الأحد، أكتوبر 14، 2007

العيد فرحة

العيد فرحة فعلاً


أنا أول يوم العيد سافرت البلد في قرية تابعة لمركز شبراخيت في محافظة البحيرة


البلد اللي تربى فيها ابويا و أعمامي و عماتي قبل ما أبويا يتجوز أمي و يعيشوا في دمنهور


نزلت من الميكروباص بعد 1/2 ساعة سفر و مشيت في سكة البلد لأنها مش على الطريق مباشرة ممكن تمشي ربع ساعة أو تركب توكتوك


أنا فضلت أمشي في الهدوء و السكينة النفسية في ظل الشجر و أستمتع بالخضرة



ده طريق البلد متسفلت زي ما انتو شايفيين و دي نعمة كبيرة في الفلاحين





و دي مقابر البلد الي إندفن فيها أجدادي و أعمامي و أحد أخوالي و هيه موجودة برة البلد على السكة الفاتحة لكل أموات المسلمين





و عديت على غيط قطن من اللي كان بيتسمى الذهب الأبيض بس راحت عليه
شوفوا منظر الخضرة



استحليت المكان و المشية قمت مصور نفسي هناك







بس شكل الواحد في الصور العادية بيبقى متبهدل مش زي ما يكون في الأستوديو زي دي مثلاً


مشيت بعدها لبيت العائلة القديم من الشارع ده


لو واخدين بالكم في دش في الصورة و دا انتشر في الأرياف دا غير البناء بالخرسانة و الطوب الأحمر زي البندر الله يرحم أيام الطوب النيئ دا غير الأسفلت جوه البلد





دا بيت العيلة القديم كان طوب نيئ و جار عليه الزمن

و جنبيه بيت ابن عمي المبني جديد




و لقيت حنفية المياه العمومية اللي قدام البيت القديم إتلغت علشان الميه دخلت البيوت



و قابلت ولاد أعمامي و عيالهم صلة الرحم حلوة برضه الواحد ما بيشوفش قرايبه و ينزل البلد غير في المناسبات يعني لازم يكون فرح أو ميتم أو عيد

الدنيا تلاهي و كل واحد مشغول في بيته و عياله و شغله

بعد ما قابلت كل قرايبي اللي أقدر أشوفهم نزلت مع بابا لبلد أخوالي عزبة مجاورة لقرية أعمامي علطول

و ده بيت العيلة هناك

قابلت أخوالي و ناس ما شوفتهمش من زمان وروحت على المغرب

بس صراحة رحلة البلد ريحتني نفسياً جداً ربنا ما يبعدكوش عن حبايبكم يارب



هناك 11 تعليقًا:

عصفور المدينة يقول...

اجمل بوست قرأته بمناسبة العيد والله
كل عام وأنت بخير
على فكرة أنا أصلي من بلد جنب شبراخيت برضه بس تبع كفر الشيخ تبقى إيه

مهندس مصري يقول...

تبقى دسوق و لو قدام شبراخيت بالضبط تبقى محلة ديٌاي
مضبوط و لا ايه ؟

عصفور المدينة يقول...

صح ليك مكافأة

مهندس مصري يقول...

إيه هيه
إيدك عليها ناولني قوام

دعوة الفردوس يقول...

كل سنة وحضرتك طيب

بجد اجمل لحظات اللي بتبقى في البلد وسط الخضرة والجو الرائع ده
وحضرتك كده اغريتني اني انزل بوست عن البلد بتاعتنا و العيد هناك بس خليها في العيد الكبير بقى
وعلى فكرة انا برده كنت بفكر اعمل بوست كده عن الريف بمان اني قضيت حوالي شهر هناك في الصيف
وبالصور برده يافندم
يلا خير

بس حضرتك محسسني انك مروحتش هناك من العصور الوسطى
يعني اتفاجئت بالحنفية العمومية وبالبيت اللي بالطوب الني وعمال تتفاجأ من ساعة مانزلت من العربية
انتوا مش بتروحوا ولا ايه:)

عصفور المدينة يقول...

بعتها لك بالإيميل وصلت
ولا لسة دعوة ع الفيس بوك

عصفور المدينة يقول...

اختبر الإيميل أحسن الهوتميل ده مش بيعرف ابوه كله ع الجنك

مهندس مصري يقول...

عصفور المدينة
-------------
وصلت و أخيراً شوفت صورتك الحقيقية مش العصفورة
أعتقد هي دي المكافأة
دعوة الفردوس
-------------
مش مفاجأة و لا حاجة أنا بأحكي لكم إنما أنا كنت في البلد من شهرين علشان وفاة عمي و دفنته و الجنازة و العزاء من أول اليوم لنهاية اليوم 11 باليل يعني
بس أول مرة أحكي على البلد فبأعرف الناس

Ρών, يقول...
أزال المؤلف هذا التعليق.
غير معرف يقول...

السلام عليكم
كل سنة وإنت طيب يابشمهندش.. وربنا يعيد علينا وعليكم الأيام بخير
وبجد عشت معاك جو الريف المصري الأصيل, والهدوء الساحر, والحضرة اللي ترد الروح, بعد طول الروح اللي بنشوفه في المدينة وزحمتها وقرفها
مش حتكلم كتير بس حبيت أسلم عليك, خصوصا وإننا نادرا ما نتقابل
أخوك محمد أبو قرن
جامع عطا-بجمهورية دمنهور الإسلامية المتحدة:)

مهندس مصري يقول...

محمد أبو قرن
=============
شيخ شيوخ شباب دمنهور
إيه النور ده
والله المدونة نورت
و شرفتني