السبت، مارس 29، 2008

لماذا دخل الإخوان المسلمين انتخابات المحليات

تحديث
المجالس الشعبية المحلية . تشكيلها ومهامها
-------------------------------------------------
بصراحة و رغم حبي للإخوان المسلمين فأنا غير متفق معاهم في قرارهم بدخول انتخابات المحليات
الإنتخابات تم فيها منع الترشيح من المنبع و لم يتمكن العديد من استكمال الاوراق المطلوبة
و من تمكن من ذلك لم يتمكن من تقديم هذه الأوراق و تسجيل نفسه كمرشح
و من قدم اوراقه لم يدرج اسمه في كشوف المرشحين
و من تمكنوا من الحصول على احكام قضائية بقبول ترشيحهم لم تنفذ الاحكام التي لصالحهم
هذا غير حملة الإعتقالات الجائرة الظالمة
كما أنه لا يوجد اشراف قضائي على الإنتخابات أي أنها ستزور بالكامل مثل انتخابات مجلس الشورى فما الجدوى من دخولها
في رأيي كانت مقاطعة الإنتخابات افضل في هذه الظروف لأنها ليست انتخابات بل مهزلة حقيقية
لا ارى أي فائدة من دخول الإخوان انتخابات المحليات بل تعود عليهم بالضرر و تفقدهم بعضاً من تعاطف الناس و تضامنهم معهم

هناك 28 تعليقًا:

عصفور المدينة يقول...

وجهة نظر معتبرة فعلا

أنا إنسان يقول...

الاخوان اساسا بدأوا في منحدر الهبوط
للاسف
........
والحل ان يطلع ناس مش تحت جماعه
ولا تحت مسمى
غير الاسلام
ويحاولوا يحيوه تاني

دكتور حر يقول...

عمنا المهندس

انا كمان كنت من أشد المعترضين على دخول الاخوان المحليات

لكن كان قرار أغلبية التصويت القاعدي بالاضافه لرأي المكتب العام بالدخول

كل ما ذكرته كان الاخوان متأكدين منه
ولهذا كان رفضي التام

ولكن الآن وبعد انقشاع الستار عن الأمر او في نهايته
أصبحت اكثر ميلا الى قرار الدخول

أولا لأنه أضاف ضربة قوية لجدار متهشم على وشك السقوط

وثانيا
أنه أضاف الى الناس فكرة ومعنى المحليات والتي لولا دخول الاخوان لما سمع عنها أحد

وثالثا
تسببت في حدوث مشادات ومشاحنات وكشف وفضح لممارسات الوطنى الداخليه والتي نجمت بالاساس عن الخوف من ولاء بعض المرشحين عن بعض للاخوان وميلهم وكذلك مجرد دخول الاخوان في المنافسه

ورابعا
أثبتت تجربة الدخول بعدد كبير أن الجماعة لم تتأثر بالضربات المستمره في الآونه الأخيره وأعلاها النحاكمات العسكرية وتجميد الأموال وأنهم قادرون على الظهور رغم ذلك

وخامسا
أفشل الإخوان ما كانت ترنو له الحكومه من محاولة شعور الناس بالاحباط واليأس من دخول الانتخابات وتزويرها والميل الى المقاطعه وهو أحلى ما كانت ترنو اليه الحكومه من الناس كلها حتى تريح وتستريح

وفي النهاية
هم مجموعه من البشر
لا يمثلون الاسلام وحدهم
لهم اجتهادهم
من وافقهم وافقهم
ومن خالفهم فكما يشاء
تحياتي لطرحك الحكيم المحترم

عاشقه الفردوس يقول...

لو الاخوان مادخلوش

والشعب كله مابيتحركش
طيب هنعمل ايه
اه صحيح
هما اصلا واكلينا واكلينا

يبقي لازم يكون في حد يدخل يبقي شويه بيفكر في الناس


في بلدنا اذكر وانا في الثانويه كده
ابي قرر انه يدخل المحليات
وهو اصلا مالهوش في اي جماعه ولا ينتمي لاي جماعه
ودخل مستقل
لاتتخيل ماحدث في البلد


انا فاكره اليوم ده لحد دلوقتي

لقيت الناس بقت تسال ايه ده

وليه هو فيه انتخابات اصلا
هي ايه المحليات دي

حسيت ان بقي فيه حركه

الناس كلها بلا فخر جت تنتخب ابي
لانه ماشاء الله له شعبيه كبيره ومحبوب


فاصبح الحزب الوطني يتسال من هذا الرجل الذي خرج اليه النساء والشباب قبل الرجال

وواحد من الحزب اقسم بالله لابي ان ابي كانت الاوراق كلها له وفي صالحه ولكنها التزوير والكوسه

لم يكن يهمنا ماحدث ولم اكن اعلم مايريد ابي من دخلو المحليات تحديدا ولكني فرحت جدالا الناس تحركت وارادات ان تتحرك

من بعدها اصبح الناس يتوافدون علي المحليات ويدخلون كمستقل
التزوير والكوسه مش للاخوان بس صدقني

ده لكل مستقل

وحسبنا الله ونعم الوكيل

monaliza يقول...

