الاثنين، أبريل 21، 2008

أستودعكم الله

أنا خلاص مسافر بكره يوم الإثنين 21/4/2008 على طائرة اسكندرية الرياض التي تغادر في الساعة 4.45 م
أستودعكم الله جميعاً و أدعو لكم بكل خير
عندي شعور بالرهبة شئ غريب ان الواحد يلاقي نفسه في بلد تانية وسط ناس غريبة
أكيد حتكون تجربة مميزة و ان شاء الله مصمم انجح فيها خصوصاً بعد ما فشلت في أخد أجازة بدون مرتب
الأجازة كانت ماشية زي الفل و اتمضت من رئيس القطاع و 3 مديرين بدرجة رئيس قطاعات و كانت فاضل لها امضاء رئيس مجلس الإدارة بس
لكن اللائحة تغيرت فجأة بقرار من وزير الكهرباء و تم تعميمه على كل شركات الكهرباء في مصر
و مضمون التعديل الجديد بيقول ان لابد من مرور 4 سنين على التعيين قبل السماح بأجازة بدون مرتب
طيب أنا كان فات عليا سنتين بس و معنديش استعداد أنتظر كمان سنتين لو سافرت و أنا فوق الـ 30 حأبقى سافرت متأخر قوي
فقررت استقيل لكن رئيس مجلس الإدارة واعي قوي عندنا و مش بيقبل استقالات عموماً أنا قدمتها لو قبلوها خير و بركة
ما قبلوهاش أديني انقطعت عن العمل و يفصلوني
دعواتكم ليا ربنا يوفقني في شغلي في الغربة و اول ما أضبط أموري هناك حأرجع أدون تاني من هناك
سلامي للجميع :)
و السلام عليكم و رحمة الله و بركاته

هناك 46 تعليقًا:

عاشقه الفردوس يقول...

في امان الله

ربنا يصلح حالك ويوفقك ويسدد خطاك
وزي ماكانت جدتي بتقول

يجعلك في كل خطوه سلامه
:)))

بت خيخة وأى كلام يقول...

هتوحشنا والله يا محمد
ترجعلنا بالف سلامة وانت سالم غانم يارب
ابقى طمنا عليك دايما واكتب بوستات احكيلنا فيها عن غربتك
وابقى ابعتلنا صورك ونشوف صحتك جت على الغربة ولا لأ
تحياتى ليك
اختك خيخة

عصفور المدينة يقول...

وفقك الله بس خلي بالك بقى بلاش تعك في السعودية ولا تتكلم عن أشخاص
:)
عشان هناك أسهل حاجة تلبس قضية
:D
ومافيش رحمة قرايبنا هنا بيهرجوا بالنسبة لهم
روق كدة وركز وغير المود ابتسم للحياة

وفيه حكيم اسمه عصفور بيقول حكمة :

مش كل الكلام لازم يترد عليه ساعات بيكون السكوت أحسن رد

وفيه واحد حكيم تاني قال حكمة قديمة

اربط الحمااااار مطرح ما يحب صاحبه

دول أهم حكم انا شايف انهم يلزموك حاليا

إلى جانب دعائي لك بالبر والتقوى
وفقك الله

مهندس مصري يقول...

عاشقة الفردوس
================
آميين ربنا يسمع منك

بت خيخة و أي كلام
=================
الله يسلمك
و ان شاء الله أكتب من هناك
بس صور ايه ؟
من دلوقتي باصة لي في اللقمة
مش لما نبقى نأكلها الأول و بعدها نقول حنتخن و لا لأ
:)
هههههههههههههههههههههههههههههه
بأهزر

عصفور المدينة
=============
لا يا هندسة أنا هناك حأكون في حالي خالص
ربنا يسهل لهم بعيد عني يا عم
و حاضر حأفتكر الحكمتين دول قوي
ربنا يكرمك و يبارك لك يا أبو يحى

د/اجدع بنوته يقول...

ربنا معاااااااااك يارب

بالتوفيق عايزنيك ترفع راسناا

باذن الله ربنا يقويك يارب

وتكون تجربه زى الفل عليييك

Bella يقول...

ربنا يوفقك ويفتح عليك وييسر لك العسير

الحقيقة اخونا عصفور المدينة نصحك بنصايح ممتازة ياريت تاخد بالك منها كويس جدا خصوصا في السعودية

وربنا يوفقك ويبارك لك في كل خطوة تخطوها

وياريت تبقى تطمنا على اخبارك لما تستقر

في رعاية الله

سهر الليالى يقول...

