السبت، ديسمبر 01، 2007

الإجتماع الموسع لمصريين ضد التعذيب

الإجتماع الموسع لمصريين ضد التعذيب

البوست ده هو تغطية سريعة للإجتماع الموسع لمجموعة مصريون ضد التعذيب و اللي تم عقده يوم الجمعة 30/11/2007 بنقابة المحامين العامة بالقاهرة

للتغطية الشاملة بالفيديو

بصوا عند نوارة

الصراحة أنا كنت رايح بأقدم رجل و آأخر التانية أصل أنا مش بتاع ضرب و إشتباكات مع الأمن المركزي زي أحمد الجيزاوي مثلاً بس قلت ربنا يقدم ما فيه الخير

رحت وحابقى أقولكم إنطباعاتي عن الرحلة في البوست الجاي ما هو السفر من دمنهور للقاهرة بالنسبة لي رحلة لأني مأعرفش في القاهرة حاجة خالص بس أحمد الصباغ وصف لي السكة من محطة رمسيس لحد نقابة المحامين في الموبايل بس ما قدرش ييجي علشان كان عنده ظروف رغم اني كان نفسي أقابله والله خيرها في غيرها

المهم وصلت بدري ساعة فلقيت النقابة مقفولة أنا واصل الساعة 1 الضهر و الميعاد الساعة 2 رحت إتغديت فول و طعمية في أقرب محل ساندوتشات و اللي يسأل ما يتوهش و شربت كوباية شاي على قهوة قريبة و رجعت الساعة 1.45 لقيت الناس بدأت تهل حوالى 5 أو 6 بس اللي كانوا موجودين و مفيش و لا عسكري أمن و لا أي لبش يظهر كانوا عرفين ان ماحدش جاي بس الناس معذورة ما هو كان فيه إمبارح قافلة رفح لدعم قطاع غزة و إنتخابات نادي القضاة و إجتماع ممثلي أعضاء هيئات التدريس بكل الجامعات المصرية في نادي أعضاء هيئة تدريس القاهرة و اللي عرفته إنه كان متعرض لحصار أمني شديد ما تعرفش خايفين من دكاترة الجامعات ليه ؟
كانت نورا يونس اول الحاضرين و إنشغلت في عمل لوحة بها اسماء ضحايا التعذيب

ثم توالى حضور الناس و كانت اول مرة أشوف نوارة نجم

شخصية ظريفة و على سجيتها ورغم شهرة مدونتها الفائقة و شهرة والديها الجبارة فهي متواضعة و انسانة أخلاقها عالية على عكس ما يبدو من إسلوب كلامها في مدونتها
ثم رأيت عبد المنعم محمود صاحب مدونة أنا إخوان

شاب كويس برضه و هادي بيتكلم شوية و بينجز شغل كتير و كان فيه مدونين تانين ما أعرفش أساميهم بس شباب مية مية
كان فيه حضور من الصحافة الأجنبية صحفي سويدي إسمه بال قعد يسألني و أنا أجاوبه بس أول مرة حد يعمل معايا حديث صحفي :)
و كان فيه صحفية من جريدة الدايلي ستار و إسمها ألكسندرا مجايب منعم
بس مش عارف هيا جنسيتها ايه ؟ بس كانت نشيطة في تغطية أحداث اللقاء مش زي بال اللي مشي بدري بدري
و جات الأستاذة جميلة إسماعيل المذيعة المشهورة و زوجة الدكتور أيمن نور

و سلمت عليها و بعتّ السلام للدكتور أيمن معاها
دا غير جيهان شعبان اللي كنت بأشوف إسمها مالي النت و ما أعرفش شكلها ايه
دا غير بعض الناس المحترمة التانيين اللي ما عرفتش أسميهم أو ما جاتش فرصة نتكلم فيها مع بعض
أول حاجة عرفناها إن فيه حد سرب كلام إن الميعاد إتغير للساعة 4 العصر و قعدنا مستنيين لحد الساعة 4
تاني حاجة كنت مستغرب الجو اللي موجود دول شوية شباب زي العسل مع قلة من الكبار اللي زي السكر و الجو العام كأننا في رحلة أو فسحة مش في حدث خطير و إستغربت بقى هما شوية الشباب دول اللي راعبين و فاضحين الحكومة
دي حكومة خيخة صحيح و الله حاجة تكسف الحكومة و تشرف كل المدونين
بدأ اللقاء بمعرض صور لضحايا التعذيب و بيانات ملصقة على الجدران لمناهضة التعذيب

