الأحد، سبتمبر 30، 2007

شبكة أم نبيل

للأسف أنا من مشتركي شبكة أم نبيل أكبر شبكة للمحمول في مصر
و أسوأ شبكة من حيث الخدمة أيضاً حيث أصبح تهييس الشبكة كل ليلة خميس أمر طبيعي و من المسلمات و لا يثير إستغراب أحد
كما تسقط الشبكة مرة أو مرتين كل شهر بالساعات عادي جداً
وكانت ثالثة الأثافي عندما أردت إدخال خدمة الإنترنت على العدة الجديدة و إشتركت في خدمة أم نبيل لايف
أولاً طراز العدة غير موجود في قوائم رسائل الخدمة المسجلة صوتياً لضبط التهيئة
و لابد من الإتصال بخدمة العملاء configuration
ثانياً في خدمة العملاء يتم تنبيهك أن المكالمة ستتكلف 1.50 جنيه مهما طالت مدتها و أنه سيتم تسجيل المكالمة لأغراض تحسين الخدمة ثم يتم توصيلك بأحد العاملين بخدمة العملاء
وكان نصيبي في أول مرة مع واحدة إستلمتني تلييف و تشطيف على أحسن ما يكون كالتالى
أنا : السلام عليكم - لم ترد هي السلام
هي : مساء الخير كل سنة و حضرتك طيب يا أفندم إسم حضرتك ؟
أنا : المهندس فلان الفلاني
هي : أهلا بحضرتك طلبات حضرتك يا أفندم
أنا : كنت جبت عدة جديدة
هي : مقاطعة ليا قبل ما أكمل الكلام "ألف مبروك يا أفندم
أنا : الله يبارك فيك عدة نوكيا 3110 كلاسيك و إشتركت في أم نبيل لايف
هي : مبروك يا أفندم
أنا : مخنوقاً من التلييف " وكنت عايز أدخل نت و أشترك في رسايل الـ mms
هي : حالاً حأبعت لك رسايل تهيئة الخدمة يا أفندم و ما تنساش تحفظهم على الجهاز و تدخل له0000 أربع أصفار ككود للرسالة الثانية شكراً لإشتراكك مع أم نبيل
وغني عن الذكر إن الرسايل ما عملتش حاجة
و تكررالموقف بنفس التفاصيل تقريباً مرتين كمان و كلهم ما فيش عندهم غير الرسايل يبعتوها لي و كل مرة أتصل بخدمة العملاء آخد التشطيفة التمام و أقفل و أنا دمي محروق من الكلام المزوق اللي مالهوش فايدة
المشكلة إن أم نبيل ملهاش مركز خدمة عملاء في دمنهور علشان يحل لي المشكلة أو على الأقل ألاقي حد أتخانق معاه و أنا مشغول في الشغل لدرجة مش هأعرف أسافر لإسكندرية لخدمة العملاء هناك
بينما اللي يغيظ إن واحد أعرفه معاه نفس العدة بس على شبكة فودة فون و شغالة بكامل إمكانياتها
أنا فكرت أغير الشبكة لكن المشكلة إن الشغل كله عن طريق النمرة دي إزاي حأبلغ 230 واحد بالنمرة الجديدة و لو إني سمعت إنهم بعد رمضان بفترة الله أعلم طويلة و لا قصيرة حيفتحوا التحويل بين الشبكات بنفس النمرة و الكود و بأقول أستنى و أحول بنمرتي
بس قرفان خصوصاً إن رسايل الsms
مش شغالة على العدة الجديدة برضه و بتطلع رسالة خطأ بتقول الشبكة لا تدعم الرسائل القصيرة إتصل بمزود الخدمة أم نبيل يعني
مش عرف أعمل ايه شكلي حأغير النمرة و الشبكة و أمري لله
ملحوظة : - مش لاقي برامج للعدة دي
عايز برنامج يفتح تسجيل الفيديو بدل الثواني المعدودة اللي بيسجلها و عايز برنامج بيشغل فيديو لأن العدة بتشغل فقط ملفات
3gp
صبرنا على أم نبيل يارب

الجمعة، سبتمبر 14، 2007

أخيراً جبت عدة موبايل بكاميرا


جبت محمول بكاميرا أخيراً نوعه




و من هنا و رايح البوستات حتبقى بالصور دا غير الفيديوهات


فرحان و الله يا جماعة إدعوا لي تبقى العدة دي وش السعد عليا


رغم اني كنت مرتبط بالعدة القديمة




بس التطور سنة من سنن الحياة و عموماً ما راحتش بعيد بابا أخدها و حيدخل عالم المحمول بعد طلوعه على المعاش يوم الاتنين اللي فات على 65 سنة


انتظروا بوستات بالصور و الحبشتكانات


و كل سنة و انتو طيبين


خطة أمريكا لمحاربة الإسلام فكرياً

مش عارف ليه حاطيننا في دماغهم ما يعيشوا في حالهم و يسيبونا في حالنا عايزين يفككوا الإسلام عن طريق ضربه من الداخل
إقرأوا التقرير و بعدين نتكلم‏

