقولك السيئة تعم والحسنة تخص
يعنى لو واحد وحش هيقول ده عيلته كلها وحشة
ولو واحد كويس هيقولوا فلان كويس
كون ان قطة اتنرفزت وكلمتك باسلوب عصبى شويتين
ممكن تعديها لانها ممكن تكون متنرفزة جدا من موقف عضو دايرتها وكانت بتتكلم عن غيظ شديد منهم سببه مواقف عضو دايرتها

نيجى لوجهة نظرك انت
لما بتقول انا بحب الاخوان ولكنى مش منهم

ده حقك
ومش معنى انك بتدافع عنهم او بيصعبوا عليك او انك تشيد بيهم انك تكون منهم
طب انا مش عضوة فى اى حزب
ومع ذلك انا بحب الاخوان
ومش شايفاها حاجة وحشة انى احبهم

وحبى للاخوان ليه اسباب عائلية كتيير
يمكن علشان بعض افراد عائلتى كانوا من الاخوان
بتوع زمان اوى
اللى هما الاخوان اللى على حق
وواحد من افراد عائلتى قضى عمره فى المعتقل ايام السادات وايام عبد الناصر سنين طويلة
والراجل ده انا بحترمه جدا
ونفسى جدا اقعد اتكلم معاه واعرف رايه فى اللى بيحصل دلوقتى واعرف ذكرياته ايام زمان وايام المعتقل
لكن للاسف مافيش فرصة اقدر اتكلم معاه فيها نظرا لحالته الصحية السيئة
وعلشان كدة دايما بسمع من ماما حكاوى عنه
لكن ماحصلش انى اسمع منه هو شخصيا


المهم يعنى علشان ماطولش عليك
بص يا محمد انا للاسف ثقافتى السياسية صفر على الشمال
لما قريت تعليقاتك انت وقطة الصحراء
حاجات كتير انتوا بتتكلموا عنها انا مش فاهماها
وعمرى بصراحة ماحاولت افهمها لانها لا تهمنى فى شئ
بعترف انى جاهلة سياسيا ولا اعرف شئ عن اى احزاب سياسية
ولا اعرف اهداف اى حزب
علشان كدة انا ساعات بقرا بوست ومعرفش اعلق اقول ايه
لانى بكون جاهلة بالموضوع المكتوب
او لان الموضوع لا يمس جوايا اى شئ
علشان كدة معرفش اعلق
يعنى من الاخر كدة
كلامك انت وقطة الصحراء بالنسبالى لوغرتمات
انا مش قادرة افك طلاسمها

بس يعنى انا معاك فى حاجة انت قلتها
ان احنا غلط اوى ان احنا نخسر بعض
علشان اختلاف فى الرأى

انا معاك فى النقطة دى
المفروض ان كل واحد بيعرض وجهة نظره بطريقة محترمة
ولو غيه اختلاف فى وجهات النظر نفتكر دايما ان علينا نحترم وجهة النظر الاخرى
حتى ولو ماقتنعناش بيها

بس خلاص لانى رغيت كتير اوى
سلام
اختك خيخة

ا بـن عــمــر يقول...

اذيك ياباشمهندس
الظاهر كده ان احنا هنكون فى طوارىء علطول
ربنا يرحمنا برحمته

مهندس مصري يقول...

النجم القادم
==============
و عليكم السلام
ان شاء الله أشارك

عبد الرحمن فارس
================
ربنا يستر و لو انه مش باين أي خير في القانون الجاي ده

فاطمة
======
أنا مش مستغربه
أنا كارهه
أما العبقريات الشريرة دي فبتقبض حق عبقريتها دي من لحمنا الحي
و ما يهمهمش مصلحة الغلابة

دكتور بيطري
=============
هما معتقدين انهم بالقوانين الظالمة دي حيحكموا السيطرة على الشعب
بس الخوف فعلاً من ثورة الجياع

