الاثنين، مارس 03، 2008

أسامة سويدان في حوار الساعة: ابي يدفع ضريبة الاصلاح والحرية

ما بين هموم العالم العربي من محرقة في قطاع غزة و صمت عربي رسمي مهين و مدمرة أمريكية تتهادى أمام سواحل لبنان و غيرها كثير

و بين هموم داخلية كإرتفاع الأسعار الجنوني و الظلم المستشري في البلاد

و هم على المستوى الشخصي و لكنه بسيط بحمد الله

أكتفي بإعادة نشر هذا الحوار

أمام كل هذا لا أجد ما اكتبه فأكتفي بنشر الحوار الذي نشره موقع اخوان البحيرة مع صديقي أسامة سويدان


حوار - ياسين عز الدين

2008-03-01

المكان : بيت متواضع في عمارات محمد عبده بحي أبو الريش بدمنهور

اعد الدقائق حتي أصل الي منزل الاستاذ محمد سويدان ، هذا المنزل الذي انقض عليه زوار الفجر في فجر الاربعاء الماضي للقبض علي مسئول الاخوان بالبحيرة بعد اعلان الجماعة دخولها الانتخابات المحلية في ابريل القادم وتحديدافي اليوم التالي لتأجيل المحكمة العسكرية لاربعين من قيادات الاخوان التي يحاكم أحد أبناء البحيرة أمامها .

القبض علي مسئول محافظة مرفوعة الرأس صاحبة كرامة وعزة ومافتئت تلقن الدروس في كل انتخابات للحزب الفاسد الحاكم ، قبض اعتبره المراقبون تصعيد خطير من النظام .

والاستاذ محمد سويدان احد ابناء البحيرة الذين دفعوا ثلاث سنوات من عمرهم في محكمة عسكرية أقامها النظام سنة 1995كضريبة للاصلاح والحرية والعزة التي ينشدها شعبنا البحراوي خاصة وشعبنا المصري عامة .

حوارنا اليوم .. مع ابنه أسامة الذي فتح قلبه وعقله لموقع "إخوان اليحيرة " فكان هذا الحوار : -

ماذا حدث يوم الإعتقال ؟

حوالي في الساعة 2.15فجر الاربعاء الماضي وجدنا جرس الشقة رن بطريقة عالية وطرقات علي باب الشقة بصورة قوية ففزعت انا والحاج والغريب اننا نظرنا من العين السحرية وجدنا احد زور الفجر وضع اصبعه عليها ، ففتحنا فوجدنا ضابط ومعه المخبرين وعساكرعلي السلالم يقولون للحاج أنهم يريدوا أخذه معاهم لامن الدولة ، ولما جهز الحاج شنطته بدأوا تفتيش المنزل .

ماذا حدث أثناء التفتيش ؟

في الحقيقة أنا اريد أنا اسجل أن الحاج كان مستاء جدا من التفتيش الذي حدث وقال ان هذا الامر زائد عن حده ، وبالنسبة لهم فهم فتشوا ثلاث غرف تفتيش دقيق للغاية وقلبوا محتوياتهم حتي صارواأشياء أخري غير الغرف التي نعرفها في بيتنا واخذوا االهارد بعد ما ساومني علي الكمبيوتر كله أو الهارد ،ومبلغ 3000 جنيه وقام الضابط بالإتصال بقيادته بعد تنبيه الحاج له أن هذه الاموال أمانات لاتخصه الا انهم أخذوها ثم عادت بعد ذهاب الحاج الي مقر أمن الدولة .

ماذا شعرت عندما حدث هذا الامر ؟ وتحديدا ما هو اول شعور انتابك عند القبض علي الوالد ؟

لقد شعرت بفقد كل الامل في ان يأتي علي يد هذه الحكومة وهذا النظام خير أو تقوم علي يديه قائمة للحرية رغم كل الزيف الذي يزعمونه علي صفحات الجرائد الحكومية حول الحرية المكفولة للجميع والانتخابات النزيهة .

لقد رأيت أمامي ارهابين دخلوا علينا في نصف الليل لتطلع علي عورات الناس وتواصل زيارات الفجر الممقوته .

والغريب أن يوم الانتخابات لايترك أحد ويستمر التزوير ومنع الناخبين أو سحل بعضهم من أجل أن ينجح النظام وذلك كله رغم الاعتقالات التي تتم وهذه اشارة اننا أمام نظام جبان .

وكيف تقيم اعتقال والدك ضمن الحملة التي طالت مسئولي المكاتب الادارية وقيادات الجماعة علي خلفية المحليات ؟؟

انظر ، انا مولود وأبي في المعتقل ، وطول عمرهم لم يخيبوا ظننا بهم ، ولكن أقول بكل ثقة وايمان بالله أننا أصحاب دعوة اصلاحية ولافخر ، ونعتبر أن ما حدث ابتلاء وفتنة " أحسب الناس أن يتركوا أن يقولوا أمنا وهم لايفتنون " .

ولكن المفارقة العجيبة والغريبة أن البلطجية والحشاشين واللصوص والنصابين سواء الصغار أو الكبار في بيوتهم يهنئون ولا يقتحم أحد من الامن بيوتهم في الفجر ، في حين والدي الذي لا أسير معه في الشارع الا يقف أكثر من مرة في مسافة 100 مرة مع الناس ويسالونه ويحيونه ويلقون عليه السلام .

وأقول بكل صراحة أني من صغري أحترم قيمة أبي من الذي أراه في عيون الناس بجانب احترامي له كأب وهو شعور مستمر وقديم كلما اتذكر ما حدث وماأره في ابي لاأجد مبرر واحد للقبض عليه .

كيف استقبل الاهالي خبر اعتقال الوالد ؟

والله يأخي الناس في المسجد والجيران قالت " معلش الدنيا ماشية بالمشقلب " وأحد الاهالي من العجائز أوقفني في الشارع وهو يبكي ويقول " شفت عملو ايه في حبيبي " وأنا اصبره وأقول له اصبر ياوالدي ، وحتي أحد الجيران دعا عليهم وقال : منهم لله اللي أخذوه ليه ما خدونيش معاهم " .

انتخابات المحليات هذه هي اللافتة التي أقدم الامن تحتها لاختطاف الوالد ؟ كيف تقرأ ما يفعله النظام في ضوء هذه اللافتة ؟

نظام فاسد ولايقبل الاخر ويدق مسمار في نعش رحيله ، وينبغي أن يري تدفق الناس علي الجان تقول له : لا ، وألف لا .، نظام مترهل بدأت الاعتصامات والاضرابات تتتوالي عليه من كل جانب تبشر بأن الحرية والاصلاح قاربت علي المجيء لهذا البلد .

ما هو تأثير القبض علي الوالد علي البيت ؟

البيت يسير علي خير حال وما ينقصنا الا والدنا الذي يغيب عنا ، ونحن تربينا علي الصبر علي الإبتلاء وهذا الصبر يجلب البركة ، وهي بركة لاتوصف ، وسيأتي الوالد ليري بإذن الله البيت كما تركه بل أفضل في القرب من الله والحرص علي رضاه .

واقول لك لقد ربنا والدنا علي مباديء الاسلام من صغرنا ، ربنا علي التعايش مع الناس كلها وعلي أهمية الحرية وحق الجميع في الاعتقاد والمواطنة والتعبير ، ربنا علي أن الله هو الحاكم والقهار والعزيز والمعز والمذل وأن قدر الله نافذ ولو بعد حين .

رسالتك الي الوالد الذي يقبع الان في سجن برج العرب ظلما وعدوانا ؟

أقول له ياوالدي العزيز لقد تركت وراءك مباديء نور وحق ، وأبناء رجال يعرفون قيمة هذه المباديء وهذ ا الحق الذي لايرضي به المستبدين والظالمين ، فاصبر علي ضريبة الاصلاح التي تدفعها من أجل مستقبلي ومستقبل الملايين من المصريين ، ولاتنسانا من خالص دعواتك فدعوة المظلوم ليس بينها وبين الله حجاب ، ولتعلم أننا جميعا علي عهدنا مع الله وسيبقي دائما : الله غايتنا والرسول قدوتنا والجهاد سبيلنا والموت في سيبل الله أسمي أمانينا .


هناك 39 تعليقًا:

د/اجدع بنوته يقول...

يكفيه انه والده صاحب رساله

ربنا يجازيهم خير بعمله ده

وربنا يفك كربهم جميعا

تحياتى

Desert cat يقول...

يا حرااااااااااام
طيب

ammar يقول...

حسبنا الله ونعم الوكيل
بقت حاجات كتير اوى بتحرق الدم اليومين دول
وهى ناقصه يعنى
مدونة جميله ياهندسه
وزيارتى تتكرر ان شاء الله

النجم القادم يقول...

