الاثنين، أبريل 07، 2008

معركة المحلة ما خلصتش

مصر: اعتقالات واصابات في "يوم الاضراب"
رداً على كل اللي علق على البوست اللي فات و لكل اللي قرأ و ما علقش
ادخلوا اللنك اللي في نهاية البوست و انتوا تفهموا ايه اللي حصل
بس ملخص الموضوع لكل اللي سألوا المظاهرات بدأت سلمية بعد خروج الوردية الأولى من العمال الساعة 3 العصر امبارح و لكن الأمن كان معتقل كل القيادات العمالية الممكنة من الصبح علشان يفشل الإضراب و الإعتصام جوه المصنع لكن أثناء الهتافات في المظاهرة السلمية البوليس ضرب بالقنابل و الرصاص المطاطي لتفريق المتظاهرين و كان عددهم فوق الـ 7 آلاف شخص بس الناس ما إتفرقتش بل ردت على الضرب بحدف الطوب و الحجارة و إشعال الإطارات المطاطية و إلقاؤها على الأمن و قام بعض المتظاهرين بإعادة قذف قنابل الغاز على الشرطة مرة اخرى
و قامت الشرطة بإستخدام الرصاص الحي و الكلام الآن على ان المحلة محاصرة و مقفلة تماماً و المرور متوقف و كثير من المصابين و الجثث يتم نقلهم لمستشفيات المنصورة و تقوم الشرطة بمصادرة طلقات الرصاص الحي الذي يتم استخراجه من أجساد المصابين و من جثث الشهداء
البوليس هو اللي دمر سلمية المظاهرات و هو اللي بدأ العنف و هو اللي كان بيكسر في عربياته المصفحة علشان يتهم المتظاهرين و هو اللي بيقبض على الناس من المستشفيات و هو اللي ضرب أطفال بالرصاص و هو اللي استخدم بلطجية في حرق بعض المنشآت العامة
هما كانوا معتقدين لما يضربوا قنابل و رصاص الناس حتخاف و تجري بس الناس وقفت و تصدت
برجاء المتابعة على اللينكات التالية
صور المظاهرات و أحداث المحلة
الأمن المركزى يهشم زجاج سيارة مصفحة فى المحلة الكبرى لإتهام المتظاهرين بإثارة الشغب
جبهة التهييس الشعبية
مدونة اضراب 6 إبريل و تغطية دقيقة و بالفيديو
مدونة لساني هو القلم
و اعملوا بحث في الجوجل و الياهو على كلمات إضراب و المحلة و مصر
سواء عربي او انجليزي و حتعرفوا كل حاجة و فضكم من كل القنوات لأن كلها طلعت بتخاف ما عدا الـ bbc arabic هي الوحيدة اللي نقلت الصورة الحقيقية

هناك 10 تعليقات:

بت خيخة وأى كلام يقول...

ايوة صح يا محمد
انا امبارح قريت خبر على النت فى جريدة البديل
ان الحكومة هتستخدم بلطجية من عندها وتخليهم يخربوا منشأت ويلبسوها للمتظاهرين سلميا علشان يتلككوا ويضربوا المتظاهرين
حكومة بنت كلب وسخة
انا هاروح اشوف اللينكات اللى انت حاططها
تحياتى ليك
سلام
اختك خيخة

آفاق الحرية يقول...

والله ياباشمهندس المحلة كلها خربة جدا
لا عارفين نطلع من المحلة ولو طلعنا مش ضامنين ندخل تاني
حتي العربيات مش عارفين نتحرك بها
كل واحد يخاف ان عربيته تتكسر زي اللي عربياتهم اتكسرت
حتي البلطجية قافلين الطرق السريعة

kikooooooooo يقول...

سلاموووووووووووو عليكووووووووو

إنت سخنتي سخنتي سخنتي وبعد كده ما قولتليش الحل إيه

بجد الحل إيه ؟؟ يعني أنا حقيقة رأي إن الإضراب ده ما جابش نتيجة

بجد حكومتنا بقت ودن من طين وودن من عجين

إحنا مش بلد ولا حكومة محترمة عشان لما شعبها يضرب الرئيس يستقيل مش الحكومة

إحنا في أم الدنيا اللي بقيت الطبقات الاجتماعية عندنا إما ووزير وإما غفير

ما تقلبش المواجع الله يخليك

كان معكم ..,
كيكوووووووووووووووو

مهندس مصري يقول...