يارب حالنا ينصلح من غير ما البلد دي تتدمر بالكامل

بت خيخة و اي كلام
=================
انا الحمد لله تمام

و انتي عمالة تأكدي انك خيخة و انا أقول لك لأ يا نوران ما تقوليش كده
:)
هههههههههههه

بقى يا شيخة حس الخناقة سمعوه في امريكا في الناحية التانية من المحيط و انتي و لا هنا

و ما بتقريش التدوينات كويس و شكلك بقالك فترة بتعلقى على عنوان التدوينة بس و بتخميني
:)
هههههههههههههههههه ماشي مقبولة منك يا أم شريف

بعد كده حأمتحنك في كل تدوينة علشان اتأكد من قرايتك ليها
:)

مافهمتنيش يا ام شريف برضه
مش مطلوب منك تأييدي رأي
و كل واحد حر في رأيه المهم يتناقش بأدب
المطلوب منك تقولي هل انتي موافقة على شتيمتها ليا شخصياً و لا لأ

قالت ان ردي كله تضليل و ان ريحة مدونتي فاحت و انها ما يشرفهاش تدخل لي تاني
دي اهانات منها ليا شخصياً و لمدونتي أنا شخصياً
و دي مش مجرد لحظة نرفزة
لأنها قبلها ببوستين شتمت الإخوان و أنا مسحت شتيمتها
ودا غير شتيمتها في الإخوان و شماتتها في اعتقالهم
بس مش مهم الإخوان يعرفوا يردوا كويس و لو ما ردوش حتى مش فارق معاهم

انا اللي يهمني اهانتها ليا شخصياً
رغم اني ما اهنتهاش
بس لمجرد الإختلاف في الرأي شتمتني

و السؤال ليكي يا نوران
هل انتي موافقة على شتيمتها ليا

موافقة و لا لأ ؟

أنا عارف اجابتك كويس بس كنت اتمنى انها تكون واضحة
:)

و ارغي براحتك يا خيخة دي مدونة أخوكي
و انتي اللي قلتي كده و انا متمسك بكده
:)
المهم تقري كويس قبل ما تعلقي و لا علشان أخوكي حتكروتيني
:)

و على فكرة و اظن لو سألتي أبو فداء حيقول لك كده
ما ينفعش تكوني صحفية و اعلامية كبيرة بدون ثقافة عامة ضخمة تمكنك من متابعة اي موضوع يفتح فيه حوار أمامك
حاولي تقري في السياسة و تأخدي فكرة صدقيني حتستفيدي
:)

نورتيني يا أم شريف و سلامي لشريف و ابوه
:)

ابن عمر
=========
الظاهر كده
آميين
:)

بت خيخة وأى كلام يقول...

اه صحيح ازاى فاتتنى دى
لأ طبعا مش موافقة على شتيمتها ليك وحكاية انها ريحتها فاحت
معلش والله يا محمد انا فعلا الكلمة دى ضايقتنى بس اصلى قريت تعليقات بعديها ونسيت خالص انها قالت الجملة دى

وعلشان خاطرى ابوس ايدك
بلاسش تجيب سيرة صحفية ناجحة واعلامية معرفش ايه
سيبنى فى الخيبة اللى انا فيها ومتفكرنيش بيها تانى
وطبعا معاك حق انى لازم اثقف نفسى فى مجالات كتير جدا
مش علشان اكون صحفية ولا اعلامية
لأ علشان نفسى علشان مابقاش عاملة زى الاطرش فى الزفة
بس المشكلة ان انا معرفش اقرا فى حاجة مش شدانى
يعنى اللى اقراله لازم يكون اسلوبه بسيط وميسر ومكتوب بشكل يجذبنى علشان افهم هو عايز يقول ايه
مش بحب الكلاكيع
وكمان انا المواضيع السياسية مش بتستهوينى انى اقرا فيها
وعلشان اقراها زى ما قلتلك لازم تكون بلغة شيقة
بس خلاص من الاخر كدة لا انا مش مع قطة الصحراء انها تشتمك
والحل انك ولا تروحلها ولا هى تجيلك
وقاطعوا بعض ومتعلقوش عند بعض تانى واخسروا بعض
واوعى اسمع ان حد فيكم راح عند التانى وقرا موضوع وعجبه وقال كلمة حلوة