ثم عرض لفيلمين فيديو عن ضحايا التعذيب في العمرانية بالجيزة و سيدي سالم بكفر الشيخ
و كان فيه إهتمام من الحاضرين بمعرض الصور بشكل خاص





و نوارة و ألكسندرا قعدوا يصوروا كل حاجة و كان فيه كاميرات تلفزيون بس مش عارف قناة ايه ؟

بعدها بدأ عرض تقارير لجان العمل الخاصة بمصريين ضد التعذيب


الأستاذ محمد الشرقاوي ألقى البيان التأسيسي لمصريين ضد التعذيب




عدد الحاضرين كان حوالي 60 واحد و بعدها تقارير اللجان المختلفة من إعلامية و قانونية و تقصى حقائق و عمل جماهيري و أعمال تحضيرية للقاءات و خطة العمل القادمة و الكلام ده كله فيديو عند نوارة

بس الفيديو اللي صورته أثناء تقرير اللجنة القانونية كنت بأصور الحاضرين أكثر من المتكلم



video

المهم ان لجنة الحريات بنقابة المحامين أعلنت تضامنها التام معانا و أكدت على لسان مندوبها ان كل إمكانياتها في خدمة مصريين ضد التعذيب من أجل إحقاق الحق في كل المحافظات و اعتقد أن هذا أكبر إنتصار للمجموعة فلجان الحريات بنقابات المحامين الفرعية تغطي جميع أنحاء الجمهورية
و ده مسؤول لجنة الحريات بنقابة المحامين

و ده خالد مسؤول لجنة العمل الجماهيري و أنا مع الرأي اللي بيقول الوقفات الإحتجاجية مش وقتها دلوقت و مش حينوبنا منها إلا البهدلة على الفاضي بدون نتيجة
و مدام جميلة إسماعيل إتكلمت

و جيهان شعبان شرحت خطة العمل في خلال الـ6 شهور اللي جايين بس طموحة قوي و أنا عقبت عليها بأن الشق الإعلامي و القانوني و الطبي فيها معقول لكن الجزء الخاص بالعمل الجماهيري حالم زيادة عن اللزوم عايزانا نمضي الناس في الشارع على وثيقة ضد التعذيب و يمضوا الناس الغلابة عليها
دا الناس بتخاف من سيرة الحكومة و ماشيين جنب الحيط نقوم إحنا نيجي نقولهم يقفوا في وش الحكومة يبقى إحنا بنحلم لو تخيلنا إن قهر و خوف سنين طويلة ممكن يتهد في 6 شهور
بالنسبة لمسودة قانون التعذيب أنا شايف إن فيه إتفاقية دولية لمناهضة التعذيب و مصر موقعة عليها و ممكن تكون هيا دي مسودة القانون الجديد اللي إحنا عايزينه لتعريف و تشريع عقاب جريمة التعذيب في مصر
ملحوظة نوارة كانت عاملة زي النحلة ما بطلتش لف و تصوير و أدي صورتها و هيا بتصور أخو ناصر السباك بتاع العمرانية اللي البوليس رماه من البلكونة و هوا بيحكي عن اللي حصل لأخوه

كفاية كده النهاردة و البوست الجاي غرائب الصور في الإجتماع و إنطباعاتي عن الرحلة

هناك 32 تعليقًا:

دكتور حر يقول...

في انتظار البوست القادم

فعاليات حلوه ربنا يتمها على خير
بس اهم حاجه يكون تفعيلها الاعلامي كويس

ربنا يكرمك ويفك قرفك يا هندسه

جبهة التهييس الشعبية يقول...

كده برضه يا قنديل؟
حاطط لي الصورة دي؟ ماشي يا عم
بكرة القط لك صورة تحب على ايدي عشان ما انشرهاش
:))
وايه بقى الغرائب اللي ح تكتبها؟ ربنا يستر
:))

دعوة الفردوس يقول...

ماشاء الله

كل ده تعقيب سريع
امال لوخدت وقتك كنت عملت ايه
ماشاء الله
ربنا يتقبل وينفع بالعمل ده يارب
منتظرين الباقي

أحمد محمود ميلاد يقول...

