الجمعة، فبراير 22، 2008

زيارة حسني مبارك و سوزان لمدينتي دمنهور و رشيد

الدنيا مقلوبة بشكل غير طبيعي من حوالي إسبوعين عندنا في دمنهور

شوارع عمالين يلمعوها و يخططوها و يدهنوا بردورات الأرصفة بتاعتها من جديد

و بوابات فراشة ياما انتشرت على طول الطريق اللي حيمشي فيه مسار موكب الريس و متعلق عليها لافتات ترحيب ملهاش عدد

بس المطر الشديد في الإسبوع اللي فات بهدلها و سيح الكتابة بتاعتها و اضطروا يكتبوها تاني
طيب هوا جاي هوا و المدام ليه؟
جايين علشان يفتتحوا مبنى أوبرا دمنهور
اللي هوا ده

و اللي كان أصلاً مبنى سينما البلدية المقفولة من زمان قوي أنا من و أنا عيل صغير باشوفها و هيا مقفولة

شوفوا شكلها من سنتين كان عامل إزاي

و اللي جنبها على الشمال ده هو مبني مجلس المدينة

و المبنيين أثريين من أيام الملك فؤاد و حابقى أنشر لكم صورة حجر الأساس اللي حطه الملك فؤاد بنفسه

المهم بقى ان ترميم الأوبرا دي اتكلف 12 مليون جنيه منهم 5 مليون جنيه من موازنة رئاسة الجمهورية

بل ان كابل الكهرباء الارضي الخاص بالأوبرا و المغذي لها من لوحة توزيع كهرباء أبو الريش ( وابور النور ) و حتى ميدان الساعة - مكان الأوبرا - تم مده منذ سنتين على نفقة رئاسة الجمهورية

ليه ؟

ليه يتعمل اوبرا في دمنهور و تحت إشراف رئاسة الجمهورية مع وزارة الثقافة ؟

و ليه التكلفة العالية دي ؟

دا علشان يعملوا مدخل للأوبرا و يزرعوه شجر و يعملوا حديقة للمدخل أزالوا المسلة اللي كانت معمولة في الميدان و ما كانش لسه فات عليها سنة واحدة

و كان لسه الميدان جديد و لسه المقاول اللي نفذه ما سلموش حتى تسليم نهائي و تكلفته كانت بالملايين برضه

بل قبلها بسنة علشان يعملوا المسلة دي هدموا حديقة مكتبة الطفل بتاعة سوزان مبارك و مهرجان القراءة للجميع

و المرة دي علشان الأوبرا هدموا الميدان الجديد و هدموا المكتبة نفسها اللي ياما الواحد قرأ فيها و هو صغير

و كان دايماً بيدربوا بنات الإستعراض في المكتبة على اغنية بتقول

يادي النور يادي النور ماما سوزان في دمنهور

يا ترى جت أخيراً الفرصة ليهم علشان يقولوها و لا محدش حيعبرهم

طيب يعني ايه أوبرا ؟ و حيعملوا بيها ايه في بلد بسيطة زي دمنهور ؟ مش عارف و مش مقتنع بفايدة الاوبرا عندنا أصلاً

يعني لو كانت مجرد سينما كنت فهمت لكن أوبرا ؟

ياريت اللي فاهم يفهمني

بس هو مش جاي بس علشان الأوبرا دا كمان حيفتتح مبنى مركز التحكم الاقليمي في كهرباء غرب الدلتا بمحطة كهرباء دمنهور في قرية زاوية غزال القريبة

هوا المبنى اللي في خلفية الصورة ده و شايفين الفراشة و يافطة من يفط الترحيب بس كانت الدنيا لسه شاتية يوميها و كانوا بيشيلوا و يحطوا كل حاجة من جديد

بس على حس الزيارة دي تم اعادة رصف طريق دمنهور زاوية غزال و توسيعه و تخطيطه رغم انه كويس بس ما كانش كويس كفاية بما يناسب مرور الرئيس عليه

