الثلاثاء، سبتمبر 30، 2008

أسئلة نوارة الرجالي

ده يعتبر تاج من عند نوارة شوفوا الأسئلة عندها في البوست ده
شوية أسئلة رجالي

و آدي أجوبتي اللي جاوبتها في تعليق عندها على الموضوع ده

شهامة وجدعنة الانسان المصري

شوفوا الأسئلة عندها و الأجوبة عندي و بعدها ياريت كل الرجالة يجاوبوا نفس التاج ده بصدق و امانة علشان نثبت لنوارة إن لسه فيه رجالة جدعان
أما الستات فلازم يجاوبوا التاج الحريمي ده بتاع نوارة برضه

شوية اسئلة حريمي

الأجوبة


اولاً : مش بأفرح و لا حاجة و لو إنها مش بتتقال لي بس ممكن تكون مدعاة للفرحة من جهة إن الواحد يكون برئ زي الأطفال
:)
مش يتعامل معاملتهم
تفرق

ثانياً: عمري ما عملتها و بأهزأ أي حد ماشي معايا يعملها و لو كررها باسيبه و امشي و ممكن اقاطعه

ثالثاً: بالعكس دا أنا بأفتخر إني عمري ما عملت الغلط و لا شربت خمرة و لا مخدرات و لا زنيت و لا حتى مشيت مع بنت
و ده مش لعجز فيا و لكن لإني اؤمن بالحديث : إفعل ما شئت فكما تدين تدان

رابعاً : بالعكس دا انا أملي اللي اتجوزها أسعدها طول عمرها و هي تسعدني علطول
لإن خير متاع الدنيا الزوجة الصالحة و انا نفسي ربنا يرزقني بذات الدين و إن شاء الله أراعي ربنا فيها و أسعدها

خامساً : عمري ما حاعمل كده ابداً
أستغفر الله العظيم

سادساً: لا انا النداهة ندهتني من زمان لإني لما اركز في حاجة زي النت او قراية كتاب او لعبة على الكمبيوتر - مش بأحب الكورة قوي على فكرة - و أي حد ينده عليا صعب أسمعه من اول مرة
بأركز قوي في اللي بأعمله
:)

سابعاً: مش حاعمل كده ان شاء الله
بس هي برضه تنقي وقت مناسب للكلام مش ابقى داخل لسه من الشغل و ما قلعتش الجزمة و لا خدت نفسي و لا شربت بق ميه و هي تتفتح في الكلام عن الجيران و اللي عملوه و العيال و التلفزيون و الراديو و السوق و اللي حصل فيه و أخبار العمارة و الشارع كله
دماغ الواحد بتبقى مصدعة من الشغل و لسه راجع
لازم تختار وقت مناسب و تحكي الأهم فالمهم
:)
و لا ايه ؟

ثامناً: الحمد لله مش تبعي و بعيد عنها نهائي

تاسعاً : مش تبعي برضه و مش حتحصل ان شاء الله و حنفضل نحب بعض العمر كله

عاشراً: مش حأهملها و حأساعدها على قد ما أقدر بس انا اصلاً اللي حأتجوزها مش حتشتغل لإن صاحب بالين حيتعب قوي و تعبها حيجيي على دماغي و دماغ العيال
انا عايزها معززة مكرمة في بيتها
و انا علي مصاريف البيت من الالف للياء
و عمري ما حآخد منشطات
:)

حادي عشر : كل لما بأغلط بأعتذر و عمري ما إستكبرت على الإعتذار لو إتأكدت من غلطي

ثاني عشر : مش بيحصل
لا باتريق على دي و لا دي
بالعكس لما باقابل حد اذكى مني سواء راجل او ست بأحاول اتعلم منه او منها

ثالث عشر : برضه ما بيحصلش
عمري ما فكرت كده

رابع عشر : بالعكس دا الواحد دلوقتي عمال يحسبها بالمللي
معايا كام و حأحوش كام
حأجيب شقة منين و فين و بكام
و الفرش و العفش بكام
و الشبكة و الفرح
و هم ياما
و مين قال عايز ملكة جمال
انا عايزها متدينة و مثقفة و جامعية وجمالها معقول
عادي يعني

