الأحد، أكتوبر 05، 2008

عداد للزوار ممتاز

أنا كنت كتبت قبل كده عن عداد للزوار
لكن إستجابة لطلبات بعض الزملاء من المدونين اللي عايزين يعرفوا رقم الـ IP لزوار مدوناتهم قررت أكتب الموضوع ده كخدمة للمدونين
في عداد ممتاز كان أستاذي عصفور المدينة عرفني عليه و بيعرف الواحد معلومات غزيرة عن مدونته و زوارها
و بيتم الإشتراك فيه عن طريق الموقع ده http://www.statcounter.com/
و حأشرح طريقة الإشتراك فيه خطوة خطوة و إيه هي المعلومات اللي الواحد بيستفيدها منه بالتفصيل و الصور
بس الموضوع حيطول قوي لكن مفيد جداً
اول ما تخشوا الموقع حتلاقوا الصفحة دي
نختار register now فحتدخلنا على الصفحة دي
نملأ البيانات و نعلم صح في المربع اللي تحت علشان نوافق على شروط الإشتراك في الموقع و نضغط register my account
نخش على الصفحة دي
كده إحنا عملنا إشتراك في الموقع نبتدي نعمل العداد و ممكن نعمل أكتر من عداد لو عندنا اكتر من مدونة
نضغط على add a statcounter project و نخش على الصفحة دي
نملأ البيانات إسم المدونة و اللينك بتاعها و نوع المدونة إيه ( شخصية - سياسية - إلخ ) و نحدد وقت الزيارة القصوى اللي على أساسه العداد بيحسب الزوار اللي بيكرروا زيارتهم للمدونة من اللي بيزوروا مرة واحدة و ما يرجعوش :)
و أقصى سجلات تفصيلية لكل زائر من الزوار على حدة هو 500
و في خاصية منع IP معين من ان العداد يعد زياراته لو مش عايز العداد يعد زياراتك كصاحب للمدونة ممكن تحط الـ IP بتاعك
و المربع الأخير تحت تعلمه صح لو عايز إحصائيات مدونتك تكون علنية و ممكن أي حد يشوفها مش إنت بس
لو عايز تحتفظ بإحصائيات مدونتك لنفسك ما تعلمش عليه
و نضغط next فندخل على الصفحة دي
و بكده نبدأ في تحديد شكل العداد
نضغط على configure & install code و نخش على الصفحة دي

نختار شكل العداد و لو عايزينه يظهر من أصله و لا لأ و نخش الصفحة اللي بعدها
و نختار لو إحصائيات العداد حتظهر حنكتب إيه في اللنك اللي حيدخل الناس عليها و العادي بتاعها view my stats ممكن تغيره لو تحب و نخش بعدها على الصفحة دي
و نختار نوع المدونة blogspot
و نخش على اللي بعدها
و نآخد الكود نسخ و لصق و نحطه عندنا في المدونة في التخطيط - إضافة أداة - html
فيظهر العداد حاجة زي كده
و بعد كده لما نعوز نعرف تفاصيل اللي بيجرى في المدونة ندخل الموقع بتاع العداد و حنلاقي الصفحة دي
Summary
وتختاروا إسلوب عرض الزوار يومي - إسبوعي - شهري - ربع سنوي - سنوي :)
الأخضر ده عدد الصفحات اللي إتفتحت في المدونة و الأزرق عدد الزوار و البرتقالي عدد الزوار اللي بيزوروا المدونة بإستمرار اللي دخلوا في اليوم ده
و حتلاقوا تقرير مفصل بالأرقام للرسم البياني ده تحته
لو إخترتوا من العمود اللي على الشمال الإختيار التاني ده Popular Pages
حيوريكم أكثر صفحات الناس بتدخلها في المدونة بالترتيب من الأكثر دخولاً الى الأقل
الإختيار اللي بعده Entry Pages
و حيوريكم الصفحات اللي الناس بتدخلها في المدونة اول ما توصل لها
برضه بالترتيب من الأكثر دخولاً للاقل
و بعدها Exit Pages صفحات الخروج من المدونة
الصفحات اللي الزوار خرجوا منها و سابوا المدونة ( قفلوا برنامج التصفح ، راحوا موقع تاني ) و برضه بالترتيب من الأكتر للأقل
بعدها Came From بيوضح المواقع اللي الزوار جم لمدونتك منها
و بعدها Keyword Analysis اللي بيوضح كلمات البحث اللي الناس كتبتها في مواقع محركات البحث علشان توصل لمدونتك و ترتيبها من الأكتر للأقل
و بعدها Recent Keyword Activity اللي بتوضح آخر ناس دخلت المدونة من محركات البحث و كانت بتدور على إيه بالضبط
ودخلت على أي صفحة في المدونة عندك
و في عدسة مكبرة موجودة في أول كل سطر و بالضغط عليها حتوريك معلومات شخصية تفصيلية عن الزائر بتاع السطر ده زي كده

