الأحد، ديسمبر 30، 2007

كيف تشترك في و تتابع أخبار مصريون ضد التعذيب


في ناس ياما سألتني إزاي يعرفوا فاعليات و أنشطة مصريون ضد التعذيب

و الرد ببساطة إشتركوا في مجموعة مصريون ضد التعذيب البريدية على الياهو

عنوان المجموعة البريدية على النت هو

Group Email Addresses

عناوين الميل بالترتيب للي عايز ينشر رسالة , يشترك في المجموعة , يلغي الإشتراك في المجموعة , يعرف المشتركين في المجموعة

Post message: اللي عايز ينشر رسالة
EgyptiansAgainstTorture@yahoogroups.com

Subscribe: اللي عايز يشترك
EgyptiansAgainstTorture-subscribe@yahoogroups.com

Unsubscribe: اللي عايز يلغي الإشتراك
EgyptiansAgainstTorture-unsubscribe@yahoogroups.com

List owner: اللي عايز يعرف المشتركين
EgyptiansAgainstTorture-owner@yahoogroups.com

و أظن دي معلومات كافية لأني مش عايز أزحم المدونة بنشر إعلانات عن أنشطة مصريون ضد التعذيب تاني

بس ممكن أنشر تغطيات للحاجات اللي حأحضرها

و كل سنة و انتم طيبين

الجمعة، ديسمبر 28، 2007

الإجتماع الموسع اللي ضيق فجأة لمصريون ضد التعذيب

رحنا الإجتماع الموسع يا جدعان

و اللي حضروا كام 35 واحد بالتمام و الكمال

يعني العدد بيقل لأن المرة اللي فاتت كان العدد 60 واحد و كانت الحجة المستخدمة لتبرير العدد القليل إن فيه قافلة رايحة للعالقين في رفح و ضد حصار غزة و إن فيه إجتماع لنادي القضاة وغيرها حاجات كتير

طيب إمبارح ما كانش فيه حاجة !!!!!!

أنا مضايق وا الله بس نبتدي الكلام من الأول


بدأً من جريي من الشغل و استئذاني بدري ساعتين بإذن رسمي من الشغل و كان رئيس القطاع في كلام انه جاي يفتش علينا و سبته


بل و فيه واجب عزاء ظهر فجأة بعد وفاة والد أحد المقاولين اللي اشرفت عليه ما يقرب من سنة و دفنته و الصلاة عليه كانت الظهر و العزاء من بعد الدفنة لبعد الصلاة العشاء بشوية و ما رحتش و زعلان جداً اني ما رحتش بس قولت مش معقول أبقى بأدعي الناس و عامل هليلة و ما أروحش


رحت موقف دمنهور الجديد اللي برة البلد عند مستشفى الحميات و ده ليه حكاية طويلة و بوست لوحده


و صليت الظهر على حصيرة فارشها بعض السواقين لأن الموقف أبو 20 مليون جنيه مفيهوش مسجد و لا حتى زاوية بس بدأوا يبنوا مسجد بعد ما ظهرت المشكلة مع تشغيل الموقف و ركبت عربية القاهرة حوالي 1.45 م و انطلقنا الساعة 2.00 م وصلت القاهرة الساعة 4.00م و كنت ضبطت مع أحمد الصباغ عن طريق الموبايل اننا نتقابل في رمسيس عند مسجد الفتح






ركبت المترو من شبرا الخيمة لحد رمسيس و كانت أول مرة أشوف المدون الحنون اللي يحسسك إنه أخ و في نفس الوقت كبير عيلة أحمد الصباغ





صليت العصر في جامع الفتح وهو كان مصلي من زمان طبعاً أنا اللي كنت متأخر لظروف السفر

و أصر يعزمني على الغداء بسرعة قبل الإجتماع إتغدينا و رحنا الإجتماع و كانت الصدمة الأولى


قاعة الحريات بتاعة إجتماع المرة اللي فاتت فيها معرض بدل و كارفتات و حاجات كده و مش فاضية أمال الإجتماع حيتعمل فين





في الجنينة في الكافيتريا المفتوحة و تحت الشجر يا وهيبة حنحكي عن التعذيب الليلة


الصدمة التانية إن نوارة ما جاتش و لا منعم جه و كل اللي اتعرفت عليهم المرة اللي فاتت ماجوش


مفيش غير جيهان شعبان من اللي أعرفهم


نوارة كانت مامتها تعبانة و قالت لي على الموبايل ان كريم البحيري جاي و معاه ضحية من ضحايا التعذيب و ما جاش


و ايمي و كوكا كانوا مأكدين انهم جايين و مجوش و الله أعلم بظروف كل واحد


بس أحمد الجيزاوي جه و اليعقوبي و الجعفري و كذا مدون تانيين


و عقد الإجتماع الموسع على الضيق بعد صلاة المغرب





و دي صور الإجتماع







اتكلم الأول الأستاذ أحمد سيف الإسلام من مركز هشام مبارك









و كان هوا اللي بيدي الكلمة للي عايز يتكلم و ناقشنا جدول الأعمال المنشور في البوست اللي فات بند بند


