الجمعة، مايو 02، 2008

تعريف بالناس و الشغل في حائل

كل الحبايب من المدونين
ألف شكر لمشاعركم الطيبة و سؤالكم عليا
أنا الحمد لله بخير و وصلت حائل و بدأت الشغل في المكتب بس لسه ما نزلتش الموقع و بأتكلم من سايبر بسرعة فمقدرتش ارد على كل واحد لوحده
البلد نضيفة و الشوارع واسعة و الأكل حلو و رخيص و أهو الواحد عمال يجرب حياة العزوبية و الغربة بقى
بس معايا واحد زميلي من دمنهور في نفس المكتب و وهو انسان محترم و يعتمد عليه بيعرفني نظام البلد و الشغل و معايا 2 مهندسين مصريين كمان و مدير المشروع هنا مهندس سوري و فيه مساح ( بتاع مساحة ) سوداني و السكرتير سوداني و 3 مهندسيين فلبينين و سواق هندي و فراش هندي
بس كلهم ناس كويسين و الحمد لله
و ربنا يسهل و الشغل في الموقع يبقى كويس:)
دعواتكم تاني :)
ده كان تعليقي الإسبوع اللي فات
أكمل معاكم حكاية الإسبوع ده من السايبر برضه
نزلت الموقع
و يبعد عن حائل 80 كم منهم حوالي 35 كم بس أسفلت و الباقي طرق ترابية صحراوية
المشروع اللي شغال فيه عبارة عن حقل آبار للمياه مكون من 18 بئر يتم تجميع مياههم عن طريق شبكة من مواسير الزهر المرن في خزان كبير سعته 50 الف م3 و بعد تطهير المياه بالكلور يتم ضخها عن طريق محطتين طلمبات عبر خطين مواسير صلب الى خزانات أخرى بعيدة في الجبال بإجمالي أطوال للخطين يزيد عن 200 كم
مديري في الموقع هو المهندس عبد الخالق و هو فلبيني مسلم من مسلمين جنوب الفلبين و يبلغ من العمر 52 سنة و رجل بشوش و ابتسامته الرائعة لا تكاد تفارق وجهه
و معي أيضاً المهندس جويل و هو فلبيني كاثوليكي مهندس مدني عمره 35 سنة
و المهندس رودريك فلبيني كاثوليكي و يقوم بفحص لحامات المواسير الصلب و عمره 39 سنة و مساح سوداني اسمه محمد 31 سنة و مساح مصري لسه جاي جديد اسمه احمد 35 سنة و فيه مهندس مدني مصري لسه جاي جديد و ما نزلش الموقع لسه اسمه المهندس ماهر 45 سنة
غير طبعاً حبيبي اللي من دمنهور زيي المهندس أحمد بلال مدني 28 سنة و ده شغال في موقع أحد خزانات الجبال
انما انا شغال في حقل الآبار و المجمع السكني و محطة الطلمبات
و فيه في المكتب في حائل المهندس مختار مهندس كهرباء سوري 62 سنة و هو مدير المشروع مؤقتاً لحين وصول مدير جديد من المهندسين المدني ذوي الخبرة
و المهندس أيمن ميكانيكا مصري 35 سنة
و السكرتير السوداني أبو بكر
و زميلي العزيز المهندس خالد مصري مدني 39 سنة و هو يسكن معي في نفس الغرفة في السكن
السكن عبارة عن فيلا خارج حائل و نسكن بها جميعاً بالإضافة الى السائق الهندي إكرام الدين و الخادم الهندي سامي
كل الناس هنا في الشغل محترمين و أخلاقهم عالية و أعتقد أغلبهم حيبقوا أصدقاء أعزاء ليا
يا بركة دعواتك يا أمي
بالإضافة لدعواتكم كلكم

هناك 43 تعليقًا:

Miss. Sosa يقول...

السلام عليكم

تقبل مروري الاول
الله يعينك ويوفقك وترجع بلدك فى اقرب وقت بعد ما تكون حققت كل ما تتمناه.

تحيــاتى

مـحـمـد مـفـيـد يقول...

ربنا يهون عليك غربتك ويرزق خير الرزق ويعينك في عملك ويقدر لك كل الخير

عاشقه الفردوس يقول...

اهلا يابشمهندس

ربنا يفتحها في وشك كمان وكمان ويصلح حالك ويكرمك ويوسع رزقك يارب



كويس انك بعتلنا ربنا يكرمك يارب

أحسن شاب في البلد يقول...

