الاثنين، أبريل 14، 2008

ندوة بجريدة الدستور عن الفيس بوك و السياسة

يوم السبت اللي فات رحت القاهرة علشان استلم جواز سفري بعد ما حصلت على التأشيرة و خلاص مسافر يوم الإثنين الجاي
بعد ما خلصت موضوعي قلت أقابل المدونين بقى
قابلت بت خيخة و ابن حجر العسقلاني و أحمد الصباغ و عرفت منهم ان في دعوة لمجموعة من المدونين لجريدة الدستور لمناقشة موضوع عن المدونات
رحنا و اتقابلنا هناك مع نوره الخشن و مدونة كمان مش فاكر اسمها بس هي اللي كانت جايبانا كلنا اصلاً
وصلنا الدستور الساعة 5.15م


صراحة كنت فرحان قوي و مش متخيل اني حأدخل الدستور لأني بأحب الجرنان ده قوي و بأعتبره هو أجرأ جرنان في مصر و هو اللي شجع بقية جرايد المعارضة انها تمشي في سكة المعارضة الصريحة مش اللي من تحت لتحت
و باشتريه كل يوم و بأقرأه كله تقريباً
المهم الندوة كان بيديرها الصحفي / محمد الدسوقي رشدي


بس طلع شاب صغير و أعتقد أصغر مني كمان أنا كنت متخيله أكبر من كده و كان فيه 2 صحفيين كمان و مصور ده غير بقى المفاجأة

الندوة كانت عن الـ فيس بوك facebook و تأثيره السياسي و علاقته بإضراب 6 ابريل

يعني مش عن التدوين

طب دا أنا على قد حالي في الفيس بوك ده خالص و مجرد مستخدم عادي و ما سبرتش أغواره و ما اعتقدش إني حأسبرها لأن المدونات واكلة أغلبية وقتي على النت فمنين اجيب وقت للفيس بوك

و كان عدد الحاضرين حوالي 20 واحد منهم نشطاء على الفيس بوك و منهم مدونين و منهم ناس في إدارة المواقع الإلكترونية و بدا النقاش بإن كل واحد يتكلم لمدة 10 دقائق عن نشاطه على الفيس بوك و رأيه في تأثيره السياسي و هل يغني عن العمل في الشارع و لماذا يعلو صوت المصريين على النت بينما لا تسمع لأغلبهم صوتاً في المظاهرات مثلاً

و بدأ النقاش من عند الأستاذ شمعي أسعد على يمين محمد الدسوقي

و ذكر وجهة نظره ثم الشاب الناظر لأسفل في الصورة و قد كان مثاراً لجدال في الجلسة لأنه اعلن أنه مؤسس جروب بأحب الحزب الوطني على الفيس بوك و كاد الحوار يتحول لهجوم على الحزب الوطني لولا دخول رئيس التحرير

ابراهيم عيسى و الذي أعجب بمعظم كتاباته و ان كنت أختلف معه احياناً و لكنه يقول الحق من وجهة نظره و لا يخشى فيه لومة لائم

قعد يسمع و بان عليه تأثير الكلام بتاع حب الحزب الوطني

ههههههههههههههههههه

هيمان في الملكوت

بس شوية و قام استأذن ربنا رحمه لأن بعد كده كان فيه مصيبة

يعني انا ممكن افهم الشخص اللي بيحب الحزب الوطني ده لأنه لسه شاب متخرج من كلية اقتصاد و علوم سياسية و عرف يشتغل أول ما إتخرج في وزارة العدل و مقدم على شغل في وزارة الخارجية

حيكره الحزب الوطني ليه ؟

انما اللي فقع مرارتنا كلنا هو الشخص ده

اللي عامل جروب على الفيس بوك و بيقول فيها انه بيحب جمال مبارك

مين

جمال مبارك

لاحول و لا قوة الا بالله

لا و الأنقح انه مش عضو في الحزب الوطني بل و محامي عادي طب بتحبه ليه؟

يقولك بأحبه و خلاص و شايف انه اصلح واحد يمسك البلد

صراحة في خلال الربع ساعة بتاعته كانت الندوة كلها دمها بيغلي و بعد كده بيستغرب انه بيتشتم على الفيس بوك