السلام عليكم

الله ينور ياهندسة
وانتظروا
مدونة اوعى تخاف تحاور المهندس اسامة سويدان

http://www4.0zz0.com/2008/03/03/21/621035887.jpg

fatima يقول...

يا مهندس يا مصرى
انالا أعرف هولاء الأشخاص و لا أعلم عن نشاطهم شىء سوى انه نشاط سياسى
لا اشجعهم و لا أكرههم
لكن أكره انهم يتمرمطوا كدا بلا ذنب سوى انهم لهم أفكارهم و أيدلوجيتهم المختلفة ...
الظلم ظلم
و هو دا المهم
ان محدش يتظلم
و بس
ربنا يفك أسر كل مظلوم
و آخر الليل ... نهار
تحياتى ليك

عاشقه الفردوس يقول...

جزاك الله خيرا ياباشمهندس

والله حرام
والله حرام
حسبنا الله ونعم الوكيل

لنا ولهم الله

مستــ ج ــــدة يقول...

اللهم مكّن لدينك فى الأرض
ربنا يرفع عنهم الظلم وينصرهم ويفك أسرهم

فرنسا هانم يقول...

مسلسل الاعتقالات لن ينتهى
وربما يستمر بشراسه اكثر
يكفى اسامه فخرا
ان الناس كلها مع ابيه
اللهم فرج كربهم
امين يارب

غير معرف يقول...

حسبناالله ونعم الوكيل فى الظالم الله معك يا اسامه وربنا يجازيه خير عنا وكلنا معه بالدعاء

قسوره يقول...

الله معك يا هندسه كلنا نعرف الاستاذ محمد وربنا يجزيه خير وكلنا نحبه

appy يقول...

اممممممممم سؤال بس يا بشمهندس هو المفروض الدين الاسلامى بيقول نحافظ على حرمات البيوت ولما يكون واحد ومسلم وتبع الاخوان مش المفروض يراعى الحاجات دى
وبعدين رساله ايه بس بصراحه انا مش شايفه من الاخوان غير مظاهرات وتشنجات فىالدنيا اكتر حاجه علشان الفلسطنين احنا فين
عموما ربنا مع المظلوم
الا قولى سؤال جانبى مش منى من النحله والدبور هو انت ليه مهتم بالاخوان اليومين دول مشاكلنا اتحلت ومبقاش عندنا غيرهم ولا انت عندك امل ان دول اللى هيصلحوا البلد اممممممممم وجهه نظر برضه المفروض احترامها

مهندس مصري يقول...

د / أجدع بنوتة
===============
آميين
:)

قطة الصحراء
===========
طيب طبعاً

عمار
=====
اهلاً بيك في أول زيارة و معلش حرق دمنا في الزمن ده بقى عادي

النجم القادم
=============
و عليكم السلام و رحمة الله و بركاته
و ينور عليك و شفت الحوار بتاعك
:)

فاطمة
======
يا ستي كل نشاطهم غرضه تحرير هذا البلد و هذا الشعب من الظلم و الإستبداد و الحكم بشرع الله سبحانه و تعالى المستقى من كتاب الله و سنة رسوله عليه الصلاة و السلام
فمن يرفض ذلك ؟
و ما السيئ في ذلك ؟

آميين ربنا يفك أسر كل المظلومين

سعيد بتعليقك :)

عاشقة الفردوس
==============
جزانا و إياكي
و الله هو حسبنا و نعم الوكيل نعم المولى و نعم المصير

مستجدة
======
آمييييييييييييين

فرنسا هانم
==========
آمييين من بقك لباب السما

غير معرف
========
شكراً

قسورة
======
و هو أيضاً كان يحب كل الناس
بارك الله فيك

آبي
=====
بصي يا غالية
أنا مش فاهم معنى جملتك الاولانية
هو في حد من الإخوان تعرفيه اعتدى على حرمة بيت تعرفيه ؟
أنا الاغلبية الساحقة من الإخوان المسلمين اللي انا اعرفهم هم من احسن الناس أخلاقاً
و صعب جداً تطلع من واحد منهم العيبة أو يتمسك عليه غلطة
أنا مش بأقول انهم ملايكة و ما بيغلطوش بس بأقول غلطهم أقل من غيرهم بكتير
و ده لا يمنع ان فيه استثناءات و كل قاعدة و لها شواذ

رسالتهم هي الحرية و الديموقراطية و الشفافية و الإصلاح
و الذي سيؤدي بالتالي لتحكيم شرع الله من كتاب و سنة و هما ما أمرنا النبي صلى الله عليه و سلم بالتمسك بهما بعده كي لا نضل
كما هو حادث الآن

و انتي مش عارفة هما بيعملوا ايه لأنك مش في دائرة نائبها من الإخوان المسلمين
فهم أنشط الناس في المعارضة في المجلس و الأكثر فضحاً للفساد و من المساندين دائماً للقضايا التي تهم الفئة المطحونة في الشعب و لو دخلتي موقع الإخوان المسلمين على النت و تابعتي أنشطتهم في كل المحافظات من أجل قضايا كثيرة فلسطين احداها و لو تابعتي نشاط كتلتهم البرلمانية من على موقعهم على النت و لو كنتي عايشة في دائرة نائبها من الإخوان المسلمين ما كنتيش سألتي هما بيعملوا ايه ؟

دوري على النت على المواقع دي و إدخليها و أنا حأحاول أديكي لينكاتها قريباً

أما ليه مهتم بيهم
فيا ستي لو تلاحظي أنا كاتب اني بأحب الإخوان المسلمين رغم اني لست عضو فيها لكن رغم كده ما إتكلمتش عليها قبل كده في المدونة
لكن لما يعتقل واحد بأعتبره زي بابا تمام و بأحبه جداً و الناس اللي تعرفه كلها بتحبه يبقى لازم اكتب عنه مرة و اتنين و تلاتة و عشرة
انتي ما تعرفيش غلاوة الراجل ده عندي قد ايه ؟

آفاق الحرية يقول...

السلام عليكم
معلش ياعم اسامة كلنا في الهوا سوا
جزاكم الله خيرا ياباشمهندس

بت خيخة وأى كلام يقول...

معنديش تعليق يا محمد بجد
اى كلام هاكتبه هيكون كلام اهب اوى
ولذلك افضل انى معلقش
بس عموما انات بدحرجلك التماسى وبقولك لازم تجيب ملاية يا كدة يا اما ممنوع الدخول البلوج بكرة من غير ملاية
بس بقى ها
سلام
اختك خيخة

appy يقول...

أنا مش فاهم معنى جملتك الاولانية
افهمك براحه يعنى لما اكون انا بنادى بالتدين يبقى لازم اراعى اهل بيتى الاول ومعرضهمش للاذى يعنى كل شويه امن دوله وزفت يبقى كده مش كويس يبقى انا بساعدهم يجرحوا حرمات بيتى هو ده قصدى ممكن ابقى صاحب رساله بس اولا احافظ على اهلى ازاى الناس دى بتقول هتحافظ علينا وهى ابسط حاجه مش عارفه تحافظ على بيوتها عارف ان حاجه مش صح او قانونيه وانا فى بلد لازم تحترم قانونها و تسيبها وتمشى عمل ليه اللى ضد القانون ده وارجع اقول بينتهكوا حرمات بيتى ومش بقول ان امن الدوله صح بس انا اقدر على نفسى مش على غيرى ومش معنى كده يسكت لا بيدعو بالدين بس فى اطار قانونى يا هندسه




رسالتهم هي الحرية و الديموقراطية و الشفافية و الإصلاح

اصلاح ايه اذا كان هما متفككين من جواهم ومش عارفين يحافظوا على نفسهم هى البلد هتتصلح كده ازاى يعنى طيب وايه اللى هيحصل مع المسيحين وباقى الديانات فكر شويه يا بشمهندس وانا مش ضدهم لو هيضمنوا ديمقراطيه اشك فيها لان هما بسم الله ما شاء الله فلوسهم ككتير يعنى مش حسين بالناس يعنى من الاخر الاخوان فلوسهم للاخوان وبس وابقى قابلنى لو حسوا بالشعب على فكرة اغلبيه منهم فى القاهرة الجديدة وعارفه الفيلات بتاعتهم ابقى تعالى ليه افرجك عاملين ازاى



و انتي مش عارفة هما بيعملوا ايه لأنك مش في دائرة نائبها من الإخوان المسلمين
فهم أنشط الناس في المعارضة في المجلس و الأكثر فضحاً للفساد و من المساندين دائماً للقضايا التي تهم الفئة المطحونة في الشعب و لو دخلتي موقع الإخوان

