الثلاثاء، أكتوبر 23، 2007

طلعت السادات ضد الخصخصة

قام طلعت السادات بنشر صيغة توكيل في جريدة الدستور في العدد الإسبوعي منذ 3 أسابيع كتب فيها التالي
توكيل
وكلت أنا
المقيم في
بطاقة رقم
و أعمل
السيد النائب طلعت السادات المحامي بالنقض و عضو مجلس الشعب في استرداد أموالنا المهربة و المودعة بالخارج و إستعادة جميع المصانع و الشركات المملوكة للشعب و التي تم بيعها و لسيادته اتخاذ جميع الإجراءات القانونية و القضائية اللازمة أمام جميع الجهات الداخلية و الخارجية
الموكل
الإسم
العنوان
على كل مواطن يتضامن معنا في دفاعنا عن حقوق الشعب أن يقوم بتوثيق هذا التوكيل و إرساله إلى مجلس الشعب , القاهرة - صندوق 227
انتهت صيغة التوكيل
من ساعة ما قريت التوكيل و أنا محتار أعمله و لا لأ
زمايلي في الشغل بيقولوا لي إنت معارض بٌق وخلاص و ساعة التصرف العملي ما بتعملش حاجة لو بتتكلم بجد إعمله و لو ما عملتوش فضها سيرة و ما تخوتش دماغنا بكلام المعارضة بتاعك
ايه رأيكم أنا حأحط إستطلاع رأي وعايز رأيكم و ياريت تعليقاتكم علشان أنا ملاحظ إن المدونين ما إهتموش بالموضوع ده
تحديث
أنا حطيت إستطلاع الرأي فوق على اليمين وهو سؤال و أربع إجابات
إيه رأيك في توكيل طلعت السادات؟ و هل هتعمله؟
1- فكرة قانونية ممتازة لازم نعمله كلنا
2- لا هيقدم و لا هيأخر بس نعمله و خلاص
3- طلعت السادات عامله بنط شهرة و مقارفة في الحكومة يعني لمصلحته الشخصية فضك منه
4- ما نعملوش مفيش فايدة
رجاء الإختيار من الـ 4 إجابات و لو تحب تعلق و تقول إخترت كده ليه يبقى مية مية
و مدة الإستطلاع تنتهي بنهاية 31 أكتوبر 2007

هناك 26 تعليقًا:

عصفور المدينة يقول...

هي الفكرة حلوة ولكن لو صدقت النوايا

وهذا أساسا عمل مؤسسي ولا يستطيع شخص يقوم له وحده وخاصة إذا كان هذا الشخص عليه علامات استفهام وتعجب وربما نجمة وشباك

وأنت تعلم أن الحلول في هذه الحالة هي كرسي في الكلوب أو فضحية جنسية وتنتهي الفرقعة وتنتهي أحلام الشعوب وهذه مسكنات الديموقراطية السماح بهامش من الجعجعة بدون طحن

ولا يقال أن هذه خطوة إن لم تنفع فلن تضر لا بل المحاولات الفاشلة تضر وتزيد من جرأة الظالمين إذا عرفوا آخرها


العولمة 100=92.5

ضد الخصخصة وضد العولمة
يعني لو كان السيد طلعت بدلا من أن يختزل الشعب في شخصه بتوكيلا يقوم بعمل لجنة مثلا قانونية تقوم بالأمر لكان أحكم

EmY يقول...

انا شخصيا مش بحب ولا بطمن لطلعت السادات
و مستحيل اعما توكيل زي ده
انا بشوف انه راجل بتاع مشاكل و غاوي شهره و طولة لسان

مهندس مصري يقول...

طيب أنتوا علقتوا فين تصويتكم في إستطلاع الرأي فوق على اليمين ما يتوهش
إختاروا إختيار من الأربعة
و شكراً لسرعة الرد
عصفور المدينة
-------------
دايما سباق ببوستاتك الجديدةو القديمة ربنا يكرمك دايما يارب
إيمي
----
أنا حاطط إختيار نمرة 3 قريب من ردك إختاريه

معماري مصري يقول...

ربما يكون طلعت غاوي شهرة وفرقعة وربما ان الكلام ده كله لن يجدي ولكن مهم ان التوكيل يتعمل لان ما سيظهره التوكيل لو صدق رفعت ورفع القضايا بجد حيعرفنا كلنا حجم المشكلة الحقيقية والذي اعتقد انها حتكون فرقعة اعلامية كبيرة جدا تتناقلها وسائل الاعلام وتتبين ردود افعال المصريين داخل مصر وخارجها

معماري مصري يقول...
أزال أحد مشرفي المدونة هذا التعليق.
Mirage يقول...

مين طلعت السادات اللى نتلم حواليه يعنى

الموضوع مش مستاهل كل القلبة دى خالص

وانا مش مقتنع بطلعت ده اصلا

Ragi يقول...

