الثلاثاء، فبراير 05، 2008

يوم معرض الكتاب و مقابلة أحسن ناس

تحديث
وا الله يا جماعة صرصارة دي طلعت بنت جدعة بجد و هيا الوحيدة اللي بعتت الصور اللي كانت عندها عقبال ما الباقيين يعملوا كده و خصوصاً الصباغ :)

أنا و نضال

أنا و الصباغ




هما دول الناس العسل اللي قابلتهم في معرض الكتاب يوم الجمعة اللي فاتت


نبتدي الحكاية من الأول


الصباغ ضبط معايا اننا نتقابل يوم الجمعة في معرض الكتاب و أنا سيحت في التعليقات و تم الإتفاق على ان كل اللي يقدر يجي يجي و نتقابل على موبايلات جوه المعرض الساعة 2 بعد الضهر


بس أول اليوم راحت عليا نومة كنت راجع هلكان من الشغل يوم الخميس و فاتني القطر اللي كانت راكبة فيه لماضة و فاتني القطر السريع الأسباني اللي بعده قمت أخدت بيجو من الموقف و طيران على مصر - القاهرة يعني - و بعد الوصول لرمسيس كانت أول مشكلة ازاي أوصل للمعرض


بس غادة برايد الله يكرمها كانت قالت قبل كده ان بيبقى فيه عربيات من قدام جامع الفتح للمعرض و فعلاً لقيت أتوبيس بيجري و بيقول معرض معرض قمت جري وراه و اتشعبطت فيه و ركبت جوه و نزلنا بعد الطحن عند بوابة المعرض بسلام- أو ده المفروض يعني- و كانت أولى المفاجأت

طابور طوييييييييييييييييييييييييييييييييييل و البوابة مقفولة

ليه مع ان التذكرة بجنيه و الأطفال مجاناً

لأن كان فيه مظاهرة ميعادها الساعة 10 ص في المعرض بس الأمن بذكاؤه قفل المعرض لحد الساعة 12 الظهر

دخلت بعد ما كلمت الصباغ على الموبايل جري على المسجد علشان نلحق صلاة الجمعة و اتقابلنا هناك و لكن الزحمة كانت رهيبة و الناس فارشة على كراتين فاضية على الأرصفة و قاعدين مستنيين الصلاة و المفروض انهم بيسمعوا الخطبة لكن بيتكلموا مع بعض عادي و لا كأنهم في الصلاة يمكن علشان صوت الخطبة كان بعيد و ضعيف

و لقيت الرتب و القيادات الأمنية كلها واقفة حوالينا بعد ما فرشنا مع الناس و الرتب حوالينا كانت من عميد و نازل غير شوية ضباط مباحث لابسين عادي بس ماسكين لاسلكي و عمالين يشخطوا في العساكر و الضباط الصغيرين

بل و أحدهم سب لواحد بالأم و الميتين علشان كان حيشرب من قزازة المياه بتاعته

كل ده و في ايده سجادة صلاة و لما الصلاة أقيمت فرشها و صلى- و نعم القدوة و المثل لجهاز الشرطة و المباحث - و بعد الصلاة سمعت هتافات المظاهرة من بعيد من عند المسجد بس كانت محاصرة تماماً بجحافل جرارة من جنود الأمن المركزي اللي مقدروش يصلوا الجمعة إلتزاماً بالأوامر الخاصة بحصار المصلين ثم التضييق على المتظاهرين منهم

و ساعتها بدأت المكالمات تنهال على موبايل الصباغ و أول الغيث قطرة

لماضة و أختها قابلونا عند كشك للقهوة هناك في بلوك المطاعم و الكافتريات

و الدكتورة لماضة بنت ظريفة و ابتسامتها مشرقة ومحجبة و لبسها أنيق و بسيط بس المفاجأة ايه بقى

انها قصيرة شوية

الصباغ طويل و أنا أقصر منه بحاجة بسيطة و عمالين ندور على مستوى نظرنا على الأوصاف اللي اتمليناها في الموبايل و مش لاقيين حد لحد ما لاقينها :)