انا دخلت موقع اخوان الدقهليه بالصدفه لانى بتابع على فكرة المواقع دى لعلى وعسى اقتنع على طول وكدبتهم فى حادثه لانى كنت شاهد عليها هههههههه وللاسف سبت لهم بالادله الصح وشالوا التعليق وتقولى حريات انت طيب قوى على فكرة على فكرة برضه انا عندى محمامى حرامى من الاخوان فى الدقهليه ومعروف حياته ايه عارف المصيبه انه جارى ومش عاوزة اقولك بس برضه مش كلهم صح

على فكرة طلبت منهم انهم يرعوا مستشفى الامراض العقليه اكتر من مرة وراسلت ناس لان فى المستشفى محتاجين لكن للاسف لا حياة لمن تنادى


أما ليه مهتم بيهم
فيا ستي لو تلاحظي أنا كاتب اني بأحب الإخوان المسلمين رغم اني لست عضو فيها لكن رغم كده ما إتكلمتش عليها قبل كده في المدونة

بص لما انت بتحبهم ومقتنع بيهم قوى ليه مش منهم ليه منضمتش ليهم دى سهله قوى وعندهم استعداد تعرف تجاوب ولا اقولك انا هاااااااااا

بص يا بشمهندس انت عارف انا بحترمك قد ايه وعارفه انك ابن ناس قوى وطيب ومتدين بس المسلمين والمتدينين مش رمزهم الاخوان لا رمزهم الاسلام فهمت دى ولا ايه
بجد مش عاوزاك تزعلى منى خالص
وفى النهايه ربنا يفك اسر كل مظلوم وعلى كل ظالم

Desert cat يقول...

ستي كل نشاطهم غرضه تحرير هذا البلد و هذا الشعب من الظلم و الإستبداد و الحكم بشرع الله سبحانه و تعالى المستقى من كتاب الله و سنة ...
...........
اللى فوق ده ردك على فاتيما صح ؟؟؟
الناس يا حرام اللى دايبة فى تراب الوطن واللى بتقاسى الفلوس اللى بالمليارات اللى فى زيادة عندهم دى منين .. مسلسل الاعتقالات اللى مش بينتهى ده مش ملاحظ انه بقى مكرر وبايخ اوى ... ومش بايخ من الحكومة ... ده هما اللى بوخوه ... لانهم بيبلغوا على بعض بيستدروا عطف الناس وشفقتهم ... شوف يا حرام الاخوان بيتقبض عليهم ازاى ... وتبتدى دموع التماسيح اللى مبقتش بتخيل على حد .... بتقول لآبى مفيش حد من دايرتها اخوان ... طيب ما انا عضو دايرتى اخوان ... عمل ايه غير انه عمل لنفسه وافراج عيلته ... وهكرر لك الكلام ده تانى ... لما كذا كنا ندعوه فى جمعية رسالة للحضور كان بيعتذر .... ولما قولنا له حدد الوقت اللى يناسبك قال سيبوا لى رقم التليفون وم نالسنة اللى فاتت بيتصل لحد دلوقتى ... فى يوم اليتيم بعتنا له دعوة ... ولا كلف نفسه يعتذر ... واللى اقام اليوم وجاب للاطفال الايتام هدايه وعلى حسابه الخاص راجل عادى جدا وبسيط جدا جدا مالوش فى السياسة علشان متقولش يمكن يترشح فى الدورة اللى جاية ... بتقول لآبى كمن ادخلى موقع الاخوان وانتى تعرفى هما بيعملوا ايه ... طيب ده الموقه بتاعهم هيدخلوا يقولوا ايه غير انهم يمجدوا فى بعض بالكدب والنفاق ... معلشى يعنى سؤال .. ماهو هدف جماعة الإخوان المسلمين الذي قامت من أجله ؟؟؟
؟الإصلاح أم إرهاب الأخر وفرض الرأي عليه بالقوه ؟ حوار العقل ام حوار المدافع ؟ ثقافة الدين ام ثقافة البارود ؟ ان كان الغرض هو الإصلاح .. فلماذا تم إنشاء التنظيم السري أصلاً .. لماذا تم انشاء وحده عسكريه داخل تنظيم ديني دعوي إصلاحي ؟
طيب تعالى نفند افعالهم من اول حسن البنا لحد النهارده كدا ؟؟؟
مش عندك وقت ؟؟؟
انا عندى
في الثاني والعشرين من مارس /أذار من نفس العام 1948.. قام التنظيم السري بإغتيال قاضي مدني وهو القاضي أحمد بك الخازندار وهو يعبر الطريق على يد عضوي الجماعة حسين عبد الحافظ ومحمود زينهم اللذان عوقبا بالأشغال الشاقه المؤبده لكلاهما .. وقد تم إغتيال القاضي بعدما حكم في قضية كان احد أطرافها عضوا في جماعة الإخوان المسلمين
.............
خد التانى بقى
في الخامس عشر من نوفمبر/تشرين الثاني من نفس العام 1948 أمسكت الشرطة سيارة جيب بها مستندات تخص جماعة الإخوان المسلمين .. عباره عن مخططات تفجير و إغتيالات .. ومستندات كل عمليات التفجير التي تمت في الأونه الأخيره فضلا عن بعض القنابل والمتفجرات .. والأهم من ذلك القبض على ثلاثه من رجال الإخوان كان أهمهم مصطفى مشهور أحد الخمسه المؤسسين والمسؤولين عن التنظيم السري بالإضافه لأحمد عادل كمال وأخر .
لسه فى تانى استنى
في الرابع من ديسمبر / كانون الأول من نفس العام 1948 جرت مظاهرة بكلية الطب بجامعة فؤاد ( القاهره ) فقاد اللواء سليم زكي - حكيمدار شرطة القاهره - قوات الأمن لفض المظاهره .. وإذا بطالب ينتمي لجماعة الإخوان المسلمين يلقى عليه بقنبلة من الطابق الرابع فسقطت أمامه فمات على الفور
في صباح يوم الثالث عشر من يناير / كانون الثاني عام 1949 قام شفيق أنس أحد المنتمين لجماعة الإخوان المسلمين بحمل حقيبه وذهب بها إلى محكمة الإستئناف بباب الخلق بوسط القاهره .. وإدعى بأنه مندوب من إحدي مناطق الأرياف جاء بقضايا للعرض على النائب العام .. وترك الحقيبه في المكتب بداخل المحكمه وذهب بحجة تناول الإفطار .. وبعدما غادر المكتب بدأت شكوك الموظفين بالمكتب حول الحقيبه .. فتم إستدعاء الأمن .. أخذوا الحقيبه خارج المحكمه وانفجرت بالشارع العام .. وبعد القبض على شفيق أنس أعترف بأن الغرض من التفجير كان نسف المحكمه وذلك للتخلص من أوراق ومستندات قضية السيارة الجيب ... وكان ذلك بأمر من سيد فايز مسؤول التنظيم .

دى النشأة وأظن من شب على شئ شاب عليه ... ولا اللى بيحصل من حماس هايل وعاجبك دول بيقتلوا فى الفتحاوية وسايبين اسرائيل ... ولا مجازر الجزائر دى كمان عاجباك ... إن كانوا دعاة للخير فلماذا يقتلون كل من إختلف معهم أو حاول حتى ان يختلف معهم .. ان كان المرشد هو من يعطى الأوامر بالقتل في سبيل الوصول للسلطه .. فلماذا قال عن رجاله الأشداء .. ليسوا إخواناً وليسوا مسلمين .. ؟؟؟

مهندس مصري يقول...