خلاص كل واحد فيكم يعمم ويقول ان كل كتابات التانى وحشة

برضه مش فاهمة حاجة
هو انتوا بجد بجد يعنى متخناقين والموقف ده مش ناويين تنهوه بطريقة احسن من كدة

مش عارفة ليه مش مقتنعة
لانى حاسة ان احنا كلنا اخوات ولازم نستحمل بعض ولازم نعدى لبعض ولازم نحترم بعض
ماينفعش نزعل من بعض

وخيركم من يبدأ بالسلام


بس خلاص
اختك خيخة الرغاية

مهندس مصري يقول...

بت خيخة و أي كلام
=================
أوكي
خيركم من يبدأ بالسلام ماشي
بس مش فيه حاجة اسمها الغلطان يعتذر و بعدها التاني يسامحه
و لا هو المفروض الواحد يتشتم و بعدها يروح يبدأ بالسلام
لا أنا مش معاكي في الحتة دي

أنا شلت لنكها من عندي من السايد بار و الجوجل ريدر و عملت لها بلوك و ديليت من الماسنجر و الإيميل و الفيس بوك
و انتهينا خلاص يا نوران
اللي مش هاين عليه يعتذر عن غلطه
يبقى أنا ما القحش جتتي عليه
الواحد عنده دم و احساس برضه
ربنا يسهل لها كل خير
أنا عن نفسي لو غلطت في حد سواء بقصد او بدون قصد بأعتذر و عمري ما إستكبرت اني اعترف بغلطي

و اللي تكتبه سواء حلو أو وحش ده يخصها هي و قراء مدونتها اللي انا ما بقيتش منهم لأني مش غاوي شتيمة

و ياريت تقفلي خلاص على الموضوع ده يا نوران
أنا اللي يحترمني أحترمه
و اللي ما يحترمنيش ربنا يسهل له كل خير بعيد عني
و الحمد لله انا رغم ان دمي اتحرق ساعتها مسكت نفسي و ما رضيتش اغلط فيها و لو راجعتي كل تعليقاتي بعدها مش حتلاقي غلطة واحدة مني في حقها لأني مؤدب و الحمد لله

حسبي الله و نعم الوكيل في من ظلمني

غير معرف يقول...

طب انت بتزعقلى انا ليه دلوقتى وبتشخط فيا هو انا اللى زعلتك
لاحظ انك بتكلم واحدة خيخة يعنى شخطة زى دى ممكن تخلينى اعمل بى بى على نفسى

سلام
اختك خيخة

مهندس مصري يقول...

أنا ما أقدرش أزعق في اختي الكبيرة
:)
هههههههههههههههههه
مش الكبيرة برضه و لا ايه ؟

دكتور حر يقول...

أطول طوارئ في العالم

الطوارئ دي ساعه و يوم سهر اتنين
لكن كل ده

ثانيا
احنا اكتر شعب بينطبق عليه
متعوده دايما

وتقوللي معرفش الطواريء

ده انا الطوارئ كلها يا بشمهندز

تحياتي للطرح الطاريء

امام الجيل يقول...

المشكلة ان المفروض ان الطوارئ
طبقا حاجة طارئة

مش تقعد عشرات السنين كده
وايه اللى خلاها طارئة اصلا

والظروف متعدلتش من وقتها عشان تبقى مستديمة

شكلنا هنبكى على قانون الطوارئ بعد ما يرحل

ونتحسر عليه
ربنا يستر بس مش هيدوموا كتير يعنى خليهم يفكروا ويدبروا
والله غالب على امره

كلاكيت تانى وتانى يقول...