طبعاً أنا ضد الشتيمة بس رأيه مستفز جداً

و اتكلم واحد من نشطاء الإخوان المسلمين على الفيس بوك

هو اللي في الصورة ده و هو و زميله اللي قبله عاملين جروب لطيف اسمه الحملة القومية للتطعيم ضد السلبية و طبعاً اتهاجم علشان موقف الإخوان المسلمين من الإضراب الأخير

و بعدها كانت مفاجأة حلوة انه حضر معانا واحد من مشرفي جروب يوم 6 ابريل اضراب عام في مصر خليك في البيت

و زميل اسراء عبد الفتاح مؤسسة الجروب و حكى لنا على تطور الجروب و ازاي بدأ بيهم هما و اصحابهم و اللي عددهم بعدد اللي دعوهم ما يزدش عن 300 فرد و ازاي انه في نهاية اليوم الأول كان العدد بقى 3000 فرد و انه يوم الإضراب كان وصل 65000 و دلوقتى عدى 70000

و ازاي الناس كانت متمسكة بالإضراب و فرحانة بيه و بتدعو له في كل مكان بمجهودات شخصية و ايه التهديدات اللي جات لهم و ايه اللي حصل لهم انتهاء بإعتقال اسراء و بعض أصدقائها

عموماً ده أهم اللي اتقال طبعاً لو عايزين تقروا الموضوع بالكامل لازم تشتروا العدد الإسبوعي للجريدة بتاع الأربعاء

:)

طبعاً الصباغ اتكلم على صالون المدونين و جروباته التانية و خيخة و عسقول قالوا ملناش في الفيس بوك و أنا قلت لهم أنا مستخدم بس انما أعجبكم في التدوين بس قلت بقين حلوين لكن الشريط بتاع المسجل خلص عندي لأجل البخت الحلو فمفيش كلمة من كلامي اتسجلت :)

و كان فيه واحد حاضر من موقع أبناء مصر اتكلم عن السياسة على النت و اثرها في الشارع

و اتكلم ناس من حزب الغد من كذا محافظة و منهم صاحبة مدونة لاظوغلي

و بعد كل اللي اتقال كان فيه سؤالين هل اللي بيحصل دلوقتي من اعتقال لنشطاء على الانترنت يخليك تخاف تحط اسمك و صورتك و بياناتك الحقيقية و لا لأ ؟

و ايه هي نصيحتك لمستخدم الفيس بوك ؟

و أنا بالنسبة للسؤال الأول بأقول العمر واحد و الرب واحد و ( قل لن يصيبنا الا ما كتب الله لنا ) و السؤال التاني كل واحد قال فيه اللي ربنا قدره عليه

و بعد انتهاء الندوة كان فيه حوار مفتوح بس للأسف إضطرينا نستأذن علشان الوقت كان إتأخر و كان ورايا سفر

هناك 42 تعليقًا:

Ahmed Al-Sabbagh يقول...


رائع

تغطية رائعة جدا

وانتظر تغطية الدستور فى عدد الاربعاء

تحياتى

احمد

somaa mahaba يقول...

انا التااااااااااانى هيييييييييييييه
ازيك يا مهندس دا اولا
ثانيا تغطيه جميله
ثالثا انا نفسى اشوف اللى بتعملوه دا واجى مره بس صراحه معنديش شجاعه اهليه يعنى انا وحيدتهم حيخافوا اروح مرجعش
ومع ذلك رغم الاعتقالات اللى على النت مخافش من وضع صورتى وبياناتى انما الخوف الاكبر استغلالها استغلال خطا حضرتك عارف انا بتاعه جرافيك وعارفه اللى بيحصل لصوره لو وقعت فى ايد حاقد ربنا يستر معانا بس عموما مهياهم فى البيت عندنا ومعرفاهم وثقتهم فيا كبيره والحمد لله
بس برضوا م ححط صورتى عشان فى سبب تانى انى قمرررررررررر اسم الله عليا ومش عاوزاكم تتخضوا من كتر القماميره اللى انا فيها ....وتحسبا لحدوث كوابيس
تحياتى ليك سومه_87

المنسى يقول...

تغطية جامدة
وانا كمان مش بتعامل كويس مع الفيس بوك
وأتمنى لو المدونين كلهم يكون ليهم موقع يجمعهم يتكلموا فيه بجدية وموضوعية أكثر

مدحت محمد يقول...