باشمهندس
طلعت السادات فى رايى طبال زفة وعلى راسة هو عليته بطحات موش بطحة واحدة
، وهو غاوى منظرة وشهره
فاكر الاسد اللى اخذه معاه فى حملته الانتخابيه؟ هى دى نوعية طلعت السادات وامثاله
مدونتك جميلة
وانشاء الله الزيارات لن تنقطع

Desert cat يقول...

هو انا حاسه ان الموضوع ده مش جايب همه حتى مهما عملنا
بس مش مشكلة نحاول
لعلى وعسى
على فكرة انا صوت
ولو كان ينفع الطم مكنتش حقول لاء

Desert cat يقول...
أزال أحد مشرفي المدونة هذا التعليق.
ammola يقول...

طبعا كلام زى عدمه ويمكن ييجى من وراه بلاوى كتير اولها جمع التبرعات والجبايات من الشعب لبناء معتقل كبيييير يلموا فيه الناس اللى حتعمل التوكيل
طيب انا عايزة الناس تعمللى توكيل علشان اعرف طلعت وقرايبه جابوا فلوسهم منين واللا هما فاكريننا ناسيين بدايتهم كانت ازاى
اللى يعمل خطوة زى دى لازم الاول يكون ناصع البياض

جبهة التهييس الشعبية يقول...

التوكيل ده يتعمل ازاي وامتى

مهندس مصري يقول...

معماري مصري
------------
أحترم رأيك بس فعلاً طلعت السادات مش هوا الشخصية ناصعة البياض اللي ممكن الناس تتلم حواليه لو لجنة وطنية من كل التيارات السياسية كانت بقت أحسن
ميراج
-----
مرحباً بعودتك ياريت ما تقطعش الزيارات
راجي
-----
الله يكرمك وسعيد بزيارتك دايماً
قطة الصحراء
------------
أول مرة عندي يا مرحب
و بلاش تلطمي لو لطمنا على كل حاجة تستاهل اللطم حنسيب أشغالنا و نشتغل معدادتية على حال البلد
أمولة
------
متفق معاكي تماماً
جبهة التهييس الشعبية
----------------------
أنا سألت واحد محامي صاحبي و قال إن ده توكيل قضائي خاص يعني زي ما توكلي أي محامي في أي قضية عادي و بيتعمل في الشهر العقاري ب 15 جنيه بس
و مقره عندنا في دمنهور في مجمع المحاكم في الدور الأرضي و شوفي عندك مقره فين بقى
و امتى ؟ في أسرع وقت ممكن
بس ما قولتيليش رأيك في طلعت و في التوكيل و في الحوار كله

دعاء يقول...

الواحد فعلاً مش عارف ..توكيل زي ده لازم الواحد يكون واثق تمامًا في من سيوكله له.. وطلعت السادات ظريف على الشاشة و في التصريحات ويقول كلام جميل يفك غيظ الواحد ولكن كل هذا يغلف بشكل أستعراضي ميخليش الواحد يثق في صنع التوكيل له..بأشعر أنه من أنصار مبدأ ضجيج بلا طحن ، أحيانًا أشعر أن احنا مبقناش الشعب والجيل الذي يمكنه ان يضع ثقته في فرد و في ذات الوقت لا يوجد الآن هذا الفرد الذي يمكن أن نضع ثقتنا فيه.. لا احنا الشعب أيام ثورة 1919 ولا طلعت السادات سعد زغلول..

الجمعاوي الاصيل يقول...

قكرة حلوة ولكن لو جاءت من شخص غير طلعت السادات فانا اعرف ان طلعت السادات يحب الشهرة وهو رأي ان الاعلام بعد عن ودائرة الضوء انصرفت عنه فاحب ان يعيدها مرة اخري بهذا الموضوع
فانا ارفض ان يستغل احد الشعب كي يصعد هو على اكتافهم
صاحب مدونة ميخا

simple girl.. ..simple dream يقول...

انا حطيت صوتى هنا ان طلعت بيعمل فرقعة اعلامية لنفسه

ماحدش بيعمل حاجة فى البلد دى غير عشان مصلحته الشخصية

ولو طلعت فعلا رفع القضيه وجه حد قاله خد 2.5 جنيه واتنازل
هيتنازل فورا وهياخد ال2.5

هما دول اهل السياسة فى مصر

عشان كدة انا ماليش اى دعوة بالسياسة واصلا مبحبش اتكلم فيها
لان الفساد للركب

مهندس مصري يقول...

دعاء
-----
و الجمعاوي الأصيل
--------------
و فتاة بسيطة حلم بسيط
---------------------
كلكم أول مرة تشرفوني و يارب ماتكونش الأخيرة
و رأيكم واحد و هوا رأي الأغلبية لغاية دلوقت
ماتنسوناش بعد كده

مهندس مصري يقول...

