الثلاثاء، أغسطس 28، 2007

كن رائعاً

جائتني هذه الرسالة على الميل و رأيت أن تشاركوني فيها


ღ♥ღ كــــنـــ رائـــــعاًღ♥ღ
عندما تبدأ يومك.. بالصلاة والدعاء فأنت إنسان رائع
عندما تبدأ يومك.. بابتسامة صادقة فأنت إنسان رائع
عندما تفشى ..السلام لكل من يلتقي بك فأنت إنسان رائع
عندما تتعامل ..مع الآخرين بكل احترام فأنت إنسان رائع
عندما تتعامل.. مع أفكار الآخرين وتستمع إليها جيدا ولا تهمشها أو تحتقرها فأنت إنسان رائع
عندما.. تسمع وتشاهد أكثر مما تتكلم فأنت إنسان رائع
عندما ...تعلم بأن الكلمة التي تنطق بها إما أن تكون لك أو عليك فتفكر قبل أن تنطق بكلمات قد تكون ضدك فأنت إنسان رائع
عندما تعلم ..بأن الفرصة قد لا تتكرر مرة أخرى وتحسن استغلالها عندما تأتي فأنت إنسان رائع
عندما ..تحفظ الآخرين في غيابهم ولا تقول فيهم ما يعيب فأنت إنسان رائع عندما ..تعطي رأيك بكل صدق عندما يطلب منك فِأنت إنسان رائع
عندما.. تعتني بمظهرك دون تكلف ولا تعيب أو تستهزئ بمظهر الآخرين فأنت إنسان رائع
عندما.. تحافظ على نظافتك الشخصية ونظافة المكان الذي تتواجد فيه فأنت إنسان رائع عندما ..لا تتسرع في إصدار الأحكام على الآخرين عبر ما تسمع عنهم من غيرك فأنت إنسان رائع
عندما ..تحترم دورك وتحترم الأنظمة فأنت إنسان رائع
عندما.. تسرع في السؤال عن الآخرين عندما تفتقدهم فأنت إنسان رائع
عندما ...لا تتردد في تقديم المساعدة للآخرين في حال فرحهم.. وفي حال حزنهم وتقف إلى جانبهم فأنت إنسان رائع
عندما ..تعامل والديك كما تتعامل مع مد رائك في العمل أو أساتذتك في المدرسة من سرعة استجابة في تنفيذ ما يطلب منك أو خفض للصوت أو الكلمات التي نسمعها- حاضر , سم , ابشر , طال عمرك , من عيوني , على راسي - وتقف عندما يحدثك احدهما وهو قائم وتفسح لهما المكان فأنت إنسان رائع
عندما ...تحب ولا تبالغ فيه.. أو تكره ولا تبالغ فيه فأنت إنسان رائع والاروع أن لا تصرح فربما تقلب لك الايام المحبة كراهية والكراهية محبة
عندما ..لا تتحدث بكل ما تسمع فأنت إنسان رائع
عندما ..لا تتحدث فيما لا تعرف فأنت إنسان رائع
عندما ...تحافظ على خصوصياتك ولا تسمح للإخرين بمعرفة كل شىء عنك فأنت إنسان رائع
عندما ..تستر ما لا يرغب الاخرون كشفه لاحد فأنت إنسان رائع
عندما.. تتوفر فيك ..الصفات التى ذكرت أعلاه أنت بالفعل رائع.... والكل يقدرك ويسعى إليك ويحترمك ويحترم رأيك.. ويفكر كثيرا بما تقول ويكون مستمعاً جيدا لك ...وترتفع أسهمك لدى كل من يعرفك أو يسمع عنك
أخيرا عندما تقرأ موضوع وتحب ان يشاركوك الاخرين فيه فانت انسان رائع
وعندما.. تمر على موضوع .. وتقرأه ثم ترد على كاتبه ....فانت انسان رائع...
وعندما..تنقل موضوع ..وتكتب منقول ..فانت أنسان رائع ..




