الاثنين، نوفمبر 19، 2007

رجل الحمار - جبهة الروتين و المديرين

الجبهة التانية - الروتين و أوامر المديرين العجيبة
تعالوا نفتكر أنا كنت كاتب ايه زمان و نكمل بعده
الجبهة الثانية : الروتين و اللوايح اللي بترغمك علشان تعمل مستخلص للمقاول مثلاً تملأ إستمارات عتيقة و تعمل كذا نسخة بالكربون لأن إختراع ماكينة تصوير المستندات غير معترف بيه
أما عمله ببرنامج للجداول الحسابية مثل الإكسل فهو نوع من الخيال العلمي الغير معترف به حكومياً
يبقى نعيش عيشة أجدادنا الموظفين الأوائل و نستعمل الإستمارات العتيقة و الكربون و الكوريكتور و خلافه و محروق أبو الكمبيوتر
دا غير تزمت المديرين اللي عايزة تلزمك بمواعيد حضور و إنصراف !!! عجيبة والله
المفروض ان مواعيد الحضور و الإنصراف من 8 ص:2.30م
للناس اللي قاعدة على مكاتب إنما الناس اللي مرمية في المواقع و التنفيذ مش من المفروض تتربط بمواعيد
لأن لما المقاول و العمال ييجوا الساعة 9 ص أنا أروح قبلهم بساعة ليه !!!
و لما يقعدوا يشتغلوا للمغرب حأسيبهم و أمشي الساعة 2.30م
لأ لازم أقعد معاهم و أراقبهم و أستلم الشغل المظبوط منهم و أرفض الشغل اللي فيه ملاحظات لحد ما تتصلح و أستلمها مظبوطة
ماشي دا كان زمان قبل ما يطلع لي في المقدر و المكتوب مديرين مش من تخصصي و بيدوني اوامر مش فاهمينها و لما ما تتنفذش يبقى أنا غلطان و لما تتنفذ و تعمل مصيبة أنا اللي أشيلها طبعاً
يعني أنا مهندس مدني وواقف في شغل مدني ألاقي مهندس ميكانيكا بدرجة مدير عام جاي يحشر نفسه في الشغل بحجة إن الرفع المساحي لموقع المشروع يهمه لأنه شغال معانا في نفس المشروع و ياريت يقف و يسكت لا بيسأل في تفاصيل دقيقة لو شرحتها له معناها إني حأشرح له علم هندسة المساحة بالكامل !!!
هوا راجل طيب بس ليه يتدخل فيما لا يعنيه
و لا رئيس القطاع المسؤول عن المشروع بالكامل مهندس ميكانيكا برضه بس بيطلب طلبات غريبة
يعني عايز يطلب اي حاجة فتتنفذ حتى لو كانت ليست في سلطتي أو ليست في تخصصي
عايز مهندس كل شيئ كان كولشينكان يعمل كل حاجة و أي حاجة
حاجة تقرف بجد خصوصاً لما يتسبب تنفيذ طلبات مدير المشروع في مشاكل ليا مع المدير العام في قطاعي و هو رئيسي المباشر في الوقت نفسه و الذي أحبه كأخ أكبر
لو كل واحد يركز في تخصصه حننجز شغل أحسن بس نعمل ايه في مصر و أحوالها

هناك 24 تعليقًا:

EmY يقول...

الكلام ده عادي جدا انت في مصر المنهوبه
تخصص ايه بس و الكوسه تروح فين
رجل الحمار مش عارفه تعمل ايه ولا ايه

عصفور المدينة يقول...

أنا تاني
يلا أعانك الله يا محمد وكويس إن عندكم
كوريكتور الاختراع ده ماكانش عند أجدادنا وبعدين أنا اتعلمت من فترة ليست بالقليلة إن مش كل الكلام يترد عليه فيه ساعات بيكون كلام ما يتردش عليه ويبقى الصمت أحسن رد يتعب اللي قدامك وساعات بيكون فرقعة صوتيه يعني هو عايز يسمع آه وحاضر بس مش عايزك تعمل اللي بيقوله

الفاتح الجعفري يقول...

