الاثنين، أكتوبر 15، 2007

العيد فرحة 2

العيد في البندر دمنهور يعني

العيد في المدينة بقى زحمة طحن أهل المدينة نازلين يتفسحوا و مضاف إليهم الفلاحين من جميع أنحاء المحافظة علشان دمنهور عاصمة محافظة البحيرة
بصوا خريطة دمنهور
الناس زحمة و مالية الشوارع و العيال فرحانة صحيح فرحة العيد كانت و الواحد صغير بيفكر في العيدية و الهدوم الجديدة و اللعب و الفسح كانت أيام حلوة
شايفين التاكسي الأبيض في أخضر دا علامة دمنهور حاسبوا منه لأن سواقينه متهورين
و شوفت بياع الطراطير
فكرني بأوبريت الليلة الكبيرة
و بعدها شوفت الحصنة اللي الفلاحين سايبنها في بلدهم و جايين يركبوها في شوارع البندر


ولا الملاهي و لو إن حديقة الجمهورية مش ملاهي قوي بس حاجة أحسن من مفيش



دا غير الحنطور اللي انقرض بعد انتشار التاكسي بس كان فيه منه لزوم فسحة العيد

و صاحبي اللي ماشي معايا يقول لي يا بني انت محسسني ان أنا ماشي جنب سائح بيصور كل حاجة بس أنا قولت أعيشكم معايا جو العيد

كل سنة و انتم طيبين

هناك 16 تعليقًا:

عصفور المدينة يقول...

انت كدة سايح رسمي
ومدمن تدوين لو كنت شفت اختبار ادمان التدوين كان فيه سؤال عن هل انت بتكون بتفكر في الحدث ازاي حتدونه

EmY يقول...

ايوه كده الموبايل الجديد عمل شغل
جميله اوي الصور و بوست حلو اوي
كل سنه و انت طيب

مهندس مصري يقول...

عصفور المدينة
-------------
والله يا بشمهندس أنا لما عملت إختبار إدمان التدوين مكنتش أعرف فيه قد كده دلوقت إتحسنت شوية و الحمد لله
ألف شكر على متابعتك و تعليقاتك
emy
----
أمال يا بنتي أمال إحنا بنلعب
و كل سنة و انتي بصحة و سلامة و ما تنضربيش من حد

الباحث عن الحقيقة يقول...

بجد يا باشمهندس انا حبيت دمنهور
مش عارف الصور حلوه فعلا ولا احساس حضرتك بيها هو اللى مخلينى شايفها حلوه
انا عجبنى الجو العام فى كل الصور
مظاهر فرح فعلا وناس بتعيد
كل سنة وانت طيب

عايش في غيبوبة يقول...

فعلا دمنهور حلوة علشان حاجة واحدة بس انها بلدي
كل عيد
سعيد لطيف رقيق و كل الصفات الحلوة ماعدا الجمال و المبارك و انت عارف ليه يا بشمهندس
و كل عام و انتم .........

دعوة الفردوس يقول...

انا من البلد دي انا من البلد دي
بلد ابويا
بس لا جدي ولا جد جدي
بما ان الباقي من المنيا
صعادية يابوي

على فكرة انا مصورة صور برده يوم العيد واحنا راجعين من البلد
بس كنت في العربية و طبعا بسرعة مشيها مش قادره القط كل حاجه بس ربنا يجبر بخاطر موبايلي ضبطني برده بشوية صور كده
هبقى انزله لو فضيت باذن الله

جمعاوى روش طحن يقول...

أسعدنى البوست ده كتير يا هندسة

بس فعلا شتان بين الصورتيين بتعو\ك اللى ف البوست اللى تحت

أحمد محمود ميلاد يقول...

العزيز المناضل محمد بك قنديل سعدت ايما سعاده عندما وجدت طريقي للبلوجر الخاص بحضرتك و عندما طالعته شعرت [اني أنطباعي الأول عن حضرتك بأنك انسان متميز قد خانني و لم يكن صحيحا بالقدر الكافي فحضرتك اكثر من متميز و لا تخسى في قول الحق لومة لائم بارك الله في حضرتك و اعزك بعزه و انعم عليك و علينا بنعمة الحريه هو ولي ذلك و القادر عليه

مهندس مصري يقول...

