الاثنين، يونيو 16، 2008

حائل تاني :)

السلام عليكم و رحمة الله و بركاته
نتكلم كما طلبت الجماهبر العريضة :) -خيخة و فاتيما يعني - عن حياتي بالتفصيل في حائل
قاعد في فيلا في حي اسمه النقرة و ده بره حائل بحوالي 10 كم و حيث ان مفيش معايا عربية فأنا بأكون شبه محبوس في الفيلا دي طول الليل بعد الشغل لأن ما ينفعش حد يتحرك في البلد دي مشي على رجليه كله راكب عربيات و مفيش أي مواصلات عامة
معايا في الأوضة الواسعة 3 مهندسين زي العسل ربنا كرمني بيهم بركة دعاء أمي و كل اللي يحبوني
المهندس خالد ( مدني ) و المهندس أحمد منصور ( مساحة) و المهندس محمد عبد العظيم ( ميكانيكا -لحام )
التلاتة مصريين و التلاتة من أحسن و أطيب و أجدع الناس الحمد لله اللي كرمني بيهم
بأصحى من النوم الساعة 6.30 ص و أصلي و أفطر و ألبس و أكون راكب مع البشمهندس عبد الخالق العربية الساعة 7.30 ص بالضبط و معانا المهندس محمد كامل مهندس كهرباء مصري و نتجه لموقع مجمع حقل آبار الشقيق
و بعد رحلة ساعة و ربع و أسفلت يشيلنا و مدقات صحراوية تحطنا بنوصل الموقع و ده في قلب صحراء جبلية و مفيهوش شبكة موبايل غير في نقطة واحدة عالية عند خزان المياه العملاق اللي بنبنيه هناك و المكان ده يعتبر سنترال الموقع كل اللي نفسه يتكلم في الموبايل بيطلع هناك يلقط الشبكة
الشغل الحمد لله كويس و مش صعب و في نفس الوقت الواحد بيشوف حاجات جديدة و يزداد علم و خبرة بس الشغل كتير و كل حاجة بأستلمها بطلب فحص يقدمه المقاول و أكتب فيه ملاحظاتي و اللي بتكون مع ملاحظات البشمهندس عبد الخالق فبنتفق حنكتب ايه و بعدها هو يكتب انجليزي و أنا تحتها أكتب الترجمة العربي
أنا بأتكلم معاه إنجليزي علطول و ده بيقوي لغتي اللي الحمد لله أقوي من لغة معظم الناس هنا
و بكده بأتعلم الهندسة بلغتين جداد الإنجليزي - مصطلحات العمل مع العمال في الموقع و ليس المصطلحات النظرية اللي درسناها في الكلية - و السوري- اللهجة السورية - لأن كل مهندسين المقاول سوريين و لهم ساعات مصطلحات عجيبة بس أهو الواحد بيتعلم
في استراحة من 12.00 لـ 1.00 بس غالباً الواحد بيقضيها شغل في المكتب في كتابة الملاحظات و التوجيهات أو طباعة الصور للأعمال -ما إحنا معانا كاميرا ديجيتال و بنصور كل حاجة في الموقع - أو في عمل التقارير
بيخلص الشغل الساعة 3.30 م و بنروح ساعتها نكون في الفيلا حوالي الساعة 5.00 م
مهندسين المقاول هم :- المهندس علي طه ( مدني ) و المهندس طلال ( معماري ) و المهندس معاوية ( ميكانيكا ) و المهندس ساجد ( كهرباء ) و كلهم ناس عسل بجد
و خصوصا ً علي و معاوية بيتحطوا على الجرح يطيب
و مدير الموقع للمقاول هو المهندس ايليا ( مدني ) و كلهم من سوريا و كلهم ناس قمة في الإحترام و جودة و دقة العمل لدرجة عمري ما شفتها في مصر
لما بنروح غالباً بنتغدى في مطعم قريب من الفيلا (رز و ربع فرخة ) أو بنتغدي أي معلبات في البيت
و بعدها يبدأ الملل في الفيلا حتى تاني يوم الصبح
صحيح ساعات بأشقر على التلفزيون و بأقعد عليه لما يكون العدد قليل و بأحاول أقنع الناس نتفرج على mbc action أو mbc 2 بدل ميلودي أفلام و روتانا سينما
بس احنا 15 مهندس في الفيلا غير الـ 2 الهنود يعني 17 واحد على تلفزيون واحد في فيلا مقطوعة بعيد عن البلد و بعيد عن السايبرات و بعيد عن كل حاجة
و بأنام قبل 12 بالليل و أصحى تاني يوم و هلما جرا
الإقامة بيقولوا جاية بكرة و ده حيكون بداية تحرك الواحد علشان يقدم في مدرسة تعليم القيادة و يحاول يطلع رخصة لأن البلد دي لابد فيها من العربية لأن المسافات بعيدة قوي عن بعضها
و بيقبضونا متأخر بتاع 20 يوم عن بداية الشهر يعني دايماً ماسكين علينا 20 يوم بس ده العادي هنا و أقل من العادي
المهم انهم بيقبضوا بإنتظام مش زي غيرهم
أنا الحمد لله كويس و صحتي كويسة و إضطريت أتعلم أغسل هدومي على إيدي بنفسي و ان كانت القمصان و البنطلونات و الترنجات بأوديها المغسلة
و شكلي حأضطر أتعلم الطبيخ
و يوم الجمعة بنصلي في أي مسجد فيه خطبة و مش شرط الجامع الكبير اللي بيلم أغلب البلد و نروح بعدها سوبر ماركت باندا و نجيب بقالة الإسبوع و ده أكبر سوبر ماركت في حائل
دي أهم التفاصيل دعواتكم ليا و أنا حأدعي لكم في أول عمرة إن شاء الله بعد ما الإقامة تيجي
سلام
:)