بينما توجد شوارع ياما مدمرة في دمنهور لكنها لن تحظى بشرف مرور السيد الرئيس

و خط سير الرئيس كالتالي حيث سيقوم بالهبوط بالهليكوبتر في استاد دمنهور ثم سيتحرك موكبه عبر شارع عبد السلام الشاذلي ثم عبر شارع الجمهورية حيث سيقوم بافتتاح الاوبرا في ميدان الساعة ثم يتحرك عبر شارع الجمهورية لنهايته و يخرج خارج دمنهور ليذهب إلى زاوية غزال لإفتتاح مبنى الكهرباء الجديد اللي شغال بقاله سنة تقريباً

أو العكس مش عارف ترتيب زيارته بالضبط

و كمان حيروحوا رشيد لإفتتاح متحف رشيد و محطة الصرف الصحي الجديدة

عن طريق الهيليكوبتر طبعاً

بس في محطة الصرف الصحي دي شغالين بقالهم شهر و أكتر استعداداً لزيارة الرئيس

فحطوا له أسانسير -مصعد- في مبني دورين فقط لأنه لا يستطيع صعود سلالم دور واحد فقط بل و قاموا بتعلية الأسفلت بالكامل حتى لا يكون الرصيف عالي عليه عندما يدخل المبنى و حاجات زي كده

حكم السن بقى الريس عنده 80 سنة

و رغم كل المصاريف دي الحكومة مديونة و بتقول أزود لكم المرتبات منين؟

و حالياً تنتشر الشائعات حول ميعاد الزيارة و لكنها عادة الرئيس في ألا يعرف أحد ميعاد زيارته كنوع من الإحتياطات الأمنية

و عموماً مش حنعرف يوم الزيارة غير لما نصحى نلاقي البلد متقفلة فجأة بالأمن

و بعدها حأبقى أكتب لكم عن اليوم ده لوكنا لسه عايشين

و أشكر النجم القادم اللي استعرت من تدوينته الريس عندنا بعض الصور المنشورة

هناك 28 تعليقًا:

لماضة يقول...

والله يا هندسة ده المتعارف عليه من قديم الاذل
لما الريس يجي لازم الشجر يتزرع فى الارض والشوارع تترصف والبلاليع يخلقولها غطيان
اما دار الاوبرا دي انا سمعت انها جميله فعلا ونفسي ازورها اشوف الناس دي بتقول ايه
يمكن افهم حاجه
:)

عصفور المدينة يقول...

أوبرا في دمنهور طيب يبعتوا زيت ودقيق ويعملوا الأوبرا عندنا
:)

جمعاوى روش طحن يقول...

الباشا الكبيير

يا عمنا الريس شاكله مش جاى عندكوا ولا حاجة

ده من 10 أيام و أنا سامع إنه جاى بركة بكرة بكرة


ولا كلام من ده


و بعدين كنت صورت المناطق اللى هو مش ح يعدى عليها

زى أبو الريش و صلاح الدين

أى خدمة أخووك لافف برده

nonoymm يقول...

اه كدة انا قلت انا قريت الكلام دة فين قبل كدة طب معلش هتعبك تروح لحد النجم القادم حطاله حبة طلبات ينوبك ثواب
بيتهيالي اول زيارة للمدونة
باذن الله متابعة
يشرفني التواصل

غير معرف يقول...

ده فعلا" الطبيعى يابشمهندس لما حد من الكبارات ينوى يزور اى محافظه وده كله نفاق ربنا يعافينا بيلمعوا البلد من بره وهي من جوه مليانه بلاوى والأدهى من كده ان الزائر الكريم بيبقى عارف كل الشغل ده بس بيحاول يصدق نفسه او من الآخر بيضحك على نفسه زى م اللى حواليه بيضحكوا عليه بس عارف مش مهم انهم يصرفوا ولا انهم بيضحكوا على بعض لاء اكتر حاجة بتزعل التخريف اللى بيحصل تحت ستارة الإصلاح وكله فى سبيل المنظرة.... زى موضوع المكتبة والمسلة ده....شىء محزن فعلا"
الشىء الوحيد اللى نقدر نقوله انهم هيتحاسبو على كل ده.... الحساب يوم الحساب مش حساباتهم البايظه
آسفه ع الإطاله
مستــ ج ــدة

fatima يقول...