و فيها بتقولك الزائر ده جالك منين و لو جاي من موقع بحث الموقع بتاع البحث ايه و كان بيدور على كلمة إيه فيه وعنوان الـ IP بتاعه و إسم الشركة اللي بتوفر له خدمة الإنترنت و دولته و محافظته و مدينته و عدد المرات اللي زار فيها مدونتك في خلال آخر 500 زيارة و مدة الزيارة دي ( و دي بتتحسب من اول ما يدخل المدونة لحد آخر مرة يضغط على لينك فيها )
يعني لو واحد فتح المدونة ساعة و ما ضغطش على اي لينك فيها و راح قافلها حتتحسب مدة الزيارة بتاعته بـ صفر ثانية
و بتدي معلومات عن برنامج تصفح الإنترنت اللي دخل بيه عندك و نظام التشغيل بتاع جهازه و resolution او دقة الشاشة بتاعته و هل بيسمح بتشغيل الجافا و لا لأ
و مساره داخل المدونة من اول ما دخل لحد ما خرج و فتح صفحات ايه بالضبط و فتحها إمتى

أظن كده ما سابش العداد اي حاجة إلا أما قالها عن الزائر و فضحه على الآخر
بعد كده Recent Came From أحدث و آخر مواقع الزوار دخلوا مدونتك منها
و بتبين هما جم منين و إمتي و دخلوا المدونة من أنهي صفحة - أو موضوع - فيها و العدسة موجودة برضه في أول السطر :)
و بعدها في Search Engine Wars و دي بتبين محركات البحث اللي الناس جات لمدونتك منها و نسبها بالنسبة لبعض
و زي ما إنتم شايفين كلهم عندي جايين من جوجل
و بعدها في Exit Links اللينكات بتاعة المواقع اللي الزوار خرجوا ليها من مدونتك و مترتبة من الأكتر للأقل
و بعدها Exit Link Activity و ده بيوريك آخر ناس خرجت من عندك خرجت على فين و إمتى و العدسة موجودة برضه
و بعدها Downloads و أظن واضح إنها بتبين اللي تم تحميله من مدونتك لو إنت حاطط حاجة تتحمل منها
بالترتيب برضه من الأكتر للأقل
و بعدها Download Activity و بتبين آخر تحميلات تمت من مدونتك و بالعدسة برضه
و بعدها Visitor Paths و ده بيوضح مسارات الزوار داخل مدونتك
و البيانات تفصيلية و فيها الـ IP و شركة الإنترنت و مكانه بالضبط و كل الصفحات اللي زارها و متنساش العدسة :)
و بعدها Visit Length و ده بيقسم الزوار حسب المدة اللي قضوها في المدونة
و بعدها Returning Visits تقسيم الزوار حسب عدد مرات رجوعهم للمدونة
و بعدها Recent Pageload Activity آخر صفحات تم فتحها في المدونة و مين فتحها و متنساش العدسة
و بعدها Recent Visitor Activity و دي بتعرفك آخر ناس زارت المدونة و معلومات تفصيلية عنهم و برضه في عدسة قدام كل زائر
و بعدها Recent Visitor Map خريطة آخر الزوار و بتبين المواقع اللي جالك منها الزوار على خريطة العالم
و ممكن تضغط على اي موقع منهم فيجيب لك معلومات الزائر بالتفصيل
و بعدها Country/State/City/ISP
و ده تصنيف للزوار حسب الدولة - الولاية او المحافظة او المنطقة - المدينة - شركة توفير خدمة الإنترنت
ده التصنيف حسب الدولة
و طبعاً أكتر دولة بتزور المدونة عندي هي مصر ثم السعودية :)
و تغيير نوع التصنيف بيتم من الإختيارات اللي فوق التصنيف
و ده التصنيف حسب الولاية
و أكتر محافظة بتزورني هي القاهرة في مصر ثم الرياض بالسعودية ثم المنطقة الشرقية بالسعودية
و ده التصنيف حسب المدينة
أكثرهم هي مدينة القاهرة ثم مدينة الرياض
و ده التصنيف حسب شركة توفير خدمة الإنترنت
و أكثرهم هي شركة TE data بمصر ثم مشتركي الـ DSL المنزلي بالسعودية