آفاق الحرية
===========
و عليكم السلام و رحمة الله و بركاته
:)

بت خيخة و اي كلام
=================
يعني ايه ؟
اى كلام هاكتبه هيكون كلام اهب اوى

مش فاهم
يا ريت توضحي
انتي في حروف وقعت منك

آبي
=====
أنا بأحب كتاباتك و مدونتك و بأحترمك
بس مش حينفع نتكلم كده
ياريت تضيفيني على الماسنجر و نتكلم مباشرة
wildfire22111@hotmail.com
wild_fire_22111@yahoo.com
و أنا مستعد لنقاش و تقبل أرائك بكل موضوعية و هدوء و بدون زعل
:)

أما حتة يحترموا قانون البلد فهما محترمينه بدليل انهم بيأخدوا براءة من أول جلسة في أي محكمة سواء الجنايات العادية أو حتى محكمة أمن الدولة العليا طوارئ
دايماً بيأخدوا براءة لأن مفيش تهمة في القانون اسمها عضوية جماعة الإخوان المسلمين و كل ما يفعلوه يندرج تحت حرية الرأي و التعبير
و عمرهم ما إتحبسوا في عهد مبارك غير في محاكمات عسكرية بأوامر من رئاسة الجمهورية مباشرة
يعني في محاكم غير عادلة و لا مستقلة
و ده رأي نادي قضاة مصر نفسه
ايه غير القانوني في دخولهم انتخابات المحليات ؟


و عموماً هما بشر مش ملايكة
يعني فيهم الغني و الفقير
و الكويس و الوحش
و مش لازم نعمم واحد أو اتنين على الكل
أنا أعرف اخوان مسلمين وحشين و عار على الإخوان
و أعرف أضعافهم ممتازين

أما ليه ما انضمتش ليهم فدي حكاية طويلة قوي مش مكانها هنا و ممكن أحكيها لك على الشات
:)

اما وضع المسيحين حيكون عادي جداً طبقاً لأحاديث الرسول صلى الله عليه و سلم انهم يتعاملوا أحسن معاملة لأنهم في عهد المسلمين و ذمتهم و لو حصل لهم حاجة ربنا حيحاسب اللي يئذيهم حساب عسير

و طبعاً حذفهم لتعليقك في الموقع اللي قولتي عليه غلط و أنا مش حأقاوح في دي

و أنا عموماً بأحب الإسلام
و بالتالي بأحب الإسلاميين أياً كانوا سواء اخوان أو سلفيين أو غيره
و ليا أصحاب سلفيين و أصحاب إخوان غير أصحابي العاديين
بس المهم انه يكون بيدعو لكتاب الله و سنة رسوله صلى الله عليه و سلم بالحق بدون تطرف و لا تعصب

يعني مثلاً عمري ما حأحب التكفير و الهجرة اللي مكفرين المجتمع كله و بينادوا بقتل كل من يخالفهم

دول هما اللي مجرمين و ارهابيين
انما كل من يدعو الى الله بالحسنى على عيني و راسي من فوق

عموماً الكلام كتير و مش حيخلص في تعليق
ضيفيني و نبقى نتناقش في كل حاجة
:)
و أنا برضه ما زلت بأحب مدونتك و بأحترمك

و مؤمن بجد ان الخلاف في الرأي لا يفسد للود قضية و لو تناقشنا بموضوعية و هدوء حنوصل للرأي الصح و نقتنع بيه احنا الإتنين
و لو معرفناش نقنع بعض يبقى فهمنا بعض أكتر و برضه نفضل نحترم بعض
يا غالية :)

مهندس مصري يقول...

قطة الصحراء
============
بصي عضو الدائرة عندكم مقصر في اللي انتي قولتيه
كان الله في عونه و عنك و عون كل اهل الخير

التنظيم السري كان هدفه تحرير مصر من الإحتلال الإنجليزي و الجهاد في فلسطين ضد الإنجليز و الصهاينة و لما قائد التنظيم السري عمل العمليات الإرهابية دي ضد مصريين عوقب داخل الجماعة و لكن تم الرأفة به على أساس انه أخطأ فهم أوامر المرشد العام حسن البنا
و ان كنت ارى شخصياً انه (قائد التنظيم السري ) مجرم و كان يجب عقابه بالقانون
و الذي تبرأ المرشد من فعلتهم في مقالة ليسوا اخواناً و ليسوا مسلمين
تبرأ من من ارتكبوا أعمال اجرامية و ليس كل الجماعة
و مصر أيامها كانت مليانة تنظيمات سرية على كل لون
و ما تنسيش جهاد الإخوان في فلسطين من سنة 1947 لحد منتصف 1948

و عموماً ده تاريخ لكن السؤال المهم هل ليهم تنظيم سري مسلح دلوقتي
لا ملهومش

هل بيخالفوا القانون
ما عدا قانون الطوارئ طبعاً
لا ما بيخالفوش


أما خلطك للأمور في فلسطين
أمريكا لسه متسرب منها وثائق تؤكد ان دحلان العميل الخاين كان بياخد أموال و سلاح من أمريكا علشان ينقلب على حماس الحكومة المنتخبة شرعياً
و حماس بس قضت على عناصر الإنقلاب ضد الحكومة اللي اختارها أغلبية الشعب الفلسطيني في انتخابات حرة
و حماس هي اللي متمسكة بحقوق الفلسطينين مش زي عباس الخاين اللي عايز يبيع القدس و القضية كلها مقابل منصبه الواهي و سلطته الضعيفة

أما مذابح الجزائر فما اقدرش اقول ان جبهة الإنقاذ الإسلامي اخوان و لا لأ
لأني ما أعرفش و ما أحبش افتي في اللي انا ما اعرفوش
بس لو تفتكري المذابح بدات من الجيش لما لغى نتائج الإنتخابات الحرة اللي فاز فيها الإسلاميين بإكتساح

Desert cat يقول...

سيبنا من الرد الاخير لانك قولت بالفعل انك مبتعرفش وانا مش هتناقش فى حاجه حضرتك مبتعرفهاش
قولت ان حسن البنا قال ليسوا اخوانا وليسوا مسلمين عن ناس هو اتبرى منهم
يعنى اللى بينكشف افعالهم بيبتروا منهم هنا بس عرفت حل اللغز ورا كل اخوانى يدخل يتكلم ويشتم فى خلق الله وفى الاخر يقول انا مش اخوانى ... طيب حسن البنا مات مع السلامة ... بس تقول ايه فى تصريح مهديكو عاكف بأنه جاهز بعشرة آلاف جندي لارسالهم إلي فلسطين أو لبنان للحرب ... طيب معلشى سؤال بيلح عليا اوى ... الجنود اللى دربتهم وسلحتهم من أعضاء جماعة الإخوان المحظورة؟ ما هو اكيد مهدى عاكف مش هيدرب علمانيين يعنى ... طيب وده مش معناه ان للجماعة جناح عسكرى مجهز ومدرب جدا للقتال ؟ طيب ودربهم فين ؟؟؟
طيب وياترى اللى دربهم خبراء عسكريون ؟وهل الخبراء مصريون؟ طبعا يستحيل أن يكونوا من العسكريين المصريين السابقين. والأكثر احتمالا أن يكونوا من العائدين من أفغانستان. أو من معسكرات تدريب أسامة بن لادن في السودان؟؟! وهل انقلبت جماعتك إلي جماعة "مسلحة". بدلا من كونها جماعة "محظورة"؟
وإذا كنت قد جهزت هؤلاء وسلحتهم علي أرض مصر. وفي معسكرات أقمتها علي أرض مصرية. فكما تعلم فإن هذا خروج عن القانون؟ ليس هذا فقط بل أنك تكون خرجت عن مبادئك ..... معلشى ده كلام مهديكو عاكف انا مجبتش حاجه من عندى ...
تسمى ايه المظاهرات فى النقابات والنوادى وخناقات الانتخابات وحرب "السنج" والسيوف. وطلاب جامعة الازهر ليسوا ببعيد الميلشيات والتخفى ورا اقنعة ... هو ده ما اسموش ارهاب باين ...
مش عاكفكوا باين اللى قال "طظ" في مصر وشعب مصر وأبومصر. فمصر وشعبها وحكومتها لا تهمه في شيء.
وسلم لى على الشرفاء

همس الاحباب يقول...

يلا هندسة ربنا يطمنئك عليهم
ويكفيك شر قطة الصحراء وابى
ولا حول ولا قوة الا بالله

مهندس مصري يقول...

قطة الصحراء
==============
أولاً انتي بتتحاوري بعدائية غريبة رغم ان مفيش داعي للنرفزة و التريقة
ثانياً ايه مهديكو دي هو حد قالك ان انا اخوان و لا انا اشتريته مثلاً فبقى بتاعي
اتكلمي باسلوب احسن من كده لو سمحتي

ثالثاً كل التحقيقات اللي عملتها الثورة في الخمسينات ايام عبد الناصر في الكلام ده و على يد النيابة العامة مش الجيش أثبتت اللي بأقوله لكي ده
ان حسن البنا ما كانش يعرف و لما عرف تبرأ
مش لما انكشفوا

بعدين انتي بتبني هرم من الهواء
دربت مين و سلحت مين
ليه هوا الإخوان ما بيتجندوش في الجيش المصري و يتدربوا فيه في مدة التجنيد الإجباري
اللي كان بيتكلم المرشد عليهم هما اللي اتجندوا و اتدربوا في الجيش المصري عادي زي أي واحد و ممكن يروحوا يجاهدوا لو اتفتحت الحدود
جات اوت منك دي
:)
و المظاهرات بتاعتهم كلها سلمية
و في الانتخابات الأخيرة لمجلس الشعب كان الحزب الوطني جايب بلطجية مسلحين بالشوم و السنج و السيوف و الإخوان عزل
و كان الأمن المركزي بيحمي البلطجية و شفت بعيني محدش قالي و الجزيرة صورت على الهواء مباشرة و مع كده تم أسر بعض البلطجية و لقوا معاهم أكل محفوظ و جبن و معلبات مكتوب عليها خاص بوزارة الداخلية
و عرفنا ان البوليس طلعهم من السجن مخصوص علشان الانتخابات و التلفزيونات صورتهم ايامها
و طلبة الازهر كان بيعملوا استعراض الكراتيه ده سنوياً و عمرهم ما أذوا حد و اللي زاد سنتها القناع بس الحكومة هيا اللي هولت الموضوع

و صحفي نرفز عاكف فقاله طظ في مصر في سياق الكلام و كان عن القيود غير الدستورية اللي بتفرضها الحكومة على الإخوان

ما أنا لما باتخنق بأقول الله يخرب بيت دي بلد
ايه حتمسيكي لي على كلمة في ساعة نرفزة
كام واحد في مصر و هو مخنوق بيشتمها و هو من جواه بيحبها

و سلامك حيوصل ان شاء الله
:)

همس الأحباب
==========
آمين
و مفيش شر و لا حاجة
آبي دي زي العسل
و قطة الصحراء هيا اللي نرفوزة شوية بس لما بتروق بتبقى 100 مية

بحبك يامصر يقول...