قاعد طهقان طول اليوم بسبب ارف الشغل وارف المواصلات والحر ويوم رخم جدا
لحــــــــــــد لما وصلت لمدونتك ولحــــــــد لما وصلت للجملة دى
انا شايف ان جمال مبارك اصلح واحد يمسك البلد
هههههههههههه
بجد مش قادر امسك نفسى من الضحك
ربنا يكرمك ياباشا
والف تحية ليك

سهر الليالى يقول...

ياعم ياعم
طب والله كويس انك عملت حاجة زى كدة قبل ما تسافر

وبعدين بالنسبة لسؤالك حط ياعم صورتك واسمك براحتك ما نات مسافر خلاص
:)

توصل بالسلامه وربنا يوفقك
تحياتى

فرنسا هانم يقول...

كلمه فى ودنك




انا معرفشى حاجه نهائى عن الفيس بوك

بذرة امل يقول...

راااااااااااااااائع
بس انا مستغربة جدا
هو ما فيش بنات ليه
؟؟؟؟؟
ده مقصودة ولا ايه
بس حلوة اوى صورة ابراهيم عيسى
بجد انا بحبه اوى
وشكله كان مخنوق من القعدة جدا

بنوته مصرية يقول...

جميل جدااا
تغطية جميله كان نفسي اكون معاكم

تروح وتوصل بلسلامه وطمنا عليك بستمرار

ربنا يوفقك يارب

تحياتي
رودي

nonoymm يقول...

تغطية هايلة
معلش كلمة زي بتاعت فرنستي انا كمان مشتركة في الفيس بوك وباعتالي يجي هديتين ورسالة واحدة للزوج وخلاص ما اعرفش عنه حاجة تاني
تروح وتيجي بالف مليون سلامة بس كدة عسقلانيا هتموت من الجوع
ربنا يوفقك
تحياتي

only spot يقول...

سلام عليكم
تغطيتك رائعه وجميله جدا وكنت اتمنى انى اكون من الحاضرين الندوه لاحترامى وحبى لمعظم صحفيو الدستور
جزاك الله كل خير
بالنسبه للشوباب الجامد الى بيحبو الحزن الوطنى يا ريت بجد تدعوهم وانا قادره اوريهم انجازات الحزن الوطنى مع اهالى منطقه واحده بس كعينه صغنونه بيعانو من الجهل والتخلف والفقر والبلطجه والى سائدها هو قانون البقاء للاقوى قانون الغابه يعنى
ليه بجى اصل الامن مكثف كل جهوده لمحاربه الشرفاء الى بيطالبو بحقوقهم وسايب بتوع المخدرات والبلطجيه طايحين
فى المناطق العشوائيه وغيرها
تحياتى
واحده زيك قرفت وزهقت بس عندها امل

nody_1987 يقول...

التغطيه مميزه
السيد الفاضل الى بيحب الحزن الوطنى ده
انت قولتها بنفسك اتخرج
ولقى شغل فى العدل ومقدم على شغل فى الخارجيه
انما لو كان مالقاش واشتغل سواق
كان
ولع فى نفسه هو والحزب الوطنى
تحياتى

بت خيخة وأى كلام يقول...

كنت تكتب يا محمد
انى كنت قاعدةعلى يمين ابراهيم عيسى
ومتهيالى ان ده اهم حدث فى الندوةو كلها
نيهاهاهاهاهاع
تحياتى ليك

بحبك يامصر يقول...

تغطيه هايله
كأننا حضرنا الندوه
تروح وترجع بالسلامه

غير معرف يقول...

السلام عليكم يا هندسة يا ابو زمل

انت ليه مش باشوفك ع المانجر دلوقت

انا المهندس / محمود مرسي

عموما تيجي بالسلامة ان شاء الله للسعودية ويا ريت اول ما تيجي تتصل بي لو عزت اي حاجة وانا كنت اديتك الرقم قبل كده

مع السلامة

شمعى أسعد يقول...

جميل يا باشمنهدس تغطيه حلوة
بس كان نفسى نتكلم ونتعرف اكتر بعد الندوة

مهندس مصري يقول...

