السبت، نوفمبر 01، 2008

ايه البجاحة في الكذب بتاعة المحامية نجلاء دي

انا النت كان فاصل عندي لمدة يومين تقريباً
دلوقتي حلقة نهى في قناة الحياة قطعت الشك باليقين
و حطت جواز السفر بتاعها في عين الكل و اللي بيوضح انها لاجئة فلسطينية من اب فلسطيني و ام مصرية و من مواليد ليبيا
و طلعت المحامية كدابة
و محصلش اي حاجة في فرنسا اصلاً
و المحامية نجلاء دي ما قدرتش تنطق و لا ترد بكلمة قدامها لكن فالحة قوي في الكذب ببجاحة منقطعة النظير لما تكون لوحدها
أنا مكنتش متخيل إن في ناس ممكن تكذب بالصفاقة دي و نهى رشدي تبقى غلطانة لو ما سجنتش نجلاء دي هي و نبيه
لإن المفروض اتهام الناس و رميهم بالباطل ما يمرش بالساهل كده
و المفروض يدفعوا تمن إفتراءاتهم
و لا ايه ؟
ثم المحامية دي تبع المجلس القومي للمرأة
مش عارف ايه مصلحة الدولة في تحطيم اي امل عند الناس انهم ممكن يآخدوا حقهم بالقانون و لا لازم نرجع لقانون الغاب و كل واحد يآخد حقه بدراعه

هناك 18 تعليقًا:

صبرني يارب يقول...

اها بجاحه
عارف البجاحه دي نابعه من ايه ؟؟؟

لضياع السلطه الحقيقه

ما عادش فى كبير فى البلد كل واحد بيبجح على كيفه

واي كلب قاعد قدام ميكروفون دلوقتي فاكر نفسه انه حاطط ايده على روس الناس
وحضرتها المحاميه يعنى تبقى معده فى برنامج معتز
وحاولت تستفيد من ده انها تتشهر وتلم تبرعات للجمعيه الى هي بتراسها وتهلبها من خلال استغلال قضة نهى ونهى نفسها

البنت رفضت
وده طبعا خلى كرامتها نقحت عليها وازاي واحده من عامة الشعب ترفض لها طلب وهى بقت ايديها على روسنا عشان بتعد برنامج زفت معتز
تقول على واحد حلو نقول وراهاامين وتقول وحش نقول امين برضه

فحبت تربيها بقى وخلت الهبل وراها قالوا امين

عرفت ليه بقى كل حقير بقى عنده بجاحه وصفاقه وحاسس ان احنا تحت ايده ؟؟؟

kochia يقول...

انا سمعتها فعلا
كلام كدة مش مترتب مالوش راس من رجل
واهي بتتكلم وخلاص والظاهر عاوزة شهرة وتقف في الضوء ساعة التقاط الصورة وخلاص

وانا عاوزة اعرف هو التحرش مش تحرش وخلاص
ان شالله تكون البنت من كوكب الزهرة لكن تم التحرش بها عندنا في كوكب الارض وعلي ارض مصر
يبقي ليها حق عرب عندنا اكتر من لو كانت مصرية كمان
بغض النظر بقي عن مسالة اسرائيل وغير اسرائيل
مش دي القضية

بجد ناس غريبة
ربنا يشفي

ojg يقول...

:(
طيب الواحد يصدق مين دلوقت؟
كل حد بيمسك مايك بيقول حاجات
واحنا مش عارفين الحقيقة فين
أنا مش معترضه انها تكون حتى من بلاد تركب الأفيال
المهم ان الواقعه حصلت
تكدب ليه بقى المحامية؟
انا مابقتش فاهمه حاجه
ويقولك عصر السموات المفتوحه
لا ده عصر الإعلام المأجور

اسامه عبدالعال يقول...

البجاحه دي فى رايي ليها سببين
السبب الاول جنون الشهره للمحاميه
السبب التانى انها مزقوقه من حد لشغل الراي العام

احمد الجيزاوى يقول...

على فكرة عندك حق كبير ينفع يترفع على المحاميه دة دعوة سب ودعوة رمى باطل ودعوة تشويه سمعه

تحياتى ليك وبصراحه كان عجبنى اوى بوست الموقع وصور التى نشرته والحمد الله انا فضين اتفرج على ابدعاتك التدوينيه

تحياتى
احمد الجيزاوى

~*§¦§ Appy §¦§*~ يقول...

