الأحد، سبتمبر 07، 2008

كارثة الدويقة

الإنهيار اللي حصل إمبارح في الدويقة ده حلقة في مسلسل الإهمال اللي بقى عادي و طبيعي
ناس مش لاقية حتة تسكن فيها قامت راحت بنت عشوائيات في الجبل ولما الجبل شرخ فوقيهم و جابوا مهندسين الحي يعاينوا كل اللي عملوه لهم محاضر مخالفات في البناء و سابوهم زي ما هم و لما اتنبح صوتهم من الشكوى قاموا بنوا عمارات جديدة لإسكان حي منشأة ناصر لهم و لكن بسبب الفساد و البيروقراطية اتوزع بعضها على المحاسيب و فضلت آلاف الشقق فاضية في انتظار توزيعة أو تهليبة مضبوطة لها على مرمي البصر من عشوائيات الغلابة
و بعد المصيبة ما حصلت و اكتر من 500 شخص اندفنوا تحت الصخور و اكتر من 35 بيت اتساووا بالأرض
ساعتها بس قالوا حندي كل اسرة متضررة شقة و 5000 جنيه للمتوفي و 2000 جنيه للمصاب و خطة عاجلة لمعالجة العشوائيات غير الآمنة- إنما الآمنة يتحرقوا بجاز وسخ و يركنوا على جنب لحد ما تجيلهم مصيبة تاخدهم و ساعتها نبقى نبص لهم - و لو اني مش فاهم ايه الفرق بين العشوائيات الآمنة و الخطرة !!!!!
يعني واحد من الضحايا جايبينه امبارح متعور هو و مراته و 2 من عياله و له 3 عيال تانيين تحت الانقاض
واحد بيقول لي بسخرية مريرة يعني حيطلع له بشقة و بـ 23 ألف جنيه و يشبرق نفسه :(
حسبنا الله و نعم الوكيل في اللي خلوا الناس عايشة عيشة اقل من عيشة الحيوانات و ياريت عارفين يعيشوها لأ دا المصايب نازلة ترف واحدة ورا التانية بدون ما تديهم أي إستراحة علشان يأخدوا نفسهم
حرق و غرق و هدم و مرض حنلاقيها منين و لا منين



هناك 16 تعليقًا:

hend...hanady يقول...

لو كان ضحايا قطار الصعيد ابو 300 جنيه صرفوا التعويضات يبقوا بتوع الدويقة يصرفوها وبعدين حتى لو اتصرفت 3 الاف جنيه هى دى قيمة البنى ادم هنا امال ليبيا دفعت 3 مليار ليه فى لو كربى والوزراء اللى بيتشالوا والحكومات اللى بتتغير علشان حادثة بتاعت 10 اشخاص بيبقوا ايه
هقول ايه لك الله يا مصر

أختكم فى الله يقول...

والله فعلا حاجة توجع القلب

سبنا الله ونعم الوكيل فى الحكومة بتاعتنا

المصايب عمالة تتوالى علينا واحدة ورا التانية

ربنا يرحمنا برحمته ويصلح احوالنا

kochia يقول...

عندك حق والله
هم بيلوموهم علي ايه
هم لقوا حاجة يعملوها ومعملوش

ربنا معاهم

براحتك بقى يقول...

مدونتك حلوة
انا مدونة جديدة وعايزة اعرف رأيك

شموسة يقول...

لا يسعنا إلا أن نقول حسبنا الله ونعم الوكيل

بنوتة مصرية يقول...

ههههههههههههههههههه
مش مهم اية يعنى لااول ولا اخر كارثة هتحصل
واية يعنى اما يموتوا ما عبارة السلام ماتوا وقطار الصعيد وقطار مطروح
نصيبهم كدة
شر البالية مايضحك
هو دة الهم اللى يضحك
تحياتى لك

abdulazez يقول...

نسأل الله العلي العظيم أن يتولى الضحايا برحمته , وأن يجازي كل من كان سببا لهذه الفاجعة. ولا حول ولا قوة إلا بالله العلي العظيم.

appy يقول...

