الخميس، أكتوبر 16، 2008

لقاء المدونيين بساقية الصاوي


البوست ده كان عندي في المسودات ( الدرافت ) من زمان مش عارف ليه ما نشرتوش ايامها بس طقت في دماغي أنشره دلوقت

رغم حبي للرغي و الكلام الكتير بس مش حأزود عن كلام الصباغ اللي قاله عنده

بس كان يوم جميل

و حأنشر بس الصورتين دول من قعدتنا على البورصة يوميها بالليل

:)

طبعاً الصباغ اللي رافع إيده ده و البنت اللي على اليمين دي صحفية أجنبية مش فاكر اسمها ايه و اللي لابس كاب و قميص أحمر ده هو أحمد سووو و البنوتة الصغيرة دي هي نور بنت رودي بنوتة مصرية و الباقيين مش فاكرهم
هنا بقى في أحمد دومة و حمادة زيدان و مش فاكر الباقي
معلش بقى الموضوع قديم و طاير من دماغي
و عموماً انا وحشني فعلاً القعدة دي مع الناس الكويسين و اللي كنت بأنزل لهم من دمنهور مخصوص لمصر لمجرد إني أقابلهم و أشوفهم
و يارب أشوفهم تاني على خير كلهم و مش اللي في الصور بس
لا كل الشلة و هما عارفيين نفسهم فرداً فرداً

هناك 31 تعليقًا:

šσяšαяαα يقول...

اجل ياولدى هما عارفين نفسهم نااااااافر نااااااااافر

والله البورصة دى الواحد كان بيروحها عشان خاطر الغاليين بس واللى صادف وقابلته هناك اكيد اتعقد منى لانى مش بطيق جوها الصراحة الملبد بأدخنة النخلة وكيلوباترا وقبل مامشى مرة قالولى ماتستنى دا البانجو والحشيش جايين فى السكة..هههههههههههه.. بهنزر طبعا دانتو الدماغ كله:)

نفسى اشوف جروب مدونة الكاهرة الكوبرى كريبا لانى الصراحة محتاجة للمة الجميلة دى اوى.. ربنا مايحرمنا منكم يابشر

وبس كفاية رغى بقى ياساتر يارب عليا

تصبعوا على خير:)

Ahmed Al-Sabbagh يقول...

الله الله الله
والله يا محمد فكرتنى بأيام جميلة اوى مفتقد اللمة دى ومفتقدك اوى اوى
بجد انا فاكر اليوم ده كان لذيذ جدا واتجمع فيه ناس صعب نجمعهم تانى دلوقت
اللى على اليمين خالص دى ميكا بريطانية صحفية فى الديلى جراف
واللى جنبها ده اسلام
والصورة التانية ده اول واحد احمد سعيد

الله عليك
مبسوط اوى بالبوست الجميل ده
اكيد الشلة كلها لما يشوفوه هينبسطو اوى

دعوة الفردوس يقول...

وتلاقيك كنت بتقول وقتها ان مشوار دمنهور بعيد

علشان تعرف بس اني دامي "دمنهور"دي نعمه

:))


ربنا يهون غربتك

ابو اعصار يقول...

واه يبوي فكرتني بأيام حلوة اتمنى انك كنت فاكرني يوميها

~*§¦§ Appy §¦§*~ يقول...

ميكا يا حج
اسمها ميكا
ههههههههههههه

جمعاوى روش طحن يقول...

طوول عمرك جااامد يا هندسة


حركة مفتكسة دى

قلم رصاص يقول...

كنت أتمنى أكون معاكم

ونفسي تتعوض واقابل ناس محترمين زيكم

تقبل تحياتي يابشمهندس

كيارا يقول...

اكيد اللمه بتبقي جميله

ربنا يجمعكوا مش يفرقوا ابدا

mahasen saber يقول...

طب انا اعلق وااقول ايه على البوست
..تعيش وتفتكر..
وربنا يجمعك بيهم تانى على خير
ونشوفك برضه على خير اشمعنا احنا لا...

سومه...مجنونه فى بلد عاقل يقول...

