الاثنين، فبراير 18، 2008

أحسن عداد للزوار

الموضوع المرة دي موجه للمدونين فقط
عايز أعرفكم موقع اتعرفت عليه بالصدفة في أول شهر ليا في عالم التدوين و هو الموقع ده
http://s4.shinystat.com/
و مكانه على جنب عندي تحت عداد الزوار التقليدي

و ده مش مجرد عداد لا دا يعتبر بوابة كنز المعلومات عن مدونتي

ده موقع لما بتشترك فيه بيديك إحصائيات تفصيلية و دقيقة عن زوار مدونتك


زي مثلاً لو ضغطتوا على العداد ده عندي دلوقت حيفتح لكم الصفحة دي



و اللي بتوضح لكم بالرسم البياني عدد الزوار اللي زاروا مدونتي خلال الشهر اللي فات و عدد الصفحات اللي فتحوها عندي في كل يوم على حدة

و غير كده موجود فيه كل الإحصائيات عن مدونتي من ساعة ما إشتركت فيه

يعني الواحد ممكن يقعد يراجع تاريخ الزوار لمدونته بالكامل

و فيه حاجات ياما كويسة زي مثلاً جنسيات الزوار و عددهم النهاردة أو امبارح أو الشهر اللي فات


و بيبعت تقرير تفصيلي على الإيميل كل إسبوع


زي ده كده



و ضغطة على اللنك اللي متعلم عليه تحت ده تدخلك عالم التقارير و الرسوم البيانية التفصيلية عن مدونتك


كمان فيه امكانية انك تعرف الناس دخلت مدونتك منين زي كده مثلاً


و زي ما انتم شايفين مقسومة لأربع أقسام

مواقع و طلب مباشر - من المفضلة أو بكتابة العنوان للي حافظه - و محركات بحث و غير معروف ؟

طب المواقع اللي الناس دخلت منها عندي

أهيه


أولهم جوجل طبعاً و الموقع موضح عدد الزوار زاد عن الشهر اللي فات من الموقع ده و لا قل و نسبتهم المئوية لعدد الزوار في الشهر ده

و كمان بيوضح كثافة الزوار للمدونة على مدار الساعة طوال اليوم

و كثافة الزوار طوال الإسبوع

و حاجات تانية كتير و كل ده مجاناً

تخيلوا بقى الإشتراك اللي بفلوس حيعرف معلومات قد ايه ؟

اللي يحب يعرف كل حاجة عن زوار مدونته و ما تفتوش لا شاردة و لا واردة يشترك في الموقع ده

جربوه و قولوا لي رأيكم

هناك 36 تعليقًا:

خمسة فضفضة يقول...

السلام عليكم ورحمة الله وبركاته

شكرا علي الاكتشاف اللجميل ده
هاجربه وادعيلك ان شاء الله

جزاك الله خيرا

عصفور المدينة يقول...

أنا أستخدم عداد شبيه ويعطيني نفس البيانات وبعض أشياء زيادة
www.histats.com

وعلى فكرة الزوار اللي بييجوا من محرك البحث مش دايما بيكونوا زوار دائمين يعني اللي أحسن منهم اللي بيييجوا عمدا بيكتبوا العنوان بإيديهم لأو بييجوا من لينك

بحبك يامصر يقول...

شكرا يا هندسه على المعلومه دى وان شاء الله نجربه

لماضة يقول...

يا هندسة متعدش كتير
كده بركتهم تقل
خليها كده وربك الرزاق
:))

ابن حـجـر الـعـسـقـلانـى يقول...

و الله موقع جميل جدا

جزاك الله خيرا علي إنك دلتنا عليه

العراق صوت الحق يقول...

السلام عليكم ورحمة الله وبركاته
شكرا لمرورك على مدونتي والتعليق على موضوع حزب الله .شكرا لاضافة مدونتي عندك . شكرا على عداد الزوار لقد وضعته عندي في المدونة
جزاك الله خيرا على كل جهودك
عمر

جمعاوى روش طحن يقول...

ماشى يا مولانا

نجرب

و نرجع نقول

رأينا

آفاق الحرية يقول...

جزاكم الله خيرا
واكتشاف جميل
يارب يكون في ميزان حسناتك ان شاء الله

EmY يقول...

انت قلتلي عليه قبل كده و انا لما شوفت البوست دلوقتي قولت لكوكا تبص عليه علشان انا ماليش دماغ اني اجرب حاجه كوكا هي المتخصصه في الحاجات دي
بوست مفيد
تحياتي
سؤال رفيع انت مختفي فين

مهندس مصري يقول...