عرفت بقى ليه مكشوف عنى الحجاب يا هندسه اي خدمه مش قولت لك من البدايه

بت خيخة وأى كلام يقول...

متهيالى ان الموضوع كله مجرد السعى ورا الشهرة من جانب المحامية

هى محامية مغمورة
شافت انها لما تدافع عن نهى رشدى وبعد كدة تتدافع عن اللى اتحرش بنهى
هى كدة العين هتبقى عليها وهتتعرف

والله اعلم
سلام

اختك خيخة

الفاتح الجعفري يقول...

ياااااااااه يابشمهندس الناس دول بقوا كتير قوي
حسبنا الله ونعم الوكيل
صدقني حتي قانون الغاب لم يعد ينفع في هذه البلد
لنا الله ,
ربنا يرد الناس الي دينه ردا جميلا
وجزاكم الله كل خير

mony يقول...

ربنا خلاها هي اللي تفضح نفسها بنفسها

و الحمد لله الكل عرف انها كذابة من البرناميجين اللي عملتهم دول و اللي فضحوها



و حتي لو اسرائيلية ده مش دافع للتحرش


ربنا يشفي

و يسترها علينا جميعا

ابو اعصار يقول...

سبحان الله
الغباء تجسد في المحامية
لدرجة كلامها يضحك المعزة
واللي يسمعها
تحسسك مالكوم اكس بيتكلم
ولا ظابط مخابرات كشف عميل اسرائيلي
وهي بتزعق كانها بقت قضية امن قومي ده اسرائيليه
ولازم نعرف اللي بيدافع عنها
فعلا صعبت على الكل
وبصراحه لازم مجموعة تتحد وتؤدب المحاميه ده قانونيا

ونت عامل ايه الوقتي

كـــيــــــــارا يقول...

انا شفت الحلقه

بجد كنت هموت من الضحك
ونجلاء بتتخانق مع المذيع وبتلغوش علي سؤاله

ههههههههههههههه

فعلا لازم نهي ترفع قضيه

mahasen saber يقول...

انا مش متابعه الموضوع اصلا يا محمد بس قريت عنه عند مدونة اسامه عبد العال وكده تاكدت شويه من الموضوع يعنى ...
بس يمكن المحاميه كانت تقصد عمل فرقعه لنفسها واهى لو بتكذب اكيد هتفرقع على دماغها بس يمكن فعلا مقطع قلبهم ان حد ياخد حقه بالقانون فعلا شئ يحزن يا عينى ثغره وحصلت من غير ما ياخدوا بالهم فلازم يصلحوها ويطلعوها عميله ولاا مكانتش تستاهل البراءه والحياه من اصله
........

princess يقول...

انا مش شفت الحلقة
بس كنت قرات ان المحامية قالت كده فعلا
انا كنت مش عارفة الحقيقة فين
يمكن عشان متوقعتش ان المحامية تكون بالغباء ده وتكدب مش عارفة........
المهم ان نهى يا ريت تفضل على موقفها وتاخد حقها
واحنا فى كل حتة نحاول نساندها ونقف جمبها
تحياتى

محمد الجرايحى يقول...

أخى الفاضل
السلام عليكم ورحمة الله وبركاته
هذا التحول السريع والغامض فى موقف المحامية أكيد وراءه سبب ولكنه غير معلن
وأكيد فى أطراف تدخلت فى الأمر وهذا مانتمنى أن تظهره الأيام

تقبل تقديرى واحترامى
أخوك
محمد

مهندس مصري يقول...

توضيح في الأول كده قبل ما أرد على التعليقات
ياريت الناس تخش اللينكات اللي في الموضوع و تشوف الفيديوهات و التدوينات المرتبطة بيه قبل ما تعلق
بلاش كروتة :)


صبرني يارب
==========
و انتي عرفتي منين انها مُعدة في 90 دقيقة
جديدة دي
بس هي مفترية فعلاً

كوشيا
=====
لا ما هي كانت عايزة تطلعها كدابة
لكن دلوقتي إنفضحت المحامية و بان كذبها و مع كده مصممة على الإستمرار في الكذب بوقاحة

وزة
===
شوفي فيديو قناة الحياة من اللينك اللي انا حاطه و حتصدقي نهى و تدعي على نجلاء
:)

