الخميس، نوفمبر 06، 2008

الرئيسين مبارك و اوباما

انا كنت نشرت الفيديو ده قبل كده


لكن حاسس إنه لا زم يتنشر تاني
بجملة الزفة و المولد بتاع الحزب الوطني و الزيارة اللي ممكن يزورها لنا
و اللي بيقولوا إن الشعب بيكره الريس يشوفوا مطرب الشعب الأول بيقول له إيه
لا و لا الكلمة اللي في الآخر اللي إتعمل في مصر ما إتعملش من ايام محمد علي ناقص ايه تاني يتعمل فينا
مع ملاحظة إن الرئيس مبارك هو صاحب المركز التالت من حيث طول مدة الحكم في تاريخ مصر بعد كل من رمسيس التاني في المركز الأول و محمد علي في المركز التاني
و بعدها الاقي اللي فرحان قوي بأوباما و عمال يتنطط من الفرحة
يا جماعة ده راح عيط قدام حائط البراق ( اللي هما مغتصبينه و مسمينه المبكى ) و قال امن اسرائيل مقدس و هي حليفنا الإستراتيجي و قال حينسحب من العراق علشان يركز في ضرب أفغانستان و باكستان و قال لو الجيش الباكستاني مش عارف يقضي على الإرهاب إحنا حنخش عندهم و نقضي عليه و نجيب أسامة بن لادن من قفاه حتى لو جبنا باكستان عاليها واطيها
و حيتفاوض مع سوريا و إيران علشان ينفذوا اللي امريكا عايزاه بالأدب لكن لو الأدب مانفعش هو ساعتها قال إنه حيكون مضطر لإستخدام القوة ضدهم
يعني الراجل مش هو المنقذ و لا حاجة
سيبنا منه و خلينا مع ريسنا أحنا
و إيييييييييييييييييييييييييييييييييييييييييييييييييييييييييييييييييييه

هناك 24 تعليقًا:

اسامه عبدالعال يقول...

وايييييييييييييييييييييييييييه

mido يقول...

يا عمى دماغك !!
-------------

قولى

انت حترجع مصر امتى؟

حتفضل شغال برا وتكون نفسك وترجع؟

ولا انت بتفكر ازاى؟

دكتور حر يقول...

فعلا


هييييييييييييييييييييييييييه



*******
شد حيلك يا باشمهندس

بسمة ولكن.. يقول...

ههههههههههههه
الاغنية دى بتضحك اوىىىى
.
.
تفتكر يا بشمهندس مصر مين اللى هيصلحها
اذا كان مفيش حد بيقوم يفتح الباب لما الجرس يرن
عشان كل الناس مسافرين
.
.
ترجع لنا بالسلامة

Gannah يقول...

كلامك صح امريكا دولة تحكمها استراتيجيات واضحة وليست دولة تتغير سياستها بتغير الاشخاص
وحماية اسرائيل واحدة من اولويات امريكا
لان امريكا فى النهاية محكومة بسياسات اللوبى الصهيونى
يعنى اوباما ماكين ولا فارقة
خلينا فى خيبتنا
تحياتى

عالم حبيب يقول...

ممكن كده الريس يعين شعبان عبد الرحيم المتحدث الرسمي له او المستشار السياسي لفخامته


لا و لا الكلمة اللي في الآخر اللي إتعمل في مصر ما إتعملش من ايام محمد علي ناقص ايه تاني يتعمل فينا

انا موافق جدا على الجملة دي .. لأن فعلا اللي اتعمل فينا دلوقتي ما اتعملش في أي عصررررررررر

šσяšαяαα يقول...

هع هع هع

بجد بجد بجد بعنى انا عصرت على نفسى جميع انواع الموالح مش اللمون بس

لان هذا المدعو بنى ادم بيستفزنى بشكل فظييييييع

وعلى راى واحد كاتب تعليق فى اليوتيوب
"جاهل وبينافق كمان"

وقال ايه لما سألوه فحيلهم بينهم
انت ليه متقوقع
قاله معرفش الكلمة انا اللى اعرفه انى متكوكع من الكوكعة اللى بتعيش فى المية
:)))))))

وتحيا مصر متخونقة مستقرة على الحافة
اللى هى حافة الهاوية

ويجعله عامر

šσяšαяαα يقول...