هنفتقدك بجد والله يا باشمهندس
ترجع لمصر بالسلامه ناجح ومحقق كل اللى بتتمناه ان شاء الله
ربنا يوفقك ويجعلك الخير فى طريقك ايا ما كان

معلش على الروتين المؤرف بس عادى فى بلدنا كل يوم بحال لعله خير ومنعرفش بكره فى ايه

نستودعك الله
ولا تنسانا من دعائك فأنت هتكون على سفر ودعائك مستجاب

لا إله إلا الله محمدا رسول الله

nonoymm يقول...

في حفظ الله ورعايته
تروح تيجي سالم غانم بعون الله
واوعى تنسى المعلقة الي تقلب بيها رزقك
تحياتي ودعواتي

Eng.Omar يقول...

مع ألف سلامه يا هندسه وترجع بالسلامه بإذن الله

appy يقول...

ربنا يجعلك فى كل خطوه سلامه وحسنه

Soooo يقول...

ربنا يوفقك يا هندزه ويكرمك يارب ويرزقك رزق حلال طيب

هندزه
الله يكرمك اول حاجه تعملها تعمل عمره وتزور المسجد النبوي
وادعي ان ربنا يفرجها ويزيح الغمه يارب

عارف انك ممكن تكون دلوقتي اتجهت على المطار وممكن ماتقدرش تقرى تعليقي لفتره لغاية ماتظبط نفسك هناك

اول ماتوصل وترستق امورك بلغني عشان اخويا في جده ولو احتجت اي حاجه هيقف جنبك
ولو رحت الرياض ابن عمي هناك
لو هتروح الخبر .. دي بقى كلها صحابي
الدمام والقصيم بقى .. ولا اعرف حد فيهم

هندزا
اوعى تكتر في اكل الكبسه



تروح وتيجيلنا بألف سلامه
والله العظيم والله العظيم هتوحشني
ومنه لله اللي كان السبب في غربتنا بره البلد .. وجوه البلد



سلامووووووووووووز

النجم القادم يقول...

مع السلامة

تروحى وتيجى بالسلامة يارفيقى العزيز

النجم القادم يقول...

بالنيابه عن المهندس محمد

اشكر كل المدونين اللى عقلوا قبلى

وكتبوا حبهم وتعاطفهم مع محمد

وان شاءالله هو لما يظبط نفسه هناك هيدخل ويكمل تدوينه

ومتقلقوش هو رايح لناس مهندسين حبايبنا

وهو يعرفهم جيدا وعمل معم قبل ذلك

ادعوله بس ربنا يثبته ويوفقه فى غربته

آفاق الحرية يقول...

السلام عليكم
توصل بالسلامة ان شاء الله ياباشمهندس
ربنا يكرمك ويعزك ان شاء الله
دعوات حضرتك في الغربة بقي
هههههههه
تحياتي

somaa mahaba يقول...

نستودعك الله يا مهندس زمانك دلوقت هابط فى الرياض بقولك دور على بنت خالى وجوزها وسلملى عليها
وابقى سلملى على فهد اه دا مات صحيح طيب خليها عبد الله
وربنا يوفقك فى سفرك
خساره والله الشغل الحكومى لانه محدش بيلاقيه وعموما انا سمعت ان الشركه حتتخصخص ههههههه يعنى كدا كدا كانوا حيسرحوكم....بلاش حيسرحكومكم دى
حيصرفوكم مع جواب شكر مجعلص من الوزوز
تحياتى ليك سومه_87

somaa mahaba يقول...

يا سووو يا ناصح
وانا كمان ادعيلنا كلنا يا مهندس ان ربنا يفكها علينا وينصرنا ويهدينا
:))
تحياتى ليك سومه_87

بحبك يامصر يقول...

مع الف سلامه يا هندسه ان شاء الله تروح وترجع بالسلامه وان شاء الله تنجح هناك
وان شاء الله مع اول فرصه لله للعمره تدعلنا وربنا يرجعك لينا بالسلامه وطمنا عليك
تحياتى

الفاتح الجعفري يقول...

