الجمعة، أكتوبر 03، 2008

تاج التدوين

التاج ده جاي لي من مدونة جنة

من المدونة Gannah

:)

بدأت تدوين امتى ودخلت العالم دا ازاى؟

بدأت تدوين في 11 أغسطس 2007 و دخلت العالم ده من متابعتي لبعض المدونات اللي كان إتكتب عليها في جريدة الدستور و التفاصيل كلها في اول بوست ليا أنا مين

إيه كان انطباعك فى البداية ؟

كان إنطباعي الاول إن ده عالم حر ممكن أي حد يقول اللي هو عايزه و يعبر عن نفسه بحرية

و الإنطباع التاني إن أغلب الناس محترمة و مثقفة و ليها فكر و مبدأ

بس لما قِدمت في الموضوع عرفت إن التدوين فيه كل حاجة الكويس و الوحش

مين اكتر حد بتهتم بتعليقه على البوست الجديد ؟

بصراحة و بدون زعل عصفور المدينة هو أكتر شخص بأهتم بتعليقه و بعد منه شلة أصحاب التدوين الجُمال اللي عارفين نفسهم و معظمهم قابلته مرة او اكتر في لقاءات المدونين اللي حضرتها و إن كنت بأهتم طبعاً بكل تعليق يجيلي و بأرد عليه خصوصاً إن فيه مدونين لسه متعرف عليهم بس مدوناتهم و تعليقاتهم حلوة حقيقي

إيه أهم حاجة إتعلمتها من عالم التدوين ؟

إتعلمت إني اقول رأيي بجرأة و بدون خوف في أي موضوع يطرح للنقاش و اتعلمت إني أقرأ و اسمع كتير و أكتب قليل و أسمع الأراء المخالفة ليا بصبر و طولة بال و أجادلهم بالتي هي أحسن

و حاسس إن التدوين فجر فيا قدرات صحفية بس مش عارف أستغلها كويس :)

بس جربت في اللقاءات دي

أيه اكتر حاجه كرهتها ؟

مدونات الشواذ و مشعلي الفتن سواء دينية أو إجتماعية أو سياسية

حاسس إن التدوين ليه تأثير ؟

هو ليه تأثير عليا أكيد حاسس إنه خلاني إيجابي أكتر و خلاني أعرف ناس كتير كويسين

هو ليه تأثير على الأفراد و أظن إن تأثيره للأحسن في أغلب الحالات

إنما تأثيره على المجتمع هو تأثير إعلامي في الأغلب لإن بجد في أخبار مش بتلاقيها غير في المدونات و مش ممكن أنسى إضراب 6 إبريل لما أخباره كانت مالية المدونات لكن ما كانش فيه و لا قناة ارضية و لا فضائية بتغطيه مضبوط بأمارة الموضوعات دي

فيديو المظاهرة أمام محكمة دمنهور

صور اشتباكات المحلة النهاردة مع قوات الأمن من رويترز

معركة المحلة ما خلصتش

و لا الكتير من الموضوعات التانية اللي أثارتها و غطتها المدونات خصوصاً قضايا تعذيب الشرطة للمواطنين

بس بدأ يبقى في تأثير إجتماعي و خيري للمدونات بلقاءات التبرع سواء بالدم او بمساعدات عينية او نقدية للناس المحتاجين بجد لها و دي اشكر فيها بجد بت خيخة وأى كلام و كل اللي ساعدوها في عمل الخير ده ربنا يكرمهم كلهم يارب

تهدى التاج لمين ؟

انا عارف إن ناس كتير بتستغلس تجاوب التاجات و علشان كده مش حأفرضه على حد و لكن اللي عايز يجاوبه يتفضل و ياريت يقول لي علشان أشوف إجاباته

:)



هناك 28 تعليقًا:

كيارا يقول...

اجابات جميلللله فعلا

وصريحه كومان

واحلي حاجه انك مش بعته لحد

كل سنه وانت طيب

عيد سعيد

Ahmed Al-Sabbagh يقول...

