الأحد، يناير 20، 2008

المقاولين تعمل ايه بعد ما الأسعار ولعت

المقاولين بعد ما أسعار الحديد و الأسمنت و الطوب ولعت بقوا بيلطموا لأنهم ملتزمين بتنفيذ الشغل بأسعار محددة في المقايسات و ما تنفعش تزيد تاني
طن حديد التسليح وصل 4600 جنيه بعد ما كان بـ 3800 جنيه من إسبوع
و طن الأسمنت زاد من 380 لـ 450 جنيه
و ألف الطوب زاد 50 جنيه فرق بسبب تضاعف سعر المازوت المستخدم في أفران حرق الطوب
دا خراب بيوت مستعجل علشان المحتكرين الكبار يزودوا أرصدتهم في البنوك
أنا كنت كاتب من زمان عن شغل المقاولات بس فيه تعليقين مهمين متعلقين بالبلوة بتاعة زيادة الأسعار دي بتوع أنونيمس و DONKYYYYYYY و ردودي عليهم
بصوا عليهم و إدعوا على الظالم و المفتري

صناعة المقاولات تقوم بتشغيل ما يقرب من 86 حرفة و صناعة معاونة لمصلحة من تدميرها بهذا الشكل البشع
حسبنا الله و نعم الوكيل

هناك 58 تعليقًا:

EmY يقول...

و لسه
استني بس انتوا لسه شفتوا حاجه تقريبا الحكومه ماشيه علي خطه علشان تخلي الشعب يكلم نفسه و يتلحس
كل حاجه تغلي و احنا نرخص لحد مانبقي من غير تمن

بوست جميل

تحياتي

Desert cat يقول...

ايه ده انت بتتكلم بجد
ده انا ابويا تاجر مواد بناء
طب ايه
مين اللى واقع عليه الضرر دلوقتى
التاجر ولا المستخدم
الله يخرب بيوتهم ياراجل
الف الطوب زاد خمسين جنيه
معنى كدا ان شغل الشونة عندنا هيقل النص
وبتقول الاسمنت زاد كاااااااااااااام
طب ثوانى بقى اعمل تليفون اشوف الوضع عندنا ايه

مهندس مصري يقول...

إيمي
=====
تقريباً كده و الله أعلم

قطة الصحراء
===========
لا إطمني كله على دماغ المستهلك في الآخر و التاجر لو السعر غلي عليع بيغلي هوا كمان و يخلص الدور و الباقي على المستهلك النهائي

عصفور المدينة يقول...

الله المستعان كل واحد بيشيلها للي تحته أما الاتفاقات المسبقة دي بلاء فعلا زي ما مصر باعت الغاز وغلي

المهم أكيد سعر المازوت حيأثر على كل السلع بشكل أو آخر رغم أن الظاهر يا عيني إن الوقود مدعوم

دكتور حر يقول...

طيب انا بنيت خلاص والحمد لله

بقية الناس تعمل ايه

ولا سيبك من قصة المباني كلها

وشوف الأغذية وصلت لكام

حسبنه على خسبنتك
وربنا عالظالم والمفتري

وربنا يقويك يا باشمهندس
ودمت بكل خير

وطني يقول...

لا أجد
ما أقوله
أشعر بالعار يلفني
يشل يدي
و يعقد لساني
صدقوني
ما تمنيت الموت غير اليوم
يااااااارب
إقبضنا إليك غير خزايا ولا مفتونين
........................
صائم حتى يرفع الحصار عن غزة

Ahmed Al-Sabbagh يقول...

والله كنت عايز اكتب فى الموضوع ده يا محمد

وانت سبقتنى

انت تعرف كتاب اسمة نقطة الغليان لدكتور مصطفى محمود ؟؟

لو عندك او شفتة اقراه

هتلاقى فيه حاجة ظريفة اوى عن الموضوع ده

:)

تحياتى

ومنتظر جديد

أخوك
أحمد الصباغ

مهندس مصري يقول...

عصفور المدينة
============
المازوت مستعمل في كل الأفران
من العيش للطوب للاسمنت لكل أفران البلد
و الناس تلبس:(

دكتور حر
=========
الله يسهل لك يا عم
حتعزمنا على الفرح امتى بقى
:)

وطني
====
حسبنا الله و نعم الوكيل في الظلمة أعوان الصهاينة على حصار غزة

أحمد الصباغ
===========
لا مش عندي الكتاب ده
طيب ما تكتب انت و تعرفنا خلاصة الكتاب و رأيك الشخصي
مستني البوست ده من ضمن اللي عليك
:)

مروة الزارع يقول...

