الأحد، ديسمبر 16، 2007

الليلة الكبيرة يا عمي و العالم كتيرة

مولد أبو الريش

مولد أبو الريش في دمنهور هو أحد الموالد التي تنتشر في أنحاء مصر لمن يعتقد أنهم من أولياء الله الصالحين
و الرأي الشرعي يقول بأنه يحرم زيارة القبور للتبرك بها و التمسح فيها و تقبيل العتبات و النحر لها و النذر لها و الإعتقاد بأن المدفون بها يضر وينفع سواء بذاته أو بمكانته عند الله سبحانه و تعالى
فكل هذا شرك بالله و هو شرك أكبر مخرج عن الملة لأن من يعتقد بهذا يجعل لله شريكاً في ملكه و خلقه مثلما كان الكفار يقولون عن الأصنام إنما نعبدهم ليقربونا إلى الله زلفاً مع إعترافهم بربوبية الله و أنه هو خالقهم و هو من خلق السموات و الأرض و الكون كله فهذه كتلك
أما حضور الموالد فهو فرصة للمرح و اللهو المباح إذا إجتنبت المحرمات من فواحش و فتن و خلافه
عموماً أسيبكم مع الصور دي لـ اليلة الكبيرة بتاعة المولد ده السنة دي
تم تصويرها بتاريخ 30/11/2007




و ما الدنيا إلا مرجيحة كبيرة و على رأي عدوية حبة فوق و حبة تحت

الليلة الكبيرة يا عمي و العالم كتيرة ماليين الشوادر يابا مـ الريف و البنادر

عروض خاصة مميزة

وردشان فتاة رأس بدون جسد

فرقة ماجيك شو الساحرة

فتاة النار و الكهرباء

الساحر العجيب

و معجزات التنويم المغناطيسي

قرب قرب قرب بس التذكرة المباعة لا ترد

النيشان فتح عينك تاكل ملبن :)

زميرة للعيل يا أبو العيال ميل خد لك سبع زمامير

صفارة شخليلة طرطور يا حليلة

طراطير يا واد طراطير

طراطير طراطير طراطير

قبة سيدنا الولي دول نوروها محلى البيارق و الناس بيزوروها

قبة سيدنا الولي في الجو عالية محلى البيارق لما نوروها

و هوا مش سيدنا و لا حاجة

حمص حمص تل ما ينقص عالنار يرقص يرقص يرقص

دا غير كل أنواع الحلويات كلها وجايين من دسوق يبيعوا في دمنهور !

بياعين القصب الصعايدة

عربيات

و مراجيح

و خيم الطرق الصوفية دا غير الزفة و الموكب اللي بيعملوه بالطبل البلدي و البيارق و الرايات الخضراء

ربنا يهدي عبيده

أنوار جامدة و فرحة و زحمة و زيطة و زمبليطة رغم إن البلد مازالت بطن شوارعها مفتوحة زي ما أنتوا شايفين في آخر صورة بس لا شئ ممكن يمنع الناس من خطف لحظات من الفرحة وسط عالمنا القاسي حالياً

البوست ده إهداء خاص للأستاذ أحمد صاحب مدونة يوميات عيل مصري

و لأخويا في الله الفاتح الجعفري

كل سنة و انتم طيبين بمناسبة عيد الأضحي و ما تنسوش صيام يوم عرفة و الدعاء لكل الناس بالخير

هناك 19 تعليقًا:

EmY يقول...

بحجز اول كرسي هارجع اقري البوست و اجي تاني
انا بحب العربيات التصادمه جدا و لسه بركبها و حريفه فيها

EmY يقول...

انا رجعت تاني
البوست لذيذ اوي و جميل بس انا عمري ما شفت مولد او حتي روحت سيرك
نفسي اجرب النشان يعني دي امنيه والله ياريت تتحقق
جميله اوي الصور و زي ماقلتلك انا بحب العربيات اوي و ببهدل كوكا فيها

كل سنه و انت طيب عيد اضحي سعيد و مستنيه الخروف بتاعي

عاشقه الفردوس يقول...

