الأربعاء، أكتوبر 22، 2008

رأيي فيما يسمى بالوثيقة التأسيسية للمدونين

تحديث
انا يا جماعة بأحب و بأحترم كل اللي أعرفهم من الموقعين على الوثيقة بل و بأعتبرهم أصدقاء
و مش معنى إني أبديت رأيي بصراحة في الموضوع ده إنهم يزعلوا مني
أنا مش معترض غير على حاجات محددة لكن موافق على اغلب النقاط
الصراحة ما تزعلش و الإختلاف في الرأي لا يفسد للود قضية وأنا مش بأهاجم حد انا بأقول رأيي بكل صراحة و بدون تجريح في حد و إن ما كنتش أقول رأيي في مدونتي حأقوله فين
و أديني بأوضح أهوه لإني حسيت من تعليق كيارا إنها فهمتني غلط رغم إني بأعتز بمعرفتها تدوينياً

أنا مرضيتش اعلق في الاول على الموضوع ده

عناصر الوثيقة التأسيسية للمدونين

في كذا مدونة من اللي اعرفهم و ناشرينه
بس انا حاسس اني لازم اقول رايي

أنا متفق مع المجمل العام للوثيقة بس مختلف معاها في كذا نقطة

في النقطة رقم 1 أنا مش حاقدر ألتزم بيها لإن لما الاقي واحد شيعي او بهائي او حتى من حملات التنصير و الهجوم على الإسلام بيقول معلومات مغلوطة مش حأقدر افضل ساكت لازم ارد بالحقائق حتى لو اتصنف الرد على إنه عدائي

في النقطة رقم 5 في غلطة إملائية
إسمه النقد مش النقض
:)
و انا شايف انه مفيش مانع من بعض المجاملة احياناً لكن متكونش كل التعليقات مجاملة و الا حتبقى مهزلة و مش حنستفيد حاجة من تعليقات الناس
المجاملة ليها حدود يحكمها كل واحد في حدود رؤيته و في حدود الأدب و الذوق

النقطة رقم 7 فيها حجر على أراء أصحاب الديانات الأخرى و محتاجة إعادة صياغة

النقطة رقم 11 حنتضامن إزاي ؟
مش فاهمها دي و محتاجة توضيح

النقطة رقم 14 أنا موافق على مقاطعة المدونات القذرة دي بس ده مش رأي كل الناس للأسف
بس انا معترض على تعريف مدوناتهم للناس لإننا كده حنشهرهم
الحل الافضل من وجهة نظري مقاطعتهم و مسح تعليقاتهم و تجاهلهم

و موافق على باقي النقط و شايفها منطقية جداً
:)

بس في شوية أسئلة

مين هما اللجنة التأسيسية للمدونين ؟
و هل بيعبروا عن حد اكتر من نفسهم ؟

معلش يا جماعة انا شايف إن اغلب الناس إن لم يكن كلهم جداد في التدوين و ده ما يعيبهمش لكن احب اعرفهم إن السنة اللي فاتت حصلت كذا محاولة لتكوين اتحادات للمدونين تتكلم بإسمهم و البعض إنضم ليها لكن الأكتر ما إنضموش
ليه ؟
لإننا حسينا انها حتحول التدوين لحاجة زي الحزب الوطني كده و حتقيد حرية كل واحد في مدونته و حيبقى الواحد ملزم بكلام هو ما قالوش لكن قاله رئيس اللجنة او أعضاء اللجنة الممثلة للإتحاد
و ده حصل فعلاً

الواحد معندوش مشكلة في الإلتزام بمجموعة مبادئ عامة بدون تشكيل لجان و هياكل تنظيمية مقيدة للحرية
زي السنة اللي فاتت كان في حملة من اجل تدوين نظيف و بدون بذاءات و في مدونات إلتزمت بيها و قابلتها كرد عليها حملة مدونات ترحب بالبذاءات و برضه مدونات تانية إلتزمت بما تعتقده حق من حقوقها و يدخل في ضمن حريتها
و الواحد ليه مطلق الحرية يدخل المدونة اللي تعجبه و يكتب اللي يعجبه ما دام مقتنع بيه
و مفيش حد بيضرب حد على إيده علشان يقرأ مدونته
:)
ده رأيي مع تقديري و إحترامي الكامل لكل الموقعين على الوثيقة دي

هناك 35 تعليقًا:

osama يقول...

بضم صوتى لصوتك والاصل فى موضوع التدوين هو الحريه المطلقه واحترام الغير نابع من الاشخاص نفسهم مع الاخذ فى الاعتبار المثل الشهير
اللى بيشيل قربه مخرومه بتخر على دماغه

Gannah يقول...