يوووووووه شفت نسيت اكتب عن المعلم اوباما

احب اقول لكل شاب وكل فتاه
اللى فات مغيم
واللى جاى عاصف
والمستقبل
.
.
.



معاكو ومعانا ربنا

أحمد سعيد بسيوني يقول...

فليذهبوا الى الجحيم

EmY يقول...

اخترناك و بايعناك و احنا معاك لما شاء الله اخترناك اخترناك
احنا معاه من زمان اوي بس مش مهم مكمليش المشوار شعب حمال قاسيه احنا و صبوووور

تحياتي يا محمد

حاجات جوايا يقول...

ههههههههههههههه
الاغنية دى بجد كوميدية جدااااااااا
دى المفروض تنضم لقائمة funny clip بس فى القسم الدرامى . " الكوميديا السوداء "

أما أوباما .. فربنا يستر

دمت بخير أخى
سالى

mostafa rayan يقول...

ايوة يا صاحبي بس اسمحلي هو شعبان دة حد يتاخد على كلامه ولا هو مطرب الشعب الأول ولا مطرب من اساسه ولا اصلا فاهم يعني ايه دستور وتعديل مواد دستورية دة مكوجي زاط مع الزيطة وربنا فتحها عليها من شارع الهرم حبة ومن الكاسيت حبه ومن الأفراح والبرامج حبة
وكما يقول القائل : مالك الملوك إذا وهب لا تسألن عن السبب
- اما بخصوص اوباما انا معاك هما الأتنين ألعن من بعض ومافيش اي حد عاقل يتوقع اي خير من الغرب نو العرب
- تحياتي لك ودمت بخير

جمعاوي صاحب "عيادة أسنان" يقول...

السلام عليكم يا بشمهندس

والله ربنا يكرمك على مشاعرك العالية دى وغيرتك الكبيرة على واقع بلدنا

وبص والله الانتخابات الامريكية اثارت بداخلما شجوم عظيمة
لابنا يفك كربة بلدنا بايدينا ويرينا الخير لبلادنا

دمت لنا بخير ويلا سلام

أحسن شاب في البلد يقول...

احنا سكتنالكم كتير ... بس آن الآوان لوقفة

عمالين تغلطوا في الحكومة و الريس و انا ساكت

بس انا مش هاسمح لحد يغلط في حبيب قلبي شعبان :) :) :) :) :)

شعبان يا جدعان رمز من رموز العصر ... عصر البخاخة ... كلنا حاليا عايشين في البخاخة

و اللي مش فاهم يعني ايه ( البخاخة ) يبقى يسألني

انا ماليش انتماءات سياسية ... بس اول ما اشوف الكليب ده .. جسمي كله بيقشعر

خصوصا في الحتة اللي بيقول فيها
( بتطور في المواد - الدستور يعني - عشان صالح البلاد ... و بتسعى في السلام ... و تحافظ ع الولاد ... و اييييييييييييه )

Hosam Yahia حسام يحى يقول...

:d
خسنى مبارك الاطول مده بعد 3


رمسيس الاول ورمسيس الخامس

ورمسيس العاشر ومبارك بقا هيبقا اسمه رمسيس السابع والعشرين

:d

م/ الحسيني لزومي يقول...

خالص شكري وامتناني لمشاركتك في الحملة الشعبية للقيد بالجداول الانتخابية

رابطة هويتي اسلامية يقول...

ندعوكم للمشاركة معنا في رابطة " هويتي إسلامية "

لا تكن بخيلا وشارك معنا لنهضة التدوين

كون معنا أول شبكة تواصل في عالم التدوين

كلنا نتفق في الغاية نختلف في الأسلوب

هيا.................. كن أول المشاركين

رابطة هويتي إسلامية

كـــيــــــــارا يقول...

ايه بس ما الراجل بيقول هيتفاهم اهو

ياوحشين مش مديناله فرصه ههههههههههه

ااااااااااااااااه هم يبكي وهم يضحك

بنوتة مصرية يقول...