و بعدها مباشرة

سارة صرصارة و وصفها مقارب لوصف لماضة بس على أطول شوية بس نفس الروح المرحة الحلوة و معاها بنت خالتها

أنا عمال بأوصف لأنهم رفضوا التصوير رفضاً باتاً و فضلوا غموض أشكالهم للقراء على النت براحتهم بقى

بعدها جه نضال فلسطين



هوا اسمه محمد بس خلاص اسم مدونته بقى أشهر من اسمه الحقيقي


شاب روعة خصوصاً ان قضية فلسطين شاغلاه جداً رغم انه مصري قوي بس عرق العروبة و الإسلام ناقح عليه عقبال ما ينقح عند الجبلات اللي ماسكين الوطن العربي كله


المهم اتقابلنا و اتجمعنا و بدأنا نلف على قاعات العرض


الأسعار مولعة نار و علشان تشتري شوية كتب حلوة جديدة حتفرتك فلوسك كلها و تروح بيتكم مشي


قلنا مفيش أحسن من المستعمل و عليه اتجهنا لركن سور الأزبكية


بـ اتنين و نص و تعال بص و بخمسة بس بخمسة بس


و وسط نداءات باعة الكتب المستعملة استطاع كل منا استخراج الكنوز التي يريد قرائتها و تجمعنا في المكان المتفق عليه و أنا أثقلهم حملاً بسبب شرائي لأجزاء من موسوعة قصة الحضارة لوول ديورانت و التي تحكي تاريخ العالم كله


و هنا بانت الجدعنة و شالت صرصارة كيس مليان و شال نضال كيس تاني و أنا شلت الكيس التالت


و قابلنا بعدها ايمي كان عندها شغل يوميها تقريباً في المعرض لأنها شغالة جنب الدراسة معدة تلفزيونية مع محمود سعد في برنامج البيت بيتك و معرفناش نتكلم معاها كلمتين على بعض عمالة تتكلم في الموبايل علطول و رايحة جاية في المعرض كل شوية تروح و ترجع


بس كانت الصدمة انها طويلة طولي تقريباً ثم الإستايل بتاعها غربي هاي كلاس انما شكلها ينفع مذيعة مش معدة برامج و شكلها صعب يقول انها أصغر مني بـ 9 سنين و كوكا ما جاتش كانت عيانة للأسف و كان نفسي أشوفها


خيرها في غيرها


و شفنا البشمهندسة مروة الزارع و دي اللي استقرت معانا و كملت لف معانا في المعرض


مروة طولها عادي بس وزنها زيادة شوية و علشان كده علطول بتتكلم في تعليقات كتير لها عن الرجيم بس مكياجها زيادة شوية و حاطة عدسات خضراء في عينيها و هيا اللي قالت كده


بس طيبة مروة و مرحة برضه


و بعدها جات آبي سلمت على السريع كده و مشت بس شكلها أصغر بكتير من الصورة اللي كانت منشورة لها قبل كده على المدونات شكلها شبابي خالص و إستايل برضه


:)


و ساعتها جات قطة الصحراء سلمت بسرعة برضه و مشت بس كانت مفاجأة غير متوقعة بس شكلها ملحقتش أركز فيه علشان أوصفه بس إداني انطباع انها قوية و مش بأقول مفترية بأقول قوية بس D: علشان أنا عارف التعليقات اللي حتيجي على النقطة دي بالذات فبأسبق


بس ناس كتير ما كانتش عارفاني رغم اني حاطط صورتي الحقيقية في المدونة علشان الصورة بشعر خفيف و أنا كنت رايح بشعر عادي


عموماً أحكموا بنفسكم من الصورة دي اللي صورتها لي صرصارة



ها شبهي و لا لأ :)


