السبت، سبتمبر 20، 2008

عمرة رمضان




الحمد لله ربنا قدرني و عملت عمرة رمضان اللي ثوابها يعادل ثواب حجة
لو فاكرين انا كنت كتبت عن العمرة قبل كده مرتين
الحمد لله عملت عمرة و صور العمرة الي كنت عملتها
بس عمرة رمضان لها طعم تاني

طعم متعب و زحمة قوي بس طعم إيماني عميق برضه خصوصاً صلاة التراويح في الحرم 23 ركعة انما ايه جميلة

المشكلة في العمرة من داخل السعودية انها 3 ايام بس
يوم رايح - الاربعاء- و يوم في مكة - الخميس - و يوم جاي- الجمعة - و نعدي على ميقات أبيار علي ( ذو الحليفة ) جنب المدينة و نحرم منه و إحنا رايحين
و و إحنا راجعين بنعدي نصلي الجمعة في المسجد النبوي
و بنقضي يوم الخميس كله في مكة
فبيبقى إجهاد جامد لإن السفر بالإتوبيس بشكل متواصل متعب
نفسي في عمرة طويلة و يومين على بعضهم في المدينة بدل الإستعجال بتاع كل مرة ده بس ظروف الشغل ما تسمحش

وصلنا الميقات الساعة 8,30 م و أحرمنا
وصلنا مكة الساعة 2,30 صباحاً و بعد استلامنا لغرفة الفندق نزلنا جري على الحرم و بدأنا الطواف
و بعد الطواف سبع أشواط في وسط زحمة رهيبة و صلاة ركعتين خلف مقام إبراهيم إتجهنا للسعي بين الصفا و المروة

بس الشهادة لله ربنا يبارك للسعوديين ويجازيهم خير على التوسعات اللي بيعملوها في الحرم المسعى تم توسيعه و بقى فيه دور أول علوي و دور تاني بجوار الدور الأرضي و لسه فيه توسعات جاية و كلها على أعلى مستوى
و ده منظر توسعات المسعى من بره شايفين عدد الأوناش اللي شغالة
المهم عملت السعي في مسعى الدور الاول كانت زحمته أخف شوية


خلصت 5 أشواط من السعي و الفجر أذن و لما خلصت الشوطين التانيين اقيمت الصلاة فصليت عند المروة في مسعى الدور الأول و نزلت خرجت من مخرج المروة و حلقت


بس لو تلاحظوا حتلاقوا البرج اللي ورايا بيتهد و ده بسبب التوسعات برضه
روحت نمت لحد الضهر و نزلت صليت الظهر في الحرم بس الفندق بتاعنا المرة دي كانت اقرب نقطة ليه في الحرم هي مخرج المسعى بتاع المروة و علشان كده كانت اقرب سكة للدخول للحرم هو مشي شوط كامل في المسعى من المروة للصفا و انا داخل و من الصفا للمروة و انا خارج
و الملاحظ في رمضان إن الحرم و الشوارع المحيطة به زحمة طوال الـ 24 ساعة و ما بيفضاش خالص
كمان البيوت في مكة مبنية على الجبال و الأنفاق مخترقة لجبال صخرية
الحاجات دي انجازات هندسية جبارة و كنت مهتم بيها جداً بحكم المهنة هي و التوسعات
يا بخته بجد اللي يشتغل في الحاجات دي في مكة
المهم خرجت من باب الملك عبد العزيز و ده الباب الوحيد اللي ساحته الأمامية ما إتدمرتش لإن مفيش توسعات ناحيتها
بس شوفوا الزحمة
المهم و انا بأتمشى إكتشفت سر من أسرار الصباغ اللي مخبيها علينا رغم الصحوبية و العيش و الساندوتشات
محل صرافة و تغيير عملات في مكة و بعد كده جاي يتكلم على الموبايل اللي ضاع :)
و لقيت ايه كمان
فندق مبارك و لا تعليق
و ناس بتأكل الحمام في الشارع


وهكذا طول اليوم ما بين الصلاة في الحرم و النوم في الفندق لإن الواحد كان هلكان الصراحة لدرجة آخر اليوم كان الواحد بيعرج
صلينا العشاء و التراويح على السطح في المسجد الحرام بسبب شدة الزحام