و اتكلم مندوب اللجنة القانونية استاذ محامي مش عارف اسمه









و قال ان فيه عشرين قضية تعذيب هما متابعينها دلوقتي واتكلموا عن تدريب المحامين للتصدي لمثل هذه القضايا و نشر المعرفة القانونية بين جموع شباب المحامين بالإجراءات القانونية الواجب اتخاذها في مثل هذه القضايا


و جه واحد شكله مخبر أمن دولة بيسأل على أسماء الموجودين بحجة إنه صحافة بس كان شكله مفقوس قوي


و بعدها لقينا واحد من أمن نقابة المحامين قاعد ورانا في ترابيزة مجاورة و رامي ودنه و عمال يكتب كل كلمة



وناس اتكلمت و اقترحت اقتراحات









بس الدكتور ده شلني بإقتراح وقفة إحتجاجية امام مجلس الشعب







قمت قلت له لما اجتماعات مغلقة بتقل يبقى فكرك الوقفة حيحضرها كام ؟ قالي مش مهم نبتدي إن شالله بعشرة قلت له و بعد كده يقلوا ؟


دا بعد ما الأمن يهشهم طبعاً

المفروض الكلام يكون معقول

و انفض الإجتماع مع آذان العشاء و قمنا صلينا العشاء في مسجد النقابة بإمامة الجعفري








حبايب قلبي اليعقوبي و الجعفري




و بقية المدونين اللي حضروا بس أحمد الجيزاوي واقف شكله كان مستعجل :)


و بعد صلاة العشاء انعقد إجتماع اللجنة الإعلامية و لجنة العمل الجماهيري




و جيهان شعبان رئيسة اللجنة اتكلمت في وسائل الدعاية للمجموعة من بوسترات و استيكرات و بانرز و خلافه بس ما كانش حد فينا بيعرف تصميم الفوتوشوب و اتفقنا على اسم واحد معين للتصميم


و اتكلمنا عن رصد لكل ما ينشر في وسائل الإعلام عن حوادث و قضايا التعذيب في مصر و اصدار تقرير شهري به هذا الرصد



و كانت حاضرة نهى عاطف من جريدة الدستور


المهم اتفقنا ان اللجنة القانونية حتحدد لنا الحالات المحتاجة متابعة اعلامية من العشرين قضية اللي معاهم و احنا كمدونين حنغطيها و نوزع الشغل ما بيننا


وخلص الإجتماع على إن فيه مؤتمر يوم 25/1/2008 اللي هو يوم عيد الشرطة و ذلك لفضح التعذيب



خلص الإجتماع و اتجهت شلة المدونين بقيادة الجيزاوي الى القهوة أو البورصة


و اتكلمنا هناك على مولد أبو حصيرة في دمنهور خشوا لنك المدونة اللي في السايد بار و حتعرفوا الموضوع أكتر


و قابلنا بالصدفة وائل عباس صاحب مدونة الوعي المصري اللي الدنيا مقلوبة عليه دلوقتي بسبب نشره لفيديو جاله على الإيميل لواحد بيعذب واحدة و ينتهك عرضها


بحجة ان مصدر الفيديو مجهول و يمكن يكون متلفق


ماشي بس هوا مهمته انه ينشر و مهمة النيابة انها تحقق في الكلام ده و مهمة الشرطة انها تتحرى عن الموضوع


و رغم اني مش متفق مع اللغة البذيئة لوائل في بعض التدوينات إلا أنني لا أرضى أن تذبحه الحكومة لأنه يفضحها


و خلص اليوم الجميل المتعب و اتفرقنا على وعد بلقاء قريب ان شاء الله


بس أجمل حاجة فرحتني هيا لقائي بالمدونين اللي بأحبهم من قبل ما أشوفهم


واكتملت فرحتي برؤياهم


معلش تغطية متأخرة و طويلة بس أنا داخل بيتنا إمبارح بعد نص الليل من السفرية دي


خدوا من طرائف الصور علشان ما نقطعش العادة


أحمد الصباغ في حالة تركيز عميييييييق

و كل اجتماع موسع و انتم طيبين

الأحد، ديسمبر 23، 2007

دعوة مصريون ضد التعذيب الإجتماع الموسع الشهري

دعوة مصريون ضد التعذيب

الإجتماع الموسع الشهري

و اجتماع مجموعات العمل

يوم الخميس

الموافق 27/12/2007

الساعة الخامسة مساءاً

بنقابة المحامين

شارع رمسيس



جدول الاجتماع:

(1) توزيع مهام لإطلاق حملة

"لن نتنازل.. لن نتصالح"

افتحوا الملفات.. حاكموا جلادي التعذيب

· تصميم ستيكر للإعلان عن الحملة

(مجموعة الحملات والعمل الجماهيري)

· تصميم أدوات دعاية للحملة (بوستر –– بادج)

(مجموعة الحملات والعمل الجماهيري)

· جمع التوقيعات على العريضة لتضم قائمة الموقعين 1000 شخصية عامة.

(الجميع)

· دعوة الكتاب لتبني القضية.

(مجموعة الإعلام)

· إعداد تقرير بالانتهاكات يضم القوائم السوداء.

(المجموعة الميدانية والمجموعة القانونية)



(2) الإعداد للمؤتمر الأول

(3 ) مناقشة الحالات والمهام الدورية

· زيارات ميدانية للتضامن مع ضحايا التعذيب ولتقصي الحقائق.