مهندس يا مصرى
ايه الجديد يعنى؟؟
ماهو اغلب الميزانية يتروح لحاجات ملهاش ضرورة ملحة .. فى كل المستويات على فكرة ...
صرف الفلوس عل المظاهر بدل صرفها على الاهم
بس انا عايزاك تبص للمستقبل ..و بدل ما تطق حاول تتخيل ان ... بكرة يستخدم مسرح المبنى دا .. فى عروض مسرحيةللمحترفين والهواة .. حفلات غنائية .. حاجات تانية غير عروض الاوبرا بس ...
جايز مش السنةدى و لا بعد خمسة لكن ممكن ولادى و ولادك هما الى يستفيدوا بيها قدام لما الظروف تتغير
خليك متفائل يا عزيزى
بدل ما يجيلك إكتئاب مزمن
تحياتى

فرنسا هانم يقول...

ياعم مبروك الاوبرا
وعبقال الفندق ال5 نجوم بتاع عايده
ومصنع احزيه سندريلا
وبعدين انت زعلان على المسله اللى اتهدت بعد سنه
انت نسيت جراج رمسيس
اللى مكملشى اصلا
وتكلف عشرات الملايين
على فكره انا زرت دمنهور
كتير
وعندى قرايب فى ميدان النافوره

عبده الرايق يقول...

عبده الرايق
مدونه ساخره
عبده الرايق
لعب وجد وضحك وضرب ................
عبده الرايق
يقدم لكم احلى تشكيله من المكسرات والمفتفتات والمطحونات والتعلب فات فات وفى ديله سبع لفات
عبده الرايق
راااااااااااااااااااااااااااااااااااايق
ومرووووووووووووووووووووووووووق
والدنيا كاسحاه فى ديلها

عبده الرايق يقول...

مبروك على الاوبرا
عبقالنا
ولو حتى باوبرا خياطه

خمسة فضفضة يقول...

السلام عليكم ورحمة الله وبركاته

والله الناس دي مش حاسه باللي الشعب بيعاني منه ، عايشيين في برج عاجي ومش داريين باللي بيحصل براه

فكروني بماري انطوانت لما قالولها الشعب مش لاقي العيش الحاف ، قالتلهم طيب مايكلوا بسكوت

صحفية روشة يقول...

عادى يا بشمهندس
انا الريس كان بيزور الحى اللى بعد اللى انا ساكنه فيه على طول الفاصل بينه وبينى نافورة مش اكتر
ولما جه الخير كله جه فى رجليه
بس لما كان موجود
كان محكوم على 3 احياء سكنية بعدم المشى فى الشوارع ولما راح زار المكان اللى كان رايح يزوره كله قعد على الكراسى مش مسموح لحد يقوم يقف حتى
دى بلدنا
اية الجديد

همس الاحباب يقول...

ولا كده عاجب ولا كده عاجب
نعمل اوبرا ما يعجبش نروق الشوارع والاسلفت ما يعجبش انتوا عايزين ايه الريس يمشى فى التراب والزحاليق ويقع فى البالوعة مش عيب عليكم وكله من ميزانيةالرئاسة وربنا يخلينا قناة السويس وتصرف على الرئاسة وبعدين الريس ربنا يديله طولة العمر عنده80 سنةطويل العمر يطول عمره وينصره على من يعاديه ومبروك على دمنهور الاوبرا
وامانة عليك تبقى تسلملى على الست عايدة
انتهى...

appy يقول...