هما اخيرا دخلوا!!؟

مهندس مصري يقول...

عصفور المدينة
==============
مش كده برضه يا ابو يحي
:)

أنا انسان
==========
ما هو الناس دول لازم حيعرفوا بغسم و لو هما ما سموش نفسهم الناس التانية حتطلق عليهم اسم لتميزهم به

أما منحدر الإخوان فهذه وجهة نظر حضرتك التي قد نختلف فيها
:)
شكراً لتشريفك لي بتعليقك للمرة الأولى عندي

دكتور حر
==========
يمكن يكون كل الكلام اللي بتقوله ده صح
بس هل تعتقد ان المنافع كانت أكثر من الأضرار
أظن لأ

عاشقة الفردوس
===============
كل من هو ليس مرشحاً للحزب الوطني حتى لو كان عضواً في الحزب ذاته سيتم التزوير ضده فما بالك بالمستقلين و المعارضة و الإخوان
أما والدك
فهو انسان ايجابي محترم
:)

موناليزا
========
يا أختي هما دخل منهم قلة قليلة مع كل هذا التضييق
و اشك ان يتركوا اي واحد منهم ينجح

صاحب المضيفة يقول...

وجهة نظر معتبرة

لكن أكيد لهم وجهة نظر لعلك لم تطلع عليها فقط

اسال االدكتور حشمت عنكم يا عمنا


تحياتي

النجم القادم يقول...

حبيب قلبى الغالى حمدلله على السلامة

ازيك فينك من زمان يارب تكون بخير

بس يلا بينا بقى ندخل فى الموضوع

بص ياعمنا الاخوان اعلنوها من قبل
ان اى انتخابات فى مصر سنخوضها من اول انتخابات الاتحادات الطلابية الى
انتخابات الشعب والشورى والمحليات
وذلك لنثبت للعالم كله ان الاخوان موجودين وبيشاركوا
من اجل حريتنا ومن اجل منع الظلم والفساد
وهاك وهو شعارنا معاً ضد الفساد الاستبداء الغلاء الظلم البطش التزوير
حبيب قلبى الاخوان انا معاك فى كل كلامك ان الانتخابات ستزور ولكن احنا بنقدم عزراً لله عزوجل
على هذا الظلم وحتى يشهد الناس والعالم كله
عن افلاس الحزب الوطنى فى اى انتخابات حيث انه يلجأ لاساليب غير قانونية
واعمال بلطجة ولا يلجا ان يدعوا الناس من اجل انتخابه
لانه ليس لديه منهج واضح او هدف يسعى لتحقيقه
وما نجده من استقالات من اعضاء الحزب اللذين لم ياتوا على قائمة الحزب
خير دليل حيث انه حزب يحكمه المصالح الشخصية وسطوة رجال الاعمال
فمثلا فى دمنهور نجداحمدعتمان امين الحزب
يعين خمسة من اقاربه واخوه وصهرة فكيف يكون حزب ناجح
حبيب قلبى الاخوان دخلوا الانتخابات حتى يقولوا لا
وانا معاك اننا مدركون كمية البطش والتزوير وعدم قبول الاوراق
وكل هذه البلطجة ولكن كفاية قول الناس
ربنا يكون معاكم وربنا يثبتكم وربنا على الظلمة
كل ده يثبت مدى تعاطف الناس معنا اللى بيزيد يوم بعد يوم ولا يقل عكس ماتقول
وان كان قل ماكنتش الناس تساعدنا فى التلصيق والتوزيع البينات وتقولنا
ربنا معاكم ان شاء الله النصر قادم

حبيبى ولاتحسبن الله غافلاً عما يفعل الظالمون انما يؤجلهم ليوم تشخص فيه الابصار

اسف على الاطالة بس ابقى طمنى عليك انته ماشيت بسرعة بعد صلاة الجمعة علشان الفرح ميزو قالى

بحبك يامصر يقول...

السلام عليكم
ازيك يابشمهندش
انا رأيى ان المحاوله نفسها مهمه حتى ولو لم يتمكنوا من الترشيح او النجاح المحاوله مهمه حتى لا نتعود ويتعود الحزب الحاكم ان لا منافس له
وشكرا

bastokka طهقانة يقول...