و أخيراً جات بت خيخة و دي بالذات تحس أول ما تشوفها إنها غلبانة و طيبة قوي


بس بجد ما جمع الا أما وفق كل اللي كانوا متقابلين يومها من المدونين شخصيات بسيطة و لطيفة و مرحة و مثقفة و الواحد استمتع بمجرد وجوده معاهم جداً


بس انا اتصورت صور ياما يوميها بكاميرات رقمية كتير و مفيش حد منهم بعت لي صور اليوم ده على الإيميل ماشي و أنا اللي ما صورتش بالموبايل بتاعي و كنت معتمد على صورهم ماشي


أنا مستني الصور خصوصاً الصور اللي عندك يا أحمد يا صباغ قديم و جديد لأحسن حسابك تقل و الصور القديمة حمضت عندك


و ظهرت هنا حركات الجدعنة من البنات يعني ساندوتش كبدة ملوثة من لماضة على كوباية قهوة من صرصارة و الواحد كده اتغدى و حبس بعد الغداء كمان


رحنا بعد كده بربطة المعلم لدار الشروق علشان نشوف غادة برايد و نحضر توقيعها للكتاب


و 3 مننا اشتروا الكتاب و غادة مضت لهم و كانت فرحانة اننا جايين لها من آخر الدنيا بس الصباغ ضيع نسخته الممضية و أخد نسخة تانية سادة


و عموماً دا لنك لتوقيع غادة للكتاب في المعرض


http://www.youtube.com/watch?v=cUn5c780aXc


طلعت من المحلة الكبرى بمحافظة الغربية يعني جارتنا البحيرة و الغربية جيران بينا و بينهم فرع رشيد بس :)


و بعدها انفض شملنا على أمل بلقاء جديد ممتع زي ده بس يكون من غير معرض و نعرف نرغي مع بعضنا شوية


طلعت أنا و الصباغ و نضال و مروة في تاكسي على البورصة و قعدنا هناك و جالنا اليعقوبي و الجعفري حبايبي و قعدنا اتناقشنا في حاجات كتير و بنحاول نثبت ميعاد ثابت للقاء المدونين شهرياً بس لسه ما وصلناش لميعاد ثابت


و افترقنا على وعد بلقاء قريب


و بالمترو على المظلات ثم موقف عبود فموقف دمنهور فبيتنا عدل وصلت الساعة 1.30ص و انتهى اليوم الجميل و في انتظار يوم تاني أجمل منه

هناك 42 تعليقًا:

سهر الليالى يقول...

سبقت الصباغ وغطيت يوم المعرض بصورة حلوة اوى بجد
بجد بشكرك على حكيك دة نقلتلى تفاصيل يوم كنت بتمنى أنى كنت قدرت أكون معاكو فيه واتعرف عليكو حد حد وما شاء الله عليكو بجد
ربنا يسهل وتتعوض إن شاء الله
بس على فكرة صورتك مختلفه تماما طبعا

تحياتى
سهر الليالى

لماضة يقول...

يا خبر
ده انت كنت حطيت صورنا ارحم
:))
ما شاء الله عليك مفاتتش عليك اى ملاحظه
حتى الشاورمه بتاعه عم تلوث عملتها كبده
:))
حقيقى كان يوم جميل وحافل
ربنا يديم المعروف ان شاء الله وانا سعيده انى اتعرفت باخوة واخوت زيكم
الحمد لله انك مقلتش عليا لمضه

عصفور المدينة يقول...

سبحان الله كنت موجود آخر النهار يوم الخميس يلا ربنا ييسر فرصة أخرى

بقيت آخذ عناوين الكتب وأبحث عن المحتوى في الإنترنت وأنا باقرأ تدوينتك بحثت عن كتاب قصة الحضارة
ووجدته متوفر وفرحت أن نظريتي الجديدة نجحت

http://www.ahlalhdeeth.net/twealib/qessat_hadharah.rar

ض/خالد يقول...

انا كنت هناك الحد..
لو كنت بيت هناك يومين كنت أقابلك اصلي كان عندي امتحان
...
يللا خير ان شاء الله :)
ملحوقة المعرض لسه قدامه 36 ساعة تقريبن

appy يقول...