الله ةةةةة

انتوا امركم عجيب اوى والله

بنا اية وكلام فارغ اية

مالة الرصيف ولا خيم الإيواء

شعب مدلع معندوشش دممممم

حسوا على دمكم واسمعوا كلام حكومتنا حبيبتنا

واعرفوا انها عاوزة مصلحتكم وان الموضوع فية بعد تانى

هيا بتحد من الإنفجار السكانى

يعنى عشان محدش لا يتجوز ولا يخلف

اعرفوا مصلحتكم بقى جتكم الهم

دى حكومتنا حبيبتنا وملناش غيرها

:(( :(( :((

مهندس مصري يقول...

مروة الزارع
=============
و نبقى شعب مخيمات و لاجئين ما هي ناقصة
علشان عز باشا يخلي الـ45 مليار يبقوا 55 مليار و كلنا فداه

lonely يقول...

ارتفاع اسعار مواد البناء فى ازدياد مرعب
والضحايا كثيرون وكلهم من المستضعفين فى الارض امثالنا
وهذا كله فى صالح الحيتان الكبيره
موش مهم الاسماك الصغغيره
ايه يعنى لما تنقرض
ايه يعنى لما ترتفع اسعار اراضى البناء واسعار المواد
ماحدش هيلاقى ربع شقه
وهتزيد ازمة الزواج
وهيزيد الانحراف؟
طب وماله
يا راجل كله فدا عيون عز
ربنا يرحمنا

مهندس مصري يقول...

وحيدة
=======
فعلاً مش فاضل بعد اللي بيحصل غير اننا نموت و ندفن و يدعوا لنا بالرحمة أحياء و اموات
حسبنا الله و نعم الوكيل

Nsreen Bsunee يقول...

كل اللى بيحصل ده بيخلينى ابتدى اؤمن بنظريه المؤامره اللى عمرى ما امنت بيها ودايما كنت باقول ان مستحيل الحكومه مهما كانت سيئه او مفتريه او رديئه او غبيه او حراميه لكن هما برضو مصريين مش معقول يعملو مؤامره محكمه للقضاء على اخر ما تبقى من كرامه وكبرياء عند الناس لكن تقريبا انا لما فكرت كده كنت مش فاهمه حاجه وحماره
احنا فعلا فى مؤامره الحكومه والرئاسه ورؤوس النظام عاوزين يخربو بيوت الناس وعاوزين يستغلو كل قرش ممكن يتسرق بس ربنا كبير ربنا يصبر كل بيت فى مصر اتخرب او حيتخرب من تحت راس الحكومه والمحتكرين وكل شئ واكيد له نهايه يارب بس الواحد يعيش لغايه ما يشوف نهايه الظلم ويشوف مصر زى ما تستحق انها تكون

بوست هايل على فكره وبسيط للغلابه اللى زيي اللى مش بيفهمو فى الهندسه او المقاولات

appy يقول...

هاتوا مكعبات ابنوا بيها عموما بابا كمان هيغير نشاطه هنتاجر فى البسكويت ولا لا علشان الدقيق غلى يبقى المخدرات افضل اوكى اشوفك فى القسم بقى
الله يكرمك يا بشمهندس ما احنا عارفين الكلام ده لازم تخبطه فى وشنا كده

walaa يقول...

اخواننا فى غزه محاصرون ومعذبون لايجدون طعام ولا ماء ومشردون ويجب علينا ان نفعل لشىء لنصرتهم لذلك قرر مجموعه من المدونين الذهاب الى معبر رفح لكىيرفعوا المعاناه عن الشعب هناك لو تقدر تشارك او اى حد يحب المجيىء معك
يا ريت تبلغنى

nonoymm يقول...

بعني هي جت على دة بس
ياااااااااااااااااااه هنتكلم عن ايه ولا ايه خليني سكتة
مدونتك رااااائعة وموضوعاتها من القلب فعلا
ادعوك واددعو كل الزوار للزيارة مدونتي فيها تدوينة اهداء لغزة وياريت تبداوا الزيارة من الرابط دة
http://nonoymm.maktoobblog.com/
هستناكم

دكتور حر يقول...

