الثلاثاء، أبريل 01، 2008

عاجل : الأمن يهاجم مظاهرة للإخوان المسلمين بدمنهور

إقروا الخبرين دول

الامن يفض مظاهرة مرشحي الاخوان بالبحيرة بالقوة

أسماء المعتقلين اليوم على خلفية مظاهرات الإحتجاج

أنا ما حضرتش المظاهرة دي كان عندي شغل مهم النهاردة و ما كانش ينفع اغيب ده غير اني ما كنتش أعرف اصلاً بالمظاهرة

ناس قرايبنا بيتهم هناك و من أقوالهم عرفت التالي

الدم من المتظاهرين المضروبين بعصيان و دروع الأمن كان مغرق الشارع و ناس بتجري و العساكر بتضرب عليهم نار - البوليس بيقول انه رصاص مطاطي - و قنابل غاز مسيل للدموع كتيرة انضربت و غطت منطقة المحكمة بالكامل و اغلبية شارع أحمد عرابي

و في حالات اختناق حصلت للناس جوه البيوت غير اللي كانوا في الشارع اصلاً

عموماً التفاصيل و الصور جوه اللينكين اللي فوق

اقروهم كويس

حسبنا الله و نعم الوكيل

هناك 15 تعليقًا:

آفاق الحرية يقول...

السلام عليكم
نفس الكلام في الغربية
اعتقال 4 من اخوان الغربية اثناء مظاهرة في طنطا امام مبني المحافظة
حسبنا الله ونعم الوكيل

روينا يقول...

انا للاسف رحت متاخره
بس عرفت انهم ضربو اخوات عندنا فى الغربيه(اللهم اجعله فى ميزان حسناتهن وفى ميزان سيئاتهم
يارب انصر الاسلام ويرجع الاسلام يحكم من تانى

عاشقه الفردوس يقول...

حسبنا الله ونعم الوكيل

ربنا يرحمنا برحمته

فرنسا هانم يقول...

ازيك يا هندسه
انا دخلت على اللينك الموجود
ولم ارى اى صوره بها عنف من جانب الشرطه
عموما
انا طبعا مصدقاك
ولكن لو الصوره موجود فيها الموقف ده كانت هتغنى عن التعليق
اخى مهندس مصرى
مره اخرى ده مش تشكيك فى الموضوع
ولكن مجرد توضيح
بس مش ملاحظ حاجه ؟؟؟؟؟؟
الحكومه الاموره دى مش نافع معاها اى مظاهرات خالص
عمله زى زمن الفتوات
الفتوه مبيهمهوش الحرافيش
وللاسف
كلنا بقينا حرافيش

د/اجدع بنوته يقول...

ربنا ع الظالمممممم

انت مش هتسافر بقى يامهندسنا

روح شم هوا نضيف احسن

النجم القادم يقول...

السلام عليكم حبيب قلبى ياغالى
منور بس ايه التغطية الجامد دى تعالى
عندى بقى وشوف انا برصد من داخل ارض المعركة وانرضب عليا قنابل خلاص بقى يلا تعالى شوف بسرعة النجم القادم فى ارض المعركة وايه الاحصل
ان شاء الله فيه شوية فديوهات هتجيلى بكرة وشويه صورة لوز هوريهملك

النجم القادم يقول...

بعد اذنك ياهندسة
اختى الفاضلة فرنسا هانم معلش هو اه ملحقناش نحط صور للاعتداء لانه جه علىفاجاة ولكن اعدك انى هجيبلكم فديو وصور كمان

مهندس مصري يقول...

آفاق الحرية
===========
و عليكم السلام و رحمة الله و بركاته
4 بس دا عندنا عدوا ال 150

روينا
=======
آميين

عاشقة الفردوس
===============
حقاً

حسبنا الله و نعم الوكيل

فرنسا هانم
==========
أنا عرفت الخبر من خالتي اللي ساكنة هناك و شافت من بلكونتها كل حاجة و الغاز المسيل للدموع غرق الشقة عندهم و غرق الشارع و هيا ست كبيرة في السن عندها حوالي 67 سنة
و بتؤكد لي ان عساكر الأمن طحنوا ناس من الضرب لحد أما دمهم غرق الأسفلت
انا بعد ما سمعت منها الخبر في التليفون دورت على النت فملقيتش غير اللينكات اللي حاطيطها و خبر على مدونة صديقي احمد ميلاد نائب رئيس حزب الغد في البحيرة في مدونته مصري حتى النخاع عندي في السايد بار
و عموماً كله حيبان و يا خبر النهارده بفلوس بكره يبقى ببلاش
:)

د/أجدع بنوتة
=============
منتظر الفيزا و بعدها يا فكيك :)

النجم القادم
=============
و عليكم السلام و رحمة الله و بركاته

منتظر الصور و الفيديو و حمداً لله على سلامتك و ربنا ينجي بقية الأخوة

محمود المصرى يقول...