امممممممم انا سلمت على السريع ومشيت معلش بقى غصب عنى كان ورايا غسييل وطبيخ فى البيوت اعمل ايه ما هو يوم الجمعه ده اجازتى بس متعوضه واه طبعا شكلك غير الصورة هتهز ولا ايه

خمسة فضفضة يقول...

السلام عليكم ورحمة الله وبركاته

ماشاء الله ، كان نفسي ابقي معاكوا
بس ظروف شغلي بقي مش بتسمح اني اسيب الصيدليه ولا يوم

انا كمان كنت بادور علي لينكات الكتب اللي كل المدونين قالوا انهم اشتروها زي باشمهندس عصفور
علي فكره اللينك مش شغال ياباشمهندس
ده لينك للموسوعه كامله بس تقراها من النت :

قصة الحضارة

مروة الزارع يقول...

أية دة يا هندسةةةة
على رأى لماضة
كنت حطيت الصور أرحم عشان أدبحككك
أية الوصف الدقيق دة
ههههههههههههههه

بتذلنى عشان مكلبظة حبتين تلاتة سبعة

عااااااااااااااااااااا
عااااااااااااااااااااا

ورحمة فراخ ستى اللى ماتت شهيدة لا أخسسسسسسس

دا انتوا ذلتونى بالكشرى وأحنا على البورصة

وبرضة لم أتقهقر وشربت زبادوو

عينى كانت فى الكشرى على فكرة

:)

بس انا هخس وهتشوف

بس متحسسنيش كدة ان مفقود الامل فيا

هههههههههههههههه

انا مزة برضة

وبالنسبة للمكياج ربنا يتوب علينا

لكن العدسات موعدكش

عشان ساعتها هضبش
لكن ممكن اخليها شفافة
:)

..............

والله كان يوم جميل
لازم يتكرر
أنا حبيتكم كلكم جداااااااااا

أنونيمس يقول...

يا سلام عليك وع الوصف التفصيلي
أكني كنت معاكم تمام _ واخدلي بالك من أكني دي_ بس الصورة دي مش شبهك خالص يا محمد
زي ما تكون دخلت الفرن وقاطعت الحلاق
:))

مهندس مصري يقول...

سهر الليالي
===========
العفو يا ستي أي خدمة
الصباغ يومه بسنة و عايز يدون في 100 موضوع مع بعض و مش فاضي يحكي أي حاجة
و الصورة مختلفة علشان بلبس عادي و بشعر طويل
لكن لو لبست البدلة و اتصورت بيها دلوقت بعد ما حلقت حتشبهوا عليا قوي
:)

لماضة
====
لا يا ستي انتي ست العاقلين
ثم انتوا اللي قلتوا بلاش صور و أنا إحترمت كلمة الشرف و مارضيتش أصوركم
:)
استحملوا بقى وصفي الفظيع ده

هو الساندوتش كان شاورمة ؟
أنا كنت جعان فماركزتش قوي
أهوه لحمة و خلاص :)

عصفور المدينة
=============
فرصة تانية ان شاء الله
دا المنطقة اللي نتقابل فيها تنور كلها بوجودك يا هندسة
و أنا بأنزل الكتاب دلوقت من اللينك ده و ألف شكر

ض/خالد
=======
يحصل لي الشرف بس أنا عندي شغل كتير و نزلت الجمعة بالعافية لأنه كان يوم الأجازة

خمسة فضفضة
=========
و عليكم السلام و رحمة الله و بركاته
ربنا يعينك يا دكتورة
لنك البشمهندس عصفور شغال لو أخدتيه قص و لزق في خانة العنوان في المتصفح
و لسه ما جربتش لنك حضرتك
:)

