السبت، سبتمبر 08، 2007

التاج علينا حق

التاج ده جاي لي من البشمهندس عصفور المدينة و ده أول تاج يجيي لي بما إني لسه نونو في عالم التدوين
يبقى حأستأذنكم نأجل رجل الحمار شوية لحد ما نجاوب على التاج ده
لما أحب أتابع أخبار التكنولوجيا وأخبار العالم بفتح
المختصر للأخبار وجووجل للأخبار وماليش في التكنولوجيا قد كده
لما أحب ألعب على الكمبيوتر
أنا كارت الشاشة عندي قديم 8 ميجا بس علشان كده بألعب ألعاب قديمة عادة بأحب الإستراتيجي و الحربي زي
age of empires 2 & 3 , army men , delta force 1 , igi , f22 & red alert 2& yuri revenge
بس الكلام ده لما يكون الواحد فاضي و دماغه رايقه مرتين أو تلاتة في الشهر يعني
لما أحب أقرأ مقالات إسلامية حلوة و إسلوبها ممتع
عادة في إسلام أون لاين بس ما بأعملهاش كتير
لما بأحب أكتب
بأكتب عن حاجة مضيقاني و عايز أفضفض عنها و ساعات بأكتب اللي ييجي في دماغي ساعة الكتابة بدون ترتيب و بدون تحضير للموضوع
لما أحب أطبخ
أنا ما بأعرفش أطبخ ربنا يخلي لي الست الوالدة لحد ما أتجوز واحدة تعرف تطبخ من ضمن مواصفات كتير
لما أحب أقرا أدب عالمي
مش بأدور على حد معين اللي بيقع في إيدي بأقراه بس بأحب مايكل كرشتون و جول فيرن و الخيال العلمي المتقن عموماً
لما أحب أختار قلم
أي حاجة تكتب و السلام النقاوة دي كانت أيام الكلية أيام الروترنج و اليونيبول و خلافه
لما أحب أعمل أي حاجة
بأعملها بمزاج و إتقان
لما أحب أطلع من حالة غضب أو ضيق أو حزن
عادة بأتوضى و أصلى ركعتين علشان الحديث اللي معناه إن الغضب من الشيطان و الشيطان من نار و الماء يطفئ النار واننا لما نغضب لازم نتوضى و نصلي ركعتين علشان الشيطان يبعد عنا معلش مش فاكر متن الحديث بالضبط
لما أحب أدور على أي تسجيل إسلامي : أناشيد / شرايط الخ
عادة مش بأدور على الحاجات دي بس موقع طريق الإسلام غالباً فيه كل حاجة ممكن أدور عليها و ساعات بأنزل منه دروس
لما أحب اتكلم
ياه دا أنا مشهور بالرغي بس ساعات ناس بتتضايق من رغيي و ساعات تانية ناس تانية بتتكيف و بتحس إنها إستفادت معلومات جامدة مني أصل العبد لله مثقف الشلة و لا فخر بس ساعات بينزل عليا سهم الله و بأقعد ساكت ليه الله أعلم حسب المود و الحالة النفسية للواحد
لما أحب أتعامل مع الناس
بأتعامل معاهم بما يرضي الله لأني بأفترض إن اللي قدامي شخص كويس و محترم إلى أن يثبت العكس و للأسف أحياناً بيثبت العكس و بيصيبني الأذي من الناس دول بس لازم الواحد يعامل الناس بما يحب أن يعاملوه به بس لو واحد آذآني كذا مرة بأحطه في البلاك ليست black list
و بأصدر له الوش الجبس و بأتعامل معاه ميري بدون ظلم في المعاملة لكن بدون ود وحب برضه و البادئ أظلم
لما احب أخرج
بأخرج مع أصحابي بس شلة هندسة هاجرت و شدت الرحال للخليج العربي و منتظر إني أحصلهم بأخرج مع شلة المحامين منهم بعض أصحاب من ثانوي نقعد على قهوة هادية في مكان بعيد عن الزحمة و الوش و الدوشة و نقعد نتكلم و نتناقش و نفضفض لبعض و نشيل هموم بعض عن بعض و يمكن ساعات تكون في حاجات حلوة فنفرح لبعض
لما أحب أقرأ مجلات
بطلت أقرأ مجلات من زمان و أنا صغير كنت بأقرا ماجد و ميكي وسمير ومجلة الشباب أحياناً
دلوقت بأقرا جريدة الدستور اليومي المصرية بس
لما أحب أمررالتاج
أمرره لكل اللي شرفوني و علقوا عندي من أول ما إبتديت تدوين

هناك 5 تعليقات:

عصفور المدينة يقول...

مش انا باقولك انت شخص رائع مش عايز تصدقني
وكمان خريج اسكندرية
وشخصيتك متقلبة يعني متنوعة يعني بتحتوي عدة أنواع من الشخصيات
وده معناه انك تقدر تتعامل مع ناس متنوعة برضة
شكرا لصاحب التاج اللي عرفنا عليك أكثر

ولــــــــــو يقول...

التاج ده جميل وبيكشف معلومات كويسه عن اللي بيرد
شخصيتك عمليه وجديره بالاعجاب
موضوع البلاك ليست ده كنت باتبعه لفتره قريبه بس للاسف مش ف كل الاوقات تقدر تسيطر على تصرفاتك
سعيد بمعرفتك

مهندس مصري يقول...

عصفور المدينة
لا متقلبة و لا حاجة يا باشا هو مبدأ واحد ماشي عليه " الحق أحق أن يتبع " مش كيميا هيه سعيد بتشريفك لي دايماً
ولو
السعادة ليا أكتر و أتمني أشوف ردودك على التاج

بنوتة مصرية يقول...

حسيت فى كلامك بجد انة منتهى الصدق
وكمان احنا فينا حاجات من بعض
الرغى ومستغربة انى الاقى راجل رغاى
وكمان انك كنت بتقرا ميكى وماجد والشباب
انا كنت غاويهم جدا والله
ربنا يوفقك بجد
اه طبعا انت دلوقت سافرت والست الوالدة بعيدة عنك فعلشان كدة انصحك انك لازم تتعلم الطبيخ
ولو عايز مساعدة ابعتلى وانا هبعتلك الوصفات

مهندس مصري يقول...

بنوتة مصرية
===========
لسه واخد بالي من التعليق ده
أنا اتعلمت الطبيخ بس شوية على خفيف

الرغي ده تعود من الصغر
و المجلات بتاعة الأطفال دي كانت جميلة جداً و نمت ثقافة الواحد كتير أيامها