الأربعاء، يونيو 25، 2008

الحمد لله عملت عمرة

الحمد لله عملت عمرة
من هنا سهلة خالص الشركات اللي بتنظمها اسمها حملات
الحملة طلعت الأربعاء الساعة 2.30 م و رجعت الجمعة 8.30 م بإقامة يوم بليلة في مكة و نص يوم في المدينة و الباقي سفر و بالفندق في مكة
كل ده بكام ؟
ب 90 ريال سعودي فقط لا غير
يا بلاش
مش عارف أرفع الصور في السايبر بس متصور شوية صور في الحرمين المكي و المدني تمام
أحرمنا يوم الاربع اللي فات من ذي الحليفة ( أبيار علي )
اشترينا ملابس الإحرام من هناك و بدأنا التلبية بعد صلاة العشاء
و الأتوبيس عطل في الميقات هناك و أول ما دعينا يشتغل إشتغل علطول
:)
وصلنا مكة الساعة 3.30 ص قبل الفجر
رمينا الشنط في الفندق و جري على الحرم صلينا الفجر و بدأنا الطواف 7 أشواط و بعدها ركعتين خلف مقام ابراهيم
بعدها سعينا بين الصفا و المروة 7 أشواط و بعدها حلقنا زيرو وتحللنا
قضيت اليوم أغلبه في الحرم و منظر الكعبة مهيب و يخطف القلب بس ما قدرتش أوصل للحجر الأسود زحمة طحن عنده و لما عملوا طابور ساعة العصر ملحقتش أوصل و الصلاة أقيمت :( بس صليت ركعتين في حجر اسماعيل
و بعد فجر الجمعة روحنا المدينة و صلينا في مسجد قباء ركعتين الضحى و بعدها صلينا الجمعة في المسجد النبوي و صليت ركعتين في الروضة الشريفة و مرينا من أمام قبر النبي - صلى الله عليه و سلم - و ألقينا السلام عليه في وسط الطحن و الزحمة
و بعدها رجعنا شوفنا جبل أحد على السريع من الأتوبيس و ووصلنا حائل يوم الجمعة بالليل قبل صلاة العشاء
دعيت في العمرة لكل اللي أعرفهم و اللي ما أفتكرتش أساميهم دعيت لهم دعوات شاملة بإن ربنا يكرمهم بكل الخير و يبعد عنهم كل الشر
و ده غير الدعوات المخصوص
:)
و السلام عليكم و رحمة الله و بركاته حتى نلتقي

هناك 23 تعليقًا:

فاتيما يقول...

ألف ألف مبروك يا محمد
ربنا يكتبلك الحج كمان
يا رب تكون إفتكرت تدعى ليوسف
لو مفتكرتش مش مشكلة ربنا عالم
ألف ألف مبروك
أهو كدا خبر مفرح
فى الأيام الغامقة دى
ربنا يسعد أيامك حلها يا محمد
يا رب

دعوة الفردوس يقول...

تقبل الله

عقبال الحج المبرور باذن الله

جمعاوى روش طحن يقول...

تقبل الله يا سيدى


و عقبال الكبييييييييرة


" الحج يعنى "


و برده لو جت فرصة تخطف لك يوميمن كمان بس فى رمضان


ح تلاقى الموضوع مختلف جدااااااااااا

دمتم بكل ود

نونو يقول...

ربنا يتقبل والف مبروووووووووك
ولسة الحج طعم تاني
واذا عرفت يوم كدة في مضان زوجي بيقولي بيبقى مختلف اوي
بتاذن الله على الحج هقولك دعوات مخصوص
الف مبرووووووك
تحياتي

عاشقه الفردوس يقول...

ماشاء الله

مبارك
مبارك مبارك


يارب تكون افتكرتنا هناك يارب


نباركلك ان شاء الله علي الحج باذن الله

خمسة فضفضة يقول...

السلام عليكم ورحمة الله وبركاته

الف مبروك وعقبال الحج
علي فكره احساس اول مره رؤية للكعبه ده حاجه مختلفه تماما ومش ممكن تتنسي

اللهم يارب اكتبهالنا اجمعين ولا تحرمنا من الزياره مرات ومرات


اوعي تكون نسيتنا في الدعاء

سلام

Bongo يقول...

ألف مبرووووووووك

و عمرة مقبولة ان شاء الله :)

عقبال الحج ان شاء الله

يارب تكون افتكرت كل المدونين بالدعاء

ربنا يكرمك دايما يارب

تحياتي و ربنا معاك

آفاق الحرية يقول...

