الأحد، يناير 13، 2008

حبيبة قلبي

بأحبها جداً و ما أقدرش أتخيل يمر إسبوع من غير ما أشوفها و بأسمع صوتها في التليفون يومياً تقريباً
من أول ما دخلت حياتي و أنا مشغول بيها و بأحبها أكتر مما تتخيلوا
تبات عندنا في البيت ليلة الأربع و تقضي الخميس بطوله و تروح في الليل

و طول ما هيا موجودة في البيت و ملناش شغلانة غيرها نضحك معاها و نلاعبها ونأكلها و نشربها كمان
بأتكلم عن نوران بنت أختي اللي لما إتولدت أصبحت أنا خال و ياله من شعور جميييييل
ولدت نوران في 28/7/2006 و من يوميها و أنا خال
بأتابعها كل إسبوع و هيا بتكبر و بتتعلم الزحف و المشي و الكلام و تجرب أنواع الأكل المختلفة و تلعب معانا أنا و أخويا و بابا و ماما
لما بتضحك بيبقى الواحد طاير من الفرحة و لما بتعيط بيبقى الواحد نفسه يعمل أي حاجة علشان يضحكها تاني
شوفوا كانت صغيرة إزاي في السبوع


لا و الجميل فيها إنها اول ما تسمع الآذان تقول أكباار يعني يالا نصلي و نقول الله أكبر

يعني بتشجع الكبار على الصلاة لأنها بتحب تقف جنب أي حد بيصلي و تحاول تقلده شكلها حتطلع بتصلي من صغرها (عمرها أقل من سنة و نص)

بصوا و هيا بتصلي أو بتحاول يعني


بس كل يوم بنطلع منها بجديد في الكلام هيا لسه بتتعلم الكلام و يا دوب بتقول كلمات بسيطة بس كل يوم بنكتشف إطلاقها لأسماء على الحاجات اللي بتقابلها و بنغلب عبال ما نفهم هيا عايزة ايه

و طبعاً كل ما تيجي نقعد نهريها تصوير بالموبايل سواء صور أو فيديو لأن بجد إنفعالاتها و تصرفاتها و ردود أفعالها بتبقى لذيذة جداً

بأحس إنها الحاجة الحلوة جداً اللي في حياتي

منظرها بالحجاب :)

ايه اللي خلاني أكتب الكلام ده

أولاً : إني مخنوق و مضايق شوية و أنا الكلام عن نوران بيريحني

ثانياً : إني حبيت أعمل لنوران سجلات على النت مش على الكمبيوتر و الموبايل بتوعي و بس

ثالثاً : إني لقيت مدونين كتير شغالين في مناقشات في قضايا عامة كبيرة و انشغلوا قوي فيها و أنا معنديش مانع كل واحد حر في مدونته و كلهم عايزين الصح و الخير من وجهة نظرهم بس مش من المفروض اننا نقلب المدونة جرنال أو فرع تاني لقناة الجزيرة و هاتك يا دش المفروض في رأيي الشخصي إن المدونة وسيلة شخصية للتواصل يعني مش لازم تتقلب نشرة أخبار و مواعظ لازم يكون فيها لمحة شخصية علشان نحس بدفء الكلام و حميميته مش أنه مواعظ و حكم و أخبار و السلام

و عموماً براحتكم يا جدعان و معلش مشغول شوية فمش قادر أكتب بإنتظام

أحلى سلام مني و من نوران لكل المدونين الجدعان :) مضطرين نخلص كلام أصل جالها مكالمة تليفون مهمة

هناك 36 تعليقًا:

mohammed alsha3r يقول...

رب يبارك لك فيها ياااااااااارب

أحلى صورة

وهى ساجده

والتانيه وهى بالحجاب


انا نفسى اتجوز

علشان اخلف

ولد او بنت زى العسوله دى ماشاء الله


واعلمها على ايدى


ياااااااااارب

دعواتكم

أمير القلوب يقول...

بارك الله فيها وأنبتها نباتاً حسناً
ورزقك بمن يكون أخاً لها
تقبل تحياتي

بحبك يامصر يقول...

بسم الله ماشاء الله ربنا يباركلكم فيها
وعقبال ما تكون اب

عصفور المدينة يقول...