انت يا عم انت ... داري على شمعتك تقيد... دا مش كلامي
مش فيه حديث بيقول .. و استعينوا على قضاء حوائجكم بالكتمان .. دا غير ان الحسد مذكور في القرآن
ربنا يبعد عنك الحسد و ولاد الحرام

خمسة فضفضة يقول...

السلام عليكم ورحمةالله وبركاته

حمد الله علي سلامتك يا باشمهندس محمد ، ماشاء الله اللي اعرفه عن حائل انها بلد جميله جدا وتقريبا جوها زي مصر ، اخو زوجي كان فيهاوكان بيشكر فيها جدا وكفايه انها ساعتين بس من المدينه المنوره

ربنا يوفقك وتحقق كل اللي تتمناه يارب

سلام عليكم

صاحب المضيفة يقول...

ربنا يهون غربتك ويرزقك الرزق الحلال الطيب


ويرزقك اولاد الحلال اللي يعينوك على الخير والصلاح


دمت بسعادة

فرنسا هانم يقول...

حمدلله على سلامتك يا هندسه
وربنا يوفقك ويبارك فيك
ويجعل رزقك على الابواب
انت كده تشكر بتطمنا عليك
نرجوا منك المتابعه معنا

النجم القادم يقول...

حبيب قلبى الغالى منور وربنا

اهلا بيك وازيك وازى الشغل وازى الناس هناك

ايه وصلتنى رنتك

وصلتلك رسالتى ورناتى

يارب تكون بخير تحياتى

لكى حبيب قلبى

وابقى طمنى عليك على الايميل زى ماقتلى

وانا هكلمك قريب

فاتيما يقول...

ربنا يثبت إقدامك يا رب
و يرزقك من وسع
و يفرحنا بيك يا مهندسنا
و خلى بالك من روحك و صحتك
و إبقى لو رحت جار النبى الغالى
إدعيلى يوسف يرجع و إدعى كمان كل اللى نفسه فى حاجة من اخواتك المدونين و تكون فيها خير ليه و للناس تحصل
و ربنا يفرجها على الكل
و هفتقدك فى تغطيات اخبار ما سيحدث يوم إضراب 4 مايو بس البركة برضو فى الصباغ و دمت بكل خير يا محمد

جمعاوى روش طحن يقول...

ألف مبروك يا هندسة

و حمد لله ع السلامة

و تابعنا على طول بقى بأخبارك

ماتحسسناش بغربتك الله يكرمك

عصفور المدينة يقول...

ربنا يوفقك ويسعدك يا حبيبنا

آفاق الحرية يقول...

الحمد لله ان حخضرتك رجعت بالسلامة
ربنا يوفقك ان شاء الله ياباشمهندس
عايز حضرتك تشوفلي عقد بقي من دلوقتي
ان شاء الله جايلك جايلك
لا تقلق
هههههههههههههه
تحياتي

بت خيخة وأى كلام يقول...

ياااااااااااااااه
كنت مستنية البوست ده علشان نطمن عليك
حمدالله على سلامتك

والحمدالله ان الناس اللى معاك كويسين لان دى اعتقد اهم حاجة
علشان تعرف تركز فى شغلك ومايكونش فيه مشاكل مع زمايلك فى السكن من اى نوع

طمنا عليك دايما يا محمد
سلام
اختك خيخة

بت خيخة وأى كلام يقول...

انا نسيت ادعيلك

ربنا يوفقك ويفتحها فى وشك ويوسع رزقك
ويباركلك فيه
ويديك الصحة
ويحبب فيك خلقه
وعلى راى تيتا الله يرحمها
يجعلك فى وش الناس جوهرة
وفى حنك الناس سكرة
ويحبب فيك الرب والعبد والحصى فى الارض
دى تيتا برضه اللى كانت بتقول كدة
لو لاقيت دعوة تانية هابقى اجى اكتبهالك
سلام
اختك خيخة

بحبك يامصر يقول...

ربنا يطمنا عليك دايما ياباشمهندس
وربنا يسهلك الصعب يارب

غير معرف يقول...