البقاء لله
في خالك يا باشمهندس
لله ما أعطى
ولله ما أخذ

مهندس مصري يقول...

نسرين بسيوني
==============
فعلاً هما عندهم شهوة فظيعة لشفط كل الفلوس اللي في البلد و وضعها في أرصدتهم
و حديث النبي عليه الصلاة و السلام بيقول : إثنان لا يشبعان طالب علم و طالب مال
يبقى عمرهم ما حيشبعوا أبداً

آبي
====
أمال لو ما فضفضتش هنا حأفضفض فين

nonoymm عاشقة النقاب
=====================
شكراً و بصيت عندك بس ما علقتش

دكتور حر
=========
إنا لله و إنا إليه راجعون
شكر الله سعيك

دعوة الفردوس يقول...

البقاء لله
عظم الله أجرك
و انا لله وانا اليه راجعون
لله ما أخذ ولله ما أعطى وكل شيء عنده بمقدار

الفاتح الجعفري يقول...

ازيك يابشمهندس
اولا البقاء لله وانالله وانا اليه راجعون
عظم الله اجرك
ثانيا والله خلاص كل حاجه مبقتش مفهومه تقريبا البلد خلاص بتنهار فعلا ربنا يستر ويعيننا فليس لنا منجي الي اليه
ثالثا اسف جدا علي التاج يابشمهندس بس فعلا محمود مشغول وهيخلص يوم الخميس ان شاء الله فعذرا سامحني
رابعا لاتنسي اخوانك المستضعفين في غزه من الدعاء
وجزاكم الله كل خير

لماضة يقول...

انا جاوبت على التاج
ايه ده
يعنى مفيش شقق
مفيش جواز
عاااااااا
وماله بيت ابويا اهو موجود ربنا يديله الصحه يارب ويعلفنى كمان وكمان

السـيد شبـل يقول...

انا قريت ف التعليقات خبر وفاة خالك

البقاء لله واسكنه الله فسيح جناته

اعتقد ان الغلاء نتيجه للمارسات الاحتكاريه
وراس المال ذا الطبيعه الصهيونيه اللى هدفوا انه يكفر الناس ف عيشتها ... ويموت اى شعور بالانتماء او الايجابيه وتفضل الناس بتدور على لقمة العيش

ربنا يكون فى عون الشعب

وتحياتى لك على موضوعاتك الهادفه

مهندس مصري يقول...

شكر الله سعيكم جميعاً و ياريت تدعوا له بالرحمة و المغفرة

دعوة الفردوس
=============
شكر الله سعيك

الفاتح الجعفري
===============
براحتكم جاوبوا لما ظروفكم تسمح
و البلد بتنهار فعلاً بس في مراحل الإنهيار الأخيرة

لماضة
====
حأروح أشوف عملتي ايه
ثم لو باباكي موافق انك تتجوزي معاه في الشقة يبقى العرسان حتتقدم لك في طوابير

السيد شبل
===========
معاك حق

حل وسط يقول...

كل ما البورصة تنزل
والحديد يغلى
اقول الله يحرقك ياا.ع.
حد قده دلوقت

وكله ببركات اونكل وابن اونكل

كنا بنقول لما الكل ولع هناكل طوب
دلوقتي حتى ما نقدرش ناكل طوب

تحياتي

فرنسا هانم يقول...

ومن المفترض او اللى بيتقال ان الحديد هيصل الى 5000 جنيه
انت فاكر زمان
مش عارفه انت كنت لسه اكيد طالب
او اتخرجت
كان طن الحديد عندنا ب 1200 وكان فى حديد بينزل من دول شرق اسيا ودول الاتحاد السوفيتى المنحل وكان ب800 الساده بتوعنا رفعوا شعار لا لاغراق السوق
وقعدوا يقولوا سياسه الاغراق ومش عارفه ايه
لغايه لما طلعوا قانون الاغراق
وغرقت السفن بتاعتنا فى البحر
قصدى
ولع العز السوق واحتكره لنفسه والحديد ابو 1200 وصل 2800
وبعد كده حدث ولا حرج

مهندس مصري يقول...