انا شوفت الموضوع ده قبل كده ويا عينى النجم كان مفروس بس انت كاتبه بأسلوب حلو
الا قولى انت شوفت الريس بجد اصلى بشوفه فى التليفزيون بس

عاشقه الفردوس يقول...

لاحول ولاقوه الا بالله

ده ايه ده
ارحمنا يارب
طيب اكلو الشعب وبعدين اعملو اللي انتو عايزينه

لو ادي لكل شاب عاطل الفين جنيه هيعملو مشروع صغير وهيتفضل فلوس كمان
كيلو العدس بقي بتمانيه جنيه يابشر
حراااااااااااااام والله

ض/خالد يقول...

في عندكوا ناس محترمة كتير في دمنهور

أتذكر منهم
المهندس خالد عقدة
واخوه الدكتور هشام عقدة

والاستاذ خالد روشة
وامير سعيد
واخوة تانيين هناك كويسين...
:)

مروة جمعة يقول...

ليه كده بس يا باشمهندس؟
ههههههههههه
فكرتني بأسبوع الفتيات
سوزان جاية الزقازيق
سوزان جاية
جاية
وما جاتش!.. معلش
مبروك دار الأوبرا عليكم
وعقبال ما تبقى البحيرة والشرقية اقل بلاد مصر فقرا!.. تحياتي

مهندس مصري يقول...

لماضة
====
طيب ليه النفاق ده كله
دا لو خرج بره المسار اللي مرسوم له حيشوف البلد ملينة بلاوي
شوارع مكسرة و مناطق مدمرة بالكامل
حسبنا الله و نعم الوكيل

و بالنسبة للأوبرا أول ما تشتغل و في اول نزولة ليكي لدمنهور انتي معزومة على الأوبرا على حسابي :)
انتي و اختك
و أما نشوف حنفهم و لا ايه ؟

عصفور المدينة
=============
مش فاهم ايه اللي دخل الزيت و الدقيق في الموضوع ؟
الا لو كان قصدك ان الشعب مش لاقيهم غير بالغلا و الكوا
أما يعملوها عندكم دي
فاتفضل يا باشا ما تغلاش عليك أوبرا
:)

جمعاوي روش طحن
==============
ما هي دي خطة أمنية معروفة بيستخدموها كل ما ينزل في أي بلد
يقعدوا يقولوا نازل و ما ينزلش و بعد ما الناس تزهق و تنسى
فجأة
ينزل زي القضا المستعجل و تنسد البلد و يوصل بالهليكوبتر و يلف لفته بالعربية المرسيدس السودا المدرعة سريع سريع و بعدها يرحل كالريح العاصف بعد ما يكتسح البلد

دا في أسيوط قبل كده نزل يفتتح كوبري على النيل فجأة بعد الميعاد اللي كان قايل عليه بشهر
عادي ده تمويه أمني

و بعدين عايز صور صلاح الدين و أبو الريش ليه ؟
من قلة طين في كفر الدوار و لا ايه ؟
البلد كلها في اثناء نوات الشتا الحالية مطينة بطين
:)

عاشقة النقاب
==============
لا تاني زيارة ليكي زيارة قديمة عندي قبل كده بس ما ظهرتيش بعدها

مستجدة
======
أولاً طولي براحتك الكلام هنا ببلاش
ثانياً فعلاً شئ محزن اهدار المال العام بسفه و دون مراعاة لأولويات الإنفاق و أصوله
ربنا ينتقم منهم

فاطمة
======
أول زيارة لحضرتك عندي
أهلاً و سهلاً :)
ربنا يسهل و نشوف مستقبل الأوبرا ايه
و اللي يعيش ياما يشوف

فرنسا هانم
==========
الله يبارك فيكي
بس فندق 5 نجوم ايه ؟ دول كانوا عملوا قبل كده عندنا فندق 4 نجوم فخم ضخم في مجمع مبارك لكن لما ملقوش حد بينزل فيه لأن دمنهور مش مزار سياحي قلبوه مستشفى و معهد للأورام و مركز تدريب للأطباء و فضل الدور الأرضي بس كفندق
أيوه أنا زعلان على إهدار المال العام في الوقت اللي البلد محتاجة حاجات كتير أهم و انا عارفها على الأقل في بنيتها الاساسية من مياه و صرف صحي
خسارة الفلوس اللي رايحة في المظاهر الكدابة