بجد نعم الاختيار
دة شعبولا ثروة قومية واذا ذاكرت مصر ذكر شعبان عبد الرحيم

واييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييية

صبرني يارب يقول...

قولهم يمكن يفهموا ويبطلوا يسقفوا فى الزفه وبس

dalia يقول...

اعرف صحفية المانية تعيش في مصر وقالت لي انها مستغربه أوى أن المصريين عايزين اوباما يكسب - ده قبل النتيجة- لانه قال بشكل صريح انه مش مسلم وليه صورة امام حائط المبكى وسألتني ليه انتوا عايزين اوباما واستغربت اننا بنحكم على الشخص بلونه أو لمجرد انه افريقى طبعا لم اشأ ان اقول لها ان احنا شعب عاطفي جدا

أنونيمس يقول...

أيه يامحمد؟؟ رمسيس مين ومحمد على مين

دا الراجل ده ولا الهرم الأكبر

وبعدين ده مش عجوز زيهم ده لسه صغير حتى بص على شعره .. تلاقيه فاحم السواد

وأيييييييييييييييييييييه

سيدي لي لي لي

عـــــــــــــــــــدنا
:))

مهندس مصري يقول...

اسامة عبد العال
================
مش كده برضه
:)

ميدو
=====
هههههههههه
بص في البوست ده و انت تعرف الرد
http://egyptioneng.blogspot.com/2008/03/blog-post_13.html
و البوست ده
http://egyptioneng.blogspot.com/2008/04/blog-post_20.html

دكتور حر
=========
الشدة على الله
:)

بسمة و لكن
===========
راجعي ردي على ميدو
الله يسلمك

جنة
====
و اول القصيدة كفر
اهو اول واحد عينه من الطاقم بتاعه طلع يهودي امريكي يحمل الجنسية الإسرائيلية و تطوع للخدمة في الجيش الإسرائيلي اثناء حرب الخليج
و هو من اشد انصار اسرائيل في الكونجرس
ولذلك كله قام أوباما بتعيينه كبير موظفي البيت الأبيض
و الكتاب بيبان من عنوانه
:)

عالم حبيب
=========
فعلاً
:)

صرصارة
=======
عامر بيكي يا أختي
هههههههههه هو عاصف بعقل
اول تعييناته عين واحد اسرائيلي

احمد سعيد بسيوني
================
آميين

إيمي
====
آخيراً افتكرتينا
:)
حمداً لله على السلامة
و ما تبقيش تقطعي الزيارات

حاجات جوايا
============
:)
كوميدية فعلاً
شكراً على تعليقك هنا للمرة الأولى

مصطفى ريان
===========
يعني متفقين
:)

جمعاوي بتاع السنان
==================
و عليكم السلام و رحمة الله و بركاته
الله يخليك
آميين
شكراً و سلام
:)

احسن شاب في البلد
================
و اييييييييييييييييييييييييه
:)

حسام يحيى
=========
لا بجد هو اطول تالت مدة حكم لحاكم في تاريخ مصر
ثم رمسيس و محمد علي حققوا انجازات عظيمة
انما احنا دلوقتي راجعين لورا زي ما الكل شايف

كيارا
======
راجعي ردي على جنة
:)

بنوتة مصرية
============
مش كده برضه
:)
طيب و إيه رأيك في اوباما؟

صبرني يارب
==========
ياريت

داليا
======
المشكلة ان احمد هو الحاج احمد
لو حلو فهو حلو لأمريكا و لو وحش فهو وحش لأمريكا برضه
إنما الاتنين وحشين بالنسبة لنا
بس هي نسبة الوحاشة اللي حتختلف من واحد للتاني
:)
بس الإتنين ضد العرب و المسلمين

انونيمس
========
مبروك علينا عودتك لينا يا دكتور
و بالنسبة لحسني فهو من عجايب الدنيا
بس ما قلتليش سمعت الاغنية و لا لأ و ماذا تقول في اوباما ؟ ما نظريتك عنه ؟
:)

محمد الجرايحى يقول...

حاجة تحزن فعلاً .....
هو نفق طويييييييييييييل لكن اكيد لابد من أن تظهر طاقة نور تدل على وصولنا للنهاية....