تسلم يا محمد

مش عارف ليه كلامك ريحنى شوية

يمكن عشان اللى الواحد بيشوفة اليومين دول
من كلام غريب

بجد انا بعتز بصداقتك جدا

mahasen saber يقول...

يا سلام انا قلت ايه ...
ما قل ودل ..بس انتا فعلا عندك قدرات صحفيه وده واضح من كتير من بوستاتك وعلى فكره ده اول انطباع جالى لما زرت مدونتك ..فاكر وكنت فاكراك مهندس محمود اسكندرانى..
بس قولى هو كل مهندسى مصر محترمين كده ربنا يبارك فى اعماركوا ويصلحلكوا حالكوا..ها الجمع اخباره ايه مضبوط ولاا انا تلميذه فاشله...
وبعدين جزئيه استاذ محمد شلبى فعلا الراجل ده شخصيه محترمه جدا عارف هو اليى قالى انقل مدونتى للبلوجر ربنا يكرمه هو اليى نورنى وارشدنى فى الموضوع ده..
ربنا يصلح حاله ويباركله فى اسرته...
اجابتك ووجهة نظرك فى محلها
ربنا يكرمك ويسعدك ويكملك بعقلك دايما
ويهديلك بالك ان شاء الله...

mahasen saber يقول...

وعلى فكره شاكره ليك قوى اهتمامك
بمدونتى فعلا ببقا فى قمه من قمم سعادتى لما بلاقى ليك تعليق تقولى فيه مثلا انا جاوبت التاج
بحس بالاهتمام والتقدير ...
ربنا يكرمك ويباركلك ويديم المعروف ونقاء القلب وصفاء السريره
وسمو الفكر
وعيد سعيد عليك وانتا بكامل الصحه والستر...
اختك ام بيرو..

قلم رصاص يقول...

جميل جدا ياهندسه

حوار رائع .. وردودك أزكت الموضوع واعطته مزيد من الجمال والتكامل


كل سنة وانت طيب

تقبل مروري

امام الجيل يقول...

جميل

ربنا يكرمك
وجميل عالم التدوين اكيد الواحد استفاد منه باشياء كتير

خاصة البشر
واعتقد ده اهم عامل
الواحد هيخرج بيه من عالم التدوين

عيد سعيد برضه
:)

محمد الجرايحى يقول...

أخى الفاضل : مهندس مصرى
السلام عليكم ورحمة الله وبركاته
قرأت كلماتك عن التدوين وعن تأثيره فيك وأكيد هو نفس التأثير فى كل مدون جاد أتخذ من التدوين رسالة
وأخذه بجدية هادفاً إلى الإفادة والاستفادة
بارك الله فيك وأعزك
أخوك
محمد

احساس لسه حى يقول...

عزيزى
كل سنه وانت طيب وعيد سعيد

اجباتك جميلة وبتفق معاك فيها

ومعاك التدوين زى دنيتن فيه

الكويس والوحش الصريح والمنافق

بس اهم شئ اننا ما نحولش نشترى مدون ونبيع رائينا علشان الصحبة والزيارات بينا فى المدونات

تحياتى

سلااام

kochia يقول...

احييك علي اجاباتك القصرة والواضحة والمباشرة
واتفق معك في كرهك لبعض المدونات جدا
هي فعلا مدونات الشواذ من كل نوع

تحياتي

مهندس مصري يقول...

كيارا
======
شكراً
و عايز أعرف إزاي إنتي اول تعليق دايماً
إنتي قاعدة جنب الريدر علطول
:)
عموماً ده شئ يفرحني
الف شكر مرة تانية
و كل سنة و انتي طيبة

احمد الصباغ
===========
الله يسلمك يا أحمد
انت عارف إنك من أهم الناس اللي بأنتظر تعليقهم
دا إنت عمود الشلة التدوينية بتاعتنا
و بينا و بين بعض ذكريات جميلة
ربنا يديم صداقتنا دايماً في المعروف
و ما تأخدش كل حاجة على أعصابك
فوت شوية و المثل بيقول
طنش تعيش تآكل قراقيش
:)