احمد الصباغ
=============
ده بس من ذوقك يا خال
بس الجرنان يا أخويا النهاردة ما كانش وراهم غير الصباغ قال و الصباغ عاد
استوليت على الندوة يا صباغ
:)

سومة
======
الحمد لله
الله يكرمك
ربنا يسترها على صورنا و صور كل الغلابة
و عموماً من ناحية القماميرية
ربنا يزيد و يبارك
:)

المنسي
=======
عندك صالون الصباغ للمدونين على الفيس بوك
خش و قول كل اللي في نفسك

مدحت محمد
==========
منورني أولاً
:)
ثانياً طب بذمتك مش أستاهل جايزة أنا و كل اللي قاعدين ان مسكنا نفسنا و محدش خبطه بحاجة

سهر الليالي
============
الله يسلمك
بس انتي لغيتي موضوع الحفلة و لا ايه ؟

فرنسا هانم
===========
ياه يا فرانسا اسألي و الف من يدلك
دا إنتي حبايبك في النت يتمنوا يخدموا
بس للأسف أنا مش قد كده فيه و مش حاعرف افيدك يا ست الكل

بذرة امل
=========
مفيش بنات ازاي ؟
أمال عزة مطر و نورة الخشن و وسام زحلان و نوران الشاملي يبقوا ايه ؟

أنا ما نزلتش صور ليهم لأن أغلبهم ما بيحبش صورته تتنشر
بس كانوا موجودين

و ابراهيم عيسى جه في حتة الحزب الوطني بس ما كانش مخنوق لأ كان مستغرب بعمق
:)

بنوتة مصرية
=============
الله يكرمك و يسلمك يا رودي
:)

عاشقة النقاب
=============
لا يا فندم مش حتموت و لا حاجة حيمسكها مكاني وكيل الوزارة اللي تختاريه
:)
و أنا برضه استعمالي للفيس بوك بسيط

only spot
==========
و عليكم السلام و رحمة الله و بركاته
احنا اتقابلنا في ساقية الصاوي في لقاء المدونين قبل كده
:)
بالنسبة لبتاع حب الحزب الوطني هو شايف ان الحزب مش مسؤول عن فشل الحكومة لأن مبادئ الحزب سامية و عظيمة لكن تطبيق الحكومة لها مش على نفس المستوى
كلام يفرس طبعاً
يارب الناس دي تنزل لأرض الواقع و تعيش عيشتنا بقى

سعيد بتعليقك

nody 1987
===========
شكراً
:)
بالضبط ده كان شبه إجماع من الحاضرين
أنا ليا واحد صاحبي خريج آداب قسم اجتماع بتقدير جيد جداً و شغال عامل في فورم الجبس
تعتقدي ايه رأيه في الحزب ؟

بت خيخة
=========
ما أنا كتبت إنك كنتي ساكتة و مؤدبة قوي و عايشة دور الصمت الرهيب
:)
ههههههههههههه

بحبك يا مصر
============
الله يسلمك
شكراً بجد
:)


البشمهندس محمود
================
معلش يا باشا بس اصل التدوينات متكومة في الريدر غير الميل مالي و طافح فبأكون مستخبي على الماسنجر و ساعات مش بأفتحه اصلاً
ابعت أوف لاين ماسج و لو موجود اكيد حأرد
:)

شمعي اسعد
==========
الله يخليك
ان شاء الله حنتكلم اكتر على الماسنجر بعد كده
و اول ما ألاقي وقت حأقلب في مدوناتك و أجيب القديم و الجديد
:)

آفاق الحرية يقول...

السلام عليكم
تيجي بالسلامة ان شاء الله ياباشمهندس
وياريت حضرتك لما توصل بالسلامة ان شاء الله تطمنا

Gannah يقول...

اخى الكريم تحياتى
تانى مرة ادخل المدونة بس المرة دى قلت لازم اقول حاجة قبل ما امشى
اولا مرحبا بك فى عالم المتغربين و لو انى مش قادرة اقولك مش هتبقى قرفان و لا مفروس من اللى بيحصل فى مصر. الحقيقة ان دى حاجة هتخدها معاك و انت مسافر زينا كلنا بس اتمنالك التوفيق
ثانيا
انا ماليش فى الفيس بوك بس واضح ان الاجيال الجديدة كلها مشتركة فيه و له تأثير كبير على الشباب مكنتش عارفة ان فيه جروب للامير جمال مبارك.....اصلها بقت ملكية...بس كان لازم يقولنا نوع الحبوب اللى نخدها علشان نحبه احنا كمان وليه هو الاصلح؟ بمناسبة ايه
مثلا..الجرايد الحكومية اللى تحرق الدم بتعتبره خبير فى كل حاجة بتقولك ان جمال مبارك بيقول لازم نطور نظام دخول الجامعة طب ماهو كل الخبرا فى التعليم قالوا كده من سنين و لا حد عبرهم و لا لما هو يقول يبقى كلام مقدس...ايه الخيبة دى؟
تقبل تحياتى

appy يقول...