الخميس، سبتمبر 13، 2007

إبادة قرية فلسطينية بالكامل في النقب


التاريخ:30/08/1428
المختصر
/
الشرق / بينما الجميع مشغولون بمناكفات فتح وحماس، وفى حين توزع إسرائيل حبوب السلام المخدرة على عواصم العرب، التي ابتلعها البعض وأدمنها آخرون، فإن قواتها أتمت إبادة قرية عربية في النقب، ضمن برنامج وحشى لمحو 45 قرية من الوجود

الثلاثاء، سبتمبر 11، 2007

مهرجان الصياعة و التشرد

قصدي مهرجان السياحة و التسوق
مساء يوم الخميس الماضي 6/9/2007م كان حفل ختام مهرجان السياحة و التسوق بإستاد مدينة دمنهور الرياضي و حضره محافظ البحيرة اللواء شعراوي و لفيف -حلوة لفيف دي - من القيادات الشعبية و التنفيذية لحد هنا و عادي
اللي مش عادي إن الحفل قامت بإحياؤه -أو تسخينه ما تفرقش - المطربة اسماً و الراقصة فعلاً بوسي سمير و المطرب مجد القاسم و الخبر ده فيه كذا حاجة عجيبة
1-
قامت قوات الأمن المركزي بحصار الإستاد و فرض طوق أمني كثيف و منع المرور في الشوارع الملاصقة لأسوار الإستاد و لم تكفي قوات أمن البحيرة فإستعانت بقوات خاصة من القليوبية
تردد أن هذا الحشد الكثيف لحماية بوسي سمير من أن يحدث لها ما حدث لزميلتها مروى من انتهاك لعرضها على المسرح بشاطئ النخيل بالإسكندرية
2-
دمنهور ليست مدينة سياحية حيث لا يوجد بها أي معالم سياحية أو متاحف أو غيره ربما تكون رشيد هي الأنسب أو وادي النطرون و لكن ليس دمنهور قطعاً
3-
لا يوجد لدينا تسوق و الحال واقف و الحمد لله والناس يدوب بتشتري الأكل و الهدوم و كان الله بالسر عليم
4-
ما علاقة راقصة مقبوض عليها من شرطة آداب شارع الهرم من ملهى ليلي لمخالفتها مواصفات زيي الرقص و التعري الفاضح بالسياحة و التسوق إلا إذا كان المقصود سياحة من نوع آخر
5-
استمرت السهرة صباحي وربنا يعين المحافظ و القيادات علينا