مروة الزارع
=============
استحملوا بقى مادام ما صورتكمش
ثم أنا قلت وزنها زيادة شوية
مش شويات
و ربنا يكرمك و تخسي و ما تبقيش مزة و تكون عدساتك شفافة
انتي طيبة يا مروة و لو قريتي أكتر في الدين و التزمتي بصحبة صالحة مع بنات متدينات ربنا حيكرمك بزيادة ان شاء الله

و أشوفك على خير دايماً

أنونيمس
========
واخد بالي يا دكترة
و كنا نتمنوا نشوفوك و الله
:)
بس دخلت الفرن علشان شغال في الشمس علطول و لو اننا في الشتاء و المطرة عندنا سيول أغلب الوقت و الشمس عزيزة

أما الشعر فحلقته دلوقتي نمرة 3 و بقيت عامل زي اللي رايح الجيش

مهندس مصري يقول...

آبي
=====
يا ستي أنا برضه الجمعة يوم أجازتي و جيت من مسافر من محافظة تانية علشان أشوف الناس
كان الله في عونك
بس كان نفسي نتكلم و نتناقش كلنا أكتر من كده لأن اللقاء كان أغلبه تعارف و سلامات و شراء كتب و ملحقناش ندردش بجد
خيرها في غيرها:)

الفاتح الجعفري يقول...

البشمهندس الكبير
حبيب قلبي
والله شرف لينا اننا نقابلك يافندم
انت يابشمهندس فعلا من الناس المحترمه جدا انت وباقي الاخوه المدونيين
وكان نفسي اقعد معاكم اكتر من كده بس الله المستعان
ان شاء الله منتظرينك في مرات جايه كتير
علي فكره
العلمانيين عاصفة النار4
http://hafedelga3fary.blogspot.com/
وهذا الرابط للمزيد
وجزاكم الله خير

م/ الحسيني لزومي يقول...

يا باشمهندس...تعليقي ليس له صله بالموضوع لكن معرض الكتاب وارض المعارض فكرتني بالجمعية العموميةلرفع الحراسة عن النقابةفي 13/2/2005 وبمناسبةالحكم التاريخي الذي صدر برفع الحراسة وضرورة اجراء الانتخابات مطلوب مننا كمهندسين تفعيل حملة من اخوانا المدونين لمساندة المهندسين في رفع الحراسة وضرورة اجراء الانتخابات.
م/ الحسيني لزومي
مدونة مواطنون ضد الشعب
www.moatnondedelsh3ab.blogspot.com
luzumy2000@hotmail.cim

اليعقوبي يقول...

السلام عليكم
هندسة عامل ايه ياجميل ربنا يعينك ويكرمك ونتقابل دايما علي خير
ويبارك في المدونين المترمين اللي الواحد بيتعرف عليهم كل فترة ومناسبة
والسلام

لماضة يقول...

هههههههههههه
ضحكتينى اوى لا واسالك اقولك انا خفت اكله تقولي ليه يابنتى شغال
وانت مش عارف ده ايه
ههههههههه اه ياني
نسيت ملحوظه هامه
اانا قلتلكوا انا واقفه عند صعيدى والدلع ديدي انتوا اللى تهتوا
وبعدين نا قلت للصباغ متبصش على مستوى نظرك بص فى الارض هتلاقينى
:))

بت خيخة وأى كلام يقول...

غلبانة وطيبة؟؟؟؟؟؟؟؟؟؟؟
هو ده الانطباع اللى خدته عنى
ههههههههههههههههههههههههههه
هههههههههههههههههههههههههههه
والنبى انا لو حد من عيلتى قرا انطباعك ده
هيقولوا اكيد ماقبلش خيخة ده قابل حد تانى
يااااااااااااااااه
انا بقالى كتير اوى محدش خد عنى الانطباع ده
غلبانة وطيبة
الاتنين مع بعض
ده كتير عليا اوى
عموما تشكر يا هندزة
انا بحمد ربنا انك مافضحتنيش اوى زى ما عملت مع باقى الاخوة المدونات
ده انت كنت نشرت صورهم ارحم
والله يا محمد
فعلا كان يوم جميل
وبالنسبالى انا كان حلو اوى لانى ماكنتش اعرف انى هاقبل كم المدونين دول
وبجد كان نفسى اكمل باقى اليوم معاكم
بس معلش بقى تتعوض المرة الجاية
سلام
اختك خيخة
اه صحيح
حاضر هبعتلك الصور اللى انا خدتهالك على الميل بتاعك
سلام

النجم القادم يقول...