بعد كده في Browser و ده تصنيف للزوار حسب برنامج تصفح الإنترنت اللي بيستخدموه
و جاء في المقدمة إنترنت إكسبلورر 6 ثم فايرفوكس 3
و بعدها System Stats و ده تصنيفات للزوار حسب دقة العرض بالشاشة ( resolution )

Resolution Stats

و حسب نظام التشغيل للجهاز

Operating System Stats


و لو تلاحظوا أغلب اللي بيدخلوا عندي بيستخدموا win xp ويندوز إكس بي
و بعدها في Lookup IP Address و ده للبحث عن البيانات الكاملة لأحد الزوار بإستخدام الـ IP بتاعه

و أخيراً و ليس آخراً Download Logs و ده لتتمكن من حفظ جميع هذه السجلات في ملف على جهازك
و بيتم الحفظ بصيغة ملف csv

Download Log as CSV file

Download Log as CSV file for Excel

بس خليكم فاكريين إن السجلات التفصيلية دي لآخر 500 زائر فقط

و الشئ الوحيد اللي مش مرتبط بحكاية الـ 500 دي هو الـعداد نفسه و تقرير الـ Summary اللي في الأول خالص

معلش الموضوع طويل جداً بس اعتقد إنه مفيد جداً

و ياريت اللي يستفيد من الموضوع ده يدعي لي و يدعي لعصفور المدينة

هناك 56 تعليقًا:

mido يقول...

هههههههه
كويس و الله
بس أنا لسه مازرنيش 300 على بعض فى 20 يوم , يامسهل

وربنا يكرم عصفور المدينة.

نيجار يقول...

أول تعليق
والله يا بشمهندس مجهود رائع
تشكر عليه وبجد كلك شهامه بس انا دماغي لفت حاسه الموضوع صعب يتعمل معايا من غير ما اغلط واتلخبط دي معجزه بجد اني اتعلمت السنه دي ادخل على النت واعمل مدونه بس هحاول برضه اعمل الخطوات اللي حضرتك قلت عليها وعلى الله تنجح صعيديه بقى ودماغي على قدي.
وكل سنه وانت طيب
تحياتي

نيجار يقول...

مطلعش اول تعليق
المره الجايه بقى

nona يقول...

انا كنت ماشية مظبوطة لغاية موضوع الكود ازاى ينزل بعد كدة كلة دخل فى كلة عموما خير
على فكرة العيب مش فى حضرتك تقريبا العيب فينا احنا هههههههههههههههههههه
مشكور على المجهود الاى حضرتك بذلتة
و ربنا يكرمك و يكرم عصفور الجنة و يجعلك من الصالحين و السعداء فى الدنيا و الاخرة
اللهم امين

قلم رصاص يقول...

ههههههههههههه

ياه ياهندسه ايه الجمال ده كله

لالالالالالالالالالالا
موضوع مصروف عليه ..هههههههههههه

بجد مجهودك فيه جبار .. وشكلك صبرت اوي عما كملته

في ميزان حسناتك يا اخي ان شاء الله

تقبل مروري وتحياتي

الطائر الحزين يقول...

جزاك الله خيرا

كل عام انت بخير
تقبل الله منا ومنكم صالح العمل

عصفور المدينة يقول...

جزاااااااااااك الله خيرا

kochia يقول...

شكله كويس وخدماته حلوة
هحربه ان شاء الله
بس هو فيه بداية انا ممكن احطها
يعني احط الرقم اللي انا وصلت له في العداد القديم ولا مش هينفع وهيبتدي من اول واحد ؟
انا قريت بسرعة مش متاكدة النقطة دي موجودة ولا لا

تحياتي

مهندس مصري يقول...