خامس عشر : محدش قال كده
أكيد في أذكى مني و في أقل ذكاء

سادس عشر : لا يعيبوه حاجات كتير مين قال ما يعيبوش

سابع عشر : و لو إن الحكاية ما وصلتش ابداً للدرجة دي بس فين نصيحة الأم لبنتها
كوني له أمة يكن لكي عبداً
:)

ثامن عشر : زي ما حاقولها أكيد هي كمان حتقولي
و لا هي ما بتعرفش تتكلم
انا اقول و هي تقول و لا لازم انا اللي اسأل
:)

تاسع عشر : مش حيحصل و حنتفق على كل حاجة مين ليه ايه و عليه ايه ؟

عشرين : طيب دا أنا نفسي آكل أكل بيتي معتبر من إيد مراتي بدل ما انا متبهدل في الطبيخ و في أكل المطاعم
:)

واحد و عشرين : ابداً و الله

اتنين و عشرين : عمري ما حأسفه رأيها
و لإني ما حبيتش قبلها اكيد الطيبون للطيبات فحتكون ما حبتش حد قبلي
مش بأقولك ذات الدين
:)

تلاتة و عشرين : مش حواري و لا نظامي يا ابلة
و لا امشي ورا و لا قدام حد

اربعة و عشرين : عمري ما حأعملها هو انا عبيط
دي غيرة الستات دي تجنن لو في غير محلها

خمسة و عشرين : كويس إنك قولتي لي علشان آخد بالي
حاضر

ستة و عشرين : لعلمك لما بأشوف واحد كده بازبهل و بعدها بأحط وشي في الارض و ما أعرفش أبص لها
بأتكسف
بس ده في الواقع مش في التلفزيون :)

سبعة و عشرين : المفروض من الجملة دي إن الرجل عقلاني و المرأة عاطفية
و دي قاعدة عامة بس مش مطلقة يعني في إستثناءات و احياناً بيحصل العكس و نلاقي إمرأة صارمة و رجل عاطفي
و مش كل الناس ماشية ورا ريالتها
:)

تمانية و عشرين : طيب إيه رأيك إني أكيد حأبص في وشها بأقول لك عايز أسعدها
و الحمد لله شغلي مفيهوش ستات
:)
عادة

أخيراً : تعدد الزوجات ليه ظروفه الخاصة و انا معترض على اللي بيستخدموه في غير مكانه
أنا عن نفسي واحدة كفاية علشان نعرف نعيش كويس و نربي العيال كويس

و انا حأنشر الكلام ده تاني عندي لإنه شبه التاج بس طويل قوي و رخم حبتين

هناك 25 تعليقًا:

human يقول...

عزيزي
اسمحلي اولا اهنيك بمناسبه عيد الفطر المبارك
كل سنه و حضرتك بخير و الاسره جميعا

لو تسمحلي عندي سؤال
بخصوص الأغنيه اللي حضرتك حاطتها من موقع
www.itoky.com

انا قمت بالتسجيل في الموقع و مع ذلك لا استطيع ان اعمل ابلود و لا اعلم كيفيه الحصول علي كود الأغنيه
اكون شاكره لو حضرتك وضحتلي الطريقه
عيد سعيد

mido يقول...
أزال المؤلف هذا التعليق.
مهندس مصري يقول...

إنسانة human
=============
و انتي بألف صحة و سلامة
عيد سعيد
التفاصيل كلها في البوست ده
http://ro7albmama.blogspot.com/2008/05/blog-post_19.html

ميدو
=====
ما انا قلت إنه رخم
بس كان المفروض يكون للمتزوجين فقط
جمر ليه ؟

كيارا يقول...