باشمهندس
الوثيقة التأسيسية (للمدونين)
العنوان اساسا فيه خطأ للمدونين ولا لاتحاد مدونين
-----------------------------
صياغة تحتاج للمراجعة لانها اقرب الى ميثاق شرف
طيب النقاط
مش معاك ان عرض الحقائق يؤدى الى عداوة لان ده يتوقف على طريقة العرض والحوار
ويتوقف على من تحاوره واحيانا نحتاج الى ان نعرف متى نتوقف عن الحوار لاننا فى النهاية ندافع عن مبادىء ولا ننتصر لانفسنا
ولكن طبعا معاك ان الكلام فى العقيدة بالذات يجب الرد عليه لانه يشوش من ليست لديه معلومات دينيه قوية

-----------------------------
المجاملة الزائدة عن اللزوم والتى تضلل صاحب التدوينة بنظام واو ..رائع
انا مش معاها
انا مع الكلمة الطيبة ولكن الصراحة احيانا مفيدة وممكن تتقال بطريقة لطيفة
-------------------------------
مقاطعة مدونات الشواذ
الشواذ فى عالم التدوين مجموعتين
1. ناس مصرة على الخطأ بل وتطالب بحقوق الشواذ ودول طبعا خطر جداا لانهم يعملون على نشر فكرهم واحيانا كتير يجمعوا بين الشذوذ ومهاجمة الدين وهذه المجموعة يجب فعلا مقاطعتها والا كنا محاربين لشرع الله
2. مجموعة تعترف انها مريضة وهم يخضعون للعلاج ومدوناتهم تمثل نوع من مجموعات المساندة والعلاج الجماعى وهى تلفت النظر انه ربما نجد التدوين اصبح فى يوم من الايام من ادوات العلاج فى الطب النفسى وهذه المجموعة تتعرض لضغوط احيانا من المجموعة الاولى الذين يحاولون اقناعهم بعدم جدوى العلاج
المجموعة التانية لو عزلتها تكون قد عرضتها لضغوط اكتر وربما يأسوا من الاصلاح وانهم بعد الشفاء سيجدوا مجتمع يتقبلهم
والتعامل معهم يكون على حسب ما يرى كل شخص وفى النهاية التوبة مفتوحة ويجب الا نغلق نحن بابها
-------------------------------
الوثيقة بصفة عامة هى محاولة اولية لوضع مبادىء يلتزم بها الجميع ولا بأس فى طرحها للنقاش وربما عمل تصويت على أكثر من صيغة ولم لا
اما موضوع الاتحاد فلا اعرف يحتاج الى تفكير ومعرفة الى ماذا يهدف
اى محاولة يجب ان نشجعها وننقدها طالما فى النهاية هدفنا واحد
ان نكتب من أجل ان نكون افضل
من اجل ان تكون هذه البلد كما نحب
-----------------------
شكرا لطرحك الموضوع للنقاش
تحياتى

كـــيــــــــارا يقول...

طيب ممكن تراجع الردود اللي في البوست اللي متضاف عندي

وتم انشاء مدونه مش عشان حاجه الا اننا نناقش الحاجات اللي بتاثر بالسلب علي العالم ده

وده كلامي في اول بوستا نزل في المدونه

---------


كان في موضوع طرحه مجنوووووون في مدونته وادي لينك البوست

نحو عالم تدوين افضل


وتم النقاش بها هنا اراء المدونين اللي اشتركوا في البوست

وبعد تجميع الاراء

قام مجنون بطرح وثيقه التدوين في الرابط ده

الوثيقة التأسيسية للمدونين

وطبعا طلب من الكل ينشرها عشان تكون لينا كلنا ومن اول اما بدء المدونين نشر الوثيقة

وكان اراء المدونين من مؤيد ومعارض

ولذلك تم فتح مدونه خاصه لمناقشه كل ما يخص عالم التدوين ولمناقشه بنود الوثيقة

حتي يتم التوصل لوثيقه ترضي اغلب المدونين


---------

وده كلامي في التويه اللي تم برده بخصوص المدونه

---------


تم انشاء مدونه
اللجنة التأسيسية للمدونين

ودي عشان نتناقش فيها عن بنود الوثيقه وكده وطبعا الوثيقه مجرد التزام مش اجباري

علي المدون انه ينفذها دي حريه شخصيه ومش كل المدونين مطلوب منهم انهم ينفذوها لانها حريه

اللي حابب يكون مشترك في بنود الوثيقه واننا نوصل بيها لافضل شي يشترك في المدونه برايه

اما اللي رافض ان يكون في وثيقه من الاساس فده حريه شخصيه واحنا مش اجبرناه انه يوافق

لاننا بنعرف كويس معني الراي الاخر وبرده ياريت يشاركنا بالراي

وكل الاراء اللي طرحت في كل البوستات اللي نزلت بخصوص الوثيقه طبعا هنتناقش فيها

المدونه لينكها اهو اضغط هنا

واللي يحب يكون مساهم يبعتلي اميله عن طريق اميلي اللي في البروفيل ده

--------

يعني الوثيقه مش نهائيه لان في لسه كتير هيتضاف وكتير هيتعدل

هو مجرد وصول لعالم افضل وده هتشوفه في بوست هتنزله المدونه ضد التيار

-------

ليا عوده لمناقشه كلامك

كـــيــــــــارا يقول...

