الجمعة، ديسمبر 28، 2007

الإجتماع الموسع اللي ضيق فجأة لمصريون ضد التعذيب

رحنا الإجتماع الموسع يا جدعان

و اللي حضروا كام 35 واحد بالتمام و الكمال

يعني العدد بيقل لأن المرة اللي فاتت كان العدد 60 واحد و كانت الحجة المستخدمة لتبرير العدد القليل إن فيه قافلة رايحة للعالقين في رفح و ضد حصار غزة و إن فيه إجتماع لنادي القضاة وغيرها حاجات كتير

طيب إمبارح ما كانش فيه حاجة !!!!!!

أنا مضايق وا الله بس نبتدي الكلام من الأول


بدأً من جريي من الشغل و استئذاني بدري ساعتين بإذن رسمي من الشغل و كان رئيس القطاع في كلام انه جاي يفتش علينا و سبته


بل و فيه واجب عزاء ظهر فجأة بعد وفاة والد أحد المقاولين اللي اشرفت عليه ما يقرب من سنة و دفنته و الصلاة عليه كانت الظهر و العزاء من بعد الدفنة لبعد الصلاة العشاء بشوية و ما رحتش و زعلان جداً اني ما رحتش بس قولت مش معقول أبقى بأدعي الناس و عامل هليلة و ما أروحش


رحت موقف دمنهور الجديد اللي برة البلد عند مستشفى الحميات و ده ليه حكاية طويلة و بوست لوحده


و صليت الظهر على حصيرة فارشها بعض السواقين لأن الموقف أبو 20 مليون جنيه مفيهوش مسجد و لا حتى زاوية بس بدأوا يبنوا مسجد بعد ما ظهرت المشكلة مع تشغيل الموقف و ركبت عربية القاهرة حوالي 1.45 م و انطلقنا الساعة 2.00 م وصلت القاهرة الساعة 4.00م و كنت ضبطت مع أحمد الصباغ عن طريق الموبايل اننا نتقابل في رمسيس عند مسجد الفتح






ركبت المترو من شبرا الخيمة لحد رمسيس و كانت أول مرة أشوف المدون الحنون اللي يحسسك إنه أخ و في نفس الوقت كبير عيلة أحمد الصباغ





صليت العصر في جامع الفتح وهو كان مصلي من زمان طبعاً أنا اللي كنت متأخر لظروف السفر

و أصر يعزمني على الغداء بسرعة قبل الإجتماع إتغدينا و رحنا الإجتماع و كانت الصدمة الأولى


قاعة الحريات بتاعة إجتماع المرة اللي فاتت فيها معرض بدل و كارفتات و حاجات كده و مش فاضية أمال الإجتماع حيتعمل فين





في الجنينة في الكافيتريا المفتوحة و تحت الشجر يا وهيبة حنحكي عن التعذيب الليلة


الصدمة التانية إن نوارة ما جاتش و لا منعم جه و كل اللي اتعرفت عليهم المرة اللي فاتت ماجوش


مفيش غير جيهان شعبان من اللي أعرفهم


نوارة كانت مامتها تعبانة و قالت لي على الموبايل ان كريم البحيري جاي و معاه ضحية من ضحايا التعذيب و ما جاش


و ايمي و كوكا كانوا مأكدين انهم جايين و مجوش و الله أعلم بظروف كل واحد


بس أحمد الجيزاوي جه و اليعقوبي و الجعفري و كذا مدون تانيين


و عقد الإجتماع الموسع على الضيق بعد صلاة المغرب





و دي صور الإجتماع







اتكلم الأول الأستاذ أحمد سيف الإسلام من مركز هشام مبارك









و كان هوا اللي بيدي الكلمة للي عايز يتكلم و ناقشنا جدول الأعمال المنشور في البوست اللي فات بند بند


و اتكلم مندوب اللجنة القانونية استاذ محامي مش عارف اسمه









و قال ان فيه عشرين قضية تعذيب هما متابعينها دلوقتي واتكلموا عن تدريب المحامين للتصدي لمثل هذه القضايا و نشر المعرفة القانونية بين جموع شباب المحامين بالإجراءات القانونية الواجب اتخاذها في مثل هذه القضايا


و جه واحد شكله مخبر أمن دولة بيسأل على أسماء الموجودين بحجة إنه صحافة بس كان شكله مفقوس قوي


و بعدها لقينا واحد من أمن نقابة المحامين قاعد ورانا في ترابيزة مجاورة و رامي ودنه و عمال يكتب كل كلمة