فتاة بسيطة حلم بسيط
---------------------
يعني ايه ؟

ماحدش بيعمل حاجة فى البلد دى غير عشان مصلحته الشخصية

ولو طلعت فعلا رفع القضيه وجه حد قاله خد 2.5 جنيه واتنازل
هيتنازل فورا وهياخد ال2.5

هما دول اهل السياسة فى مصر

عشان كدة انا ماليش اى دعوة بالسياسة واصلا مبحبش اتكلم فيها
لان الفساد للركب

دا إنت فكرتك سودا قوي عن البلد
أمال المدونين اللي زينا بيحولوا يعملوا ايه
أمال الإخوان المسلمين بيعملوا ايه
أمال أيمن نور ربنا يفك سجنه كان بيحاول يعمل ايه
و حركة كفاية و كل المعارضين الشرفاء في البلد بعملوا ايه
ثم ايه هيه السياسة مش نظام حكم و إدارة البلد اللي إحنا عايشين فيها و كل قرار من السياسين بيؤثر على حياتنا تأثير مباشر
يبقى لازم نتكلم و ما نكونش زي الشيطان الأخرس اللي ساكت عن الحق
و أفضل الجهاد في سبيل الله كلمة حق عند سلطان جائر
أنا ما بقولش إنك كده
بس بقول لازم نسيب السلبية اللي إحنا فيها و نعمل حاجة

أنونيمس يقول...

بص بقى ياعم
طلعت السادات ده بصراحة
مش عارف ليه لا أشعر أني أستطيع الوثوق فيه
مش عارف ليه تحديداً
بس هو كله على بعضه كده
بيحسسني بعدم الارتياح
كلامه انشائي شويتين
وبصراحة ليه هو مثلا معملش جبهة من محامين عديدين مشهورين من الشخصيات العامة وطلب التوكيل بإسم الجبهة دى ونسق لحملة منظمة

الموضوع رغم نبل مقصده شامم فيه ريحة التربح والاستغلال
ديماجوجية يعني يا معلم
:)

رغم كده
عندي شعور قوي جداً
اننا لازم نعمل التوكيل ده

لو عاوزين ندافع عن حقوقنا
لازم ناخد خطوة

منك لله يا شيخ
حيرتني الحيرة اللي انت فيها
أعمل ايه انا بقى دلوقتي؟؟؟؟؟؟؟؟؟

mazlomen يقول...

والله نعمله وخلاص

بس برده أنا حاسس أنها بروبجندا

وبجد سعيد بالتواصل معاك
يابشمهندس

مهندس مصري يقول...

د أنونيمس
---------
سلامتك من الحيرة يا دكترة
بس فعلاً الحل هوا عمل جبهة قانونية وطنية تعبر عن معظم إن لم يكن كل التيارات السياسية الحقيقية في البلد و ساعتها الناس حتعمل التوكيل
لكن قبل كده الله أعلم
مظلومين
---------
أول زيارة ليك شرفتني
روح إعمل التوكيل في الشهر العقاري و إبعته على العنوان المكتوب
الله يوفقك

الفاتح اليعقوبي يقول...

السلام عليكم

بشمهندس
هو المشكلة ان خطوة زي دي في صاحبها يعني عليه اختلاف جااامد جدا واراه وتصرفاته صعبة شوية
علي العموم التحرك الايجابي شئ جميل


بس القصة كان ممكن تبقي شكلها افضل واكثر فعالية لو تمت عن طريق مؤسسة مثل نقابة المحامين او اي لجنة حريات موثوق منها وهكذا
عايزين نحاول رفض الحل بس برضه نوضع بديل


اما تصويتي
نفس الكلام طلعت السادات رجل بتاع شهرة ومنظرة
والسلام اخي الكريم

Ahmed Al-Sabbagh يقول...
أزال المؤلف هذا التعليق.
جمعاوى روش طحن يقول...

باشمهندس

وصلنى الميل بتاع حضرتك


معلش جييت متأخر

أنا علقت على الاستطلاع


و أزيد


" مالوش لازمة "

mazlomen يقول...

أدعوكم للأشتراك في الأستطلاع على مدونتي
وجزاكم الله خير

Ahmed Al-Sabbagh يقول...

الموضوع ده عدى عليا ازاى
انا اول مرة اسمع عنه
بس موضوع شيق اوى
وغريب بردو

انت رأيك ايه ؟


تحياتى

مهندس مصري يقول...

الفاتح اليعقوبي
----------------
الباشا بذات نفسه دا انا كده وصلت يا جدعان
فين الله أعلم بس وصلت برضه دا اليعقوبي مش أي حد يا إخوانا
رأيك هو الأغلبية

جمعاوي روش طحن
--------------
مقفلها كده ليه يا عم هيثم

مظلومين
=======
حصل

أحمد الصباغ
===========
انت اللي رأيك ايه