الأحد، نوفمبر 16، 2008

و كده 100 لون و كده 100 لون و الكل سيربح المليون :)

شكراً لـ طفاطيفو على رفعه الفيديوهات القيمة دي و مدونته للفيديو دايماً بتعرفنا كل جديد و مهم و إن كنت اتمنى منه إنه يكتب ملخص لمحتوي الحلقات الطويلة و رأيه فيها
المهم

محمود محيي الدين وزير الاستثمار .. وتوزيع البلد على المواطنين .. في العاشرة مساء


بيقول إيه بقى سيادة الوزير
بيقول لكم حيوزعوا مجاناًعلى كل مواطن فوق الـ 21 سنة صك - ورقة يعني - عبارة عن محفظة مالية فيها بعض اسهم من الشركات المملوكة لقطاع الاعمال العام
و بيقول الشركات العامة دي حتتقسم لأربع مجموعات
مجموعة لن يتم بيعها نهائياً و لا توزيع أي اسهم منها مثل قناة السويس مثلاً
و مجموعة ستحتفظ فيها الدولة بنسبة 67% من الأسهم و حتوزع على الشعب 33% من أسهمها
و مجموعة ستحتفظ فيها الدولة بنسبة 51% من الأسهم و حتوزع على الشعب 49% من أسهمها
و مجموعة ستحتفظ فيها الدولة بنسبة 30% من الأسهم و حتوزع على الشعب 70% من أسهمها

و كل واحد فوق الـ 21 سنة حيآخد صكه في إيده و يبقى حر فيه
يبيعه بقى و لا يشتري عليه صكوك غيره هو حر بس الكلام ده مش حيحصل غير بعد إصدار القانون المنظم للعملية دي في خلال سنة
يعني سنة واحدة و بعدها كل واحد منكم يقفش الصك بتاعه في إيده و غير مسموح ببيع الصكوك سوى للمصريين فقط
المهم اكتر بقى إن قيمة الصك حتكون كام ؟
بضع مئات من الجنيهات
يعني مش حتوصل لألف لحلوح يا مواطن منك له لها لها له
يعني ما تحلموش احلام كبيرة و الحداية مش حتحدف كتاكيت و عمر الحكومة ما كانت حتعمل زي صابر الطيب - هاني رمزي - و ترزع كل واحد مليون جنيه في إيده
لا الحكومة حبيبتكم خايفة لأحسن تجي لكم صدمة من الفرح فحتديكم المبلغ اللي تقدروا تتعاملوا معاه يا مواطن منك له

الصك ده بقى مش حتقدر تفكه لأسهم و تتعامل معاه كأسهم فرط غير بعد مرور سنة على استلامك له و ساعتها بس تحطه في البورصة و تبتدي تتعامل على اسهم محفظتك دي بقى بيع و شراء
و انتوا عارفين البورصة غدارة و ممكن بلعبة واحدة من الكبار تلاقي نفسك خسرت الجلد و السقط زي ما حصل مع ناس كتير قبل كده
طيب و اصول الشركات دي من أراضي و عقارات و منقولات مين يتحكم في بيعها و شرائها الله اعلم بس أكيد حيكون الحكومة بما إنها صاحبة النصيب الأكبر في معظم الشركات و متحكمة فيها و في سياسة إدارتها
طيب مين يضمن إن الحتيان الكبار ما يشتروش من كل الغلابة صكوكهم برخص التراب و يحتكروا بقية البلد اللي محتكرينها بالفعل
برضه لا ضمان من أي نوع
طيب إيه اللي حيفهم الشعب الغلبان طريقة اللعب في البورصة ؟
و بعدين الناس المغتربين اللي زيي كده نظامهم ايه ؟ بيقول اللي مش حيآخد الصك بتاعه في خلال سنة حيتحول لصندوق الاجيال القادمة
طيب نظامه ايه الصندوق ده و فلوسه حتروح فين و تتصرف أرباحه على مين ؟ العلم عند الله برضه
في مناقشات و آراء كتير مفيدة إتقالت عند نوارة في البوست ده حد بيفهم في الاقتصاد يفهمني و الإنطباع العام إن الناس خايفة و شبه متأكدة من إن الموضوع ملعوب كبير من الحكومة علشان تخلي الشعب يبيع بقية القطاع العام بنفسه و ترفع الحرج عن نفسها و يبقى مفيش حد أحسن من حد و زي ما الحكومة باعت الناس باعت برضه
الله اعلم
بس الموضوع غامض و مريب خصوصاً إننا عمرنا ما تعودنا من الحكومة على حاجة كويسة
عموماً الفيديو بتاع الحلقة رغم طوله الشديد ( ساعة و نص ) لكنه مهم جداً شوفوه و بصوا على آراء الناس عند نوارة و بعدها قولوا لي فهمتموا ايه ؟
و اسيبكم مع صابر الطيب و محاكمته و هو بيتكلم على حقوقنا الدستورية