فرنسا هانم
==========
أنا خريج 2003 يعني مش متابع من الأول بس قريب من الأول بتاع الموضوع

أحمد عز هو من قاد حملة في داخل مجلس الشعب لفرض رسوم إغراق 60% على الحديد المستورد بحجة حماية الصناعة الوطنية
و هو من طالب وزير الصناعة رشيد محمد رشيد بسحب تراخيص مصانع و ورش بلاستيك التسليح اللتي كانت موجودة في منوف و كانت بدأت في منافسة حديده بأسعار رخيصة جداً
السعر العالمي لطن الحديد خارج مصر 2000 جنيه فقط
حسبنا الله ونعم الوكيل

MerMaid يقول...

طيب صحيح علي رايك يا فندم
المقاول اللي ملتزم بسعر و تكايف معينة يعمل ايه؟؟

حاجة تقرف

عندك حق نبقي قرفان
تحياتي

:)

مهندس مصري يقول...

عروسة البحر
============
اقري اللنك بتاع البوست القديم اللي موجود بين سطور البوست ده و انتي تعرفي

MĕŢø & ŘǿŖêĔ يقول...

لا حول ولا قوة الا بالله
كل شعب عندو مصيبه ممش قادر عليها
حسبي الله ونعم الوكيل

اشكر متابعتك اخي
بارك الله فيك

روري

عبدالرحمن فارس يقول...

يعني يا بشمهندس هي جات على المقاولين
اشمعنى هما يعني الي مش هيعانوا زي بقيت الناس

عقبال لما نشوف البني ادم سعره بيرفع كده زي كل حاجه

بوست جميل

و
.. ود ..

mado80 يقول...

السلام عليكم
لأ موضوع مهم أوي فعلا كمان لو عرفنا أن صناعه المعمار زي ما أنت بتقول بتشغل 86 حرف أغلبها طبعا حرف لناس بسيطه هانحس أد ايه ان المهنه دي لو أصابها الركود أو توقفت كتير من الناس البسطاء سوف تعاني معاناه كبيره جدا

بس نيجي بقي لحكايه الأسعار ما هي الحكومه الفاضله خلاص شالت ايديها سابت التجار وأصحاب المصانع هما اللي يتحكموا في الناس الغلابه وده شايفينوا في كل حاجه الحقيقه مش في أسعار الحديد والأسمنت بس

بس فيه خبر قريته يوم الثلاثاء الماضي فرحني أوي بصراحه مع أن الأخبار اللي بتفرح قلت أوي اليومين دول الخبر عن احاله 20 مسئولا من أصحاب ومديري الأنتاج والتسويق والقطاع التجاري في شركات الأسمنت الي المحاكمه لأتهامهم برفع الاسعار دون مبرر ، نتمني طبعا أن قرار زي ده يحصل مع اللي محتكرين الحديد في مصر واللي الحكومه عارفاهم كويس ومع ذلك مطنشه عليهم

أخيرا تحياتي ليك علي الموضوع المهم والبقاء لله في وفاه خالك أسكنه الله فسيح جناته

حل وسط يقول...

انا رديت على تعليقك عندي
ياريت تقراه

أحمد مصطفى يقول...

مش عارف هيغلوا ايه تانى بعد كده ؟؟؟

ربنا يستر

أحمد

احمد الجيزاوى يقول...

بص البلد دة فيه كل حاجه بتغله لا لانسان بيرخص كل شويه
تحياتى
احمد الجيزاوى

شهاب الأزهر يقول...

حسبنا الله ونعم الوكيل

مهندس مصري يقول...

ميتو و روري
===============
الشعب المصري عنده هم ياما بس فلسطين في قلبنا دايماً

عبد الرحمن فارس
===============
شكراً

مادو 80
=========
ما هو الخوف ان اللي اتحولوا للتحقيقات يطلعوا براءة مثلاً و لا يتحولوا لمحاكمة حبالها طويلة و حتى لو اتحكم عليهم هل الحكم حيكون قوي و رادع و هل حيتنفذ و لا حيفضل حبر على ورق زي أحكام كتير
و ليه ما اتعملش كده في الحديد رغم ان الملفين اتحولوا مع بعض لجهاز مكافحة الإحتكار الأسمنت اتدرس و اتكتب فيه تقرير بالإدانة و اتحول لوزير الصناعة اللي حوله للنائب العام
أما الحديد فمازال قيد البحث و الدراسة و التمحيص و الله أعلم باللي حيحصل فيه دا لو حصل فيه حاجة أصلاً

و شكر الله سعيك

حل وسط
=======
و أنا قريته :)

أحمد مصطفى
===========
كل حاجة

أحمد الجيزاوي
==============
بيرخص و بيتسحل في المظاهرات كمان
:)

شهاب الأزهر
===========
فعلاً هو مولانا و نعم النصير

coca يقول...