هناك 20 تعليقًا:

عصفور المدينة يقول...

ربينا يقويك يا حبيبنا

بس مش كثير شوية المظاهرة اللي في الفيلا دي

فاتيما يقول...

محمد
إنت لازم مع أول قبضية تجيب كمبيوتر
عشان تدخل منه على النت و تتونس بدل القعدة و الملل اللى بعد الشغل دا
هتعرف تتواصل معانا و مع أهلك فى مصر
و كمان تتفرج فيه على الأفلام الاجنبى مدام اللى معاك ذوقهم عربى بس ...
متهيلى هيفرق معاك شوية
السوريين فيهم كتير من المصريين
خفة الدم و الجدعنة و ساعات النصاحة
و مبيعرفوش يغدروا على عكس جنسيات آخرى
أنا بكلم سيادتك من واقع خبرتى لما إتغربت أربع سنين و اتعاملت مع جنسيات كتير ...
خلى بالك من روحك يا ريت
و ربنا يسهل و تعرف تتحرك بحرية اكبر فى البلد
و موش عاوزة اوصيك بقى و انت قصاد الكعبة تفتكرنى و تدعى ليوسف ينوبك فينا ثواب
تحيتى يا باشمهندس
و ربنا يفتحها عليك من وسع

جمعاوى روش طحن يقول...

طول عمرك باشا و الله


فرحتنا و الله


و إبقى طمنا عليك دايما الله يكرمك

عاشقه الفردوس يقول...

الله يعينك
وباذن الله تشتري سياره قريبا

وفقك الله

صاحب المضيفة يقول...

ربنا معاك ويهون غربتك على خير

انا قعدت طفولتي في السعودية ومقدر كل كلمة بتقولها

لكن احمد ربنا انك في حائل

يعني الدنيا هناك جوها حلو غير اماكن كتير زي الولعة في السعودية

ربنا معاك ويردك من غربتك على خير

نونو يقول...

ربنا معاك يارب
شوية نصايح بما انكي ست بيت يمكن تفيدك
الغسيل انقعه في ميه ومسحوق م الصبح لحد ما ترجع هيسهل عليك غسيله
سهل اوي تشتري فرخة وتحطها في شوية مية وخل ملح عشر دقايق وتتشطف هتبقى زي االفل
تحط مية وتغلي تحط الفرخة فيها تستوي ومعاها حبهان وقرنفل وملح وفلفل
وتحمر مكرونة وتحط عليها شوربةمن الفرخة تغطيها وشوية ملح وفلفل صغار واول ما تغلي توطي النار لحد ما تستوي
دي اكلة سهلة ااوي بدل اكل المطعم
ولوعاوز اكلات سهلة تاني اكتبلك بس تامر
ربنا يهون عليك غربتك يارب

Bongo يقول...

السلام عليكم

ربنا يقويك ان شاء الله و يوفقك

الحمد لله انك كويس و بخير

غسيل و طبيخ :]
كويس كويس بتتعلم خبرات جديدة اهو :D

كل ده بيزود خبرتك و معرفتك و اكيد بيعلمك تعتمد علي نفسك اكتر و دي حاجه كويسة اوووي ..