مهندس معماري اسكندراني

حمد الله على السلامة يا هندسة , وعلى فكرة انا قريب منك برده لاني بمنطقة الجوف لو تعرفها

بيني وبينك حوالي 400 كم

وانا ان شاء الله نازل حائل عن قريب

وانا كتبتلك رقم جوالي ابقى اتصل بي وطمني عليك لو كنت محتاج اي حاجة
0507180239

Gannah يقول...

الحمد لله ان الامور ماشية كويس. يا رب دايما. كويس انك مبسوط من الناس فى الشغل لان ده مهم جدا و بيفرق و يا رب يكرمك
التجربة حلوة مش كده ولا بدرى الحكم عليها
لو فعلا حائل قريبة من المدينة تبقى فرصة كويسة. المدينة جميلة جدا و المسجد النبوى رائع
ربنا معاك
تحياتى

النجم القادم يقول...

حبيب قلبى ليك عندى 3 تاجات تعالى خدهم

Ahmed Al-Sabbagh يقول...

حبيبى
ربنا يكرمك حمدلله على السلامة مرة تانية
ويارب ييسر لك الحال وتبقى مبسوط دايما
ومعانا ووسطنا فى كل وقت

تحياتى لك

احمد

wafaa يقول...

ربنا يهون عليك الغربة
ويكرمك فى الدنيا والاخرة

nonoymm يقول...

حمد الله على سلامتك ربنا يهونها عليك يارب وتبقى خضرا وبرحة معاك بس قول يارب
تحياتي

Rainbow يقول...

حمدلله على سلامتك و يبارك ربنا لك فى شغلك الجديد
و يارب تثبت لنا من خلال تعاملاتك مع المصريين ان المصريين بره مصر فعلا بيكونوا كويسين مع بعض مش زى ما دايما بنسمع انهم بيغيروا من بعض

تحياتى

محمود الدوح يقول...

حبيب قلبى
الف مليون و32 ونص حمدلله على السلامة

عامل اية ؟ اية السؤال دا
ماانت قايل على كل حاجة

طمنا عليك اول باول
من سايبر ولا اقولك ان شالله من سايبر
ههههههههه

اليعقوبي يقول...

السلام عليكم ازيك ياهندسة الف حمد لله علي سلامتك
ويارب ينولك الله ماذهبت من اجله ويصبرك علي الغربة بس والله وحشتني
لعله خير متقولي صحيح اهندسة مفيش
بورصة زي هنا ولا ايه
ههههه
ربنا يوفقك يارب
والسلام

أنونيمس يقول...

حمد الله ع السلامه يا برنس
اشطه ع البث المباشر اللي من حائل يا بشمهندس

:)

ربنا يكرمك كده ويعترك ف ولاد الحلال اللي زيك

المبدع الناقد يقول...

ربنا يوفقك

http://fekrety.blogspot.com/
زر مدونتي استاذي الفاضل

somaa mahaba يقول...

مبروك على انك استقريت والحمد لله
اللى بستعجبله انك رايح موقع لحفر مياه السعوديه بتجيب ناس يحفروا عشان الميه واحنا النيل بكل خيره هنا ومش عارفين نشغل شعبنا يستغله اقولك ايه البلد عاوزه فيضان يشيل الرواسب اللى مكمكمه فوق النيل
ربنا معاك
تحياتى ليك سومه_87

هبههههووب يقول...

حمد الله على وصولك بالسلامه يا بشمهندس
---
حلو اوى انك بعيد عن مصر وبتكتب لأهلها
مصر ف دمك وبتحبها
واحمد ربنا انك مشيت منها قبل ما تشوف الى حصل لهاوحصل ف اهلها
غلاء الاسعار هنا مخلى الناس مولعه نار وكل حاجه غليت
ومحدش بقى طايق التانى
الناس الميسورة عايشه
لكن الغلابه هيكلوا التراب بعد شويه
قول الحمد لله
واستحما الغربه
كتير من الشباب دلوقتى بتمنوا يخرجوا من مصر ويشوفوا حياتهم برة ويعرفوا يعملوا حاجه ف الزمن دا
يالا الحمد لله
وربنا يوقف لك ولاد الحلال ويسترها معاك دنيا واخرة وينور لك طريقك
قادر يا كريم
سلام مؤقت

Bongo يقول...

السلام عليكم

حمد لله علي سلامتك يا باشمهندس

ربنا يكرمك و يوفقك في شغلك
و كل حاجه تمشي زي ما انت عايز

متقطعش الجوابات بقي و متطولش الغيبة علينا :D

سلام

بت خيخة وأى كلام يقول...