انا خلاص اتخنقت بجد هما عايزين الناس تسرق


يارب ارحمنا

مهندس مصري يقول...

كوكا
=====
تسرق
تشحت
مش فارقة معاهم
المهم يستنزفونا حتى آخر مليم

barbie girl يقول...

الحديد عدى دلوقتى الخمسة الاف جنية

دى اخر حاجة سمعتها

ولسسسسسسسسسسسسسسسسسسسسسسسسسة

لـــى لــــىِ يقول...

يادى الوقعة
هو كله كده اخفاقات اخفاقات
مفيش مرة الواحد يقرا انجازات؟

اومال مين اللى بينجز بقا
هو احنا كده هنفضل نرجع لورا
خلاص ورا خلص ومبقاش فيه ورا عن كده

يارب ارحمنا

اشكرك على زيارتى
وابقي تابع القصة
الاحداث الجايه ان شاء الله
هتكون اكثر فكاهة
علشان تنسى شويه
والله انا عملت المدونة دى علشان كده
تبقي حاجه فكاهية وسط كل الهموم اللى شوفتها
فى المدونات واصحابها ماشين وهم الدنيا فى عيونهم
ربنا يسعدكم يارب ياكل المدونين

سلاماتى

لى لى

مهندس مصري يقول...

باربي جيرل
=========
على حسب انتي فين
عندنا بـ 4600 جنيه

لي لي
====
شكراً و ربنا يكرمك

عابد الرحمن يقول...

بصراحة يا بشمهندس
المفروض الحكومة تتحمل فرق الاسعار
بس هتعمل ايه بتدن في مالطة

مدونة يلا نفضحهم يقول...

الحرية للمدون الدكتور ابراهيم الزعفرانى
وقع على وثيقة الالف مدون للافراج عن الطبيب المدون
www.dahayaa.com

مهندس مصري يقول...

عابد الرحمن
===========
لا المفروض الحكومة تجبرهم على البيع بالسعر العالمي اللي هوا أرخص بكتير من أسعارهم و في نفس الوقت أكبر من سعر التكلفةو بيوفر لهم ربح معقول

بدل ما المحتكرين بيربحوا أرباح خرافية و بينهبوا فلوس البلد

مدونة يلا نفضحهم
================
حاضر

ا بـن عــمــر يقول...

البقاء لله ياباشمهنس
ربنا يرحمنا برحمته كل شوية زيادة فى الأسعار
حسبنا الله ونعم الوكيل

مهندس مصري يقول...

ابن عمر
=========
شكر الله سعيك

Rain man يقول...

و الله افتكرتك بتتكلم عن المقاولين العرب و مشكلته فى الدورى العام ..
ما علينا
والدي الله يرحمه كان مقاول
بس مقاول اعمال نجارة يعنى الحمد لله مافرقتش معاه
ناهيك عن انه بطل شغل بعد ما مات اصلا

يا بشمهندس

لو لم اكن مصريا كان هيبقى اشطه جدا

Ahmed Al-Sabbagh يقول...

البقاء لله يا باشمهندس محمد

تقبل خالص تعازيا فى وفاة خالك

وشد حيلك يا جميل

ومنتظرين عودتك للمدونة

أخوك أحمد

Hossam يقول...

hello man
god with poor
i cant say any word

ِِAdem El-Mahdy يقول...

و لسه
احنا لسه شفنا حاجة

و بس

و سلام عليكم

عاشقه الفردوس يقول...

حكيلك حكايه حلوة اوي
ال ايه عندنا ارض وال ايه بقالها كتير مرميه بلالزمه
وال ايه كمان دخلت هي ونص بلدنا كوردون المباني الايام دي
ليييييييييييييييه
واشمعنيييييييييييييي

اها علشان الناس تبني وتشغل فلوس الناس الكبار

حسبنا الله ونعم الوكيل

اقولك
احنا اللي جايبينو لنفسنا

عاشقه الفردوس يقول...