خطوات عملاقه ياباشمهندس على طريق التحرر من الطاغية و اعوانة محترفي التعذيب نتمنى ان تنتقل الخطوه من المركز ألى الأقاليم و التى تعاني من بطش و سطوة الامن -- كل التوفيق

مهندس مصري يقول...

دكتور حر
========
الله يخليك يا دكتور بس قرفي مرتبط بحالة البلد و لما تبقى أحسن أكيد حأتحسن أنا مش قرفان شخصياً أنا قرفان للبلد

جبهة التهييس الشعبية
=====================
مالها الصورة بس يا زعيمة الجبهة ما أنتي كنت موافقة على إنها صورة حلوة و الأصل أحلى و من ناحية التصوير بتاعك أنا عامل إحتياطاتي و جيت بالبدلة اليتيمة اللي على الحبل علشان الفضايح
بس ربنا يسترها معانا و معاكي و مع كل السامعين :)

دعوة الفردوس
==============
واحشانا يا بنتي إيه الغيبة الطويلة دي
معلش أخوكي رغاي و مهما أحاول أختصر ما بأعرفش
اللهم آميييييين تقبل منّنا أجمعين

أحمد محمود ميلاد
==============
ربنا يوفقنا جميعاً و نتعاون كلنا مع بعض من أجل الحق و العدالة و لو إن 60 فرد مش عملاقة أوي

coca يقول...

والله مجهود حلو اوي


اتمني ان يكون بدايه لوضح حد ولكن اتمني ايضا انه يكمل بنفس الحماسه ونفس النظام

ويكون فيه منطقيه

وبعدين لمما انت جيت القاهره بعد 5 سنين مش كنت تقول نفرشلك الارض بلالين كدا ولا ايه وكنت هاجي اوصل انا حافظه القاهره يالا خيرها في غيرها ان شاء الله

تحياتي

Desert cat يقول...

بالتوفيق ان شاء الله يا بشمهندس
فى انتظار البوست الجديد ان شاء الله

عصفور المدينة يقول...

ربنا يعينكم يا هندسة

جمعاوى روش طحن يقول...

الباشا الكبيير

يا رحلاتك يا عموونا

منها لله الإمتحانات بقى

ربنا معااااااااااكم

أنونيمس يقول...

والله يا بشمهندس اكننا كنا معاك

وصف تفصيلي متين جداً

تسلم ايدك

كده تيجي ام الدنيا من غير ما تقول؟

دكتور حر يقول...

اي خدمه

صانعة الحرية يقول...

السلام عليكم
تغطيه جميله يا فندم
جعلها الله فى ميزان حسناتكم

النجم القادم يقول...

الله ينور ياباشا على الكلام الجميل ده والوصف وربنا يكتر من رحلاتك

الفاتح الجعفري يقول...

البشمهندس الكبير ربنا يتقبل منك ويجعل تلك الخطوات في ميزان حسناتك
التعذيب جريمه ازليه في مصر كويس انهم فطنوا لمواجهتها دلوقتي بس ربنا يستر

مهندس مصري يقول...

كوكا
====
ان شاء الله حنكمل المشوار بس همتكوا معانا و لا إنتي مش مدونة دا إنتي من القاهرة يا بنتي و الموضوع يلزمك
عموماً فيه كلام على إجتماع شهري و لما يتحدد ميعاده حاقولكم و لازم أشوفكم هناك المرة الجاية و ساعتها انتي اللي تعرفيني السكة
و على فكرة آخر مرة نزلت القاهرة قبلها كان في شهر 6/2004 في كشف ضباط الإحتياط في تجنيد حلمية الزيتون و طلعت غير لائق طبياً و أخدت إعفاء من الجيش و العتب على النظر
يعني من 3 سنين بس مش من 5 و البلالين بتتعلق مابتتفرش :)

قطة الصحراء
===========
مستنيكي هناك المرة الجاية

عصفور المدينة
=============
آميييين

جمعاوي روش طحن
==============
كأنك كنت معانا يا حاج ربنا يفك زنقتك و ما يهرسكشي دكتور في إمتحان أبداً

انونيمس
========
ما أنا ما كنتش متأكد جاي و لا لأ و عموماً أبعت لك نمرة الموبايل على الميل و نبقى نظبط مع بعض المرة الجاية يا دكترة

