الخميس، يناير 17، 2008

تاج مجلس الشعب

التاج ده جاي لي من فاقوس - شرقية من المدونة العزيزة قطة الصحراء و ربنا يستر و أعرف اجاوب كويس
اتفضلوا اقروا و شوفوا بنفسكم

دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟
رمز الطيارة
كنت تفضل الدخول مستقل او تتبع حزب معين ؟؟؟؟
مستقل
اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟
لا لأنه حزب قذر و مأوى للفساد و تجمع لأصحاب المصالح و الوصوليين و المنتفعين على كل شكل و لون
ايه اول حاجه هتعملها لنفسك ولاسرتك ؟؟؟؟؟
مش في دماغي حاجة معينة بس حاعمل ايه يعني ؟ اعتقد و لا حاجة زينا زي غيرنا
ايه المشروع اللى ناوى تعمله لاهل دايرتك ؟؟؟؟ دون ذكر اسم الدائره
ياه مشروع واحد قولي مشاريع حأضغط على الحكومة علشان مشاريع إستكمال المياه و الصرف الصحي و الرصف الأسفلتي و الإسكان
قعدت فى المجلس جنب نائب مميز . من هو النائب ؟؟؟
كل نواب الإخوان المسلمين متميزين و أغلب المستقلين و المعارضة بس أنا بأحب النائب بتاعنا دكتور محمد جمال حشمت اللي زوروا ضده الإنتخابات اللي فاتت و نجحوا مصطفى الفقي
قدمت سؤال للحكومه ايه هو السؤال ؟؟؟؟؟
انتوا مش خايفين من يوم الحساب و وقوفكم قدام ربنا
طلب احاطه موضوعه ايه ؟؟؟ وبتقدمه لمين ؟؟؟؟
لرئيس الوزراء عن اهدار المال العام بالمليارات و العك بتاع وزير المالية
استجواب لاتنين من الوزراء موضوعه ايه ؟؟؟؟وبتستجوب مين
استجواب لوزير الإسكان عن مشروعات المياه و الصرف الصحي و الإسكان كلها تبعه و كلها روبة
و عن بيع أراضي الدولة بالمزاد ساعات و منحها للحبايب ساعات بدون قواعد واضحة
و الوزير التاني وزير الحكم المحلي عن فساد المحليات
انت مع الخصخصه ؟؟؟؟؟؟
أنا مع ان الدولة تمتلك المرافق الأساسية زي المطارات و المواني و السكة الحديد و المرافق من مياه و كهرباء و صرف صحي
و الباقي يبقى ملك أشخاص بما في ذلك جميع المصانع ماعدا المصانع الحربية
بس يكون البيع بالقيمة الحقيقة و ليس بقيمة بخسة كما يحدث حالياً
و ان يتم مراعاة مصالح العاملين و لا يتم اضطهادهم لإجبارهم على المعاش المبكر و ترك العمل
و أن يكون هناك قانون حقيقي لمنع الإحتكار و يسري على كافة الناس بما فيهم كبار رجال الاعمال
و أن تكون أولوية الشراء للمصريين و ثم العرب و أخيراً الأجانب مع إستثناء الإسرائيليين حتى من البيع لهم عبر وسيط فيما بعد
يعني من الآخر البيع بعدل و شفافية و نعرف الفلوس حصيلة البيع كام و اتقبضت ازاي و راحت فين و اتصرفت على إيه مش السبهللة بتاعة دلوقت
هل انت مع قطع العلاقه مع اسرائيل ؟؟؟؟؟
أكيد لأنها كيان غريب لابد من إزالته
هل تؤيد الحرب على العراق ؟؟؟؟؟؟؟؟
لا
هل تؤيد مرور الامريكان فى القناه ؟؟؟؟؟؟
السفن التجارية بس إنما الحربية لأ
هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟
لا و الله و فرنسا هانم عارفة كده كويس
بتمرر التاج ده لمين ؟؟؟؟؟؟
اليعقوبي
الجعفري
بت خيخة و أي كلام
مروة الزارع
احمد الصباغ
أنونيمس
عصفور المدينة
جمعاوي روش طحن
النجم القادم
ايمي
كوكا
لماضة
يا الله ان شالله ما عن حد حوش :)

هناك 29 تعليقًا:

walaa يقول...

اولا مبروك عليك التاج
ثانيا حلوه اجابتك

Nsreen Bsunee يقول...

باشمهندس انا جيت اهو
مدونه جميله مش حاكدب واقول انى قلبت فيها كلها بس حيحصل ان شاء الله

تحياتى يا سياده النائب
:)

السـيد شبـل يقول...

اجاباتك رائعه تمنياتى لك بالتوفيق

موضوع الفلسطينين لم يبيعوا ارضهم ... موضوع ممتاز ....

مهندس مصري يقول...

ولاء
====
مش عارف أودي جمايلك فين
مكسوف منك بجد
الله يبارك فيكي و يخليكي

نسرين بسيوني
=============
يا ألف خطوة عزيزة
إحنا مستنيين انه يحصل يا فندم
و اي خدمة في المجلس
:)

السيد شبل
==========
شكراً يا باشا

Desert cat يقول...