و ان شاء الله ترجع لأهلك بالسلامة

ربنا يكرمك ان شاء الله و هندعيلك اكيد .. :)
تحياتي

بت خيخة وأى كلام يقول...

لولولولولولولولى
محمد ظهر يا رجاااااااااالة
يااااااااااااه
والله عينى دمعت لما شوفت البوست بتاعك الجديد

الحمد الله انك بخير
يارب دايما كل اللى حواليك يكونوا كويسين معاك

وترجعلنا بالسلامة يارب يا محمد

الا صحيح لما قمصانك وبنطلوناتك وترنجاتك بتوديهم المغسلة امال بتغسل ايه على ايدك؟

نيهاهاهاهاهاهاهاع
سؤال خبيث مش كدة؟


سلام
اختك خيخة

eng يقول...

ربنا يعينك ويوفقك ان شاء الله
بس متهيقلي ان قعدة المهندسين دة متتعوضش خصوصا لما يبقوا شخصيات كويسة ومن بلدان مختلفة
وربنا يوفقك ويكرمك

MerMaid يقول...

محمد محمد محمد

وحشتني جدا جدا

والله بجد
طمني عليك

حمد الله علي سلامتك و ربنا يوفقك يارب

تحياتي

آفاق الحرية يقول...

السلام عليكم
دوحشتنا والله ياباشمهندس
ربنا يقويك ويعينك
سلاماتي لحضرتك

أحرار ولكن يقول...

ربنا ويوفقك ان شاء الله
و طمني عليك

النجم القادم يقول...

حبيب قلبى الغالى وحشنى موت

ايه ياعمنا فين رناتك ماشى عارف انك مشغول

ربنا يعزك يارب وتكون موفق ويلا علشان تجبلى n95 معاك وانت جى

هههههههههههههههههههه

ربنا يكرمك ياهندسة

ولو فاضى ابقى جاوب على تاج الشباب والبنات من النجم القادم

انا عارف انك مشغول بس يلا ابقى صور نفسك وانشر الصور علشان نطمن انك لسه رفيع مطخنطش ههههههههههههههههه

ربنا يوفقك يارب

فاتيما يقول...

اخبارك أيه يا باشمهندس دلوقتى ؟؟
إن شاء الله تكون بألف خير
تحياتى

زكرياء يقول...

مساء النور على مهندسنا المغترب،
كيف الأحوال؟ إن شاء الله تكون مرتاح نفسيا في وسط الناس الكثيرين في السكن! و تكون تعايشت مع المكان الجديد...اشتقنا لك يا صديقي.
ادعو الله ان يوفقك و ان يعينك.

تحياتي
زكرياء

بت خيخة وأى كلام يقول...

اتعلمت السواقة ولا لسة

ربنا يكرمك يارب

طمنا عليك دايما

سلام
اختك خيخة

mohammed alsha3r يقول...

ربنا يوفقك ياهندسه
وان شاء الله ترجع ارض الوطن
وعلى فكرة انا كنت سعيد لما قابلتك فى ساقيه الصاوى

مهندس مصري يقول...

عصفور المدينة
=============
الفيلا دورين 7 أوض و 5 حمامات و مطبخ واحد و تليفزيون واحد و أهي ماشية
دعواتك يا هندسة

فاتيما
=======
ربنا يسهل
و دعيت لك والله
ربنا يستجيب مني و منك

جمعاوي روش طحن
==============
الله يكرمك و مبروك التخرج
:)

عاشقة الفردوس
==============
يسمع من بقك ربنا

صاحب المضيفة
============
الحمد لله على كل حال يا باشا

نونو
=====
آميين
و أكتبي كل النصائح و الأكلات الممكنة و منكم نستفيد لأحسن أنا غلباااااااااااااااااااان
:)

بونجو
=========
و عليكم السلام
الف شكر و ربنا يمع منك
و أهو فعلاً كلها خبرات على كل لون

بت خيخة و أي كلام
=================
أي دمعة حزن لا لا لا لا
:)
زغروتك دي غالية عندي يا أم شريف
بس انا ما عرفتش انتي اشتغلتي ايه و فين
ثم صراحة أنا ساعات بأتكسف لما بأقرأ بعض الكلام في بعض بوستاتك يمكن علشان أنا لسه عازب و ما دخلتش دنيا
الله أعلم
بس أعتقد في حاجات كتيرة ممكن تتفهم بالتلميح بدون تصريح وكل لبيب بالإشارة يفهم
لكن عموماً انتي عارفة معزتك عندي كأخت و ما عاش و لا كان اللي يشتمك
أدي تقييمك يا ستي بس عندي مش عندك
:)
ربنا يكرمك انتي و هاني و شريف و جميع الإخوة المستقبليين ان شاء الله
:)

eng
=====
الحمد لله أغلبهم شخصيات كويسة

عروسة البحر
===========
وانتي كمان يا غالية
اطمني
الحمد لله
الحالة كويسة و بتتحسن بعد العمرة
آمين