ربنا يسهله ياعم
مش كنت تقول ولا كنت تبصيلى كده مكنش عيش ومخلل
وخيرها فى غيرها ان شاء الله بس ابقى لغينى اوك مان
سلام وطمنى على موضوع السفر
لدشنا فاهمنى طبعاً

شمس الزناتي يقول...

ما لحقناش نقعد مع بعض دقيقتين على بعض
بس اكيد هنتقابل و نقعد مع بعض كتير

مهندس مصري يقول...

الفاتح الجعفري
===============
الله يكرمك و يعزك يا أحمد و قرأت البوست بتاع عاصفة النار 4 و مش عارف أعلق أقول ايه
بارك الله فيك و بنتعلم منك بجد

م/ الحسيني لزومي
===============
حاضر

اليعقوبي
==========
و عليكم السلام
ربنا ما يقطع لك نت يا بني
:)

لماضة
=====
ما دام من ايدك يبقى شغال و بعدين لو كان حصل لي حاجة كان علاجي حيلزمك مش انتي دكتورة و لا ايه ؟

بت خيخة و أي كلام
=================
أنا قلت
و أخيراً جات بت خيخة و دي بالذات تحس أول ما تشوفها إنها غلبانة و طيبة قوي

دا الإنطباع الأول من شكلك بس
انما أنا عارف من قراية مدونتك انه ياما تحت السواهي
:)
هههههههههههههه
ربنا يصبر هاني

و ما وصلنيش حاجة على الميل لسه
P:

النجم القادم
==============
لما أشوفك حأقول لك

شمس الزناتي
===========
ان شاء الله
:)

Desert cat يقول...

هو كله كان جاى مستعجل فى اليوم ده ولا ايه
انا افتكرت انا بس اللى مشيت بسرعة
اتارى فى كل الردود كله مشى بسرعة
اشمعنا كدا يا جدعان
طيب انا مكنتش مرتبة لحاجه خالص واتفاجأت بوجودكو الجميل طيب والباقى اللى نازل من البيت مخصوص علشان المقابلة دى
عموما زى مبيقولوا خيرها فى غيرها
وكويس انك اتبسطت يا بشمهندس
بس انا مش مفترية واخد بالك احسن اخربش

ابن حـجـر الـعـسـقـلانـى يقول...

يا جدعان أنا اللى أستاهل .. أنا اللى ما متابعتش التعليقات عشان اعرف انكم هاتتقابلوا .. بس و الله أنا مشغول جدا .. باعلق بالعافية .. و باكتب المواضيع بمنتهى الصعوبة

بس مش مشكلة .. فكرة اللقاء الدورى اللى انت اقترحتها دى حلوة

إيه رأيك يا باشمهندس ؟؟ إيه رأيك إننا نتقابل بشكل دورى بحيث إننا نجتمع بعد ما نكون قرينا رواية .. أو فصل من كتاب .. أو نناقش موضوع نتفق عليه قبل كدة .. أو حتى عشان نقول "معسلة قوى البطاطا" ..أو نقوم بأى عمل مشترك الناس تقترحه

دة اقتراحك .. و أنا قلت رأيى فيه .. و مش عارف رأى الناس إيه

بس أيا كان .. لو هاتتقابلوا يا جدعان ابقوا ادونى ميسد كوول و أنا هاتصل بيكم عشان ماأكلفكوش

و ياللا .. أشوفك أمس

مهندس مصري يقول...

