السبت، أكتوبر 18، 2008

حقائق عن قضية فلسطين

كنت منذ زمن قد كتبت هذه التدوينة

الفلسطينيون لم يبيعوا أرضهم

رداً على بعض التساؤلات من مدونين و قد وصلني اليوم تعليق على هذه التدوينة القديمة من Yuq و فيه رابطين لكل من

مذكرة القائد البطل الشهيد عبد القادر الحسيني لجامعة الدول العربية


و رابط الكتاب نفسه

حقائق عن قضية فلسطين

تكشف الحقائق وترد على الشبهات في تاريخ القضية الفلسطينية

للحاج أمين الحسيني رحمه الله مفتي القدس ورئيس الهيئة العربية العليا


فرجاء لكل من لم يقرأ التدوينة القديمة ان يقرأها و ان يقرأ الكتاب نفسه لإنه ممتع و واضح و ممتلئ بالحقائق التى لا يعرفها الا القليل من الناس و هو كتاب قصير فلا يقلق من طوله أحد و لكنه يمثل صفحة مشرفة من تاريخ جهاد الفلسطينين

هناك 37 تعليقًا:

Gannah يقول...

باشمهندس
موضوعاتك دايما مهمه
ان شاء الله فى اجازة اخر الاسبوع اشوفهم
لات الموضوعات دى محتاجة تركيز
لكن هى من الحاجات اللى لازم تتقرى
تخيل بجد احنا دول غريبة جدااا
ليه مش بندرس الحاجات دى فى المدارس
هى مش فلسطين دى مسؤوليتنا كلنا
ومع الوقت الاجيال الجديدة هتنسى كلمة فلسطين وتفتكر بس الضفة وغزة وكان الاجزاء دى بس اللى من حقنا
والباقى فى خبر كان
والبركة فى الاعلام الحديث
تحياتى

كـــيــــــــارا يقول...

تاريخ القضيه الفلسطينيه

قعدت سنه كامله ادرس فيه

بالاضافه لعده مؤتمرات

وبصراحه ادام البوست كده انا سيفته عندي

لاني بحب اقرا التاريخ جدا

وشكلي اول تعليق :)

عاوزه مصاصه بقي

كـــيــــــــارا يقول...

عاااااااااااااااااااااا


مش اول تعليق جنه سبقتني :(((((

مهندس مصري يقول...

جنة
====
يا ستي دا انا ناشر خلاصة تعليق جالي بس
:)
مع تذكير بالتدوينة القديمة

اما ليه مش بتتدرس في المدارس فده لإن المطلوب مننا ننسى أصلنا و تاريخنا و نسير مع قطيع التطبيع مع العدو الصهيوني

كيارا
======
لو انتي درستي التاريخ الفلسطيني فعلاً سنة
يبقى تعظيم سلام و الف تحية للمثقفة المحترمة كيارا
( واحد بيضرب تعظيم سلام )
و يارب الكتاب يعجبك و تستفيدي منه و إقري البوست القديم و تعليقاته

كيارا
======
ما البوست فضل فاضي 3 ساعات من غير و لا تعليق و جاية دلوقت تعيطي
كنتي تعالي بدري شوية
:)

القلم السكندري يقول...

جزاكم الله خيرا


اللهم انصر المسلمين في كل مكان

وفضح صيحات المنافقين فيهم ومن اراد بهم او بسمعتهم سوءاً يارب العالمين

Gannah يقول...

أنا قصدت انى هقرى الكتاب فى الاجازة بس:)
كده ظلمتنى
تحياتى

Ahmed Al-Sabbagh يقول...

جميل اوى والله
انا كنت بقول لنفسى الواحد لازم يقرا اكتر فى تاريخ القضية الفلسطينية لان الموضوع مش موضوع خناقات فتح وحماس الموضوع كبير وفيه اسرار كتير
بوستاتك الاخيرة جميلة ومهمة جدا
تسلم يا محمد

مهندس مصري يقول...

القلم السكندري
===============
آميين
:)

جنة
====
إنتي تالت واحدة تفهمني غلط في ظرف يومين
يا ستي انا مش بأقول إنك ما قريتيش

أنا كنت بأتواضع شوية و بأقول إن أنا ما عملتش حاجة
:)

شفتي إنك فهمتيني غلط إزاي يا دكتورة

mahasen saber يقول...