أفاق الحرية
===========
أحرار و لكن
==============
شكراً
:)

النجم القادم
=============
أنا بأتكلم من السايبر خطف كده
فمش حينفع أجاوب تاجات
و بعدين الجهاز مفيهوش فتحة usb لأنه قديم فمش حينفع أوريكم صور العمرة
معلش خيرها في غيرها
كلها كمان شهر و ان شاء الله أدخل dsl و أجيب لاب توب و أهيصكم صور
بس لما أستقر حأكمل في الفيلا و لا حأخد سكن برة في قلب حائل نفسها

فاتيما
========
تابعونا تجدوا كل جديد
:)

زكرياء
=======
حبيبي يا سابقني في الغربة
أديني بأحاول أتأقلم و الحمد لله حاسس بخير ان شاء الله

بت خيخة
=======
لسه ما أخدتش جواب من المكتب في الرياض للمرور في حائل
بيقولوا الجواب جاي الإسبوع الجاي و ممكن أبدأ تعليم السواقة الإسبوع اللي بعده و دي مدتها 10 ايام و بعدها أخش امتحان الرخصة
ادعي لي
و إدعوا لي كلكم

محمد الشاعر
============
و أنا أسعد يا باشا

نونو يقول...

وصفة للخضار
اي نوع خضار بيتغسل ويتقطع ماشي
البطاطس تقشرها الاول وتغسلها وبعدين تقطعها مكعبات لو عاوز تطبخها بصلصة مثلا
الامهم تغسل الخضار وتقطعه وبعدين تخرط يعني تقطع او نبشرها بالمبشرة البصلة يعني
وبعدين تحط اسهلك معلقتين صلصة وملح وكمون وفلفل وشوربة من فرخة عندك ولا من سلق لحمة
وتكون الشوربة مغطية الخضار قيمة 3 سم كدة وتغطي الحلة لحد ما تبدا تغلي
تكون اصلا فيه لحمة مسلوقة تاخدها اللحمة وتحطها على الخضار يكمل سوا مع الخضار يخدلهم غلوة مع بعض يعني
لو عاوز في الاخر تحط ملعقة سمن ماشي
الصحي كفاية اوي الشوربة ودهون اللحمة
تسلق اللحمة او الفراخ ازاي زي ما قلتلك فوق الفراخ واللحمة يتحطوا في المية المغليه
تعمل رز ازاي هقولك اسهل رز وهو الرز الابيض البلدي
بتحط الرز وتغسله كويس بعد ما تنقيه وبعدين تحطه في حلة مع ملح وملعقة سمنة والمية تكون كوب رز عليه كوب ونص مية
اول ما تغلي توطي عليه شوية وهيستوي
السعودية الرز عندهم بسمتي
تغسله كويس
وتحط على الشوربة ملعقة صلصة وكركم وحيهان وقرفة ومون وقرنفل وبصلة مبشورة وجزرة مبشورةوملح وفلفل وتسيب الشوربة تغلي بالحاجات دي بعدها ممكن تصفيها بالمصفاة الالمونيوم او لا براحتك انا ما بصفيهاش
بعدها هتحط الرز في الحلة والشوربة عليه البسمتي بيحتاج شوربة اكتر يعني كوب بسمتي عليه كوبايتين شوربةويمكن يحتاج كمان ربع كوب كمان
المهم اول ما تغلي الحلة تهدي النار برضه ودة كل فترة تقلب
لما يتشرب المية كلها ولقيته لسة ما استواش تحط الربع كوب شوربة مضاف له ملعقة سمن
والنار برضه هادية
وبالهنا واي حاجة تعوز تستفسر
يسعد\ني اوي والله
تحياتي

مصعب الجمال يقول...

حائل حلوه جداً ..

أنا عشت فيها جزء من فترة الطفولة لحد سنة أولى ابتدائي ..

في حي اسمه " شراف " تسمع عنه ؟

أنا فاكر كمان ان كان في حي اسمه
" صديان "