ميدو
=====
يا سيدي بكره تقدم و العدد يكتر و يبقى في اللمون
:)

نيجار
======
الله يخليكي يا ستي
بس ما تقلقيش الموضوع سهل عمله جداً
دي مجرد بيانات بتملأيها و إختيارات بتعمليها
مشي خطوة خطوة و مش حتتلخبطي إن شاء الله
حطي العداد و إنتظري لما تكملي 500 زائر و شوفي شكل البيانات حيبقى عامل إزاي
:)
نونا
=====
يا ستي وضع الكود سهل خديه copy
و خشي مدونتك إنتي اول ما بتدخلي بتخشي على لوحة التحكم الرئيسية
و في 3 إختيارات
إرسال
إعدادات
التخطيط
إختاري التخطيط
حيدخلك على عناصر الصفحة
حتلاقي في العمود الجانبي بتاعك كل الحاجات اللي انتي حطاها فيه زي البروفايل و الارشيف و غيرها
و حتلاقي مكتوب في مستطيل صغير إضافة اداة
إضغطي عليها فحيفتحلك نافذة تضيفي منها أي حاجة للمدونة
إختاري نوع اللي حتضيفيه كود html
حيفتحلك مكان تكتبي فيه الكود
تروحي عاملة paste
و تحفظي الكلام ده بالضغط على حفظ
و تخرجي تلاقي مدونتك بقى فيها عداد
:)
سهلة أهيه
جربي بس
و عفواً يا نونا
بس هو إسمه عصفور المدينة مش الجنة
آميين يارب

قلم رصاص
=========
آه الموضوع ده طلع عيني يومين كاملين
يوم لتجهيز الصور
و يوم كتابة و تنسيق
آميين يارب
و ياريت الناس تستفيد

الطائر الحزين
=============
ياه خطوة عزيزة
فينك من زمان
واحشني تعليقاتك
:)
و كل عام و إنت بألف خير و منورني
آميين

عصفور المدينة
=============
جزاني و إياك يا أستاذي فأنت من عرفني الموقع
:)

كوتشيا
=======
ليا سؤال بس الأول يعني إيه إسمك ده ؟
ممكن تعرفيني المعني
و ممكن أيوه تحطي رقم تبدأي من عنده بس دي أنا نسيت اقولها
ممكن تبدأي من الرقم اللي وصل له العداد القديم
:)

ملك المدينه يقول...

شكراً يا مهندس على المجهود الرائع فى الشرح


معلومات ممتازه حقيقى وان شاء الله هحاول أجربها وادعوك لزياره مدونتى الجديده

كيارا يقول...

معلش اتاخرت في ارد ومش كنت اول تعليق بس انت عارف الظروف

بوست جميل اوي وربنا يكرمك انت وعصفور المدينه


جزاكم الله خيرا

تحياتي كيارا

مهندس مصري يقول...

ملك المدينة
===========
العفو
ياريت تجربه
:)
انا بصيت في مدونتك و لقيتك غيرت إسمك من الفرعون المصري لملك المدينة

كيارا
======
يا ستي إنتي تنوريني دايماً
بس نفسي تطمنيني فيه إيه
ربنا يكرمك و يفرج كربك

Gannah يقول...

ممكن أسأل سؤال غبى
هو ايه IP ده
لما اعرفه هستفيد ايه؟؟؟
هو طبعا البوست مفيد للى عايز يعمل العداد بس انا السؤال ده وقفنى من البداية
اعذرنى لجهلى
الريدر تمام والله متشكره
تحياتى

مهندس مصري يقول...

جنة
===
رقم الـ IP هو رقم جهازك اللي بيتصل بيه بالإنترنت
و كل جهاز متصل بالإنترنت له رقم IP فريد يمكن تعقبه من خلاله

و سيبك من الـ IP و إعملي العداد علشان تعرفي كام واحد دخل مدونتك و قروا فيها إيه ؟
و لا ده ما يهمكيش
:)

لماضة يقول...

هايل
جاري التجربه

بت خيخة وأى كلام يقول...

انا بس قلت اجي اسلم عليك يا محمد
واقولك كل سنة وانت طيب
معلشس هي جاية متاخرة شوية
بس كنت عند ماما واسر خلاص خد معاه الكمبيوتر بتاعه وداه بيته
وانا كنت قاعدة عند ماما من غير انترنت خاااااالص

المهم
انا قريت التاج والف شكر ليك
ان شاء الله ابقى اجاوب عليه

بالنسبة للبوست ده بقى

بجد مفيد جدا
بس انا برضه بزهق من كل الخطوات دي

تحياتي ليك
اختك خيخة

الدفاع يقول...

