السبت، نوفمبر 15، 2008

بنجيب مياه الشرب هنا إزاي

فين ايام مصر ايام ما كان الواحد بيفتح الحنفية و يشرب منها و يملأ منها مياه الشرب علطول
هنا المياه بنشتريها من محلات البقالة في جراكن كبيرة و بعد ما تخلص بنملأها من محطات مياه بخرطوم فيه مسدس شبه بتاع محطة البنزين بالضبط و نفضل نملأ فيها كل ما تخلص لإن مياه الحنفية لا تستخدم في الشرب و لا الطبيخ و بتستخدم في الإستخدامات التانية
لا و كل ما المياه بتاعة الشرب ما تخلص لازم تروح تملأ المياه و لولا إن في عربية مع واحد زميلي كان زمان الواحد شال الجراكن التقيلة دي و مشى بيها مسافة طويلة
:)
شوفوا الصور و قارنوا بين هنا و مصر

هناك 12 تعليقًا:

أحمد سعيد بسيوني يقول...

ربنا معاكم في الغربة

انا كنت في اليمن برضه وكنا بنشتري الميه

الجركن عشرة ليتر بعشرين ريال اي ما يقرب جنيه مصري

الله المستعان

خمسة فضفضة يقول...

السلام عليكم ورحمة الله وبركاته

اوحش حاجه في السعوديه هي ان مية الحنفيات غير صالحه للشرب

عمتي كانت في جده كانوا بيجيبوا ميتهم بالاسبوع من زمزم

اما الاماكن البعيده عن مكه زي الرياض مثلا فاطبعا بيشتروا مية صحه او جراكن زي دي كده من السوبر ماركت

بيني بينك مية مصر اللي في الحنفيات بقت زي الزفت هي كمان وماعدتش تنفع تتشرب


ربنا معاكوا ومعانا

سلام

mahasen saber يقول...

محمد شوف ربنا انعم علينا طبعا بنهر النيل ودى نعمه عظيمه محدش عارف قيمتها غير الدول المحرومه منه
انما شوف احنا بنعامله ازاى
فاعتقد ومتأكده ان المايه ام جراكن دى انضف من اليى بنشربها دلوقت

المهم بقه انتا عامل ايه غيبة انا مده طويله بس رجعت اهه ويا رب ما تحصل حاجه وحشه تانى ولاا اغيب ابدا
وانتا اخبارك ايه
انا بقيت قلقانه على اى مصرى بالسعوديه
ربنا يستر طريقكم كلكم ويبعد عنكم شياطين الانس وغوغاء البشر

kochia يقول...

الله
امال مية الحنفية دي لزمتها ايه
بيمسحوا بيها الارض بس ؟؟
الله يكون بالعون
انا فعلا اسمع كدة واعرف ان ناس كتير الكلي بتتعب منها لما بتسافر هناك

الله المستعان ان شاء الله

مولان يقول...

ياااااااربي

ربنا معاك فعلا بجد عذاب

احنا في مصر في نعمه وكتير مش حاسسها للاسف

جعلوني مريض نفسيا يقول...

ربنا يصبرك انت وكل الناس هناك

وعلي العموم ميه الحنفيه الي في مصر اصبحت كلها امراض

المهم انت بتمون ميه ثمانين ولا تسعين

اسامه عبدالعال يقول...

فكرتنى بالذي مضي
ربنا معاك :)

بت خيخة وأى كلام يقول...

طب وبعد كدة بتدفعوا فلوس لما تملوا الجراكن دى تانى ولا بعد كدة المية بتكون مجانا؟

(أم البنين) يقول...

سبحان الله...رغم ما قولون عن ماء بلدنا الحبيبة ألا أننني أحب طعم ماء النيل وألاحظ فور وصولي هنا الفارق في المذاق
اللهم بارك لنا ف مصرنا
((هناك شركات تنقل الماء في زجاجات مثل التي في الصورة تعبأ آليا وتغلف...هي موجودة هنا بالكويت لا أدري هل هي عندكم أم لا)
كان الله في عونكم أخي الفاضل

مهندس مصري يقول...

احمد سعيد بسيوني
================
آميين
كلنا في الهوا سوا

خمسة فضفضة
==========
و عليكم السلام و رحمة الله و بركاته
يعني هي مية الحنفيات في مصر هي اللي صالحة للشرب
دا انا عامل دبلومة دراسات عليا من هندسة إسكندرية في الهندسة الصحية ( مياه شرب و صرف صحي ) و من خبرتي العملية في الشغل بتاع المياه و دراستي الأكاديمية أقدر اقولك إنها مش فارقة كتير بين مية الحنفية هنا و في مصر

محاسن صابر
==========
أكيد طبعاً لإنها مياه صحية و متنقية مضبوط فأنضف بكتير

أنا الحمد لله بخير و حجزت للحج و ربنا يسهل و يقويني عليه

كوشيا
=====
و بيغسلوا بيها العربيات و الأطباق و الهدوم و الإستحمام
حاجات كتير بس المهم ما تبلعيهاش
:)

مولان
=====
ما هو محدش بيحس بالنعمة غير لما يفقدها
قليل قوي اللي بيقدروا النعمة و هيا موجودة
سعيد بأول زيارة ليكي لمدونتي

جعلوني مريضاً نفسياً
===================
بأمون مياه 100 100 :)

أسامة عبد العال
================
و ياما لسه حأفكرك
آميين
:)

بت خيخة و أي كلام
=================
الجركن بـ 6 ريال من السوبر ماركت
و ملؤه تاني من محل المياه بـ 1 ريال

فبتشتري الجركن مرة في الأول بس و بعدها بتشتغلي ملو علطول
:)
هو في حاجة ببلاش في الدنيا دي أبداً

أم البنين
=========
آميين
موجودة و بتتباع في محلات البقالة و السوبر ماركت بس الملؤ ارخص بكتير

امير بن عبدالله يقول...

السلام عليكم
واضح من اليافطة انك في حي مدينة حائل علي ما اظن
نصيحتي لك لا تقم بشرب الماء المعبأ
عن طريق المضخات
فا منطقة الوسيطاء و الجزء الشرقي من طريق سعد بن أبي وقاص
بها مستنقعات نظرا لتجمع ماء المطر وسوء الصرف الصحي

ما تستخسرش في نفسك وبدل الزجاجة ب 6 او 7ريال
بدل ما يجيلك فشل كلوي لا قدر الله
اما عن مصر فحدث ولا حرج
ماء بالصرف الصحي
بس كثرة ضخ الكلور في الماء لاخفاء اي اثر
يؤدي الي امراض اشد سؤا من الماء بالصرف

انت بس حظك رحت منطقة صعبة جدا
حاجة زي النجوع والكفور في مصر

FreeKiller يقول...

باشمهندس
هو حضرتك ف حااااااااااااااااااااااااااااااااايل!!!!!!!!!!!!!!!!!
مكنتش اعرف
يااااااااااااااااااه
حايل دي وحشتني جدا جدا جدا جدا
بلد جميلة بكل ما في الكلمة من معنى
صدقني
و بتشتكي فيها من الغربة
غربة ايه بس و الله حرام عليك
دي مفيش فيها اكتر من المصريين
عموما انا خبرة ف حائل
عشت فيها 16 سنة
اي خدمة انا موجوده بجد

سلااااااااااااااااام و ابقى سلم لي على حايل اول ما حضرتك ترجع بالسلامة من الحج
اه بالحق
يا ترى حضرتك طلعت مع حملة ايه؟؟