وناس اتكلمت و اقترحت اقتراحات









بس الدكتور ده شلني بإقتراح وقفة إحتجاجية امام مجلس الشعب







قمت قلت له لما اجتماعات مغلقة بتقل يبقى فكرك الوقفة حيحضرها كام ؟ قالي مش مهم نبتدي إن شالله بعشرة قلت له و بعد كده يقلوا ؟


دا بعد ما الأمن يهشهم طبعاً

المفروض الكلام يكون معقول

و انفض الإجتماع مع آذان العشاء و قمنا صلينا العشاء في مسجد النقابة بإمامة الجعفري








حبايب قلبي اليعقوبي و الجعفري




و بقية المدونين اللي حضروا بس أحمد الجيزاوي واقف شكله كان مستعجل :)


و بعد صلاة العشاء انعقد إجتماع اللجنة الإعلامية و لجنة العمل الجماهيري




و جيهان شعبان رئيسة اللجنة اتكلمت في وسائل الدعاية للمجموعة من بوسترات و استيكرات و بانرز و خلافه بس ما كانش حد فينا بيعرف تصميم الفوتوشوب و اتفقنا على اسم واحد معين للتصميم


و اتكلمنا عن رصد لكل ما ينشر في وسائل الإعلام عن حوادث و قضايا التعذيب في مصر و اصدار تقرير شهري به هذا الرصد



و كانت حاضرة نهى عاطف من جريدة الدستور


المهم اتفقنا ان اللجنة القانونية حتحدد لنا الحالات المحتاجة متابعة اعلامية من العشرين قضية اللي معاهم و احنا كمدونين حنغطيها و نوزع الشغل ما بيننا


وخلص الإجتماع على إن فيه مؤتمر يوم 25/1/2008 اللي هو يوم عيد الشرطة و ذلك لفضح التعذيب



خلص الإجتماع و اتجهت شلة المدونين بقيادة الجيزاوي الى القهوة أو البورصة


و اتكلمنا هناك على مولد أبو حصيرة في دمنهور خشوا لنك المدونة اللي في السايد بار و حتعرفوا الموضوع أكتر


و قابلنا بالصدفة وائل عباس صاحب مدونة الوعي المصري اللي الدنيا مقلوبة عليه دلوقتي بسبب نشره لفيديو جاله على الإيميل لواحد بيعذب واحدة و ينتهك عرضها


بحجة ان مصدر الفيديو مجهول و يمكن يكون متلفق


ماشي بس هوا مهمته انه ينشر و مهمة النيابة انها تحقق في الكلام ده و مهمة الشرطة انها تتحرى عن الموضوع


و رغم اني مش متفق مع اللغة البذيئة لوائل في بعض التدوينات إلا أنني لا أرضى أن تذبحه الحكومة لأنه يفضحها


و خلص اليوم الجميل المتعب و اتفرقنا على وعد بلقاء قريب ان شاء الله


بس أجمل حاجة فرحتني هيا لقائي بالمدونين اللي بأحبهم من قبل ما أشوفهم


واكتملت فرحتي برؤياهم


معلش تغطية متأخرة و طويلة بس أنا داخل بيتنا إمبارح بعد نص الليل من السفرية دي


خدوا من طرائف الصور علشان ما نقطعش العادة


أحمد الصباغ في حالة تركيز عميييييييق

و كل اجتماع موسع و انتم طيبين

هناك 21 تعليقًا:

عصفور المدينة يقول...

ربنا يكرمك يا محمد

appy يقول...

طيب بزمتك لما يكون فى الجنينه مش ده تعذيب فى البرد يالا معلش انا اسفه بس انا كنت مسافرة علشان انا نصى المنصورة والتانى العريش فبعمل كل اسبوع رحله لمكان وغير كده المرة دى كانت العريش وقبلها الاسماعيليه اصل انا بقيت آبى موحد المحافظات زى مينا موحد القطرين كده

Hossam يقول...

مرسى اوى انك عبرتنى ودعتنى للاجتماع.متشكر اوى لاهتمامك

الفاتح الجعفري يقول...

مهندسنا الكبير
والله انا اتشرفت جدا بمقابلتك
والموضوع دائما في الاول بيبقي صعب والتضييقات امر وارد والركود امر وارد ايضا
هو لو كان الشعب بيتحرك كان ده بقي حاله
وربنا يبارك فيك ويعزك
ودايما منورنا

مهندس مصري يقول...