خمسة فضفضة
==========
و عليكم السلام و رحمة الله و بركاته
يارب يعجبك يا دكتورة
و دعواتك لينا دايما ً من غير حاجة
:)

عصفور المدينة
=============
حطيت عدادك يا هندسة و حأجربه فترة و أشوف
و في زوار بتيجي من مواقع تانية غير محركات البحث
يعني مثلاً الموقع رقم 2 في قائمة المواقع الموصلة لمدونتي هو البروفايل بتاعي في البلوجر
و الموقع رقم 4 هو لنك لمدونتي في السايد بار عند واحد مدون صديق
أصل في ناس مش بتحطني في المفضلة و بيخشوا لي من السايد بار عندهم علطول
:)

بحبك يا مصر
===========
العفو يارب يعجبك

لماضة
=====
و أنا أقول مين اللي نظر لي فيهم
:)
هههههههههههه
ماشي يا دكترة مردودة لك

ابن حجر العسقلاني
=================
أي خدمة
:)
جزانا و إياك

العراق صوت الحق
================
العفو يا عمر
أنا الذي تشرفت بمعرفة مدونتك و التي هي صوت الحق لأهلنا من السنة في العراق
و عرفت منك الكثير عن تاريخ العراق و حالته الحالية
بارك الله فيك
و نصر المقاومة ضد الإحتلال و العملاء
و أعاد لنا العراق القوي
حامي البوابة الشرقية أحد أكبر الدول العربية الإسلامية العظيمة

اللهم انصرهم على عدوهم و عدوك اللهم آميين

جمعاوي روش طحن
===============
ماشي جرب و أنا في انتظارك
:)

آفاق الحرية
===========
أول زيارة ليا منك
ايه النور ده
جزانا الله و اياكم
آميين
:)

إيمي
====
ماشي يا كسلانة مستني رأي كوكا
و لو كنتي قريتي البوست اللي فات كنتي عرفتي اجابة السؤال الرفيع بتاعك ده
:)
:)

walaa يقول...

شكرا ليك على المعلومات الجميله دى
بس انا مش بحب احط عداد مش عارفه ليه
تحياتى ولاء

إنـســـانـة يقول...

إشي خياااااااال يانااااااس

لا بجد متشكرة ليك جدا ع الإكتشاف ده .. انا قريت البوست امبارح وقلت اجرب لاقيت نفسى بعرف معلومات كتيرة جدا عن اللى بيدخلولي سبحان الله .. العلم نورون

بس على فكرة هو مش احسن عداد ولا حاجة لان العداد بتاعى مختلف وطلع بيجيب نفس البيانات بردو .. والفكرة التانية انه مش سهل اوى كدة اننا نجرب لانك طالما حاطط عداد معين صعب تغيره عشان يرجع يعد من الاول وجديد خصوصا لو كنت فاتح المدونة من زمان يعنى

بس بجد متشكرة ليك جدااااااااااااااا

جزاك الله خيرا

مهندس مصري يقول...

ولاء
===
تلاقيكي خايفة تقلي بركتهم زي لماضة
ههههههههههههه

انسانة
=======
تاني تعليق ليكي عندي
انتي متابعاني و لا بتزوريني كل سنة مرة
:)
العفو يا ستي أي خدمة
و سلامي لكميكاز
:)
ثم المهم انك عرفتي من عدادك نفس المعلومات مش مهم نوع العداد
المهم المعرفة في حد ذاتها
نورتيني بس ما تغيبيش عليا
:)

النجم القادم يقول...

حبيبى ياهندسة
الحق
مبارك عندنا تعالى قوله الا فى رايك
وانا هجرب العداد واقولك راي بس بسرعة الحق مبارك قثبل ما يمشى

appy يقول...

ايه المعلومات الجامده دى الحق سجل حق الاكتشاف بجد بحترم العقليات اللى بتفكر وتفيد دى ربنا يبارك فيك

مهندس مصري يقول...

النجم القادم
==============
بصيت عندك و انت سبقتني بس أنا برضه حأكتب في الموضوع ده
:)

آبي
====
شكراً و يبارك فيكي
:)

coca يقول...

معلوماتك دايما قيمه يا محمد اشكرك عليها

هو سايت مفيد وجميل

تحياتي

عبد الرحمن مدني يقول...

من كان يؤمن بالله و اليوم الاخر فليزور مدونه
اخوان ستايل ويفرج عن كرب اخوكم المسلم

مهندس مصري يقول...

كوكا
====
شكراً
و يارب ينفعك

عبد الرحمن مدني
===============
حاضر

بت خيخة وأى كلام يقول...

ايه الفضايح دى يا محمد
يعنى افرض مثلا مثلا يعنى
انى فتحت تلاجة مدونتك وخدتلى ازازة
بيبسى
يقوم العداد ده يفتن عليا وتعرف انى فتحت تلاجتك
طب افرض مثلا انى اتزنقت وحبيت افك حصر فى حمام المدونة
يقوم العداد ده يقولك ان البت خيخة دخلت الحمام
ومش بعيد يديك تفاصيل عن الاحداث اللى جرت فى الحمام
لا يا عم
مش لاعبة معاك تانى
انت كدة هتخلينى ابقى البس طاقية الاخفاء وانا جايالك
بس بصراحة يعنى هو واضح انه موقع كويس
بس العداد ده لو حبيت اركبه
هاضطر اكسر فى حيط المدونة
ولا ده بيتركب باللزق
؟؟؟؟؟؟؟؟؟؟؟
شكرا ليك يا محمد
سلام
اختك خيخة

محمود المصرى يقول...