و مشهد بيع المال العام في مصر بالمزاد العلني و اللي قرب يبقى حقيقة لكن يا عالم حيبقى مزاد و السعر يزيد و لا مناقصة و السعر ينزل في الارض

هناك 32 تعليقًا:

جمعاوى روش طحن يقول...

باشا

أول تعليق أهوه


سؤال رخم \\\



ممكن أخش بدوريين ؟؟

fashkool يقول...

شوف ياباش مهندس . هو الكلام ده عشان ما يبقاش فيه حاجه لخدمة الشعب .. يعنى لو رحت قسم بوليس لازم تدفع ثمن الموضوع اللى انت رايح له .. لو رحت مستشفى لازم تدفع لو حبيت تروى ارضك لازم تدفع لو حبيت تمشى بعربيته فى الشارع لازم تدفع .. اصل انت فى الحاله دى حيقولولك احنا ما لناش دعوه .. اصحاب الاسهم هما اللى عايزين فلوس وارباح الاسهم وانتم اصحاب الاسهم .. طب هى الحاجات دى فى الاصل ملك مين ؟ طبعا ملك الشعب .. طب هما ازاى حيدوها للناس صحوك .. طب وابنك اللى حييجى .. مش حيبقى له فى البلد والا ايه .. طب وحفيدى مش حيبقى له .. طب واللى اقل من 21 يبقى مالوش حاجه فى البلد .. هى دخول الحاجات دى مفروض بتدخل خزينه الدوله .. اللى هى وزارة الماليه .. ووزارة الماليه بتصرف على الماليه العامه اللى هما ايه ؟؟ خد عندك
الامن .. الدفاع .. الصحد .. التعليم ..العدل .. دول اوجه صرف الدوله على شعبها .. طب بعد كدا حييصرفوا منين .. والله ما حد عارف اخر الافتكاسات دى ايه .. ربنا يسترها علينا

نهر الحب يقول...

بص
انا كل اللى فهمتة انها عملة نصب فى نصب للاسف مش قادرة اقتنع بغير كدة ؟
بس ياترى لما يقرروا يبيعوا اسهم قناة السويس مين اللى هيشترى ؟

احمد الجيزاوى يقول...

عواد با ارضه يا ولد
لا تعليق غير كدة
تحياتى لك
احمد الجيزاوى

kochia يقول...

والله
صكوك وبعد سنة وببضع جنيهات ؟؟
خايفة الناس كمان تثمن في البورصة ويبقي المواطن صك ويتباع ببضعة جنيهات هو الاخر
ربنا يستر

فاتيما يقول...

أنا شوفت الحلقة بتاعة العاشرة مساءا
و قريت كام رأى عن الموضوع
و من غير ما أقرى يا محمد
القصة دى كلها بتفكرنى بمثل مصرى بليغ ممكن يتقال فى الموقف دا
من دقنه ...و إفتله
بس كدا

سومه...مجنونه فى بلد عاقل يقول...

