السبت، ديسمبر 08، 2007

تاج مليان لو بس ما بيفتحش عمل الشيطان

التاج ده اتمرر لي مرتين مرة من أستاذي البشمهندس عصفور المدينة و مرة من إخواتي الفاتحين اليعقوبي و الجعفري و رغم اني بعد قراءة إجابات البشمهندس عصفور حسيت بالضألة و إنه قطع قول كل خطيب بس علشان ما أزعلش حد مني حأجاوب و أمري لله


لو مكنتش مصري بس عربي
كانت هتبقى إيه نظرتك للمصريين واللي بيحصل في مصر دلوقتي؟


شعب مليان مواهب و متدين بفطرته و فيه خير أجناد الأرض و ساكن في أرض الكنانة بس شعب جبان خايف يثور على الحكام الظالمين و ما بيقاومش لتحسين وضعه و علشان كده حيفضل متخلف لحد ما يمتلك شجاعة التغيير

لوكنت أوروبي أو غير مسلم هتبقي إيه نظرتك للعرب والمسلمين؟

أكيد قبل ما أقرأ عن الإسلام حتكون نظرتي ليهم إنهم بدو رحل و حثالة و محدثين نعمة و لولا شوية البترول اللي عندهم كانت تبقى الدنيا أحسن من غيرهم لأنهم همج و بينتهكوا حقوق المرأة و بيتجوزوا 4 و بيعشقوا الظلم و الإستبداد

أما لو قرأت عن الإسلام و فهمته أكيد كنت حأعتنق الإسلام و أحترمه و أتحسر على حال العرب و المسلمين اللي عندهم أحسن دين و لو ابتغوا العزة به لأعزهم الله

لو قالوا لك إنت بقيت رئيس جمهورية هتعمل إيه؟

هأعمل زي ما أيمن نور كان عايز يعمل
حأحط بالتشاور مع أساتذة القانون الدستوري دستور جديد محترم بدل العك الموجود دلوقتى و بعد موافقة الشعب عليه في الإستفتاء
حأعمل زي موريتانيا إنتخابات محلية و برلمانية بدون تزوير ثم إنتخابات رئاسية مش حأترشح فيها و أسيب البلد للي الناس تختاره و يحكمها بعدل و بما يرضي الله
و البرلمان الجديد المنتخب هوا اللي يبقى يتعامل مع الفاسدين السابقين و يشرع قوانين جديدة محترمة تتفق مع شرع الله و يؤكد إستقلال القضاء اللي حيخضع له الكل من الرئيس للغفير و القضاء ده هوا اللي يحاكم رموز العهد البائد بما يرضي الله برضه

لوسمح لك برؤية الرسول عليه الصلاة والسلام وإنك تقوله كلمة واحدة ؟

أقول له أسالك أن تدعو الله لي و لكل المسلمين ان نرافقك في الجنة


لو كنا في عصر ازدهار الأندلس كنت تتخيل نفسك إزاي؟

أنا من عاشقي تاريخ الأندلس و قرأته بالكامل في موسوعة دولة الإسلام في الأندلس للمؤلف محمد عبد الله عنان في 8 أجزاء
و شايف ان تاريخ الأندلس يعتبر ملخص لتاريخ أمة الإسلام من إزدهار و وحدة ثم تفرق و إنحطاط

كنت حأكون مهندس برضه خصوصاً إن الأندلس كان فيها تفوق هندسي رهيب في الإنشاءات و المعمار و هندسة الري و المساحة و كل تخصصات المدني القديمة

و خير دليل على كده كاتدرائيات قرطبة و أشبيلية و غرناطة و التي كانت هي المسجد الجامع لكل مدينة من هؤلاء ثم تحولت لكنائس بعد سقوط الأندلس و ما زالت تشهد بعظمة المهندسين و المعمارين المسلمين دا غير قصر الحمراء في غرناطة و غيرها كتير

لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟

مش عارف بس أكيد لو بأحبها بجد حيكون صعب أتخلى عنها و غالباً حأفضل جنبها و نتجوز بس صعب جداً الواحد يفقد إحساس الأبوة ربنا ما يبتليناش بالإبتلاء الصعب ده