اسامة عبد العال
================
معاك حق
:)

احمد الجيزاوي
============
و ده اللي نهى قالته هي و محاميها
انهم ممكن يرفعوا عليها قضية سب و قذف بس مش عارف حيرفعوها فعلاً و لا لأ
بس نفسي يرفعوها علشان الناس اللي بتكدب ببجاحة دي تتلم

فضيت ؟
و العروسة سابتك فاضي كده
:)
ربنا يهنيك و يوفقك يا أحمد

آبي
====
ههههههههه
بس ياريت تقولي بعد كده بالراحة و من غير قلل
:)

بت خيخة و أي كلام
=================
ممكن برضه يا ام شريف
بس ليه مهتمين بيها قوي في التلفزيون الحكومي
و ليه تحسي إنها شبه مدعومة بشكل رسمي

؟؟!!!!!!!!

الفاتح الجعفري
==============
آميين
جزانا و إياكم يا أحمد :)

موني
=====
معاكي حق
آميين
يا يهديها يا يأخدها و يريح الناس من شرها

ابو اعصار
==========
الحمد لله
و انا بعت لك الرقم على الإيميل
و حانزل مصر إن شاء الله في مايو الجاي

كيارا
======
هههههههههههه
لكن بتبقى عاملة نفسها أسد لما تكون لوحدها
دا غير إنها غلطت في كلامها كذا غلطة قانونية و نهى علشان خريجة حقوق صلحت لها غلطها
دي جاهلة بمهنتها أصلاً
محامية لا تعرف القانون
و بتسترزق من ورا جمعيتها اللي عاملها سبوبة دي
شخصية غريبة

محاسن صابر
==========
ازيك انتي الاول و ازي مامتك و صحتها عاملة ايه ؟
شوفي الفيديوهات اللي في اللينك الاولاني
و تابعي كل المكتوب في مدونة احمد الصباغ
و شوفي اللينك التاني اللي حاطة لمدونة جبهة التهييس الشعبية و بعدها حتعرفي التفاصيل كلها

أميرة
=====
شوفي الحلقة فيديو من اللينك الاول
و بصي على اللينك التاني
:)
و المفروض نهى تأدبهم على كذبهم الفاجر ده

محمد الجرايحي
===========
و عليكم السلام و رحمة الله و بركاته
:)
واضح انها اطراف رسمية و الا ما كانش التلفزيون الرسمي هلل للمحامية دي قوي كده
عموماً شوف حضرتك الفيديو في اللينك الاول

سبهللة يقول...

دول ناس بتحث عن الشهرة
عشان لما يجيى لهم موكلين فى مكاتبهم يقولوا لهم مش انتوا اللى بتطلعوا فى التلافزيون؟؟؟؟؟
والاتعاب تعلى واهى سبوبة
لكن كله كوم والجحش دة كوم تانى
اسم على مسمى

بنوتة مصرية يقول...

هاى محمد ازيك
على فكرة انا سمعت كلام
ان المستندات كلها مع مصطفى بكرى
ودة من لسان نجلاء نفسها
ولو كدة اكيد مصطفى هيعمل حاجة فى جريدة الاسبوع وهيبان كل شىء
انا شفت برنامج 90 دقيقة لما اتكلمت مع ريهام واكدت ان نهى اسرائيلية
وكمان شفت حواراها مع شريف على الحياة
وحاولت ماتقولش اى تصريح
بس اكيد فى لغز والموضوع مش هيسكت على كدة
وعلى فكرة لو نجلاء غاوية جنون الشهرة والبروبجنداماكنتش هتتكلم لان الكلام دة خطر جدا عليها وكمان ممكن يكون فية حبس
ومظنش انها للدرجة دى من السذاجة

مهندس مصري يقول...

سبهللة
=======
ممكن برضه

بنوتة مصرية
===========
الحمد لله

لا نجلاء دي على درجة عالية من البجاحة و مسنودة من حد احنا مش عارفينه لغاية دلوقت
لإن ما ينفعش نهى يكون معاها باسبور لجوء فلسطيني و شفناه بعينينا كلنا و يقولوا بعدها إسرائيلية
ما ينفعش قانوناً حسب القانون الإسرائيلي نفسه
نهى اثبتت كلامها بمستندات لا شك فيها
بينما نجلاء و نبيه ما أخدناش منهم غير الجعجعة الفارغة