انا شخصيا حاخد الاسهم بتاعتى واضارب بيها فى الجورصه وافضل ابيع واشترى لحد ما يبقوامن 1400 ل 5000 جنيه فى عين العدو
اخد عليهم قرض بضمان الاوضه بتاعتى واطلع بعماره عشر ادوار ابيع الدور بسعر اقتصادى 200 الف جنيه واسد القرض واطلع بمدينه وبعدين اكون امبراطوريه زى طلعت مصطفى واسميها امبراطوريه المجانين
اخلف واد قليل الادب يصرف كل تعبى ع الرقاصات ويتمسك فى قضيه وانا اموت وابنى بقى يتفضح ويفضح المصريين ....وتوته توته ملهاش نهايه الحدوته
وسؤال صغير ليه يكون معانا فلوس عشان نعمل بيها ايه انا شخصيا طموحى انى ربنا يرزقنى بعربيه 126 كارو بحمارين واتخرج واشتغل واريح اهلى بس مش اكتر خللى اللى يربى ارانب يربى وهى معروفه هم عاملين كدا ليه
...........
اما المواطن الغلبان فاقدر اقولك انه 1400 جنيه دول حيشبرقوه على الاخر ويحلوا كل مشاكله يعنى حياكل ويشرب ويتعلم ومش بعيد باراحهم يجهز عياله ويفتح دكان يوسع دخله
انا ماشيه ليجيلى نقطه

مولان يقول...

وهو من امتي الحكومه بتعمل حاجه لله في لله

بص عشان مش اكروت الفيدوهات هشوفها واقرا اللينكات وبعدين هرد لكن انا قريت البوست

ليا عوده

خمسة فضفضة يقول...

السلام عليكم ورحمة الله وبركاته

والله يا محمد انا كل ما فكر في الموضوع ده احس اننا داخلين علي مصيبه، تخيل بعد شويه ان بلدك مش هاتبقي بلدك وان ممكن جدا ان معظم منشئات البلد المهمه والحساسه تبقي في ايدين شوية مستثمرين مابيحسبوهاش الا بنظام المكسبق والخساره تخيل بقي ان كل الفقراء هايروحي في الرجلين والطبقه الوسطي واللي فوقيها بشويه هايموتوا وان البلد هاتصفصف علي الاغنيا وبس

عارف رواية يوتوبيا بتاع احمد خالد توفيق ، اهو انا حاسه ان مصر هاتبقي كده
وان دي هاتبقي خلاص بداية النهايه

تخيل النيل مش هايبقي بتاعنا ولا البحر ولا الشوارع ومش هايبقي فيه مصانع ولا زراعات ولا اي حاجه خالص ، وكل حاجه هاتدار باسلوب راسمالي مافيهوش رحمه

ربنا يستر ومجلس الشعب مايوافقش علي الموضوع ده ولاونه من سابع المستحيلات


والله كل ما الفكره تيجي في دماغي اطردها ومارضاش استرسل في التفكير فيها وفتوابعها حاسه انه هايحصلي حاجه

ربنا يستر يارب

Rain_Drops يقول...

ماتقعدوش تنقو في الموضوع يا رجالة و تقولولي صابر الطيب و مش عارف ايه ، أنا خلاص ظبطت نفسي على الصكين دول، دول هم أملي في المستقبل
;)

Dr Ibrahim samaha يقول...

ما هو السهم دليل ايه دليل الملكية

وكله يخش البورصة

وكله يبيع هدومه وهتبقى الصطة ان شاء الله

د إبراهيم

mahasen saber يقول...

برضه سياسة البلد التطور بعد ما كانت البلد بتتباع للغرب دلوقتى مبتتبعش الا للقرب

حلو قوى
بس بئه محتمل قصاد ده يلغوا الدعم والتامين الصحى ويبقى الغلابه من غير شئ يسترهم
دايما وزارتنا بتفكر لمصلحتنا
حد يقدر ينكر ده

جبهة التهييس الشعبية يقول...