اما بخصوص اننا جداد

الاكوننت اللي ضي القمر بيه ده 2008

اه جديد بس مش معناه اني جديده لان الاكونت الرئيسي اللي هو من نوفمبر 2007

انا لاغياه

وبرده ضد التيار لو تشوفها في اول بوست هتعرف انها قديمه بس هي اللي حابه تكون باكونت جديد

ومجنون اللي هو صاحب الفكره برده من زمان يعني مش مدون جديد

mohamed ghalia يقول...

يا جماعة نتناقش ونوصل لحل وانا شايف فى المجمل العام متفقين فى معظم النقاط

مهندس مصري يقول...

أنا حأرد على التعليقات بكرة إن شاء الله
و ياريت تقرأوا التحديث اللي كتبته و خصوصاً إنتي يا كيارا
:)

كـــيــــــــارا يقول...

لالالالا مش فهمت غلط ولا حاجه

وانت حر تكتب اللي تحبه بس حسيت ان الكلام فيه تحامل شويه وخاصه

كلمه جداد هي اللي استفذتني شويه لاني حتي لو انا مش قديمه فبرده ليا فكري وده مش يقلل مني

لكن مش زعلت ولا حاجه وبالعكس كلامك هيفيدنا اكتر

وصدقني كل الهدف اللي عاوزين نوصله هو ان بجد المكان الجميل اللي بنكون فيه يكون جميل

عاوزه اقولك اني قفلت مدونتي امبارح علي المغرب تقريبا

ومش كنت هفتحها وتقريبا محدش حس الا عدد بسيط

والسبب كومنتات كانت اهانه ليا ولشخصيتي

ده سبب من الاسباب اني عاوزه اوصل لحل كل المشاكل اللي بنتعرض ليها

وسبب غياابي الاولاني كان برده كومنتات مستفزه وياريتها نقد
الا انها شتايم وقله ادب

مع اني عمري ماجرحت حد بكومنت حتي لو معترضه بقولها بشكل مهذب

ده السبب

kochia يقول...

من حيث المبدأ هي فكرة
لكن من حيث التقاصيل اعتقد الموضوع محتاج مناقشة كتير
لان فعلا انا كمان شايفة ان فيه حاجات محتاجة تعديل
زي مثلا بند 5
وبند 14 اللي انا كتبت عنهم في تعليقي علي الوثيقة دي عند كيارا

لكن الفكرة اللي اساها - كما اعتقد - هو احترام الراي والراي الاخر والتعبير بشكل مهذب والالتزام بالتقاليد بشكل عام
وده تلخيصي للموضوع لانه مش محتاج اكتر من كدة
لكن الصياغة بتكون مهمة برده

تحياتي

مهندس مصري يقول...

معلش يا جماعة حأرد على كيارا الأول

كيارا
=====
انتي مشحونة من تعليقات قليلة الادب عندك و ده اللي خلاكي تحملى الكلمة اكتر من معناها
انا مقلتش ان جداد دي عيبة
و ما قللتش من قدر او قيمة اي حد
و اعتقد ما تجاوزتش حدود الأدب و الإحترام
و ربنا يعلم بأعزك انتي و كل اللي اعرفهم من الموقعين
:)
راجعي نص كلامي حتلاقيني قايل ان ده ما يعبش المدونين الموقعين
لكن حداثة عهدهم بالتدوين ممكن تكون سبب في عدم معرفتهم إننا جربنا السكة دي قبل كده و عارفين آخرتها ايه

و علشان كده كل اللي اتلسع من الشوربة بتاعة المرة اللي فاتت أكيد حينفخ في زبادي المرة دي حتى و لو كان زبادي بالفواكه
:)

كـــيــــــــارا يقول...

و اعتقد ما تجاوزتش حدود الأدب و الإحترام
و ربنا يعلم بأعزك انتي و كل اللي اعرفهم من الموقعين
:)

----------

انا عارفه ده كويس ومتاكده منه وربنا العالم انا بعزك ازاي وبحترم قلمك

وعارفه انك نقدت نقد مهم ممكن اكون مفهمتش معني الحاثه كويس بس والله حسيت اني بقول تعالوا نشرب مخدرات ولا حاجه احنا بنقول نناقش المشاكل اللي بتواجه التدوين ونحدد في الاخر نقاط مهمه بلاش يتسمي ميثاق او اي مسمي المهم اننا نقول ايه بيخلينا نطفش من العالم ده

عاااااااااااااااااااااا

انا عصبيه انا عارفه بس اكيد فاهم ان قصدي وهدفي مش وحش قصدي وهدفي اننا نكون افضل

Ahmed Al-Sabbagh يقول...