كل تاريخ بلد فيه المشرف وفيه غير المشرف ...وفيه فلسطنيينيين باعوا ارضهم وبيبيعوها لحد الان
شوف كل وطن فيه الوطنى وفيه الخاين
زى الامومه والبنوه
فيه ام وفيه اولاد فيه البار وفيه العاق
.....بس كويس انك بتركز على الجانب الايجابى يا محمد...

مهندس مصري يقول...

احمد الصباغ
===========
الله يخليك يا بني يا رافع روحي المعنوية
إنت اللي فاهمني صح
:)
الكتاب ده رغم قصره بيتكلم على التاريخ و الموقف السياسي و الجهادي في فلسطين من سنة 1917 مع بداية الإحتلال الإنجليزي لفلسطين في الحرب العالمية الاولى و حتى 1949 بعد إنتهاء حرب نكبة فلسطين عام 48

و فيه تفاصيل و ارقام و حقائق مهمة جداً بس في ناس بتكسل تقرأ حتى و مكتفية بأحكامها المسبقة

و ياريت بعد ما تخلص قراية الكتاب يا أحمد تقول لي علشان عاوز اتحاور معاك فيه شوية
:)

مهندس مصري يقول...

محاسن صابر
==========
و لو قريتي الكتاب حتلاقيه كله إيجابيات
:)

كـــيــــــــارا يقول...

فعلا درسته عشان تخصصي

اما بالنسبه لاول كومنت انا كنت لسه داخله النت


عشان تعرف بس اني مش علطول اول تعليق

ياظالمني

عاااااااااااااااا

مهندس مصري يقول...

كيارا
======
يعني سيبتي تعظيم السلام و بتعيطي على اول تعليق !!!!!!!!!!!!!!!!!!!!!!!!!!!!
فعلاً انتي غريبة
:(
:)

عالم حبيب يقول...

جزاك لله خير يابشمهندس

فعلا حاجات كتيرة عن فلسطين مغلوطة في أذهان ناس كتير .. وفي ناس بتلجأ للمفاهيم دي علشان تريح دماغها

مثلا : ياعم ما هما اللي باعوا أرضهم .. احنا اللي هانرجعهالهم !! ويكبر دماغه

الله المستعان

alhakonline يقول...

الاخ العزيز ربما كنت شديدا معك ولكن شديد فى الحق فلقد أغضبنى كثيرا ما نشرته أبى من صور وكلام فارغ عن الراقصات وعندما قرأت تعليقك عليها علمت أنك ملتزم فأحزننى كثيرا عدم ردك عليها وذكرك لحديث النبى صلى الله عليه وسلم تصديقا عليها أعزرنى على شدتى معك ولكن أنظر الى ردها على فى مدونتها وقارن بين أسلوبى وأسلوبها فى الرد أستحلفك بالله أن تقرأه وتشهد بالحق ..... كلمة حق

كـــيــــــــارا يقول...

مش غريبه والله يمكن الصداع اللي ضارب في دماغي من الصبح ومش قادره منه

لكن بصراحه تعظيم السلام ده

احرجني مووووووووووووووووووت ومش رديت اتكلم عشان بس احراجي

nona يقول...

شى مهم جدا اننا نعرف تاريخ بلدنا و تاريخ البلاد العربية و اهمة الدول المحتلة ان كانت فلسطين او العراق
لانى بحس فعلا انهم عايزين يمحو اى اثر لينا من بلادنا
عجبنى شى فى الفلسطنين المغتربين انهم بيحافظو على هويتهم يعنى تلاقى مهما الواحد اتغرب منهم بيفضل يتكلم لغة اهل بلدة حتى اطفالهم الاى عمرهم ما شافوا فلسطين بيتكلموا اللغة اكنهم طول عمرهم عايشين هناك
مش زاى بعض العرب بيتخلوا عن اللغة و هى ابسط شى و اللسان يتعوج بلغات تانية كتير

الفاتح الجعفري يقول...