يالهوووووووووووووي يانوراه

والله جامده

--------

بس فس حاجه مش كل اللي في شويه اساله رجالي عام هو بينطبق علي فئه معينه وليس الجميع :)

---------

بصراحه اجاباتك جميله اما اروح اشوف الاسئله الحريمي بقي

mido يقول...

ميدو
=====
ما انا قلت إنه رخم
بس كان المفروض يكون للمتزوجين فقط


هو ده ردك

طيب

:)

mido يقول...

سؤال

عايز الكود بتاع شريط الاخبار اللى عندك فوق ده

وعايز اخليه يجيب احدث الاخبار

ازاى اعمله؟

princess يقول...

الاسئلة جامدة شويتيتن:)
بس الاسئلة دى مش بنطبق على جميع الرجالة
عموما كل سنة وانت طيب وبخير
تحياتى

مهندس مصري يقول...

كيارا
======
هي لمت كل إنحرافات الرجالة مع بعضها
أما نشوف إجاباتك على الحريمي
:)

ميدو
====
خير الكلام ما قل و دل
و إضغط على أي خبر حيدخلك موقع المختصر للأخبار
و هناك حتلاقي مكتوب فوق على الشمال
الشريط الإخباري
خش حيديك كود
خده نسخ و لصق في مدونتك
و اي خدمة
:)

وكل موقع ليه كوده
انا باحب المختصر فحاطط شريطه
غيري حاطط العربية
غيرنا حاطط الجزيرة
و انت و مزاجك
:)
أميرة
=====
جامدة شويات كتير
بس لا تنطبق غير على الرجالة المسجلة خطر
:)

و انتي طيبة و بالف خير
بس تعالي هنا رايحة فين
جاوبي الاسئلة الحريمي بتاعتها و لا فينا من تزويغ
:)

حسام وريمان فى هاكونا مطاطا يقول...

أسأل الله
أن يعطيك أطيب ما في الدنيا محبة الله
وأن يريك أفضل ما في الجنه رؤية الله
وأن يجمعك بأفضل خلقه رسول الله
وأن ينفعك بأنفع الكتب كتاب الله
وكل عام وأنتم بخير
عيد سعيد

الـفـرعـون الـمـصـرى يقول...

كل سنه وانت طيب

ودى أول زياره ليا للمدونه


جميله ما شاء الله

جبهة التهييس الشعبية يقول...

طيب ليه يا محمد اعتبرت ان الاسئلة للرجالة رخمة وعدوانية انت وميدو وما اعتبرتوش ان الاسئلة للستات برضه رخمة وعدوانية؟
وهو ده السؤال اللي ماحدش عارف برضه يجاوبني عليه
يعني هم الرجالة عندهم كرامة والستات لا؟

اشمعنى هو هو نفس الراجل لو منوفي وللا صعيدي واتريقت على المنايفة والصعايدة قدامه ما يزعلش
لو نفس الكلام قلته على المصريين وهو مصري ما يزعلش
اشمعنى لما تقوله على الرجالة بس الرجالة بيزعلوا
والرجالة بس هم اللي بيزعلوا
اشمعنى الستات مش بتزعل من النقد؟
واشمعنى الستات بتعترف بعيوبها
تاني باقول لك الثقافة العامة في تربية الذكور عندنا في مصر انه يبقى متكبر وما يقبلش اي حد يقول عليه اي ملاحظات ويزعل قوي وياخد اي كلام بحساسية
صح وللا لا؟
انا باسألك لو نفس الكلام ده مكتوب على المصريين بشكل عام من غير توضيع رجالة وللا ستات
كنت ح تزعل كده؟
:)

مهندس مصري يقول...