الموضوع انا شايفة تخريف
يعنى ايه المحافظة على العادات الاسلامية يعنى المدونين المسيحين ما يدونوش ؟؟؟
لالا الموضوع من الاول انا شايفة مالوش معنى
تحياتى

مهندس مصري يقول...

أسامة
======
بالضبط كده

جنة
====
انا موافق على رأي حضرتك تماماً
و في النهاية الموضوع كله حرية شخصية و انت حر ما لم تضر
:)

كيارا
======
اظن خلاص انتي فهمتيني
الصياغة للوثيقة بها بعض الأخطاء اللي انتقدتها
ده غير إن الإسم بتاعها نفسه يخض
و حاسس إنها ممكن تقيد حريتي
و علشان كده قلت رأيي فيها بصراحة
و اللي يناسبني منها حأعمله بدون قسم و من غير ما أنضم لأي حد
و اللي ما يناسبنيش آسف مليش دعوة بيه

لإن التدوين حالة شخصية
:)
و سعيد بتعليقاتك دايماً يا كيارا و ربنا يوفقك لما فيه الخير

محمد غالية
==========
ما هو احنا بنتناقش يا عم هو انت شفتنا بنتخانق
:)
يا سيدي ربنا يسهل ما فيه الخير لكل من يريد الأحسن لعالمنا الإفتراضي

كوشيا
=====
بالضبط انا شايف ان المحترم حيلتزم بإحترام الآخرين من نفسه و مش محتاج وثيقة و لا قسم
و اللي غير كده الوثيقة مش حتغير في حاجة

ثم الصياغة عليها بعض الملاحظات زي ما قلنا
يالله خير ان شاء الله
:)

مهندس مصري يقول...

احمد الصباغ
===========
بالراحة يا خال
الناس ما تقصدش
و محدش يقدر يصادر حرية حد
هي الصيغة مكتوبة بشكل ملئ بالثغرات
و الإسم نفسه يدي شعور بتقييد الحرية التدوينية
بس بالراحة مش كده
دول مش زيي التانيين
دا كل اللي اعرفهم منهم ناس كويسة
:)

خمسة فضفضة يقول...

السلام عليكم ورحمة الله وبركاته

ايه الوثيقه دي يا محمد اول مره اسمع عنها ، هو كل شويه حد يجي عاوز يحول التدوين من حاجه حره لحاجه مقيده وليها شروط واتحادات وكارنيهات

طيب هو مين اللي اوحي ليهم بالفكره دي واتفقوا مع مين والفوا الوثيقه دي علي اي اساس

بنوته مصرية يقول...

انا بضم صوتي لصوتك يا بشمهندس

وموافقة علي رئيك

وانا عن نفسي محبش اكون تحت قيود او تحت مؤسسة او اتحاد مداونين

انا معاك في الرئ

كل التحية لك

mahasen saber يقول...

يا مصرى يا مصرى يا هندسه ...
انا موافقه على الميثاق ده وكانت البدايه بتعليق ليا عند مجنون بس لقيته حاطط اسمى فى اللجنه وانا مفضتش او اتكسفت ااقولك شيل اسمى لانى اصلا مش بحب اظهر فى المسائل دى ااقول رايى وكفا بس لقيته حاطه واصلا قريت الميثاق ومخدش بالى ان اسمى مكتوب
...يعنى يا هندسه انا مش فى اللجنه بس اؤؤيدها وبشده بشده بشده
........
اليى انا كتبته ده اسمه توضيح

~*§¦§ Appy §¦§*~ يقول...

اه وماله عادى يعنى ايه المشكله
الله انت مالك يا اخى
دا انتم ناس غريبه اوى

بص بقى علشان فقعه المراره اللى انا فيها
الى كل الناس بجد وبراحه
يا جماعه اللى عاوز ميقولش الفاظ مش كويسه هو حر محدش غصب عليه يقول اللى مش عاوز يدخل عند مثليين اوك برضه بس فيه ناس تانيه بتحب علشان يناقشوهم
يعنى يا جماعه ابسطها لكوا والنبى اكتر
انا مثلا مش بسمح بتعليقات فيها شتيمه والناس محترمه ده
من الاخر الاحترام بيفرض مش بيطلب
ومش كل شويه حد يطلع يقول حاجه وبعدين اللى بيجامل بيبان اوى والناس بتقرف منه لان تعليقاته كوبى وبست لو احرجتوه مرة يبقى خلاص
بالنسبه للنقد ومش النقد ده عادى انا ممكن انقد حد براحه واقوله ومش نقد اسمها بناقشه لو مش عجبكم النقاش الغوا التعليق
بزمتكوا البلد فيها خمس تلاف حاجه وانتم تقولا ده
هو احنا لا يمكن هناخد على الديمقراطيه
بس خلاص وبطل حرقه دم يا محمد

~*§¦§ Appy §¦§*~ يقول...