بشمهندسنا الكبير
ربنا يحفظك ويبارك في عمرك
موضوع في غاية الاهمية فعلا
واظن اني علقت عليه وقتها
بس انت عارف المشكلة في المفاهيم نفسها
فمن يملك فلسطين حتي يبيعها!!!
لان باع بعضهم بعض الاراضي الزراعية بنسبة لاتتجاوز الـ1% اتكون هذه النسبة هي الارض بالكامل !!
اظن انهم يلقون بالحجج والاعذار ليبرروا لانفسهم خذلان اوطانهم واخوانهم في الدين
والله المستعان
--------
ثانيا
جزاكم الله كل خير يابشمهندس علي السؤال علي ,
انا الحمد لله كويس بفضل الله ,الظروف الصعبة هي ظروف العمل يعني الوقت ضيق جدا بالنسبة لي اليومين دول فعلا ليس اكثر
انما بفضل الله باقي الظروف جيدة
فقط نحتاج الي دعائكم كثيرا
وجزاكم الله كل خير

osama يقول...

ياهندسه مع الاحترام للجميع فأن التاريخ بالكامل مشوه وانا اتكلم عن تاريخ العرب ككل فكل من وضع حرفا فيه ليس فوق مستوى الشبهات هناك العديد من البطولات فى فلسطين ولكن يستحيل الثقه فى اى مرجع تاريخي عربي قد تم انشاؤه على اهواء تيالاات واتجاهات معينه لقد ضاع تاريخنا وعلينا الحفاظ على المستقبل

جمعاوى روش طحن يقول...

جزاكم الله خيرا يا هندسة

كل تدوينة و أختها

بيتأكد عندى شعور ...


انا بأقرأ لواحد بيفهم و فهم عالى كمان


جزاكم الله خيرا

مهندس مصري يقول...

عالم حبيب
=========
المهم إننا نعرفهم الحقيقة
:)

alhakonline
============
ردها عليك أشد من تعليقك

كيارا
======
ألف سلامة
:)

نونا
=====
معاكي حق
المهم تقرأي الكتاب و تقول لي رأيك فيه
:)

الفاتح الجعفري
==============
ربنا يكرمك و يسهل لك الخير و يكرمك في الشغل
و انا فاكرك دايماً
و ياريت تقرأ الكتاب

أسامة
======
إقرأ من كذا مصدر و حكم عقلك
و إقرأ الكتاب و أحكم بنفسك
:)

جمعاوي روش طحن
==============
الله يخليك
:)

قلم رصاص يقول...

بجد موضوعك المرة مهم جدا
لأنه يتعلق بأهم القضايا العربية المصيرية الا وهي القضية الفلسطينية

التقصير في القراءة عن تاريخ وحقائق القضية ليس مهما بقدر التقصير الجدي في ترجمة الحد الادنى من معلوماتنا عن القضية الى خطوات عملية للدفاع عن القدس العربية والتصدي للمحاولات الصهيونية الحثيثة والصمت الدولي والعربي على تهويدها

مشكور يابشمهندس على مجهود الرائع

وان شاء الله هنقرأ كمان وكمان

تقبل مروري

مهندس مصري يقول...

قلم رصاص
=========
شكراً و يارب الكتاب يعجبك و تستفيد منه
:)

عاشــــــ النقاب ـقــــة"نونو" يقول...

حاضر
بجد لازم يتقري لان الموضوع لازم يتعرف ويتفهم وعندك حق لازم نعرف الحقيقة مش ننسى
بارك الله فيك

مهندس مصري يقول...

عاشقة النقاب
=============
و بارك في حضرتك
و منتظر رأي حضرتك بعد ما تنتهي من قراءة الكتاب
:)

دعوة الفردوس يقول...

جزاكم الله خيرا

قرأت كتب مماثلة و شوفت شوية وثائقيات على الجزيرة تستاهل تعظيم بصراحه
بتوضح حقائق كتير جدا في العصر الحديث والقديم

بالنسبه للكتاب
ده الحاج أمين الحسيني
ازاي منقراهوش
الكتاب ده كنز
جزيت خيرا كثيرا
بس يارب يبقى ورد مش اكروبات ريدر علشان انزله على الموبايل

هرجع اقرا التدوينه اثناء تحميل الكتاب
ولو لي استفسار هرجع

جزاكم الله خيرا
ونفع بكم

مهندس مصري يقول...

دعوة الفردوس
=============
ايوه هي دي الثقافة اللي احنا عايزينها من الناس
انهم يكونوا واعيين بقضايا أمتهم و مشكلاتها
الله ينور عليكي
بس الكتاب مش بيتحمل ده صفحات مكتوبة و منشورة على النت
عموماً في إنتظار أي أسئلة منك
:)

جبهة التهييس الشعبية يقول...