(المجموعة الميدانية)

· حضور التحقيقات والمحاكمات.

(المجموعة القانونية)

· مؤتمرات صحفية.

(المجموعة القانونية – المجموعة الميدانية)



· تطوير السايت.

(مجموعة الإعلام)

· صياغة أخبار صحفية عن فاعليات المجموعة وأنشطتها قبل وبعد انعقادها.

(مجموعة الإعلام)

· حشد الصحفيين لحضور فاعليات المجموعة وتغطيتها والانتقال ميدانيا لتغطية وقائع التعذيب والفاعليات المصاحبة لها (مؤتمر صحفي، وقفة احتجاجية، محاكمة، زيارة للنائب العام...).

(مجموعة الإعلام)



· بيانات سياسية.

(مجموعة المتابعة)

· التنسيق مع المحافظات.

(مجموعة المتابعة) .


ده الكلام اللي وصلني على البريد الإلكتروني وأظن التفاصيل دي تجاوب على اللي قالوا حنروح نعمل ايه

حنروح نتناقش في الكلام و نضيف عليه و نحذف منه بمنتهى الحرية يا جماعة و رأي الأغلبية هو اللي حيمشي و لو حد مش عاجبه حاجة ممكن ما يعملهاش لأن الشغل تطوعي تماماً
المهم نحضر و نشارك و نكون إيجابيين وربنا يكرمنا و يسهل ما فيه الخير
:)
ربنا يكرم البلد دي و يصلح حالها يارب

الخميس، ديسمبر 20، 2007

مصريون ضد التعذيب إجتماع و انطباعات و غرائب


دعوة مصريون ضد التعذيب

الاجتماع الموسع الشهري واجتماع مجموعات العمل

يوم الخميس الموافق 27/12/2007
الساعة الخامسة مساءاً بنقابة المحامين شارع رمسيس

جدول الاجتماع:-
توزيع مهام لإطلاق حملة "لن نتنازل.. لن نتصالح"

حاكموا جلادي التعذيب ·
الإعداد للمؤتمر الأول .

دقت ساعة العمل
هي دي صيغة الدعوة اللي جات لي على البريد الإكتروني و المرة دي أنا قولت بدري أهوه علشان اللي قالوا المرة اللي فاتت ما قولتش ليه
أديني قولت و الحاضر يعلم الغايب و عايز أشوفكم كلكم هناك خصوصاً المدونين اللي من القاهرة الكبرى و ضواحيها المصراوية يعني علشان عيب يبقى في ناس جاية من المحافظات و ناس من نفس البلد ما تروحش إلا لو كان عذرهم جامد قوي
فاكرين اني كنت قولت حأنشرعن الإجتماع اللي فات إنطباعات عن الرحلة و غرائب أو طرائف الصور و أهو جه و قتها

محطة قطارات دمنهور


السكة الحديد 3 خطوط من اليمين للشمال

خط مصر إسكندرية , خط إسكندرية مصر , خط دمنهور دسوق

أنا كنت في المحطة من الساعة 9 ص علشان أركب قطار 9.10 اللي جه 9.30 ص

وصلت محطة مصر في رمسيس حوالي 11.30 ص وصليت الجمعة في مسجد المحطة

و الخطيب كان بيخطب عن الكعبة و الحج بس قال شوية حاجات غريبة لا أظن أن لها أصل في الدين و رفض النقاش فيها رغم أنه شاب أزهري صغير و لم يذكر أدلة عليها !!!!

عموماً مفيش صور غريبة و لا حاجة من اللي كانت نوارة خايفة منها غير الصورتين دول

ناس زهقانة و حاطة ايدها على خدها و عايزة تروح

و أ نورا يونس و أ جيهان شعبان خدوا جنب لوحدهم و مستنيين الفرج

عايز أشوفكم كلكم هناك المرة الجاية و نتقابل كلنا و ان شاء الله العميد محمود قطري حيحضر و يتكلم و اللي عايز يسأله يحضر السؤال من دلوقتي :)

الأحد، ديسمبر 16، 2007

الليلة الكبيرة يا عمي و العالم كتيرة

مولد أبو الريش

مولد أبو الريش في دمنهور هو أحد الموالد التي تنتشر في أنحاء مصر لمن يعتقد أنهم من أولياء الله الصالحين
و الرأي الشرعي يقول بأنه يحرم زيارة القبور للتبرك بها و التمسح فيها و تقبيل العتبات و النحر لها و النذر لها و الإعتقاد بأن المدفون بها يضر وينفع سواء بذاته أو بمكانته عند الله سبحانه و تعالى
فكل هذا شرك بالله و هو شرك أكبر مخرج عن الملة لأن من يعتقد بهذا يجعل لله شريكاً في ملكه و خلقه مثلما كان الكفار يقولون عن الأصنام إنما نعبدهم ليقربونا إلى الله زلفاً مع إعترافهم بربوبية الله و أنه هو خالقهم و هو من خلق السموات و الأرض و الكون كله فهذه كتلك
أما حضور الموالد فهو فرصة للمرح و اللهو المباح إذا إجتنبت المحرمات من فواحش و فتن و خلافه
عموماً أسيبكم مع الصور دي لـ اليلة الكبيرة بتاعة المولد ده السنة دي
تم تصويرها بتاريخ 30/11/2007




