الأربعاء، نوفمبر 28، 2007

رجل الحمار - جبهة الأسافين من الزملاء

تعالوا نكمل و نفتكر أنا كنت كاتب ايه زمان و نكمل بعده

عارفين المثل اللي بيقول الشاطرة تغزل برجل حمار
المثل ده هو القاعدة الأساسية للعمل مهندس في الحكومة
خصوصاً لو كنت نضيف و مش مفتح مخك ده من ناحية
و من الناحية التانية لما ما تكونش عبد الروتين و اللوايح الغبية اللي معمولة علشان توقف المراكب السايرة

الجبهة الثالثة : مكائد و وقيعة بعض الزملاء هداهم الله و هذه من أسوأ الجبهات عندما يأتي الزر أو الإسفين من

زميل أو زميلة تتعامل معهم على أساس من المودة و الأخوة و لكنهم يقوموا بنقل معلومات مغلوطة و مضللة عن العمل للقيادات العليا لكي يحظوا بثقتها و يصبحوا عملاء لها و جواسيس على زملائهم

نخش في التفاصيل


لما مهندسة زميلة كانت جاية الشغل و هيه خام ما عندهاش خبرة و علمتها كل ما أستطيع تعليمه لها بما يرضي الله و لم أتأخر في إجابة أي سؤال لها و كل شئ يأتي وقته في التنفيذ أشرحه لها
ثم تقوم هي بنقل معلومات مغلوطة عن العمل لكل من مدير الإدارة و المدير العام بل و بعد ذلك وصلت لرئيس القطاع بل و رئيس القطاعات أثناء زياراتهم المتباعدة للموقع
و تؤكد لكل منهم أنها تقوم بالعمل كله وحدها و أنه لولا وجودها في الموقع لتم تنفيذ العمل كله بصورة خاطئة
و هي توحي بذلك أنني إما جاهل لا أعلم أصول الشغل و أنا من علمها كل ما تعلم تقريباً في التنفيذ العملي
أو أنني مرتشي أتغاضى عن تطبيق المواصفات لصالح المقاول ويعلم الله أنني أخاف من القرش الحرام و لا أقبله على نفسي و أعلم جيداً أن كل جسد نبت من سحت فالنار أولى به
صحيح انها لم تصرح بذلك ولكنها كانت تلمح و كل لبيب بالإشارة يفهم
مع إنها هي التي لا تعرف شيئاً في أصول التعامل مع الناس بالإضافة لأن معلوماتها الفنية و الهندسية ضعيفة لأنها لم تنتظر حتى تنتهي العملية التي كانت ضيفة عليا فيها و هي انشاء 3 عمارات سكنية و لو انتظرت لإكتملت خبراتها و لكنها إستعجلت الطعن فيا و في كفاءتي
و مش فيا لوحدي بل و في المشرف الفني الموجود معايا و تحت إمرتي في العملية دي
من أهم الأشياء في شغلنا إسلوب التعامل مع الناس
و لما تكون مهندس الجهة المالكة (الحكومة) المشرف على مشروع معناها إنك قائد الموقع بالكامل و لابد ان تخاطب الناس على قدر عقولهم فمش ممكن أكلم الحداد و النجار زي ما اكلم العامل العادي و لا ممكن اكلم المقاول زي ما أكلم مهندس المقاول كل واحد و ليه أسلوب في التعامل معاه
و من اهم الأشياء التعامل مع الناس بأدب و تواضع و في نفس الوقت المعرفة التامة لكل التفاصيل الهندسية و الفنية بالأشياء التي سأقوم بإستلامها علشان ما حدش يضحك عليا و لو ما عرفتش أسأل مديري و زمايلي الأكبر مني سناً و خبرة و السؤال مش عيب العيب هو الفتوى عن جهل و زي ما بيقولوا يموت المعلم و لا يتعلم و ما حدش كبير على العلم
دايماً بأحط في دماغي و أنا بأتعامل مع الناس الكلام التالي ده
من تواضع لله رفعه حديث شريف
رحم الله رجلاً سمحاً إذا باع سمحاً إذا إشترى سمحاً إذا إقتضى حديث شريف
وَلَا يَجْرِمَنَّكُمْ شَنَآَنُ قَوْمٍ عَلَى أَلَّا تَعْدِلُوا اعْدِلُوا هُوَ أَقْرَبُ لِلتَّقْوَى وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ قرآن كريم
يعني كل واحد من الناس اللي قدامي بني آدم يمكن يكون عند ربنا أحسن مني و علشان كده بأتعامل معاهم بأدب و إحترام و ما ليش عندهم غير الشغل لازم استلمه مظبوط و لو مش مظبوط أقولهم على الملاحظات و لو صلحوها يبقى تمام و لو حسيت إنهم بيلاوعوا أو بيستهبلوا بأشد عليهم و من حقي إني أستبعد من الموقع أي حد من أول العامل العادي البسيط لحد المقاول نفسه بس ما بأستغلش السلطة دي غير في حالة الخطأ الفادح في العمل لأن قطع عيش الناس مش بالساهل كده
