الاثنين، نوفمبر 12، 2007

رجل الحمار - جبهة المقاول

اللي متابعيني من زمان فاكرين البوست القديم رجل الحمار

كنت قلت إني حأكمله و أهو جه الوقت اللي الواحد يكمله فيه و يا ريت اللي ما قراهوش يروح يقراه

الجبهة الاولى جبهة المقاول


المقاول و الإشراف عليه و على صنايعيته و عماله و مهندسيه إن الشغل يطلع مطابق للمواصفات و سليم هندسياً و لا تشوبه شائبه

تحت الكلمتين دول يندرج حوار كبير

مفيش مقاول مهما كان كويس إلا فيما ندر إلا و بيحاول يكسب من مخالفة المواصفات و المقايسة و الرسوم الهندسية الخاصة بالأعمال

تبدأ الإشتغالات مع إستلام المقاول للموقع حيث يحاول المجادلة في تفسير منطوق البند الخاص بالحفر و هل يشمل إزالة نواتج الحفر من الموقع أم لا و هل يشمل تكسير الصخور و الخرسانات إن وجدت أم لا مع إن كل هذا مذكور صراحة في البند و لكنه الجدل العقيم و محاولة الحصول على أرباح إضافية بدون وجه حق

ثم يكون الصدام التالي عند أول صب للخرسانة و غالباً ما تكون الخرسانة العادية أسفل الأساسات و الخرسانة العادية هي خرسانة فقط و بدون حديد تسليح و توضع كفرشة أسفل الخرسانة المسلحة و أسفل البلاط سواء بالدور الأرضي أو السطوح أو الرصيف و لها إستخدامات أخرى

حيث يقوم المقاول بإحضار زلط من نوع أرخص ثمناً من النوع المذكور في المواصفات ويحاول إستخدامه في الصب مع المجادلة بالطبع في كمية الأسمنت المطلوب إضافتها للخرسانة رغم الوضوح التام لمكونات المتر المكعب للخرسانة في المواصفات و لكنه يجادل عملاً بمبدأ أهو كل اللي تطلع بيه من مهندس الحكومة مكسب و توفير في المصاريف

و طبعاً أنا ما بتدخلش عليا الحركات دي مادام البند واضح و صريح في المقايسة و المواصفات واضحة يبقى لازم تتنفذ و لا أتهاون مطلقاً في تنفيذها و مش مشكلتي إنه عايز يخنصر و يوفر علشان يكسب أكتر خصوصاً إن أي خطأ في كتابة أو تفسير البند يفسر لصالح المقاول يبقى الشئ الواضح المفروض ينفذ بدون جدال أو نقاش

نيجي بعدها لشغل الخرسانة المسلحة و بيبقى هم المقاول فيها إنه يوفر حديد التسليح بأي تمن خصوصاً بعد ما أحمد عز خلى سعر الحديد ولع نار

أنا طبعاً ما بتفرقش معايا أنا ليا لوحات التسليح و الرسومات الإنشائية تتنفذ على أكمل وجه و أتأكد من مطابقة المنفذ للوحات و ساعتها بس أسمح بالصب

يبقى أي محاولة للتلاعب أو أي سيخ حديد ناقص بأرفض إستلام السقف كله و يتم تدارك أي ملاحظات في السقف أو أي عنصر انشائي آخر (الأساسات من لبشة لرقاب أعمدة لسملات أو الأعمدة أو الأسقف بلاطات و كمرات إلخ) ثم يعاد الإستلام من أول و جديد و لو كله تمام يبقى نسمح بالصب

الخرسانات هيه هيكل أي مبنى و اللعب فيها ممكن يتسبب في إنهياره بس في مقولة متداولة بين المقاولين و بين العاملين في مجال الإنشاءات و بتقول