ايه ده
واله مااعرف ان خالك توفاه الله

البقاء لله

انالله وانا اليه راجعون

Dr. Kafy يقول...

طبعا مش عارف أقول حاجة غير منهم لله اللى كانوا السبب
و على فكرة اللى كانوا السبب مش سايبين مجال إلا و مبهدلين اللى فيه.
مش عارف أقول غير منهم لله علشان إحنا على الهوا
بس بينى و بينك بادعيلهم دعوات جامدة قوى

بت خيخة وأى كلام يقول...

انا جاية ادحرج التماسى
سلام
اختك خيخة

بت خيخة وأى كلام يقول...

معلش وانا بقرا التعليقات
لقيت الصباغ بيقدملك التعازى فى وفاة خالك
قلت اقدم انا كمان التعازى وبلاش اطلع خيخة
البقاء لله
ويجعلها اخر الاحزان ان شاء الله
اختك خيخة

ض/خالد يقول...

اسعار الشقق عندنا في مدينة نصر في بعض الاماكن تجاوزت الـ 150 ألف جنيه...للاماكن المتوسطة...

والبعض بيقول ان السبب هو الارتفاع الرهيب في اسعار مواد البناء..
وناس بتقول بسبب هجرة العراقيين
وموضوع القطريين اللي اشتروا اراضي السنة اللي فاتت في القاهرة الجديدة
............
الواحد ما يملكشي الا انه يقول ...
ربنا يذل عز

خمسة فضفضة يقول...

السلام عليكم ورحمة الله وبركاته

لمصلحة عزو باشا طبعا


اما سعر طن الحديد يبقي 4600 جنيه دلوقتي واحنا مش في الموسوم وفي عز الشتا اللي المفروض الاسعار فيه بتقل ، امال هايعمل ايه في عز الموسم في شهر 7 و 8

منهم لله اللي كانوا السبب

ويرجعوا يقولوا هما المقاولين بيغشوا ليه في مواصفات البناء

مهندس مصري يقول...

رجل المطر
=========
ما هو الصناعيية أياً كانوا من أصغرهم لأكبرهم لمقاولين المصنعيات ما بيتأثروش بالأسعار هيا تعلى و هما يغلوا مصنعيتهم و أهي ماشية
الله يرحم والدك يا منورني
:)

أحمد الصباغ
===========
هو مش خالي لزم هو ابن عم أمي
بس كان خالي و جارنا كمان و تعب جداً من فيروس سي بقاله سنتين و ده تالت واحد من إخواته يموت بالفيروس ده في ظرف سنتين
الله يرحمه و يصبر أهله لإنه سايب مراته و ابنه اللي في أولى ثانوي أزهري و بنته اللي في تانية اعدادي
ربنا يجازي اللي فيرسوا و سرطنوا و امرضوا الناس بكل حاجة وحشة

شكر الله سعيك يا بو حميد

حسام
=====
طبعاً و الفقراء و المساكين هما اللي بيدخلوا الجنة الأول :)

آدم المهدي
==========
و لسه ياما حنشوف
و عليكم السلام

عاشقة الفردوس
================
عندكم في البلد و لا عندكم بتاعتكم و ملككم
أما لو ملككم تبقى فرجت عندكم من أوسع الأبواب
تبيعوا و تلعبوا بالفلوس لعب
:)

شكر الله سعيك

د كافي
=====
ربنا يسمع منك

بت خيخة و اي كلام
=================
يا مساء الفل و لو اننا الضهر دلوقتي
:)
شكر الله سعيك يا أم شريف

ض/خالد
=======
الأسعار عندنا من 100 ألف جنيه و طالع

آميين ربنا يسمع منك

خمسة فضفضة
=========
و عليكم السلام و رحمة الله و بركاته
مبقاش فيها مواسم بقت بالمزاج
و لو ان المقاول الغشاش بيبقى الغش في طبعه و بيساعده تهاون أو تواطؤ الإشراف
بس أكيد لو حيخسر اللي وراه و اللي قدامه أكيد حيحاول يتفادى الخسارة بأي وسيلة أو يقلل خسارته لأدنى حد ممكن