فريق عمل
::...مجموعة اهل القران...::
نور الاسلام

الاثنين، أغسطس 27، 2007

شكراً لكل القراء

أحب أشكر كل اللي دخلوا المدونة
فعلاً حسسوا الواحد إن اللي بيكتبه ليه لازمة
و شكر خاص لكل الإيجابيين اللي علقوا
ما تتخيلوش فرحة الواحد بالتعليق قد ايه
لكن اللي محيرني حاجة في العداد بتاع الزوار عندي ناس بتزورني يومياً من مورشيوس
و متابعني من أول ما بدأت و مورشيوس جزيرة في قلب المحيط الهندي
هوا في حد من مورشيوس بيعرف عربي ؟
الى الإخوة بتوع مورشيوس رجاء التعليق على البوست ده و عايزين نتعرف
و ألف شكر للي متابعيني و أوعدكم بشوية بوستات جديدة تعجبكم ان شاء الله

الخميس، أغسطس 23، 2007

يا مرحب يا نظيف باشا 4

الحلقة الأخيرة علشان طولنا عليكوا قوي

الباشا لم يفتتح نادي القوات المسلحة و لا مبنى التحكم الإقليمي في كهرباء غرب الدلتا و ذلك لعدم انتهاء أعمال الرصف الجديد أمامهم و هوا ما يصحش يمشي بعربيته المرسيدس السوداء المصفحة 200 متر بحالهم على أسفلت قديم

و لم يفتتح مجمع المواقف اللي إتكلف 25 مليون جنيه علشان موضوع الكوبري اللي ظهر فجأة بعد الشكاوي و القضايا التي قامت برفعها شركات التأمين على سيارات الميكروباص الجديدة التي ستعمل بالموقف و أكدت فيها أن الموقف بوضعه الحالي سيتسبب في حوادث كثيرة مما سيتسبب بخسائر لها كونها ملتزمة بالتأمين على السيارات ضد الحوادث

و تناول السادة الضيوف طعام الغداء في قاعة وجيه أباظة بالنادي الإجتماعي (نادي ألعاب دمنهور ) و الذي تم إحضاره لهم من قرية الحجناية القريبة من دمنهور

حيث قام الحاج محمود الأعصر عمدة القرية و عضو الحزب الوطني و عضو مجلس الشوري بالتزوير

قام بإحضار 15 طباخ من قبلها بليلة تفننوا في طبخ لحوم الغزلان و النعام بصفة خاصة مع بعض اللحوم العادية الأخرى

ربنا يخلي لنا الفول و الطعمية

و أنصحكم بقراءة قصيدة أحمد فؤاد نجم الفول و اللحمة

و المثل بيقول إطعم الفم تستحي العين

فقام بعدها الباشوات بزيارة قريته و إعطاؤها لقب القرية المثالية قبل أن يغادروا المحافظة

اللهم صبرنا يارب

الأربعاء، أغسطس 22، 2007

يا مرحب يا نظيف باشا 3

يا 3 مراحب يا نظيف باشا

و أخيراً إنتهت الزيارة الميمونة

شوفوا الصور و بعدين نتكلم

الكورنيش الجديد بتاع الباشا


العمود الجديد بتاع الباشا

اللي المفروض يستخدم في تزيين مداخل المباني مش في الكورنيش بإمتداد 2 كم على الجانبين و اللي تكلفت عمدانه و كابلاتها الأرضية فقط 10 مليون جنيه


النخل اللي حطوه للزينة و لما السعف اصفر لأن النخل محطوط كده و مش مزروع جابوا سعف أخضر جديد و ثبتوه في النخل امبارح بس علشان الباشاوات يشفوها خضرا



واحدة من يفط ترحيب ملهاش أول و لا آخر

نصبة مولد سيدي نظيف


الكورنيش الجديد للباشا


برضه الكورنيش أبو 16 مليون

الكورنيش القديم يا ولاد الشعب


و خليكوا فاكرين إن القديم لسه معمول من 4 سنين بس

شارع الكورنيش وسعوه على امتداد 5 كم و ما همهومش حاجة و لا حد و هدوا سور مضرب الأرز و سور جمعية الشبان المسلمين و نصف جامع الصحابة لكن عند مديرية الأمن الجديدة لأ الناس مقامات برضه





نادي القوات المسلحة الجديد اللي تحول بقدرة قادر الى نادي مبارك
الزبالة على الكورنيش القديم اللي الباشا مش حيمر عليه


البلاستكاية دي لسه مدهونة إمبارح باللون الأصفر رغم انها لسه راكبة من 3 أسابيع بس و كان لونها برتقالي