على فكره انا ضد مش مع نيهاهاهاهاها

يعنى الكلام كويس وكل حاجه بس انا اقدر انفذه من غير الرصه دى

جمعاوى روش طحن يقول...

ممكن توضيح للموضوع


أنا أول مرة أشوفه


معذرة يا هندسة

إيه و ثيقة المدونيين دى ؟

مهندس مصري يقول...

خمسة فضفضة
==========
و عليكم السلام و رحمة الله و بركاته
هما عايزين يعملوا حاجة زي المدينة الفاضلة في عالم التدوين و هما على ما أعتقد نيتهم خير بس الموضوع وسع منهم شوية
و عموماً عندك لينك الوثيقة بالبنط العريض
خشيها و شوفي الناس دي عايزة ايه ؟

وكل التفاصيل اللي عايزاها عند كيارا
خشي مدونتها او المدونة اللي عملوها علشان مناقشة الوثيقة دي و كلميهم و اتناقشي معاهم
انا شايف إن نيتهم كويسة و عايزين يعملوا حاجة زي التدوين النظيف اللي حضرتك كنتي من اركان حملته الأساسية بس الموضوع بصياغته الحالية يحسسك إنه قيد على حرية كل مدون

بنوتة مصرية
===========
طيب كويس الحمد لله
منورة المدونة بعد طول غياب
ربنا ما يبوظلك ويندوز أبداً
:)

محاسن صابر
==========
ما انا عارف و شوفت البوست ده عندك و ما رضيتش اعلق عليه
بس لما لقيته في كذا مدونة من اللي بأخشهم قلت لأ ضروري اوضح رأيي و إعتراضي على بعض النقط و موافقتي على باقي النقط
و إعتراضي على الشكل و الصيغة اللي الموضوع متداول بيها
و مش حأقعد أعلق على كل واحد نشر الموضوع من اللي اعرفهم و آخد التعليق الطويل ده نسخ و لصق بين المدونات
فقلت أنشره كبوست عندي و نتناقش
:)
طيب و حيث انك تؤيديها و بشدة إيه ردك على النقط اللى انا معترض عليها
نقطة نقطة لو سمحتي
:)

آبي
====
بالضبط
اللي عايز يلتزم بحاجة حيلتزم بيها من نفسه من غير وثيقة و لا حاجة
و اللي مش عايز يلتزم يبقى مهما عرضت عليه من وثائق مش فارقة معاه
يبقى لازمته ايه ؟
كل واحد عقله في راسه يعرف خلاصه

مهندس مصري يقول...

جمعاوي
======
خش اللينك اللي بالبنط العريض و انت تعرف
ركزوا في القراية بقى
بلاش شغل الكروتة ده
:)

~*§¦§ Appy §¦§*~ يقول...

ايوه ونقعد نكتب فى وثيقه وتعب قلب وفى الاخر الالمان يسرقوها ولا المدونين الانجليز هههههههههههههههه


يا جماعه بجد مش بتريق بس فعلا ده صعب والموضوع مينفعش
مبنفعش تدخل بيت حد تقوله اعمل كذا انت اللى تقدر تمنع حد بيقل ادبه عندك انت اللى ممكن تروح لواحد بيهاجم الاسلام او اى حاه وتتناقش عليه
طيب ايه فايده اللى بتقوله انتم بتعملوا مقاطعه بين الناس

princess يقول...

مش عارفة ليه الناس مش متابعة الموضوع كويس!
يا جماعة احنا ماجبلرناش حد على حا جة ده اقتراح من مجنون ومفتوح اللى عايز ينفذ ويناسبه اوكيه مش عايز بردو اوكيه
ايه الكلام الكبير عن كبت الحريات والكلام ده؟
وبعدين يابشمهندس النقط الى حضرتك علقت عليها قلنا انها نقط اولية وهتتعدل كتيييييييير مع اراء الناس
اما بخصوص اللجنة والكلام ده
هيا مش لجنة بالمعنى اللى اتفهم ولا احنا نصبنا نفسنا على حد او على مدونة او اراء
مجنون لما كتب اسماء فى البوست كان شايف ان من خلال الكتابات احنا بنتبع كل النقط دى (وده مش معناه انه بقية الناس لا)ولما اتكبت الاسماء فينا اللى وافق وانضم وشارك فى عمل مدونة
وغفى الى قال موافق على النقط بس مش لازم ابقى فى المدونة او الكلام ده
يعنى احنا مش لجنة بالمعنى اللى واصل للناس
بدليل ان الموضوع مفتوح للناس كلها واالى عايز يشارك فى المدونة اهلا وسهلا بيه
واللى عايز يشارك بتعليقاته فقط بردو اهلا بيه
انا لهجتى يمكن تيان انى عصبية
لا بس انا مستغربة لان فى ناس مش متابعة الموضوع بدا ازاى او الهدف الصح بتاعه وهدفه ايه وبتقول رايها وده غلط لازم الواحد يبقى ملم بكل الموضوع ولو فى حاجة مش واضحة يسال
وتبقى اخر خطوة ابداء الراى
وبردو عشان محدش يفهمنى غلط انا مقصدش حد بعينه انا بتكلم فى العموم
تحياتى:)

مهندس مصري يقول...