الخرسانة سرها باتع

يعني ممكن مبني هندسياً غير متزن و ما ينفعش يتبني و لا يقوم على الأرض و يتنفذ و يفضل واقف بس ما ينفعش نعتمد على القاعدة دي و اللي ينفذ شغل غلط لو فلت من عقاب الدنيا و المبنى فضل واقف و ما وقعش و لا شرخ و لا حصل له حاجة حيروح من ربنا فين هوا اللي شايف و مطلع وعقاب الآخرة لن يفلت منه
و قس على ذلك كل البنود خصوصاً إن الهيكل لو طلع سليم فلسه البركة في التشطيبات اللعب فيها ما يوقعش المبنى و يوفر فلوس كتير
يعني لو جاب نوع سيراميك أو بلاط أرخص من المطلوب شوفوا حيوفر كام
دا غير خلطة المحارة و الضهارة و كمية الأسمنت في كل منهما
والإكسسوارات من خلاطات المياه و الحنفيات و أكر و مقابض الأبواب و الشبابيك و خلافه
دا حتى أسلاك الكهرباء ليها مواصفات و لازم تتراجع
تخيلوا حجم المسؤلية و الأمانة الملقاة على الواحد و هو مطلوب منه متابعة و مراجعة تنفيذ ما يقرب من 80 بند في المبنى من أول ما يسلمه قطعة أرض فاضية للمقاول لحد ما يستلمه منه مبنى كامل تماماً (تشطيب مفتاح) و الكلام بيبقى بالملايين يعني مسؤلية كبيرة
لا و شوفوا حجم المفارقة إن أنا بأشرف على بناء شقق سكنية و لا أستطيع شراء شقة و ليس معي ثمنها
الحمد لله على كل حال
ملحوظة:- أنا آسف لو كان البوست ده بايخ و رخم لأنه بيتكلم عن الشغل بس أهو الواحد بيفضفض

هناك 13 تعليقًا:

Karshet Nafas يقول...

تمام يا كبير المهندسين
الخرسانة سرها باتع

عصفور المدينة يقول...

يا هندسة البوست ده رائع وجميل جدا تبادل الخبرات بين الناس من فوائد التدوين لو المواضيع كلها فضفضة وانا مخنوق وفتحت الشباك لقيت نفسي باحب القمر والنجوم والذي منه
وأسأل الله أن يزوجك ويمن عليك بواسع رزقه أنت وجميع الشرفاء

مهندس مصري يقول...

كرشة نفس
========
خليتني كبير الله يكرمك دا كبير دي درجة أولى و أنا يادوبك درجة تالتة

عصفور المدينة
============
رافع روحي المعنوية يا بشمهندس علطول
وربنا يسمع منك و يكرمك

يوميات عيل مصري يقول...

يبقى كان عندي حق لما قلت عاوزين حد يتكلم عن المهن اللي بيتغل فيها
بيشتغل فيها
يمكن مع تبادل الخبرات دي .. الناس تستفيد من بعضها
خواطر نفسية هامة يا باشمهندس محمد
زودنا كمان وكمان

Ahmed Al-Sabbagh يقول...

والله بوست رائع وجميل
عمرك ما تخيب ظنى ابدا لما بدخل عند

تحياتى

الجمعاوي الاصيل يقول...

بوست جامد جداً بارك الله فيك
ورزقك الجنة وزوجك من حور العين
اللهم امين
صاحب مدونة ميخا

أنونيمس يقول...

ازيك يا بشمهندس؟؟
لك وحشة والله
.
.
ليا سؤال: هو سعر المواد الخام لما يرتفع بعد الاتفاق مين اللي بيتحمل الزيادة؟؟هل المقاول ولاالجهة المتعاقده؟؟
.
.
مش الخرسانة بس اللي سرها باتع

حاجات كتيييير اليومين دول بقى سرها باتع

عليوه يقول...

منور يا هندسه واحلى مسى على كل دمنهورى وكل مصرى ماله البوست يا مان وفيها ايه وربنا الواحد استفاد وعرف حاجات ما كانش يعرفها عن شغل المقاولين ولا طريقه تفكيرهم انا عن نفسى كنت فاكر انه اخرهم بس يغشوا فى كميه الاسمنت وبس مش فى كل حاجه يعنى وفعلا استفدت كتير جدا شكرا يا باش مهندس

الفاتح الجعفري يقول...