مش عارفة
بس ربنا يختار لهم الخير


اوروفوار

somaa mahaba يقول...

والله مهندس انا قلت من زمان
طمع السلطه يعمى الناس....انا بحترمهم كحزب معارض كالاحزاب الباقيه لكن لا اعتبرهم فئه دينيه مثلا....بشعر زيهم زينا وفى ناس اقل فى الدين كمان...وايضافى ناس بتنضم معاهم لتحصل فقط على القوه....
اما ما حذث من اعتقالات لهم فدا مش من حق الحكومه بس طبيعى انه يحصل ..ولو اى حزب تانى كان بدا يظهر ويبان حتى لو بيرشح الرقص مش التدين
كانت الحكومه حتمنعه....
اعتقد اننا لو تركنا المسميات ووحدنا فئات الشعب حننجح لكن تقطيع اوصال البلد بالطريقه دى وكل واحد يقف لواعده فبيفكرنى بعود الحطب الوحيد الذى يمكن كسره بسهوله
تحياتى ليك سومه_87

somaa mahaba يقول...

لوحده ...مش لواعده
اسفه

عبدالرحمن فارس يقول...

عزيزي محمد

الموضوع ليه ابعاد كتيره انا هنا مش هتبنى وجهة نظر الاخوان وهقعد ابرر وكده

انا هقول رأيي انا واحد من الناس لو كانت قدامي فرصة النزول كنت هنزل والي مخلنيش انزل انه كان ساعة قت التقديم الورق بتاعي مش كامل

طب انا ايه الي هينزلني وانا عارف انه ممكن تحصل بلاوي

في قناعتي الشخصيه ان انا بدرب نفسي على العمل السياسي في وسط الجماهير لان كان فيه مشكله ديما انا مرشحين مجلس الشعب معندهمش تجارب سياسيه

ثانيا هي محاوله اخرى لفضح النظام اكتر ما هو مفضوح الغرض منها نزعة ورقة التوت

ثالثا بدل ما انا عمال اعتقل عمال على بطال وانا قاعد في بيتي ومن غير سبب يبقى اعتقل بسبب الي هو نزول المحليات

مش دفاعا هنا عن الاخوان لكن دفاعا عن فكرة النزول نفسها

ربما يكون للحديث بقيه

محبتي

مهندس مصري يقول...

صاحب المضيفة
============
عرفت وجهة نظرهم
يمكن هما على حق

النجم القادم
==============
أنا موافق على كلامك كله بس انا فعلاً شفت ناس فقدت ايمانها بإن الإخوان ممكن يعملوا حاجة وسط التزوير و القمع ده كله
عموماً أنا حأروح اصوت برضه و أعمل اللي عليا

بحبك يا مصر
===========
و عليكم السلام
:)
ممكن برضه

bastokka طهقانة
==================
ان شاء الله
:)

somaa mahaba
==============
المفروض اننا نتوحد بس ساعة الجد ناس كتير بتفضل مصالحها الفئوية
ربنا يهدي الجميع
و الإخوان مش شيوخ فيهم و فيهم
:)

عبد الرحمن فارس
================
انا اقتنعت برأيك يا عبده
خصوصاً بعد ما قريت اللينك اللي اديته ليا
http://www.fayoumwindow.net/newsite/main.php?PageNo=nafeza&id=105&tn=makalat
و اللي بيشرح ايه هي المحليات و تشكيل مجالسها و صلاحيتها
و بأدعو الناس كلها تخش و تقرأه
شكراً يا عبد الرحمن

مهندس مصري يقول...

المجالس الشعبية المحلية . تشكيلها ومهامها

http://www.fayoumwindow.net/newsite/main.php?PageNo=nafeza&id=105&tn=makalat

fatima يقول...

مهندس يا مصرى
الاول أزيك و أخبار الاستعداد للسفر إيه ؟؟
ربنا يوفقك دايما يا رب
ثانياً الانتخابات عبارة عن مسرحية تنتمى لمسرح العبث ...
لا ليها نظام و لا رابط و لا ظوابط و لا حاجة ...
فمفيش لازمة و لا فايدة ان حد يشترك فيها أخوان و لا غير اخوان
و مع تحفظاتى عليهم لجماعة و فكر ...
بس المشاركة حق لكل مواطن أى كان انتماؤه و فكره ...
بس دلوقتى ...
كأنه بيمثل دور مرسومله فى المسرحيةالعبثية دى متصورا ان حد هيقدر و يشوف
بس برضو الجمهور موش هيدخلها
و لو دخل
موش هيفهمها
و لو فهم موش هيحبها
و يقدرها
و يسقف لحد
بالعكس دا يمكن و غالبا هيحدفهم بأى حاجة فى أيديه عشان البيض و الطمام بقت عزيزة و غالية
تحياتى يا محمد

محمود المصرى يقول...

