الاثنين، أغسطس 25، 2008

أكتب ايه ؟

الكلام ده انا كنت كاتبه رداً على تعليق خيخة في الموضوع اللي فات بس حسيت إنه يستاهل بوست لوحده
لأني فعلاً محتار أكتب ايه ؟
أنا حاسس إن المدونة بوخت لما بقت شخصية قوي كده بس أنا ليا عذري
أولاً : كنت بادخل النت كل فين و فين من السايبر و بيبقى ورايا 100 حاجة لازم أعملها في الساعتين اللي داخلهم
ثانياً : إن المواضيع اللي كنت باكتبها في المدونة كانت بتبقى تأثراً بالبيئة المحيطة في مصر من حياة تنقط و اخبار تحرق الدم و ومواقف تشل و تصرفات للناس و الحكومة تجنن
و علشان كده انا كنت مسمي المدونة مهندس مصري قرفان بس بيحب مصر لأن الواحد كان قرفان في عيشته فعلاً و حاسس انه بحسابات المنطق مهما الواحد عمل و إشتغل فمفيش امل في تحسين وضعه الشخصي او وضع البلد و رغم كده الواحد كان بيحب البلد مش عارف ليه ؟
غالباً إدمان و لا لوثة عقلية
إنما لما جيت هنا
أنا معزول عن المجتمع السعودي تماماً لا بأتعامل مع سعوديين إلا في اضيق الحدود و لا باقرأ جرايد سعودية و لا بأشوف التلفزيون السعودي و حتى الراديو السعودي لما بأسمعه في العربية و أنا رايح الشغل بيكون غالباً الـ mbc fm وهي إذاعة تافهة للأغاني و الأخبار الخفيفة و رسايل الـ sms بتاعة المستمعين
و كل تعاملي في الشغل مع عرب و أجانب فمقدرش اتكلم على السعودية و المجتمع السعودي لأني منعزل عنه و مش جزء منه أنا مصري و السعودي هو أحسن من يعبر عن مجتمعه
اما أنا و أنا بره مصر فكل معرفتي باخبارها من خلال الإنترنت و الفضائيات المصرية و ده لا يماثل وجودي الفعلي في مصر
هنا القرف بتاع المعاناة في الحياة في مصر راح لكن جه بداله وجع الغربة و عيشة العزاب المنفردة المتعبة بدل ما كان الواحد متهني في بيت العيلة في مصر
فمش عارف إزاي اقدر أكتب عن مصر من هنا و في نفس الوقت مش عارف أكتب عن السعودية و مستبوخ إن المدونة تتحول لمجرد كتابات شخصية زي الفترة الأخيرة
مش عارف أعمل ايه و أكتب ايه ؟

هناك 21 تعليقًا:

دكتور حر يقول...

يا باشا

تأمل وتفكر واكتب

ولا تزعل نفسك
أبدا

عيش حياتك


وأهم شيء تكون مبسوط ومرتاح

واحنا مقدرين

وترجعلنا بالسلامه ان شاء الله

أحسن شاب في البلد يقول...

توكل على الله و اقفلها ... انا قلت لك الكلام ده من زمان .

تواصل مع احباءك و اقرالهم و اكتب لهم ردود و كل حاجة.

مش لازم يبقالك مدونة علشان تقول " انا موجود "

"ان يقال لماذا لا يكتب .. خير من ان يقال .. لماذا يكتب "


و ربنا يوفقك للأصح و الأسلم

سومه...مجنونه فى بلد عاقل يقول...

بص يا مهندس فى اقتراحين اما تعمل مدونه كمان وتسميها يوميات مغترب مثلا وتكتب حياتك ومشاعرك فى الغربه او تتابع مدونات الناس اللى بتحبها
بس انا عاوزه اقولك شىء نزول مدونه ليك شىء مهم بالنسبه لينا عشان نعرف نطمن عليك ويهون من غربتك ومتكونش لواحدك
عموما ربنا ييسرلك الاحوال
تحياتى ليك سومه_87

النجم القادم يقول...