لا يا مهندش
انا مش عايزة المشروع ده
ده وحش قوي
طيب انا مش مسموح لي طول السنة اني ابيع الحافظة غير لمصريين
طيب بعد السنة؟ لما اطرحها في البورصة
هي البورصة ح تسأل جنسيتك ايه؟ مش ممكن تتباع لاسرائيل؟

وبعدين احنا ايش فهمنا في الحاجات دي هو احنا اقتصاديين وللا رجال اعمال؟

انا مش عايزة المشروع ده
نعمل ايه؟
انا خلاص فهمت
بس مش عايزاه

TAFATEFO يقول...

سيدي
مشكور على كلامك الطيب

بس أنا مبعرفش أشتم علشان أعلق على كل الفيديوهات .. وانت عارف كل الفيديوهات دي عايزه قاموس شتايم

TAFATEFO يقول...

وبعدين وجهة النظر اللي أكونها ممكن تكون مختلفه عن الناس .. وكده أنا هبقى بفرض على الناس انها تسمع وجهة نظر الضيف .. وكقدم البرنامج .. وأنا كمان

ده أنا أبقى غتييييييييييييييييت أوي

Gannah يقول...

والله دى بلد العجايب
بس بلدنا هنعمل ايه
ده بقى اقتصاد المفلس
يعنى بيدوروا ازاى ياخدوا فلوس وفى نفس الوقت يشغلوا الناس
بورصة ايه؟؟؟
انا ولا اعرف يعنى ايه بورصة ولا أفهم ليه يقعدوا يبيعوا ويشتروا
انا اصلى كنت علوم
ما علينا
أنا مش واخدة الا اذا كانت أسهم فى قناة السويس
ينفع مش شركات واقعة
هو ده بقى اللى بيقولوا عليه بيعبوا الهوا فى ازايز
تحياتى

طالب ثانوى يقول...

مجرد سؤال هى مصر مش بتاعتنا والمفروض الحكومة دى شغالة خدامة عندنا ازى يبيعهولنا ماهى بتاعتنا واحنا مختارينهم المفروض علشان يديروهاارجو جواب

أحسن شاب في البلد يقول...

مش عارف ابتدي منين
ناس شبهت لي البلد بمركب بتغرق .. و الشاطر اللي ينط منها ... اديك نطيت يا عم محمد ... عقبالي انا كمان ما انط قبل ما اتبل
معدل الغرق بيتزايد .. لأن كل يوم يطلع لنا خرم جديد ... بس الحركة دي .. الناس جابت من الآخر .. و بدل ما كانوا بيخرموها .. بدأوا يشيلوا الواح القاع كله .. دا زائد انهم ولعوا في السطوح
مين اللي بيفكر للناس دي ؟؟ ايه الدماغ دي ؟؟ جابوا الافكار الجهنمية دي منين
انا سمعت نكتة ع القهوة ع الموضوع ده
الريس قاعد حزين .. جاله ابليس و قاله زعلان ليه ؟؟ قاله عملت كل حاجة في الشعب .. مش عارف اعمل ايه تاني .. قام ابليس قاله : خد دي ( و قام موشوشه ) قاله قديمة يا عم .. دا انا عاملها من سنة 90 .. قام ابليس فكر شوية و قاله .. طب خد دي بقى .. جديده ( و قام موشوشه ) الريس قاله : يووووووووه .. قديمة اوي .. عاملها من 97 .. امال بيقولوا عليك ابليس ازاي؟ ... اسكت .. و انت داخل عليا .. كنت بافكر اعمل لهم .. ( و قام موشوش ابليس ) ابليس وشه احمّر قاله .. يا شيخ حرام عليك اتقى الله

اهو اللي فكر الفكره دي ... بصراحة .. ابليس يقوله يا عمي

لو محتار من هايجيبلك صكك .. ابعت لي توكيل و مالكش دعوة ... اهو قرشين من هنا .. على قرشين من هناك .. نلم تمن موبايل جديد بدال اللي اتسرق مني في البلد بنت الـ(تيييت)دي ... اللي لا منها و لا كفاية شرها
ربنا يطلعنا منها على خير

لو لم اكن مصريا .. يبقى اشطة اوي

أحسن شاب في البلد يقول...