يمكن الباشا بيحب الأصفر و لا حاجة



بعض صور الدمار في شوارع رئيسية في دمنهور بس ما عداش عليها الباشا



شفتوا شكل البلد الحقيقي ايه و المهم ان إحنا مصورين في شارع رئيسي كبير و اتجاهين و بجزيرة في النص و منور بعمدان النور و كل اتجاه حارتين أو 3 حواري

انما لو كنت دخلت الشوارع الفرعية و لا الحواري كنتم شفتم فضايح أكتر

الشارع ده هو أقصر طريق من مجمع المواقف الجديد للكورنيش الجديد لأنه خط مستقيم لكن معداش فيه الباشا لأنهم دخلوه البلد من عند مبنى المحافظة من سكة ودنك منين يا جحا

و عليه حركة مرور كثيفة علشان شركة المياه و مبنيين التأمين الصحي بتوع محافظة البحيرة للموظفين و المعاشات و الطلبة


دا غير حركة النقل التقيل علشان شركة الزيوت المستخلصة (مصنع الزيت) و مطاحن غرب الدلتا و صوامع الغلال -لتخزين القمح و غيره - يعني مدخل رئيسي و مهم للبلد


الشارع ده كان لسه متسفلت جديد من 3 سنين و قبل ما يعدي على الأسفلت سنة جه حفر مشروع المياه و كل شارع في دمنهور اتحفر فيه خط مياه واحد أو خطين بالكتير إلا الشارع ده اتحفر فيه 3 ثلاثة خطوط لأنه يقع عليه محطتين المياه اللي في دمنهور فعملوا خط مياه تالت للربط بين المحطتين

و بالتالي تم تدمير أسفلت الشارع دمار شامل من حوالي سنة و نصف و عدى فصل الشتاء الماضي كله كان سباحة في الطين و الروبة و نستعد من الآن للشتاء القادم المطين بطين

دا غير الناس العيانين و العواجيز اللي بيشوفوا الويل علشان يكشفوا و لا يصرفوا دواء من التأمين الصحي الخاص بمحافظة البحيرة بالكامل و ليس دمنهور فقط في هذا الشارع المدمر

و المشكلة مش في شارع و لا اتنين دا كل حي أبو الريش مدمر و ده مساحته حوالي ربع مساحة دمنهور

دا غيرأحياء إفلاقة و عزبة سعد و عزبة العبيد

وحواري سيدي عمر و أبو عبد الله و صلاح الدين و القلعة

ونصف شبرا

لكن ما دام وسط البلد و عند المحافظة و مديرية الأمن و بيت المحافظ تمام

يبقي مش مهم بقية البلد

أضحكوا

طب اسمعوا دي لسه عارفها طازه

الموقف الجديد لم يفتتح و لن يتم افتتاحه قبل 5 سنين على الأقل

لأن رئيس الوزراء إكتشف ان مداخل و مخارج الموقف على الطريق السريع الزراعي ستؤدي الى إرتباك مروري حاد على طريق مصر اسكندرية الزراعي

فقرر و هوا واقف مطرحه انشاء كوبري علوي يمر فوق الطريق الزراعي عند مجمع مواقف دمنهور

بحيث يربط اتجاه اسكندرية القاهرة بكوبري علوي للدخول و الخروج من الموقف

اما اتجاه القاهرة الاسكندرية فهو بجانب الموقف و يتم الدخول و الخروج منه بشكل طبيعي

و سيتم عمل الكوبري في خلال 1.5 سنة

و هو ما تسبب في ارباك هيئة الطرق و الكباري حيث ان الخطة الموضوعة كانت تقضي بعمل كوبري علوي أمام مدخل دمنهور عند شارع المحافظة

و ذلك بعد الإنتهاء من كوبري كفر الدوار العلوي

هذا و قد تظاهر أصحاب المحلات التي قاموا بشرائها أو استئجارها في سور الموقف الجديد احتجاجاً على إحتمال تأجيل عمل الموقف سنين عديدة و لكن قام الأمن المركزي بتفريقهم في الحال نظراً لقرب الموقف من معسكر فرق الأمن

ما قولتلكوش بالصدفة شوفت الموكب بتاعهم عند المستشفى العام و هما رايحيين يفتتحوا الكورنيش

