السبت، أغسطس 23، 2008

و نجحت في إمتحان الرخصة و نقلت السكن الجديد

الحمد لله نجحت في إمتحان الرخصة من اول مرة و سبحان الله في ناس مغلطتش خالص و يمكن سواقتهم احسن مني بل و بعضهم بيسوق بقى له فترة بس سقطوا
الحمد لله انا فرحان قوي

حاسس انه كان هم و إنزاح و حاروح استلم الرخصة بكرة ان شاء الله
بركة دعوات كل اللي بيدعوا لي دا أنا كنت موصي كل اللي أعرفهم إنهم يدعوا لي

صحيح أنا مش حأستلم عربية - سيارة - دلوقتي و مش مطروح الموضوع ده اصلاً لأني بأروح الموقع في عربية البشمهندس عبد الخالق و الحمد لله معايا زميلي و ابن بلدي أحمد في السكن معاه سيارة فمفيش حاجة ملحة للسيارة بالنسبة لي بس أهي خطوة لقدام و الحمد لله إنها تمت على خير
بالنسبة لمدرسة القيادة و هي نفس المكان اللي بنمتحن فيه حأوريها لكم في الصور دي


سيارة التدريبمظلة مدرج الإنتظار أثناء الإمتحان و الباب المقفول في الجنب ده باب قاعة امتحان الإشارات المروريةكل واحد منتظر دوره على الدكة مجموعة جنسيات و مهن مختلفة في المصري و السعودي و الهندي و البنغالي و الباكستاني و اليمني و الكيني و في المهندس و دكتور الجامعة و النقاش و السواق و الطالب و العامل و كل المعلمين في المدرسة مصريين





ميدان التدريب و مليان إشارات و منحنيات و لعبكة



ده غير التلبيكة - يعني الإنتظار و ركن السيارة بشكل موازي للرصيف - في مكان يدوب يساع سيارتك و مهارتك انك تركن مضبوط بين القراطيس زي الناس دي





اللي بتتدرب على التلبيكة

و دي سيارات بتتمرن على الإختبار



و نقلنا من السكن القديم في الفيلا البعيدة قوي بره البلد دي


و ده كان مدخلها الرئيسي

و ده كان مدخلها الجانبي و اللي في الصورة ده السواق الهندي إكرام

و آدي العزال بتاعي أنا و اتنين زمايلي لما نقلنا من السكن يوم الخميس اللي فات

الحمد لله على الرخصة و الحمد لله على السكن الجديد و بأحاول حالياً أدخل نت في السكن الجديد بأسرع ما يمكن

تحياتي و شكري و سلامي لكم جميعاً

هناك 16 تعليقًا:

جمعاوى روش طحن يقول...

مبارك عليك يا هندسة


معلش مبارك هى الأصح لغويا ..!!.

محمد الجرايحى يقول...

أخى الكريم
السلام عليكم ورحمة الله وبركاته
مبارك عليك الرخصة والسكن
أنا حاسس بك لأنى مررت بنفس التجربة وشعرت بنفس مشاعرك...
وعقبال السيارة إن شاء الله

زى الهوا يقول...

niceeeeeee

ad3ili b2a ang7 ana kmannnnn . bs ana lsa btdrb . rbna ykrm

mabrouk 3la el skn we elr7`sa

نور يقول...

الف مبروك يافندم

*****

ادعوك لحضور دورة تنمية بشرية على مدونتي

بعنوان ( واحد تاني )

ازي تتغير وتبقى واحد تاني .. وازي نتستغل شهر رمضان الكريم في هذا التغيير .

يسعدني مرورك بشدة

الطائر الحزين يقول...

وفقك الله

مهندس مصري يقول...

جمعاوي روش طحن
==============
اسمها مبارك لك
ده لو حنتكلم لغوياً

محمد الجرايحي
===========
و عليكم السلام و رحمة الله و بركاته
الله يبارك فيك يا فندم

زي الهوا
===========
ربنا يكرم ان شاء الله

نور
=====
شكراً
:)

الطائر الحزين
==============
الطائر الحزين بنفسه
دا المدونة نورت
ربنا يسمع منك و خطوة عزيزة

عصفور المدينة يقول...

مبروك يا محمد
الرخصة بتاعة السعودية ودول الخليج عامة صعبة وانا مقدر فرحتك بس واضح من الميدان إنه أسهل من أيامنا
:)

عاشقه الفردوس يقول...

مبااااااااااااارك عليك

يارب يسعدك ويفرحك دايما

انت وكل المسافرين يارب

دعوه جدتي بقي: روح يابني ربنا يجعل في سكتك السلامه
لا لا
في كل خطوه سلامه:))

مهندس مصري يقول...

عصفور المدينة
============
ربنا يبارك فيك يا بشمهندس
بس الميدان صعب و الصور مبينة جزء بسيط منه لأنه مش ممكن يتصور كله من زاوية واحدة و مش حيبان بشكل واضح غير لو إتصور من فوق
بس هو كله عبارة عن منحنيات ضيقة كلها و لو القرطاس اتهز تبقى مصيبة و 3 إشارات ضوئية مزودة بأسهم مش عادية يعني و 3 تلبيكات يا دوب على القد
بس ربنا ستر
:)

عاشقة الفردوس
==============
ربنا يسمع منك و الله يبارك فيكي

EmY يقول...