دكتور حر
=========
جميلك على راسي من فوق

صانعة الحرية
===========
و عليكم السلام و رحمة الله و بركاته
آميييين
و سعيد دايماً بتعليقك

النجم القادم
============
حبيبي الجديد في عالم التدوين كله يخش مدونته يا جماعة و يشجعه في أول خطواته التدوينية
ربنا يكتر الرحلات بس من غير أمن مركزي
مش كل مرة تسلم الجرة و ربنا يستر
مش حنلاقي مستشفى حلوة بزوارها زي جمعاوي روش طحن كده ;)

الفاتح الجعفري
==============
بتقول
كويس انهم فطنوا لمواجهتها دلوقتي
مين هم دول دول مجموعة مدونين عاديين زي و زيك إنت حطيت نفسك بره الموضوع ليه
ليه ما تشاركش معانا خصوصاً إنك مدون من القاهرة و ذو عقلية متميزة و ناشط سياسياً و طلابياً
و المجموعة فيها إخوان مسلمين و فيها من كل الألوان السياسية و ليس لها أي غرض سياسي بل غرضها وقف التعذيب الذي تمارسه الشرطة بحق المواطنين بجهود أهلية و شعبية خالصة
ياريت تيجي المرة الجاية معانا يا جعفري إنت و اليعقوبي حأستناكم لأنكم مش أقل من أي حد من المشاركين :)

هبههههووب يقول...

شكلك كدا صحفى
ومهتم بالصحافه واخبار الدنيا
----
انا شدنى عنوان الدونه
لانى انا كمان بحب مصر اوى
...بس مش قرفانه
قد يكون لأنى راضيه ...بس عندى امل ان بكرة هيكون احلى لينا ولأولادنا بإذن الله
انا شايفه ان حال البلد دى هينصلح لما احنا نغير من نفسنا وكل انسان اشتغل على نفسه وقومها ...واتقن شغله وحاول يصلح بعد نفسه .. اهل بيته وقرايبه ...يبقى هنوصل انشاء الله
والخير فى وفى امتى الى يوم الدين وانا عندى امل
تفائلوا بالخير تجدوة
----
على فكرة انا خريجه اعلام يعنى المفروض اكون من اكثر الاشخاص اهتماما بالصحافه واخبار البلد
بس على فكرة بقى انا اخر مرة قريت فيها اخبار او سمعت فيها نشرة قد تكون من سنتين تقريبا
مش لانى مش عايزة اعرف
لا لان كل شىء باين ف وشوش الناس ف الشوارع وف الهيئات الحكوميه ولو وقعدت شويه مع ناس فقرا والدنيا دايسه عليهم بكل عافيتها هتلاقى ان ان الواحد مش محتاج يسمع اكتر من كدا
-----
ربنا يلطف بينا
---
ان الله لا يغير ما بقوم حتى يغيروا ما بإنفسهم
---
مدونتك وعنوانها خلاتنى اطلع بعض مما يجول فى فكرى وقلبى

الجمعاوي الاصيل يقول...

السلام عليكم ورحمة الله وبركاته


الهندسة الكبير


ايه ياعمنا التغطية الجامده دي

كان نفسي اكون معاكم

بس منها لله الامتحانات

هي اللي منعاني من اي حاجة

المذاكرة بقى ياعمنا

اخر سنة وانت عارف

الواحد خلاص عاوز يخلص

ادعلنا

الجمعاوي الاصيل يقول...

ولو عاوز تعرف الجيش العربي فين

تعالى ميخا وانت تعرف

جبهة التهييس الشعبية يقول...

فين اللي انت قلت عليه يا عمي؟

أحمد مصطفى يقول...

الله ينور تغطية جامدة
تحياتى لك

مهندس مصري يقول...

هبههههووب
==========
سعيد بزيارتك و كلامك صح بالنسبة لتصليح كل واحد لنفسه و أنا مؤمن بان البلد دي حالها حينصلح و ادينا بنحاول نغير المنكر باللسان

الجمعاوي الأصيل
==============
ربنا معاك

جبهة التهييس الشعبية
=====================
الصبر يا عمتي و الله كان عندي نائب وزير الكهرباء في الموقع النهارده و كنا شادين طوارئ في الشغل إن الله مع الصابرين

أحمد مصطفى
==========
ربنا يكرمك يا باشا

الفاتح الجعفري يقول...