بسم الله الرحمن الرحيم

برنامج العاشرة مساءا امس جاب مشاهد للمصادمات فى عدة محافظات , ومنى الشاذلى قالت كلمة حلوة اوى ( مشهد يذكرنا بأنتخابات ماضية ) , وكأن دا المشهد الطبيعى لأى انتخابات فى مصر , اه يا بلد .

مهندس مصري يقول...

محمود المصري
=============
للأسف هو ده الطبيعي بتاع كل اتنخابات في مصر المنهوبة

Ahmed Al-Sabbagh يقول...



شكرا لك يا محمد

وشكرا للنجم القادم

على مجهودكم الرائع

فى توصيل جزء من الصورة القاتمة

التى يعيشها الشعب المصرى

فى تلك المرحلة من عمر الزمان

لكن أوكد

ان فرجة قريب

تحياتى لك

أحمد الصباغ


مهندس مصري يقول...

أحمد الصباغ
=============
يارب يفرجها بقى

somaa mahaba يقول...

الله يخربيت الشيطان
عليهم بايه من دا كل دا عشان انتخابات محليه
بصراحه انا جالى عقده نفسيه اذا كنا مش قادرين نواجه الظلم الاصغر فى عملنا ومكان دراستنا حنواجه الظلم الاكبر من رؤسائنا
تحياتى ليك سومه_87

مهندس مصري يقول...

سومة
=====
أدينا بنحاول
:)
و اقري من الأرشيف تدوينتي
رجل الحمار : جبهة المديرين

غير معرف يقول...

اخبار اضراب 6ابريل تم النزول الى ميدان الساعه الواحده والنصف يبداء احمد ميلاد والدكتور عادل العطار المظاهره ومعهم الدكتور محمد برانيه ويحيى ابوشعره وطاهر ابو شعره وطارق ابو شعره ليبداء الهتاف يسقط يسقط حسنى مبارك ويتم القبض على الجميع اتمكن من الفرار وجمع الاوراق المطبوعه واذهب انا وباقى المتظاهرين الى مبنى نقابة المحامين ونبداء اعتصام لاخراج من تم القبض عليهم يصل اثناء الاعتصام الاستاذ طارق حشاد القيادى بالاخوان ولن اقول المسلمين ثم بعد فتره ينزل مع رفاقه ليتحدثوا مع طارق هيكل مفتش امن الدوله ثم يذهبوا لنفاجاء بعد ذلك بانسحاب الامن لخلف المبنى ويامرنا رجال النقابه انهم سيغلقوا ابواب المبنى لنخرج ونحن حوالى 20 فرد لمواجهة الامن يقترح زملائنا بالحزب الناصرى فك الاعتصام والتشاور مره اخرى بعد عدة ساعات يخرج 6 افراد من ال18المقبوض عليهم منهم قيادى الحزب الناصرى ويبقى الاستاذ احمد ميلاد والدكتور عادل العطار ورفاقنا من الغد وكفايه ليحولوا للنائب العام ليامر بحبسهم خمس عشرة يوم على زمه التحقيق هل هؤلاء هم الاخوان اولا ينضموا للائتلاف المعارضه ولم يشاركوا حتى المظاهره السابقه لم يحضرها احد منهم عدا الدكتور جمال حشمت ليلقى كلمه بها كاى ضيف واليوم لم يكتفوا بعدم المشاركه بل شاركوا امن الدوله فى القبض على اخواننا وطردنا من نقابه المحامين لنواجه بقلتنا قوات امن الدوله اى اخوان هؤلاء اقترح عليهم اسم الاخوان الغادرين فهذا ما يليق على افعالهم والبقية تاتى من غدر وخيانه لمصر من ابنائها