الاثنين، نوفمبر 10، 2008

شعبان عبد الرحيم يغني لأوباما

إستكمالاً للبوست اللي فات :)
شعبان زي ما غنى قبل كده لمبارك و لبوش و لغيرهم سواء مدحاً او قدحاً فالمرة دي حيغني لأوباما
شوفوا اصل الخبر هنا
و آدي كلمات الأغنية
:)

أنا شايف الإبتسامة والفرحة ع الوشوش
اياك بارك اوباما ما يكونش زي بوش

مين يعرف ولا يعلم في ايه جوه النفوس
بلاش من بدري نحلم لا يكون الحلم كابوس

خلينا زي ما احنا ما الهم خدنا عليه
راح بوش وجه اوباما ايه يعني هيحصل ايه

لسه فلسطين محتله والحرب في العراق
والناس عايشه في مذلة وعداء يجيب عداء

مهما هيعمل اوباما ويلف شمال ويمين
لا يرجع الحريري ولا حتي الشيخ ياسين

عرفات مش جاى تانى اللى عاش ايام سواد
ومات والكل عارف بحركات من الموساد

يا عربى الف سلامة يا عربى يا عينى عليك
قاعد مستنى اوباما علشان ياخد بأيديك

ولا بوش ولا اوباما هيفكروا ابدا فيك
يا عربى مفيش غير ايدك هى اللى راح تحميك

بوش يخرب بيت سنينه باعنا وضيعنا سنين
وأوباما الناس فاكرينه هيكون صلاح الدين

ما هو بوش ابن المجنونة شعللها في كل مكان
افغان وعراق وغزة واخرها سوريا كمان

هيعمل ايه اوباما في مصايب بوش وابوه
ما سابوش مكان في العالم الا ما خربوه

مجاعات وأزمة مالية وخراب ودمار وحروب
اهو غار ابن المؤذية وسايبها لنا ع الطوب



هناك 15 تعليقًا:

صبرني يارب يقول...

طيب ما الراجل بيتكلم كلام حلو اهو يعنى بس تظلموه انتم كده

خمسة فضفضة يقول...

السلام عليكم ورحمة الله وبركاته


وأييييييييييييييييييييه

مين اللي كاتب كلمات الاغنيه دي ؟؟

لا بجد بغض النظر عن ركاكة الاسلوب بس الكاتب واحد ابن لذينا عرف يوصف اللي حاصل بالظبط
وكمان شعبان بيعرف كويس يستغل كل الاحداث اللي حاصله عشان يزود فشعبيته

وادينا قاعدين مستنيين ايه اللي حايحصل بكره ربنا يستر



سلام

kochia يقول...

والله انا شايفة انه في المرحلة الاخيرة الاغاني رغم انها ساعات بتبقي شعبية اوي لكن معبرة اوي عن اللي جوة ناس كتير

الاغنية عجبتني
وعلي فكرة كتير قبلها عجبني زي اغنية القطر واغنية رغيف العيش وحاجت يعني سمعتها بالصدفة

بس بصراحة عجبتني

mahasen saber يقول...

ايه الترحيب الغنائى باوما ده ومن مين شعبولا بحاله
ده احنا هناخد على دماغنا من باراك ده بشكل

ده يكفى اول مؤتمراته الصحفيه ولاا ذكر اسم العراق لا منقريب ولا من بعيد
وطبعا نبقى نقابل بعض كلنا كده لو امريكا سحبت قواتها من العراق

استعدوا للتوغل الامريكى والغزو الكاوبوىى
وشعبولا استعد باغنيه تهاجمفيها البعده

mido يقول...

باش مهندس محمد

ابعتلى كود البانر الخاص بالبطاقة الانتخابيةفى ملف على ميل

princess يقول...

بصراحة انا من ضمن الناس المتفائلة با اوباما بس يارب يكون احساسى فى محله ويارب لو طلع كويس ميتصفاش ويغتال
تحياتى

مهندس مصري يقول...