ياباشا هتكتب وتولعها زى زمان

بس النت يتظبط وانت تظبط ظروفكم

وليك عذرك ويلا مستنينك تانى تولعها

مهندس مصري يقول...

دكتور حر
=========
الحمد لله أنا مبسوط هنا و مش ناقصني غير مصر بأهلي و أصحابي و بلدي
لكن من الناحية المادية للحياة أنا الحمد لله عايش كويس و يمكن احسن من مصر كمان
الحياة هنا سهلة و بسيطة من الشغل للبيت و من البيت للشغل و أهي ايام و بتعدي
ربنا يسهل و استرجع قدرتي على الكتابة عن حاجت مهمة ترضيني و تعجبكم تاني
و ربنا يسهل لك في مصر الجديدة
:)

أحسن شاب في البلد
==================
مش لدرجة اقفلها يا زيزو
بس حنخف كتابة شوية
و حأقلل الكتابات الشخصية

سومة مجنونة في بلد عاقل
=======================
حأفكر يا سومة و ربنا يسهل ما فيه الخير
و شكراً لإهتمامك

النجم القادم
=============
النت اتضبط يا بني
المشكلة دلوقت اكتب ايه ؟ و من وحي اي بيئة و أي ظروف

د/اجدع بنوته يقول...

خلاص اكتب عن الغربه

علشان توجع قلوبنا معاك وعليك

هههههههههههههههههه

مهندس مصرى متغرب لكن بيحب مصر

مساء الخير ويارب تكون كويس

ويكون الشغل والامور تمام

زى ماقال دكتور حر

تأمل واطلق لدماغك العنان واكتب

معاك ان اللى بيكتب لازم بيكون عنده ماده وافكار

ودول بيستمدهم م المحيطين

بس برده ليه تنعزل عن المجتمع السعودى بصراحه

انا مستغربه م الموقف ده

هو حضرتك مقضيها شغل وبس ولا ايه

تحياتى وربنا يوفقك

لماضة يقول...

والله يا محمد انا رايي
تكتب اللي انت حاسه وبس
مش لازم تتكلم عن مشاكل مصر ولا مشاكل السعوديه حتى
الا اذا كنت حاسس المشكله ونفسك تتكلم فيها
فيما عدا ذلك
دي مدونتك مش عيب تنقلنا اوقات حزنك وفرحك وغربتك
على الاقل عشان نشاركك فيها
المهم اكتب اللى ترتاحله وبس

الفاتح اليعقوبي يقول...

السلام عليكم
ممكن تكتب عما يجتاح جوانبك
اكتب اي شئ قد يشفع لك عند الله
اكتب شئ تنصح فيه لمن يدخلون المدونة

(اكتب عن شئ قد يغير احد أو يبقي لك بعد موتك)

محدش يقدر يقولك تكتب ايه بالظبط يابشمهندس لان كل واحد بيكتب عما يراه صواب
فانت تدري ماصوابك وما الشئ الذي تستطيع من خلاله الاضافة والافادة لغيرك
وترجع بالسلامة باذن الله
والسلام

مهندس مصري يقول...

د/ أجدع بنوتة
=============
فعلاً يا بنتي أنا من البيت للشغل و من الشغل للبيت
أصل مفيش تسلية هنا غير الدش و النت و الإتنين دلوقت بقوا في البيت فحأخرج ليه إلا لو كنت نازل أشتري البقالة و لا حاجة

كده شكل بوستاتي حتقل لحد أما ألاقي نفس و مواضيع أكتب فيها

لماضة
=====
ما هو ده اللي انا بأعمله باكتب اللي انا حاسه و بس
عمري ما تصنعت في موضوع قبل كده
فاكرة اول مرة قابلتك قلت لك ايه
انا البوست بأكتبه من اول مرة و انشره أول ما اخلص كتابته بدون تعديل و مراجعة و غالباً بيخلص كله في قعدة واحدة على المدونة على عكس التحضير اللي انتي بتعمليه
فبيطلع فعلاً زي ما انا حاسس بالضبط
بس سؤال بجد انتي مش حاسة ان مدونتي بقت مملة و بايخة و لا يمكن انا اللي بأمر بحالة ملل
رغم اني من ساعة ما نقلت السكن الجديد و دخلت نت في البيت و اخدت الرخصة كل ده ورا بعضه خلاني فرحان
بس مش عارف ليه حاسس بخواء تدويني
عموماص انا حاعلق على تدويناتكم و حأكتب لما ألاقي نفسي مستفز للكتابة في موضوع