ربنا يكرمك يابشمهندس ويعينك اهم حاجه عشان تريح نفسك في اي حاجه انك تعامل ربنا واللي مش عاجبه يخبط دماغه في الحيط عشان لو الواحد حب يرضي الناس كلها هيروح في دهايه خصوصا في مصر وربنا ييسرك امرك وجزاكم الله خير

مهندس مصري يقول...

يوميات عيل مصري
===============
منورني و لو إنه ما كانش التعليق اللي في بالي
مستعدين لإفادة الناس كلها بس اللي يسأل و إحنا نفيدوا :)

احمد باشا الصباغ
===============
فضك من الكلام الدبلوماسي و إتكلم في صلب الموضوع
و لو إنك منورني دايماً من غير وصل نور
ببلاش يعني :)

الجمعاوي الأصيل
=============
آآآآميييييين

أنونيمس
=======
و الله إنت كمان ليك وحشة يا دكترة بس إنت اللي غاطس نجيبوك منين
بجد فرحت لما شوفت تعليقك بعد غيبة طويلة
يص يا سيدي أي زيادة في الأسعار للمواد الخام أو اي بند بعد ترسية المناقصة و صدور أمر الإسناد يتحملها المقاول لوحده و ده بيبقى شرط في العقد ( المناقصة يعني )
بس ممكن لو زادت الأسعار بشكل كبير ممكن المقاول يقدم طلب للجهة الحكومية المتعاقد معاها و لجنة المشتريات العليا بها تملك أن تعطيه زيادة في الأسعار في حدود 10% من سعر كل بند على حدة
حسب البنود اللي زادت يعني
و لو طلب اكثر من كده يبقى ده لازم يكون قرار سيادي من الوزير أو رئيس الوزراء
و لو مش عاجبه القرار من حقه يرفع قضية و يدوخ في المحاكم
بعض المقاولين مازالت قضايهم في المحاكم بيطالبوا بفروق الأسعار اللي تضاعفت حوالي 2.5 مرة
ساعة تعويم الجنيه ربنا يديهم طولة العمر :(

عليوه
=====
إنت تؤمر يا باشا
دا إحنا عنينا لولاد بلدنا و حينا

الفاتح الجعفري
=============
ما هوا ده اللي الواحد بيعمله خصوصاً في الشغل
بيعامل ربنا و يعمل ما يرضي الله بغض النظر عن موقف الناس
يعني ساعات بأجيب للمقاول حقه من الشركة اللي أنا شغال فيها لو شايف إن ليه حق و مظلوم و ساعات المدير بتاعي بيزعل مني لكن الحق حق سواء للشركة أو للمقاول

خمسة فضفضة يقول...

السلام عليكم ورحمة الله وبركاته

الله يعينك عليهم ويثبتك علي الحق

و لا تياس ان شاء الله هاتلاقي مقاولين شرفاء بيراعوا ضميرهم ويخافوا ربنا

تحياتي

DONKYYYYYYY يقول...

السلام عليكم
اخويا المهندس القرفان.الموضوع مش زى مانت شرحته خالص أنا آسف .كل مقاول امنيه حياته انه يعمل شغل جميل ويفرح بيه ..بس لازم يكسب ويغطى المصاريف الكبيره والى منها لو انت مش بتاخد غيرك بياخد الى فوق الى بيوقع على الشيك وخلافه..المشكله الأساسيه فى السعر مش فى اى حاجه تانية.وانا عاوز افيدك فى النقطه دى بالذات.كل الدول العربية والأجنبيه والأفريقيه الى بيفهم والى مش بيفهم لهم نظام فى المناقصات ومصر لها نظام تانى مختلف .تخيل هى الوحيدة على مستوى العالم..العالم كله ماشى بنظام حاجه اسمها السعر التقديرى.فيه لجنه من ناس محترمة وبتفهم بتعمل سعر للمناقصه وأقرب سعر للسعر التقديرى هى الى بيشتغل . لكن فى مصر بياخدوا أقل سعر . وهى دى المشكله . مع أن نظام السعر التقديرى أشتغل شويه ورجعوا لغوه تانى ..دى كل مشكله المقاولات فى مصر...لازم السعر التقديرى ..كمان مافيش حاجه إسمها زياده 10% فى كل الكون لو الأسعار زادت زياده معلنه المقاول ياخد الفرق فورا فى مستخلصاته ...وأنا تحت أمرك فى أى استفسار وسعيد بالمشاركه معاكم ..أنا مهندس مدنى عجوز ومقاول..وبطلت الأتنين وشغال حمار اليومين دول