مبروووووووووووك الرحصه و السكن يا محمد و يارب النت كمان قريب علشان متغبش علينا
تحياتي

بت خيخة وأى كلام يقول...

الف مبروك يا محمد
وعقبال ماتجيب عربيتك الخاصة ان شاء الله

انا بحب اوى بوستاتك الشخصية اللى بتنشرهالنا
علشان من خلالها بنعرف نطمن عليك

ربنا يكرمك يارب دايما

كل سنة وانت طيب علشان رمضان

سلام
اختك خيخة

ابو اعصار يقول...

مبارك مصر مبار من فيها
الف مبروك عليك شوف انا في ثالث التدوينه اللي قبل ده قلتلك عن اهم محتوى الاختبار
وعلى فكرة الرخصه هتريجك كتير بالذات لو في اي تفتيش بالمناسبه قبل ما طلع رخصتي مرتين وقفوني شرطه سرية على كورنيش الدمام بس عدت بالسلاسه
موفق
https://www.blogger.com/comment.g?blogID=2230064245339142308&postID=6284213234353188749

النجم القادم يقول...

الف مبروك ياهندسة اسعدتنا

ربنا يوفقك يارب

مهندس مصري يقول...

إيمي
====
و دخل النت يا ستي
أخدت وصلة واير لس ( لاسلكي ) من مودم جاري اللي في الاوضة اللي فوقي اللي مدخل نت دي إس إل
إداني وصلة مقابل إشتراك شهري
و بقيت قاعد لكم
:)

بت خيخة و أي كلام
=================
الله يبارك فيكي يا خيخة
بس على العكس أنا حاسس إن المدونة بوخت لما بقت شخصية قوي كده بس أنا ليا عذري
أولاً : كنت بادخل النت كل فين و فين من السايبر و بيبقى ورايا 100 حاجة لازم أعملها في الساعتين اللي داخلهم
ثانياً : إن المواضيع اللي كنت باكتبها في المدونة كانت بتبقى تأثراً بالبيئة المحيطة في مصر من حياة تنقط و اخبار تحرق الدم و ومواقف تشل و تصرفات للناس و الحكومة تجنن
و علشان كده انا كنت مسمي المدونة مهندس مصري قرفان بس بيحب مصر لأن الواحد كان قرفان في عيشته فعلاً و حاسس انه بحسابات المنطق مهما الواحد عمل و إشتغل فمفيش امل في تحسين وضعه الشخصي او وضع البلد و رغم كده الواحد كان بيحب البلد مش عارف ليه ؟
غالباً إدمان و لا لوثة عقلية
إنما لما جيت هنا
أنا معزول عن المجتمع السعودي تماماً لا بأتعامل مع سعوديين إلا في اضيق الحدود و لا باقرأ جرايد سعودية و لا بأشوف التلفزيون السعودي و حتى الراديو السعودي لما بأسمعه في العربية و أنا رايح الشغل بيكون غالباً الـ mbc fm وهي إذاعة تافهة للأغاني و الأخبار الخفيفة و رسايل الـ sms بتاعة المستمعين
و كل تعاملي في الشغل مع عرب و أجانب فمقدرش اتكلم على السعودية و المجتمع السعودي لأني منعزل عنه و مش جزء منه أنا مصري و السعودي هو أحسن من يعبر عن مجتمعه
اما أنا و أنا بره مصر فكل معرفتي باخبارها من خلال الإنترنت و الفضائيات المصرية و ده لا يماثل وجودي الفعلي في مصر
هنا القرف بتاع المعاناة في الحياة في مصر راح لكن جه بداله وجع الغربة و عيشة العزاب المنفردة المتعبة بدل ما كان الواحد متهني في بيت العيلة في مصر
فمش عارف إزاي اقدر أكتب عن مصر من هنا و في نفس الوقت مش عارف أكتب عن السعودية و مستبوخ إن المدونة تتحول لمجرد كتابات شخصية زي الفترة الأخيرة
مش عارف أعمل ايه و أكتب ايه ؟

ابو إعصار
==========
الله يبارك فيك و يخليك
هنا كماين الشرطة مش كتير في حائل بس مفاجئة

النجم القادم
=============
الله يبارك فيك
عقبالك يا ابو حميد
:)

عالم حبيب يقول...

السلام عليكم يابشمهندس

الف الف مبروك .. ولو انها متأخرة .. بس فرحت والله لك على موضوع الرخصة وقلت لازم اباركلك ولو اني قرأت الموضوع متأخر

بص بقى انا هنا في دبي وامتحنت 4 مرات علشان الرخصة واللي جاية الخامسة .. وصرفت حوالي 7000 درهم .. ولسة ما اخدتهاش .. شكلي كده هاجي السعودية احسن :)

ومبروك السكن كمان ربي يسعدك ويوفقك يارب

وادعيلي بقى اخد الرخصة عندي امتحان 25 / 9

مهندس مصري يقول...

عالم حبيب
==========
يااااااه
ربنا يكون في عونك
دي مصاريف تقطم الوسط يا بني