و ما الدنيا إلا مرجيحة كبيرة و على رأي عدوية حبة فوق و حبة تحت

الليلة الكبيرة يا عمي و العالم كتيرة ماليين الشوادر يابا مـ الريف و البنادر

عروض خاصة مميزة

وردشان فتاة رأس بدون جسد

فرقة ماجيك شو الساحرة

فتاة النار و الكهرباء

الساحر العجيب

و معجزات التنويم المغناطيسي

قرب قرب قرب بس التذكرة المباعة لا ترد

النيشان فتح عينك تاكل ملبن :)

زميرة للعيل يا أبو العيال ميل خد لك سبع زمامير

صفارة شخليلة طرطور يا حليلة

طراطير يا واد طراطير

طراطير طراطير طراطير

قبة سيدنا الولي دول نوروها محلى البيارق و الناس بيزوروها

قبة سيدنا الولي في الجو عالية محلى البيارق لما نوروها

و هوا مش سيدنا و لا حاجة

حمص حمص تل ما ينقص عالنار يرقص يرقص يرقص

دا غير كل أنواع الحلويات كلها وجايين من دسوق يبيعوا في دمنهور !

بياعين القصب الصعايدة

عربيات

و مراجيح

و خيم الطرق الصوفية دا غير الزفة و الموكب اللي بيعملوه بالطبل البلدي و البيارق و الرايات الخضراء

ربنا يهدي عبيده

أنوار جامدة و فرحة و زحمة و زيطة و زمبليطة رغم إن البلد مازالت بطن شوارعها مفتوحة زي ما أنتوا شايفين في آخر صورة بس لا شئ ممكن يمنع الناس من خطف لحظات من الفرحة وسط عالمنا القاسي حالياً

البوست ده إهداء خاص للأستاذ أحمد صاحب مدونة يوميات عيل مصري

و لأخويا في الله الفاتح الجعفري

كل سنة و انتم طيبين بمناسبة عيد الأضحي و ما تنسوش صيام يوم عرفة و الدعاء لكل الناس بالخير

الخميس، ديسمبر 13، 2007

خبر عاجل الحكم على العميد محمود قطري

خبر عاجل
الحكم على العميد محمود قطري

حكمت المحكمة في القضية رقم 7971 لسنة 2007 جنح قسم دمنهور
على العميد السابق و المحامي الحالي / محمود السيد قطري بغرامة 200 جنيه و تعويض مؤقت 5001 جنيه و ذلك بعد إدانته بتهمة إهانة موظف عمومي ( نائب مأمور بندر دمنهور ) أثناء تأدية عمله

الجدير بالذكر أن هذه القضية تم قلب الحقائق فيها حيث أن نائب مأمور بندر دمنهور و أحد صغار الضباط قاموا بالتعدي بالألفاظ غير اللائقة عليه أثناء تأدية عمله داخل قسم بندر دمنهور ومعه ثلاثة من موكليه في أحد القضايا و عندما إعترض على الإهانة قاموا بالسخرية منه و عندما ذهب لمدير أمن البحيرة للشكوى وجد معاملة مهينة من مدير الأمن و عندما ذهب للشكوى بالنيابة مما حدث له وعرف مدير الأمن الخبر أصدر أوامره لنائب المأمور بسرعة تلفيق مذكرة للعميد قطري تقلب الحقائق و مدعمة بتحريات المباحث المزيفة و بـ 3 من شهود الزور من المدنيين الذين ليسوا فوق مستوى الشبهات و الذين تضاربت شهاداتهم مع تحريات المباحث المزعومة و مع مذكرة نائب المأمور نفسه
و تم رفع هذا كله للنيابة ليجد الشاكي و المجني عليه نفسه و قد أصبح جانياً و متهماً
ومن يطلع على المذكرات و الأوراق المقدمة من الطرفين لابد أن يحكم ببراءة الأستاذ محمود قطري من تهمة اهانة موظف عمومي و لابد أن يدين خصومه بتهمة إهانة محامي المنصوص عليها بالقانون
و لكن يتردد أنه مورست ضغوط ضخمة على القاضي ليحكم بالحبس على العميد قطري و لكن ضميره لم يسمح له سوى بالغرامة و التعويض مقدراً أن هذه الإدانة منه للعميد قطري ستريحه من الضغوط و أن هذا حكم أول درجة و مازال هناك 3 درجات تقاضي أخرى من استئناف و معارضة إستئنافية و طعن بالنقض قبل أن يصبح الحكم نهائياً
و قد علق العميد قطري على الحكم في الفيديو التالي