ربن يبارك فيها ويرزقك يا محمد

Desert cat يقول...

ربنا يبارك فيها ويجعلها قرة عين اهلها بارة بيهم باذن الله
انا مقدرة شعورك تجاهها كويس اوى
اصل انا عندى ميدو ابن اخويا نفس النظام برضه
بس ميدو اكبر شوية سنتين ونص
ومقدرش اتخيل يوم يعدى من غير ما اشوفه
اصلا هو اللى بيجى يصحينى كل يوم من النوم الصبح لانه هو وماماته بيجو يفطروا عندنا بسيح لهم
ههههههههههههه
اصل بيت اخويا قصادنا على طول
يلا كفاية كدا كلام على ميدو
ربنا يخلى لك نوران وترفح بيها ان شاء الله

خمسة فضفضة يقول...

السلام عليكم ورحمة الله وبركاته

ماشاء الله تبارك الله
ربنا يخليهالك ويباركلكم فيها

EmY يقول...

انا خاله من 6 سنين
لولد و بنت و فعلا احساسي بقي مختلف بعد ما اتخللت
و هما حياتي و حب عمري كلو فعلا واخدين عقلي و بخاف عليهم جدا جدا
ربنا يخليهالك

أنونيمس يقول...

أيه ياعم الحاجات الحلوة دي؟
قمر وسكرة واللهع يا بشمهندس

بس مش شبهك خالص
;)


بهزر ياعم

lonely يقول...

ربنا يخليلكم نوران
ويبارك فيها
ولويفرج كربك وهمك
احدى ادعية الكرب
لا اله الا الله رب العرش العظيم
لا اله الا الله رب السموات ورب الارض
رب العرش العظيم

بت خيخة وأى كلام يقول...

مهندس مصرى
اولا عايزة اشكرك جدا جدا
على تعليقاتك على اغل بوستاتى
ومعلش اعذرنى انا مارديتش على كل التعليقات اللى انت سبتهالى لكن انا قريتها كلها
بس اعذرنى النهاردة على حظك ايدى بتوجعنى شوية وباكتب بالعافية

المهم ربنا يخليلكم نوران وتفرحوا بيها وتشفوها انسانة صالحة
بسم الله ماشاء الله عليها
زى القمر
ربنا يحميها يارب
وهى بتصلى بتفكرنى بشريف ابنى اوى
انا برضه مصوراه كام صورة كدة وهو صغنون وكان لابس الجلابية وبيصلى
ومصوراه كمان وهو حاطط الدبدوب بتاعه جنبه علشان كان عايز يعلم الدبدوب الصلاة
ربنا يخليهم يارب
الاطفال دول احلى حاجة فى الدنيا
هما اللى بيخلولها طعم وريحة ولون
تحياتى ليك
اختك خيخة

صاحب المضيفة يقول...

ما شاء الله تبارك الله

لك حق تفرح لما تجيب في سيرتها

قمر ربنا يبارك فيها ويجعلها خادمة للدين إن شاء الله

دمت بخير

appy يقول...

الله عليها ماش اء الله سكر بس كده بقى انا هخطب مين ولا مين لابن اختى يعنى نورا بنت اخت نوسه المدونة ولا نوران لا انتم اتفوضوا وقولوا ليه الولد كويس وبيعرف يسوق عربيتى كمان وهو فى نفس السن عموما انتم حرين قبل ما يطلع حد تالت وعلى فكرة احنا بنقدر نشكل الاطفال فى طباعهم وهما صغييرن كده بسهوله جدا يعنى اللى هتعلمه لها وهى صغيرة هتكبر عليه ربنا يخليها لكم

دكتور حر يقول...

براحتك طبعا يا باشمهندس
هو حد يقول حاجه تانيه

ربنا يا رب يباركلم فيها ويرزقك بالزوجه الصالحه والذريه المباركه

بس فيها حبة شبه منك ولا ايه رأيك ؟


****
دمت بكل الود

لماضة يقول...

ما شاء الله ربنا يبارك فيها يارب
ويخليها ويحفظها لباباها ومامتها
وعقبال يارب ما يشوفوها داااااااكتورة قد الدنيا زى حلات كده واحسن منى

مهندس مصري يقول...