فيس بوؤ هى كان فيها كده يالا ما علينا سورى كنت جايه بس الشغل موتنى مقدرتش عموما كل ندوه وانت طيب

المهم تسافر وترجع بالسلامه ومتنسناش وانت هناك يا هندسه

خمسة فضفضة يقول...

السلام عليكم ورحمة الله وبركاته

خلاص ماشي يا باشمهندس ، تروح وتيجي بالسلامه ويارب تتوفق في حياتك هناك ،
قريت تغطيه الندوه في الدستور ماشاء الله جميله جدا
بس فين صورك انت واحمد الصباغ ونوران الشاملي ايه ماكانوش عاوزين يصوروكوا ؟؟؟

مهندس مصري يقول...

آفاق الحرية
=============
و عليكم السلام و رحمة الله و بركاته

الله يسلمك

gannah
========
أهلاً بحضرتك في اول تعليق لكى هنا
:)
أولاً ربنا يستر
ثانياً هو بيتعامل مع جمال مبارك كأنه المفتاح السحري لحل كل مشاكل البلد
ربنا يشفي اصل الظاهر ده مرض

آبي
====
ربنا يعينك على ما بلاكي شغل و مدونات و خلافه
:)
الله يسلمك

خمسة فضفضة
==========
و عليكم السلام و رحمة الله و بركاته
الله يسلمك يا دكتورة

هما صورونا كلنا بس كانوا مركزين اكتر على رأس الندوة و الجنب اللي فيه الصحفيين و رئيس التحرير
احنا كنا قاعدين في الجنب التاني
و بعدين انتي عايزة خيخة صورتها تتنشر
أعتقد هاني كان يقطعها
ههههههههههههههههههههههههههههههه
بأهزر بس
:)

shahed 7ak يقول...

كويس

الندوة في حد ذاتها كويسه جدا

وده معناه ان المدونات

والجروبات ع النت بقه لها منظور تاني

صحفية روشة يقول...

انت خلاص وصلت
والنبى يا اخويا الواد ابنى عاوز يدخل حربية وعاوزين واسطة
هههههههههه
ربنا يوفقك فى سفرك وتبقى مهندس مدنى قد الدنيا

الفاتح الجعفري يقول...

يااااااه يابشمهندس خلاص هتسافر
هتوحشني جدا والله
استودعك الله الذي لاتضيع ودائعه وانا هكلمك اسلم عليك بأذن الله
ولو نزلت القاهرة قبل ماتسافر بالله عليك كلمني
انت من الناس المحترمه فعلا يابشمهندس
اني احبك في الله
ربنا يحفظك ويبارك فيك
وجزاكم الله خير

اعترافات انثى جامحة يقول...

بصراحة اكتر حاجة شدتنى هى انك هتسافر يوم الاتنين
تروح وترجع بالسلامة

عصفور المدينة يقول...

زودك الله التقوى وغفر ذنبك ويسر لك الخير حيثما كنت

د/اجدع بنوته يقول...

تسافر وترجع بالف سلامه

ربنا يوفقك يارب وتحقق هناك كل اللى بتحلم تحققه م التجربه دى

وماشاء الله الندوه كانت لذيذه جدا

وتغطيتها رائعه

خصوصا اللى بيحب جمال والحزب دول

تحياتى

محمود الدوح يقول...

اولا مبروك حضور الندوة
اللى لو كنت اعرف كنت حضرتها

المهم وانت هناك برة فى البلاد البعيدة القريبة
متنسناش من بوستاتك
ومتبخلش علينا باى بوست ولو صغير

تروح وترجع بالسلامة

مهندس مصري يقول...