انشاء الله هاجي بس ياريت تبلغني وان شاء الله نيجي انا واليعقوبي وجزاكم الله خير يابشمهندس

Ahmed Al-Sabbagh يقول...
أزال المؤلف هذا التعليق.
Ahmed Al-Sabbagh يقول...
أزال المؤلف هذا التعليق.
Ahmed Al-Sabbagh يقول...

أخى وصديقى العزيز
الباشمهنز محمد

تحية عظيمة على التغطية الجميلة للإجتماع

والله على نن عين اللى جابونى انى ما جيش واشوفك واحضر الاجتماع واشوف نوارة نجم وعبد المنعم والجمع الجميل ده

بس والله كان فرح اعز اصدقائى وكان فى اخر بلاد المسلمين وعايز اقولك انى مشيت بعد الصلاه وراجع البيت الساعة تلاتة الا ربع قبل الفجر

ثانيا سايق عليك النبى تيجى تانى قريب القاهرة عشان بحد عايز اشوفك واتكلم معاك وياريت لو هيعملو اجتماع تانى نحضرة سوا

كمان الصورة اللى اخدتها لنوارة دى جميلة خالص انا مش عارف هى مبقوقة منك ليه
هى فاكرة الصورة وحشة ؟ بالعكس والله

وشكلها كدة مرقدالك على تصويرة خلى بالك وحاول تمشى بالبدلة وتبتسم اكتر وقت ممكن ..ههههه

على فكرة انا كنت مشغول شوية الايام اللى فاتت ولسه داخل عندك دلوقت ولقيت البوست ده بقالة كذا يوم نازل
وانت ولا تقول ولا تعمل منظر
ماشى ماشى

متشكرين ياباشا على التغطية دى

و

تحياتى

لولا الملامه يقول...

ربنا يوفقكو ويحميكو

مهندس مصري يقول...

الفاتح الجعفري
=============
هوا ده الظن فيكم برضه
تنورونا يا عم الجعفري انت و اليعقوبي

أحمد الصباغ
==========
كأنك حضرت يا باشا و حسيت بيك معانا في كل لحظة و المرة الجاية نتقابل إن شاء الله بس مش عارف إمتى و فين أول ما أعرف حأقول على طول

لولا الملامة
==========
آمييييين و يخليكي لينا
و ما تقطعيش الزيارات لينا هنا

mazlomen يقول...

والله فاتتني طب مش كنت تقول
معلش أصلي مادخلتش من مدة
خيرها في غيرها يا باشمهندس

على العموم في حمل ضد أبو حصيرة وعايزين مشاركة فعالة منك

عيب يبقى في يهود على أرض البحيرة ونسكت
زور مدونتي للتعرف على التفاصيل

الفاتح اليعقوبي يقول...

السلام عليكم
ازيك يااستاذنا عامل ايه؟


معلس انا اسف النت عندي كان مسعور شوية وعمال يقفلي في كام مدونة منها مدونة حضرتك
انا عارف نت قليل الادب


شئ جميل مقابلة الناس الجامدة دي كلها وربنا يعينا علي فضح البشر الضالة التاينة اللي عايزة ضرب 00000
النار متفهمش غلط
والسلام يااستاذي

مهندس مصري يقول...

مظلومين
=======
أنا معكم في الحملة ضد مولد أبو حصيرة بس مش عارف مطلوب مني ايه بالضبط

الفاتح اليعقوبي
================
و هوا ضرب النار شوية دي جريمة قتل يا بني
انت عايز تودينا في داهية و لا ايه ؟ :)

غير معرف يقول...

شكرا جدااااااااااا
علىا لموضوع ده
وانا بصفتى محام بشوف مهازل فى الاقسام
ااقلها ممكن شخص عادى يروح يعمل محضر يطلعو عين ابوه وميعمللوش حاجة وممن يحطوه فى الحجز
---------
واخر حاجة شوتها يوم الاحد 25 / 5 / 2008 مظاهرة امام مجلش الشعب
كنت رايح فى مشوار لمصلحة المهن الحرة
وكانت المنطقة ملغمة امن مركزى رسمى وغير رسمى
بيطلعو من كل حتة ازاى متعرفش
المهم رحت المصلحة وانا جى ههههه
ملقتش ولا ورقة واقفة

غير معرف يقول...

اسف جدا
غلطت وكتبت مجلس الشعب
ده كان مجلس الشورى
ههههههههه