محاسن صابر
==========
يا ستي شكراً الله يكرمك ده بس من ذوقك
و يا ستي مش حأراجع وراكي الجمع بس لو إستخدمتي حرف الميم بدل الواو و الألف كان يبقى أحسن
:)
يعني تبقى "أعماركم و يصلح لكم حالكم"
:)
مش كل مهندسين مصر كده كل فئة فيها الكويس و الوحش بس الحمد لله إن لسه الكويس أغلبية حتى لو كانت مش ظاهرة قوي

البشمهندس / محمد شلبي هو فعلاً من أكثر الشخصيات إحتراماً و تأثيراً إيجابياً في عالم التدوين في رأيي
و الإهتمام متبادل يا أم عبد الرحمن
ربنا يكرمك انتي و ابنك و يسهل لكم الخير كله
و آميين على كل دعائك يا أم عبد الرحمن
هو بيرو ده دلع عبد الرحمن ؟

قلم رصاص
=========
شكراً
و انت طيب
و جميلة مدونتك التانية عالم مفتوح لسه شايفها اول مرة دلوقت

امام الجيل
==========
الله يخليك
معاك حق يمكن دي اهم حاجة نستفيدها من عالم التدوين
الأصدقاء الحقيقين

محمد الجرايحي
===========
و عليكم السلام و رحمة الله و بركاته
الله يبارك في حضرتك
متفق معاك تماماً

إحساس لسه حي
=============
متفق معاك
بس مهم برضه نعرض رأينا بهدوء و بإسلوب لطيف و بدون تجريح و نصبر
و نجادل بالتي هي أحسن و تذكر قول الله سبحانه و تعالى لرسوله الكريم صلى الله عليه و سلم بعد غزوة أحد " فبما رحمة من الله لنت لهم و لو كنت فظاً غليظ القلب لإنفضوا من حولك "

و في النهاية لا يجب أبداً أن نبيع المبدأ من أجل شخص أياً كان لإن المبدأ باقي و الشخص زائل

سعدت بتعليقك
كل سنة و انت طيب و عيد سعيد عليك :)

كوتشيا
======
طيب الحمد لله
:)
و ياريت تحلي التاج ده و نشوف إجاباتك

الفاتح الجعفري يقول...

بشمهندسنا الكبير
ربنا يبارك في عمرك
وكل عام وانت بخير
تاج رائع فعلا
ومن افضل الحجات بالنسبة لي في التدوين التعرف علي الناس المحترمة اللي زي حضرتك فعلا
واري ان التدوين شكل من اشكال التواصل الانساني الجيدة ووسيله من وسائل نشر الافكار

عامة اجابات حضرتك رائعه ,وحضرتك فعلا من الشخصيات النشطة والفعاله
بارك الله لك
وجزاكم الله كل خير

Gannah يقول...

أخى الكريم محمد
سعدت باجابتك على التاج اللى وضحت انك صريح وعنك خبرة معقولة جداا فى عالم التدوين
انا فعلا باتمنى ان تأثير التدوين يكون اكبر وانا فعلا حسيت فى اضراب 6 ابريل انها كانت مصدر مهم للاخبار وكتير من المدونين ليهم مواهب صحفية و ادبية وفعلا انا قريت لك كام موضوع لقيت فعلا انك ممكن تكون صحفى وانت فعلا كده ولك صحيفة كبيرة هى مدونتك
خيخة فعلا بدأت العمل الخيرى فى التدوين وبعدها كان فيه اعمال لاخرين ارجو ذكرهم فى تدوينتك لانك كنت سافرت
اثناء الأعمال اللى قاموا بيها

وهم
طبعا آبى الغنية عن التعريف
و

داليا صاحبة مدونة قوس قزح
http://kouskoza7.blogspot.com
والمهندس أحمد كمال صاحب مدونة رحايا العمر
http://ra7aya.blogspot.com/

أحسن حاجة فى اجاباتك الوضوح والصراحة
بالتوفيق
--------------------------------
بما انك قديم فى عالم التدوين ممكن اسأل سؤالين ع الماشى
منين ممكن احمل برنامج الريدر؟؟
ازاى احط لينك فى التعليق؟؟
تحياتى

Hossam يقول...

hi
كل سنة وانت طيب وعيد سعيد
ردك حلو اوى على التاج
تقبل مرورى
سلام

مهندس مصري يقول...