اهو انا بقى مبحبش الزحمه دى اما بيكون عندنا حاجه زى كده مش بخرج من بيتنا


بس زمان كنت بحب المراجيح

فيه مرجيحه كده كنت حريفه لا مش حريفه كنت خطيره فيها


هيييييييييييييييه
كنا عيال بقى وصغيرين


جزاك الله خيرا ع البوست ده والله رجعنا كتيير
كل عام وحضرتك الى الله اقرب وعلى الطاعه ادوم باذن الله

دكتور حر يقول...

انا مش عارف حضرتك بقيت مهندس ليه او ازاي
مكانك في الصحافه يا فندم

كل عام وأنت بخير
والسنه الجيده يحقق الله لك فيها ما تتمنى

عصفور المدينة يقول...

جميل يا محمد التغطية دي وخاصة المقدمة ربنا يبارك فيك

تصدق إن نفس الناس دول بيتنقلوا

مهندس مصري يقول...

إيمي
===
طب دا إنتي عندك الموالد الكبرى في القاهرة
السيدة زينب و الحسين و السيدة نفيسة و غيرهم كتير
انزلي مشي رجلك لمصر القديمة و حتلاقي من ده ياما قوي
ربنا يستر على كوكا منك و ما يحكمكيش على غلابة أبداً :)
ثم النشان مش للعدوانيين يا بنتي لأحسن تديري فوهة بندقيتك علينا و إحنا مش قدك :)
و بعدين ما لكيش خرفان عندنا ماشية تلميهم من البلوجات و من زوار البلوج بتاعك و حتعملي سوق مواشي بيهم لا يا ستي
لكن تتفضلي تتغدي عندنا ماشي لكن خرفان لا و ألف لا :)

عاشقة الفردوس
==============
جزانا الله و إياكي
كل سنة و انتي طيبة

دكتور حر
=========
تقول ايه بقى في مجموع الثانوية العامة ثم الواحد مكانش محدد هوا عايز ايه دا أنا كنت علمي مجموعة شاملة يعني على حسب الريح ما يودي
أدينا بنجرب صحافة الهواة فيكم و ربنا يستر
كل سنة و انت طيب و ربنا يكرمك في الإمتحانات
ثم ايه السنة الجيدة دي ؟ :)

عصفور المدينة
=============
طبعاً يا هندسة دا جدول بمواعيد محدودة
مولد الدسوقي بعديه بإسبوع مولد في المحمودية بعديه بإسبوع مولد أبو الريش في دمنهور و هلما جرا
الحمد لله إنه عجبك لإنك إنت الترمومتر بتاعي اللي بأطمئن بيه على المدونة و موضوعاتها :)

الفاتح اليعقوبي يقول...

السلام عليكم
ازيك ياهندسة
تعرف البشر دي من كتر الهجس اللي بتهجسه علي نفسها صدقت نفسها

كنت في الصعيد فواحد بيقولي اغلب الحاجات دي حوارات مش عارف سيدي ايه وسيدي ايه والكلام ده كله

بيحكيلي علي واحد كان عنده واد متخلف عقليا عافانا وعافاك الله فبيقولك عشان يكرمه ام عمله ختمة وعزا كبير واتفق مع شوية الهلاسين دول انهم يجيوا كل سنة ويعملوا مولد للمبروك ابن المبروك
وبس

ربنا يهيدنا جميعا
والسلام

أنونيمس يقول...

ازيك يا بشمهندس
كل سنة وانت طيب وبألف خير

أية حكاية الجدع ابو الريش ده؟؟
الظاهر كان من اهل الخطوة
:)
اصل ليه ضريح ومولد تاني ف القاهرة
والله باين عليها نصباية ولا في حد مدفون من اساسه.. وسلملي ع الخرفات والدماغ العاليه
:)

عيد سعيد يا باشا

Desert cat يقول...