الفاتح اليعقوبي
===============
مش كل الناس لها قدرات دعوية يا بني
كل ميسر لما خلق له
يعني انت و الجعفري قايمين بالدور ده كويس قوي
و انا بأقوم بالدور ده في حياتي العادية بشكل بسيط و بأبلغ و لو آية و خصوصاً مع غير المسلمين اللي الواحد بيتعامل معاهم هنا و اشتريت من مكة في العمرة نسخة من ترجمة معاني القرآن الكريم للغة الإنجليزية و بأحاول اقرأ فيها علشان اكتسب مصطلحات الدين باللغة الإنجليزية علشان لما اتكلم مع الأجانب عن الإسلام أعرف أتكلم كويس
بس مش حاسس بإني ممكن اكتب كويس في امور الدعوة في المدونة
و عموماً أهي فكرة برضه
تشكر :)

ابو اعصار يقول...

عزيزي يا هندسة صلي على النبي وفرفش
طبعا من الحبسة لازم تحس بوجع الغربة والوحده
شوف انا هنا بالدمام نسيت حتى شكل مصر طبعا بمزح
لازم تطلع لو مره كل اسبوعين لو الشركه تنظم لكم طلعه (فسحه) كل شهر يبقى رضى
انا ما تعاملتش اوي مع اهل حائل معظمهم من عائلة الشمري اللي عندكم
بس اكيد هتلاقي من كل الجنسيات من هترتاح معاهم
وبيون فيه فعاليات بالصيف فعاليات دعوية رووعه زي قافلة الخير بالمنطقة الشرقيه وفي كتير روحها هتروح عن نفسك

ربنا يوصلك بلدك سالم غانم وتكون السعوديه بلدك التاني كمان ياعم

appy يقول...

كل سنه وانت طيب يا هندسه
انت فى مصر كنت مع اللى ماشين بس عندك هدوء خليك بعيد وخلاص ربنا معاك

الجمعاوي الاصيل يقول...

الكبير كبير ياريس

المهم عندنا راحتك ياريس

وربنا يرجعك اولاً بالسلامة

اما عن الكتابة

فممكن تكتب خواطر حول مواضيع متعددة مش شرط يبقة الكلام في السياسة

اطرح مواضيع نقاشية

وهكذا والله يسهلك

مهندس مصري يقول...

ابو اعصار
===========
شكراً على نصايحك الغالية
و فعلاً معظم البلد هنا شمري
أنا ما اعرفش حد من بره الشغل خالص
حأشوفهم فين من الشغل للبيت و من البيت للشغل
بس هو الواحد ناوي على عمرة رمضان ان شاء الله و حتكون ترويح ممتاز عن النفس
و بعدها الحج و ده اللي حيكون المعمعة الكبيرة و ربنا يكرمنا و يسهل لنا أداء الفريضة :)

آبي
=====
و انتي طيبة و بالف سلامة
بس متهيأ لي مفهمتش انتي تقصدي ايه بالضبط بكنت ماشي مع اللي ماشيين
انما هنا فعلاً هدوء

الجمعاوي الأصيل
===============
حاضر يا باشا
:)
علم و جاري التفكير

بت خيخة وأى كلام يقول...