لكن هيا مغرورة و متعجرفة و فاكرة إنها مدام مهندسة الحكومة تبقى أعلى من كل الناس اللي شغالة في الموقع و من حقها تذلهم و تعاملهم بجليطة و قلة ذوق مستغلة إحتياجهم لليومية بتاعة الشغل و تحت التهديد بالطرد و الإستبعاد من الموقع
و مش عمال و مهندس المقاول بس بل بتتعالى على الفنيين و المشرفين زمايلنا في الإدارة المدني بالشركة لأنها مهندسة و أحسن منهم رغم إن بعضهم بيفهم في الشغل أكتر منها بكتير بس ما بيحبوش يحرجوها و هيا فاكرة إن سكوتنا مش أدب بل ضعف مننا لحد ما تسببت في إننا كلنا إشتكيناها للمدير العام مع بعض في شكوى واحدة و كلنا طلبنا إننا ما نشتغلش معاها أي شغل مشترك
تخيلوا طهقت 6 مهندسين و6 فنيين في عيشتهم لما ما حدش بقى طايق يشتغل معاها
و حأحكي لكم مثال على اسافينها
في يوم كنت قاعد باخلص شغل حصر كميات تم تنفيذها مع مهندس المقاول و فوجئت بإتصال على الموبايل من المدير العام بيصرخ فيا إيه اللي انت عملته ده ؟
سألته عملت إيه يا بشمهندس ؟
قالي إزاي تحط على الشدة الخشب بتاعة السقف اللي حيتصب للدور التالت في العمارة رقم 2 مواسير و خراطيم كهرباء من النوع المرفوض ؟ ليه ما خليتش الكهربائي يحط خراطيم من الماركة المعتمدة ؟
قلت له ما حصلش حاجة زي كده و اكيد فيه حاجة غلط
قالي المهندسة زميلتك بتقول كده
قلت له حأشوف و أرد عليك
طلعت فوراً للسقف لقيت مفيش خراطيم كهرباء محطوطة أصلاً و الكهربائي لسه ما إشتغلش
و خراطيم الكهرباء دي هيه اللي بتمر من داخلها الأسلاك الخاصة بالتوصيلات الكهربائية للعمارة من لمبات و مفاتيح إنارة و خلافه
و الخرطيم المعتمدة لقيتها على السلم بلفتها زي ما هيه و جاهزة للتركيب علشان بعد ما تتثبت يبتدي الحداد يرص حديد تسليح السقف
و الخرطيم المرفوضة اللي هيه شافتها كانت جنب كيس هدوم الكهربائي لاففها معاه علشان يروح بيها و مش حتستخدم في الموقع لأني لسه رافضها قبلها بيوم و مش حتتركب نهائي
لكن لشدة رغبتها في إيذائي و دق إسفين فيا إتسرعت و بلغت المدير حاجة ما حصلتش
رحت للمدير و معايا الفني المشرف معايا و مهندس المقاول و المقاول و أكدت للمدير العام إن مفيش حاجة من كلامها حصلت بشاهدة الشهود فإستغرب و قالي أمال هي بتقول كده ليه قولت له ما أعرفش و إلتفت لها و قلت لها بطلي شغل الأسافين بتاعك ده فإنهارت في العياط و البكاء مستغلة إنها بنت مع إني كده ما غلطتش فيها
مش عارف اعمل معاها ايه غير إني أتحاشى الكلام أو الشغل معاها
و حسبي الله و نعم الوكيل فيها و في كل اللي عايزين يوصلوا على أعناق زملاؤهم
صحيح اتق شر من أحسنت إليه
الكلام ده قديم و أسافينها ياما فيا و في غيري و كل الإدارة رافضاها خصوصاً لما تتجسس علينا و تنقل اخبارنا لرئيس قطاع المشروع و هوا مهندس ميكانيكا يعني ملوش في شغلنا بس شهوة الصعود و الترقي عندها فوق كل شئ و علشان كده إداها رئيس القطاع ده إمتياز في التقرير السري بتاعها مع إن العملية الوحيدة اللي عملتها لوحدها و هيا عملية الأسفلت لرصف المستعمرة السكنية طلعت بايظة و الأسفلت مشقق و إتجاه ميله العرضي عكس اتجاه بلاعات مياه المطر و الشوارع اتملئت مياه بعد أول شتواية بس نقول ايه
حسبنا الله و نعم الوكيل
على فكرة أنا انقذت حياتها من غير ما تعرف لحد دلوقت
من شدة تعاملها المذل و المقرف للعمال كانوا عايزين يرموها من فوق سقف الدور التالت في عمارة و لأنهم شايفيني مش طايقها جم يستأذنوا مني لأنهم بيحبوا معاملتي ليهم
و على أساس إنها وقعت من فوق الشدة قضاء و قدر و كل العمال حيشهدوا بكده
أنا أول ما سمعت الكلام ده زعقت فيهم و شخطت جامد و قلت ليهم إنها لو حصل لها أي حاجة حأبلغ فيهم و أوديهم كلهم في داهية فتراجعوا في الفكرة و خافوا مع إنهم كانوا بيتكلموا بجد و مش بيهزروا
أقول لكم ايه كفاية كده لأحسن أسافينها تملئ مجلدات