أميرة
=====
السبب في كده عدم دقة الكلمات المستخدمة في الصياغة
بتدي معاني غير اللي انتوا عايزينها
ثم زي ما قلت لك في تجارب سابقة مريرة و الناس ملسوعة منها قبل كده

و انا اتناقشت مع كيارا كتير و فهمت منها الموضوع بدأ و تطور إزاي
و ما زلت عند رأيي
بس المشكلة اللي بتقابلكم دلوقتي ايه ؟

إن في نوعيين من المدونيين رفضوا

نوع مؤدب و ده رفض بأدب و بعقل و منطقية زيي كده
و نوع بذئ و ده قل أدبه عليكم و انا شفت بعض بذاءاتهم ضدكم على الفيس بوك
و ده مرفوض تماماً بس تعملي ايه ؟
البذئ حيفضل بذئ طول عمره الا لو إقتنع بغلطه من داخله
و إذا كان مش بيخاف من ربنا يبقى مش حيخاف على مشاعر أي حد

انا عارف ان نيتكم كويسة و بأحترمكم كلكم
و ارجو إن الخلاف في الرأي لا يفسد للود قضية
:)

princess يقول...

مهندس مصرى
احنا بنحترمك كلنا طبعا وحضرتك عارف كده:)
اما بخصوص عدم الدقة فده طبيعى جدا بالنسبة لحاجة مكتوبة بشكل اولى:)
ولسه عايزة تعديلات
اما بخصوص الرفض هقول ايه كل واحد وشخصيته:(
تحياتى

مهندس مصري يقول...

أميرة
====
بالضبط كل واحد حر في مدونته
المهم نفضل نحترم بعض
و إن الإختلاف في الرأي لا يفسد للود قضية
:)

ضد التيار يقول...

اولا انا حبت اضيف الرد هنا علشان طبعا البوست الجديد ماينفعش الكلام فيه

قولت اضيف هنا فى المكان المخصص

و طبعا ماكنش ينفع برضه ارد عليك عند نيجار حبيت اجى فى مدونتك وارد لقيتها افضل

عشان لو انا المقصوده بالكلام تعرف انى ماقصدش تجريح فيك ..اصل الصراحه شفت الردود بعد ردك مافيش غيرى اللى ذكر الاسم متهيألى

(الاستاذ مهندس المصرى انا لما شفت كلمه الجدد بجد جالى صاعقه لان مش معنى ان التسجيل من قريب يبقى خلاص احنا جدد لو هو اخد باله من الاسماء اللى اتذكرت و دخل المدونات هايلاقى وقتها اننا ناس من القدام بس باكونت جديد

يعنى عارفين اللى حصل كويس لكن فى موضوع فشل فيه البعض ليه احنا مانحاولش ننجح فيه ؟؟؟؟ ليه عشان غيرنا فشل يبقى نقف على فشله و بس )

دا الجزء اللى اتذكر فيه الاسم ...انا قولت اول لما شفت جالى صاعقه و وضحت ليه مش اكتر و سألت الاسئله اللى بعد التوضيح

على فكره عايزة اقولك انى شفت البوست و الكلمه و اضيقت بالفعل لكن لما قريت توضيحك فهمت قصدك و دا اللى خلانى معلقش .. عشان كدا برضه قولت لو كنت دخلت المدونات دى كنت هاتلاقى اننا بنقول اننا مش جداد

استاذى الفاضل انا حبت اوضح كلامى عشان لو انا المقصوده تكون فهمت قصدى من الكلام انه مش تجريح فى شخصك

و لو مش انا المقصوده يبقى برضه اوضح عشان ماتحطش تحت بند الظالمين

اسفه للإطاله لكن كان لازم التوضيح

لك منى كل الاحترام و التقدير

مهندس مصري يقول...

طيب و بقية كلامك

لكن من الواضح ان الاعتراض للهجوم على البعض فقط و دا كان واضح قوى فى اصطياد الاخطاء يعنى الاعتراض ماكنش عشان زى ماتقال انها بتمنع الحريه و بتفرض قيود

لما الكلام ده يتقال بعد اسمي المفروض افهم منه ايه ؟

عموماً انا فهمت من كيارا انك ما كانش قصدك
بس ياريت بعد كده حضرتك تأخدي بالك من معنى كلامك و توضحيه اكتر من كده

حصل خير
:)

ضد التيار يقول...