بشمهندسنا الكبير
ربنا يحفظك ويبارك فيك ويجعله خير لدنياك واخرتك
هتوحشني جدا والله ,استودعك الله الذي لاتضيع ودائعه
في حفظ ربي يابشمهندس
وجزاكم الله كل خير

حمادة زيدان يقول...

فى حفظ الله
وربنا يوفقك ان شاء الله

صاحب المضيفة يقول...

زودك الله التقوى

وبارك لك في عمرك ومالك ونفسك


مش تنسى العمرة طبعا والحج هناك


كان الله لك وبلغك ما تريد في الخير والطاعة

تحياتي ودعواتي

صاحب المضيفة يقول...

زودك الله التقوى

وبارك لك في عمرك ومالك ونفسك


مش تنسى العمرة طبعا والحج هناك


كان الله لك وبلغك ما تريد في الخير والطاعة

تحياتي ودعواتي

Ahmed Al-Sabbagh يقول...

ربنا يكرمك يا محمد

والله انت غالى علينا اوى

وكلنا بنتمنى لك كل التوفيق والنجاح

اللهم امين

اخوك احمد الصباغ

Gannah يقول...

أخى الكريم
اتمنى لك التوفيق و منتظرة اسمع اخبارك. ان شاء الله كل شىء سيكون على ما يرام الفترة الأولى هى اصعب فترة و لكن بعد ان تمر و تستقر ستجد ان الغربة تجربة تستحق المغامرة لان الحقيقة الاستقالة مغامرة بس نعمل ايه فى الحكومة اللى مش عايزة تسيب الناس تشوف مستقبلها.
اتمنى لك التوفيق فى عملك و ان يرزقك الله الصحبة الصالحة لانها خير معين على الغربة.
تحياتى من المدينة المنورة

طارق يقول...

ربنا يوفقك كان نفسى اسلم عليك قبل متسافر الله معاك

خمسة فضفضة يقول...

السلام عليكم ورحمة الله وبركاته

رنا يوفقك يا محمد وترجع بالسلامه يعد ما تحقق كل اللي تتمناه

سلام

بت خيخة وأى كلام يقول...

انا قلت اجى اروق المدونة وانضفها علشان لما تيجى متلقيش فيها عنكبوت
طمنا عليك يا محمد
اختك خيخة

صحفية روشة يقول...

تروح وتيجى بالسلامه بس ابقى تابعنا من هناك
ــــــــــــــــــــــــــــــ
اول مرة هطلب زيارة محتاجه جدا جدا اجابات على البوست الاخير بمدونتى
شكرا

خبيب يقول...

أعانك الله ووفقك

وقدر لك الخير

مهندس مصري يقول...

أنا وصلت مدينة حائل و الحمد لله الناس في الشغل كويسين و أخلاقهم سمحة و الحمد لله كل شئ تمام
أشكركم جميعاً
و حأكتب بالتفصيل في اول فرصة

احسن شاب في البلد يقول...

حد يقوله يا جدعان ان اهله اهم من المدونة

الله يحرق المدونات و سنينها

مش تكلمنا و تحكيلنا بالتفصيل ايه اللي حصل .. و لا الدقيقتين الخطف دول ينفعوا ؟؟

اخوك ... احسن شاب في البلد

Bongo يقول...

ربنا معاك و يوفقك ان شاء الله

و اول ما تعرف تدخل نت من هناك و تستقر متقطعش الجوابات هههه

لأ ان شاء الله خير و ربنا هيكرمك

منتظرينك و منتظرين خبراتك و ملاحظاتك عن رحلتك :)

سلام

somaa mahaba يقول...

ههههههه ايه اللى حدفك فى حائل يا مهندس الله معك عموما هى بقيت دلوقت احسن من 10 سنين يااااه عمر طويل
تحياتى ليك سومه_87

اوعى تفكر يقول...

مبرووووك مش عارف امتى اخلص واعمل زيك
الواحد لو فشل عايش فى البلد
مش هيلاقى ياكل جاتوووه

محمود المصرى يقول...

بسم الله الرحمن الرحيم

ربنا يوفقك اخى الكريم وييسر لك الامور ويرزقك الخير كله .

only spot يقول...

سلام عليكم
الحمد لله لوصولك بالسلامه وان شاء الله يهون عليك الغربه ومرارتها وتلاقى الصحبه الخيره الى تعينك علىيها وربنا يرجعك بالف سلامه وربنا يوفقك فى حياتك يارب
خالص تحياتى

مهندس مصري يقول...