شوفوا الحرم عامل ازاي بعد الصلاة


بس صلاة التراويح هناك لها طعم تاني خالص و إحساس عميق يحرك قلب الواحد من جوه لكن انا لي اعتراض على دعاء القنوت كان طويل جداً و بعض المعاني فيه مكررة بدون داعي انا رجلي وجعتني من الوقفة و افتكرت حديث حولها ندندن انا و معاذ


و بعد صلاة فجر الجمعة اتجهنا للمدينة

المشكلة الكبيرة بقى سواء في الحرم المكي او المدني إن الحمامات زحمة جداً

و مش عارف ايه الحل الصراحة دا الحمامات و المواضئ في المسجد النبوي 5 ادوار تحت الارض
و الجراجات تحت الارض متعددة الطوابق يادوب مكفية العربيات
ربنا يقدرهم على توسعات تانية تكفي
صلينا الجمعة في المسجد تحت واحدة من المظلات اللي بتغطي الساحة الداخلية للمسجد
بس الروضة الشريفة اتقفلت بعد الصلاة مباشرة و معرفتش ادخلها من الزحمة بس مرينا قدام قبر النبي - صلى الله عليه و سلم - و صاحبيه ابو بكر الصديق و عمر بن الخطاب - رضي الله عنهما - بقوة الدفع وسط تيار بشري رهيب و خرجنا من باب البقيع
بس زحمة طحن
شوفوا المنظر بعد الصلاة

بس بدأوا يغطوا الساحة الخارجية دي بمظلات برضه كجزء من التوسعات لإستيعاب أعداد أكبر من المصلين
بس لسه ما خلصوهاش
و رجعنا بعدها لحائل وصلنها الساعة 8,30 بالليل بعد ما فطرنا على مائدة رحمن في جامع في السكة
بس سفر متعب بشكل جامد انا مش عارف الناس كانت بتحج على ظهور الجمال إزاي بس

عموماً ربنا يطول في عمرنا و يكتب لنا الحج جميعاً يارب و انا ناويه السنة دي ان شاء الله
و على فكرة انا دعيت لكم كلكم كل اللي قالي و اللي ما قاليش و افتكرته و ربنا يتقبل و يستجيب

هناك 36 تعليقًا:

Ahmed Al-Sabbagh يقول...

الله الله الله

ماشاء الله لا حول ولا قوة الا بالله

ياااااااااااارب يكرمك ويتقبل منك

ويرزقنا بزيارة النبى

الصباغ للصرافة

ههههههههههههههههههههههه

يا خسارة فقستنى وفقست احد استثماراتى فى السعودية

هههههههههههههههههههههههه

بس يا عم للناس تصدق

ده انا يا بنى لما بعدى من قدام محل صرافة بتجيلى كرشة نفس

الصورة جميلة اوى يا محمد وعيشتنى فى جو جميل

واسلوبك محبب اوى ليا

يارب ترجع لنا بالسلامة

بجد يا اخى وحشتنا وسايب فراغ كبير

تسلم لى

احمد

princess يقول...

يا رب يتقبل منك
وتكون عمرة مقبولة ان شاء الله
ويتقبل دعائك
الصور خلتنى اكنى كنت هناك بالظبط
لربنا يوعدنا يارب:)
تحياتى

ojg يقول...

اللهم تقبل
شوقتنا واحنا اصلا متشوقين
ربنا يرزقنا بيها
خسارة اني ماوصيتكش على الدعاء قبل ما تسافر
:(
ان شاء الله المرة الجايه عن قريب بس تبقى تقولي قبلها
:)

أحسن شاب في البلد يقول...

ايه يا عام الحاج .. انت رايح عمرة و رايح تعمل ريبورتاج ؟؟
ماشي بالموبايل ؟؟ صور و فيديو ؟؟
فين الخشوع ؟
لو مش هاتخشع في المسجد الحرام هاتخشع فين ؟
اكيد ماشي تبص و تقول " آه .. لقطة هايلة تنفع للمدونة " ... ينفع كده ؟؟ :(
انا مستاء منك

ضى القمر يقول...

اخى
بسم الله ماشاء الله ..

صور جعلت روحى تروح لهناك ..

شوقتنى لزيارة البيت كثييرا ..

بارك الله فيك يا اخى

تحيتى لك

Hossam يقول...

hiiiiiiiiiiiiiiiiii
الف الف الف الف مليون مبروك
ياهووووووووووووووووووووووووو
مبروك يا باشا وعقبلنا يا رب وعقبالك كمان اما تبقى حجة انشاء الله
الوصر تحفة وبجد يبختك انك كنت هناك
انا بحقد عليك ههههههههههههههههههه
اتمنى اشوفك عندى سلام حبى

مصري بالغربة يقول...