محمد الشاعر
===========
آميين ربنا يرزقك و يكرمك و يحقق لك أمنيتك
سعيد بأول زيارة ليك عندي

أمير القلوب
===========
آمين و تحياتك على عيني و راسي :)

بحبك يا مصر
===========
يسمع منك ربنا

عصفور المدينة
=============
ياه دا أنا قولت انك نسيتني
:)
آميين يا أبو يحي خصوصاً دعوتك انت بالذات نحسبها مستجابة و لا ايه ؟ :)

قطة الصحراء
===========
آمين و ربنا يخلي لك ميدو :)
و بلاش السياح العائلي ده دا ربنا أمر بالستر
هههههههه

خمسة فضفضة
==========
و عليكم السلام و رحمة الله و بركاته
آميين و منورانا بجد و الله يا دكتورة

إيمي
====
بقى خالة من زمان كده و مخبية آه يا سهنة :)
آميين ربنا يستجاب منك و يخلي لنا حبايبنا كلهم خصوصاً الأطفال منهم

أنونيمس
========
تصدق يا دكترة عمري ما فكرت هيا شبهي و لا لأ ممكن شبه باباهه أو مامتها أو جدها أو جدتها لكن خالها اللي هو أنا مجاش في بالي ثم أنا باحبها سواء شبهي أو لأ فمش فارقة كتير
ثم أنت معندكش حاجات حلوة انت كمان و لا ايه؟

وحيدة lonely
=====
شكراً ليكي و لإهتمامك و ربنا يسمع منك

بت خيخة و أي كلام
=================
سلامة إيدك الأول قبل أي حاجة
ثانياً : آميين ربنا يسمع منك و يستجيب يا أم شريف
ثالثاً : إنتي مدونتك جميلة حقيقي و الواحد ندم إن بقاله فترة بيشوف تعليقاتك و ما دخلش شاف مدونتك إلا دلوقت حاسس إني فاتني كتير فقعدت إمبارح سبع ساعات متواصلة على مدونتك أقراها كلها و برضه لسه ما خلصتهاش بس لازم إن شاء الله أخلصها النهاردة وأركز في الجديد عندك من هنا و رايح
الله يسلمك و يسلم لك هاني و شريف :)

صاحب المضيفة
===========
آميين وشكراً لزيارتك يا مضايف صفوة المدونين عندك يا جميل :)

آبي
=====
أنا موافقك في إن التعليم في الصغر كالنقش على الحجر
ثم مين قالك إننا بنرضى بأي عريس بالساهل كده مش لما نسأل عنه الأول
قدمي السيرة الذاتية و كشف عيلة و نبقى نشوف
:) ههههههههه
باضحك طبعاً
دا كفاية إنه من كوكبك

دكتور حر
=========
انت حيرتني بردك الأخير عليا عندك و أنا مفهمتوش و ياريت تفهمني في ايه في تاريخي
:(
و ربنا يستجيب منك آميين
أما بالنسبة للشبه فمش عارف الصراحة
و الود هيدوم لما تفهمني كنت تقصد ايه عندك ؟

لماضة
====
آميين يا لماضة يا أختي
بس مش عايزها تشوف المرار بتاع الدكاترة ده و لا تفطر فوق الجثث دي بنوتة رقيقة يا ناس و مش حمل طب يا دكتورة بس مين عارف الغيب مخبي ايه
ربنا يسهل ما فيه الخير يا عالم مين يعيش
سعيد دايماً بتعليقك يا لماضة

أحمد مصطفى يقول...

ربنا يخلى ويبارك فيها

مبروك الشكل الجديد

وكل سنة وانت طيب

أحمد

coca يقول...

محمد
يارب تكون بخير
مبروك علي اللوك الجديد بصراحه مفيش احلي من اللون الابيض
بالنسبالي يعني
وبعدين كويس اهو مش خالو احمد الصباغ بس اللي طلع خالو
انت كمان هنقولك يا خااااااااال
ربنا يخليهالكوا يارب وتجوزها ياعم

أنا إنسان يقول...