بوكسات بوليس و بعدها عربيات الحراسات الخاصة 4*4

وبعدهم أتوبيس كبير خالص و بعدها بتاع 30 أو 35 عربية مرسيدس سودا

و بعديهم حراسات خاصة و بوليس برضه

بس ما عرفتش أصوره

يالله نستكمل التفاصيل في الحلقة القادمة


الثلاثاء، أغسطس 21، 2007

يا مرحب يا نظيف باشا 2

يا مرحبتين يا نظيف باشا

تتوالى الأنباء تباعاً بخصوص زيارة نظيف باشا لمحافظة البحيرة وهي زيارة تاريخية حقاً لأننا دايماً منسيين و ما أقدرش أفتكر آخر مرة زارنا فيها رئيس وزراء حتة واحدة

لا و الحلاوة بقه ان معاه جميع محافظين الجمهورية يعني النهارده حيبقى يوم تاريخي والله أعلم حنعرف نروح الشغل في المحمودية و لا مداخل و مخارج و شوارع دمنهور حتتقفل لحد ما الزيارة تخلص

الشوارع اللي حيمر منها اتملت بوابات من بتاعة الفراشة متعلق عليها يفط النفاق و الترحيب الحار بالباشا و صحبه الكرام

واحد علق و قال يعنى لو واحد مات مش حيلاقوا فراشة علشان يعملوه صوان للعزاء يالله اللي يموت يستريح

فضائح الزيارة

واحد

سيقوم الباشا بإفتتاح كوبري كفر الدوار على الطريق الزراعي و الذي به خطأ هندسي فادح و فاضح

يتمثل في أن إرتفاع التقاطع الذي تمر منه السيارات أسفل الكوبري يجب ألا يقل عن خمسة متر و نصف 5.50 م حسب المواصفات و الرسومات و لكن الحادث حالياً أن الإرتفاع أربعة متر 4 م فقط و ذلك بسبب خطأ في التنفيذ و بذلك لن تتمكن اللواري و عربات النقل الثقيل من المرور أسفل الكوبري و ستضطر لدخول كفر الدوار من الدوران

قبل أو بعد الكوبري بما يقرب من عشرة كيلومترات

و كفر الدوار كلها مصانع و حركة اللواري على ودنه آدي واحد

اتنين

الكورنيش الذي سيفتتحه الباشا في دمنهور و طوله اثنين 2 كم وهو جزء من كورنيش دمنهور الذي يبلغ طوله خمسة 5 كم والذي تم بناؤه من أربعة 4 سنين فقط

تكلف الكورنيش الجديد لنظيف باشا و الذي تم عمله على عجل من ثلاثة 3 شهور فقط ستة 6 مليون جنيه بينما تكلفت أعمدة الإنارة و كابلاتها الأرضية لنفس الكورنيش عشرة 10 مليون جنيه لأنها من أغلى نوع و الذي يستخدم في تزيين مداخل المباني المهمة و من السفه وضعه على جانبي الكورنيش بطول اتنين 2 كم

يعني ستاشر 16 مليون جنيه في الكورنيش و بقية البلد بايظة

ثلاثة

بصوا على الخريطة دي توضح مشاكل شبكة المياه في دمنهور عام 2003 قبل التجديد و الإحلال