السبت، سبتمبر 08، 2007

التاج علينا حق

التاج ده جاي لي من البشمهندس عصفور المدينة و ده أول تاج يجيي لي بما إني لسه نونو في عالم التدوين
يبقى حأستأذنكم نأجل رجل الحمار شوية لحد ما نجاوب على التاج ده
لما أحب أتابع أخبار التكنولوجيا وأخبار العالم بفتح
المختصر للأخبار وجووجل للأخبار وماليش في التكنولوجيا قد كده
لما أحب ألعب على الكمبيوتر
أنا كارت الشاشة عندي قديم 8 ميجا بس علشان كده بألعب ألعاب قديمة عادة بأحب الإستراتيجي و الحربي زي
age of empires 2 & 3 , army men , delta force 1 , igi , f22 & red alert 2& yuri revenge
بس الكلام ده لما يكون الواحد فاضي و دماغه رايقه مرتين أو تلاتة في الشهر يعني
لما أحب أقرأ مقالات إسلامية حلوة و إسلوبها ممتع
عادة في إسلام أون لاين بس ما بأعملهاش كتير
لما بأحب أكتب
بأكتب عن حاجة مضيقاني و عايز أفضفض عنها و ساعات بأكتب اللي ييجي في دماغي ساعة الكتابة بدون ترتيب و بدون تحضير للموضوع
لما أحب أطبخ
أنا ما بأعرفش أطبخ ربنا يخلي لي الست الوالدة لحد ما أتجوز واحدة تعرف تطبخ من ضمن مواصفات كتير
لما أحب أقرا أدب عالمي
مش بأدور على حد معين اللي بيقع في إيدي بأقراه بس بأحب مايكل كرشتون و جول فيرن و الخيال العلمي المتقن عموماً
لما أحب أختار قلم
أي حاجة تكتب و السلام النقاوة دي كانت أيام الكلية أيام الروترنج و اليونيبول و خلافه
لما أحب أعمل أي حاجة
بأعملها بمزاج و إتقان
لما أحب أطلع من حالة غضب أو ضيق أو حزن
عادة بأتوضى و أصلى ركعتين علشان الحديث اللي معناه إن الغضب من الشيطان و الشيطان من نار و الماء يطفئ النار واننا لما نغضب لازم نتوضى و نصلي ركعتين علشان الشيطان يبعد عنا معلش مش فاكر متن الحديث بالضبط
لما أحب أدور على أي تسجيل إسلامي : أناشيد / شرايط الخ
عادة مش بأدور على الحاجات دي بس موقع طريق الإسلام غالباً فيه كل حاجة ممكن أدور عليها و ساعات بأنزل منه دروس
لما أحب اتكلم
ياه دا أنا مشهور بالرغي بس ساعات ناس بتتضايق من رغيي و ساعات تانية ناس تانية بتتكيف و بتحس إنها إستفادت معلومات جامدة مني أصل العبد لله مثقف الشلة و لا فخر بس ساعات بينزل عليا سهم الله و بأقعد ساكت ليه الله أعلم حسب المود و الحالة النفسية للواحد
لما أحب أتعامل مع الناس
بأتعامل معاهم بما يرضي الله لأني بأفترض إن اللي قدامي شخص كويس و محترم إلى أن يثبت العكس و للأسف أحياناً بيثبت العكس و بيصيبني الأذي من الناس دول بس لازم الواحد يعامل الناس بما يحب أن يعاملوه به بس لو واحد آذآني كذا مرة بأحطه في البلاك ليست black list
و بأصدر له الوش الجبس و بأتعامل معاه ميري بدون ظلم في المعاملة لكن بدون ود وحب برضه و البادئ أظلم
لما احب أخرج
بأخرج مع أصحابي بس شلة هندسة هاجرت و شدت الرحال للخليج العربي و منتظر إني أحصلهم بأخرج مع شلة المحامين منهم بعض أصحاب من ثانوي نقعد على قهوة هادية في مكان بعيد عن الزحمة و الوش و الدوشة و نقعد نتكلم و نتناقش و نفضفض لبعض و نشيل هموم بعض عن بعض و يمكن ساعات تكون في حاجات حلوة فنفرح لبعض
لما أحب أقرأ مجلات
بطلت أقرأ مجلات من زمان و أنا صغير كنت بأقرا ماجد و ميكي وسمير ومجلة الشباب أحياناً
دلوقت بأقرا جريدة الدستور اليومي المصرية بس
لما أحب أمررالتاج
أمرره لكل اللي شرفوني و علقوا عندي من أول ما إبتديت تدوين

الاثنين، سبتمبر 03، 2007

رجل الحمار

عارفين المثل اللي بيقول الشاطرة تغزل برجل حمار


المثل ده هو القاعدة الأساسية للعمل مهندس في الحكومة


خصوصاً لو كنت نضيف و مش مفتح مخك ده من ناحية


و من الناحية التانية لما ما تكونش عبد الروتين و اللوايح الغبية اللي معمولة علشان توقف المراكب السايرة

يعني الواحد بيحارب على 3 جبهات

الأولي : المقاول و الإشراف عليه و على صنايعيته و عماله و مهندسيه إن الشغل يطلع مطابق للمواصفات و سليم هندسياً و لا تشوبه شائبه

الثانية : الروتين و اللوايح اللي بترغمك علشان تعمل مستخلص للمقاول مثلاً تملأ إستمارات عتيقة و تعمل كذا نسخة بالكربون لأن إختراع ماكينة تصوير المستندات غير معترف بيه

أما عمله ببرنامج للجداول الحسابية مثل الإكسل فهو نوع من الخيال العلمي الغير معترف به حكومياً

يبقى نعيش عيشة أجدادنا الموظفين الأوائل و نستعمل الإستمارات العتيقة و الكربون و الكوريكتور و خلافه و محروق أبو الكمبيوتر

دا غير تزمت المديرين اللي عايزة تلزمك بمواعيد حضور و إنصراف !!! عجيبة والله

المفروض ان مواعيد الحضور و الإنصراف من 8 ص:2.30م للناس اللي قاعدة على مكاتب إنما الناس اللي مرمية في المواقع و التنفيذ مش من المفروض تتربط بمواعيد

لأن لما المقاول و العمال ييجوا الساعة 9 ص أنا أروح قبلهم بساعة ليه

و لما يقعدوا يشتغلوا للمغرب حأسيبهم و أمشي الساعة 2.30م لأ لازم أقعد معاهم و أراقبهم و أستلم الشغل المظبوط منهم و أرفض الشغل اللي فيه ملاحظات لحد ما تتصلح و أستلمها مظبوطة
الثالثة : مكائد و وقيعة بعض الزملاء هداهم الله و هذه من أسوأ الجبهات عندما يأتي الزر أو الإسفين من زميل أو زميلة تتعامل معهم على أساس من المودة و الأخوة و لكنهم يقوموا بنقل معلومات مغلوطة و مضللة عن العمل للقيادات العليا لكي يحظوا بثقتها و يصبحوا عملاء لها و جواسيس على زملائهم
وسأتحدث بإستفاضة فيما بعد عن رجل الحمار اللي ماسكها بقالي سنتين و شغال بيها و ياريت عاجب