ربنا يعينك يابشمهندس فعلا لو كل واحد التزم بشغله وتخصصه كان الواحد استريح بس هنعمل ايه العرق الفرعوني بقي وانا المدييييييييير اللي عارف القرد مخبي ابنه فين وربنا يعافينا ربنا يكرمك يااخي

مهندس مصري يقول...

إيمي
====
هوا عادي بس يحرق الدم
ثم الكوسة هنا ملهاش دعوة أنا مهندس مدني يبقى اللي يشغلني و يشرف عليا يكون مدني زيي إيه الصعب في كده ؟
ليه كل واحد ما يلتزمش بتخصصه
و لو مدير المشروع ( انشاء محطة توليد كهرباء ) عايز يعرف حاجة يطلب تقرير رسمي من مديري المدني زيي و الكلام يكون ماشي سليم لكن اللف و الدوران و إسلوب اللي يدي أمر و عايزه كن فيكون بدون فهم و لا تخطيط دا إسلوب فاشل و محبط للتقدم في أي عمل ثُم دا حتى المثل بيقول إدي العيش لخبازه

عصفور المدينة
============
يا حبيبي يا بشمهندس تصمت إزاي إذا كان واحد بيديك أمر دلوقت و بيقولك نفذه دلوقت حالاً بدون أي إمكانيات متوفرة لديك و بعد نص ساعة يقولك خلصت و لا لسه دا عفريت سيدنا سليمان ما يقدرش ينفذ الطلبات العجيبة دي
ربنا يعينا و يصبرنا على ما بلانا

الفاتح الجعفري
=============
فعلاً يا أخي نعرة الإستكبار بالجهل
أنا المدير يبقى عارف كل حاجة حتى لو مش في تخصصي بس شكله بيبقى بايخ لما يهرتل بكلام غلط هندسياً قدام الأغراب و هوا واجهة للمشروع و الشركة كلها

الفاتح اليعقوبي يقول...

استاذي عامل ايه ياهندسة انا بدخل مدونتك فاجد ان التدوينة طويلة مبقدرش اكمل ياحبي
والله العملية بسيطة
رسول الله (صلي الله عليه وسلم)يقول :اذا وسد الامر الي غير اهله فانتظر الساعة
دي مشكلة بلدنا اغلب اللي ماسكين وظائف الان في غير تخصصهم وهم ليسوا اهل له بل ويضعوا انفوهم فيما لايخصهم


هتعمل ايه ؟؟
انت فاكر حضرتك بمتاسبة الروتين
كان في برنامج في الراديو اسمه همسة عتاب بتاع
الموظف اللي كل شوية يقول
بكره ياسيد بكره ياسيد
فوت علينا بكره ياسيد
القصة اكبر من بوست واكبر من مجرد تعليق القصة في شعب ساكت يري الخطا ويسكت ثم يسكت حتي اوشك الخطا ان يقتله
والسلام اخي الكريم

مهندس مصري يقول...

الفاتح اليعقوبي
================
نورتني يا راجل بقى الحكاية كده البوستات طويلة فبتبص بصة و تمشي
لا دا أنا كده ليا عندك حق عرب و لازم نقعدوا فيها قعدة
يا بني أنا رغاي فإتعود على كده و إستحملني شوية دا أنا عمري من ساعة ما دخلت عندك ما إستطولت بوست
:)

يوميات عيل مصري يقول...

أحلى باشمهندس
معلش حبيبي ، جيتلي على الجرح، اصل أخوك موته وسمه الروتين، واللي مابيفهموش في شغلهم يتكلموا فيه، والله العظيم عند حق تقرف من العالم دي، مش من مصر .. دول يخنقوا .. تحياتي لمشاعرك الجميلة

دكتور حر يقول...

سلاماتي للمهندس

انت فعلا جيت على أصعب جرحين مطلعين عين المصريين
لا مطلعين عين مصر كلها

لكن معلش

اصبر ولك الجنه ان شاء الله

دكتور حر يقول...