حسام و ريمون في هاكونا مطاطا
===========================
آميين و لك بمثله
عيد سعيد عليك

الفرعون المصري
==============
و انت طيب و بالصحة و السلامة
نورتني في اول زيارة
الله يخليك ده من ذوقك

جبهة التهييس الشعبية
=====================
و مين قال انها مش رخمة
دي أسئلة الستات رخمة جداً برضه
و اشك إن أي واحدة حتعدي من هنا حتجاوبها
لشدة رخامتها و إحراجها
:(
و الستات أكيد برضه عندهم كرامة
بس انا مش ست علشان اتكلم بإسمهم
p:
و الكلام لو قلتيه على كل المصريين بدون معظم او اغلب او كتير من
برضه كنت حأقول لك ما تعمميش
:)

و عموماً لو انتي متأكدة انهم ما بيزعلوش غير من كلمة رجالة بس
إسألي طبيب نفسي بس يكون محايد
:)
و هو يحلل السبب

جبهة التهييس الشعبية يقول...

اولا كل سنة وانت طيب

ثانيا
انت يا محمد كناشط وواحد ايجابي وبتحاول تعمل حاجة لبلدك مش انت برضه عندك نفس الشكوى اللي عند كل الناشطين من الشعب المصري بقى فيه سلبية وخوف وندالة؟ انك بتتعب قوي عشان تقنع حد انه يعمل حاجة ايجابية؟

صح وللا لا؟

طيب انا شرحت لك ان فيه حاجة اسمها اتجاه عام او ثقافة عامة بتحكم المجتمع الاستثناءات لا يقاس عليها الثقافة العامة والاتجاه العام في المجتمع

صح وللا لا؟

اظن اننا متفقين على النفقطتين اللي فاتوا
والله اعلى واعلم لو مش متفق قول لي

طيب
الشجاعة والايجابية والجدعنة دي مش شغلانة الستات باي حال من الاحوال
دي شغلانة الرجالة بالاساس
لما بيبقى فيه ست بيتوفر عليها حاجة من دول او كلهم يبقى كتر خيرها
لكن لو ست انت كناشط بتكلمها فقالت لك انا خايفة ما اقدرش اعمل حاجة انا ما فيش في ايدي حاجة اعملها انا ست وخايفة اتبهدل

تقدر تلومها؟
مش ده الوضع الطبيعي؟ بدليل ان لما بيبقى حد ايجابي زي نورا يونس مثلا الناس بتقول على نورا يونس بميت راجل
لان اساسا مش ده الطبيعي بتاع الست
الست طبيعتها تخاف والخوف قد ينتج عنه حركة ندلة قد ينتج عنه سلبية جبن
صح؟

لو واحدة ماشية مع جوزها وجوزها دخل خناقة والموضوع وصل الى تشابك بالايدي

الست ح تجري وتسيب جوزها لو لقت انها ح تنضرب
ده الطبيعي
لو اتدخلت ده الاستثناء

لكن لو ماشي مع صاحبه وجري يبقى صاحبه ندل
صح؟

طيب
اذا الناشطين هم نفسهم واللي بيزعلوا من الكلام اللي باقوله هم نفسهم بيقولوا ان الشارع المصري سلبي وخواف ونسبة الندالة فيه زادت بشكل فاق الوصف

واذا كان الجدعنة والشجاعة والايجابية بالاساس شغلانة الرجالة مش الستات

واذا كان الناشطين دول هم اصلا الاستثناء مش القاعدة

كل المقدمات المنطقية دي تؤدي الى نتيجة واحدة

ان مصر بتعاني من ازمة رجولة

انت عارف في 25 مايو لما بلطجية الامن تحرشوا بالصحفيات، طبعا الرجالة اللي في المظاهرة بقوا يقلعوا القمصان ويغطوا البنات

بس بقى الرجالة اللي كانوا بيتفرجوا من بعيد واللي عددهم اضعاف اضعاف المشاركين في المظاهرة رجالة وستات قالوا: يستاهلو...نسوان ورايحين يبهدلوا نفسهم مع الامن وجايين يعيطوا؟
!!!!!!!!!!
امممممممم طب هم نسوان وبهدلوا نفسهم مع الامن
وانت يا حاج انت وهو اللي واقفين تتفرجوا ايه؟ نسوان برضه؟