أخلاقنا...اسلامنا
إيمانا منا بأن حال العالم ...لم ولن ينصلح... إلا بالاسلام
وإيمانا منا بأن اسلامنا...لم ولن ينصلح ...إلا باأخلاق
اتفقنا...أو وفق الله بيننا ...لتكوين أول حملة للأخلاق...لتحقيقها...والسمو بها...والعمل بها بإذن الله
...................
من نحن
مجموعة من الشباب ...أهمهم حال أمتنا...وعروبتنا...وأوطاننا
فوفق الله بينناعلى الإجتماع على هذه الحملة...ولنطلقها حتى تصل إلى عنان السماء...علها تشفع لنا يوم القيامة
وبإذن الله ... سوف نعلن في البوست القادم عن المدونات والمواقع التي تدعم هذه الحملة
...................
وقد تم بحمد الله إنشاء مجموعة أخلاقنا إسلامنا البريدية على
yahoo groups
وسننشر بها ان شاء الله ما يتم انزاله من مقالات وفعاليات الحملة
وللاشتراك في الحملة...اضغط على الرابط التالي
http://groups.yahoo.com/group/akhlakona/
Group Email Addresses
Related Link
http://groups.yahoo.com/group/akhlakona/www.ana-insan.blogspot.com

MerMaid يقول...

البنت زي القمر ماشاء الله
و كويس قوي انكم بتعلموها الصلاة ومفهمينها الاذان
دي تربية اسلامية و بداية كويسة قوي
:))
ربنا يبارك فيها
و تكبر وتفرح بيها ان شاء الله
:)
و عقبال بنت سيادتك
:))
بما انك متضايق من الاخبار و المناقشات حاليا فانا مش هقولك تعالي زورني لاني هتلاقي عندي نقاشات كتير
بس اتمني في يوم كدة تخطف رجليك و تيجي
:)))

تحياتي

مهندس مصري يقول...

احمد مصطفى
=========
الله يبارك فيك
و كل سنة و انت طيب دايماً و بخير
أول واحد يبارك لي على الشكل الجديد للمدونة أنا قولت ما حدش خد باله
:)
تشكر يا غالي

كوكا
======
الحمد لله
أنا برضه بأقول كده الأبيض سيد الألوان و أريح حاجة للعين
بس لما أتجوز أنا الأول نبقى ندور على نوران:)

عروسة البحر
============
آمين
بأشكر تعليقك عندي و متابعتك الدايمة و علقت عندك تعليق طويل كاتبه كله و تعبت فيه بس ما يغلاش عليكي و حأكمل لسه ان شاء الله بس أستريح و أرتب كلامي و يمكن أعمل بوست مستقل للموضوع ده

Ahmed Al-Sabbagh يقول...

ماشاء الله
ماشاء الله
ماشاء الله
ماشاء الله
ماشاء الله

ايه العسولة دى

لالالا انا كدة هبتدى اغير

فى خالو تانى ولا ايه غيرى
:)

عسولة اوى والصور حلوة اوى يا محمد

وانت شايلها وهى صغنونة

انا بموت فى الحاجات دى اوى

بس اوعى تكون نوران دى

تطلع بت خيخة واى كلام

:)

ربنا يحميها ويخليها ويبارك فيها

واسف جدا جدا للتأخر

تحياتى
أخوك أحمد

daktara يقول...

زي القمر
ماشاء الله
ربنا يخليهالكم
ويبارك فيه

انظر حولك
د. خالد عزب

مهندس مصري يقول...

أحمد الصباغ
===========
يعني مش انت لوحدك اللي عندك مخاليل
لا دا احنا جدعان قوي و نعجبوك
و سماح المرة دي بس المرة الجاية غرامة تأخير :)

دكترة
====
د/ خالد عزب
آميين و منورنا يا دكترة

no chance يقول...

السلام عليكم

بجد ربنا يخليهالك ويباركلك فيها
وهى محجبة امورة اوى



تحياتى

عاشقه الفردوس يقول...

ماشاء الله
بجد بجد عسوله
وخصوصا بالحجاب
بجد ماشاء الله ربنا يحميها ويجعلها قره عين لابويها اللهم امين
لا
قره عين لكم جميعا اللهم اين

مهندس مصري يقول...

no chance
============
و عليكم السلام
آميين
شكراً

عاشقة الفردوس
==============
آميين
أيوه كده ركزي و صحصحي معانا
منواراني و معطرة المدونة بوجودك
:)

النجم القادم يقول...