احنا عندنا ملاهى فيها عربيات زى دى وبنات خالى بيجوا من السعودية فى الصيف بننزل كل يوم نبهدل بعض فيها
مرة وانا فى ثانوى سمعت عن الست اللى ليها راس دى ومش ليها جسم وكنت عايزه اروح اشوفها مع صحابى وماما حلفت ما انا خارجة من البيت
اوصف لنا شكلها بقى لو تكرمت
كل سنة وانت طيب يا بشمهندس
عيد سعيد ان شاء الله

الفاتح الجعفري يقول...

ياباشا ياباشا ياباشا
ايه يابشمهندس في العيد كده
ياعم الحجات دي ابويا كان بياخدني وانا صغير اكل سندوتش تشيكن كرسبي اه اسف رز باللحمه واشرب قرفه بالبن بس كانت جامده ويقعدوا يذكروا شويه اه اسف يفقروا وبعدين كان ابويا بيمشي علشان كان مشغول ويسيبهم هما بقي يقعدوا 3 ايام في الحكايه دي
3ايام فيها البدع فعلا بقي بدع بدع
وضلال طب حتي يحترموا المولد بتاع الراجل لو يعني هما مؤمنين كده انما رقص وشرب وحجات كتير
لا بس الحمد لله طريقه والدي كانت كويسه في حالها بجد يعني مبيهبلوش في الحجات دي بس لايمنع من انهم مبتدعين ربنا يهديهم
ده في شويه كوارث يعني ضياع فعلا
ربنا يستر علينا
اللهم اهدي المسلمين وكل سنه وانت طيب يابشمهندس
والهديه وصلت

Ahmed Al-Sabbagh يقول...

الله الله الله

ايه الجمال ده

انا بحب الموالد اوى

انت شوقتنى خالص

بجد فكرة الريبورتاج ده جميلة اوى

ومجهود رائع

انا كنت جى اعيد عليك

الاقى بوستين

يعنى انا نايم فى العسل بقى

وانت ولا بتقول ولا بتعمل منظر

ماشى ياعم

ادينى قاعد ليل نهار فى مدونتك

اما اشوف هتنزل بوستات من وريا ازاى

اهى قاعدة

اهيييي

كل سنة وانت طيب

وعيد سعيد عليك وعلى الاسرة

تحياتى

مهندس مصري يقول...

الفاتح اليعقوبي
================
فكرتني باللي دفنوا حمار و عملوا عليه مقام سموه سيدي المركوبي و بقت الندور شغالة حلاوة و لموا فلوس كتير من ورا النصباية دي و بعدين و هما بيتقاسموا إختلفوا مع بعض و سرقوا بعض فواحد بيحلف للتاني بيقوله و مقام سيدي المركوبي ما أخدت منهم حاجة قام قاله لا دا إحنا دافنينه سوا
و من هنا جه المثل بتاع دا إحنا دافنينه سوا
:)

أنونيمس
========
وانت طيب و كل حبايبك طيبين و بخير و سعادة
اللي عندنا إسمه عطية أبو الريش إتأكد من إسم اللي عندك و ما تدخلش أبهات الريش في بعض
:)

قطة الصحراء
============
كل سنة وانت طيبة و بكل خير
و عيد جميل و سعيد و لذيذ و مش مبارك علينا كلنا :)
ثم أنا كنت بأصور بس و محدش قال إن أنا دخلت جوه :)

الفاتح الجعفري
==============
بس أهم حاجة إنها وصلت
هدفنا إسعادكم يا أخي
:)

أحمد الصباغ
===========
مليش ذنب إنك نايم و مش حأنده على كل واحد بإسمه :)
و لو انت من الغاليين
و عايزيين نتقابل في العيد و أنزل لك مصر مخصوص إنت و كل البلوجرية المصراوية حبايبنا الجدعان
:)
و كل سنة و انت بألف خير انت و المخاليل :)

يوميات عيل مصري يقول...