يعني يا محمد من عشرين سنة بس ممكن الناس ما تشاركش في المظاهرة لكن لما يشوفوا بنات بتتقلع هدومها حتى اللي مش مشارك في المظاهرة اعصابة مش ح تستحمل وح يتدخل

ده زمان...زمان زا وومان

لكن دلوقت ما تقدرش تنكر يا محمد ان الشارع المصري بقى فيه حالة من الجبن والبلادة والندالة

وتاني باكرر لك
لو ست جبانة وندلة وسلبية دي حاجة ما تعيبهاش
مش بس وفقا للقيم الشرقية
كمان وفقا للقيم الغربية
الست حق من حقوقها انها تخاف على نفسها
طبعا الخوف شعور انساني
بس ربنا والقيم الاجتماعية الغربية والشرقية ادوا الراجل الحق انه يحس بالخوف زي اي انسان بس ما ادهوش ابدا الحق انه يجري وفيه واجب عليه

فهمتني اقصد ايه؟

ارجو اني اكون وضحت كلام

mido


اما بخصوص اللي ميدو قاله

ارجو يا ميدو انك معلش ما تدخلش في حياتي الشخصية
فوق انه مش من حقك الاشارة لحياتي الشخصية بالطريقة دي
كمان انت ما عندكش اي معلومات عنها
وفيه اتهام ليا بعدم الموضوعية او اني واخدة فكرة غلط عن الرجالة
او انك بتشكك في نزاهة رايي وانا مش قابلة الكلام ده

جبهة التهييس الشعبية يقول...

اه نسيت اقول لك حاجة
فيه حاجة نسيت اقولها في بوست الستات انهم ما عندهمش سيستم في التربية
بتربي عيالها كده كيفما اتفق
وتاني عشان ما تقوليش تعميم يا مهندس فيه حاجة اسمها اتجاه اجتماعي وثقافة اجتماعية عامة
كام ام في مصر بتجيب مثلا كتب في التربية او حتى من غير ما تجيب كتب في التربية كام ام بتفكر في نفسية الطفل وان كل تصرف بتعمله مع الابن او قدامه ح يأثر عليه بقية عمره؟

اشمعنى الستات زمان كانوا بيعرفوا يربوا رجالة ودلوقت مش عارفين؟
انا مش باتهم دي تساؤلات احنا عايزين نفهمها
ممكن مثلا لو حد متخصص
ياخد عينة من الشباب الايجابي واللي هو لا مجال الا اننا نقول انهم قلة
اظن انت متفق معايا في الموضوع ده
ويشوفوهم اتربوا ازاي
وياخدوا عينة من بقية الناس اللي عادة مش ايجابيين ويشوفوهم اتربوا ازاي
لان فيه ظواهر اجتماعية تدل على ان فيه غلط في التربية

mido يقول...

خد يا عمى كل اللى نفسك فيه

هنا

mido يقول...

جبهة التهييس الشعبية

طيب ليه يا محمد اعتبرت ان الاسئلة للرجالة رخمة وعدوانية انت وميدو وما اعتبرتوش ان الاسئلة للستات برضه رخمة وعدوانية؟

علشان مقرتش اسئلة الستات
D:
---------------------

اما بخصوص اللي ميدو قاله

ارجو يا ميدو انك معلش ما تدخلش في حياتي الشخصية
فوق انه مش من حقك الاشارة لحياتي الشخصية بالطريقة دي
كمان انت ما عندكش اي معلومات عنها
وفيه اتهام ليا بعدم الموضوعية او اني واخدة فكرة غلط عن الرجالة
او انك بتشكك في نزاهة رايي وانا مش قابلة الكلام ده


الله طب بالراحة متضربيش :)
انا اسف و اسحب كلامى علشان زعلك
(بس مش عارف احذفه)
:((


اما بخصوص الموضوعية

انا فهمت فكرة الاتجاه العام اللى انت حللتيها فى كلامك اللى بتعبر عن الاغلبية

موافق

بس برده لازم فى الاخر تبلى ريقنا و تقولى

( ومما لاشك فيه , انه يوجد نسية معقولة من الرجال اصحاب الشهامة والنخوة والاخلاق الراقية .. الخ)

:)
:)
:)

mido يقول...