والله يا مهندس انا مره ساقتنى قدماى مع رودى وقوزقوزح للبورصه
وكانت المره وضميرى قعد يقرص فيا شهر بعدها انى روحتها حتى مقعدتش اكتر من عشر دقايق وجريت
واللى هون عليا ان كل الناس المدونين اللى شوفتهم كانوا كويسيين جدااا
لسبب الاول جو البورصه مينفعش لبنات بصراحه والتانى كميه الدخان اللى هناك وانا بكره الدخان جدااا والتدخين ومحبش اقعد وحد بيشرب سجاير غير لما اكون بحب الناس دول جداا فبحاول اتحمل وخلاص
وربنا يرجعك بالسلامه ويصبرك على غربتك

سومه...مجنونه فى بلد عاقل يقول...

انا كان ليا تعقيب صغير يا مهندس بعد رؤيتى لرد الاستاذ الشيعى عندك فى المدونه
للاسف هو دا اللى قصدته ان لو حد فينا شتم او نقد الطرف الاخر حيرد الطرف الاخر عليه بنقد قد يكون من وجهه نظره صحيح
عشان كدا قولت ننحى خلافاتنا فى الدين جانبا ونفسح المجال للتعاون
وطبعا دمى محروق من كلامه لكن مش حرد عليه لانى كنت عارفه ردوده مسبقا...
وكل ما استطيع فعله هو الدعاء لنا جميعا بالهدايه
سومه_87

mido يقول...

المدونة دى جامدة شوفها كده

http://marzoqzone.blogspot.com/

elmalke يقول...

ارجو شرح كيفية وضع خلفية صوتية للمدونة زى الى عندك وشكرا على المدونة الجميلة دى /ابوكريم من الرياض

بنوتة مصرية يقول...

هو انت فين منهم صحيح

nona يقول...

مافيش اجمل من اللمة الجميلة و الواحد يفضل يفتكرها طول العمر
باذن الله ترجع بالسلامة و يكون فية اجتمعات كتير للمدونين

سوسو سارة فى اجتماع يوم 7\11 لتبرع بالدم و باذن الله عدد كبير يقدر يجى اليوم دة عشان كلنا نشوف بعض هناك يارايت تقدرى تيجى هو هيكون يوم جمعة

نيجار يقول...

والله أكيد بتبقى لقاءات جميله جدا وليها ذكرى حلوه ،
وأكيد هيبقى في لقاءات تانيه كتير وتكون حضرتك رجعت بالسلامه يا باشمهندس بجد والله انا لما بشوف اللقاءات دي بيبقى نفسي ابقى معاهم
نفسي اشوف الناس اللي غاليين علياواللي عمري ما شفتهم الا عن طريقك مدوناتهم ،
تحياتي

محمد الجرايحى يقول...

جمع الله بينكم دائماً فى الخير

Soooo يقول...

يااااااااااااه يا هندزا

طب والله كان يوم حلو قوي
وحشتنا اللمه دي

على فكره .. احنا بطلنا نتلم كده ونقعد قعدات كتير مع بعض
بس ان شاء الله خير


ملحوظه
بقى ياجدع انت تحط صورتي من غير ما تاخد اذني .. قلنا ماشي مش مهم
انما تحط صورة نور خطيبتي بنت رودي من غير ما تقولي
لا مونكن ابدا






سلامووووووووووووز

مهندس مصري يقول...

صرصارة
=======
ما الواحد كان بيروحها علشان يقابل الحبايب عليها لكن انا مش بأطيق ريحة الدخان و عندي حساسية منه بس نعمل ايه اذا كان في بعضهم مدخنين للشيشة و بيقعدوا يكركروا طول القعدة
و انا كمان نفسي

أحمد الصباغ
===========
و انا كمان والله مفتقدكم كلكم
لإنها فعلاً كانت ايام جميلة
ربنا يزيدك إنبساط و يبسطهم كلهم
أي خدمة يا بو حميد
:)

دعوة الفردوس
==============
ايوه يا بنتي كا المشوار بيآخد 3 ساعات
نص ساعة جوه دمنهور و ساعتين من دمنهور للقاهرة و نص ساعة جوه القاهرة
يعني علشان اروح ميعاد هناك كنت بأنزل قبله بـ 3 ساعات
و آخد 3 ساعات في السكة و انا راجع برضه
يعني كان بيبقى يوم طحن

ابو اعصار
===========
هههههههههههه :)

آبي
====
علم و ينفذ يا فندم
:))

جمعاوي روش طحن
==============
الله يكرمك يا بني
:)

قلم رصاص
=========
الله يسلمك
و ان شاء الله الجايات أكتر
:)