الفاتح الجعفري
==============
الله يخليك ايه الكلام الحلو ده كله
أنا كده ممكن أتغر في نفسي
يعلم الله كم احبك في الله يا أحمد إنت و محمود ربنا يسهل له جيشه
:)
طيب ما تآخد التاج و تورينا إجاباتك له
انا واثق انها حتكون أجمل

جنة
====
أشكرك على رأيك ده
و يا ستي أديكي ذكرتي الباقيين أهو
:)
و أنا لاأنكر دورهم طبعاً بس أنا ذكرت خيخة لإن البداية اللي أعرفها كانت من عندها و لو ذكرت كل الناس اللي عملوا خير من المدونين مش حأقدر لإن عددهم كتير و ممكن أنسى حد فيزعل و انا مش حمل زعل المدونين
:)

الريدر مش برنامج و إنما هو خدمة من جوجل لقراءة كل جديد في المواقع التي تتابيعها و يوجد له شرح مفصل في التدوينتين دول

ريدر 1

ريدر 2

أما إزاي تحطي لينك جوه التعليق فدي لسه عارفها طازة من ميدو
بس ده كود html مينفعش يتكتب هنا لإنه حيتنفذ علطول و مش حيبان
لو حضرتك تضيفيني على الماسنجر او تبعتي لي إيميل حأبعته لحضرتك علطول

حسام
=====
شكراً يا حسام و ياريت تحل التاج و أشوف إجاباتك

عصفور المدينة يقول...

السلام عليكم ورحمة الله وبركاته
أخي محمد حفظك الله ورعاك في سفرك وترحالك وهون عليك كل صعب
وكل عام وأنت وجميع زوراك بخير

عبرت بكلمات يسيرات عن حالنا كثيرا
ولا شك أن جلوس الإنسان أمام لوحة المفاتيح لكتابة مكنون نفسه وأفكاره وآراءه في أحداث يراها هو مما ينمي ترتيب تلك الأفكار ومراجعتها وتنقيحها بل ونقدها ذاتيا وخارجيا
وأيضا تنمية قدرة الحوار وتحمل المخالفين ومناقشتهم والوصول إلى مكامن الخلل في الأفكار

أحمد كمال يقول...

إجاباتك متوازنة ، و فيها جانب كبير ماحدش يختلف عليه .

أحيي في حضرتك هدوؤك و وعيك ، و تحياتي لك .

مهندس مصري يقول...

عصفور المدينة
=============
و عليكم السلام و رحمة الله و بركاته
آميين يا أبو يحي
و كل عام و انت و كل من تحب بكل خير و صحة و عافية
أتفق معك تماماً يا أستاذي
و لا تغب عليا طويلاً فقد إشتقت إليك
و كان الله في عونك على مشاغلك الكثيرة

أحمد كمال
========
ألف شكر يا بشمهندس
و حضرتك نورتني في اول زيارة لمدونتي و ارحب بأي ملاحظات منك :)

جبهة التهييس الشعبية يقول...

ينفع اعمل التاج ده على المغرب عشان تكون دماغي راقت شوية؟

Gannah يقول...

أخى الكريم
جزاك الله خيرا
عملت خدمة الريدر
دى حلوة قوى مشيت على الخطوات اللى فى الرابط الاول اللى كتبته لى
وان شاء الله ابعتلك ميل علشان تقلى ازاى اعمل رابط فى التعليق
اخبار الشغل ايه؟؟ رجعتوا ولا لسه اجازة
تحياتى

مهندس مصري يقول...