سلاماتي للمهندس

انت فعلا جيت على أصعب جرحين مطلعين عين المصريين
لا مطلعين عين مصر كلها

لكن معلش

اصبر ولك الجنه ان شاء الله

مهندس مصري يقول...

يوميات عيل مصري
===============
الروتين في مصر من أيام الكاتب المصري الفرعوني روتين عمره 7 ألاف سنة حنعمل ايه ؟

دكتور حر
=========
شرفتني بزيارتك و ياريت تواصل معايا

أنونيمس يقول...

معلش يا بشمهندس

ياما الواحد بشوف

روق
وهو كله هندسة
:))))))

مهندس مصري يقول...

أنونيمس
==========
ياه يا دكتور
دا الواحد شاف لما إستكفى بس لسه بنشوف ربنا يستر

Ahmed Al-Sabbagh يقول...

والله تسلم ايديك


وربنا يعيننا


ويعينك يارب


ويرحم البلد دى


تحياتى

مهندس مصري يقول...

أحمد الصباغ
==========
الله يسلمك يا أبو حميد ربنا يعيننا كلنا و يخليك لينا يارب

أحمد مصطفى يقول...

اذا ذكر الروتين يبقى انت اكيد... اكيد فى ...مصر

تحياتى
أحمد مصطفى

مهندس مصري يقول...

أحمد مصطفى
=========
بالظبط مصر بلد الروتين الرخم
منور يا بو حميد

Desert cat يقول...

يعنى هو مش عارف نفسه شغله فى المكيكانيكا ايه اللى حاشره فى المساحة ده
دى المساحة دى لوحدها عايز له فيا عشرين سنة لما يفهمها
ده كفاية علها الميزانية ولا الترافرس لو استوعب منه حاجه اصلا ....
الا قولى يا هندسة الراجل المدير بتاعك ده بيعرف يطلع القراءات من جهاز Waild وليه فى مكعبات الحفر والردم ..... ولا هو ازعاج كدا على الفاضى ...

مهندس مصري يقول...

قطة الصحراء
===========
انتي مهندسة زميلة و لا ايه؟
ايه جهاز Waild ده أنا ما أعرفوش
أنا أعرف الميزان و الثيودوليت و البلانشيطة و الـ Total Station و الـ GPS Mapper
ايه الجهاز بتاعك ده بقى ؟

لا يا ستي ما يعرفش أي حاجة و حتى ما بيقولش عدس

و ربنا ما يحكم عليك بناس بتتدخل في اللي مالهاش فيه

ma2tshren يقول...

عادى ياباش مهندس أهلا بيك في مصر وطن كبر تعيش تنتعش وأحشر منخيرك في الى ليك ولى ملكاش ولسه ياما بنشوف بجد مجال الشغل غير فكرتى عن الحياه تماما

نانو يقول...

اولا أزيك وعامل ايه ومتشكرة جدا على سؤالك عليا
ثانيا انا قرأت التدوينة دى بسرعة كده ومش حرد دلوقتى عليها انا عايزة اقرأة بشويش اللى فاتنى من تدويناتك لأن انا فاتنى كتيير جدا
ثالثا مبروك على تطوير المدونة يعنى انا اغيب شوية ارجع الاقيك عامل كل ده مبروك

مهندس مصري يقول...

ma2tshren
=========
المهم اننا ما نسكتلهمش و نسيبهم يهبلوا لازم يقفوا عند حدهم

نانو
====
D: لولولولولولوليييييييي
زغروتة حلوة يا جدعان
نانو عادت بعد طول غياب
ألف حمد لله على السلامة

ابن عمر يقول...

اصبر واحتسب اجرك عند الله

مهندس مصري يقول...

ابن عمر
=======
صابر وا الله و محتسب الأجر عند الله و أشكر لك مرورك

الفاتح الجعفري يقول...

ايه يابشمهندس اتأخرت علينا ليه فين البوستات الجديده مينفعش الكلام ده