مهندس مصرى

ادينى بئى الكود بتاع الاخبار علشان مش عارف اجيبه

mido يقول...

طب بقولك

احذف تعليقى الاولانى

جبهة التهييس الشعبية يقول...

ههههههههههههه
يا جمالي
ليه بقى انت عايزني اكدب؟
لو فيه نسبة معقولة
والنسبة المعقولة دي تعمل مثلا خمسين في المية
لو فيه خمسين في المية من رجالة مصر ايجابيين ومتحملين المسئولية وفاهمين معنى الرجولة ما كانش اكبر اعتصام فيكي يا مصر يعمل 200 واحد
اصل مش معقولة يعني الرجالة في مصر عددهم 400 بس
:)
لو فيه نسبة معقولة يعني عشرين مليون راجل مصري جدع ما كانش الناس ينزلوا يهيصوا للاهلي يوم براءة بتاع العبارة بينما النسبة المعقولة قاعدة حاطة ايدها على خدها

يا راجل ده احنا خايفين نعلن عن اضراب احسن نتكبس زي يوم 4 مايو وناخد مقلب ويبقى شكلنا وحش تاني
طب على الاقل لو فيه نسبة معقولة يعني عشرين مليون كان يوم 4 مايو تلاقي عشرين مليون مواطن قاعدين في البيت
صح؟

Mohamed Hamdy يقول...

بصراحه الأسئلة جميله والإجابات أروع

تحياتى .. وكل سنه وانت طيب

mido يقول...

نوارة

امممممم

عندك حق

بس اضراب غزل المحلة كان معقول ولاايه؟

مهندس مصري يقول...

جبهة التهييس الشعبية
====================
يا ستي ما انا رديت عليكي عندك
و قلت لك على الصدمة اللي اتصدمتها في بعض إصحابي
و قلت لك إن شكلي كنت عايش في المريخ مش هنا
:)
أبصم لك بالتسعة يا ستي
:)

انا عن نفسي اتربيت من اب حازم و ام حنونة
و الإتنين ربوني إني أراعي ربنا في كل حاجة بأعملها
لإن دي اهم حاجة في الدنيا

ميدو
=====
تشكر يا دكتور

موقع الكود أهوه
http://almokhtsar.com/index.php?action=newsbar

بس إنت بتحط لينك جوه التعليق إزاي

إبعت لي الكود في الإيميل بشرح تفصيلي الله يكرمك
و إحذف تعليقك من سلة مهملات صغيرةتحت تاريخ و وقت تعليقك
لونها رصاصي باهت
ركز انت بس

محمد حمدي
========
و انت طيب و بألف صحة و سلامة

شكراً يا باشا

°¨¨™¤¦الراقص مع الذئاب¦¤™¨¨° يقول...

السلام عليكم
علي فكرة انا دخلت جاوبت علي الاسئلة المستفزة بتاعتها
اتمني من كل قلبي اني اكون عرفت احرق دمها واستفزها

مهندس مصري يقول...

الراقص مع الذئاب
=================
و عليكم السلام و رحمة الله و بركاته
و تحرقه ليه و تستفزها ليه ؟
دي بنت حلال و طيبة
ثم انت ما شفتش الأسئلة الحريمي بتاعتها ما هي زي الرجالي و يمكن أزفت
مفيش داعي إنك تآخد الموضوع على أعصابك يا باشا
هي بتقول إن دي عيوب متفشية في معظم و ليس كل الرجالة و أنا و هي مختلفين على نسبة العدد المعيوب بس
:)

¨¨¨°~*§¦§ Appy §¦§*~°¨¨¨ يقول...

مش كله زيك يا هندسه فيه وفيه وبعدين الكلام حاجه فى الجواز والتنفيذ حاجه تانيه وتالته ورابعه خالص