بقى بتزوري دمنهور كتير و لسه بتقولي دلوقتي يا فرنسا

طيب الزيارة الجاية و لو اني عارف انك مش عايزة تكشفي شخصيتك الحقيقية خليكي عارفة ان ليكي أخ في دمنهور لو عرفتيه على الميل بميعاد و مكان وصولك حيشيلك من على الأرض شيل
يا فرنستنا الغالية

عبده الرايق
============
الله يبارك فيك

خمسة فضفضة
==========
و عليكم السلام و رحمة الله و بركاته
فعلاً يا دكتورة
و ما قدرتش اعلق على بوست على طول الحياة الجديد
ما عرفتش أقول ايه

صحفية روشة
=============
لا جديد بس بنفضفض بس
المهم تكوني اتمتعتي بالخير اللي في رجليه انتي و أهل البلد كلهم

همس الأحباب
==========
فعلاً طويل العمر يطول عمره و يزهزه عصره و ينصره على مين يعاديه
هاي هيئ

آبي
====
لا يا ستي لا شفته و لا عايز أشوفه الله يبعده عنا مش ناقصينه
و انتي شايفة ان الإسلوب حلو
طب دا أنا كتبته و نشرته في قعدة واحدة من غير مراجعة
الله يكرمك على المجاملة اللطيفة دي
و نعم الإتيكيت
شكراً يا آبي
:)

عاشقة الفردوس
==============
فعلاً حرام
حسبنا الله و نعم الوكيل

ض/خالد
========
و لو اني ما اعرفش اي حد من الناس اللي حضرتك قلت عليهم
بس مادام من طرفك يبقوا أحسن ناس
بس ايه دخلهم بالموضوع ؟
:)

مروة جمعة
==========
الله يبارك فيكي
و آمين
:)
و اهلاً بيكي في أول مرة هنا

النجم القادم يقول...

ايه ياهندسة سبقنا ولولولولواوا
متخدش فى بالك
انته ايه ياعمنا الزيارة اتلغت يوم الخميس انته متعرفش لما عرفوان ان النجم القادم حط البوست وبيلم رسايل لمبارك خافوا عليه منى هههههههههههه
بس انا ليا حق النشر والتوزير انته كده اخدت منى اكتر مكن صورة وربنا بس لما اشوفك ههههههههههه

مهندس مصري يقول...

النجم القادم
===============
مين اللي قال انها اتلغت؟
أما بالنسبة للصور فكده خالصين لأن صور الكورنيش الجديد و شوارع ابو الريش المكسرة من عندي
راجع تدوينة يا مرحب يا نظيف باشا 3 في شهر اغسطس الماضي عندي
و بعد كده هأعمل زي الصباغ و أكتب اسم المدونة على الصور و الفيديوهات لحفظ حقوق الملكية

قبلة الحياة يقول...

يادي النور يادي النور ظهرت أوبرا في دمنهور


يلا يا باشمهندس ماشيه معاكم بئه الريس مهننكم
أوبرا مرة واحدة يا بختكم يا سيدي

ألا قولى يا باشمهندس انت عمرك دخلت أوبرا ؟؟!!!

أظنش مفيش دلع اكتر من كدا هيجلكم ناس تقعد تصوت للصبح .. عشان تعرفوا ان في ديمقراطية وحريه تصويت

بجد هقولك ايه غير هم يبكي وهم يضحك

ربنا يزيح عننا وقادر ينجينا من كل ظالم مستبد

احترامي وتقديري

بحبك يامصر يقول...