شاهد حق
=========
ممكن و ممكن برضه تكون سبوبة كويسة يتملأ بيها 3 صفحات في الجرنان
:)

صحفية روشة
===========
ههههههههههههههههه
لسه بدري على وصلت دي
آميين يارب

الفاتح الجعفري
==============
ياه يا أحمد
أنا كمان بأحبك في الله و بأحترمك جداً و اتصلت بيك يوم الندوة و انت ما ردتش مش عارف ليه لا إنت و لا اليعقوبي
للأسف مش نازل القاهرة تاني أنا حأسافر من مطار اسكندرية
ربنا ينصرك و يجازيك خير على كل ما تفعله من نشر لدعوة الله و توعية للغافلين

اعترافات انثى جامحة
==================
شكراً

عصفور المدينة
==============
أبو يحى عندنا
يا مرحبا يا مرحبا
واحشني جداً يا بشمهندس
آميين يا هندسة و لك مثله
:)

د/أجدع بنوتة
=============
الله يسلمك يا دكتورة
:)

مهندس مصري يقول...

محمود الدوح
===========
الله يبارك فيك بس الموضوع كان صدفة
:)
و ان شاء الله أول ما أرتب أموري هناك حأرجع أدون تاني

لماضة يقول...

يا هندسة
كفايه بس ابراهيم عيسى كان منور القاعده الحلوة دي

لماضة يقول...

تروح وترجع بالسلامة

مستــ ج ــــدة يقول...

ما احنا عرفين انك اكيد قولت بوقين حلوين يابشمهندس بس ليه مكتبتهملناش بقى
وكمان فين اللى خيخة قالته
لاء كده مش حلو
بس اللى حلو الأخ اللى بيحب الحزب والتانى بتاع جيمى ده.. ربنا ينفخ ف صورتهم كمان وكمان
.
.
ربنا يكرمك يابشمهندس ف سفرك وبالتوفيق ان شاء الله

مصر اللى مشفتهاش يقول...

لا حول ولا قوة إلا بالله ..

بيحب جمال مبارك .. :S

طيب ليه ..؟؟؟ مقلش ليه ..؟؟
ربنا يغفرله .. ديه لوحدها جريمة فى حق الشعب .. :D

تغطية جميلة يا بشمهندس ..

Whispers just for a Night يقول...

السيد الكريم

تابع على مدونة قولاً سديداً رد الحكومة الهولندية على حملة المدونة لدعوة الحكومة الهولندية لسن قوانين ردعية تمنع حدوث الإستهزاء بالمقدسات الدينية ورد المدونة عليهم على الربط التالي
http://kawlansadida.blogspot.com/2008/04/blog-post_18.html

وجزاكم الله عن نبيكم خيراً

مهندس مصري يقول...

لماضة
======
على قولك بجد أنا فرحت قوي لما شوفته و كان نفسي اتصور معاه بس كانت الندوة حتقف و تبوظ
الله يسلمك يا دكتورة
:)

مستجدة
=======
لأني مش فاكرهم
:)
و خيخة قالت إن ملهاش في الفيس بوك و سكتت خالص هيا و ابن حجر العسقلاني

الله يخليكي

مصر اللي مشفتهاش
=================
بيحبه بدون سبب
من أول نظرة
:)
ربنا يشفيه
شكراً

Whispers just for a Night
============================
ألقيت نظرة على البوست و أؤيدك تماماً

بت خيخة وأى كلام يقول...

محمد
ابقى طمنا عليك
لما تسافر وابقى اكتب بوست اول ماتوصل علشان نطمن عليك
هتوحشنا يا محمد اوى
يارب يوسع رزقك ويكتبلك اللى فيه الخير دايما
سلام
اختك خيخة

weswes يقول...

اممممممممم
مدونه كده مش فاكر اسمها
مرسيه جدا على الذاكره العظيمه
تحياتى على التغطيه الجميله:)

مهندس مصري يقول...

weswes
========
عرفته
وسام زحلان
أنا آسف أرجو تسامحيني
:)

weswes يقول...

يا عم حصل خير
بس ونبى حط ال قبل الزحلان
هههههههههههه
تحياتى لك
:)

غير معرف يقول...

ماتفرحش قوي كده
الدستور انهارت خلاص ، وابراهيم عيسى اللي بيحارب الدكتاورية هو أكبر دكتاتور في الصحافة وانسان غير محترم في تعاملاته مع الصحفيين
خش هنا لو عاوز تعرف حقيقة الدستور ، وشهد شاهد من أهلها
https://www.blogger.com/comment.g?blogID=28686677&postID=115226543910642331

أحمد سعيد بسيوني يقول...

شكلها كانت ندوة جميلة واستفتم منها

بس انا مستغرب ازاي قدرتم تمسكوا نفسكم وماتتهوروش مع الاستاذ محب الحزب الوطني والتاني بتاع جمال

دمتم