ايه يا جماعه فى ايه؟
ك ده عشان البشمهندس اهتم بخبر اعتقال راجل هو بيحبه عالعموم الاختلاف فى الرأى لا يفسد للود قضيه ولا كلكم بتقولوا الكلمه دى كلام وخلاص؟
يا جماعه الصح باين والغلط باين وكل واحد يروح للمكان والفكر اللى يريحه دنيا واخره
انا زى البشمهندس مش من الاخوان لكن بحبهم بحس ان الاخوان هما اللى عندهم ايجابيه وبس انا واحد من الناس اتعرض عليا انى ارشح نفسى فى المحليات والنجاح شبه مضمون لكنى خفت الحقيقه انا فعلا خوفت لان ابن عمى اخوان وانا بتصنف فى المنطقه دلوقتى على انى اخوان فانا خوفت احسن ابهدل ويخدونى على امن الدوله
بالرغم من ان ابن عمى معتقل من اسبوعين ولكنى برده خوفت يبقى من الواضح ان الاخوان هما اللى ايجابيين والباقى ........؟
يارب فك كرب كل مكروب

Desert cat يقول...
أزال المؤلف هذا التعليق.
Desert cat يقول...

طبعا الرد الاخر كله تضليل والصغير قبل الكبير عارف الحقائق
بالنسبة
اتكلمي باسلوب احسن من كده لو سمحتي
فده العادى وقت الزنقة او وقت الكلام المحفوظ ما بيخلص تسميعه
عادتكوا ولا هتشتروها
عموما كدا الرؤية وضحت اوى
وعقبال الباقى ان شاء الله لما يعتقلوهم ونخلص منهم

Desert cat يقول...

ثم بتكلم بعداء شديد لمين لبتوع التلات ورقات الميلونيرات اللى بيدعوا الشرف والنزاهة ... عموما المدونة دى فاحت ريحتها اوى ومدونات الاخوان بصراحة بتبقى كلها شغل تمثيل وجلا جلا وبالتالى مش يشرفنى ادخلها تانى

الفاتح الجعفري يقول...

بعد اذنك هاارد علي استاذه اابي
اولا يااابي مفيش حاجه اسمها اساعدهم انهم يجرحوا حرمات بيتي طالما ليه قضيه باادافع عنها مابالك اذا كنت اطلب ان يحكم شرع الله عزوجل ,وكل اصحاب القضايا في العالم كله حصل ليهم كده من اجل قضاياهم وحدث للصحابه رضوان الله عليهم وما حدث لاال ياسر فلماذا لم ينهاهم النبي ويقول لياسر رضي الله عنه حافظ علي حرمة بيتك بل قال له الجنة موعدنا ال ياسر
وبعدين مخالفة قانون ايه ,اي قانون قانون يحمي المجرمين قانون ظباط الشرطه اللي بيغتصبوا النساء ويعذبوا الرجال لااعمم بس اين القانون القانون الذي يخالف قانون رب العالمين في اقامة شرعه واحكامه
ثانيا مفككين ازاي؟
طبيعي انك ممكن تلاقي داخل اي مجموعه خلافات ولكن تفكيك اي تفكيك ممكن حد ينفصل وينشق وقد حدث مرارا في التاريخ حتي بين الصحابه انما كلمة تفكيك دي توحي بحروب وانقسامات وهذا لم يحدث بل عكسا تجدي بينهم ترابط قوي جدا جدا يختلف عن اي مجموعه عمل او حزب قائم وهو ده اللي مخوف الامن من الاخوان زائد التنظيم داخلهم منظم جدا بل ان جماعة الاخوان المسلمين بتقارير المخابرات الروسيه والامريكيه والمصريه هي اصعب الجماعات اختراقا من الداخل وقد حاولت المخابرات المصريه وغيرها بلا تفصيل ان يخترقوا جماعة الاخوان المسلمين من الداخل ليقضوا عليها ولكنهم باؤوا بالفشل الذريع لقوة التنظيم الداخلي للاخوان وهذا بفضل الله ليس الا
-----
وقد ناقشتك ياابي من قبل وهناقشك تاني في النقطه دي لانك استدللتي بحادثه فرديه وحوادث التعميم دائما فيها ظلم انك بتتكلمي عن مجموعه بشكل عام والحادثه دي معاكي انها خطأبس اين الخلل في منهج الاخوان منين جبتي انهم ضد الحريات لاستشهادك بحادثه واحده ولم يتعرض احد لكي فيها بالاذي وكيف جماعه تعتقل وتدمر ومتربص بها هي اصلا لاتملك الحريه لنفسها كيف ستمنحها الان في هذه الظروف فلا تسبق الاحداث,
-------
اولا برده انتي عملتي حاجه غلط جدا ياابي وده من وجهة نظري علي الاقل ممكن يكون كلامك صح علشان متقوليش اني بااحكم
طبعا المسلمين المتدينين رمزهم الاسلام مش الاخوان
ايه الخطأ بقي انك وضعتي الاسلام كمنهج شامل كامل متكامل قرآن وسنه وتريعات في كفه وجماعه الاخوان في كفه
طيب شوية اسئله
ايه وجه الشبه بين منهج ومجموعه؟
ايه الاخطاء العقائديه اللي لمستيها فافرقتي بين الاخوان والاسلام؟
ايه هو منهج الاخوان المناقض للاسلام فيمنع اي مسلم ملتزم من الدخول لهم؟
-------
عذرا ياابي انا لااحرجك والله العظيم بس ,وهجاوبلك ,الاخوان لم يحصروا الاسلام في انفسهم بل هم مجموعه اخذت من منهج الاسلام دليلا لها وقائدا ومرشدا لهم اجتهاداتهم الفقهيه في ضوء القران والسنه واي حد يختلف معاهم له ذلك لان التشريع الاسلامي تشريع واسع شامل مفتوح لايلزم مجموعه بعينها اي كانت فمن اراد ان ينضم للاخوان له ذلك ومن اراد ان لاينضم له ذلك فلا الاخوان يحتكرون الاسلام وبهذا انتي تظلمي 2,5 مليون مسلم من الاخوان في مصر واكتر من 4 مليون في اليمن غير وجودهم في اكثر من 45 دوله فهل كل دول وكل دول وكل الاخوان رمزهم الاسلام وليس الاخوان فما هكذا تورد الابل يااابي فرقي بين منهج وجماعه
ثانيا
ليس للاخوان منهج فقهي او عقائدي شاذ عن باقي الامه فمنهجهم هو منهج اهل السنة والجماعه ومذاهبهم هي المذاهب الفقهيه الاربعه وزيهم زي اي مسلم طبيعي منهم اللي بياخد المذهب الشافعي واخر مالكي والثالث حنبلي وغيره ,ولهم اجتهادات زي اي حد غير ان الشعب فصائل عندك علمانيين وملحدين وشيوعيين وسلفيين واخوان وناصريين وناس عادي ملهاش في كل ده ,انا فقط اقصد ان محدش يقدر يحتكر الشعب او الاسلام
-------------------------
نأتي بقي لقضيه فلسطين
بصي يااابي في حديث عن النبي يقول فيه (من لم يهتم بأمر المسلمين فليس منهم)
وانظري الي فقه الجهاد في الاسلام الاسلام يااابي وليس الاخوان بيقول ايه بقي فقه الجهاد
اذا دخل عدو او قام عدو بمهاجمة ارض اسلاميه وجب علي اهل البلد ان يدافعوا عنها (وجب اي فرض عين مثله مثل الصلاه والزكاه وباقي الفروض)وان لم يستطع اهل البلد دفع الضرر وجب علي اهل البلاد المجاورة فأذا عجزوا وجب علي كل مسلم في سائر بقاع الارض الدفاع عن الارض المسلمه
وهذا الجهاد يسمي جهاد الدفع لان الجهاد نوعين
جهاد دفع
جهاد طلب
جهاد الدفع فرض عين علي كل مسلم ومن قصر عنه فهو مقصر في الدين ويحاسب امام الله عزوجل ومثل جهاد الدفع اليوم هو اي ارض اسلاميه محتله ,طيب ولو اهلها تركوها عارف انك هتقولي ,هااقوليك ولو تركوها جميعا وهربوا لان الارض لله عزوجل وجب علي المسلمين استردادها وحكمها في الاسلام يسمي الارض المغنومه التي فتحها المسلمين صلحا او حربا وتصبح ارض ملك للمسلمين وهي وقف عليهم اي يجب ان يستردوها مهما كان ومثلها ايضا فلسطين والعراق واي ارض اخذت منهم وتخيلي اسبانيا ايضا والبرتغال وكانت تعرف بأرض الاندلس وحدث بها مثلما حدث في فلسطين
----
اما جهاد الطلب وهو فتح البلاد ونشر الدعوه ويسمي جهد نشر الدعوه وهو فضل ليس علي كل مسلم ان يؤديه
-------------
ليه بقي ان فصلت علشان تعرفي ان ده مش واجب علي الاخوان ده واجب علي كل مسلم ولو الاخوان تقاعسوا فيه يأثموا مثلهم مثل اي مسلم لايكلف الله احد دون احد وكل مسلم مكلف فأن قصروا حملوا الوزر وبعين كل الامه تناد بتحرير فلسطين حتي الشيعه وحزب الله يفعلون ويجدون من اجل تحرير فلسطين يااابي فلسطين والعراق قضايا امه كامله لانفصلها بحال
وطالما يذبحوا ويقتلوا وجب علينا مناصرتهم ولهم الاولويه في ذلك
اما الاخوان فنصيحتي ان تقراي عنهم اكثر وتنظري في مناهجهم ولاتقولي اكيد مناهجهم فيها دفاع عنهم ماطبيعي برده المناهج اللي تخالفهم فيها هجوم عليهم ولا ايه المهم من كلامه اوقع واقرب للعقل والمنطق
-------------
اسف جدا لو كنت طولت عليكي او ضايقتك بس انا عارف انك دائما تبحثي وتحاولي الوصول للحقيقه وربنا يبارك فيكي ويعزك
وجزاكم الله خير