بسم الله ما شاء الله
اجباتك هايله يا بشمهندس
اجمل حاجه بجد عجبتنى استجواب وزير الاسكان
ومن الواضح من خلال كل الاجابات انك بتحب شغلك جدا

EmY يقول...

تاج جميل تعيش و تجاوب و انا و كوكا هانجاوب عليه
بس كنت سمعت انك اشتركت في المؤامره ضد فرنسا هانم ليه بتنكر هنا

تحياتي انا و كوكا هي قاعده جنبي و بتسلم عليك و طبعا مش قاعده حب فيا دي مستنيه الفطير

مهندس مصري يقول...

قطة الصحراء
===========
أصلي شايف و عارف بحكم شغلي بلاوي كتير و أغلبها بأسمعها من اصحابي اللي شغالين مهندسين في حتت كتير
حسبنا الله و نعم الوكيل في حكومة سفيهة عايزة الحجر و واحد يكون عاقل يمسك وصي عليها و يتصرف بعقل في شغلها
و دي خلاصة تقرير الجهاز المركزي للمحاسبات عن الحساب الختامي للسنة المالية اللي فاتت

إيمي
====
طب هاتي حتة فطير بقى :)
و ابقى بصي على موضوع الفلسطينيين اللي قبل ده
و سلامي لكوكا

جمعاوى روش طحن يقول...

ماشى يا هندسة

إجابات ف الجون
خصوصا موضوع الأسفلت ده الله يخليك

إنت عاجبك شكل منطقتكوا كده؟؟؟؟؟؟؟؟؟؟؟؟؟

لماضة يقول...

لا ده انت ناوى تدخلنى السجن
ياعم انت بش خربشه مع الناس دى
طيب هفكر كده
واستشيرهم لو قالولى قول هقول على طول
ولو اتمسكت هفتن عليك

عصفور المدينة يقول...

انت كدة حتحول المدونات كلها لساحة استجوابات خلال الشهر القادم
:)
إجاباتط واعية بارك الله فيك بس انا كنت منظر ع الرئاسة
يلا شكرا ع التمرير

صاحب المضيفة يقول...

ماشاء الله تبارك الله

اجابات قوية وجميلة ورايقة

ربنا يبارك فيك ويعزك

دمت بخير

مهندس مصري يقول...

جمعاوي روش طحن
==============
ماشي يا عم أنتوا قلتوا نوابكم هما نوابنا و مشفناش حاجة في الأسفلت ما كانش العشم من نواب الإخوان يا أخ
:)

لماضة
=====
أنا قات أما اشوف لماضتك في المجلس و لا فالحة بس تلامضي في الغلابة زينا
و إفتني ما تخافيش ما بيهمناش
ثم دي عالم جتتها نحست و مبقاش يؤثر فيها الكلام و ينطبق عليهم امثل اللي بيقول
كلام زي الرصاص في جتة زي النحاس

مستني إجاباتك يا لمضة الدكاترة

عصفور المدينة
=============
ليه هو أنا اللي كاتب التاج
دي فرنسا يا جدعان و أنا بأجاوب بس
شكراً يا بشمهندس و إجاباتك انت بالذات بيبقى لها طعم تاني

صاحب المضيفة
===========
الله يخليك و يبارك فيك
أنا مقصر معاك بس رايح عندك أهوه

الفاتح الجعفري يقول...

تاج مقبول يابشمهندس
وردود حضرتك مميزه جدا
يبقي انت جهز نفسك الدوره الجايه
وناجح ان شاء الله لو مفيش تزوير
وربنا يبارك فيك

MerMaid يقول...

اجاباتك حلوة قوي يا بشمهندس
:)
فينك من زمان؟؟
اكتر حاجة عجبتني رايك في الخصخصة

بجد رائع

:)

تحياتي

mermaid

وسيبتلك كمان تعليق في موضوع فلسطين

مصطفى محمد يقول...

يا عم بلاش موضوع الحزب كله فساد ده .. حتروح ورا الشمس
هكذا يقولون
نقول
ورا الشمس ليس أسوأ من هنا

مهندس مصري يقول...

الفاتح الجعفري
==============
لا يا عم عندنا الدكتور محمد جمال حشمت 35 ألف صوت الإنتخابات اللي فاتت و مع كده زوروا ضده
هوا عمهم و حابس دمهم

عروسة البحر
===========
الله يخايكي أخجلتم تواضعنا
و انا موجود ما رحتش في حته

مصطفى محمد
==========
كلها محصلة بعضها ثم دي الحقيقة :)

appy يقول...

انت لبست فى الحيطه زى طيب عموما تشرفنى فى سجن مارينا قريب
هههههههههههههههههههههههههه
او اقولك عرفت كده هقعد فى المجلس جنبك

مهندس مصري يقول...

آبي
====
و لو إني مش فاهم آبي يعني إيه

هو أنا أطول دي تبقى أحلى جيرة

بس سيبك من التاج و بصي على الموضوع اللي تحته أهم بكتير
:)

Ahmed Al-Sabbagh يقول...