بوست جميل فعلا

وتقبل الله ان شاء الله عمرتك باذن الله

بس اللي باخدوا عليك ويمكن واحد علق على الموضوع ده قبل كده

هو ان يكون فيه خشوع وتبعد عن الدنيا خالص في الوقت ده

تبقى مع ربنا وبس ومتفكرش في اي حاجة تانية

لا مدونة ولا مدونيين

معلش يا هندسة ده راي الشخصي

يا رب متزعلش بس

مهندس مصري يقول...

احمد الصباغ
==========
الله يخليك يا أحمد
اسلوب ايه بس
دا انا باكتب اللي بيجيي في دماغي علطول من غير ترتيب
دايماً جابر بخاطري
و انت كمان واحشني قوي
اشوفك على خير ان شاء الله
:)

أميرة
=====
آميين
و ربنا ينولها لك انتي و كل المسلمين :)

ojg
====
و لو إني مش فاهم معنى إسمك ده ايه ؟

آميين
و لا تزعلي في الحج ان شاء الله
:)

أحسن شاب في البلد
=================
يا بني انا كنت بأبقى خاشع في الصلاة لكن بعدها كنت بأتأمل في كل حاجة و نفسي اصورها و أوريها للناس
لكن جوه الصلاة و المناسك كنت خاشع و الحمد لله
و بكره تروح و تعرف و حنشوف ساعتها حتتصور كام صورة و حتصور كام صورة
:)

ضي القمر
==========
أي خدمة
و شكراً على التعليق
:)
ربنا يكتبها لك ان شاء الله

حسام
=====
الله يبارك فيك
عقبالك

وبصيت عندك خلاص دا انت طلعت مثقف غويط قوي :)


مصري بالغربة
=============
بص يا هندسة انا قلتها قبل كده
اثناء الصلاة كنت بأكون خاشع و الحمد لله و أثناء قراءة القرآن لكن ما تطلبش مني ده طوال الـ 24 ساعة
و مفيش أي زعل
:)
و رأيك على دماغي من فوق

أنا إنسان يقول...

تقبل الله منك عمرتك وصلاتك ودعاءك
ورزقنا مثلها
اللهم امين

عاشــــــ النقاب ـقــــة"نونو" يقول...

اغبطك
ربنا يتقبل يارب
واتمنى تكون افتكرتني بدعاء
وان ما كنتش افتكرت
يلا دلوقتي ادعيلي بتفريج الكرب
ربنا يبارك لك وعقبال الحج
رمضان كريم

حمادة زيدان يقول...

بشمهندس

حمدالله ع السلامة ويارب تكون افتكرتنا بالدعاء .....

متشكرين اوى عالصور تجنن ربنا يكرمك يارب ويحازيك خير

رمضان كريم

اخوك
حمادة زيدان

Appyplanet يقول...

ربنا يتقبل منك يا رب يا بشمهندس
بس انا شوفت صور الموقع والله عذرت ليه المهندسين عندنا فى الموقع فى مصر بتهرب دا انتم علا بتتعبوا وخاصه لما تكون واحد زيك بيدي اهتمامه للشغل ويراعى ربنا
ربنا معاك

احمد الجيزاوى يقول...

ماشاء الله لا حول ولا قوة الا بالله
بجد وحشتنى ايام وذكريات العمرة
الف مبروك واسئل الله ان يجعله بعودة ليك
احمد الجيزاوى

مهندس مصري يقول...

انا إنسان
==========
آمييييييييييين

عاشقة النقاب
=============
ربنا يفرج كربك و يكرمك و يهنيكي
آمييين

حمادة زيدان
===========
الله يسلمك و يكرمك

أي خدمة يا ريس
على فكرة أنا متابع تدويناتك كلها بس مش بألاقي حاجة اقولها فما بأعلقش علشان كده بس بأقراها

آبي
====
آميين
الله يخليكي
و شغلانتنا فعلاً متعبة بس نعمل ايه ؟
قالوها من زمان
قطيعة محدش بياكلها بالساهل
D:
:)) هههههههه

أحمد الجيزاوي
============
الله يبارك فيك
آميين و نكون جماعة ان شاء الله

خطوة عزيزة يا ريس بعد غياب
:)

نيجار يقول...