الف الف مبروك ياباشمهندس
ان شاء الله ربنا يكتب لك الحج ان شاء الله
بس متنسناش من دعوات حضرتك هناك

زكرياء يقول...

مبروك يا صديقي، اياك تكون نسيتني و أنا اول واحد طلب منك الدعاء :)
اتمنى ان تكون مرتاحا اكثر بعد العمرة.
إلى اللقاء يا صديقي

بت خيخة وأى كلام يقول...

وأنا من انهى نوع فيهم
من الدعوات الشاملة
ولا الدعوات المخصوصة

ربنا يكرمك يارب يا محمد
وعقبال الحج ان شاء الله

تقبل الله منك

ربنا يسعدك يارب

سلام
اختك خيخة

ابتسم من فضلك يقول...

موضوعك رااااااااااااااااائع وفوق الرائع كمان
ربنا ينورلك طريقك
من الحسن للاحسن دايما

صاحب المضيفة يقول...

ألف مبروك يا ريس على العمرة

الواحد حن تاني للأيام الجميلة دي


ومال لما تروح المدينة بقى


حكاية تانية خالص


ربنا ينولهالك يارب


دعواتك يا جميل

النجم القادم يقول...

الف الف مبروك ياهندسة وعقبال الحج

ودعتلى ولا نسيت انا عارف انك نسيت

على فكرة اسامة سافر السعودية بس هو فى الرياض

هجبلك عنوانه وابقى اديهولك

وربنا يكرمك يارب

ومردتش عليا فى موضوع N95

ربنا يوفقك يارب

غير معرف يقول...

السلام عليكم ورحمة الله

مبروك العمرة وعقبال الحج ان شاء الله

وانا ارسلت لك رقمي انا بالجوف شمال حائل ب 400 كم تقريبا ابقى اتصل بيا

Ahmed Al-Sabbagh يقول...

تقبل الله منك يا حبيبى

يارب يطمنا عليك دايما

وترجع لنا بالف سلامة

اخوك احمد

فاتيما يقول...

محمد
أنا قريت عند نوران و جيت أشوف حائل تانى
لقيتك عامل بالوصية و دعيتلنا انا و يوسف
ربنا يخليك يا رب
أترينى الأيام دى حاسة بإرتياح شديد و عندى إحساس كدا إن يوسف راجع قريب
حتى آخر بوست كتبته إسمه " حروف إسمك " و انا بكتبه لقيت الكلام طالع لوحده على سكة امل و إستبشار
لأ باين الدعوة كانت بجد من القلب
متحرمشى منك يا محمد
و ربنا يسعد أيامك
و ترجع لمصر غانم سالم مرتاح القلب
تحياتى يا باشمهندس

بنوته مصرية يقول...

تقبل الله

اوعي تكون نسيتني انا ونور في الدعوه

ربنا يتقبل منك ويجعله في صالح اعمالك

واعبال كل سنه واعبال الحج ان شاء الله

تحياتي لك

كلبوشستان يقول...

ربنا يتقبل ان شاء الله
الف مبروك
ادعي لنا كمان ينوبك ثواب واتوصى لاحسن مصر والعرب كلهم محتاجين دعوة تسند الزير

بت خيخة وأى كلام يقول...

اخبارك ايه يا محمد

طمنا عليك دايما

فزلوكة يقول...

حمدالله على السلامة يا باشمهندس

عمرة مقبولة إن شاء الله

حضرتك دلوقتى دعاؤك إن شاء الله مستجاب

دعواتك لينا يا فندم

أنونيمس يقول...

ازيك يا بشمهندس

مبروك ع العمرة وياريب تكون دعتلينا

ربنا يكرمك ويوفقك .. مفتقدك والله وع بالي دايماً

الطائر الحزين يقول...

الف مبروك

الحمد لله انك بخير

دعواتك

محمود الدوح يقول...

بجد انا مش عارف اودى وشى فين منك
بس انت اكيد هتراعى ظروفى وان انا مش بظهر فى المدونات كتير
بجد سامحنى
انت عامل اية واخبارك اية والدنيا فيها اية
ومبرووووووووك العمرة
وعقبالى يارب مع انى حجيت واعتمرت
ودا سر محدش يعرفة خالص
ومش عايز حد يعرف
ههههههههههههه