جزاكما الله خيرا وربنا يبارك فيكما وينفع بكما وينفعكما بما تفعلون
تحياتى ولك عام وانتم بخير

سومه...مجنونه فى بلد عاقل يقول...

جزاك الله كل خير يا مهندس بس للاسف انا بق من النوع اللى لازم توريه الحاجه بتتعمل ازاى عملى قصاده مره واتنين وتلاته عشان افهم
غير كدا والله لو قعدت تشرح صوت وصوره
قفل بترباس قاعد قصادك
تحياتى ليك سومه_87

أحسن شاب في البلد يقول...

معلش .... الفضا بيعمل اكتر من كده
:) :) :)

جبهة التهييس الشعبية يقول...

انا جاوبت التاج يا سيدي
:)

مهندس مصري يقول...

لماضة
=====
الله يخليكي يا دكترة
جربي و مش حتندمي

بت خيخة و أي كلام
================
و انتي طيبة يا نوران :)
وشكراً على ايه
دي الحقيقة
ايوه جاوبي التاج و وريني أصولك الخيخية
:)
خطوات ايه اللي بتزهقي منها
دا عدد خطوات عمل العداد 4 خطوات او 5 بس
و باقي البوست ده كله عبارة عن شرح مميزات العداد
يعني تركيبه سهل و مميزاته كتير
و حيعرفك مين مد ايده في تلاجة المدونة و مين دخل حمام المدونة
:)

الدفاع
=======
آميين
ولك مثله
و كل سنة و انت طيب

سومة مجنونة في بلد عاقل
=======================
دا آخر ما عندي يا سومة
و عموماً ليس عليكي حرج
:)
و كل سنة و انتي طيبة

أحسن شاب في البلد
=================
فضا فضا ليك فيه؟
يارب يسهل لك ما فيه الخير في موضوع الجيش
p:

جبهة التهيييس الشعبية
=====================
و انا علقت بس انتي ما قلتيش رأيك في العداد
:)

طوبة ذهب وطوبة فضة يقول...

جميل اوى الموضوع تسلم ايدك بس الصراحه طويل وانا جيت بعد اربع خطوات وتعبت وفضلت انى ما اعرفش مين اللى بيزور المدونه هههههههههههههههه
دى اول زياره ليه لكن بجد عجبنى اكتر من موضوع تحياتى وتقبل مرورى

CAIROCOMPUTER يقول...

عزيزى مهندس مصرى
موعد أذاعة تعليقاتكم بالأذاعه موجود فى مدونتنا
http://netonradio.blogspot.com
ونرجوا دوام التواصل وكل عام وانت بخير

ojg يقول...

تسلم ايدك يا باشمهندس
بجد بجد
كفيت ووفيت
الخطوات واضحه وبسيطه
ربنا يجعله في ميزان حسناتك
ويا مسهل يبعد عننا الحشرات الضاله علي رأي أأبي

حزينه يقول...

السلام عليكم
معلش اصل انا غبيه اوى
انا وصلت لحد ما ضيفت العداد عندى
فى البلوجر
وبعد كدة مش عارفه اجيب الصفحه اللى فيها الاخضر والبرتقالى دى
ممكن تساعدنى..؟؟



حزينه

مهندس مصري يقول...

طوبة دهب و طوبة فضة
====================
ليه كده ؟
دا عمل العداد في الأربع خطوات دول
عمل العداد سهل و خطواته بسيطة
بقية الكلام الطويل ده هو شرح للبيانات الغزيرة و المعلومات الوفيرة اللي بيقدمها لك العداد
لإني لقيت ناس من فطاحل المدونين مركبين العداد ده و مش عارفين إمكانياته الجبارة
نورتيني في اول زيارة يا دكتورة
:)

CAIROCOMPUTER
=================
شكرأ و انت بخير:)

ojg
====
:)
يا بنتي فهميني معنى إسمك ده
إختصار لإيه ؟
الله يسلمك سعدت بتعليقك و يارب تستفيدي من الموضوع
:)
و يبعد عنك كل حاجة ضارة

حزينة
======
و عليكم السلام و رحمة الله و بركاته
لا لا لا لا لا
ما تقوليش كده
خشي موقع العداد http://www.statcounter.com/
زي ما بتدخلي الإيميل بإسمك و الباسوورد
و حتظهر لك صفحتك الرئيسية
إضغطي على أيقونةالإحصائيات و هي شكلها 3 اعمدة ملونين و صغيرين جنب بعض حتفتح لك على طول
:)

بت خيخة وأى كلام يقول...