يعنى انا توقعى صح

عموما بعتذر و بشده لحضرتك لان بالفعل مش انت المقصود لان حضرتك اعتقد انك ماغلطش فى حد ولا فضلت تعمل حمله ضده ..صح ؟؟؟

عموما كويس ان حضرتك لفت نظرى المفروض بالفعل كنت عملت فواصل بين الكلام

عموما حصل خير

و بعتذر لتانى مره (:

مهندس مصري يقول...

ضد التيار
==========
حصل خير و انا قبلت الإعتذار
:)
و ياريت تقرأي بقى في باقي موضوعات المدونة
و أشوف تعليقاتك عليها
:)

M.K يقول...

السلام عليكم....
اولا يسعدني انك زرت مدونتي ..
وكنت اتمنى أن تزورها بضروف أخرى...
...........
سيدي الفاضل بالفعل بدأ الموضوع عند
مدونت مجنون بتعليقي على موضوع لعالم تدوين أفضل...
وبعد فتره وجدته أنزل موضوع الوثيقه وورد به اسمي من دون أن أقبل أو أرفض..
ولم ألقي بالا للموضوع كون كما تفضلت
أن أغلب البنود بالوثيقه أنا أوافق عليها ...
وكان لي تحفظ على بعض النقاط...
وسترى ذالك من خلال تعليقي لدى مجنون و كيارا...
وأيضا سيتضح لك موقفي الذي هو مشابه لموقفك...
أني أنتهج مسار البنود قبل صدور الوثيقه...
وليس بالضروره اصدارها ولاكن نشرها قد يساعد البعض على فهم ما أنا
أنشده من زوار مدونتي ...
لذا لم أرد أن أدخل بمهاترات ...
وكلام غير لائق ...
بدأ يصدر من بعض المدونيين المؤيدين والمعارضين...
...............
أستاذي الفاضل أنا أتفق معك في رأيك
بخصوص البند الأول والبند الرابع عشر بالذات ....
والموضوع كان يفترض به كما فهمت من تعليقات مجنون أن يكون هناك اجتماع للاجماع على الوثيقه وأن نشر الوثيقه الآن لمعرفة رأي الجمهور فقط لا غير ...
...................
لست بحاجه لوثيقه لأوضح رأيي لأن من سيتصفح مدونتي سيعلم ميولي...
و لاكن أحببت أن أوثق معرفتي بالمدونيين من حولي ...
وبالفعل هذا ماحدث وتثبته زيارتك الأولى لي من خلال موضوع الوثيقه..
.............
دمت بخير

بنوتة مصرية يقول...

ع فكرة ياابشمهندس انتى متلخبط بينى وبين بنت مصرية

معلهشي يااريت مش تزعل من اسلوبى لما تقوول رايك او تنقض
حاول تكون اهدى من كدة شووية انا حاسة انك فعلا من جواك كويس بس اما بتتكلم بتكحلها سورى بتعكها
سورى انا اية اللى بهببوة دة مش قصدى حاول تكون طريقتك احسن من دى شوية عشان انا متابعة مدونتك من زمان وعارفة ان فى كتير جدا بيعزوك فبلاش تخسرهم بااسلوبك
الاختلاف ف الراى لا يفسد للود قضية
بس يااريت الاسلوب يكون احسن من كدة
لو معجبكش تعليقى
احذفوة

مهندس مصري يقول...

m.k
====
و عليكم السلام و رحمة الله و بركاته
و يا اهلاً بأشقاء و شقيقات الإمارات
انا بأحب الإمارات من ايام ما كنت طفل و بأقرأ مجلة ماجد
:)
سعيد بزيارتك و تعليقك
:)
انا متفق معاكي في إن اللي ملتزم و محترم قبل الوثيقة حيستمر على نفس النهج بعدها و حتى لو مفيش وثيقة حيفضل محترم برضه
و إسمحي لي أكرر لك نفس اللي قلته لبعض الزميلات الموقعات على الوثيقة قبل كده

وجهة نظرك كانت صح في مناقشة الوثيقة
و كانت غلط في نشرها قبل ما تتعدل و تتحول لصيغة نهائية


الطريقة الأصح في اللي حصل كانت ايه من وجهة نظري
تتعمل مدونة مناقشة الوثيقة الاول
و يتعمل لها بوست اعلان في مدونة كل واحد منكم
و الناس تخش المدونة دي تتناقش
و لما يتم التوصل لصيغة نهائية
يتم نشرها في كل المدونات الموافقة عليها و عمل بانر لها بحيث كل مدونة ملتزمة بيها تعلقه عندها علشان تعرف الناس بده
و يبقى الإسم مخصص و بيدل على المجموعة دي بس
مش على كل المدونين
يعني يبقى مدوني ميثاق الشرف مثلاً يعني
صدقيني لو كنتم اتبعتوا الخطوات دي كان الهجوم حيقل كتير
إنما الموضوع تحسي انه مشى بالمقلوب
يعني الصيغة المبدأية اتنشرت الاول بدون اي إشارة لإنها مبدأية و قابلة للتعديل في بوستها نفسه
بل بنود فخمة و إسم كبير و قسم و بتاع
كل ده و هي فكرة اولية لسه