لو طلعت القمر هتكتب عليه ايه؟

هأغرس راية مكتوب عليها لا إله إلا الله محمد رسول الله
أما بالنسبة للسجود فده عادي أنا حأسجد كتير هناك في الصلوات الخمسة لأني مش حأبطل صلاة هناك :)

لو مررت التاج لحد و ما جاوبش هتعمل ايه؟

عادي هأزعل شوية و بعدين حنتصالح أنا قلبي أبيض و صعب أشيل من حد

تمرر التاج لمين ؟

أحمد الصباغ حبيب الملايين

جبهة التهييس الشعبية الزعيمة نوارة

قطة الصحراء خربوش الشرقية الكبير

أنونيمس أبو الطب كله

هذا أنا المغاربة أجدع ناس


هناك 15 تعليقًا:

دكتور حر يقول...

اجابات جميله يا باشمهندس

وزي ما بقول دايما كل الناس اللي اتسالت سؤال رئيس الجمهوريه جاوبت احسن من احسن تفكير يقوله الافندي

ربنا يصلح حالك وحال مصر يا باشمهندس

عصفور المدينة يقول...

أقول إيه بيقول علي جاوبت كويس وهو أستاذ الأساتذة ومهندس الشعب القرفان
ومعماري أندلسي كمان ومتنازل لي عن الرئاسة قصدي يعني حيديني فرصة أرشح نفسي ونوه إلى وجوب الصلاة على وقتها مهما كانت الظروف

أسأل الله أن يبارك فيه
وربنا يهدي الدكتور محمد اللي بقى خاطف مني أول تعليق مش عارف لما يخلص الدراسة حيعمل في إيه

إوعى تخاف يقول...

الله ينور ياهندسة على الاجابات الرائعة دى وربنا يكرمك وتمسك رئيس جمهورية ان شاء الله مش بعيد ماهو الا جاب حسنى وعبدالناصر والسادات قادر انه يجيبك صح ولا ايه بس انته كده عندك واحده بجد انا زعلان انته منفضلى وكمان ممررتليش التاج ياعم شكراً امال لو مكناش معرفة قديمة

الفاتح الجعفري يقول...

البشمهندس الكبير ربنا يكرمك
اجابات رائعه
بس قولي لما تصلي علي القمر هتحدد القبله ازاي
وتتنازل عن الرئاسه معقول يابشمهندس
احنا شعبك مش هنتانزل عنك
يازعيم
وجزاكم الله خير

صانعة الحرية يقول...

السلام عليكم
اجابات مميزه يا فندم
كده انا احترت اختار مين رئيسا للجمهوريه
نفسى الافكار دى توصل لصاحبنا يمكن يتعلم منها حاجه
جزاكم الله خيرا

مهندس مصري يقول...

دكتور حر
=========
جمايلك كترت علينا يا دكتور و مش عارفين نرد لك أول تعليق و لا مرة
ربنا ينجحك بتقدير إمتياز و اشوفك دكتور عالمي كبير كده يارب

عصفور المدينة
============
حلوة أستاذ الأساتذة دي أعتبرها لقب فخري ليا من حضرتك و لا ايه
بس انت برضه شيخ المدونين و شيخ المهندسين و أستاذي

إوعى تخاف
=========
يا بني انا مش عايزها لأنها أمانة و لأنها لمن لم يؤدي حقها خزي و ندامة يوم القيامة هو إحنا قادرين على مسؤلياتنا الصغيرة لما نشيل مسؤلية شعب بحاله
و بعدين أنا قلت انت لسه عضمك طري في التدوين و مش حمل تاجات ماشي يا عم و لا تزعل شيل التاج و خد عندك بس لو ما جاوبتش مش حاقولك انت بالذات حأعمل فيك إيه

أحمد ده جاري يا جماعة و سهل أظبطه

الفاتح الجعفري
==============
القبلة سهلة اينما تولوا فثم وجه الله يعني أي ناحية تنفع بس غالباً حأتوجه في صلاتي لكوكب الأرض و أخليه قدامي علشان أبقى إتوجهت للكعبة بقدر الإمكان
و بالنسبة للرئاسة إقرأ الرد اللي فوق ده علطول

صانعة الحرية
============
و عليكم السلام و رحمة الله و بركاته
أنا مقصر معاكي في التعليقات و آسف من هنا لحد ما تحبي و و شكراً يا ستي جازاكي الله الخير كله

الفاتح اليعقوبي يقول...