مهندس مصري يقول...

بحبك يا مصر
===========
علشان تعرف يا سيدي الفرق بين اللي بيقول الكلام و بين اللي بيطبقه
الإختلاف في الرأي لا يفسد للود قضية لمن كانت نفوسهم صافية و يتناقشون و يتحاورون بإحترام للتوصل للحقيقة و ليس للإنتصار على الآخر
و أديك شوفت قطة الصحراء اللي باعتبرها أختي و عمري ما غلطت فيها علشان اختلفت معايا في الرأي عملت فيا ايه من غير ما اغلط فيها و كل اسئلتها رديت عليها

قطة الصحراء
============
هاتي دليل على ان ردي كله تضليل
و لا هو كلام و خلاص
انتي سألتي و انا رديت
ايه لازمته الغلط ؟

و بعدين انتي شايفة ان اسلوبك ده كده صح

أنا حأشهد عليكي المدونين
و بعدين هو انا لازم أقول آميين على كلامك الغلط في حق الإخوان و الا ابقى إخوان
أنا مش اخوان بس بأحبهم و انتي حرة تصدقى أو لأ
تهمة لا أنفيها و شرف لا أدعيه

و مش عارف ريحة ايه و فاحت ازاي
دي الفاظ و ده مستوى حوار و أنا ما غلطتش فيكي يا بنتي
كل ده علشان ما عرفتيش تردي بالمنطق على الحقائق اللي في ردي

تشتميني و تتهميني و تعملي هليلة
الله يسامحك
الله يسامحك
الله يسامحك
أنا ما أجبرتكيش على الإقتناع بحاجة و كان ممكن تسكتي و نفضل أصحاب بس مش عارف عملتي كده ليه
:(

الفاتح الجعفري
================
اعتبرها مدونتك و رد براحتك يا باشا
على الأقل انت عضو في الإخوان و اعرف اللي أنا ما اعرفوش و أكيد تعرف ترد احسن مني في الموضوع ده

الفاتح اليعقوبي يقول...

السلام عليكم
الهندسة كلها ربنايكرمك يارب ويفك اسر من كل من ظلم او اعتقل بسبب طغيان الاخرين وي الغالب الاعتقالات شغالة علي ودنه اليومين دول ماشاء الله اللهم اهدهم واهدنا لاشئ ي الدنيا يستحق ان نظلم من اجله احد
وربنا يك اسر كل اخواننا المعتقلين يارب

الي استاذة قطة الصحراء
ربنا يكرم حضرتك يااستاذة فقط اري انك متاملة علي الاخوان في تعليقاتك حتي في المدونات الاخري
يااستاذة كلام حضرتك ذكره السيد الغير فاضل المدعو رفعت السعيد ومااري الا انه رجل يداري فشله وقهر الاخوان له ولامثاله في السبيعنيات والثمانينات فكان من الطبيعي ان يسب ويلعن في سلسافيل الاخوان
يااستاذة لما ذكرتي الاتهامات كلها التي وجهتها الي الاخوان ولم تذكري تاريخهم في قتال الانجليز ومدي اجادتهم ووطنيتهم في هذا الامر
بل لما تذكري جهادهم ضد الصهاينة في فلسطين ومحاصرتهم للقدس وبها مئة الف صهيوني ووقتها ضربت الهدنة المشبوهة والتي تم بمقتاضها اعتقال الاخوان في ارض الجهاد وغلق شركاتهم واعتقال ذويهم في مصر ورجوعهم الي مصر بدلا من ان يكرموا اعتقلوا فكان رد فعل شاب من الاخوان ان قتل النقراشي باشا رغم تورطه هو والملك عبدالله ولم تيحرك الاثنان الا باوامر مباشرة من رئيس وزراء بريطانيا والذي امرهم يها بالهدنة رغم انتصارات العرب وقتها وامرهم بسحب المتطوعين من ارض المعركة

وهذا وارد في مذكرات الجنرال كلوب القائد العسكري للقوات العربية في حرب 48
وكان اسمها كنت جنديا مع العرب


وكان رد فعل احد شباب الاخوان وقتها اغتيال النقراشي باشا وهذا خطا ورفض وقتها الامام البنا هذا الفعل ونقده

طيب سؤال ليه بس بنذكر عميليات الاغتيال التي قام بها الاخوان رغم قيام العديد من الحركات الوطينة لعمليات اغتيال مماثلة
ليه ببنكر دورهم مثلا في الثورة ولا نذكر فضلهم فيها وبنذكر مساؤهم فقط فكل الحركات الوطنية لها اخطاء والا لاصبحنا جميعا ملائكة
يااستاذة كل واادخل في مدونة اجدك تتحدثي عن الاخوان وفلوسهم الكتير
سؤال بسيط
هو الفلوس الكتير حرام ولا حاجة؟؟؟
فلوس الاخوان بس هي اللي تتلم انما فلوس اليهود ومشروعاتهم فمستحيل تتقفل ابدا

وهناك الكثير من الاخوان فقراء وهناك ايضا الكثيرين اثرياء واعلم والله اخوة لايجدوا اموالا ياتوا بها الي الجامعة واخ اعرفه والده من اثرياء مصر ماشاء الله وده عادي مع ده وهذا مايميز الاخوان

ليه لو في اخوان معاهم فلوس بنعتبرهم مستغلين لماذا لانعتبرهم ناجحين ؟
يااستاذة مادام هذه النقود ليست من حرام فما الحرج ان يكونوا اغنياء
مش حرام والله
يااستاذة لاتجمعي كل الاخوان في قفة واحدة واعتقد والله اعلي واعلم ان احد الاخوان ضرك او جرحك في شئ فكونتي كلامك علي هذا فكرهتي كل الاخوان لهذا


واسف وان كنت لااري لنرفزتك وعصبيتك سبب واضح وان كنت لايشرفك ان لا تزوري مدونات الاخوان فالاخوان يشرفهم انك تزوري مدوناتهم
والسلام

مهندس مصري يقول...