د أجدع بنوتة
بيلا
سهر اليالي
عاشقة النقاب
المهندس عمر
آبي
سووووو
النجم القادم
آفاق الحرية
سومة
بحبك يا مصر
الفاتح الجعفري
حمادة زيدان
صاحب المضيفة
أحمد الصباغ
جنة
طارق
خمسة فضفضة
بت خيخة و أي كلام :)
صحفية روشة
خبيب
بونجو
اوعى تفكر
محمود المصري
only spot
====================
و كل الحبايب من المدونين
ألف شكر لمشاعركم الطيبة و سؤالكم عليا
أنا الحمد لله بخير و وصلت حائل و بدأت الشغل في المكتب بس لسه ما نزلتش الموقع و بأتكلم من سايبر بسرعة فمقدرتش ارد على كل واحد لوحده

البلد نضيفة و الشوارع واسعة و الأكل حلو و رخيص و أهو الواحد عمال يجرب حياة العزوبية و الغربة بقى
بس معايا واحد زميلي من دمنهور في نفس المكتب و وهو انسان محترم و يعتمد عليه بيعرفني نظام البلد و الشغل
و معايا 2 مهندسين مصريين كمان و مدير المشروع هنا مهندس سوري و فيه مساح ( بتاع مساحة ) سوداني و السكرتير سوداني و 3 مهندسيين فلبينين و سواق هندي و فراش هندي
بس كلهم ناس كويسين و الحمد لله
و ربنا يسهل و الشغل في الموقع يبقى كويس
:)
دعواتكم تاني :)

saso يقول...

مادام مبسوط
يبقي ربنا يوفقك وترجع بالسلامة

ويقدرك يارب تثبت نفسك في الشغل الجديدة

مثلية فقط يقول...

بالسلام و في امان الله

بتمنى لك كل التوفيق و النجاح
بتفهم مشاعرك لانو انا كمان بغربة

دير بالك عحالك و خلي ثقتك في الله و في نفسك قوية و اكيد الله بوفقك

خالص امنياتي و تحياتي اليك

Ahmed Mubarak يقول...

مره وحده كده هتسافر وتسبنا ..
مش عارف اقلك ايه .. بس ربنا يوفقك هتوحشنا .. يمكن متعرفنيش لكن انا عارف مدونتك كويس

ربنا بوفقك

أنونيمس يقول...

أخي العزيز

ربنا يوفقك ويكرمك

ويرجعك بالسلامه بعد ما تحقق اللي نفسك فيه

ادخل بقى ع المسنجر عشان عاوز ارغي معاك

:))

فاتيما يقول...

مهندس يا مصرى
إيه دا ؟؟
اغيب كام يوم ألاقيك سافرت و وصلت و كمان دخلت المدونة ؟؟؟
طب دانا شكلى وحش قوى خالص كدا
انا أسفة يا محمد على تقصيرى و حقك عليا
و الف حمدلله على السلامة
و عقبال ما نقولهالك و انت راجع مصر بالسلامة مجبور الخاطر يا رب
و إن شاءالله ربنا يوقفلك ولادالحلال فى كل مطرح تخطيه
و منتطرين بوستات
مهندس مصرى فى السعودية
تحياتى يا محمد
اختك فاطمة

غير معرف يقول...

ربنا يوفقك يارب يا محمد
وتكون الصحبة اللى معاك
تكون مريحة ومتسببلكش اى مشاكل من اى نوع
ابقى طمنا عليك من وقت للتانى

سلام
اختك خيخة

Rainbow يقول...

ربنا معاك و يوفقك
و يكون لك رزق كتير هناك

مـحـمـد مـفـيـد يقول...

ربنا يعينك ويقويك
ويوفقك في هذه الخطوه الجديده

هبههههووب يقول...

ترجع لمصر بلدك بالسلامه يا بشمهندس
ربنا يقويك على الغربه ويوقف لك ولاد الحلال
لا اله الا الله

دعوة الفردوس يقول...

السلام عليكم
أنا مدخلتش نت من زمن بس اتفاجأت بخبر سفر حضرتك
ربنا يجعله خير يارب لك في دنياك واهلك ومالك و يرجعك بالسلامه و ترتاح في الشغل الجديد

بس اظن المصريين مضبطين الدنيا هناك ده تلات ترباع الشغل مصريين احسن تضبيط والله يارب ترتاحوا مع بعض