يذكر أيضاً أن العميد قطري سيستأنف الحكم بالإضافة إلى مواجهته لقضيتين أخريتين وهما
- القضية رقم 512 لسنة 2006 جنح قسم دمنهور بتهمة سب و إهانة هيئة الشرطة لأنه صرح لصحيفة العربي الناصري بأن الشرطة تقوم بتزوير الإنتخابات!!!!!!!!!!!!!!!!!!!!
و الجلسة القادمة لهذه القضية يوم 24/12/2007 و ستكون الجلسة الثالثة في هذه القضية
- القضية رقم 21350 لسنة 2006 جنح أبو المطامير و جرت أحداثها من 14 سنة حيث تم اتهامه مع 11 من زملائه الضباط بالإهمال و مجازاتهم إدارياً جميعاً كعادة الداخلية العجيبة ثم بعد 14 سنة قامت بنبش الدفاتر القديمة و لمجرد المعاندة معه قامت بالتضحية بـ 11 من الضباط الآخرين و لم تعقد لهذه القضية أية جلسات حتى الآن حيث إستشعرت الدائرة الأولى التي كانت ستنظر في القضية الحرج
استشعرت الحرج و تنحت عن نظر القضية فتم إحالة القضية لدائرة أخرى ستعقد أولى جلساتها في 15/1/2008

وللأسف الشديد لم يحضر أي ممثل عن نقابة المحامين في هذه القضايا المرفوعة ضد المحامي محمود قطري و كان نقيب المحامين أثناء الجلسة الأخيرة مشغول بإرسال برقية شكر من إتحاد المحامين العرب للرئيس مبارك
كما كان تمثيل منظمات حقوق الإنسان ضعيفاً في الجلسة الأخيرة و ليس بكثافة أول جلسة
نسالكم التضامن مع العميد محمود قطري الذي يصر على قول كلمة الحق و لو كانت شديدة المرارة و نسألكم الدعاء له
و لنا معه مرات أخرى ان شاء الله

الثلاثاء، ديسمبر 11، 2007

نسبة إدمان التدوين عندي

فيه إختبار عبارة عن مجموعة أسئلة و تختار الإجابة من عدة إختيارات و في الآخر يقول لك نسبة إدمانك للتدوين

أنا عن نفسي عملت الإختبار و طلعت نتيجتي
مدمن بنسبة 82%
مش عارف النسبة الصحية كام
عموماً جربوه بنفسكوا و طمنوني على نتايجكم و صحتكم التدوينية
82%How Addicted to Blogging Are You?

Oklahoma City Dating

السبت، ديسمبر 08، 2007

تاج مليان لو بس ما بيفتحش عمل الشيطان

التاج ده اتمرر لي مرتين مرة من أستاذي البشمهندس عصفور المدينة و مرة من إخواتي الفاتحين اليعقوبي و الجعفري و رغم اني بعد قراءة إجابات البشمهندس عصفور حسيت بالضألة و إنه قطع قول كل خطيب بس علشان ما أزعلش حد مني حأجاوب و أمري لله


لو مكنتش مصري بس عربي
كانت هتبقى إيه نظرتك للمصريين واللي بيحصل في مصر دلوقتي؟


شعب مليان مواهب و متدين بفطرته و فيه خير أجناد الأرض و ساكن في أرض الكنانة بس شعب جبان خايف يثور على الحكام الظالمين و ما بيقاومش لتحسين وضعه و علشان كده حيفضل متخلف لحد ما يمتلك شجاعة التغيير

لوكنت أوروبي أو غير مسلم هتبقي إيه نظرتك للعرب والمسلمين؟

أكيد قبل ما أقرأ عن الإسلام حتكون نظرتي ليهم إنهم بدو رحل و حثالة و محدثين نعمة و لولا شوية البترول اللي عندهم كانت تبقى الدنيا أحسن من غيرهم لأنهم همج و بينتهكوا حقوق المرأة و بيتجوزوا 4 و بيعشقوا الظلم و الإستبداد

أما لو قرأت عن الإسلام و فهمته أكيد كنت حأعتنق الإسلام و أحترمه و أتحسر على حال العرب و المسلمين اللي عندهم أحسن دين و لو ابتغوا العزة به لأعزهم الله

لو قالوا لك إنت بقيت رئيس جمهورية هتعمل إيه؟

هأعمل زي ما أيمن نور كان عايز يعمل
حأحط بالتشاور مع أساتذة القانون الدستوري دستور جديد محترم بدل العك الموجود دلوقتى و بعد موافقة الشعب عليه في الإستفتاء
حأعمل زي موريتانيا إنتخابات محلية و برلمانية بدون تزوير ثم إنتخابات رئاسية مش حأترشح فيها و أسيب البلد للي الناس تختاره و يحكمها بعدل و بما يرضي الله
و البرلمان الجديد المنتخب هوا اللي يبقى يتعامل مع الفاسدين السابقين و يشرع قوانين جديدة محترمة تتفق مع شرع الله و يؤكد إستقلال القضاء اللي حيخضع له الكل من الرئيس للغفير و القضاء ده هوا اللي يحاكم رموز العهد البائد بما يرضي الله برضه

لوسمح لك برؤية الرسول عليه الصلاة والسلام وإنك تقوله كلمة واحدة ؟

أقول له أسالك أن تدعو الله لي و لكل المسلمين ان نرافقك في الجنة


لو كنا في عصر ازدهار الأندلس كنت تتخيل نفسك إزاي؟

أنا من عاشقي تاريخ الأندلس و قرأته بالكامل في موسوعة دولة الإسلام في الأندلس للمؤلف محمد عبد الله عنان في 8 أجزاء
و شايف ان تاريخ الأندلس يعتبر ملخص لتاريخ أمة الإسلام من إزدهار و وحدة ثم تفرق و إنحطاط