مستبوخ ان المدونة تكون شخصية
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ليه؟

وهى المفروض ان المدونة تكون حاجة عامة

بالعكس انا شايفة ان المدونة دى هى روح الانسان

كل واحد يكتب اللى يجول فى خاطره بأسلوبه وبوجهة نظره

اصل المدونة دى مش كتاب هنألفه ولازم نطلع احسن ما عندنا من تعبيرات ومواضيع علشان تعجب القراء

المدونة دى
زى اجندتك الخاصة اللى بتكتب فيها اى حاجة وتشخبط اى شخابيط وتفقل عليها بعد كدة فى درج المكتب
بس المدونة دى اجندة انت اخترت ان احنا نشاركك قرأتها
ولك جزيل الشكر على ثقتك فينا

لكن مين قالك ان احنا عايزين نعرف اخبار مصر ولا السعودية ولا اى حاجة تانية
بالعكس انا عندى ان اعرف اخبار
محمد صديقى اهم من انى اعرف اخبار اى حاجة تانية

احنا عايزين نعرف وجهة نظر اللى بيكتب

وجهة نظره فى اى حاجة

اختلفنا او اتفقنا معاه مش مشكلة

لكن الاكيد ان احنا استفدنا منه حتى ولو استفادتنا دى كانت واحد فى المية


وعدين انت دلوقتى موجود فى السعودية
اكيد هتلاقى حاجة تشدك
موقف مثلا غريب حصل قدامك ممكن تحكيلنا عنه

ممكن تقولنا انطبعات الناس ايه عن المصريين فى الغربة


ممكن تكتب عن احساسك بالغربة

ممكن توصفلنا اكلة غريبة اكلتها

او تقولنا عن عادات السعوديين اللى احنا مش عارفينها

او تقولنا عن لغتهم

احكلنا عن قميص جديد اشتريته

احكلنا عن فار دخل بيتك وازاى قضيت عليه


احكى اى حاجة يا محمد

احكى علشان نحس انك موجود معانا وانك مابعدتش عننا
احكى علشان انت نفسك تحس انك لسة وسطنا وتخفف عن نفسك احساس الغربة


المهم انك ترجعلنا بالسلامة وانت مجبور الخاطر دايما

ورمضان كريم

اختك خيخة

مهندس مصري يقول...

بت خيخة و أي كلام
=================
أنا محدد من الأول شعار لمدونتي و هو ايه ؟
أهوا حبة كلام شوية شخصي و شوية عام عن اللي بيحصل في الدنيا و البلد و اللي بيحصل لي في الغربة

يعني انا مش عايز المدونة تكون حاجات شخصية بس و لا حاجات عامة بس أنا عايزها الإتنين و مش عايز جانب يطغى على التاني
بس كلامك لفت نظري لحاجات كتير ممكن أكتب فيها
شكراً يا أم شريف
:)
و ربنا يسمع منك
و الله اكرم

أحسن شاب في البلد يقول...

إيه يا عم الحب ده كله ... دا انت طلعت اشهر من تامر حسني و انا ما اعرفش
و مظاهرات حب و تأييد .. و لا تتنحى.
ماشي يا عم..ربنا يزيدك

مهندس مصري يقول...

أحسن شاب في البلد
==================
هذا من فضل ربي
:)

رضوى يقول...

انا عشت فى السعودية كل فترة الدراسة قبل الجامعة

فعلا الاحتكاك بالسعوديين قليل جداا

بحس انى مش بشوفهم اصلا
كأن ليهم محلااتهم ولااحنا لينا نحلاتنا
وليهم اسواق واحنا اسواق تانية

ما علينا

اللى فهمته من البوست ده ..التجديد

دمتم بخير
panadol extra

مهندس مصري يقول...

رضوى
=====
يعني انتي شايفة البنادول هو الحل
ما أعتقدش
شكراً لتعليقك
:)

غير معرف يقول...

Peace on you
I was interested in your blog
esp you add that nice song for E darwish
i invite you to our blog
http://yuyu-youyou.blogspot.com/
thanks

osama يقول...

اكتب اى حاجه المهم اكتب خليك موجود وبس اللى فى راسك طلعه
يمكن كتاباتك تبقي ليك فى الغربه وطن
فهمت قصدك