الفاتح اليعقوبي
=================
يشرفني ردك و تعليقك عندي دائماً
و انا ما كنتش اعرف الخلفيات التاريخية لإغتيال النقراشي و ارتباطه بقضية فلسطين رغم خطأ الغغتيال و انه جريمة شنيعة
أفادكم الله

الفاتح الجعفري يقول...

انا بس هاارد علي شوية كلام نشر في التعليقات يابشمهندس
الناس يا حرام اللى دايبة فى تراب الوطن واللى بتقاسى الفلوس اللى بالمليارات اللى فى زيادة عندهم دى منين .
---------------------------------
اه طيب وعدد فلوس الاخوان اللي بالمليارات ده كام؟
ممكن تعرفي ارصده الاخوان في البنوك ولا هو كلام وخلاص.
طبعا المحكمه مبرئاهم 3 مرات في قضايا غسيل الاموال وغيرها والناس المعتقلين من رجال الاعمال واصحاب الشركات الكبار جدا زي الاستاذ خيرت الشاطر والاستاذ عبد الرحمن سعودي والاستاذ حسن مالك وطبعا شركاتهم هي مصدر اموالهم
ولاعندك مصدر تاني
يبقي قوليلي المصدر وادلتك
وعدد فلوس الاخوان كام بالظبط
وعرفتي منين؟
-------------------
مسلسل الاعتقالات اللى مش بينتهى ده مش ملاحظ انه بقى مكرر وبايخ اوى ... ومش بايخ من الحكومة ... ده هما اللى بوخوه ... لانهم بيبلغوا على بعض بيستدروا عطف الناس وشفقتهم ... شوف يا حرام الاخوان بيتقبض عليهم ازاى ... وتبتدى دموع التماسيح اللى مبقتش بتخيل على حد
---------------------------
طيب بالله عليكي ده كلام يعقل او حد يصدقه في الدنيا ,مش كده يبقي حضرتك بتلقي اتهامات جزافا وبدون ادله وبصراحه كلام محدش يصدقه ابد ولا حتي يعقله او ييجي في مخيلته !!!
اه بس عرفتي منين انهم بيبلغوا علي بعض المفروض الحكايه دي تبقي سر صح ؟
خير الله المستعان
-----------------------
طيب تصدقي بالله ان علي طول في العيد الكثير من الاخوان يجيبوا هدايه للاطفال وفي منهم كثير جدا بيروح دار الايتام غير ان في دار رساله اللي عندنا اخوان كتير جدا داخلين فيها ,ولو الراجل اللي عندك عمل كده يبقي غلطان طبعا ,انما عندك اهو العضوا اللي عند البشمهندس رجل بيخدم الناس والناس بتحبوه جدا جدا واعضاء مجلس شعب كتير جدا كده بس في حالات فرديه ومحدش قال ان الاخوان انبياء او معصومين
---------------------------
طبعا كل الاتهامات اللي انتي جايبها كل الناس عارفه بتساق من انهي مصدر
رفعت السعيد (كتاب الاخوان المتأسلمين )
رفعت السعيد اللي واخد 3 دكتوراه في الشيوعيه واحد اقطاب الشيوعيه في الشرق الاوسط
اولا انا هااردعليكي براحه جدا اولا اه كان في تنظيم سري للاخوان سنة 1948 وده وقت اما كانت مصر دوله محتله وكان لجميع الاحزاب في هذا الوقت او لمعظمها تنظيم سري اذا كان ياسيدتي الفاضله تنظيم الظباط الاحرار نفسه كان تنظيما سريا ومعظم الظباط الاحرار كانوا متورطين في قضايا اغتيالات وايه رايك في السادات ,وكان ايضا الاخوان المسلمين يجاهدون بقوة في منطقة القناة وكان لهم اتصالات مباشره مع الظباط الاحرار وشاركوامعهم في التمهيد والقيام بالثورة وارجعي الي خطابات عبد الناصر قبل 1954 واشترك الاخوان بحوالي 10الاف مقاتل في حرب فلسطين 1948 وشاركوا بقوة في فك حصار الفالوجه لولا ان قبض علي الكثير منهم وهم علي خط النار واعتقلوا في ذلك الوقت ,اما حوادث الاغتيالات التي ذكرتيها فطبعا حوادث كلها ملفقه وكانت التيارات الموجوده في ذلك الوقت تصطدم فيما بينها وكان يفعل ذلك كله القصر الملكي حتي يوقع الاحزاب فيما بينها وكانت هكذا سياسته مع جميع الاحزاب الموجوده ,والا لماذا لم يفعل هذا الاخوان منذ عودتهم بقوة في اوائل السبعينيات الي الان ها هي اين القضايا رايحه تأتي بقضايا في الاربعينيات في وقت كنت مصر علي صفيح ساخن وكان الاخوان علي خطوط النار في فلسطين والشيوعيين والاشتراكيين اشباه الرجال ملقحين بيخربوا في البلد مع القصر الحاكم ,وكلها قضايا ملفقه في ذلك الوقت ليتخلصوا من الاخوان ولكن ابي الله ذلك ,انما في عصرنا وبعد الثورة الي الان اين قضايا الاغتيالات ولماذا لم يتورط الاخوان في اي قضية اغتيال واحده منذ ذلك العصر حاولي تكوني وقعيه وبلاش كتب الشيوعيين والناس دي ابحثي عن كتب ناس شاهده علي العصر ومنصفين شوفي واحد زي انيس منصور وعلي امين وغيرهم علي الاقل كانوا بيكتبوا الواقع انما رفعت السعيد واحد شيوعي موجود اصلا علشان يرجع امجاد الشيوعيه من جديد وهذا ما لن يحدث بأذن الله وسيحكم شرع الله وستكون خلافة علي منهاج النبوة الراشده ,علي اي حد سواء اخوان سواء سلفيين سواء حزب وطني ولكن لابد ان تكون خلافة علي منهاج النبوة الراشده
----------------------------
كويس جدا بقي انك روحتي لفتح وحماس
لانها اكثر مااضحكني
وعلشان الناس تري مدي التباس الامر
حماس تكون الحكومه الشرعيه في فلسطين بااكتساح وانتخاب الشعب لها
فتح تسحب جميع الفلوس الموجوده في الحكومه وكانت مليارات بحجه انها لمنظمه التحرير اللي هي فتح
فتح تعترف بالكيان الصهيوني
حماس لاتعترف بهذا الكيان
العالم يمنع معوناته عن فلسطين وعن حكومتها المنتخبه
وحماس تصمد
فتح وابو مازن يضعوا ايديهم في يد اليهود وحماس تصمد
يوقعون اتفاقية انابوليس المخزيه وترد اسرائيل علي فشلهم بمنتهي الوقاحه وحماس تصمد
فتح تنقلب علي حماس ولكن هيهات وكيف يااستاذه تنقلب حماس علي فتح وهي اللي معها الحكومه في حكومه بتنقلب علي نفسها ولا ايه
المهم تدخل حماس مكتب الامن الوقائي لتكتشف حقائق مخزيه اذيع بعضها فقط بالادله مما جعل موقف مصر في منتهي الحرج
منها انهم امسكوا اوراق تثبت تجسس فتح علي مصر
ودلائل لتهريب فتح الاسلحه لبدو سيناء ودلائل لتهريب فتح المخدرات وبيعها للبدو غير الفضائح الكبري
غير استشهاد الكثير من قادة حماس وابنائهم ومقاومتهم العنيفه في فلسطين ولا انتم بتنقدوا مقاومتهم ولا علشان قالوا حركة مقاومه اسلاميه ولا ايه
--------------------
لا كلام الا بالدلائل وكفي الكلام المرسل المطلق الكريه
المليء بالتطرف والحقد
بلاش منهج الاخوان اين منهجكم المأخوذ من الكتاب والسنه عايز اعرف خلاص الاخوان اسلوبهم وطريقتهم وحشه فين طريقتكم انتم فين دلائل اصلاحكم ,اشرحيلي منهجكم في الاصلاح
--------------------------
اما القبض والسب وعدم وجود لفه للحوار فالافضل متتعبيش نفسك وتكتبي لان هذا سيضعف من موقفك
لان التطرف لايعرف لغه او دين او ناس
بل من يتهمون الناس بالتطرف قد يكونوا هم الاكثر تطرفا وتمزقا وحقدا
ومن يتهمون الناس بالحقد والغل قد يكونوا هم كذلك
والادله والكلام العقلاني هم الفيصل بيننا
وكما قلت اين اصلاحكم ومنهجكم علي ضوء الكتاب والسنة
-----------------------\
ومتزعلش نفسك يابشمهندس انت رجل فاضل تبحث عن الحق اينما كان هذا عهدي بك دائما ,ولايهزك شيء لان الله غالب علي امره ولكن اكثر الناس لايعلمون
0000000000000
وحسبوا الا تكون فتنة فعموا وصموا ثم تاب الله عليهم ثم عموا وصموا كثير منهم والله بصير بما يعملون
------------------------
انا انزلنا اليك الكتاب بالحق لتحكم بين الناس بما اراك الله ولا تكن للخائنين خصيما
---------------------------------
وعادي جدا يابشمهندس الهجوم علي الحق شيء طبيعي جدا جدا لذا فنحن نعتمد علي الله ونحكمه بيننا
وسيحكم شرع الله حتما
ولكن السؤال
هل نحن نعمل لذلك ام لا
اللهم استخدمنا ولا تستبدلنا؟
النت ممتليء بالناس دي يابشمهندس شوية الملحدين علي الشيوعييين علي العلمانيين علي الامنجيه ونحن لهم بأذن الله ولنا الله عزوجل
وجزاكم الله كل خير

مهندس مصري يقول...