بسم الله الرحمن الرحيم

ازيك يا باشمهندس

انا اختلف معاك فى هذه المسألة لان لو الاخوان مادخلوش الانتخابات او حاولوا يدخلوا كانوا هايفوتوا فرصة لفضح النظام وممارساته , ودلوقتى النظام خسر نقاط كتير بممارساته التى لا تخفى على احد , ولما يزور الانتخابات بعد كده برضه هايسخر نقاط اكتر , وبما ان مافيش امل فى الافق بهزيمة هذا النظام بالضربة القاضية فهزيمته بالنقاط ممكنة فمافيش مانع استنزاف النقاط من الاخوان .
ممكن واحد يقول ان دا ليه خسائر على جانب الاخوان من اعتقالات ومضايقات ومطاردات , اقول ايوة امال عاوزين تغيير من غير تمن ؟ وبما ان الاخوان مستعدين لدفع هذا الثمن يبقى هما رجاله وربنا يؤيدهم وينصرهم واحنا نقف معاهم برضه لأنها قضيتنا جميعا .
يقول الاستاذ الشهيد باذن الله سيد قطب " لابد للمجتمع الاسلامى من ميلاد ولابد للميلاد من مخاض ولابد للمخاض من آلام "

احمد الجيزاوى يقول...

لانى واحد من محبى جماعه الاخوان المسلمين فى مصر
اتمنه من الله ان يصلح حلهم وان يكون لهم دور قوى ومؤثر ان شاء الله فى اضراب 6 ابريل
تحياتى ليك
احمد الجيزاوى

حل وسط يقول...

يا اما ليهم هدف وبيستقتلوا عشانه
يا اما حلاوة روح
يا اما دور مرسوم لهم
والله اعلم
ماحدش بقى فاهم حاجة

مش عارفة اقوللك مبروك على السفر والا ايه
الغربة فعلا مرة
بس زي مانت قلت
فيه اللي امر منها
ربنا يوفقك ويرزقك ويباركلك ويوقفلك ولاد الحلال

رئيس جمهوريه نفسى يقول...

مشكله البلد وحلها فى ايد متغير واحد بس ولسه ساكت لحد دلوقتى مشكله البلدى احنا شعب بيفرعن الحكام وبيسكت عن اللظلم وحلها انى الشعب يتحرك

مهندس مصري يقول...

فاطمة
======
أنا الحمد لله خلصت ورقي و في انتظار التأشيرة من السفارة و بعدها أسافر فوراً ان شاء الله

الإنتخابات دي دوامة كبيرة قوي و التزوير فيها حيبقى تام و كامل و شامل دا غير اني سامع ان 95% منها خلصت تزكية من غير انتخابات

محمود المصري
===========
أنا الحمد لله كويس
:)
ما أعتقدش ان أي شوشرة اعلامية في انتخابات المحليات حتأثر على النظام كتير ما هو مفضوح اصلاً و وشه مكشوف و ما عندوش دم
عموماً أدينا حنشوف يوم 8/4

احمد الجيزاوي
==============
أنا برضه اتمنى انهم يشاركوا في اضراب 6/4

حل وسط
=======
اعتقد انه الإختيار الأول
الله يبارك فيكي
:)
آميين

رئيس جمهورية نفسي
=================
يتحرك بدون قادة ؟
صعب يا ريس
و لو ان تحركه هو الأمل الوحيد

الفاتح الجعفري يقول...