بسم الله الرحمن الرحيم

بصراحة الاكتشاف جميل يا باشمهندس وهايبقى اجمل واجمل لو عرفتنى ازاى احطه فى المدونة , وهايبقى صارخ الجمال لو ساعدتنى وعرفتنى ازاى احط مواد صوتية او صور فى المدونة .
وكله حسب درجة الجمال اللى تحبها بس برضه الف شكر .
تحياتى

احمد الجيزاوى يقول...

شكرا يا نكتشف على الاكتشاف دة
بس كنت عوز اعرف ممكن يجبى احصاء بعدد زيارات امن الدوله لمدونتى ولا
تحياتى
احمد الجيزاوى

a7med3bdelfta7 يقول...

ثانكس بجد

gannah يقول...

ميرسى كتيى للمعلومة الحلوة دى

الباحث عن الحقيقة يقول...

بقيت داخل واقول يا رب ألاقى ابن حجر سبقنى ودخل
كده هقدر اعرف زباين الاستراحة وألاحقهم واخد حقى من حبابى جيوبهم
انا قربت اشهر افلاسى والضرايب ما بترحمش
مشكلتى سعادتك هى المحروقة اللغة
هبعتلك ابن حجر اهو مهندس برضه بس سبحان الله
مهندس عن مهندس يفرق
انا حزنقه فى الموقع ده واشوفه هيعمل ايه
شكرا يا باشمهندز

عاشقه الفردوس يقول...

جزاك الله خيرا ياباشمهندس

ربنا يباركلك هجربه وادعيلك

عاشقه الفردوس يقول...

جربتها وربنا يباركلك ويبارك فيك ويزيدك علم

ض/خالد يقول...

امكانيات جامدة يا باشمهندس
انا فعلا نفسي في عداد من النوعية دي..

ع العموم ربما نجرب :)

مهندس مصري يقول...

بت خيخة و أي كلام
================
انتي فايقة و بتهزري أهه أمال وقعتي قلبي عندك
يا ستي ركبيه و بعدين نتفاهم و لو مش حتعرفي حأجي اركبه لمدونتك في أول نزولة لمصر
ثم المدونة هنا مقشفرة لا تلاجة و لا حمام
يعني لا خوف من العداد
بس برضه المدونة مدونتك و اتصرفي فيها براحتك
دا انتي صاحبة مكان
محمود المصري
===========
لا ده كده كتير ما ينفعش في تعليق
ضيفني على الماسنجر
wildfire22111@hotmail.com
و احنا في الخدمة

أحمد الجيزاوي
============
جربه و انت تعرف
و العفو يا باشا

أحمد عبد الفتاح
===============
العفو

جنة
====
أي خدمة يا فندم
:)

الباحث عن الحقيقة
=================
بقى كده عايز تجمرك الناس رايح جاي من عندك
عموماً ابن حجر عدى قبلك اتفاهم معاه
بس لو فيها جمرك مش حيعدي من عندك كتير
:)

عاشقة الفردوس
===============
و جزاكم الله خير
يارب يعجبك

لحظه من فضلك يقول...

ارجو الاهتمام بذلك الموضوع الموجود بالمدونه وارجو التضامن معى وشكرا

مهندس مصري يقول...

ض/خالد
======
جرب و ان شاء الله مش حتندم
و يارب يعجبك

لحظة من فضلك
============
حاضر

أنونيمس يقول...

كتر خيرك يا هندسه
أول ما افضى هاظبطه

والله وحشني يا جدع
طمني عليك

مهندس مصري يقول...

أنونيمس
========
العفو يا دكترة يا حبيبي
و انت كمتن واحشني بس انت اللي مش بتبان على الماسنجر
و ربنا يسهل أنا نازل لمقابلة المدونين على البورصة يوم الخميس الجاي و ياريت اشوفك هناك
:)

همس الاحباب يقول...

انا اول مرة ادخل مدونتك
بس مش اتبقى اخر مرة طبعا واتمنى انك تشرفنى بالزيارة علشان العداد يعد
على فكرة انا عايز اعمل عداد يبقى ازاى ممكن المساعدة
وشكرا تحياتى
على فكرة لماضة زارتنى والصباغ كمان يعنى انت متاخر
تحياتى خالد

MerMaid يقول...

انا مش عارفة يعني
هو المصريين مبيحرموش ؟؟
يعني هم يتجوعوا من الحكومة و يرحبوا بيها ؟؟
يعني حاجة غريبة فعلا والله

يستاهلوا اللي بيحصلهم فعلا

تحياتي

مهندس مصري يقول...

عروسة البحر
==============
التعليق ده مكانه كده غلط
مكانه بوست زيارة مبارك اللي فوق ده
:)
عموماً يفط الترحيب دي أصحاب المحلات معلقينها بأوامر من الأمن غصب عنهم مش بمزاجهم