مهندس مصري يقول...

مهندس مدني عجوز و قديم و مقاول
==============================
بص يا بشمهندس أنا عن نفسي كلي ثقة في مديريني في المدني ما بياخدوش حاجة و متأكد من كده بالنسبة لبتوع الشئون المالية و المشتريات حياخدوا كام يعني
بيتهيأ لي مش كتير و لو إني ضد مبدأ الرشوة اساساً
بالنسبة لزيادة الأسعار معاك حق بس نعمل ايه أهو قانون من ضمن القوانين الوسخة اللي عايزة النسف و التغيير بقوانين للناس العاقلين
بالنسبة للسعر التقديري فده معمول بيه عندنا أمال بيطلع الإعتماد المالي للعملية قبل الطرح على أساس إيه
ما هو على أساس السعر التقديري
بس المشكلة في ايه ؟
إحنا درسنا في مادة إدارة المشروعات في الكلية إن العطاء اللي أقل من 90% من السعر التقديري يترفض لعدم الجدية في وضع الأسعار و العطاء اللي فوق 110% من السعر التقديري يترفض للمغالاة في وضع الأسعار و بعدين العطاءات اللي تفضل يتم إختيار أحسنها فنياً و ليس أقلها سعراً
ده المفروض اللي درسناه نظرياً
اللي بيحصل عملياً أنه بيتم فتح المظاريف الفنية و يستبعد كل من هو غير مطابق فنياً للمواصفات ثم يتم فتح المظاريف المالية و إختيار أقل سعر لو ما زادش عن 110% من السعر التقديري
و لو كل الأسعار زيادة بتتلغي العملية و يعاد طرحها بعد إعادة دراسة السعر التقديري
طيب بعد ما ياخدوا أقل سعر فكرك بترسى عليه العملية لأ دا في أي هيئة حكومية إلا إحنا
في شركات هيئة كهرباء مصر نظام خاص إسمه المفاوضة
يعني يجيبوا المقاول بتاع أقل سعر و يفاوضوه و يحاولوا ينزلوا السعر بتاعه كمان مرة و لو 0.5% حتى و لو رفض يجيبوا اللي بعده و يحاولوا يخلوه ينزل أقل من سعر الأولاني
بس غالباً ما حدش بيرفض ينزل في المفاوضة بس بتختلف النسبة من مقاول للتاني
و بعدها ترسى عليه العملية و يستكمل التأمين النهائي و يطلع له أمر الإسناد و ييجي يستلم الموقع و أستلمه أنا أو واحد من زمايلي

و على فكرة مش كل مقاول عايز يكسبها بالحلال فيه مقاولين يعرفوا ربنا و فيه ضلالية و أنا ما عممتش فيه الكويس و الوحش
وأنا بأحب أتعامل مع المقاول المهندس لأنه بيكون فاهم و لما يحب يخمني و يوفر بيعملها بذكاء ما يضرش بالشغل
إنما المقاةول التاني بيقى عايز يوفر في كل حاجة و إن شاء الله لو نزلت كوم تراب بعد الـ 11 سنة
واحدة إستلام نهائي و 10 ضمان مدني
مالوش دعوة ان شالله تخرب ما تعمر
سعيد بتشريفك ليا يا بشمهندس
و خبرة حضرتك على دماغي من فوق