انا مقدرش على زعلك يا محمد
ومتخافش قرار قفل المدونة مش هيكون بين يوم وليلة
وبعدين لو قفلتها مش هيكون على طريقة لم يتم العثور على المدونة

هيكون مجرد عدم كتابة تاني تحت اسم بت خيخة واى كلام

لكن المدونة نفسها هتكون مفتوحة لاى حد عايز يدعبس فيها


الاول معلش اذا كنت برد عليك هنا مش هناك عندى

المهم
بالنسبالك انت بقى يا محمد
انت فعلا من شلة المدونين المقربين ليا
انا بحب كل المدونين

لكن اكيد طبعا مش كلهم اصدقائى ومش كلهم بالنفس الدرجة من الصداقة


انت ربنا وحده اللى يعلم انا بعزك اد ايه
وخصوصا كمان لما سافرت
حسيت ان اخويا اسر هو اللى سافر


اقولك على حاجة

ايام زمان قبل ما تسافر كنت بستنى تعليقك علشان اعرف وجهة نظرك فى موضوع انا كتبته


دلوقتى بعد ما سافرت بستنى تعليقك
لكن علشان حاجة تانية خااااااااااالص
وهى انى اطمن عليك

تعليقك عندى وانت فى الغربة
بيكون عبارة عن رسالة اطمئنان عليك انك بخير وكويس ومتابعنا
لو اتاخرت يوم ولا اتنين بكون قلقانة
واقعد اقول فى نفسى
ياترى محمد كويس ولا عنده دور برد مرقده ومش مخليه يقدر يبعت اى تعليق


بجد نفسى ترجعلنا بالسلامة
بس ارجع واقول
ده رزقك وربنا مايقطعلكش رزق ابدا


فكرة انى اعمل مدونة تانية واكتب هنا شوية وهناك شوية
مش هاعرف اعمل كدة
لانى بطبعتى معرفش اركز غير فى حاجة واحدة بس

لو عملت مدونة تانية هابقى اقولك اسمها ايه

علشان عارفاك انك مش هتفتن عليا

الحاجة اللى راحت منى
حاجة اكبر من انى اجبلها سيرة
فبالتالى مش هاجبلها سيرة

متقلقش عليا
المهم انك تكون انت بخير
وربنا يوفقك ويكتبلك كل الخير دايما

تحياتى ليك
اختك خيخة

mahasen saber يقول...

اظن انا بالذات متكلمش فى الموضوع ده
حفاظا على عقلك وعلى التركيو اليى رزقك بيه ربنا..وحفظا لماء الوجه اليى هو وجهى انا طبعا...
جهد واضح وجبار ...
ااقدر ااقولك بس ربنا يجعله فى ميزان حسناتك...
بس ليا سؤال عيالى شويه على قد مخى
هو ممكن العداد ده عرفنا الغير معروف بيجى منيين.....
اضحك براحتك انا قلت سؤال عيالى...

مهندس مصري يقول...

بت خيخة و أي كلام
================
طمنتي قلبي يا شيخة إلهي يريحك
:)
و انا كان جالي دور برد دشدشني 3 ايام بس خفيت و الحمد لله و الكلام ده في العشر الأواخر من رمضان بعد ما رجعت من العمرة علطول

محاسن صابر
==========
آميين
و ايوه بيعرفنا الغير معرف جه منين بس ده لو عرفتي تطلعيه من وسط كل الزوار بتوعك
لإنه بيعرض لك الزائر مجرد رقم و مش بيعرضه بإسمه التدويني و بالتالي انتي تشوفي هو كان في صفحة التعليقات عندك امتى و علق امتى و من هنا تقدري تعرفي هو مين بالتقريب بين الناس اللي كانت في مدونتك لحظتها

Jana يقول...

الله يكرمك ويجزيك الخير على شرحك الوافى
العداد بتاعى سايت ميتر ..مكنتش باستغل مميزاته اصلا
حاجرب اكتشفه يمكن الاقيه شبه الكاونتر بتاعك
ولو لاقيته مش زيه حأغيره يافندم
:)

جزاك وعصفور المدينة خيرا

بت خيخة وأى كلام يقول...

