الاثنين، سبتمبر 03، 2007

رجل الحمار

عارفين المثل اللي بيقول الشاطرة تغزل برجل حمار


المثل ده هو القاعدة الأساسية للعمل مهندس في الحكومة


خصوصاً لو كنت نضيف و مش مفتح مخك ده من ناحية


و من الناحية التانية لما ما تكونش عبد الروتين و اللوايح الغبية اللي معمولة علشان توقف المراكب السايرة

يعني الواحد بيحارب على 3 جبهات

الأولي : المقاول و الإشراف عليه و على صنايعيته و عماله و مهندسيه إن الشغل يطلع مطابق للمواصفات و سليم هندسياً و لا تشوبه شائبه

الثانية : الروتين و اللوايح اللي بترغمك علشان تعمل مستخلص للمقاول مثلاً تملأ إستمارات عتيقة و تعمل كذا نسخة بالكربون لأن إختراع ماكينة تصوير المستندات غير معترف بيه

أما عمله ببرنامج للجداول الحسابية مثل الإكسل فهو نوع من الخيال العلمي الغير معترف به حكومياً

يبقى نعيش عيشة أجدادنا الموظفين الأوائل و نستعمل الإستمارات العتيقة و الكربون و الكوريكتور و خلافه و محروق أبو الكمبيوتر

دا غير تزمت المديرين اللي عايزة تلزمك بمواعيد حضور و إنصراف !!! عجيبة والله

المفروض ان مواعيد الحضور و الإنصراف من 8 ص:2.30م للناس اللي قاعدة على مكاتب إنما الناس اللي مرمية في المواقع و التنفيذ مش من المفروض تتربط بمواعيد

لأن لما المقاول و العمال ييجوا الساعة 9 ص أنا أروح قبلهم بساعة ليه

و لما يقعدوا يشتغلوا للمغرب حأسيبهم و أمشي الساعة 2.30م لأ لازم أقعد معاهم و أراقبهم و أستلم الشغل المظبوط منهم و أرفض الشغل اللي فيه ملاحظات لحد ما تتصلح و أستلمها مظبوطة
الثالثة : مكائد و وقيعة بعض الزملاء هداهم الله و هذه من أسوأ الجبهات عندما يأتي الزر أو الإسفين من زميل أو زميلة تتعامل معهم على أساس من المودة و الأخوة و لكنهم يقوموا بنقل معلومات مغلوطة و مضللة عن العمل للقيادات العليا لكي يحظوا بثقتها و يصبحوا عملاء لها و جواسيس على زملائهم
وسأتحدث بإستفاضة فيما بعد عن رجل الحمار اللي ماسكها بقالي سنتين و شغال بيها و ياريت عاجب

هناك 14 تعليقًا:

عصفور المدينة يقول...

يا أيخ أعانك الله
وفعل كفاية عليكم معاملة أرباب المهن
باشمهندس أحب أهديك هذه التدونية فكرتني بيها

أبي وأنا وأصحاب المهن

وثانيا احذر من الأسافين وخليك ناعم مثل الأسفلت
:)
هو الاسفلت ناعم
وصلب مثل الحديد

coca يقول...

يا باشمهندز روتين وعقم نظام الحكومه شئ مستفز الحمد لله مشتغلتش فيه بس كل يوم بشوف ميت واحد قرفان منه
ربنا يعينك

جمعاوى روش طحن يقول...

أخى المهندس القرفان

أعانك الله على قرفك من الحكومة اللى بيقولوا عليها ذكية


"أكيد ذكية دىى تبقى أخت نزيهة "


متابع بشغف لغاية ما أعرف رجل الحمار

عصفور المدينة يقول...

جزاك الله خيرا على الزيارة المفاجئة
:)

مهندس مصري يقول...

البشمهندس الكبير عصفور المدينة
انت في دماغي على طول و فاكرك بس مشاغل و الله و طحن اليوميين دول في الشغل مخليين الواحد مش فاضي يدخل النت
coca شرفتيني بأول زيارةيا
يارب ما تكونش الأخيرة
هيثم باشا
ما قولتليش السلام وصل لك مع أحمد و لا لأ

عصفور المدينة يقول...

سؤال بريء
قلت لي فين بقى إجاباتك على التاج؟؟؟؟؟

مهندس مصري يقول...

يا بشمهندس عصفور
الصبر طيب أنا ما قولتش إني حأرد النهارده
إن غداً لناظره قريب

عايش في غيبوبة يقول...

اخي الحبيب المهندس المصري القرفان من الروتبن ، كم اتمنى ان اقابلك و اتحدث معك ، و علي العموم كلنا بنغزل برجل حمار اخي الحبيب يعني انا بيطلب مني حاجات في الشغل ليس لي بها علاقة ، بس ايه اتصرف ، حاول ، اتعلم ، يعني مش الحكومة وحدها يا عمنا القطاع الخاص كمان لاننا في الاخر في مصر

نانو يقول...

ربنا يقويك
أنا الحمد لله مش شغالة فى حكومة بس مجربة الروتين العقيم ده لما بروح أخلص أى مصلحة حكومية بشوف الويل وبجى كارهه نفسى حتى
ربنا يقويك ومستنين نشوف حكايات رجل الحمار وصلت معاك لفين

ولــــــــــو يقول...

يا حول الله اول مره ادخل الاقي مأساه زي دي
كان الله ف عونك والحمد لله الذي ابعدنا عن الحكومه - حتى الان -وربنا يقدرك
تحياتي

جبهة التهييس الشعبية يقول...

باشمهندز
مين ايمن بركات ده
وفين خبر انتحاره
ما تبعت لي اللنك

أنونيمس يقول...

بص يا بشمهندز
كلنا نعاتي مما تعاني منه
علي الأقل انت بتتعامل مع مقاولين وعمال لو طهقت منهم هاتسيبهم يضربوا يقلبوا وتمشي

بس لو كانوا عيانين ومطلعين روحك هما واهاليهم مينفعش تسيبهم يموتوا وتمشي

والمدرين و الروتين و الزنب في كل عمل حكومي سخيف تتحكم فيه اللوائح العقيمة و البطالة المقنعة

استحمل وصبر نفسك ولا الواحد يطق

اعتذر عن عدم متابعتي في الفترة الماضية

ســـــــــــــــــلام

مهندس مصري يقول...

أسيبهم و أمشي إزاي يا دكتور انونيمس
ماأنا بأمضي بإستلام أي شغل بيعملوه يعني كله في رقبتي
المقاول بيضمن الشغل 11 سنة بس
إنما المهندس مسؤول عن المنشأ طوال عمره الإفتراضي يعني بتاع 60 سنة
إلا أسيبهم و أمشي دي دا أنا كنت أروح في داهية
دا غير خوف الواحد من حساب ربنا

هبة النيـــــل يقول...

المثل دا عقيم فعلا

ماهو اللي بيغزل برجل حمار دا بيكون غزله مفعكش

عمره ما هيطلع غزل مرتب ونضيف

اللهم لا حول ولا قوة إلا بالله