كيارا
======
أكيد
آميين
و الأجمل إن كل الناس دي متعرفة على بعض من النت و كلهم جايين يتقابلوا لمجرد الصداقة بدون أي مصلحة او منفعة مادية
:)

محاسن صابر
===========
آميين
بس تعيش و تفتكر دي حسستني إني بأحيي الذكرى السنوية لفقيد الشباب
:)

سومة مجنونة في بلد عاقل
=======================
انا معاكي في كل اللي قولتيه و انا كده برضه مش بأحب الدخان و لا بأستحمله
بس و الله علشان الحبايب بس
و علشان كده مكان البورصة ده اتغير كذا مرة لساقية الصاوي و للأوبرا
علشان الأماكن دي تناسب البنات
بس واضح ان بعد ما انا مشيت اللقاء المنتظم اتفشكل

بالنسبة للشيعي
الكلام بتاع الدكتور يوسف القرضاوي كان متوجه لمعاتبيه من السنة و لم يوجه حديثه للشيعة أصلاً في هذا الخطاب
هو اللي رد منه لنفسه كده
:)
ربنا يهدي

ميدو
=====
شوفتها
كويسة يا ميدو
:)

المالكي
=======
الخلفية الصوتية شرحها موجود في البوست ده

http://ro7albmama.blogspot.com/2008/05/blog-post_19.html

و حتلاقي شرح حاجات تانية مفيدة في المدونة دي

بنوتة مصرية
============
انا مش موجود في الصور لإن أنا اللي كنت باصور بالموبايل
ثم الصور دي متصورة في الخباثة من غير ما حد يأخد باله
شغل الكاميرا الخفية
:)

نونا
=====
فعلاً ربنا يوريني وشوشكم على خير

و ربنا يقويكم على التبرع و عمل الخير

و انا من موقعي هذا بأنادي
روحي اتبرعي يا صرصارة
:)

نيجار
======
طيب و ايه المانع
روحي و احضري بس مش تجمعات عامة خليها لقاءات خاصة حريمي مع اللي تثقي فيهم من المدونات البنات
علشان انا مقدر موقفك علشان ظروف الشغل

محمد الجرايحي
===========
آميين
و يسر لك كل خير يا أستاذ محمد
:)

سووو
=====
ما هو فعلاً كان يوم جميل
و يارب ترجعوا تتلموا تاني
ما هو يا تتلموا يا حأنزل ألمكم في اقرب أجازة ليا
:)
ثم تعال هنا صورتك مش سر حربي إذا كنت حتطلع في التلافزيون مستكتر عليا أنشر لك صورة و ياريتها واضحة
:)
أما خطيبتك فأنا إستأذنت من حماتك و ما قالتش لأ
هي طلبت حذف صورتها فمنتجناها إنما سمحت بنشر صورة نور
أنا متفوتنيش حاجة زي دي يا جدع
:)

rihanat يقول...

أنا تعبت كل شويه اكتب نفس الكلام ..
عامةً اتمنى ان حضرتك تستحملنى ..ده اذا وصلت الرسله دى كمان ..
انا من دمنهور يافندم .. جيران يعنى :)
صحيح انا منها بقالى 20 سنه اهو ..بس لا اعرف عنها سوى القليل ..وان تكن معرفتى بها لاتتعدى كونها بلد مليئه بالسلبيات ..
بالصدفه لقيت المدونه تبع حضرتك ..وقريت تقريبا معظم مواضيعها
أعتذر عن المقدمه السخيفه ..
طلبى من حضرتك عايزة اعرف اذ كان فى امسيات ثقافيه عندنا .. فى ندوات علميه .. المكتبه اللى تفيدنى
هل فى اجتماع للمدونين ولا ايه النظام ؟؟!!
آسفه على الاطاله

ريْحــانة

Dr. Kafy يقول...

متجمعين فى الخير

مهندس مصري يقول...

ريحانة
======
يا مرحب بالدماهرة يا مرحب
للأسف انا في السعودية حالياً و مش في دمنهور
و عموماً انا في دمنهور كنت مع نفسي خالص و اختلاطي بباقي مدوني دمنهور قليل
خصوصاً إن اغلبهم مش كاتب دمنهور في البروفايل بتاعه او مش عامل شير للبروفايل بتاعه زي حضرتك كده
فلما آجي أدخل البروفايل عندك علشان أخش مدونتك بتظهر لي الرسالة دي

الوضع غير متاح

لا يمكن عرض ملف التعريف Blogger الذي طلبته. لم يختر الكثير من مستخدمي Blogger مشاركة ملف التعريف الخاص بهم بشكل علني.