قطة الصحراء
============
لا مش كله كان مستعجل
لماضة و صرصارة و الصباغ و نضال و انا و مروة كنا مع بعض طول المعرض يومها و بعدها لماضة و صرصارة مشوا و كملت أنا و الصباغ و نضال و مروة على البورصة
يعني كان فيه ناس و ناس مش كله كان مستعجل
و أنا قلت قوية آه مفترية لا
:)

ابن حجر العسقلاني
=================
و ماله ابعت لي نمرة الموبايل على الميل و ليك عليا أرن عليك قبل كل لقاء
:)
أما بالنسبة للفكرة فدي مش فكرتي دي فكرة الصباغ و نضال
و أنا موافق على اللي يتفق عليه مدونين العاصمة و احنا وراهم من جميع محافظات مصر
حيث ان اللقاء حيكون على ملعبهم
:)))

Ahmed Al-Sabbagh يقول...

ههههههههههه

والله العيال دى هتموتك

انا اعرف مدونين اهدرو دمك اصلا على البوست ده

هههههههههههههه

مبرووووووووك لمصر

NIDAAL PAL يقول...

ايه يا هندسة
ايه الصورة المحروقة دى حرااااااااااام عليكوا يبقى انت و الصباغ عليا ولا ايه
بوست ممتاز ز تغطية ووصف دقيق
و تشرفت بمقابلتك يا بشمهندس

مهندس مصري يقول...

أحمد الصباغ
===========
ألف مبروك لمصر و ربنا يستر في النهائي
و اللي عايز يهدر يهدر يا باشا المهم اللي يقدر ينفذ

نضال فلسطين
===========
انت الوحيد اللي صورته اتنشرت فنفدت بجلدك من التحليل بتاعي
:)ههههههههههههه
و أنا كمان حصل لي الشرف

احمد الجيزاوى يقول...

والله انا كان نفسى
اشوفك يومه بس انت عرف الامن عليه من الله ما يستحق خدنا من المظاهرة حطنا فى عربيه ولف بينا مصر كله
وسبنا فى العين السخنه
ههههههههههههههههههههههه
معلش فرصه تانيه اشوفك فيه

بحبك يامصر يقول...

تغطيه هايله ولا بتوع الجزيره
بجد انا كان نفسى اكون معاكم
وفكرة اللقاء الشهرى دى جميله
وياريت تنفذ ولو حتى كل شهرين

مهندس مصري يقول...

أحمد الجيزاوي
============
فرصة تانية ان شاء الله
ما يكونوش فسحوك فيها
:)

بحبك يا مصر
============
مرة تانية ان شاء الله

عصفور المدينة يقول...

قصة الحضارة

أصل النسخ واللصق مش بيعرض العوان كله فلازم تعلمه لحد آخره

مهندس مصري يقول...

عصفور المدينة
==============
أنا أعرف أجيبه كله يا هندسة الدور و الباقي على الدكتورة 5 فضفضة
:)
تشكر مرة تانية يا بشمهندس

Nsreen Bsunee يقول...

خلاص انا حاعمل حسابي اكل كشري فى البورصه
:)

على فكره انت شكلك غير صوره البروفيل شكلك اصغر فى صوره المعرض


مبرووووووووووووووووووووك لمصر عشان تعرف ان وشي حلو
وحسن شحاته معلم معلم
:)

مهندس مصري يقول...

نسرين بسيوني
==============
وشك حلو من غير ما نشوفوه
:)
ألف مبروك لمصر
هيييييه
مصر مصر تحيا مصر

دكتور حر يقول...

يا بختكم يا باشمهندس
يا راجل مش كنت تقول


حصل خير
السنه الجايه وعليك خير بقى ان شاء الله

فينك يا هندستنا تقلان علينا ليه؟

مهندس مصري يقول...

دكتور حر
===========
لا تقلان ولا حاجة بس مطحون جداً في الشغل و ساعات قعدتي على النت قلت غصب عني فبقيت أقرأ البوستات عند ناس ياما متأخر قوي و تعليقي ساعتها بيكون ملوش لازمة
أعذرني يا دكترة

yasmina يقول...