نسيت اقول آخر حاجة

كده 100 لون و كده 100 لون
و الكل هايقلع في الكراكون

جيب العواقب سليمة يا رب

rona يقول...

استرها معانا يارب
دحنا غلابه

سنابل قمح يقول...

ماشى أنا فهمت شوية بس بقي هما هيستفيدوا إيه من الحركة دى ؟
يعني لو افترضنا حسن النية هما كانوا بيشتكوا من قلة موارد الدولة ودلوقت هاتقل أكتر طبعا لأن جزء كبير من الأربااااح هيتوزع علينا وكل واحد ياخد خمسة صاغ بحاله وهما اصلا كانوا بيقوللنا إن الدعم ده حاجة وحشة وواقف عليهم بخسارة وأوكلكم منين ؟يبقي نتيجة طبيعية إنهم يخلعوا ويقوللنا مافيش
نعمل إيه عشان نوقف الهبل ده ؟
أنا حاسة إننا داخلين على سنين سودا

مصري جدا يقول...

زي ما فهمت
اولا كل ما تم من خصصة باطل او على الاقل قابل للبطلان و الدليل حكم بطلان بيع الغاز لاسرائيل

ثانيا الشركات اللي عليها العين بيعت وانتهى الامر باقي شركات لا قيمة لها يعني لن تباع في كل الاحوال وكل ما الناس تسأل على شركة ممكن تجيب فلوس يرد الوزير دي خارج البرنامج؟؟؟؟؟؟؟؟؟


ثالثا على اقل تقدير سيمر العالم بركود اقتصادي شديد لمدة عامين على الاقل بمعنى ادق لا بيع ولا شرا الا في المضمون وزي ما انتو عارفين الاقتصاد المصري مش مضمون

رابعا طلبات الناس كترت يتلهو ازاي بسيطة تفتق ذهن العصابة عن هذا الحل اما اي حاجة تغلا الشعب اللي غلاها ما انتوا المالكين وانتوا المستفيدين وطبعا انتوا المضارين؟؟؟ يا ولاد الابالسة

كويس اللي فات دة مش مهم
اولا الدستور ينص على ان الملكية للشعب والحكومة تدير لحساب الشعب واخدين بالكو
ثانيا ما يسري على الجزء يسري علي الكل تعالوا نجيب من الاول من الاول خالص حصة في كل المال العام ولا يعتد بما تم قبل هذا التاريخ
حلوة دي

لا استثناء البترول زي القناة زي جبال الذهب المختفية ؟؟؟؟ زي شركةالحديد زي المصتع النووي لانتاج اربطة الجزم اسم اللة على مقامكم



والاهم تأميم كل ما يملكة كل من تولى منصب في مصر في اثلاثين عام الاخيرة هو وزوجتة واولادة واحفادة واقاربة حتى الدرجة المائة ولا يستثنى من هذا احد بدءا من مغتصب رئاسة الدولة وحنى اصغر موظف في السلم الاداري غلى ان تدخل هذة الاموال في الصكوك


اخر حاجة
ردا على سؤالك الخاص بمن هم خارج مصر ارجع بسرعة دول 500 جنية يا با قابلين للنقصان ولا تقبل الزيادة انتا مجنون تسيب الفرصة دي!!!!!!!!!!!!!!

مهندس مصري يقول...