جبهة التهييس الشعبية
=====================
ماشي زي ما تحبي
:)

جنة
===
أي خدمة يا ستي
لا و لو دخلتي الرابط التاني حتلاقي شرح بالصور حيوضح لك كتير
لإن الريدر مليان خبايا
:)

حنرجع الشغل يوم الإتنين

الفاتح اليعقوبي يقول...

السلام عليكم
ازيك يابشمهندس
ربنا يكرمك اجابات جميلة بس كلها لينكات كده ليه فين الاجابات المباشرة

وفي راي الشخصي ان اكثر مانجحت فيه المدونات هي انها اصبحت متنفس لكثير من الشباب المكبوت سياسيا
والقت الضوء علي بعض العينات التي تعيش وسطنا ولا نلقي لها بالا
وخلقت روح جديدة من التواصل بين بعض اصحاب الافكار المختلفة والمتضادة في بعض الاوقات
وايقظت بعض الشباب واضاءت له طريق جديد لفعالية مجتمعية والحملات الخيرية التي نسقت عن طريق مدونين خير دليل علي ذلك

وكل عام وانت بخير يازعيم والسنة الجاية تبقي ابو محمدين علي اعتبار ماسيكون باذن الله
هههههههه
والسلام

أحمد عاطف يقول...

السلام عليكم ورحمة الله وبركاته

ربما تكون تلك هي المرة الأولى التي أتشرف بالتعليق على مدونتك ولكن قبل أن ارد مررت على ما قمت من قبل بتدوينه

فعلمت أنك تستحق التاج عن جداره

تحياتي لك وفقك الله

دعوة الفردوس يقول...

كل سنه وانت طيب


اخبار العيد بعيد عن مصر والصلاه في الاستاد والزحمه اييييييه؟

اتفق معك بخصوص انك تقرا اكتر علشان تكتب في موضوع معين
وانك تتحمل المخالفين لك

mo'men mohamed يقول...

سنة الله فى الكون وجود آدم و إبليس و الملائكة
جزاكم الله كل خير
كل عام و انت بخير
السلام عليكم

أنا إنسان يقول...

عجبتني جدا اجابه حضرتك عن أثر التدوين
هوه فعلا اداه اخباريه قويه
لكن
لا تنسى انه أولا واخيرا
أداة فكريه
نشر الفكر
ومناقشته
وتطويره

مهندس مصري يقول...

الفاتح اليعقوبي
===============
و عليكم السلام و رحمة الله و بركاته
إيه يا دفعة إنت لسه ما لبستش
أنا كنت فاكرك خلاص :)
اللينكات يا سيدي لزوم تعريف الزباين بالبضاعة القديمة
بدل ما سوقها يقف و لا حاجة :)
و موافقك في الرأي طبعاً
بس ربنا يبشرك بالخير مش أما ألاقي أم محمدين الأول
:)

أحمد عاطف
=========
و عليكم السلام و رحمة الله و بركاته
شكراً
و أنا فعلاً بدأت اقرأ أخبارك في ليبيا
:)

دعوة الفردوس
==============
كل سنة و انتي طيبة
العيد هنا مش عيد أصلاً و قمة في الملل
دمنهور وحشاني جداً

مؤمن محمد
========
و عليكم السلام و رحمة الله و بركاته
و كل سنة و انت طيب

أنا إنسان
==========
هو فعلاً أداة فكرية
و كثيراً ما نشاهد صراع الأفكار هذا في ساحات التعليق
:)

الباحث عن الحقيقة يقول...

حاسس إن التدوين فجر فيا قدرات صحفية بس مش عارف أستغلها كويس :)

مش كل من مسك كاميرا بقى صحفي يا باشمهندس

واحنا كمان سعداء بوجودك في عالم التديون
انا سبقتك بكام يوم كده
20 يوليو
:)

اقدم منك برضه

سته استعد يا عسكري :)

مهندس مصري يقول...

الباحث عن الحقيقة
=================
لا يا بابا لا
الشويتين بتوع 6 استعد دول تعملهم على عسقول مش عليا انا
:)
و انا كمان سعيد بوجودي في عالم التدوين