حبيب قلبي مهندسنا الغالي
ربنا يحفظك ويبارك فيك ويعزك
بص ياسيدي دخول الاخوان للانتخابات بشكل عام وغيرهم من المعارضه انا اراه له فائدة عظيمه جدا من وجهة نظري
1/كشف وفضح ديكتاتورية النظام الحاكم
2/تفعيل المشاركات السياسية لدي الشعب او الجمهور
3/وجود كيان يقف بحق امام النظام الحاكم حتي لو كان هناك بعض الخسائر
دي شوية نقاط
ولو الاخوان قاطعوا والمعارضه قاطعت
كان ايه اللي هيحصل
هيقولوا تخلوا عن دورهم وتركوا الجمل بما حمل
وكان الحزب الوطني هينجح بالتزكيه دون اي تعب يذكر ويوقول اننا دعيناهم للمشاركة وهما مدخلوش علشان
مينكشفوش ويبنوا ضياع شعبيتهم!
غير كده ياسيدي
معذرة الي ربهم ولعلهم يتقون
وصدقني ان بدخول الاخوان للانتخابات
تم كشف الا عيب جديدة وخطط ديكتاتوريه للنظام الحاكم ماكانت ستنكشف لولا وجود الاخوان في الانتخابات
,ثانيا اللعب علي تعاطف الناس صدقني في مصر ليس له قيمة للاسف ,اذا كان الناس لايتعاطفون مع انفسهم لااقصد الكل ولكن الغالبية اين كان الناس في الستينيات وقت الاعتقالات والانتهاكات المخزيه ,الناس في اي وقت وزمان يحتاجون الي فئة تضحي وتبذل من اجل ان يرفعوا الناس سواء بقي اخوان او غير اخوان انا اتكلم عن العام
عامة وجهة نظرك تحترم جدا يابشمهندس
ربنا ييسر ويهيء لنا من امرنا رشدا
وجزاكم الله كل خير

alshared يقول...

يا جماعه ايه المشكله أن الاخوان يدخلوا أنتخابات المحليات

بالتأكيد فيه استراتيجيه وهدف هما حاطينوا في دماغهم وهما بيعملوا كده
لان كلنا واثقين أن الانتخابات محسومه تماما

عموما ربنا يوفق الجميع

تحياتي

آفاق الحرية يقول...

السلام عليكم
والله ياباشمهندس انا متفق مع حضرتك تماما
مع ان الاخوان فازوا بالقضية وتم ادراج الاسماء في الكشوف
لكن الاخوان لم يكن هدفهم الفوز لكن الهدف كان التوغل وسط الناس والتفاعل معهم وممارسة الدعوة بشتي صورها في الشارع
وهي كلها وسائل تنعدم حاليا الا في الانتخابات
تحياتي

ِِAdem El-Mahdy يقول...

السلام عليكم

بشمهندس
اهلا بحضرتك
انا كل اما لفكر فى وجهة نطر
الاقى اخوانا قايلنها

اقول بس كلمة على لسان الدكتور عصام العريان
ان لو فيه انتخابات على جمعية دفن الموتى هاندخلها
مش ظهور
و لكن املا فى اصلاح جزء صغير

و كمان علشان ربنا يوم القيامة لما يسألنا ليه ماصلحتوش
هانقول يا رب لان الانتخابات عارفين ان هى هاتتزور و هانعتقل

يا اخى العمل علينا و النتيجة لله
و بعدين يكفى اننا اخدنا الثواب
و لعلمك مين قال ان الانتخابات مش مفيدة حتى لو مش هاتكسب
اولا
بتعلم صف الاخوان على بعض المهارات ولا مليون دورة حد هاياخدها

ثانيا
بتكشف اوراق الحزب الوطنى

ثالثا
بتتحرك فى وسط الشعب و تبدأ تعمل معاهم دعوة و تنشر فكرتك بين الناس سواء كسبت او لا

اعتقد ان كل هذه المميزات تجعل الاخوان يشاركون فى المحليات

محمود الدوح يقول...

ازيك يا هندسة

بعيدا عن الاخوان ودخولهم كان صح او غلط
انا ليا وجهة نظر ممكن تكون صح او غلط
انا شايف ان احنا مينفعش نقاطع اى انتخابات فى البلد دى
نفضل ندخل وتتزور ونفضح وندخل تانى وتتزور تانى ونفضحهم لحد محال البلد يتغير

nonoymm يقول...

يارب مصر تتحكم بالاسلام
اخوان بقى يحكوموها
ولا مين المهم تبقى اسلامية يااه لو بقى الخلافة ترجع
ربنا يوحد صف المسلمين يارب
دي وجهة نظري فكرك تتحقق لو كل حد بيقول الله ورسوله هيقاطع ؟؟؟
تحياتي

مهندس مصري يقول...

و عليكم السلام و رحمة الله و بركاته

الفاتح الجعفري
==============
ماشي يا فاتح
بس برضه أديك شوفت مفيش فايدة

آفاق الحرية
===========
و بعد ما فازوا بالقضايا مفيش أحكام اتنفذت

الشارد
=======
ربنا يوفق كل من يسعى للخير

آدم المهدي
==========
و أديك شوفت المهزلة اللي حصلت يا سيدي

محمود الدوح
=============
يا صديقي العزيز
أنا شايف ان العصيان المدني اسرع و أحسن

عاشقة النقاب
==============
أنا نفسي في كده برضه
بس هل الإنتخابات المهزلة دي هي الوسيلة
أشك