هندسه
متشلش فى نفسك فك ياراجل احنا واخدين على كده واكتر من كده بس حلوه ابرا ههه
المهم يا اخى اننا خلاص بنموت من قلة المواد الاساسيه ويقلى ابرا دا خلاص الواحد هيطنقط والله الواحد قرب تجيله نقطه.......يلا اهى تنفع فى الدورى

حل وسط يقول...

جه ولا ما جاش
انتو الكسبانين

ياريت يا سيدي الريس ييجي عندنا
يا بختكو

Desert cat يقول...

مبروك عليكم زيارة الريس يابشمهندس
ومبروك علينا زيادة الغلاء واختراع قوانين جديدة لسحب فلوسنا علشان يرصفوا الطرق اللى الريس بيمر عليها والاسانسير اللى بيطلع فيه الهى تطلع مراوحه البعيد

بت خيخة وأى كلام يقول...

مش عارفة اهنيك ان الريس هيجيلكم دمنهور
ولا اعزيك
لان الزيارات اللى من النوع ده بتيجى فوق دماغ اهل البلد
يعنى هتلاقى الحال واقف ومش عارفين تتمشوا خطوة واحدة فى البلد وهيبقى يوم اسود من قرن الخروب فوق دماغكم
بجد بجد صعبانين عليا
بصراحة يعنى مش فرحنالكم على اد ما انا مستنية البوست بتاعك بتاع يوم الزيارة وعايزة اعرف المأسى اللى حصلتلكم فيه
ربنا معاكم
وربنا على الظالم والمفترى
بس صحيح هو ايه لزمة الاوبرا عندكم
ماكانوا يخلوا المكتبة افيد
سلام
اختك خيخة

احمد الجيزاوى يقول...

والله كان بيقوله يا هندسه عندنا الناس اى سكنه فى العشوايات انى المكان اى عوزة ينضف جيب الرئيس يزورة ساعه
بس المهم انى بعد ما يمشى الرئيس ميشلوش كل حاجه حتى الاسفلت كمان
تحيانتى احمد الجيزاوى

مهندس مصري يقول...

قبلة الحياة
===========
بالضبط هم يضحك و هم يبكي
سعيد بزيارتك الأولى لمدونتي و يارب دايماً منورانا علطول
:)

بحبك يا مصر
===========
أنا مش شايل و لا حاجة ما أنا بأفضي في المدونة أهوه
ربنا ييسر ما فيه الخير

حل وسط
=======
لو قصدك على تنضيف و ترويق البلد
يبقى لأ مش كسبانين دا رايح وسط البلد اللي هوا نضيف أصلاً و بيترصف مرة كل سنة
إنما لو يلف شوارع البلد كلها
كان يبقى هوا ده المكسب الحقيقي
:)

قطة الصحراء
=============
و لو اني مش عارف ايه مراوحه ؟
بس آميييييييين

بت خيخة و أي كلام
=================
مش عارف لا زمتها ايه؟
و المكتبة دي انا قضيت فيها أجمل أيام عمري في أجازات الصيف بتاعة اعدادي و ثانوي و بدايات الكلية
و كنت من أهم اصدقاء المكتبة
ذكريات جميلة اتحطمت مع هدم المكتبة
منهم لله
و أول ما ينزل حأحكي لكم كل حاجة ان شاء الله

أحمد الجيزاوي
============
لا حيشيلوا الفراشة و اليفط بس يا بو حميد
و يخفوا ايدهم في النضافة شوية
لأن دلوقتي طول ما هما منتظرينه مستحيل تلاقي على طول مسار الزيارة ورقة في الأرض أو سلة زبالة مليانة أو شوية تراب أو طين على الارض
المسار بيبرق
لكن بعدها
انت عارف
:)

زكرياء يقول...

مبروك الأوبرا يا محمد و عقبال ما ازورك و ندخلها...

مهندس مصري يقول...

زكرياء
=======
دا دمنهور تنور كلها
تعال انت بس و انا ادخلك اوبرا و كل اللي انت عايزه
:)