عم محمد
صباح المراجيح والفل والموالد
ألف ألف ألف شكر على الإهداء الجميل، انت جميل جدا يا هندزة والله
وكل هداياك جميلة زيك
تعرف حكاية القبور دي، ساعات باموت على روحي من الضحك عليها
وساعات اقف وأدعي لصاحب القبر إن ربنا يرحمه، ولا يؤاخذه بما يقول الناس، خاصة إذا كنت متأكد منه
عندنا في العتبة، جامع اسمه سيدي علي البكري، تشد له الرحال من كل مصر
تعرف الجبرتي، كاتب ايه عنه
كاتب إنه رآه رأي العين، وإنه كان مجذوب من المجاذيب، وأخوه كان ناصح، لبسه جلابية خضرا، وستات المماليك الأتراك كانوا بيتبركوا بيه، ولما مات عملولوا المقام ده، والناس ولا عارفة حاجة

يا مراجيحك يا هندزة
كل سنة وانت طيب، وتعيش وتهادي يا فندم

coca يقول...

البوست حلو اوي من فتره قصيره كان نفسي حد يعمل دراسه عن الموالد في مصر
وكل انواع الترفيه اللي فيها
والصور جميله

علي فكره بقي ايمي اللي بتقولك ببهدل كوكل في العربيات دي كدااااااااااابه
دا انا بخليها تطله تقول حقي برقبتي

مهندس مصري يقول...

يوميات عيل مصري
===============
انت اللي جميل جدا يا أستاذي و أخويا الكبير
و بالنسبة للقبور راجع ردي على اليعقوبي
و كل سنة و انت بألف خير انت و العيلة كلها

كوكا
=====
بصي يا ستي احنا نتقابل كلنا الإسبوع الجاي و نروح نركب عربيات مع بعض و الميه تكدب الغطاس و نشوف مين حيكسب مين :)

MĕŢø & ŘǿŖêĔ يقول...

ما احلا الجو عندكم
انا نفسي يجي العيد واشوف هاي الاشياء والزحمه والعالم فوق بعد
دمار

البوست حلو كتير وعجبني كتير ومن البوست الي قبلو واضح انك صحفي ممتاز مع انك مهندس بس عادي بتصير باحسن العائلات

تسلم على زيارتك لمدونتي
دمت بود

RoReE

مهندس مصري يقول...

MĕŢø & ŘǿŖêĔ
==============
بصي يا ستي ان شاء الله فلسطين كلها تتحرر بما فيها القدس و ساعتها حتفرحوا و تعيدوا بجد و احنا كلنا معاكم
احنا مش راضيين عن حكامنا اللي باعوا القضية و ارتموا في أحضان الصهاينة
دول أعدائنا زي الصهاينة بالضبط

أنا سعيد إني أقدرت أسعدك بشيئ بسيط مثل هذه البوستات و يارب تبقي سعيدة دايماً

الصحافة دي جت كده مع المدونة إنما الهندسة دي كانت مجموع في الثانوية العامة
:)

و ان شاء الله صديق دائم لمدونتك

و اطمئن منك على كل أهل فلسطين الغالية و القدس أولى القبلتين و ثالث الحرمين و مسرى رسول الله صلى الله عليه و سلم و أرض الأنبياء من إبراهيم حتى عيسى عليهم جميعاً السلام

خالص مودتي
:)

حزينه يقول...

السلام عليكم
انا بسمع فعلا ان بيحصل كدة هنا
بس الصور دى منين بالظبط فى دمنهور
والله الناس بتدور على اى حاجه وخلاص علشان تعملها ومش مهم بقى حرام ولا مش حرام

حزينه

مهندس مصري يقول...

حزينة
=====
الصور دي من عند جامع أبو الريش
إركبي أي تاكسي و هو يوصلك :)