بص يا محمد
هو البوست ماكنش الهدف منه انى اجاوب التاج
بس انا لما قريت اسئلة التاج تانى
اكتشفت ان ممكن جدا البوست يجاوب على اغلب اسئلة التاج
فبالتالى البوست يغني عن انى اجاوب التاج

طالب ثانوى يقول...

انا زارنى 499يعنى اتبقى واحد وابقى احطة كدة

انا على فكرة بعتلك ري كويست على الفيس بوك بس انت لسة مجاوبتش

وانت قاقل لية كدة الياهو عاى طول

ღღAhMedღ3LaMღღ يقول...

هوه الصراحه البرنامج مفيد جدا يعني لو عرفت رقم الاي بي بتاع اي حد ممكن اغلس عليه ع الياهووووو
هههه
احزرو بقي لو حطيت البرنامج ده وحد يدخلي المدونه
وربنا اخليه يقفل الياهو بتاعه اسبوع
ههههههههه

لماضة يقول...

محمد انا مش كل الصفح بتظهر عندي
ليه كده

ojg يقول...

والله يا باشمهندس كنت ناوية انزل الموضوع بتاع معنى اسمي ده بوست
عشان ناس كتير سألت
(مش انت لوحدك اهو)
بس أنا هنزله أنا لحضرتك الأول

بص علي الحروف المكونة للإسم
وجردها من كونها مجرد حروف انجليزية محفوظ عندنا نطقها
وشوفها مجرد رسومات
يعني حرف الأو
حسه انه دايرة
وحرف الجاا شرطة وعليها نقطة
وهكذا
وبنظرة واحده هتشوف التشابه بين الأشكال دي والحروف العربية
يعني حرف الجي هتلاقيه شبه حرف الواو جداا
والجا شبه حرف الزين
والاوو شبه حرف الهاء
هتقراها من اليمين طبعا للشمال
هتلاقي انها نفس الحروف المكونة لكلمة وزة
:)
ها؟
فكرة طقة بس حلوة
مش كده؟؟

مهندس مصري يقول...

jana
=====
العفو
لو عدادك مزاياه اقل غيري علطول و اديكي عرفتي الطريقة
:)

بت خيخة و اي كلام
================
خلاص براحتك
:)

طالب ثانوي
===========
معلش ظروف الشغل بقى
انامش بأرجع من الشغل غير الساعة 5
فقعدتي على النت قلت كتير

احمد علام
========
ربنا يكفينا شرك
:)

لماضة
=====
مش فاهم إزاي يعني ؟
ممكن علشان لسه العداد جديد
ياريت تشرحي لي الموضوع بالتفصيل على الميل

وزه
====
ما هو ده مش في كل الفونتات
مش دايماً بيظهروا شبه بعض
و لو عاوزة تكتبيها بالإنجليزي
إكتبيها goose
يعني وزة بالإنجليزي
:)

ojg يقول...

كده يا باشمهندس؟؟
ماشي ماشي
لما ابن كاري يتريق عليا
مين ينصفني بس؟؟
طيب حتى جاملني يا هندزة
قولي ايه الافكار اللوذعيه دي
وبعدين كل الناس عارفين الكلمة بالانجليزي
بس مين يعرفها بالطريقة اللي انا كاتباها بيها
حلاوتها في كونها مخترعه ومميزة

ولا إيه
:((

أحمد عبد الفتاح يقول...

انا مش هعلق علي العداد لاني بستعمله
بس هعلق علي الاغنية حلوه قوي وتقريبا اول مرة اسمعها ومعانها موثر قوي

مهندس مصري يقول...

وزة
====
يا ستي أنا بأقول رأيي
ما تزقيش كده
:)
الفكرة إنتي شايفاها حلوة
و هي كانت تبقى أحلى لو مفهومة
لكن إنتي بنفسك قلتي إن أغلب الناس مش فاهماها
و انا بأحب البساطة يا وزة مش الالغاز
يعني لو كنت فكرت فيها 100 سنة ما كانش معناها بتاعك ده حيجيي على دماغي
عموماً انا برضه سعيد بزيارتك ليا
:)

احمد عبد الفتاح
===============
ما هو ده عيب الريدر يا بو حميد
مش بيخليك تسمع الأغنية
دي أغنية اسمها ولد عمي
لإيمان البحر درويش
و مناسبة لموود الغربة بتاعي دلوقت
و يارب تبقى تشرفنا بالتعليق تاني
:)
ربنا يعينك على مشاغلك و ينصرك

ابو اعصار يقول...