مهندس مصري
شرفتني بزيارتك لمدونتي
وبجد مدونتك جميله جداً
أما عن موضوع البوست ده فمبروك العمره وعقبال الحج وأنا عارفه إن عمره العشر الأواخر من رمضان تعدل حجه وكان حظي حلو إني عملت عمره العشر الاواخر بس من وأنا صغيره شويه وكنا ساعتها في الكويت ورحنا من الكويت للسعوديه بالعربيه وكانت رحله جميله جداً وروحانيه جداً وبجد كنت حاسه بنفس إحساسك وقت العباده كان في خشوع ووقت التأمل أكيد كنت عايزه أصور كل لحظه علشان حبايبي يشوفوا اللي شوفته وده طبعاً ما يتعارضش مع غرض الرحله وطبعاً المدينه المنوره مش عارفه ليه كانت الأقرب لقلبي من مكه يمكن لإن أصلي وجذور عائلتي من المدينه المنوره ولان طبعاً فيها سيدنا محمد صلى الله عليه وسلم والصحابه، بس للأسف كان التصوير وقتها ممنوع بالمدينه
والله فكرتني بالأيام الحلوه دي
ربنا يكرمك
تحياتي

لماضة يقول...

يا بختك يا هندسه
ربنا يتقبل يارب صالح الاعمال
المهم دعيتلنا ولا نسيت

ابن حـجـر الـعـسـقـلانـى يقول...

ربنا يكرمك يا هندسة .. و يتقبل منك

و يا رب كدة تتمكن من أداء الحجة الكبيرة

ليا عندك سؤال يا زعيم بس ما تتخنقش منى الله يخليك .. إذا كانت العمرة فى رمضان بمقام حجة ... طب الحجة فى رمضان تبقى بمقام إيه ؟؟؟؟

جاوبنى الله يكرمك :-)

مهندس مصري يقول...

نيجار
======
الله يخليكي

عمرة رمضان في اي وقت منه تساوي ثواب حجة و ليس العشر الاواخر فقط

سعيد إن المدونة عجبتك و الأرشيف مليان حاجات كتير ان شاء الله حتعجبك

لماضة
=====
آميين
ما انا قلت دعيت

ابن حجر العسقلاني
=================
آميين

الحجة في ذو الحجة يا عسقول
ملهاش دعوة برمضان خالص يا خفيف :)

mahasen saber يقول...

الله الله يكرمك ويتقبل
نقلتلنا المشاعر الروحانيه بالتفصيل والصور الله يباركلك قمه فى الجمال
انا هقعد ابنى على رجلى واوريله الصور دلى واشرحله العمره واحساسها
بس اكتر شئ لفت نظرى وعجبنى موضوع هدم البرج عشان التوسع الله فعلا شئ جميل لان ده بيدى معانى كتير اولا قدسية الحرم اليى ميقفش قدامها شئ حتى لو الامبايرستات وثانيا ده دليل على زيادة الاعداد كل سنه..
اللهم عز الاسلام والمسلمين..
ربنا يتقبل منك ويكرمك لانك بتشركنا معاك فى الروحانيات النقيه دى.
وربنا يكتبهالك وتشتغل فى توسعات الحرم انتا كمان ...
ده ي ا بخته اليى يمس التراب ده..

mahasen saber يقول...

بس بخصوص الصباغ انا قلت من البدايه
ده رأس مالى مندس محدش صدقنى
عمله وتغيير دولارات
وايه بيقول بتجيله كرشة نفس ...
قصده من كتر الفرحه نفسه بيطبق عليه..
خلاص لقيتله حل الصباغ يطلعنا عمره كلنا على حسابه
بس ربنا يتقبل..

مهندس مصري يقول...

محاسن صابر
==========
الله يكرمك يا أم عبد الرحمن
و يخلي لك عبد الرحمن و ينولكم العمرة و الحج ان شاء الله يارب

هو برج واحد اللي بيتهد
دا ده اللي فاضل و متأخرين في هدمه
دول هدوا أبراج و فنادق و محلات كتييير قوي
من ناحية باب الفتح و مخرج المسعى و دلوقتي اتساوت بالأرض و بيكسروا في صخور الجبل علشان يساووا الارض بره الحرم من الناحية دي

بالنسبة للصباغ
انا كنت باقول إنه مخبي حاجة و اخيراً عرفتها
:)

Coca يقول...