إذا كنت مستخدم Blogger، فإننا نحثك على تمكين الوصول إلى ملف تعريفك.

فلو ممكن تشيري االبروفايل بتاعك
او تديني عنوان مدونتك علشان ازورها

و لو تلاحظي كل شلة المدونين اللي اتعرفت عليهم مش من دمنهور و اغلبهم من القاهرة و كنت بأنزل لهم القاهرة مخصوص

مش عارف بقى موضوع الأمسيات و الندوات ده :) أنا في غربة
اما المكتبات هو احنا عندنا مكتبات
مش هما هدوا مكتبة حديقة الطفل اللي كانت في ميدان الساعة و هدوا الحديقة ذات نفسها بل و هدوا المسلة اللي كانت في الميدان و الميدان نفسه علشان الاوبرا اللي لسه ما إشتغلتش لغاية دلوقت و مش عارفين حيعملوا بيها ايه ؟
قولي يا باسط
أخبار الشوارع المطينة بطين ايه بالحق
:)
و انا سعيد جداً بتعليقك
و اتمنى اشوف مدونتك

د/كافي
=======
جمعاً
:)

الطائر الحزين يقول...

ربنا يبارك فيك

===========

بقول لك كان فيه رد عندك على التدوينة اللى فاتت وانت حذفته ممكن تبعته لى لو لسه عندك؟

مهندس مصري يقول...

الطائر الحزين
=============
يا عزيزي انا لم احذفه بل حذفه صاحبه
:)
و عموماً لقد أرسلته إليك
و منورني دايماً

rihanat يقول...

لا يافندم لسه مش عندى مدونه..
جارى الانشاء..
انا برد على حضرتك من حساب Gmail
المهم حضرتك احبطتنى ..
الشوارع زى ماهيـه ودمنهور زى ماهيــه
وفى الكليه حته الكافتيريا اللى مريحانا
هيبنوا بدالها كليه علوم..
والعلوم اللى عند النادى هتبقى حقوق..
طيب حضرتك سهل تسافر للمدونين فى القاهره ..لكن انا اتواصل مع الدنيا ازاى بس ..
يلا خير ان شاء الله ..
ان شاء الله اول لما اعمل مدونه هبقى اقول لحضرتك عليها ..

مهندس مصري يقول...

ريحانة
======
خلاص يبقى في انتظار مدونتك
:)
و مش عاوزك تحبطي
ده العادي في دمنهور
و اول مرة اعرف إن عندنا كلية علوم ؟ عملوها امتى دي ؟
و كمان حيعملوا حقوق ؟
دا الفرع بتاع الجامعة عندنا شد حيله قوي بقى
بس يارب يكون فيه تعليم بجد مش أي كروتة

و لما تعملي المدونة حتلاقي نفسك تواصلتي مع الدنيا كلها و انتي قاعدة في البيت :)

rihanat يقول...

ان شاء الله احاول اعملها وتبقى فى نص قيمه بتاعه حضرتك ..
وبالمناسبه بقى فى اعدادى صيدله وطب اسنان عندنا ..

الى لقاء

بنوته مصرية يقول...

ازيك يا بشمهندس

ميرسي اووي علي ذوقك العالي

علي فكرة الصحافية دي اسمها ميكا


كل سنه وانت طيب واعذرني علي تقصيري معاك

تتعوض ان شاء الله

لك تحياتي

مهندس مصري يقول...

بنوتة مصرية
============
الحمد لله
الله يخليكي و يبارك لك في نور و ابو نور
:)
و مفيش تقصير و لا حاجة
حضرتك تنوريني في أي وقت

اقصوصه يقول...

للعلم انا شيعيه:)

مهندس مصري يقول...

اقصوصة
=======
اهلاً و سهلاً
و انا معنديش اي مشكلة مع الشيعة
و حضرتك من الإمارات و دي بلد مختلط سنة و شيعة
و لازم يتعايشوا مع بعض بما يرضي الله
إنما حضرتك شيعة ايه ؟
اصل فرقهم كتيرة
:)
في زيدية و كيسانية و إسماعيلية بطوائفها المختلفة و الجعفرية الإثنى عشرية
:)