جمعاوي روش طحن
==============
ليه يا بني هي جمعية ؟
كل اللي حتآخده صك واحد بس
و ابقى قابلني لو عرفت تكسب من وراه أي حاجة
:)

فشكول
======
لا من ناحية الدخل بتاع الدولة إطمئن
الدولة في آخر ميزانية لها كان اكتر من 75% من دخلها ضرايب و جمارك و رسوم
يعني أغلب دخل الدولة من الجباية مننا و ليس من ارباح القطاع العام
خصوصاً إن تحليل الضرايب أثبت إن 67% من الضرائب بيدفعها الفقراء و 33% فقط يدفعها الاغنياء بسبب تمتعهم بإعفاءات ضريبية و جمركية متعددة تشجيعاً للإستثمار

و هما باعوا فعلاً اكتر من 85% من القطاع العام يعني الكلام على الـ 15% اللي فاضلين منه بس

و الوزير قال في اللقاء إن ده ملوش علاقة بالدعم نهائياً
يبقى طبقاً لقاعدة خالف تعرف بتاعة الحكومة
:)
يبقى دي مقدمة لإلغاء الدعم نهائياً خلال 3 سنين على الأكثر

و الله اعلم آخرتها إيه

نهر الحب
=======
هو نصب مقترن بسفه رهيب و إهدار واسع للمال العام

هما لسه ما قرروش بس إصبري على رزقك كله جاي في السكة
:)

احمد الجيزاوي
============
على الأقل الأرض كانت بتاعة عواد
إنما المال العام مش ملكهم

كوشيا
======
الله أعلم
ربنا يستر

فاتيما
=======
و بعد ما يفتل له يا ام يوسف حيحصل ايه ؟

سومة مجنونة في بلد عاقل
======================
و توتة توتة توتة و لا تخلص الحدوتة و كل يوم جديد
و كل يوم في جانب افواه على أرانب و بياكلوا في الحديد
:)

طيب ما كلنا عايزين الصحة و الستر و راحة البال
و مش عايزين اكتر من كده من الدنيا

مين قال 1400 جنيه
مش قلنا بطلوا كروتة
الوزير قايل بضع مئات من الجنيهات
:)
و نقطني يا جدع

مولان
=====
رحتي و ما رجعتيش يعني
لعل المانع خير يا كيارا
مش كنتي تقولي من الأول يا بنتي
انا ضفت مدونتك الجديدة في الريدر خلاص

خمسة فضفضة
=========
هي فكرة مفزعة
بس هما لغاية دلوقت ما إتكلموش على النيل و البحر و الشوارع
الكلام كله على شركات القطاع العام
و مجلس الشعب بتاعنا طول عمره موافقون موافقة فما تحلميش
:(
ربنا يستر

قطرات المطر
==========
هو كل مواطن صك واحد بس
إحنا حننهب من أولها
:))

د / إبراهيم سماحة
=================
بالضبط كده

محاسن صابر
==========
بصي على ردي على فشكول
:)

جبهة التهييس الشعبية
=====================
في البورصة أي حد ممكن يشتري أي حاجة
دي هيصة يا بنتي و مولد كبير و إحنا ما نفهموش فيه حاجة
عايزين نعمل حملة ضد الصكوك دي و نبين للناس بلاويها و مساوئها

طفاطيفو
========
يا مصطفى ده حقك و مش مجاملة ليك
ربنا يكرمك يارب
ثم لخص يا سيدي تلخيص محايد و ما تقولش رأيك
:)

جنة
====
ههههههههههههه
مش لدرجة الهوا في قزايز
ما هم حيدوكي اسهم في شركات الحديد و الصلب و الأسمنت و شركات كويسة كتير

بس البورصة دي معضلة بجد و حاسس إنها لوغاريتم كبير قوي

طالب ثانوي
=============
هما حيوزعوها علينا ببلاش مش حيبيعوها لنا لإنها بتاعتنا اصلاً
بص على ردي على فشكول فوق

أحسن شاب في البلد
=================
هو فكر ابالسة فعلاً
ربنا يستر علينا

إنت بتجيب الكلام الدرر ده منين ؟

رونا
=====
آمييين

سنابل قمح
==========
شوفي ردي على فشكول و جبهة التهييس الشعبية
و ربنا يستر

مصري جداً
=========
الله ينور عليك
لا بالنسبة للصك ده حابقى آخده لما أنزل أجازة

الفاتح الجعفري يقول...

