الأحد، سبتمبر 30، 2007

شبكة أم نبيل

للأسف أنا من مشتركي شبكة أم نبيل أكبر شبكة للمحمول في مصر
و أسوأ شبكة من حيث الخدمة أيضاً حيث أصبح تهييس الشبكة كل ليلة خميس أمر طبيعي و من المسلمات و لا يثير إستغراب أحد
كما تسقط الشبكة مرة أو مرتين كل شهر بالساعات عادي جداً
وكانت ثالثة الأثافي عندما أردت إدخال خدمة الإنترنت على العدة الجديدة و إشتركت في خدمة أم نبيل لايف
أولاً طراز العدة غير موجود في قوائم رسائل الخدمة المسجلة صوتياً لضبط التهيئة
و لابد من الإتصال بخدمة العملاء configuration
ثانياً في خدمة العملاء يتم تنبيهك أن المكالمة ستتكلف 1.50 جنيه مهما طالت مدتها و أنه سيتم تسجيل المكالمة لأغراض تحسين الخدمة ثم يتم توصيلك بأحد العاملين بخدمة العملاء
وكان نصيبي في أول مرة مع واحدة إستلمتني تلييف و تشطيف على أحسن ما يكون كالتالى
أنا : السلام عليكم - لم ترد هي السلام
هي : مساء الخير كل سنة و حضرتك طيب يا أفندم إسم حضرتك ؟
أنا : المهندس فلان الفلاني
هي : أهلا بحضرتك طلبات حضرتك يا أفندم
أنا : كنت جبت عدة جديدة
هي : مقاطعة ليا قبل ما أكمل الكلام "ألف مبروك يا أفندم
أنا : الله يبارك فيك عدة نوكيا 3110 كلاسيك و إشتركت في أم نبيل لايف
هي : مبروك يا أفندم
أنا : مخنوقاً من التلييف " وكنت عايز أدخل نت و أشترك في رسايل الـ mms
هي : حالاً حأبعت لك رسايل تهيئة الخدمة يا أفندم و ما تنساش تحفظهم على الجهاز و تدخل له0000 أربع أصفار ككود للرسالة الثانية شكراً لإشتراكك مع أم نبيل
وغني عن الذكر إن الرسايل ما عملتش حاجة
و تكررالموقف بنفس التفاصيل تقريباً مرتين كمان و كلهم ما فيش عندهم غير الرسايل يبعتوها لي و كل مرة أتصل بخدمة العملاء آخد التشطيفة التمام و أقفل و أنا دمي محروق من الكلام المزوق اللي مالهوش فايدة
المشكلة إن أم نبيل ملهاش مركز خدمة عملاء في دمنهور علشان يحل لي المشكلة أو على الأقل ألاقي حد أتخانق معاه و أنا مشغول في الشغل لدرجة مش هأعرف أسافر لإسكندرية لخدمة العملاء هناك
بينما اللي يغيظ إن واحد أعرفه معاه نفس العدة بس على شبكة فودة فون و شغالة بكامل إمكانياتها
أنا فكرت أغير الشبكة لكن المشكلة إن الشغل كله عن طريق النمرة دي إزاي حأبلغ 230 واحد بالنمرة الجديدة و لو إني سمعت إنهم بعد رمضان بفترة الله أعلم طويلة و لا قصيرة حيفتحوا التحويل بين الشبكات بنفس النمرة و الكود و بأقول أستنى و أحول بنمرتي
بس قرفان خصوصاً إن رسايل الsms
مش شغالة على العدة الجديدة برضه و بتطلع رسالة خطأ بتقول الشبكة لا تدعم الرسائل القصيرة إتصل بمزود الخدمة أم نبيل يعني
مش عرف أعمل ايه شكلي حأغير النمرة و الشبكة و أمري لله
ملحوظة : - مش لاقي برامج للعدة دي
عايز برنامج يفتح تسجيل الفيديو بدل الثواني المعدودة اللي بيسجلها و عايز برنامج بيشغل فيديو لأن العدة بتشغل فقط ملفات
3gp
صبرنا على أم نبيل يارب

هناك 11 تعليقًا:

جبهة التهييس الشعبية يقول...

انا كمان من المشتركين في ام نبيل
وكل ما حد يتصل بيا ارد عليه واسمعه بيقول: إنت اللي مين انا طالب نوارة
اقول: ايوة يا فلان

اللي طالبني: يا عم ده تليفون نوارة انت بترد عليه ليه؟

انا: ايوة يا فلان انا نوارة سامعاك انت بتكلم مين

الل طالبني: الله طب بتشتم ليه يا جدع

عصفور المدينة يقول...

يا هندسة آخر احتمال يستخدمه شخص يعتمد على التليفون هو شبكة أو تي في التي تنتهي مكالماتها عن 33 أو 36 ثانية لسبب غير معلوم

وبعدين هم 65 حتستغنى عنهم وتبعت رسايل لكل الناس اللي في الدليل عندك المهندس الزهقان غير رقمه إلى
011
ومنها تقولهم كل سنة وانتم طيبين
وتخلص من الهم ده ياراجل

وبخصوص البرامج شوف ده

http://www.nokiagate.com/vb/a-12/

عصفور المدينة يقول...