يا سلام عليك يا هندسة
لو اسامة بن لادن زار مدونتك ازاي هتعرفه
جزاك الله خير

عالم حبيب يقول...

جزاك الله خير يابشمهندس

شرح رائع ومبسط

ربنا يكرمك حبيبي

مهندس مصري يقول...

ابو اعصار
==========
حيكون داخل من افغانستان او باكستان
:)
يعني امريكا مش عارفة تجيبه و انا اللي حأعرف

عالم حبيب
=========
جزانا و إياك
و يارب يعجبك
:)

mahasen saber يقول...

اه فهمت تقريبا ...
يعنى عايز لفه وشغل عشان استدل على شخصه الكريم..
بس مااعتقدش ان شخصه الكريم يستاهل التعب ده
بس مبسوطه قوى ان سؤالى طلع واقعى وموضوعى مش سؤال خيال علمى...

mohamed ghalia يقول...

متشكرين جداااااااااا على الشرح يابشمهندس
وإن شاء الله العداد هيعد زيارات كتير
تقبل تحياتى وإعجابى بالمدونة

مهندس مصري يقول...

محاسن صابر
==========
يا ستي و لا يهمك
:)

محمد غالية
==========
العفو
ان شاءالله
:)

kochia يقول...

اشكرك علي المعلومة
يا تري قريت معني الاسم
انا رديت عليك عندي
ولو تحب اقرا موضوع كوشيا هتفهم اكتر

حياتنا الزوجية يقول...

جزاك الله خيرا
وبارك الله فيك

وتعالي صوتك في الافاق



حياتنا معلومات قيمة

هو كدة يقول...

بارك الله لك ولعصفور المدينة وزاد الله من خيركم ووفقكم الله

ابو فاطمة

مهندس مصري يقول...

كوشيا
======
بس إسمك كده النطق الصح بتاعه هو كوتشيا
مش كوشيا
لإن كوشيا تبقى كده koshia
الـ ch دايماً تتنطق (تش)
:)
دا الف باء اللغة الإنجليزية
:)

حياتنا الزوجية
===============
شكراً شكراً
:)

هو كده
=======
آميين و لك مثله

أحمد مصطفى يقول...

ووالله وحشتنى مدونتك يا باشا مهندس

أنا أخر بوست شوفته لك

كان بعد سفرك

ياترى ايه اللى حاصل

أخوك أحمد مصطفى

شاطئ الاسكندرية سابقا

سيكولوجية مصرية حاليا

http://psychologyegypt.blogspot.com

سبهللة يقول...

جزاك الله خيرا

FreeKiller يقول...

متشكرين جدا
تسلم ايدك

بنوتة مصرية يقول...

الحمدلله
عملت اللى قلت علية والمدونة كلها راحت
مش عارفة ااقلك انا متنرفزة بجد ازاى
ودمى محروق جدا

مهندس مصري يقول...

احمد مصطفى
==========
سعيد برجوعك للتدوين تاني و تشريفك ليا

سبهللة
======
و جزاكي يا فندم :)

القاتلة الحرة
=============
الله يسلمك يا بنتي
بس اسمك مش ماشي مع صورتك خالص
مش ممكن تكوني قاتلة ابداً
:)

بنوتة مصرية
============
مش فاهم
راحت بسبب العداد و لا بسبب حاجة تانية
المدونة موجودة بس بقت صفحة بيضاء فاضية
إزاي مش عارف
اول مرة اشوف حاجة كده

بنوتة مصرية يقول...

هتشوف اللى عمرك ماشفتة
شفت اللى جرالى يابشمهندس دة بسبب العداد
مانا اللى غلطانة
حصل خير سورى لو انا ضايقتك بكلمة بس بجد انا هتجنن
ع فكرة انا اللى غلط لما دخلت ع html
حذفت كل حاجة فية وحطيت الكود وبجد مش عارفة ينفع ارجع المدونة تانى ولالا
وسورى لو انا ضايقتك انا عارفة انك انت قصدك خير بس انا الى طلعت غبية

FreeKiller يقول...

القاتلة الحرة
=============
الله يسلمك يا بنتي
بس اسمك مش ماشي مع صورتك خالص
مش ممكن تكوني قاتلة ابداً
:)


....................

هههههههههه
أقول إيه بس
الله يجبر بخاطرك يا بشمهندس
:))