عصفور المدينة
=============
حلو الدعاء ده يا بشمهندس أبو يحيى
اللهم آميين أنا و انت و كل المسلمين

appy
====
عقبال ما توحديهم على خير ان شاء الله
و حنلم لك حق البنزين المرة الجاية :)
ألف شكر و مفيش داعي للأسف على الأقل انتي ما إلتزمتيش بالحضور

حسام
====
انت يا بني أمل المستقبل اللي جاي بكرة بلغاتك الكتير دي ممكن تعمل شغل اعلامي هايل و انت مدعو دايماً سواء لقاء سياسي أو ودي
:)
سعيد بمعرفتك يا حسام

الفاتح الجعفري
==============
الشرف ليا برضه يا أحمد لأنك نموذج مشرق للشاب المسلم
ربنا ييسر لنا من أمرنا رشداً
ثم النور دا طبيعي مش شغال في الكهرباء يا معلم
:)

لماضة يقول...

لا كده فى حاجه مهمه جدا نسيتها يا هندسه مين اللى دفع المشاريب ولامكنش فيه هههههههه
حقيقى بحييك على الفكره جدا ومعلش لو كان العدد قليل ان شاء الله المره الجايه يكون اكتر ولو فى مشاريب يبقى ان شاء الله اجى معاكم
بس عجبتنى احلى حاجه قلتها لقاء المدونين
سؤال يطرح نفسه
انت روحت متاخر ليه ؟؟ وهل ده ليه علاقة المخبر ؟؟

مهندس مصري يقول...

لماضة
=====
علشان تعرفي انك مش مركزة معايا وعايزة تتلامضي يا دكتورة و خلاص
:)
أنا من مدينة دمنهور عاصمة محافظة البحيرة يعني بيننا و بين القاهرة ساعتين في الميكروباص
الإجتماع كان من 5.00 لحد 7.30 و بعدين قعدت مع المدونين على القهوة لحد 9.00 و كانت المشاريب بنظام كل واحد يدفع لنفسه بس الصباغ صمم انه يدفع لي
كان بيعاملني معاملة ضيوف غداء و مشاريب و حتى تذكرة المترو دفعها لي في المرواح من التحرير للمظلات
مدون كريم و ابو الكرم كله و لا نقول خال الكرم
:)
بس و من المظلات لموقف عبود فميكروباص دمنهور فتاكسي على بيتنا و دخلت من الباب 12.10
أظن الوقت كان يا دوب فمتظلميش المخبر
سعيد بلماضتك يا دكترة :)

Desert cat يقول...

حمد الله على سلامتك يا بشمهندس
دايما اجمل فى الرحلات اللى زى دى الصحبة الحلوة
دمت محبا للجميع

coca يقول...

والله انت عامل تغطيه كويس كان المفروض تشتغل في التحقيقات في الفضائيات ههههههههه وهتبقي مشهور شغل جميل

بس بصراحه هو العيب او مش العيب اول خطوه في عدم نجاح شئ هي عدم النظام

واتمني ان يكون في نظام والنظام مش هيجي غير لما يكون في خطه وهد معين الناس هتشتغل عليه علشان ميبقاش مجهود ضايع في الهوا

بس يكفي انك قابلت ناس زي اليعقوبي والجعفري حقيقي ناس محترمه جدا

واتمني اننا نقابل احمد الصباغ ان شاء الله

مهندس مصري يقول...

كوكا
====
طيب خلي إيمي تتوسط لي
:))
ثم مفيش هيكل تنظيمي محدد فتحسي بقلة النظام و بعدين أنا حسيت ان الناس دي من كتر ما بتحضر ندوات و اجتماعات و فاعليات مش مهتمة قد كده بالإجتماع ده أهو واحد من ضمن حاجات ياما و اللي ما يحضروش حيحضر غيره كتير ويا مكتر الهم على القلب و هما من القاهرة يعني الموضوع سهل بالنسبة لهم
أما بالنسبة لي كان الموضوع مهم و مختلف

بس بالنسبة للخطة فيه خطة و فيه جدول زمني و ادوار متوزعة في العمل بس ربنا يسهل

و على قولك كفاية مقابلة الحبايب
:)

Ahmed Al-Sabbagh يقول...

هههههه

ربنا يكرمك ويعزك

ياحبيبى ده أقل واجب تجاه انسان جميل وحبوب زيك

بقى كدة تاخدنى صورة على غفلة ماشى ماشى

انا كمان مصورك صور كتير ولسه بجهز البوست بتاع التغطية وان ماوريتك

هههههههه

بس بجد انا بتكسف اعمل بوست تغطية بعدك لأنك ملك التصوير والريبورتات

عموما احب اقولك شرفت القاهرة وشرفت اخواتك المدونين وان شاء الله يكون لنا لقاءات على خير وتشرفنا دايما

تحياتى

السيد شبل يقول...