احنا صلحنا نصفها و فاضل نصفها مش كانت هيه أولى بالفلوس بدل الفشخرة الكدابة

دي خريطة كبيرة نزلوها على الجهاز عندكم و كبروها و اتفرجوا و بعدها اتحسروا

أربعة
نادي القوات المسلحة الجديد على ترعة الخندق الشرقي المارة بدمنهور
بعد ما علقوا يافطة باسم
نادي القوات المسلحة
من اسبوعين نزلوها أول امبارح و حطوا واحدة جديدة
" نادي مبارك "
ما هو كل البلد بتاعته و يمكن نظيف باشا يفتتح النادي ده و يمكن لأ الله أعلم
كل المشاريع اللي حيفتتحها نظيف كان ممكن يفتتحها رئيس مجلس المدينة أو المحافظ بالكتير
الحاجة الوحيدة اللي عليها القيمة فعلاً هي توسعة محطة مياه أبو حمص و زيادة انتاجها ثلاثة أضعاف
وعلى فكرة شركة مياه شرب البحيرة مصنفة أحسن شركة مياه في الجمهورية
و التحاليل المعملية بتؤكد إن مياه الشرب في مدينة دمنهور هي أنظف مياه في مصر كلها و الحمد لله
اما القرية النموذجية اللي حيزورها في كفر الدوار فجنبها قرى ياما حالتها بالبلا
و في داخل مدينة كفر الدوار كوبري ما خلصش من ثلاثة و ثلاثين 33 سنة و المستشفي الشامل فيها ما خلصش من ثلاثين 30 سنة
حتى عقود شقق اسكان مبارك اللي حيوزعها في كفر الدوار طبقاً للبرنامج الإنتخابي للسيد الرئيس
شقق مساحتها اتنين و خمسين 52متر مسطح مكونة من أوضتين و صالة و مطبخ و حمام صغيرين جداً
و الناس دافعة تمنها بالتقسيط المريع و ليس المريح على ثلاثين 30 سنة تحسبها تلاقي الشقة واقفة بـستة و تسعين 96 ألف جنيه يا بلاش و لما العمارة تقع بعد عمر طويل ما لكش حق في الأرض لأنك ماضي عقد حق إنتفاع و ليس تمليك
مما إستفز زكريا الجنايني عضو مجلس الشعب عن كفر الدوار من كتلة الإخوان المسلمين في تصريحاته لجريدة الدستور
هو و الدكتور محمد جمال حشمت الممثل الشرعي لأهل دمنهور و الذي تم التزوير ضده في الإنتخابات السابقة لصالح الدكتور مصطفى الفقي
حيث قال الإثنين بالفم المليان لا مرحباً بك يا نظيف
جاي رئيس الوزاراء بجلالة قدره هو و المحافظين علشان يفتتحوا موقف الميكروباص و سوق الخضار
وكم ذا بمصر من المضحكات و لكنه ضحك كالبكاء
حأستلف موبايل واحد صاحبي بكاميرا و أصور لكم البلد و تشوفوا الفرق بين شوارع حيمر فيها الباشا و شوارع عايش فيها الشعب
يا ولاد الشعب
انتظروا الصور قريباً مع تغطية لما سيحدث في البلد أثناء الزيارة

تحية على السريع للحكومة

لا يجد الشخص ما يقوله عما يحدث في البلد إلا أن يردد قصيدة الشاعر أحمد فؤاد نجم عمنا كلنا
و التي اسمها
قصيدة عليا الحرنكش
عليا الحرنكش ياريس مبارك
في عصر مزركش ملون بنارك
لأبايعك وأبايع حكومة حمارك
ملعون أبو اللي يقدر يقاطع قرارك
نهاره مقندل وليله مبارك
فهمبك وهجص وطلع في ديننا
أكيد هو طالع يشاهد جمالك
جمالك جمالنا سوزانك سوزاننا
يا محلا عهدك لمصر اللي جالنا
نسيمها في عصرك بيشوي ف بدنا
أأيد وأبايع فخامة جلالتك
وأأيد أي واحد بيمسح ريالتك
ولأنك سر باتع هننسى هبالتك
فأقعد ياريس ودلدل حمامتك
حمامتك ياريس حمامة السلام
سلامة الحمامة وسلامتك ياريس
ياريس حمامة ياريس كويس
على تل مصر ياريتك تهيص
خرابة فسيحة عليها تمتيس
وأأمر تطاع فشعبك مفيص
و حسبنا الله و نعم الوكيل

الاثنين، أغسطس 20، 2007

يا مرحب يا نظيف باشا



دولة السيد الأستاذ الدكتور المهندس أحمد نظيف رئيس الوزراء

قرر التكرم و التعطف بزيارة دمنهور المنسية دائماً في وسط عواصم المحافظات التانية

وتقول الشائعات انه سيعقد اجتماع مجلس المحافظين عندنا

و الزيارة الميمونة يوم الأربعاء القادم 22/8/2007 يعني بعد بكره

و قد بدأت الإستعدادت لإستقبال سعادته هو و صحبه الكرام فإنتشرت بوابات النصر و لافتات الترحيب من القيادات الشعبية و المحلية والتنفيذية

دا غير الإستعدادات الأمنية فقد تسلم رجال المخابرات و مباحث أمن الدولة و الحرس الخاص النادي الإجتماعي بدمنهور حيث سيتناول سيادته و رفاقه طعام الغداء و منعوا المواطنين و العاملين من الدخول حتى تنتهي الزيارة