بت خيخة و اي كلام
=================
اللي بيحصل دلوقتي في المحلة تخريب عنيف و الواحد مبقاش عارف البلطجية دول تبع مين و ايه فايدة التكسير في البلد ده
و ليه الأمن بيتعامل بغباء و يستفز الناس و يهيجهم بدل ما يهديهم و يلم الدور

آفاق الحرية
===========
كان الله في عونكم في وسط الإنتفاضة دي اللي ملهاش قائد و في قمة العشوائية

كيكو
=======
و عليكم السلام و رحمة الله و بركاته
لسه لما الموضوع ينتهي و المحلة تهدأ و الناس المقبوض عليهم يعرفوا راسهم من رجليهم ساعتها نعرف نتكلم عن استفدنا ايه من الإضراب
قبل كده ما ينفعش

بنوته مصرية يقول...

لا يا بشمهندس اللي بيحصل في المحلة الحكومه سبب فيه

الحكومه ضغطتت علي الشعب علشان كدا فاض بيهم
كفاية اني الحكومه بتطلق الرصاص الحي والمطاطي والقنابل المسيرة علي الاهالي عاوزين الشعب يعمل ايه

بجد حسبي الله ونعم الوكيل

الصور فكرتني بسقوط بغداد

ربنا يستر

رودي

pusssssy يقول...

يعنى مش كفايه محرومين من حقنا ان احنا نكون بنى ادمين .كمان بيحرمونا من حقنا ان احنا نكون متظاهرين.
بجد ربنا يصبرك يامصر ويصبر اهلك وشعبك المسكين.

somaa mahaba يقول...

برايى ان اللى حصل من اهل المحله دا نتيجه طبيعيه لاستفزاز الشرطه والامن المركزى ....ودا مش جديد علينا اننا نستسلم لاستفزاز من اجهزه الامن
تحياتى ليك سومه_87

nonoymm يقول...

يعني يا جماعة بلطجية الي كسروا محلات الذهب وحرقوا العربيات والبلد من الحكومة يعني ولا ايه؟؟؟
انتوا هتلخبطوني تاني ولا ايه بس
ربنا يستر
تحياتي لحضرتك

مهندس مصري يقول...

بنوتة مصرية
============
متفق معاكي يا رودي
بس تخريب المدارس و كباين التليفونات و عمدان النور مش حيفيدنا في حاجة
المظاهرات ممتازة و الإشتباك مع الأمن نتاج طبيعي للإحتقان ودفاع عن النفس ايضاً
لكن التخريب لمصلحة مين
و مين اللي بيخربوا
أعتقد اللي بيخربوا دول شوية بلطجية و صيع من الغوغاء ملهمش رابط و لا ضابط و لا قائد و لا هدف

و برضه حسبنا الله و نعم الوكيل في الحكومة و الأمن و كل الظالمين

بوسي
=======
آميين
و شكراً على اول تعليق ليكي عندي

سومة
=====
ممكن بس ده مش تفسير كافي
لسه في حاجات تانية أكيد حتتكشف

عاشقة النقاب
================
محلات الدهب محصلهاش حاجة لحد دلوقت الحمد لله

أما البلطجية تبع مين و لا نبع نفسهم و لا مواطنيين غضبانين و لا عصابات مجرمين محترفين

الله اعلم

بنوته مصرية يقول...

انا معاك في اني البلطجية هما اللي عملو الاعمال الشغف دي

وبرضة يا بشمهندس يعني لما صبي يبص من البلكونه وياخد رصاصتين في راسه

تفتكر اهله مش هيثورو ويكسرو في املاك الحكومه مهي اللي قتلت ابنهم

لما عربية الاسعاف تدخل علشان تنقل اطفال والامن المركزي يمنعهم ده حلال ولا حرام

لما الامن المركزي يضرب الناس بقنابل ورصاص مطاطي ورصاص حي ده ايه
هو احنا بنحارب ولا ايه لحسن يكونو فاكرين انهم راحو الانتفاضة ولا بيحاربو اسرائيل

الناس فاض بيهم

بس في النهاية انا مش مع التخريب ده بس برضة الناس معذورة

تحياتي لك
رودي