تمااااااااااااام

والله يا محمد انت ما سيبتش حاجة اقولها

وحاسس انك بتقرا أفكارى

تقريبا أنا متفق معاك فى معظم رؤيتك

وبعدين مدونتك بتاكل التعليقات

وكل شوية الاقى البروفايل مرة بالعربى ومرة بالانجليزى

شكلك بتعمل سحر فى المدونة

وميرسى على التاج وبظبطة اهو

:)

وبطل تاكل الكومنتات

دى بتوجع البطن

(وش مطلع لسانة )

أخوك
أحمد الصباغ

أحمد سعيد بسيوني يقول...

بسم الله
اجاباتك متميزة
تحياتي

DR.HAMAS يقول...

الأخ الكريم المهندس المصرى

أحييك على إجاباتك المتميزة

و التى تنم عن فهم عالى و عقل واعى

بارك الله فيك

و نصر بك دينه و كتابه و عباده الصالحين


د.حمــــــاس

بت خيخة وأى كلام يقول...

بص بقى بصراحة انا مقريتش كل تدويناتك
انا قريت التدوينات الموجودة تحت مسمى شخصى وشعر وشعل وعربى
لان انا ماليش فى السياسة اطلااااااااااااااااقا
وقريت كمان ملتقى المدونين اصلى بحب اتفرج على الصور اوى
واضح جدا طبعا انك انسان ثائر من الدرجة الاولى
يعنى لو قالوا هنعمل ثورة مش بعيد الاقيك انت اول المشتركين
بالنسبة للبوست بتاع التوكيل بتاع طلعت السادات
انا اخترت الاجابة اللى هى ان طلعت السادات غاوى شهرة وبيعمل حركات علشان كدة فكك منه
طبعا مش محتاجة اقول ان اجاباتك على التاج ده كانت جميلة
وبتدل على انسان واعى وفاهم اللى بيجرى حواليه بالظبط
كمان اتبسطت اوى لما عرفت انك من دمنهور والبحيرة
لان على ما اتذكر ان جدى الله يرحمه والد مامتى كان من هناك
مش عارفة اذا كان هو اللى من هناك ولا جدتى
هبقى اسال ماما وهاقولك
المهم يعنى ان مدونتك جميلة جدا
بس طبعا زى ماقلتلك انا ماليش فى السياسة خاااااااااااالص
علشان كدة احتمال ماتلاقنيش كتير بعلق عندك فى حالة انك تكون كاتب بوست سياسى
اه صحيح عجبنى اوى البوست بتاع الفلسطنيون لم يبيعوا ارضهم
وكمان الكام بوست بتاع يا مرحب يانظيف باشا
بس خلاص
تحياتى ليك
اختك خيخة

مهندس مصري يقول...

أحمد الصباغ
=============
بص يا أبو حميد عند عصفور المدينة على البوست الأخير و حتعرف إن بلوجر بقى عربي بالكامل
:)
ثم حد الله بينى و بين أكل كومنتاتك يا عم
و يارب يخليك ليا يا منورني

أحمد سعيد بسيوني
================
شكراً :)

د حماس
======
الله يخليك يا باشا و انت أحسن و ربنا يكرمك و يستجيب منك

بت خيخة و أي كلام
=================
الله يخليكي يا أم شريف تعبتي نفسك و الله
:)
بس صراحة فرحت إنك بصيتي في المدونة كلها
الله يكرمك و يا ريت تهتمي بالسياسة شوية لأنها مهمة جداً
بس مش ضروري تعلقي براحتك خالص
:)
فرحتي قلبي إلهي يفرح قلبك

الفاتح الجعفري يقول...

بشمهندسنا الكبير
اسف جدا
التاج هجاوبوه انا واليعقوبي بس هو كان مطحون في الامتحانات وقولنا نجاوبوه مع بعض لحسان تفتكر ان انا نسيت
ربنا يبارك فيك ويعزك

مهندس مصري يقول...

الفاتح الجعفري
==============
ربنا يكرمكما
:)
و في انتظار اجابتكما

عاشقه الفردوس يقول...

طيب وانا اجاوب التاج ده ازاي
بعد اجابات حضرتك الهايله واجابات استادنا عصفور

مع اني اول واحده تاخد التاج ده من خالتشي
الا اني مش عارفه حاسه اني مش هعرف اجاوبه



بس بصراحه مافيش بعد كده
رشح نفسك انت بس واحنا وراك


انتخبوا مين رمز الطياره


اه صحيح اشمعني الطياره

مهندس مصري يقول...

عاشقة الفردوس
==============
الله يخليكي
:)
الطيارة علشان بتحسسني بالحرية و الإنطلاق
كمان الأمور بتبقى أوضح من فوق و صعب الواحد يتوه بيبقى سهل الواحد يحدد طريقه

صانعة الأحلام يقول...

اجابات قمة في التميز

مهندس مصري يقول...

صانعة الأحلام
============
شكراً
:)