ومن المفترض ان يقوم نظيف باشا بإفتتاح المشاريع التالية

مجمع مواقف دمنهور الجديد بجوار مستشفى الحميات

سوق الخضار الجديد بعد كوبري إفلاقة

نادي القوات المسلحة

الكورنيش الجديد من كوبري افلاقة و حتى كلية الشريعة و القانون

مبني التحكم الإقليمي في نقل الكهرباء بغرب الدلتا بقرية زاوية غزال شمال مدينة دمنهور بجوار محطة كهرباء دمنهور

و سيتم عقد اجتماع المحافظين في مجمع مبارك الثقافي

و الغداء في قاعة وجيه أباظة بالنادي الإجتماعي


كده الخبر انتهي نتكلم عليه بقى

لأول مرة في حياتى أحس اني محتاج موبايل بكاميرا علشان أوريكم شكل الشوارع اللي حيمر فيها الباشا ايه و بقية شوارع البلد ايه

الشوارع اللي حيمر فيها اتسفلتت كويس و اتروقت و نضفت و بقت على سنجة عشرة

اما بقية البلد منظرها كأنها خارجة من الحرب الأسفلت متكسر مطرح حفر مشروع تجديد شبكتي المياه و الصرف

و التراب مغطي الشوارع و لا كأنها طرق ترابية في عزبة مش في عاصمة أكبر محافظات الوجه البحري مساحةً

و ده رغم ان المقاولين اللي حفروا الشوارع دفعوا مئات الآلاف من الجنيهات كقيمة رد الشئ لأصله لمجلس المدينة قسم الطرق علشان يأخدوا تصريح الحفر

و رغم ان كان المفروض المقاولين يرقعوا مطرح الحفر برقع أسفلت مؤقتاً

مجلس المدينة رفض لأنه قال ان عنده خطة شاملة لرصف البلد و فات سنة و لا حصل حاجة

و العربيات عفشتها باظت من كتر التكسير اللي في الشوارع

لأ و لسه مشروع المياه ما اكتملش

التمويل من المنحة الإيطالية 50 مليون جنيه خلص و مكفاش المشروع جابوا 20 مليون كمان من الشركة القابضة لمياه الشرب و الصرف الصحي و ما كفوش و ما اتغيرش من المواسير المتهالكة في دمنهور غير 55% و شبرا بحالها ما إتلمستش

ما عدا شارع المحافظة اللي مواسيره كانت سليمة و مش محتاجة تغيير و مع كده تم وضع 4 كم مواسير في الشارع بدون لازمة بناءً على توجيهات المحافظ السابق اللواء عادل لبيب

دا غير إهداره للمال العام في تغيير الأعمدة الكهربائية اللي في الرصيف الأوسط في الشوارع الرئيسية المرتبطة بكابلات هوائية بأخرى على يمين و شمال الشارع ترتبط بكابلات أرضية بتكلفة 220 مليون جنيه

سعادة اللواء رايح ينور شوارع منورة أصلاً ب 220 مليون جنيه

بينما الأسفلت مكسر و شبكة المياه تصميماتها جاهزة و مواسيرها أغلبها موجود و ممكن يخلص تجديد الشبكة بأقل من نص المبلغ اللي هو صرفه على عمدان الكهرباء

و شبكة الصرف الصحي متهالكة بنسبة 65% تقريباً و محتاجة احلال و تجديد عاجل

انا واحد صاحبي في الصرف الصحي أكد لي ان ساعات كتير بييجي صرف صحي لمحطة معالجة الصرف الصحي بكمية تصرف أكبر من طاقة المحطة على الإستيعاب فبيرموا الزيادة بدون معالجة في مصرف الخيري

يعني إحنا محتاجيين محطة صرف صحي تانية فوراً

و محطة مياه تانية علشان يدوبك نلاحق الزيادة السكانية


اتكلم على ايه و لا ايه دا الواحد مرارته مفقوعة

نكمل بعدين

مذكرات الفريق سعد الدين الشاذلي

تعليقاً على ما ورد في مدونة الأخت العزيزة نوارة أثناء التعليقات على كتاب الناس و الحرب للعقيد البطل اسامة الصادق من كلام عن مذكرات الفريق سعد الدين الشاذلي رئيس أركان حرب القوات المسلحة المصرية خلال حرب أكتوبر 1973
رأيت وضع هذا الرابط لتنزيل هذه المذكرات القيمة و التي تحتوي على الكثير من الحقائق الصادمة و المريرة
و برنامج أكروبات ريدر لفتح المذكرات
و بعد قراءة هذه المذكرات يمكننا أن نقارن بين رؤية أحد أبطال موجة العبور الأولي
للحرب و رؤية رئيس الأركان الذي يتحكم في حركة جميع قوات و أسلحة و فروع الجيش المصري