هناك 12 تعليقًا:

الفاتح الجعفري يقول...

ايه الغياب ده كله يابشمهندس وحشتنا والله
فعلا يااخي في ناس صعبه جدا ومتأصل لديهم انهم علشان يكبروا لازم يدوسوا علي رقاب الناس وده من اسوء الاصناف لان يبقي فيه الغدر والخيانه والحب الشديد للايذاء ومن اكتر اصناف البشر الممقوته وصدقني ربنا مابيسبهمش لازم وحتما ربنا بينتقم منهم
وللاسف الحكايه دي موجوده في كتير من المصريين انا خالي قاعد في السعوديه بقاله 25 سنه بيقولي كل الجاليات بتحافظ علي نفسها ويجيبوا شغل لبعض الا المصريين دايما يغدروا ببعض ويقطعوا عيش بعض لدرجه ان الحكايه دي بقت معروفه عنهم ولا حول ولاقوه الابالله
ربنا يعينك يابشمهندس ومتغبش
وجزاكم الله خير

مهندس مصري يقول...

الفاتح الجعفري
==============
أنا ما بأغيبش بس باحب اسمع اكثر مما بأتكلم
و تعليقاتي معاكم على طول
شكراً ليك أول تعليق يبقى شيلتني جميلة
المصريين برة فعلاً معروفين إنهم بيقطعوا في بعض و بيقطعوا على بعض لما خلوا صورة المصريين زبالة ربنا يهدي الجميع

Desert cat يقول...

هو المفروض ان مهنة المهندس لا تقل عن مهنة الطبيب فى الانسانية والضمير الحى ولو انه مطلوب فى جميع المهن وجميع تعاملاتنا الحياتية وبما انهم انقرضوا فالمفروض مينقرضوش من المهنتين دول تحديدا
النموذج اللى حضرتك بتحكى عنه موجود والمهندسة دى موجودة فى كل مهنة وفى كل مكان لكن الاشخاص اللى زى دى بتكون منبوذه من المجتمع ومن اقرب الناس ليها كمان مش زمايلها فى الشغل بس لدرجة انهم بيستلذوا دائما باذية الاخرين وده مرض الحقد والحسد والانتهازهية اللى صاحبهم عمره دائما مبيكون مستريح ربنا يبعدنا عنهم ... هو الحل الصح فعلا انككوا جميعا تتلاشوها وتشعروها قد ايه هى مكروهه بينكم لاننها تقصد الايذاء
ربنا يهديها ويهدى كل اللى زيها
بالنسبة لانقاذ حياتها فاجرك عند الله سبحانه وتعالى جزاك الله خيرا عليه وده طبعا دليل على حسن اخلاقك
ربنا يوفقك دائما لما يحب ويرضى
مودتى

عصفور المدينة يقول...

وَلَا يَجْرِمَنَّكُمْ شَنَآَنُ قَوْمٍ عَلَى أَلَّا تَعْدِلُوا اعْدِلُوا هُوَ أَقْرَبُ لِلتَّقْوَى وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ


السلام علكيم
أعانكم الله وهذه النوعية للأسف هي النوعية التي تأخذ مكانا وخاصة إذا كان رؤوس الأهرام من المزيفين فإنهم يحبون هذه النوعية

أنا يا محمد أفتيك ألا تتعاون مع هذه النوعية ولا تؤدي لها خدمات لأن ارتفاعها مش لأنها أنثى لأنها "دعية" أقول ارتفاعها يغضب ربنا

بس مش لدرجة انك تسيبهم يقتلوها
:)

دكتور حر يقول...