قانون الطوارئ برغم انة ساهم فى نكميم العديد من الافواة الحرة الا انة بالرغم من هذاساعد ع ضبط ايقاع الحياة وقلل من الأرهاب والعمليات الارهابيى فى مصر وبرغم انى لا اقرة الا اننى اعتقد ان فوائد عديدة لة ظهرت فى ظل موجة الارهاب التى اجتاحت مصر سابقا والقصد ان العيب ليس فى القانوون ولمن فى التطبيق كعادة كل شئ فى بلدنا
لنا اللة

مهندس مصري يقول...

دكتور حر
==========
هي فعلاً متعودة
:)
دايماً
:)

بس يارب تنسى بقى و تتعود على الحرية

امام الجيل
============
في كل الدساتير المحترمة الطوارئ تفرض في مكان محدد فقط و ليس كل البلاد
و لمدة محددة لا تزيد عن 6 شهور
الا في أثناء الحرب فتفرض على منطقة العمليات الحربية طوال استمرار هذه العمليات
انما أحنا قانونا و دستورنا عجبة و ما وردوش على حد

كلاكيت تاني وتاني
=================
فعلاً العيب في التطبيق حيث أنه لا يجب أن تستمر الطوارئ كل هذه الفترة
ثم انه حتى أحكام الإفراج التي يحصل عليها المعتقلون من محاكم أمن الدولة طوارئ لا يتم تنفيذها و يتم اعادة اعتقالهم بدون الإفراج عنهم سوى صورياً على الورق
فيما أصبح يسمى بالإعتقال المتكرر
و هو ما تنفرد به مصر عن دول العالم أجمع و ذلك بالمخالفة لأحكام محاكم و قانون الطوارئ نفسه

مروة الزارع يقول...

هو اللينك دة تبع قانون الطوارئ برضة

او الجهاز هنا علمة قانون طوارئ

مش عاوز يفتح معايا يا (بشمهندز) خالص

:((((

أريد عريساً يقول...

السلام عليكم يامهندس ايه الاخبار مش عاوز عروسة

غير معرف يقول...

مهندس معماري اسكندراني


ازيك يا هندسة 0 0 يا ابو زمل المهم

انت مش كنت برده عامل حالة طوارئ في

مدونتك من بوست او بوستين فاتوا برده

وعملت حظر تجول كمان بسبب بسة

الصحراء واللي صدر منها و اشمعنى يعني

جت على الحكومة ديه حتى من سنة 1981

بس يعني لسه بدري على بالة ما يفكروا

يشيلوه واديهم اهم بيفكروا للشعب

وعشان كده حيواكبوا التطور ويعملوا

قانون جديد

ويجعله عامر

مهندس معماري اسكندراني

الفاتح اليعقوبي يقول...

قالها الشيخ عبدالحميد كشك رحمه الله من قبل
يابلادنا ياعجيبة فيكي حاجة ميحراني نزرع القمح في سنين يطلع القمح في ثواني

هي دي بلادنا وحسبي الله ونعم الوكيل في اللي خربها وبهدلها
طوارئ مش طوارئ العيب ان جيه من اهل العيب مايبقاش عيب ولكن العيب ان نضرب علي اقفيتنا بدعوي لقمة العيش ثم ذهبت لقمة العيش ولم تبق لنا كرامتنا
والسلام

مهندس مصري يقول...