من هو الفريق سعد الشاذلي 




سعد الدين الشاذلي
من ويكيبيديا ، الموسوعة الحرة

الفريق سعد الدين الشاذلي



الفريق سعد الدين الشاذلي ولد في قرية شبراتنا مركز 
بسيون في دلتا النيل في أبريل/نيسان 1922.
يوصف بأنه الرأس المدبر للهجوم المصري الناجح على خط الدفاع الإسرائيلي بارليف في 
حرب أكتوبر عام 1973.
بعد إنضمامه إلى الأكاديمية العسكرية في 
القاهرة تمتّع بمهنة بارزة كجندي محترف.
كان هو مؤسس وقائد أول فرقة مظلات في مصر في (
1954-1959
قائد أول قوات عربية موحدة في الكونغو كجزء من قوات الأمم المتحدة(
1960-1961)؛
ملحق عسكري في لندن (
1961-1963
قائد لواء المشاة (
1965-1966)؛ قائد القوّات الخاصّة (الصاعقة) (1967-1969
قائد منطقة البحر الأحمر (
1970-1971
و في مايو 1971 عيّن رئيس هيئة أركان القوّات المسلّحة المصرية حتى 
1973.
أصبح السفير إلى 
بريطانيا (1974-1975) وبعد ذلك إلى البرتغال في 1975، حتى طرده في 1978 بعد انتقاد سياسات الرّئيس السادات.
فهرست
1 حياته العسكرية
2 الخروج من الجيش
3 مؤلفاته
4 وصلات خارجية

السبت، أغسطس 11، 2007

أنا مين

السلام عليكم
أنا لسه جديد في موضوع المدونات ده و مبعتبرش نفسي مدون
لأن أنا مهندس صغير و الشغل مطحنة و ما أدراكم ما شغل المدني شغال في الفاعل مع العمال و الصنايعية في الشمس و الحر
دا غير إني مهندس حكومة يعني شغال بملاليم و بأمضي على شغل بملايين و أي حاجة غلط أنا اللي حأشيل مسئوليتها بأعتباري مهندس الإشراف الخاص بالمالك (الحكومة) و أنا اللي بأستلم من المقاول و من مهندس المقاول
و لكن حأجرب أتكلم شوية عن اللي حاسس بيه من ناحية البلد و اللي بيحصل فيها و مفيش مانع أتكلم عن نفسي و محافظتي و مدينتي و شغلي
أنا متابع دايماً لمدونة نوارة نجم "جبهة التهييس الشعبية" ومدونة عبد المنعم محمود"أنا إخوان" و ما أحلمش أكون زيهم و يارب أحصل ربعهم
أنا بأحب الإخوان و لو إن أنا مش إخوان و ليا بعض الإختلاف مع بعض أفكارهم لكن بأحبهم و ليا أصحاب و جيران إخوان
و بأحب أيمن نور بل و انضميت لحزب الغد من شهر 4/2005 لحد شهر 12/2005 لما أيمن نور خد حكم في القضية المتلفقة و إتحبس وبعدها ما دخلتش الحزب و لا خطيته برجلي رغم اني ما قدمتش استقالتي رسميا من الحزب لغاية النهاردة لكن زهقت من الصراعات على مناصب تافهة بين الناس و بعضها جوه الحزب بينما أيمن محبوس و العملية مش ناقصة و بصراحة بعد حبس أيمن نور يئست من العمل السياسي الحزبي و آمنت إن مفيش فايدة من الأحزاب
أنا قارئ دائم لجريدة الدستور المصرية سواء يومي أو إسبوعي وبأحب إبراهيم عيسي و بلال فضل ومعظم اللي بيكتبوا في الدستور
و بأعتبر الدستور هوا الجرنان اللي فتح عنيين المصريين على حاجات ياما كانت غايبة عنهم
مش عارف أقول ايه تاني أرجو إني ما أكونش بايخ و لا رذل
سلام وعرفوني رأيكم