صبرني يارب
==========
طيب ما هو الكلام حلو بس المغني مش فاهم منه و لا كلمة

خمسة فضفضة
==========
و عليكم السلام و رحمة الله و بركاته

لا دا انا لازم انبه كل بوست بقى لعدم الكروتة و ضرورة فتح اللينكات اللي في كل بوست
:)
و لا أكتب تنبيه في السايد بار
:)
اللي كاتب الكلام ده طبقاً للخبر الأصلي في موقع العربية في اللينك
هو الشاعر إسلام خليل و هو مؤلف معظم أغاني شعبولا
:)

كوشيا
======
ما هو علطول شعبان بيقول درر
بس المشكلة إنه هو مش فاهم هو بيقول ايه

محاسن صابر
==========
ما هي الأغنية بتقول ما تفرحوش بأوباما ما أسخم من بوش الا اوباما و الله اعلم

ميدو
=====
ده مش كود دي مجرد صورة خدها
:)

أميرة
=====
لا ماتتفأليش و لا تتشائمي
يا خبر بفلوس بكره يبقى ببلاش و لو انه اول القصيدة كفر
عين كبير موظفي البيت الأبيض عنده سيناتور يهودي امريكي يحمل الجنسية الإسرائيلية و خدم من قبل في الجيش الإسرائيلي

رابطة هويتي اسلامية يقول...

اخي مهندس مصري هذه الدعوه لا نلقيها كعابر سبيل انما نعلم ان هذه مدونة مهندس مصري فنتمني منك الرد اما بالقبول او الرفض نتمني الاهتمام بالامر

هويتي

سبهللة يقول...

بصرف النظر عن اى حاجة
الا ان كلمات الاغنية حلوة

MATRIX يقول...

يا جماعة .ز
امريكا سياستها واحدة وموش حتتغير ..
وكلنا حنشوف دا ..

وبعدين اوباما راجل مية مية ..والناس فرحانة بيه لانه اسمر :)

على فكرة انا فرحان بيه لانه اسمر ذيى بالظبط .. :)

حاجات جوايا يقول...

هههههههههههههههه
خذوا الحكمة يا مدونين ... من شعبان عبد الرحيم .. ده كلامه موزون و سليم

احترامى
سالى

جمعاوى روش طحن يقول...

مستنين الكليب

(:

كـــيــــــــارا يقول...

الكلام حلو بس الجدع اللي يسمعها دي محتاجه قاري الشفرات :)

Gannah يقول...

تصدق دا كلام الأغنية رغم بساطته صح جدااا
يعنى الكاتب فاهم اللى بيحصل
فعلا احنا قاعدين منتظرين اوباما وكأنه السوبر مان اللى هيحل كل مشاكل العالم
مع ان البداية زى ما انت قلت مش مبشرة ابدا
يالا لو كان لينا عمر ادينا هنشوف
تحياتى

مهندس مصري يقول...

رابطة هويتي إسلامية
==================
انا رديت عندكم
و حأكرر اللي قلته في بوست سابق عندي قبل كده


الواحد معندوش مشكلة في الإلتزام بمجموعة مبادئ عامة بدون تشكيل لجان و هياكل تنظيمية مقيدة للحرية
زي السنة اللي فاتت كان في حملة من اجل تدوين نظيف و بدون بذاءات و في مدونات إلتزمت بيها و قابلتها كرد عليها حملة مدونات ترحب بالبذاءات و برضه مدونات تانية إلتزمت بما تعتقده حق من حقوقها و يدخل في ضمن حريتها
و الواحد ليه مطلق الحرية يدخل المدونة اللي تعجبه و يكتب اللي يعجبه ما دام مقتنع بيه
و مفيش حد بيضرب حد على إيده علشان يقرأ مدونته
:)

سبهللة
=======
أكيد
:)

ماتريكس
========
لا ما تفرحش يا عالم بكره الراجل ده حيورينا ايه ؟

حاجات جوايا
============
فعلاً
:)

جمعاوي روش طحن
==============
و انا مستني معاك
:)

كيارا
======
ليه بس قارئ شفرات
دا كلامها من كتر بساطته بيقولوا عليه ركيك
:)

جنة
====
و ربنا يستر علينا من اللي حنشوفه
:)