فالناس بمجرد ما تقرأ بتقول مين اللي بيتكلم بإسم المدونين كلهم ده و مين إدى له الحق
فهمتيني
هي غلطة صياغة في المقام الأول
و تسرع في نشر الفكرة قبل ما تنضج

ربنا يوفقكم لما فيه الخير
و انا طبعاً ضد أي بذاءات اتوجهت لكم لإن البذئ بيعبر عن بيئته و تربيته


و سعيد فعلاً بزيارتك
:)

بنوتة مصرية
============
انا مش متلخبط فيكي مع أي حد
بس بصي في التعليقات فوق
حتلاقي تعليق من بنوته مصرية
بالهاء و ليس التاء المربوطة
و دي صديقة قديمة من عالم التدوين و إسم شهرتها رودي
و هي أم نور اللي ناشر صورتها قبل كده

نيجي لرد كلامك بقى
أولاً انا كنت هادي
و لو كنت متنرفز مكانش الكلام بتاعي طلع منضبط كده بدون ما أغلط في أي حد

ثانياً إيه الوحش في إسلوبي ؟
ياريت تحددي كلام معين و ما تتكلميش كلام عايم كده علشان أعرف ارد بالتحديد
انا شايف إسلوبي كويس و نصحت الناس بأدب و إحترام و بينت لهم أخطاؤهم من وجهة نظري و محدش رد على أي نقطة من اللي إعترضت عليهم و أقنعني بصحتهم
بل على العكس
ناس كتير وافقتني حتى من موقعي الوثيقة
و قالوا انها وثيقة مبدأية و كانت لسه حتتراجع في المدونة المخصصة لذلك
رغم إن ده ما إتكتبش في بوست الوثيقة اللي إنتشر في كذا مدونة اعرفهم
طيب الناس حتنجم و لا حتقرأ الغيب

و حأكرر لك تاني اللي قلته أكتر من مرة
لأكتر من مدونة صديقة نشروا الوثيقة رغم إني ما أعرفش انتي نشرتيها و لا لأ لإني للأسف ما تابعتش لسه مدونة حضرتك

وجهة نظرك كانت صح في مناقشة الوثيقة
و كانت غلط في نشرها قبل ما تتعدل و تتحول لصيغة نهائية


الطريقة الأصح في اللي حصل كانت ايه من وجهة نظري
تتعمل مدونة مناقشة الوثيقة الاول
و يتعمل لها بوست اعلان في مدونة كل واحد منكم
و الناس تخش المدونة دي تتناقش
و لما يتم التوصل لصيغة نهائية
يتم نشرها في كل المدونات الموافقة عليها و عمل بانر لها بحيث كل مدونة ملتزمة بيها تعلقه عندها علشن تعرف الناس بده
و يبقى الإسم مخصص و بيدل على المجموعة دي بس
مش على كل المدونين
يعني يبقى مدوني ميثاق الشرف مثلاً يعني
صدقيني لو كنتم اتبعتوا الخطوات دي كان الهجوم حيقل كتير
إنما الموضوع تحسي انه مشى بالمقلوب
يعني الصيغة المبدأية اتنشرت الاول بدون اي إشارة لإنها مبدأية و قابلة للتعديل في بوستها نفسه
بل بنود فخمة و إسم كبير و قسم و بتاع
كل ده و هي فكرة اولية لسه

فالناس بمجرد ما تقرأ بتقول مين اللي بيتكلم بإسم المدونين كلهم ده و مين إدى له الحق
فهمتيني
هي غلطة صياغة في المقام الأول
و تسرع في نشر الفكرة قبل ما تنضج

ربنا يوفقكم لما فيه الخير
و انا طبعاً ضد أي بذاءات اتوجهت لكم لإن البذئ بيعبر عن بيئته و تربيته


انا مش حأحذف تعليقك
لكن لو عايزة تنصحيني بجد يبقى اتكلمي بشكل محدد علشان يا اما اقتنع و أشكرك ساعتها
يا أما ما اقتنعش و أرد عليكي بالمنطق و اقنعك

و إنتي اول واحدة تعترض على اسلوبي من اول ما فتحت المدونة فياريت تفهميني بالتفصيل و التحديد ايه غلط في إسلوبي
:)

و على فكرة برضه ما إسمهوش النقض
إسمه النقد
حيث ان النقض هو الهدم
اما النقد هو إبداء رأي مخالف او معارض
و مش ممكن تكون غلطة كيبورد لإن الدال و الضاد بعيدين عن بعض خالص

عمر يقول...

أنا موش قذر

وشكراً

مهندس مصري يقول...

عمر
====
شوف ردي على تعليق جنة فوق