كنت حأكون مهندس برضه خصوصاً إن الأندلس كان فيها تفوق هندسي رهيب في الإنشاءات و المعمار و هندسة الري و المساحة و كل تخصصات المدني القديمة

و خير دليل على كده كاتدرائيات قرطبة و أشبيلية و غرناطة و التي كانت هي المسجد الجامع لكل مدينة من هؤلاء ثم تحولت لكنائس بعد سقوط الأندلس و ما زالت تشهد بعظمة المهندسين و المعمارين المسلمين دا غير قصر الحمراء في غرناطة و غيرها كتير

لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟

مش عارف بس أكيد لو بأحبها بجد حيكون صعب أتخلى عنها و غالباً حأفضل جنبها و نتجوز بس صعب جداً الواحد يفقد إحساس الأبوة ربنا ما يبتليناش بالإبتلاء الصعب ده

لو طلعت القمر هتكتب عليه ايه؟

هأغرس راية مكتوب عليها لا إله إلا الله محمد رسول الله
أما بالنسبة للسجود فده عادي أنا حأسجد كتير هناك في الصلوات الخمسة لأني مش حأبطل صلاة هناك :)

لو مررت التاج لحد و ما جاوبش هتعمل ايه؟

عادي هأزعل شوية و بعدين حنتصالح أنا قلبي أبيض و صعب أشيل من حد

تمرر التاج لمين ؟

أحمد الصباغ حبيب الملايين

جبهة التهييس الشعبية الزعيمة نوارة

قطة الصحراء خربوش الشرقية الكبير

أنونيمس أبو الطب كله

هذا أنا المغاربة أجدع ناس


الخميس، ديسمبر 06، 2007

تحقيق صحفي مع العميد السابق محمود قطري


تحقيق صحفي مع العميد السابق بالشرطة المصرية و المحامي حالياً الأستاذ محمود قطري

تحديث
رقم موبايله 0102905077 للي عاوز يتضامن معاه و لو بكلمة طيبة
و الكلمة الطيبة صدقة عظيمة و صفها الله في القرآن بأنها كشجرة طيبة أصلها ثابت و فرعها في السماء تؤتي أكلها كل حين بإذن ربها



محمود قطري لمن لا يعرفه هو عميد سابق بالشرطة المصرية و قد ألف كتاب إعترافات ضابط شرطة في مملكة الذئاب بعد تركه للشرطة يفضح فيه إنهيار جهاز الشرطة من الداخل



و كيف أن فاقد الأمن لا يمكن أن يعطيه و أن كل الضباط في حالة خوف مستمر من التقارير السرية الظالمة و المتجنية على الضعفاء منهم و هم من ليس لهم ظهر يستندون عليه أو واسطة قوية تيسر لهم أمورهم



وأن الضابط مطالب بأن يصل بعدد القضايا المضبوطة سنوياً لرقم لا يقل عن ما حققه سلفه في نفس الموقع فيلجأ إلى إختلاق القضايا خلقاَ و تلفيقها للأبرياء الضعفاء الذين يكونون بدون ظهر أيضاً حتى تكون إحصائياته سليمة و غالباً ما تكون القضايا الملفقة هي قضايا سلاح و مخدرات عن طريق المرشدين السريين لضابط المباحث و هم من المجرمين الذين يتغاضى الضابط عن نشاطهم الإجرامي مقابل مساعدتهم له في بلوغ القضايا المضبوطة النسبة المطلوبة



كما كشف أن التعذيب منتشر على نطاق واسع بين ضباط الشرطة و خاصة المباحث و ذلك كوسيلة وحيدة للحصول على الإعترافات من المشتبه بهم عن طريق الضرب و الصعق بالكهرباء خاصة في الأماكن الحساسة من جسم الإنسان و التعليق بطرق مختلفة من اليدين أو الرجلين و النفخ من فتحة الشرج بالمنفاخ و كم من مظلومين إعترفوا على انفسهم بما لم يرتكبوا ليرحموا أنفسهم من التعذيب ثم ظهر المجرمين الحقيقين في بعض هذه القضايا و تفجرت فضائح سرعان ما تم التغطية عليها



كما أكد ان المعاملة للطلاب في كلية الشرطة غير إنسانية و تهدف إلى غسل أدمغتهم و عزلهم عن الشعب و جعلهم يحسون أنهم طبقة ارقى من الناس فلا يجب ان يخالطوهم كما أن كل الناس هم إما مجرمين حاليين أو مجرمين محتملين فكل من خارج الشرطة مجرم محتمل فيجب الحذر منه



كما رأى أن تدريبات و مناهج كلية الشرطة ينقصها الكثير من ناحية العلوم الشرطية و البحث الجنائي و خلافه لذا يلجأ الضباط بسبب قلة إمكانيتهم البحثية إلى التعذيب لكونه وسيلة مجربة و مضمونة النتائج وتهتم المناهج بتدريبات أشبه بتدريبات الجيش من طوابير و خلافه مما لا يفعله الضابط في حياته العملية أبداً