السلام عليكم بشمهندسنا الكبير
ربنا يستر ,والله البلد بقت كلها مفاجأت متعرفش ايه اللي هيحصل
وطالما فيها بيع وشراء يبقي اكيد احنا الخسرانين ,
المهم احدد سعر الصك بتاعي ولا اعمل مزاد علني
بص ان هشيله للاخر ومفيش حاجة مضمونه
المهم معاك 22,35 قرش وده السعر المبدئي بدون ضريبة هتشتري ولا نشوف حد تاني
:)
ربنا ييسر الامر ويحفظنا من كل شر
جزاكم الله خير

مهندس مصري يقول...

الفاتح الجعفري
==============
و عليكم السلام و رحمة الله و بركاته
لا معاييش بالمصري ينفع بالريال السعودي ؟
آميين يا جعفري يا بني :)
ثم المزاد ده تعمله لو العرض قليل و الطلب كتير لكن العكس هو اللي حيحصل و حتلاقي ناس كتير بتبيع صكوكها و قليلين بيشتروها فحتلاقي السعر ينزل في الأرض
ربنا يستر

Mahdi Mahdi يقول...

يلزمنى رايك فكن ناصحا ولا ملامة، فهدفى افهام المرضى والموتورين ممن يتطاول او يخادع بدس السم فى العسل تحت دعوى الدفاع عن الاسلام ، ان العين بالعين والسن بالسن والبادى اظلم ، وجنت على نفسها براكش

Ahmed Al-Sabbagh يقول...

انا عايز اخد حقى بيض
ينفع ؟

مهندس مصري يقول...

مهدي مهدي
==========
شفت مدونتك
معاك حق

أحمد الصباغ
===========
لا ما ينفعش

NIDAAL PAL يقول...

للاسف مش كتير هيفكر بأنه يستثمر تماشياًً مع المثل القائل " عصفور فى خير من 10 على الشجرة " و العشرة الى على الشجرة دول عند المصريين 10.000 عصفور
و أستغلال الحكومة لحالة الفقر الى فى البلد وما أعتقدش أن الحكومة لو ما كانتش واثقة من أن اكثر من 90 % هيبيعوا كانت هتقدم على حاجة زى دى
وبصراحة وحتى بعد الحلقة بتاعت العاشرة مساءً حاسس برده انى تايهه و الموضوع كبير أوى اوى
مش المفروض برده يبقى فيه كتالوج مجانى مع المشاريع الحكومية الى كل يوم بيقول عليها .
ولا الحكومة متبعة مبدأ أنك لو عايز الى قدامك مايفهمش حاجة و يحس أنك انت عارف كل حاجة كلمه بلغة غريبة و تقيلة و ماتتفهمش من أول مرة .

تحياتى على المجهود الكبير الواضح الى انت عامله فى البوست ده

مهندس مصري يقول...

نضال فلسطين
===========
يا بني ما هو انا كاتب الكلام الكتير ده كنوع من التوضيح و التبسيط و الشرح للموضوع الملعبك ده
ولو إن في نقط كتيرة مش واضحة و انا باتساءل عنها
اهم حاجة إنك شرفتني بتعليق يا راجل
دا انت ليك وحشة و غايب عن مدونتي بقالك فترة
ربنا يعينك و يوفقك

الراقـــص مع الذئـــــاب يقول...

السلام عليكم

ما انا قلتلك يا باااااشمهندس
انا مش عاوز افهم...الفهم في البلد ديه بيتعب اوي
خلينا مع الزحمة

الحكاية كلها بتتلخص في الاخر في كلمة واحدة بس بالنسبة للموضوع دا

((خازوق))

شكله ايه ولا لونه ايه مش هتفرق بقي


جزاك الله خيرا علي الشرح والإفادة

سلام

مهندس مصري يقول...

الراقص مع الذئاب
=================
و عليكم السلام
براحتك
عفواً
:)