ربنا يتقبل منك يا محمد
انا نفسي انا كمان فيها اوي
الصور جميله اوي اوي اوي
ادتني احساس اني هناك
ربنا يكرمك يا محمد
بوست جميل

مهندس مصري يقول...

كوكا
====
آميين
شكراً
و يارب ما تقطعيش الزيارات
:)

محمود بن حافظ يقول...

يا رب اوعدنا

جمعاوي(لا للنميمة) يقول...

السلام عليكم يا بشمهندس وتقبل الله منا ومنكم ونكون سوا مع بعض فى عمرة السنة اللى جايه اللهم امين

دمت لنا بخير ونورت مدونتى المتواضعة وادعيلنا يا بشمهندس علشان فعلا والله مصر بتتخطف واحنا فى بهدلة واستإساد لأمن الدولة علينا فى حالة ليس لها من دون الله كاشفة
ويلا سلام

تابعوا الجديد يقول...

مشكلة الصباغ والدكتور زعبولا
بنظرة حيادية لصديق كليهما
مدون يدعى محمد الجوهري
http://goharyblog.blogspot.com/
شوفوها ضروري

مهندس مصري يقول...

محمود بن حافظ
=============
إن شاء الله يوعدك
:)

جمعاوي ( لا للنميمة )
===================
و عليكم السلام و رحمة الله و بركاته
آميين جمعاً إن شاء الله
الله يخليك
ربنا يرفع مقته و غضبه عنا
إحنا في دمنهور الأمن إقتحم مسجدين و طرد المعتكفين

تابعوا الجديد
=============
شفتها
و علقت

عايش ولكن يقول...

ما شاء الله
ربنا يتقبل منك
عمره مقبوله ان شاء الله
اوعدنا يا رب
دمت بكل الخير
علاء

كيارا يقول...

اللللللللللللللللله

بابا برده شوقني اني اروح من الصورررر


عاااااااااااااااا هو انتوا تروحوا وتعقدوني انا

عااااااااااااااااااااا

بس بجد ربنا يباركلك يااارب

وتحج كمان

وتحقق احلامك

وتكون من ربنا قريب

ويباركلك في رزقك وحياتك

كل سنه وانت طيب

كيارا

مهندس مصري يقول...

عايش و لكن
===========
آميين و ربنا يكتبها لك و لكل المسلمين
و شكراً لدعاؤك يا علاء
:)

كيارا
======
هههههههه
طبعاً يا بنتي تعقيدك ده مهمة أساسية في حياة كل اللي راح عمرة
:)

لا بجد شكراً على الدعوات دي كلها و ربنا يستجيبها يارب آميين

و كل سنة و انتي طيبة و انا عجبتني مدونتك و حأتابعها على طول
:)

الباحث عن الحقيقة يقول...

ما شاء الله
يا خي الواحد ..يعني انتم هتخلونا نعيط ولا ايه
يا رب اكررمنا بزيارتك وزيارة حبيبك المصطفى صلى الله عليه وسلم
ربنا يتقبل منك ويجزيك خير جزاء

مهندس مصري يقول...

الباحث عن الحقيقة
=================
آميين ربنا يكتبها لك
عيط و لا يهمك هو إنت حتعيط قدام حد غريب :)
مش جاي عندنا و تقولي شباب و بتاع :)

أنا ضفتك على الماسنجر إقبل الإضافة عايز أكلمك
أو ضيفني انت على أي إيميل تاني إنت بتستخدمه

الباحث عن الحقيقة يقول...

قبلت الاضافة واضفتك
انت اللى فين
مش عايز ادور كتير انا رجلي لسه وارمه

حزينه يقول...

السلام عليكم
اهلا ابن بلدى

انا كمان ربنا قدرنى وسافرت عمرة بس قبلك فى رجب وكانت جميله
ودلوقتى فى حاجه اسمها الشوق
بيقتلنى انى اروح واشوفها تانى وابكى لما اشوفها
ربنا يكتبهالنا كلنا امين



حزينه

ربع ضارب يقول...

عمرة مقبولة باذن الله وعقبالنا جميعا

osama يقول...

اول مرور وليس الاخير
عمره مقبوله الصور فكرتنى بايام السعوديه وكما انا كنت بزور حائل كتير
تقبل مروري