انا اول مره بدخل على مدونتك ... بقرى تعليقاتك ف اماكن كتير ... اكيد كنت هاجى الاجتماع ده .... انا معرفش غالب المدونبن اللى كانوا موجودين ... يمكن ده كان السبب فى انى معرفتش ....
عموما انا قريت كتير ف مدونتك ... مدونة محترمه وبتمنالك التوفيق ... هستنى زيارتك و اتمنى يكون بينا اتصال اكتر وتعرفنى مثل هذه الاجتماعات ..
وكل سنه وانت طيب وبتمنالك عام جديد سعيد

محمد الجرايحى يقول...

أخى الكريم
السلام عليكم ورحمة الله وبركاته
أشكرلك هذا التقرير الوافى
أخى: دائماً الأعمال العظيمة والكبيرة تبدأ صغيرة ولكن مع توليها بالرعاية والاهتمام وكثير من الدأب تكبر وتحقق كل الطموحات

تقبل تقديرى واحترامى

مهندس مصري يقول...

قطة الصحراء
============
الله يسلمك و سلامة ضهرك ألف سلامة

أحمد الصباغ
===========
الواحد ما يقدرش يوفيك حقك من الكلام
المهم مستني صوري و تغطيتك أما نشوف حتعمل ايه بالكاميرا الديجيتال اللي عميت نص الإجتماع بفلاشاتها
أنا كل ده بكاميرا موبايل غلبان و من غير فلاش

السيد شبل
==========
تشرفت بزيارتك
و كل سنة و انت بكل خير
أنا بصيت عندك بس مليش في الشعر قد كده بس ان شاء الله نتواصل دايماً
:)

محمد الجرايحي
==========
و عليكم السلام و رحمة الله و بركاته
سعيد بتشريفك ليا

Noha Atef يقول...

يا بشمهندس!

شكرا على التغطية للاجتماع، والاهتمام بالاعلان عنه ، والاعلان عن فعاليات مصريون ضد التعذيب

انها نهى عاطف.. وفعلا من جريدة الدستور


بس اناالصراحة كنت حاضرة مش بصفتى المهنية، انا(وافتخر) محررة موقع التعذيب فى مصر

WWW.TORTUREINEGYPT.NET

يوم 3 يناير يبقى فات عليه سنتين
وبيعلن عن فعاليات مصريون ضد التعذيب.. ابقى تابع عليه
تحياتى :)

السيد شبل يقول...

اولا ازيك يا باش مهندس ... انت دخلت المدونة عندى ما لقيتش غير شعر ...
يا راجل ده نسبة الشعر ما تجيش ربع المقالات او الاراء ...
عموما كل سنه وانت طيب واتمنى زيارتك مرة اخرى للمدونة للتعرف عليها اكثر

مهندس مصري يقول...

نهى عاطف
========
أدينا بنحاول نعمل حاجة بسيطة ما تجيش حاجة جنب بطولاتكم

السيد شبل
===========
حاضر
عينيا الإتنين
:)

كريم البحيرى يقول...

اتقدم بالاعتذار الى حضرتك وكل من حضر الاجتماع على عدم حضورى مع ضحية التعذيب محمود الغمرى والذى عذبه الامن داخل منزلة ثم انتقل به الى مقر مديرية الامن وتناولوا تعذيبة بسبب ان قريب زوجتة مستشار وصديق للمحافظ وكان سبب عدم حضورى هو اصابة احد اصدقائى فى حادثة على طريق طنطا ونحن فى طريقنا الى القاهرة مما اطرنى للاعتذار للضحية على ان يتم مقابلتى له فى اقرب فرصة خلال ايام وان شاء الله وعد بالاجتماع الشهرى القادم ان لم يحدث مكروه سيتم حضورى وهو بصحبتى لكى يخبركم بما حدث له ووعد ان يتم ادارج كل ما حدث معه تفصليا على مدونة عمال مصر ومدونة احترس انت الان فى مصر وبعض مدونات الاصدقاء ومصريون ضد التعذيب

مهندس مصري يقول...

كريم البحيري
===========
كان الله في عونك و ربنا يوفقك
و ألف سلامة لصاحبك
:)

بحبك يامصر يقول...

بشمهندش ربنا يوفقك يارب وعمل بجد رائع وانا اول مره بمر عندك سعيد جدا واكيد مرورى عندك هيكون على طول

مهندس مصري يقول...

بحبك يا مصر
===========
شكراً و ياريت تكون بقية المدونة عجبتك قلب في الأرشيف و قول لي رأيك