أصيل والله يا بشمهندس
يعني كل الصفات التي تتحدث ان الله حباك بها تستحق عليها شكر الناس وحمد الله
من التعليم
والتعلم
والتواضع
وعلو الهمه
والأخلاق الساميه
وكظم الغيظ

يعني كلها صفات رائعه فعلا ربنا يبارك فيك
بس أهم شي تحافظ عليهم كل لما المشاكل تزيد لأن ساعتها أجرها بيزيد
تحياتي لك
ودمت بخير

مهندس مصري يقول...

قطة الصحراء
===========
الصديقة العزيزة الجديدة
أنا متحاشيها فعلاً و هي حست بماشعرنا ناحيتها لما المدير العام قالها وش كده كل زمايلك بيكرهوكي و محدش عايز يشتغل معاكي و لو تقدمي طلب نقل يبقى أحسن بس المشكلة إنها من نفس البلد اللي شغالين فيها فحتنقل تروح فين ؟ و هي مهندسة مدني فمينفعش تشتغل غير في إدارتنا المدني و ملهاش شغل في أي إدارة تانية في الشركة

عصفور المدينة
============
بطلنا الخدمات من زمان يا هندسة و ما بتلاقيشد يفيدها بأي معلومة مهما كانت صغيرة
لازم تحصد زرعها المر
بس مش لدرجة القتل :)

دكتور حر
=========
الله يكرمك يا دكتور
يارب بس نكون قد الكلام الكبير اللي بتقوله عليا ده دا أنا راجل غلبان
و اللي بأعمله ده إتربيت عليه و من شب على شئ شاب عليه
سعيد بمرورك

Saydalanya Mat7oona يقول...

هى من الواضح انها ذكية حبتين
لا حبتين ايه...دول أربعة خمسة ستة...دى اى أسفين بتعملو بيبان انه أسفين و بتتكشف و مع ذلك مصرة انها تكمل برضوو..ده بقا الاصرار الغبى الذى يفضى لقدر محتوووم...الرفد باذن الله...ياااريت
تصدق بقا اتخنقت منها...حسبى الله و نعم الوكيل
ربنا يصبرك

الجمعاوي الاصيل يقول...

بارك الله فيك اخي المهندس

وان دل هذا فيدل على حسن اخلاقك وضميرك الحي اثابك الله على هذا وادخل فسيح جناته

وفي مثل شعبي بيقول

اللي يزرع انسان يقلعه
فهل المثل ده هو ما تم تطبيق بينك وبين المهندسة زميلة

Ahmed Al-Sabbagh يقول...

حمدا لله على السلامة يا باشمهندس

ومنتظرين تغطيتك للقاء نقابة المحامين بتاع امبارح

وياريت بالصور وبالذات صور نوارة نجم

:)

تحياتى

أحمد مصطفى يقول...

شكرا ياباشامهندس على اضافة مدونتى لقائمتك


لكن طلبي الوحيد منك

انك تكبر الفونت شوية

لانى بصراحة مبقدرش اقرا كل التدوينة

تحياتى لك

أحمد مصطفى

بلحه يقول...

انا كان عندى و لا زال عندى زملاء من نفس العينة و على فكلاة انا برضة مهندس مدنى بس الحمد لله فى القطاع الخاص لكن اشتغلت شوية فى الحكومة و عارف الاشكال دى و عادة بيكونوا ناس تافهين و ضعاف فى مهنتهم ..... احسن حل اتجوز البت المهندسة دى و قعدها فى البيت

مهندس مصري يقول...

أنا آسف جداً على التأخير في الرد و الله كنت فاكر اني رديت على التعليقات دي من زمان

صيدلانية مطحونة
===============
إذا كانت خدت امتياز في تقريرها السري دوناً عن الناس كلها من رئيس القطاع رغم إعتراض المدير العام
ربنا يكفينا شرها
يا نحلة لا تقرصيني و لا عايز منك عسل

الجمعاوي الأصيل ميخا
===================
ماحدش يقدر يقلعني
بس هيا ناكرة للجميل
:(

أحمد مصطفى
==========
و لا يهمك وطي الرزليوشن او كبر حجم الخط من قايمة view
text size
largest

بلحة
======
بقى مش طايقها ساعتين الشغل قوم عايز تبليني بيها العمر كله
حرام عليك