لذا يهتم الضباط بتناقل نصائح متعارف عليها عن كيفية الضرب و التعذيب بدون ترك أثر حتى لا يؤثر ذلك على القضايا الملفقة و الداخلية تعرف ذلك و تباركه لكن الذي يسقط و ينكشف امره لا يرحمه أحد و لا يسانده احد و خاصة لو لم يكن مسنود



كما كشف عن تفشي الرشوة سواء الصريحة أو المقنعة لبعض ضباط الشرطة و يساعد على ذلك قلة مرتبات ضباط و افراد و جنود الشرطة مما يضعهم تحت إغراءات عسيرة قد يسقطون فيها لضيق ذات اليد و إضطرارهم للحفاظ على مستوى و مظهر إجتماعي عالي بمرتبات ضئيلة للغاية إلا للمسنودين الذين يتم تعيينهم في المناطق الطرية حسب تعبير الضباط أنفسهم مثل شرطة الكهرباء و السياحة و الجمارك و الجوازات و أمثالها من الفروع ذات الدخول العالية بينما الأمن العام لا يناله إلا الفتات



و قد تمت مصادرة هذا الكتاب بعد صدره مباشرة منذ عامين و تم تلفيق عدة قضايا للمؤلف منها على سبيل المثال إفشاء أسرار الشرطة و إتهام مأمور قسم دمنهور له بالتعدي عليه و إتهامه بإدانة وزارة الداخلية و الشرطة المصرية



و لم يصمت الأستاذ المحامي محمود قطري فقد قام بتأليف كتابه الثاني تزوير دولة و فضح فيه كيفية تزوير الشرطة لكافة انواع الإنتخابات و الإستفتاءات تمت مصادرة هذا الكتاب أيضاً و قام مؤخراً بتأليف مذكرة إرشادية صغيرة بعنوان حقوق المواطن داخل قسم الشرطة و لم يتمكن من نشرها حتى الآن و مازال صوت الأستاذ محمود قطري الحر ينطلق من مكتبه بمدينة دمنهور بمحافظة البحيرة ليعلن انه لن يتراجع عن فضح الداخلية و عن توعية المصريين بحقوقهم



و أقرب جلسة في سلسة المحاكمات التي يتعرض لها هي في 9/12/2007 في مجمع محاكم دمنهور و سأحاول نقلها إليكم بإذن الله لو سمحت الظروف

و قد كشف الأستاذ محمود قطري عن مطالبه من الداخلية و من الناس كما كشف عن موهبة في تأليف و إلقاء الزجل في الفيديوهات التالية


محمود قطري يستشهد بأحمد فؤاد نجم


يتسأل مالك يا مصر ؟


أربي إبني مخربش و لا أربيه محترم ؟


مطالب العميد محمود قطري من الداخلية و من المواطنين


محمود قطري يخاطب جورج بوش الإبن


مصر أكلها الغول

السبت، ديسمبر 01، 2007

الإجتماع الموسع لمصريين ضد التعذيب

الإجتماع الموسع لمصريين ضد التعذيب

البوست ده هو تغطية سريعة للإجتماع الموسع لمجموعة مصريون ضد التعذيب و اللي تم عقده يوم الجمعة 30/11/2007 بنقابة المحامين العامة بالقاهرة

للتغطية الشاملة بالفيديو

بصوا عند نوارة

الصراحة أنا كنت رايح بأقدم رجل و آأخر التانية أصل أنا مش بتاع ضرب و إشتباكات مع الأمن المركزي زي أحمد الجيزاوي مثلاً بس قلت ربنا يقدم ما فيه الخير

رحت وحابقى أقولكم إنطباعاتي عن الرحلة في البوست الجاي ما هو السفر من دمنهور للقاهرة بالنسبة لي رحلة لأني مأعرفش في القاهرة حاجة خالص بس أحمد الصباغ وصف لي السكة من محطة رمسيس لحد نقابة المحامين في الموبايل بس ما قدرش ييجي علشان كان عنده ظروف رغم اني كان نفسي أقابله والله خيرها في غيرها

المهم وصلت بدري ساعة فلقيت النقابة مقفولة أنا واصل الساعة 1 الضهر و الميعاد الساعة 2 رحت إتغديت فول و طعمية في أقرب محل ساندوتشات و اللي يسأل ما يتوهش و شربت كوباية شاي على قهوة قريبة و رجعت الساعة 1.45 لقيت الناس بدأت تهل حوالى 5 أو 6 بس اللي كانوا موجودين و مفيش و لا عسكري أمن و لا أي لبش يظهر كانوا عرفين ان ماحدش جاي بس الناس معذورة ما هو كان فيه إمبارح قافلة رفح لدعم قطاع غزة و إنتخابات نادي القضاة و إجتماع ممثلي أعضاء هيئات التدريس بكل الجامعات المصرية في نادي أعضاء هيئة تدريس القاهرة و اللي عرفته إنه كان متعرض لحصار أمني شديد ما تعرفش خايفين من دكاترة الجامعات ليه ؟
كانت نورا يونس اول الحاضرين و إنشغلت في عمل لوحة بها اسماء ضحايا التعذيب

ثم توالى حضور الناس و كانت اول مرة أشوف نوارة نجم

شخصية ظريفة و على سجيتها ورغم شهرة مدونتها الفائقة و شهرة والديها الجبارة فهي متواضعة و انسانة أخلاقها عالية على عكس ما يبدو من إسلوب كلامها في مدونتها
ثم رأيت عبد المنعم محمود صاحب مدونة أنا إخوان