متشكرة قوي يا مهندس
ح احملهم حالا

مهندس مصري يقول...

جبهة التهييس الشعبية
=====================
العفو
و يا سلام بقى لو بعد ما تخلصي قراية الكتاب تكتبي عنه تدوينة من تدويناتك العجب يبقى مية 100
:)

صابر وراضى يقول...

وعليكم السلاااااااام
فعلا ياخى كتاب الشهيد عبد القادر الحسينى روعه روعه روعه
وعلى فكره التاريخ كل الناس تعرفه
بس للاسف الناس بتنسى
.

مهندس مصري يقول...

صابر و راضي
============
و عليكم السلام و رحمة الله و بركاته
الكتاب لمفتي فلسطين الحاج امين الحسيني و ليس للشهيد عبد القادر الحسيني
:)
و مش كل الناس عارفة التاريخ للأسف
بس اللي عاوز يعرف حيعرف

سومه...مجنونه فى بلد عاقل يقول...

انا شوفت بوست القريه وقلت ارد هنا عارف كل القرى شبه بعض لانها كلها فى مصر وهو دا السر
شكرا على الكتب واللينكات دى

مهندس مصري يقول...

سومة مجنونة في بلد عاقل
=====================
العفو
:)

زهرة الجنة يقول...

دي اول زيارة ليا للمدونة
لكن واضح جدا ان موضوعاتها كلها مهمة

تاريخ القضية الفلسطنية محدش يعرف عنه كتير وانا واحدة منهم لأن معرفتي مش متعمقة فيها
فسمحلي أحفظ الموضوع عندي وكمان الكتاب
المشكلة ان كل جيل بيطلع بينسي التاريخ
مثلا ايام الدراسة افتكر اننا كنا بندرس ونهتم بتاريخ الفراعنة اهتمام زائد عن اللزوم وفي نفس الوقت كنا بناخد قشور عن النكسة وحرب اكتوبر وقضايا العربية المهمة
مستهيألي ان التاريخ اللي هيدرسوه للأجيال القادمة هو تاريخ استار اكاديمي ومحمد عطية وكمان اليسا وعمرو دياب
والبركة في وزارة التعليم
تحياتي ليك

مهندس مصري يقول...

زهرة الجنة
==========
و منورة المدونة في اول زيارة
و اما اشوف معرفتك بالقضية الفلسطينية حتزيد قد ايه ؟
مش كل الجيل بينسى رغم كترة اللي عايزينه ينسى
و ربنا يستر علينا و على مستقبلنا

مختار الجندى يقول...

كم كنت احجتاج للتزود بهذه الحقائق للرد على بعض المتلاعبين بالقضيه الفلسطينه ،واود شكرك لانك قدمت لى نموذجا رائعا فى ان التميز فى المحتوى كافيا للنجاح بدون الاهتمام الزائد بالمظهر الخادع ،وكذلك امتعنى رد الدكتور يوسف القرضاوى الذى كنت انتظره ولم اعلم به فى الدستور مع انى من محبى ومتابعى الدستور ولربما فاتتنى بعض الاعداد.

مهندس مصري يقول...

مختار الجندي
===========
يسعدني أني إستطعت مساعدتك
:)
اما رد الدكتور يوسف القرضاوي فقد نشر في إحدى الصحف القطرية و لا أعلم إن كانت الدستور قد إهتمت بإعادة نشره ام لا و إن كنت اتذكر انها نشرت ملخصاً له مع تعليق من الدكتور ابو المجد عليه
للأسف لا اتابع الدستور يومياً الآن لإن التصفح الإلكتروني لها من خارج مصر يختلف مذاقه عن قراءة النسخة الورقية لهافي الصباح من داخل مصر
و الف شكر على كلامك الجميل
و لو تصفحت الأرشيف عندي حتلاقي موضوعات كتير تعجبك كتبتها على مدار سنة و ربع من التدوين
:)
و رغم كده انا شايف التدوين شئ شخصي في المقام الأول
يعني انا بأكتب اللي عاوز أكتبه و اللي حاسس بيه مش اللي الناس عايزة تقرأه
:)
سعيد بزيارتك و تعليقك