اكيد بعد البوست هدا كثير ناس بيخافوا يقابلوك
:)))))

عشان التحليل الدقيق

بس عموما يا ريت لو انا كنت موجودة كنت اشتريت مليان كتب بس يلا خير

احنا صعب نلاقي كتب لاعربي عشان كدة كل ما بسمع عن معرض كتاب بيكون نفسي كثير اكون فيه


تحياتي

مهندس مصري يقول...

ياسمينة
=======
شكراً لتعليقك و محدش خايف و لا حاجة دول بيهزروا بس
:)

تــــايه ومش تـــايه يقول...

على راى لماضه انت كنت حطيت صورهم احسن.بس اكيد كان يوم جميل تقابل كل الناس دى فى يوم واحد يبقى يوم تاريخى

مهندس مصري يقول...

تايه و مش تايه
===============
فعلاً
:)

ليهات يقول...

السلاام عليكم

الله عليك وعلى وصفك ليهم ولليووم
هو ده السبق الصحفي
انا لسه جديد في العملية بتاعتكم دي
وتايه في المدونة
بقالي يومين باظبط فيها
نفسي اعرف شريط الصوت اللي بيتحط ده بيتحط ازااي انا ورااه لحد لما اعمله

بس صرااحة ده انا سعيد بس من كلامك عن اليووم فما بالك باللي راحوا

ربنا يوفقكم يارب
ودايما في تقدم كده

صحفية روشة يقول...

ممكن سؤال
انا تانى مرة ادخل مدونتك
ومعرفش عنك حاجة قبل كدة
بس انت كان ليك كتاب اتنشر فى معرض الكتاب اللى فات؟
ووصلت لانك تنشره ازاى؟
ينى مين اللى اقترح عليك النشر ونشرته ازاى؟

مهندس مصري يقول...

ليهات
=======
مرحباً بك في عالم التدوين يا دكتور
ما أعرفش شريط الصوت بيتحط ازاي
بس ممكن تسأل البشمهندس عصفور المدينة
هو أحسن واحد يفيدك
ربنا يسعدك كمان و كمان و شكراً على تعليقك
:)

صحفية روشة
===========
يا أهلاً و سهلاً
مدونتك دمها خفيف و شكلها حلو
و شكلك حتبقي من مشاهير عالم التدوين بعكس الناس المملة زي
:)
كتاب ايه ؟ اللي انتي بتقولي عليه
دا أنا غلبان
كتاب مرة واحدة
ربنا يبشرك بالخير
الكتاب اللي أنا متكلم عليه هو كتاب عايزة أتجوز بتاع غادة عبد العال صاحبة مدونة عايزة أتجوز و لنك البروفايل بتاعها موجود في أسماء المدونين اللي قابلتهم في أول البوست
wanna be a bride
و لما تخشي مدونتها هتفهمي التفاصيل اللي بتسألي عليها كلها
أهلاً بيكي مرة تانية و ما تقطعيش التعليقات
:)

صحفية روشة يقول...

متقولش على نفسك ممل
يعنى لو انت ممل انا هدخل مدونتك لية؟
وربنا يخليك كل ده مدح فى مدونتى
مش هقطع التعليقات ولا انت كمان ياريت
سلام

somaa يقول...

يااااه كل دا كان فى المعرض سبحان الله احنا عملنا رحله بس برضوا فى مدونه تانيه بس مشفناش كل دا مع اننا لفينا المعرض يمكن عشان كان اخر يوم...اللذيذ فى الموضوع بعد ما رحنا سوق الازبكيه ملقيناش كتب عدله كانت الكتب الحلوه خلصت ومش باقى غير مجلات ...يومها عرفت ان الشعب بقى مثقف قلت خير والله
بس تغطيه جميله تسلم ايدك وعلى فكره الصوره اللى حاتطها مش شبه الصوره التانيه هههه
تحياتى ليك سومه_87