شاب كويس برضه و هادي بيتكلم شوية و بينجز شغل كتير و كان فيه مدونين تانين ما أعرفش أساميهم بس شباب مية مية
كان فيه حضور من الصحافة الأجنبية صحفي سويدي إسمه بال قعد يسألني و أنا أجاوبه بس أول مرة حد يعمل معايا حديث صحفي :)
و كان فيه صحفية من جريدة الدايلي ستار و إسمها ألكسندرا مجايب منعم
بس مش عارف هيا جنسيتها ايه ؟ بس كانت نشيطة في تغطية أحداث اللقاء مش زي بال اللي مشي بدري بدري
و جات الأستاذة جميلة إسماعيل المذيعة المشهورة و زوجة الدكتور أيمن نور

و سلمت عليها و بعتّ السلام للدكتور أيمن معاها
دا غير جيهان شعبان اللي كنت بأشوف إسمها مالي النت و ما أعرفش شكلها ايه
دا غير بعض الناس المحترمة التانيين اللي ما عرفتش أسميهم أو ما جاتش فرصة نتكلم فيها مع بعض
أول حاجة عرفناها إن فيه حد سرب كلام إن الميعاد إتغير للساعة 4 العصر و قعدنا مستنيين لحد الساعة 4
تاني حاجة كنت مستغرب الجو اللي موجود دول شوية شباب زي العسل مع قلة من الكبار اللي زي السكر و الجو العام كأننا في رحلة أو فسحة مش في حدث خطير و إستغربت بقى هما شوية الشباب دول اللي راعبين و فاضحين الحكومة
دي حكومة خيخة صحيح و الله حاجة تكسف الحكومة و تشرف كل المدونين
بدأ اللقاء بمعرض صور لضحايا التعذيب و بيانات ملصقة على الجدران لمناهضة التعذيب

ثم عرض لفيلمين فيديو عن ضحايا التعذيب في العمرانية بالجيزة و سيدي سالم بكفر الشيخ
و كان فيه إهتمام من الحاضرين بمعرض الصور بشكل خاص





و نوارة و ألكسندرا قعدوا يصوروا كل حاجة و كان فيه كاميرات تلفزيون بس مش عارف قناة ايه ؟

بعدها بدأ عرض تقارير لجان العمل الخاصة بمصريين ضد التعذيب


الأستاذ محمد الشرقاوي ألقى البيان التأسيسي لمصريين ضد التعذيب




عدد الحاضرين كان حوالي 60 واحد و بعدها تقارير اللجان المختلفة من إعلامية و قانونية و تقصى حقائق و عمل جماهيري و أعمال تحضيرية للقاءات و خطة العمل القادمة و الكلام ده كله فيديو عند نوارة

بس الفيديو اللي صورته أثناء تقرير اللجنة القانونية كنت بأصور الحاضرين أكثر من المتكلم



video

المهم ان لجنة الحريات بنقابة المحامين أعلنت تضامنها التام معانا و أكدت على لسان مندوبها ان كل إمكانياتها في خدمة مصريين ضد التعذيب من أجل إحقاق الحق في كل المحافظات و اعتقد أن هذا أكبر إنتصار للمجموعة فلجان الحريات بنقابات المحامين الفرعية تغطي جميع أنحاء الجمهورية
و ده مسؤول لجنة الحريات بنقابة المحامين

و ده خالد مسؤول لجنة العمل الجماهيري و أنا مع الرأي اللي بيقول الوقفات الإحتجاجية مش وقتها دلوقت و مش حينوبنا منها إلا البهدلة على الفاضي بدون نتيجة
و مدام جميلة إسماعيل إتكلمت

و جيهان شعبان شرحت خطة العمل في خلال الـ6 شهور اللي جايين بس طموحة قوي و أنا عقبت عليها بأن الشق الإعلامي و القانوني و الطبي فيها معقول لكن الجزء الخاص بالعمل الجماهيري حالم زيادة عن اللزوم عايزانا نمضي الناس في الشارع على وثيقة ضد التعذيب و يمضوا الناس الغلابة عليها
دا الناس بتخاف من سيرة الحكومة و ماشيين جنب الحيط نقوم إحنا نيجي نقولهم يقفوا في وش الحكومة يبقى إحنا بنحلم لو تخيلنا إن قهر و خوف سنين طويلة ممكن يتهد في 6 شهور
بالنسبة لمسودة قانون التعذيب أنا شايف إن فيه إتفاقية دولية لمناهضة التعذيب و مصر موقعة عليها و ممكن تكون هيا دي مسودة القانون الجديد اللي إحنا عايزينه لتعريف و تشريع عقاب جريمة التعذيب في مصر
ملحوظة نوارة كانت عاملة زي النحلة ما بطلتش لف و تصوير و أدي صورتها و هيا بتصور أخو ناصر السباك بتاع العمرانية اللي البوليس رماه من البلكونة و هوا بيحكي عن اللي حصل لأخوه

كفاية كده النهاردة و البوست الجاي غرائب الصور في الإجتماع و إنطباعاتي عن الرحلة