نسيت اقولك اسم نظام التشغيل بتاعك
S40

EmY يقول...

العده الجديده دي شكلها كده محسوده
انت تغير الرقم و الشبكه و العده
يعني ايه مضبوط في البلد علشان الموبيل يبقي تمام

دعوة الفردوس يقول...

كان الله في العون

علشان تعرف مزايا العدد القديمة اللي مبتعرفش تقول غير الو

النهارده بس
حسيت قد ايه انا في نعمة
علشان انا خط فودافون
وعدة N70 music
وحاسه بانسجام وتوافق وكلام كتير كده رغم اني مش بستخدم نص الخيارات العاليه اللي عندي
بس اهو على الاقل لما احب استخدمها مش هتذل الذل ده

وبالنسبه لام نبيل دي
اتسببتلي في مشكله كبيره جدا
كنت مره بتصل باخت رقمها 012 اللهم احفظنا ومرديتش عليا بعدها لقيت واحد بيتصل بيا يقولي انتي بتتصلي بيا ليه علما ان رقمه مختلف تماما بس كانت ام نبيل بتدخل الخطوط في بعض ايامها المهم الحاجه الظريف ده طلع ظريف اوي اعتذرتله وقلتله يمكن تكون الخطوط دخلت في بعض عذرا ومعلش وبتاع
قالي لا ده من حسن حظي
وفضل كل يوم يتصل كام مره في اليوم الواحد
ولما مبقيتش ارد بقى يتصل بشكل متواصل بيشغل التليفون كتير بقيت افتح عليه واكتم الصوت علشان اخسر الاخ وهو ولا فايده وبيرغي لوحده ولما مره اديت لخطيب اختي يرد عليه قفل علطول واتصل بعدها بكام يوم ولما قلتله انت معندكش دم ومفيش حاجه نافعه معاك مش كفايه خليت اخويا يرد عليك علشان تحترم نفسك
قالي اه صحيح فكرتيني
مش ده تليفونك بتخلي اخوكي يرد عليه ليه انا ادايقت والله
ساعتها مقدرتش امسك نفسي من الدحك
و فضل يرن ويتصل من ارقام تانيه كام شهر كده
كل هذا بسبب ام نبيل
وتتوالى مواقفي معها حتى الان
عذرا على الاطاله
الرغي يعني

bastokka طهقانة يقول...

انا كمان مشتركة عند ام نبيل و ملاحظة ان حالتها في النازل مش عارفة يظهر من ساعة ما ظهرت شركة ام حسين و هي غطت على شبكتها

و احنا اللي بناكل على اور اسكرف
اوروفوار

أنونيمس يقول...

الله يخربيت نبيل وأم نبيل

أنا لولا الملامة كنت رميت التليفون

تصور أنا مينفعش أرد على أي حد

يعني لو رديت مش بسمع أي حاجة

لازم اقفل واتصل أنا

والمصيبة لما كلمت خدمة العملا قالولي

أهلا يا دكتورة زينب

ولولا اني صايم كنت قولت أحلي رد

اللهم صبرنا

تجمع المدونين الطامحين في وطن عربي بدون سجين رأي واحد يقول...

لاول مرة بالاسكندرية : دعوة لكل مواطن ولكل مدون حر: لحضور .............

ملتقي الدفاع عن سجناء الراي وحقوق الانسان
بالإشتراك مع ....
تجمع المدونين الطامحين في وطن عربي بدون سجين رأي واحد و بحضور نخبة من الصحفين والسياسين والمدونين
فرصه حقيقيه ليجتمع المدونين مع بعضهم البعض
ويعلنوا تضامنهم مع حرية الصحافه والكلمه في مصر

موعدنا : الجمعة 19 / 10

الساعه 5 بنادي المحامين بجليم كورنيش البحر الاسكندرية


ارسلها لكل المدونين عندك

مدونه انا بحبك يا مصر يقول...

انا على راى الاعلان
انا فدفون ومعايه الاهلى كله وعمر اديب وكام بيت الى طلعه فى الاعلان
عموما الى يشوف بلوت غيرة تهون عليه بلوته
احمد الجيزاوى

ولــــــــــو يقول...

ايه المأساه دي
ده على كده احنا ف نعمه
انا كنت بابقى ف وسط البحر وبكلم امي كاني قاعد قدامها
الى شبكتي العزيزه
انا اسف
ظلمتك

msayed2004 يقول...

السلام عليكم و رحمة الله و بركاته

وصلت لموضوعك بالصدفة و أعلم أنه قديم لكن أردت أن أقول لك أنك ممكن تطلب رسائل الأعدادات من موقع نوكيا نفسه و بتيجى صح و فى لحظتها , أنا لا أذكر الرابط فعليك بالبحث , الموقع هيسألك عن الدولة و الشبكة و رقم تليفونك و يبعتلك على طول.

بالمناسبة نوع موبايلى برضه مش فى قائمة شبكة أم نبيل , رغم أنه ناس كتير بتستعمل نفس النوع.

و السلام عليكم و رحمة الله و بركاته