مروة الزارع
============
اللينكين شغالين يا مروة
عموماً ركزي في اللينك التاني
:)

أريد عريساً
===========
بصي يا رئيسة حزب الأحلام
أنا قريت تدويناتك كلها
و عايزك تقري مدونة عاوزة أتجوز
حتلاقي لينكها في المدونات اللي بأتابعها على جنب
و بالنسبة للجواز عاوز اتجوز النهاردة قبل بكرة
بس العين بصيرة و الإيد قصيرة
:)

مهندس معماري اسكندراني
=======================
علشان تعرف انك ما قريتش البوست كويس يا هندسة
81 مين و الناس نايمين
:)
دي من 1914 بس على فترات متقطعة و فترةالطوارئ من يوميها اكتر من فترات الحرية

و انا ما أعلنتش طوارئ عندي
أنا كنت باسال مين الغلطان و اهم حاجة ان الناس عرفت

الفاتح اليعقوبي
================
تصحيح المقولة هو :

يابلادنا ياعجيبة فيكي حاجة محيراني نزرع القمح في سنين يطلع القرع في ثواني

:)

هيثم ابوخليل يقول...

عاجل :

تم إعتقال المدون المصري عبدالرحمن منصور صاحب مدونة مراسل الأرض ....

http://www.the-earth-correspondent.blogspot.com/

بإعتقال عبد الرحمن يكون لنا عند نا أربعة مدونين معتقلين ثلاثة عند النظام المصري وواحد عند النظام السعودي

فؤاد الفرحان المدون السعودي والذي أكمل 3 شهور كاملين أمس في معتقله

http://www.alfarhan.org/
http://ar.freefouad.com/

والدكتور إبراهيم الزعفراني المدون المصري صاحب مدونة من الذاكرة والذي أعيد

للمعتقل بعد عملية جراحية في القلب
http://zafarany.blogspot.com/

والشيخ المصري أحمدي قاسم ...صاحب مدونة أحمدي قاسم

http://www.ahmadyk.blogspot.com/

تعاطفكم لا يكفي ... إظهروا دعمكم ... كل يوم العدد يزيد .... إلي متي .... ??

إفرجوا عن الكلمة .... إفرجوا عن الرأي ...

فزلوكة يقول...

قانون الطوارىء ومن بعده الإرهاب
وسيكون هناك ما هو أسوء
إن لم نعلن رفضنا ونتحرك
وإلى إن يأتى هذا اليوم
فليفعلوا بنا ما شاؤا

الجمعاوي الاصيل يقول...

مهندس حبيب قلبي

للاسف ورغم كل اللي انت قلته ده

فان قانون الطوارئ بالنسبة لقانون الارهاب الجديد والمدرج بالتعديلات الدستورية الجديدة

العن من هذا ولا يترك اي بصيص للحرية

بل يعطي الحق لاي احد ان يتنصت على المراسلات والتليفونات بل ويصورك بالكاميرات وانت في قلب بيتك ودون اذن احد او من نيابة

واللي مش عاجه يخبط دماغه في الحيط وحسبنا الله ونعم الوكيل

مهندس مصري يقول...

هيثم ابو خليل
===============
و لسه
:(

فزلوكة
=======
حقاً

الجمعاوي الأصيل
==============
و كله بفضل ترزية القوانين
:(

somaa يقول...

الجميل فى الموضوع والموقف ان بعد ما عملوا استفتاء بتاع الدستور طلع القاضى فى التفسديون زى القمر تحسه نجم سيما وقال 11 فى المائه من الشعب قاموا بالتصويت....منهم 39 فى المائه لم يوافقوا على الدستور اذا اغلبيه الدستور تمت الموافقه عليه....انا بحياتى ما شفت بلد 11 فى المائه يصوتوا ويحتسبوه استفتاء...قمه الاستهزاء بعقول الشعوب
تحياتى ليك سومه_87

الجمعاوي الاصيل يقول...

مهندس مصري

مبروك فرصة السفر واتمنى ان ترفع هذا الشعار
ومهما يحاولوا يبعدو عني وطني الغالي انا راجع ليه مهما يقولوا وطني ده امي عمري في يوم ما هنت عليه انا عاشق ارضه وعاشق نيله ومهما بعدت ضروري هجيله

وتروح وتيجي بالسلامة وياريت متنسناش بقى وتدعيلنا عند الكعبة