الباحث عن الحقيقة
-----------------
أول مرة تشرفني يا مرحب بيك
دمنهور حلوة فعلاً بس محتاجة محافظ و رئيس مجلس مدينة ينضفوها و يظبطوها مش يسيبوها تضرب تقلب
عايش في غيبوبة
--------------
غيبوبتك طولت و بقالك فترة ما بتدونش يا ترى ليه اللهم إجعله خير
دعوة الفردوس
-------------
يعني كنت في أنهي بلد ؟
في الصعيد و لا هنا
الصعايدة دول أجدع ناس أنا عاشرتهم سنتين في أسيوط قلبهم أبيض بس دماغهم ناشفة
جمعاوي روش طحن
--------------
و لا باين عليك أي روشنة شكلك كده سيد العاقلين
و قصدك ايه بفرق الصور شامم ريحة رمي كلام مش ولابد
وضح أفصح أبن
أحمد محمود ميلاد
--------------
الله يكرمك يا أحمد باشا إديتنا البهوية مرة واحدة كده ثم لا مناضل و لا حاجة كل الحكاية إن اللي في قلبي على لساني
أما بالنسبة لأكتر من متميز فدي ألف شكر عليها و لو إنت و الزملاء في حزب الغد اللي تستحقوها
أنا يأست من العمل الحزبي و إنسحبت لكن إنتوا لسه بتكملوا النضال ورا الدكتور أيمن ربنا يفك سجنه
إنما مازال حبي للدكتور أيمن و الحزب لم يتغير و الدليل إني ما قدمتش إستقالتي منه و مازلت أحمل الكارنيه في جيبي
و يوم ما الدكتور أيمن يخرج إحتمال كبير تلاقيني جنبكم و نكمل المشوار سوا
و بأبعت لك السلام مع أمين الصندوق بيوصل و لا إيه ؟

Ρών, يقول...

بوست زي العسل، جميل إنك تنقل روح المكان بكل مافيه من جمال و خصوصية و بساطة...أنا كمان بجهز بوست عن العيد،لكنه أبسط..و كعادتي غالباً هينزل في آخر شهر شوّال على بال ما يبقى عندي وقت

كل سنة و أنتَ طيب :)
.رون

19 أكتوبر, 2007 09:

Ahmed Al-Sabbagh يقول...

بجد البوستين دول من اجمل ما يكونو

برافو عليك استمتعنا بيهم اوى

مهندس مصري يقول...

رون
----
منور يا رون
الكلام اللي بيخرج من القلب بيوصل للقلب علطول بدون إفتعال مستني بوستك
و كل سنة و انت بألف خير
أحمد الصباغ
-----------
الله يكرمك يعني ننفع ندون
بس ما نجيش حاجة في الأجانب بتوعك يا عم اللي وصل وصل اللهم لا حسد و لا قر

ammola يقول...

باشمهندس
رجعتنى بالذاكرة لزمااااااااان ييجى من كام اسبوع
اتعزمت عند واحدة صاحبتى من اعيان كفر الدوار
والى الان برغم مرور الزمن-كام اسبوع-وانا مش عارفة استمتع بأى مناظر طبيعيةبعد اللى شفته هناك
يا بختك والله وياريت البيوت المسلح دى ما تسرحش وتلغى تراث البيوت الطين اللى بيتهيالى لو كانت فى بلد تانى كانوا عملوها محمية طبيعية

مهندس مصري يقول...

أمولة
-------
يا سلام دا البحيرة نورت
إنما البيوت الطين دقة قديمة يبنوا مسلح مفيش مشاكل بس بلاش تطغى على الخضرة

عليوه يقول...

صباحو قشطه يا باش مهندس انا جاى اقوللت تسلم ايدك يا مان على الصور دى لانى دمنهورى جدا وبحب دمنهور جدا وفعلا عندك حق ان دمنهور محتاجه محافظ صح ورئيس مجلس مدينه صح الصح بس الصور دى خدتها قبل دمنهور ما تنضرب با القنابل ولا بعد القنابلا اصل البلد شكلها يفرح فى الصور وده مش الطبيعى ولا لانى لسه من ارباب ابوا الريش ولسه العمار ما جاش عندنا على العموم بوسط يجنن فرحتنا ببلدنا

مهندس مصري يقول...

عليوه
=====
أنا كمان من أبو الريش بصرة
دي صور طازه من العيد الصغير اللي فات بس في ميدان الساعة و قدام جنينة الجمهورية
و أبو الريش بتتسفلت دلوقت ربنا يسهل