انا مستنية اهه لما تترستق وتبعتلى سلفة

ربنا يوفقك يارب يا محمد

تحياتى ليك
اختك خيخة

أحمد مصطفى يقول...

مبروك الشغل الجديد يامحمد

انت انسان محترم وتستهل كل خير

اسف لغيابى الطويل


وربنا يوفقك

أخوك

أحمد مصطفى

بت خيخة وأى كلام يقول...

ها ايه الاخبار عندك يا محمد
كله تمام؟
مش ناوى تكتبلنا بوست بقى مفصل عن الحياة هناك عاملة ازاى

appy يقول...

واحشنا جدا وكويس ان حائل عجبتك

كده لو احتجت حاجه هناك انت عارف احنا مسيطرين صفر بس وهتلاقينا جنبك بعت لك السلام مع النجم القادم يا رب يوصلك

عبدالرحمن فارس - مدونة لساني هو القلم - يقول...

اخبارك ايه يا بشمهندس

حمدلله علىسلامتك هناك

معلش عارف اني مقصر معاك حبتين

بس دعواتك الشغل برضه مظبط الواحد هنا

يارب تكون ديما بخير


تحياتي
و
محبتي

مهندس مصري يقول...

سلامكم كلكم وصل يا جماعة بس أنا مش لاقي فرصة أقعد على النت خالص
في أقرب فرصة حأكتب بوست طويل
حاليا بأقرأ بوستاتكم

فاتيما يقول...

معلشى
على مهلك خالص يا محمد
بس إحنا مفتقدينك برضو
ربنا يصلح لك الاحوال دايما
الأنشغال عموماً احسن
على الأقل موش هتلاقى وقت تعقد مع نفسك لوحدك و تبتدى تشعر بالغربة
و يهجم عليك الأحساس دا
أصله أحساس غادر بيستنى لما تبقى لوحدك محدش حواليك و يروح مفترسك و انت بقى و قدرتك على المقاومة
ربنا يثبتك و لما تحس بكده
إحنا هنا مستنيناك
ربنا يكرمك دايما
و سامحنى على التقصير

ام نوران يقول...

الحمد لله على سلامتك و ربنا يطمنا عليك .. نوران بتسأل عليك و بتقول ( دادا بح ) :))
كلنا بندعيلك ... في امان الله

بت خيخة وأى كلام يقول...

وانت عامل ايه؟
مبسوط ولا ايه؟
وحائل حلوة معاك
وبتضحك ولا ايه؟

ايه الاخبار يا محمد
طمنا عليك

سلام
اختك خيخة

فاتيما يقول...

اخبارك إيه يا باشمهندس ؟؟
طمننا عليك فى أقرب وقت
أنا بغنى فى الكورس ورا خيخة
أنت عامل إيه؟

بت خيخة وأى كلام يقول...

صفحة تعليقاتى النهاردة نورت بتعليقك يا محمد
مفتقدينك جدا

ربنا يوفقك يارب ويرزقك
ويحبب فيك خلقه
ويبعد عنك ابن الحرام وابن الكلب
والشيطان ابن التيييييت

طمنا عليك دايما كدة من وقت للتانى

اختك خيخة

بت خيخة وأى كلام يقول...

ازيك يا محمد
يارب تكون بخير
اختك خيخة

د/أبويحيى وادم يقول...

السلام عليكم ورحمه الله وبركاته
آخى الكريم
لما أراك لم تشارك معنا فى حملتك إلى الآن ؟
أخي العزيز : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أخي الحبيب أن مشاركتك في هذه الحملة سوف يكون احد أسباب نجاحها ونشر لغتك
ندعوا الى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم

سبهللة عالاخر يقول...

فينك من يوم 2 مايو مش بتكتب ليه؟؟
لعل المانع خير
على فكرة انا عشت فى الرياض سنه تقريبا
وحسيت بالغربة بس لما نزلت مصر نهائى
الحياه فه فى السعودية جميلة جدا يكفى ان الواحد لما يزهق شويه يعمل عمرة او يزور قبره صلى الله عليه وسلم
بصراحة المدينة المنورة ومكة عندى بالدنيا واتمنى ارجع تانى
وفقك الله فى عملك وحاول تشوف الحلو فى المكان اللى انت فيه ايا كان