طيب اعمل ايه بجد
عارف المصيبه ان فيه فندق مقفول بقاله سنين فوق المقطم عارف ليه علشان الجبل انهار من تحته واساسات الفندق باينه مش كلها طبعا بس الحته اللى وقعت
عالم حذر من الموضوع ده من اكتر من 15 سنه يا بشمهندس

šσяšαяαα يقول...

الحمدلله انى مادخلتش امبارح وسبتها للنهاردة لما اكتب البوست بتاعى

ماهذا البؤس والاكتئاب الحاد
لا ياعم انا بتاعى اروش من كدا بكتيييير:)

الحياة حلوة بس نلاقيها:)

مهندس مصري يقول...

هند هنادي
==========
لا دا التعوييضات حتنضرب في 2
من الوزارة تعويض و من المحافظة تعويض
يعني الورثة حيتنغنغوا :(

حسبنا الله و نعم الوكيل

أختكم في الله
===========
آميين

kochia
=======
يارب بس يخلصوا و يطلعوا أحياء تانيين قبل ما كل اللي تحت يبقوا جثث

براحتك بقى
===========
حاضر

شموسة
=====
بالضبط

بنوتة مصرية
============
وا الله أنا مش قادر أضحك حتى على البلية دي بالعكس حزين جداً لأن الكارثة ضخمة و قدام عينينا و مش عارفيين نعمل حاجة
إحساس مهين بالعجز عن المساعدة
حسبنا الله و نعم الوكيل

عبد العزيز
===========
آميين

آبي
=====
طيب و الناس تعمل ايه ؟
انا عارف ان كلامك صح
بس بما انهم بنوا لهم شقق ليه ما سكنوهمش فيها
لازم الناس تموت الأول
:(

صرصارة
=======
يابنتي ما قلبك محروق على مالطة
فرقت ايه ؟

مقاطعـــــــــــــون يقول...

جزاكم الله كل خير
http://mokat3een.blogspot.com/
شارك حمله مقاطعون نحن نرفض اى قرش يدفعه العرب للتتربح من ورائه اسرائيل وغيرها رافعه شعار ان العرب يستفيدون من وراء شركاتهم ولا تتسببوا فى قطع ارزاق الناس انهم يضغطون علينا بلقمه خبز
فسحقا لاى لقمه تاتينا منهم فى مقابلها الاف يموتون من اموالنا شارك ولا تتردد
وجزاكم الله كل خير

أخـــ مسـلمة ـــت يقول...

"واحنا نموت تحت الجبل مش مشكلتهم"

الحقيقة اننا بنموت تحت فسادهم ومحسوبيتهم

ربنا ياخدهم

MATRIX يقول...

لاسف مصر حتفضل كدا ..مدام الكوارث كدا بتعدى وخلاص ومحدش بيتحاسب ..

أنا إنسان يقول...

فضيحة كبرى...الأمن يسرق قوافل الإغاثة
الأمن يتفق مع ساقين الحافلة الأولى والثانية في القافلة الإغاثية المتجة لغزة
وتسير الحافلتان بدون الركاب الذين كانوا على الأرض إلى وجهة غير معلومة
والجدير بالذكر أن هاتان الحافلتان همه المحملتان بالطعام والشراب للمسافرين الصائمين النتجين لغزة
كما أنهما يحملان البضائع الإغاثية للفلسطينيين
وبالإتصال بأصحاب الشركات التي تملك الأتوبيسات
وجد أنهم قد أغلقوا موبايلاتهم
ولا يردوا على الأرضي
أي أن الأمن سرق البضائع الإغاثية
وترك الركاب على الأرض
أمن مصر القذر
>>>>>>>>>>>>>>>>>>
تابعونا
تغطية شاملة للقافلة المتوجهة لغزة

مهندس مصري يقول...

اخت مسلمة
===========
آميين

ماتريكس
========
مين حيحاسبهم و البلد كلها في كرشهم

butterfly يقول...

مش عارفه والله الناس تعمل ايه ولا ايه ومصر كل يوم حالها من اسوأ لاسوأ