الفاتح الجعفري
==============
و لو ان ردك عليها كان عنيف شوية بس هيا اللي بدأت

بس هيا لا ملحدة و لا شيوعية و علمانية و لا أمنجية
هي انسانة بسيطة على ما أعتقد و ده اللي مزعلني منها
انها بتغلط لمجرد الانتصار في مناقشة و ما بتراجعش نفسها قدام الحقائق و مفيش عندها ادنى احتمال ان كلامها يكون غلط
ربنا يهديها و يهدي اخلاقها
و مش يهديها تبقى اخوان
لأ
يهديها لأنها تعرف تتناقش و تختلف بإحترام و تعمل بمقولة الإختلاف في الرأي لا يفسد للود قضية

appy يقول...

جعفرى

معلش بقى يا بشمهندس انا طلبت منك اننا نقعد ونتكلم وانت والله مبتحرجنيش بس اقنعنى انا وانت وانا قولت فى البدايه انا مش ضدهم انا بتكلم عن حاجات شوفتها بالعقل كده وهو مش موقف واحد يا جعفرى ما علينا انا قولت لك نقعد ونتكلم واناعلى استعداد افهم واعرف فكركم وانا قولت للبشمهندس قعدنى مع حد من الاخوان بس قيادات بصراحه لان اناعاوزة افهم حاجات كتير لو تقدر تعمل كده يبقى كويس جدا لو مقدرتش هكتفى بيك ويا انا يا انت هههههههههههههههههههههههههه لا بجد انا عندى استعداد اعرف الحقيقه فين وانت عارف انى دايما بسعى لكده بس

النجم القادم يقول...

السلام هندسة
وربنا انته جامد اوى
فكك ياعمنا دى واحده حافظة كام كلكمة من بتوع جرايد امن الدولة وانا اسف ليكى انها شتمتك
دى والحده معندهاش سورى يعنى اسلوب فى الحوار ولا الكلام وفكك منها وخليك فى طريقك طريق المدونة الجميل اوك ياهندسة وربنا يكرمك يارب بس فكك بالله عليك منها

غير معرف يقول...

مهندس معماري اسكندراني بالغربة

انا بصراحة اسف جدا على ان اشوف او اقرا لواحدة المفروض على الاقل لنها مثقفة , يعني اكيد مدام عاملة مدونة وبتكتب المفروض انها مثقفة ومتعلمة وعلى الاقل تعرف تدخل في حوار وتناقش مسألة معينة , ونهاية النقاش ملوش رابع حاجة من ثلاثة اما الطرف الاول يقنع الطرف التاني , او الطرف التاني يقنع الطرف الاول , او لا الاول ولا التاني يقتنعوا فكل واحد عرف وجهة نظر الطرف الاخر ولكنه لم يقتنع بيها وينتهي الحوار على ذلك

ولكن ان يتشبث احد الاطراف برأيه ولابد ان يفوز بالمعركة ويقنع الطرف الاخر
او يكون الطرف الاخر سفيه ويبدا بسببابه بدون اي وجه حق

انا عن نفسي لو لاقيت حد كده باوقف الحوار معاه تماما , ولا احاول حتى بإقناعه او محاورته

وسلامي ليك يا هندسة انا باقرا لك من فترة بس اعتقد ديه اول مرة ابعت تعليق ليك

واتشرف بمعرفتك

مهندس معماري اسكندراني بالغربة

مهندس مصري يقول...

آبي
=====
أظن كده الجعفري ابتديتي تعرفي منه كل حاجة
:)
اطلع انا من وسطيكم

النجم القادم
=============
خلاص يا نجم اللي فات مات

مهندس معماري اسكندراني بالغربة
=======================
متفق معاك جداً و أنا كمان تشرفت بمعرفتك

ايمن اكس بى يقول...

حسبنا الله ونعم الوكيل
ارى انكم انصرفتم عن الموضوع الاصلى وهو هذا الاخ المعتقل الى حوار جانبى عن الاخوان
وهذه الحوارات لا تنتهى والناس ستظل تجادل ربما من اجل الجدال وربما للوصول للحق
لكن ما اردت ان اقرره لمن تحدثوا ان الاخوان ليسوا ملائكة كما ان اصحاب النبى ليسو ملائكة فقد كان منهم ابوبكر وعمر
وكذلك كان منهم من زنى ورجم
والاخوان ليسو افضل من الصحابه
ولم يتربو على يد النبى ولكن تربو على منهجه على يد بشر عدايين
واذا لم يكن الاخوان الصواب المحض فهم على الاقل افضل الوحشين
فالاخ او الاخت الذى يقول لى تحفظ عليهم
نحترم وجهة نظره لكن هل هناك تيار لا يوجد عليه اى ملاحظات او تحفظات
وكفى بالمرء فخرا ان تعد معايبه
واذا كان هناك من يرى ان من ينتمى للاخوان يعرض اهل بيته للاهانه
فماذا يقول فيمن ينافق ويهادن هل يحفظ اهله
ماذا يقول فيمن يسكت عن الحق هل تسمية شيطان اخرس اوقع وافضل
هل لان الباطل يحاربنا لازم نكون نحن المخطئين
وفى النهاية حسبنا الله ونعم الوكيل فيمن يحول بيننا وبين احبابنا وفيمن يحول بيننا وبين اهلنا وفيمن يمنعنا من ان نوضح للناس دعوتنا وفكرتنا

مهندس مصري يقول...

أيمن اكس بي
===========
نورتني
و اتفق معك في كل كلمة قلتها

somaa يقول...

اولا السلام عليكم ورحمه الله وبركاته
ثانيا...
أنا الاغلبية الساحقة من الإخوان المسلمين....الجمله دى ممكن توديك جنب حبيبك يا بشمهندس... ههههه لو اتقريت لوحدها كدا
وحضرتك على وش سفر ربنا يصلحلك الحال
ثانيا والاهم منه...مع احترامى للاخوان ودعائى ليهم ولكل الشعب المصرى ربنا يفرجها عليه لانهم وقفوا للحق لكن انا بعتب عليهم فى اشياء اولها...
بقالهم اد ايه فى مجلس الشعب ومشفناش منهم حاجه...اقتصرت اعتراضاتهم على اشياء بسيطه لم تحل اى ازمه من الازمات...ناهيك عن ان مجلس الشعب والشورى حاليا ملهومش لازمه...
سؤال صغير ايه انجازات الاخوان حتى الان بلاش الاخوان خلينا فى المعارضه جميعها ...اين اعمالهم حتى الان..!!؟؟
برايى المتواضع ان الناس قبل السلطه يفعلون اكثر من بعد السلطه...واذا دخل الطمع فى شىء الا هدمه...
وللاسف الشديد لا يقدر اى احد من السياسيين فى الوقوف بوجه حكومتنا الكريمه لانهم متبعين نظام اللى بيته من ازاز ميحدفش الناس بالطوب فكل واحد فيهم (المعارضه جميعهم) بيته به لبنه على الاقل زجاجيه
وهذا ما حدث لايمن نور وامثاله ممن حاولوا دخول بيت الشمس المحرقه...
وعموما ربنا يفك سجن الجميع...
تحياتى ليكى سومه_87

somaa يقول...

بالله عليكم بلاش خناق وبلاش تحديف طوب حقكم عليا جميعا...احيانا بتلتبس الامور وبيكون سوء تفاهم...او لبس فى المواضيع وساعات كمان بيكون فى مواضيع تمس شىء فى نفسيتنا البشريه فبناهم بناء على خبره سابقه....التمسوا الاعذار...ومادمت بتعتبرها زى اختك فالتمس لاخيك سبعين عذر
نفسى ابطل اوقع باسمى بس هى عاده بقى وخلاص استحملوها
تحياتى ليكم سومه_87