السلام عليكم
اجابات جميلة تدل علي شخصية نوعا ما هادئة
وجامدة حكاية لوكنت اوربي ومش مسلم ايه نظرتك للمسلمين
انت الصراحة كان ناقص تقول ولو شفت حد منهم هاتف علي وشه واضرب0000
بالجذمة
والسلام

الفاتح اليعقوبي يقول...
أزال أحد مشرفي المدونة هذا التعليق.
Ahmed Al-Sabbagh يقول...

هيييه!

تاج ليا انا

ياقوت مرجان احمدك يارب احمدك يارب

على فكرة يا محمد انت اول واحد يمرر ليا تاج

وعشان كدة هعمله بضمير يليق بأهمية صاحبة

فاستنى عليا يومين اجهز فيه بقى

وطبعا عمرى ما اتأخر عليك خالص

وكمان هقرا اجاباتك انت وادرسها كويس عشان لو اتزنقت فى سؤال اغش منك

:)

تحياتى

يوميات عيل مصري يقول...

أنا فضتلك من هنا لغاية العيد يا هندسة، مبروك التاج يا رريس يتربى في عزك، ويارب يكبر وتخاويه كده
ردودك حلوة أوي،
بس الله يخليك لو اشتغلت مهندس في الأندلس ابقى خدني معاك بدل المقاولين المتعبين اللي بيكونوا معاك دول
تعيشي وتلبس تاجات يا هندسة

أنونيمس يقول...

لبسني لبس ... ماشي ياعم
لك يوم يا بشمهندس
:)

ردود أخر منجهة
وناوي تعمل زي أيمن نور
بعدين ترحله طره تونسه مش كده
:)

أحمد مصطفى يقول...

اجابات وافية وكافية
تحياتى
أحمد مصطفى

عاشقه الفردوس يقول...

والله ماشاء الله اجابات حلوة

ربنا يكرم حضرتك


ربنا يثبتك على دينه ويجعلك من المصلحين الصالحين اللهم امين

زكرياء يقول...

صديقي محمد،
آسف على التأخر في الرد على اسئلتك، للأسف فأنا حاليا مشغول جدا، مع هذا اعدك انني في نهاية الأسبوع ان شاء الله ارد عليها و باستفاضة و بموضوعيتي العربية إياها (:

تحياتي
زكرياء

مهندس مصري يقول...

الفاتح اليعقوبي
===============
و عليكم السلام و رحمة الله و بركاته
شخصيتي مش هادية قوي إتقي شر الحليم إذا غضب
و اللي قلته هي الصورة النمطية للعرب و المسلمين في الغرب و أغلبهم مصدقها و معتقد كده

أحمد الصباغ
===========
مش كنت تقول يا راجل و أنا كنت أهريك تاجات :)
بس من غشنا فليس منا يا أبو حميد :)

يوميات عيل مصري
================
على فكرة يا أستاذ أحمد أنا كنت عايز أمرر لك التاج بس انت مصمم تركز مع ذكريات العيل بس
و لو كنت مررته لك و ما جاوبتهوش أو جاوبته و حذفته بعد شوية كنت حأزعل منك فقلت خلينا حبايب من غير تاجات أحسن :)
و بعدين المقاولات مش كارك يا باشا و لا انت عايز تكوش على كل الشغلانات :)
بس الصراحة كنت ساعتها لما تكون معايا حأطير من الفرحة :))
ثم ده مش أول تاج فيه تاج قديم ليا بس انت اللي مش واخد بالك

أنونيمس
========
بس العيش و الحلاوة عليك يا دكتور

أحمد مصطفى
=========
تشكر يا ذوق

عاشقة الفردوس
=============
آمييييييييييييييييييييين

زكرياء
======
براحتك يا باشا
ربنا يكون في عونك في الغربة و الشغل و الدراسة