ايه العسل ده ياهندسة خلاص انا حجزت موافق ولا اكلم الجماعة انته عارف انا الا على وش جواز خلاص ربنا يباكلكم فيها ياااااااااارب وعاوزينك بقى تبقى اب اوك وسلملى على ميزوو

الفاتح الجعفري يقول...

مهندسنا الكبير
دايما كده بتعملنا حجات جديده
بجد بسم الله ماشاء الله والله زي العسل ربنا يبارك فيها ويحفظها
واجمل حاجه انه بيتزرع فيها معاني ايجابيه من وهي صغيره ودي حاجه مهمه جدا
انت عارف انا برده خال بس من بعيد يعني بنت خالتي عندها بنت اسمها نورين عنها 7 شهور لما بشوفها بجد باكلها
ربنا يبارك فيك يابشمهندس ويمن عليك
وجزاكم الله خير

مهندس مصري يقول...

النجم القادم
=============
لا لسه بدري على الحجز يا نجم
ربنا يسهل و يسمع منك و سلامك وصل
:)

الفاتح الجعفري
==============
آميين
و بتأكلها لا حول و لا قوة إلا بالله
هيا حصلت الأكل لا دا لازم يخبوها منك فوراً :)

shahy يقول...

بسم الله ماشاء الله
ربنا يحفظها ويحميها

سلملي عليها كتير
وقولها تبقى تيجي تلعب مع الشينيور والرايقة والجبارة دي هاتنبسط خالص

تحياتي

الفاتح اليعقوبي يقول...

السلام عليكم
الباشا الكبير والمهندس العظيم
البيج بابا بوم بتاع المدونات


لالالا يااخ محمد مينفعش كده الاخت نوران انت مطلعها في كام صورة كده من غير حجاب انا قلت انت كنت لازم تاخد بالك يااخي من الحكاية دي وقلت اكيد الاخ ابو يحي هيوصلك النصيحة

لالالالالالا مكنش العشم يااخ محمد

ربنا يخليها يارب
اجمل حاجة في الدنيا ضحكة طفل والله بتشيل الهم كله ربنا يرزقنا الذرية الصالحة يارب
علي فكرة انت وحشني جداااوانا مقصر معاك في المدونة وبقرا موضوعاتك بس مش عارف التعليق بنساه

اسفين ياهندسة
والسلام

جمعاوى روش طحن يقول...

الله ينور يا هندسة

بأقوللك إيه


هى مرتبطة ؟؟؟؟؟؟؟؟؟

و اوعى تفهمنى صح

مهندس مصري يقول...

شاهي
=====
مفيش مشاكل تلعب معاهم بس يا خوفي لأحسن يعلموها الأسئلة الغريبة بتاعتهم
:)
سلامك وصل

الفاتح اليعقوبي
================
و عليكم السلام
الله يخليك
انت أخ و مفيش بيننا زعل أبداً
ثم الحجاب يبدأ من سن 10 سنين يا أخ مش كده و لا إيه :)

جمعاوي روش طحن
=============
و ينور عليك
بس هيا مرتبطة عاطفياً بكل من أبوها و امها و أعمامها و اخوالها و جدودها

أظن كده فهمتك :)

إنـســـانـة يقول...

بجد مش عارفة اشكر حضرتك ازاى

رسمت على وشي ابتسامة رايقة وانا لسة صاحية من النوم كدة


ربنا يجازيك انت ونوران خير الجزاء
:))

مهندس مصري يقول...

انسانة
=======
شرفتيني في أول زيارة و يارب دايماً منوراني

و كويس اني أخدت ثواب فيكي بابتسامتك دي
:)

بنوتة مصرية يقول...

ياخراشي على الطعامة بسم الله ماشاءالله طعمة وسكرة ربنا يخليها
ع فكرة انا اول اما قريت الموضوع بجد افتكرت انك بتتكلم عن حبيبة حبيبتك
بس طبعا نانو احلى ربنا يخليها